The Insider нашри ўз мақолаларини уларнинг “хорижий агент” функцияларини бажарувчи оммавий ахборот воситаси томонидан тайёрлангани ҳақида махсус эслатма билан эълон қилмайди. Бу ҳақда нашр бош муҳаррири Роман Доброхотов маълум қилган.
Унинг қайдича, The Insider Латвияда рўйхатдан ўтган ОАВ ҳисобланади, Россияда унинг ваколатхонаси йўқ, бинобарин “хорижий агентлар” тўғрисидаги қонунга бўйсунмагани учун Россия расмийлари ҳеч кимга жарима сололмайди. Айни пайтда Доброхотов уни ва нашрнинг бошқа журналистларини ноқонуний таъқиб қилишлари мумкинлигини тахмин қилган.
Россия Адлия вазирлиги The Insider нашрини Алексей Навальний ва бошқа мухолифат вакилларининг заҳарланиши, Чехиядаги ўқ-дори омборларининг портлаши ва бошқа шов-шувли воқеалар юзасидан ўтказган суриштирувлари ортидан “Хорижий агент ОАВлар” рўйхатига тиркаган.
Реестрга, шунингдек, “Проект” нашрининг суриштирувчи журналистлари Михаил Рубин ва Софья Гройсман, Самарадаги “Другой город” веб-журнали бош муҳаррири Юлия Апухтина, “Откритие медиа” журналистлари Илья Рождественский ва Алексей Постернаклар ҳам киритилган.
“Хорижий агент ОАВлар” реестри ундан олдин 15 июль куни янгиланган. Ўшанда рўйхатга “Проект” журналистлари Роман Баданин, Петр Маняхин, Ольга Чуракова, Мария Железнова, Юлия Лукьянова, “Откритие медиа” журналистлари Юлия Ярош ва Максим Гликин, Шунингдек Озодлик радиоси рус хизмати мухбири Елизавета Маетнаялар киритилган эди.
Россия расмийлари амалдаги “Хорижий агент ОАВлар” тўғрисидаги қонунчиликни АҚШ ҳукуматининг “Америкадаги россиялик журналистларга қарши” хатти-ҳаракатлари инъикоси эканини иддао қилиб келишади.