Тошкентга ташриф қилган Татаристон раҳбари Рустам Минниханов 24 апрель куни Жиззахда кимё-саноат технопарки қурилиши стартида иштирок этди. Бу ҳақда президент матбуот хизмати хабар берди.
Расман билдирилишича, президент Шавкат Мирзиёев 24 апрель куни Татаристон республикаси раиси Рустам Миннихановни қабул қилди.
Учрашувда устувор инвестиция лойиҳаларини амалга ошириш ва маданий-гуманитар алмашинувларни янада кенгайтириш масалалари кўриб чиқилди.
Хабарда таъкидланишича, ўтган йили Татаристон билан ҳамкорликда Тошкент вилоятида “Чирчиқ” кимё-индустриал технопарки очилган эди. Бугунги кунда мазкур ҳудуда 20 та сармоявий лойиҳа амалга оширилмоқда. Ишлаб чиқарилган маҳсулот эса Қозоғистон ва Тожикистонга экспорт қилинмоқда.
“Россия делегациясининг мазкур ташрифи давомида янги лойиҳага – Жиззах вилоятида технопарк барпо этишга старт берилди”, дейилади хабарда.
Россия Украинага бостириб кирганидан сўнг Ғарб давлатлари санкциялари остида қолди. Бунинг ортидан, расмий статистика рақамларига ишонилса, сўнгги пайтларда Ўзбекистонда Россия иштирокидаги корхоналар сони кўпайган. Масалан, 2023 йилнинг январь-март ойларида Ўзбекистонда Россия капитали иштирокида 243 та корхона ташкил этилган. Айни пайтда Хитой билан 118 та, Туркия билан 67 та корхона очилган.
Бундан ташқари сўнгги уч ой ичида Россия Ўзбекистон экспортида биринчи ўринни эгаллади. Жорий йил биринчи чорагида Ўзбекистондан Россияга 736,2 миллион долларлик, Туркияга 336,4 миллион долларлик, Хитойга 334,1 миллион долларлик маҳсулот экспорт қилинган.
Европа Иттифоқи сўнгги бир йилда Марказий Осиё давлатларидан Россияга экспортнинг 300 фоизга кўпайганидан ташқиш билдирган эди. Европа Иттифоқи фикрича, Россияга экспортнинг кескин кўпайиши Марказий Осиё давлатларининг Москвага санкцияларни четлаб ўтишга кўмаклашаётган билан боғлиқ бўлиши эҳтимол.
Татаристон раҳбари Тошкентга келди. Жиззахда қўшма технопарк қурилишига старт берилди
Президент Шавкат Мирзиёев 24 апрель куни Татаристон республикаси раиси Рустам Миннихановни қабул қилди.