Қирғизистон Ташқи ишлар вазирлиги Тожикистондан 50 нафар Қирғизистон фуқароси бадарға қилингани ортидан Душанбега норозилик нотасини топширди.
Қирғизистон Ташқи ишлар вазирлигининг билдиришича, бадарға қилинган шахсларнинг Тожикистонда ота-онаси, оила аъзолари ва яқинлари бор. Қирғизистонликларнинг бадарға қилиниши ортидан уларнинг Тожикистондаги оила аъзолари ва кекса ота-оналари қаровсиз қолиши мумкин.
Бишкек Душанбега бу масалани дўстона муносабат ва халқаро ҳуқуқ меъёрларидан келиб чиққан ҳолда ҳал этишни таклиф қилди.
Аввалроқ Қирғизистон Чегара хизмати Тожикистон сабабларини айтмаган ҳолда 2 январь куни 47 нафар, 4 январь куни 3 нафар қирғиз фуқаросини ўз ҳудудидан бадарға қилгани ҳақида хабар берган эди.
Бадарға қилинганларнинг барчаси Тожикистоннинг асосан этник қирғизлар яшайдиган Жерғатол туманида туғилиб-ўсган ва кейинчалик Қирғизистон фуқаролигини олган шахслардир.
Тожикистон ҳукумати ҳозирча мазкур баёнот юзасидан муносабат билдирмади.