Саудия Арабистони ташқи ишлар вазири Фейсал бин Фархон ал Сауд Украина билан дипломатик алоқалар ўрнатилган 1993 йилдан бери илк маротаба Киевга келди ва президент Зеленский билан музокаралар ўтказди. Бу ҳақда Владимир Зеленский телеграм каналида маълум қилди.
“Украинада тинчлик ўрнатилишини, бизнинг суверенитетимиз ва ҳудудий яҳлитлигимизни қўллаётганингиз учун ташаккур”, деди Зеленский.
Музокарадан сўнг ўтган матбуот анжуманида вазир Саудия Украинага 410 миллион доллар миқдорида ёрдам кўрсатишини маълум қилди.
“Қироллик украиналикларнинг ғам-андуҳларини камайтириш учун барча имкониятларни ишга солмоқда”, деди вазир. Унга кўра Саудия Украинадаги урушни тинч йўл билан тўхтатиш йўналишидаги ҳаракатларни қўллайди.
Бундан ташқари Саудия Украина билан нефть ва нефть маҳсулотлари етказиб бериш бўйича меморандумни имзолади.
Аввалроқ валиаҳд шаҳзода Муҳаммад бин Салмон ал Сауд Россия ва Украина ўртасида ўтказилиши мумкин бўлган тинчлик музокараларида воситачи бўлишга тайёрлигини билдирган эди.
Саудия ўтган йилнинг сентябрида Россия ва Украина ўртасида асирлар алмашинувига воситачилик қилган. Ўшанда Ар Риёдга Украина томонида жанг қилган ва Россия асирга олган бир неча хорижлик келтирилган эди.
Саудия ташқи ишлар вазири сўнгги 30 йилда илк бор Киевга келди
Украина президенти Зеленский Саудия ташқи ишлар вазири Фейсал бин Фархон ал Сауд билан.