Ашхободликлар бундан буён пойтахтдан вилоятларга сафар қилиш учун Туркманистон миграция хизматидан рухсатнома олишлари шарт эмас. Бу ҳақда “Хроника Туркменистана” нашри хабар қилди.
Қайд этилишича, вилоятликларнинг пойтахтга келиш учун рухсатнома олишига оид тартиб ҳали ҳам сақланиб қолган. Сафар мақсадида поезд ёки учоққа чиқаётган фуқаролардан манфий натижали COVID-19 тестини тақдим этиш талаб қилинади.
Шу пайтгача пойтахтга бормоқчи ёки шаҳардан чиқмоқчи бўлган туркманистонликлар бу ишни фақат дафн маросимида қатнашиш, зарур тиббий ёрдам олиш, хизмат сафари ёки ўқиш мақсадидагина амалга ошириши мумкин эди.
Аввалроқ Туркманистон ўз ҳудуди орқали Ўзбекистондан товар транзитига рухсат бергани хабар қилинган эди.