Туркиянинг Газиантеп шаҳрида коронавирус касалхонасида содир бўлган портлаш ва ёнғин оқибатида тўққиз киши қурбон бўлди. Бу ҳақда Онадўли агентлиги соғлиқни сақлаш вазири Фахреттин Қўжадан олинган маълумотга таянган ҳолда хабар қилди.
#Gaziantep’te özel bir hastanenin COVID-19 yoğun bakım ünitesinde yüksek akım oksijen cihazının patlaması sonucu çıkan yangında 9 kişi hayatını kaybetti, 11 kişi yaralandı. ▪️Patlamanın ardından hastanenin içindeki hasar böyle görüntülendi. pic.twitter.com/mnoUFOEa5K
— EHA MEDYA (@eha_medya) December 19, 2020
Портлаш Санко университети касалхонаси жонлантириш бўлимидаги сунъий нафас бериш аппаратининг носозлиги туфайли юз берди. Ҳодиса тафсилотлари ўрганилмоқда.
Портлашда омон қолган беморлар яқин атрофдаги касалхоналарга етказилган. Улардан бири бошқа касалхонага олиб кетилаётган пайтда йўлда жон берган.
Касалхона раҳбарияти томонидан тарқатилган расмий баёнотда қурбонлар ёши 56 дан 85 гача, деб кўрсатилган.
Газиантеп волийлиги маҳаллий касалхонада даволанган беморларнинг бир қисми у ерга бошқа шаҳарлардан кўчирилганини маълум қилди.
Туркияда сўнгги кунларда коронавируснинг иккинчи тўлқини кузатилмоқда. Мамлакат расмийлари қайдича, сўнгги пайтларда бир кеча-кундузда коронавирус юқтириб олганлар сони 25 минг нафардан ошмоқда. Эпидемия бошидан бери эса хасталикка чалинганлар сони қарийб 2 миллионга етган, беморлардан тақрибан 18 минг нафари қурбон бўлган.
Туркия расмийлари иккинчи тўлқин оқибатларига қарши курашиш мақсадида тунлари комендантлик соати ҳамда ҳордиқ кунлари кескин карантин чораларини жорий қилганлар.