Наманган, Фарғона ва Андижон вилоятларига уч кунлик сафар ортидан 29 сентябрь оқшомида Тошкентга қайтган президент Шавкат Мирзиёев ўзбекистонлик устоз ва мураббийларга табрик йўллади.
1 октябрь – устоз ва мураббийлар куни муносабати билан йўлланган ҳамда матни президент матбуот хизмати томонидан ёйинланган табрикномада Ш. Мирзиёев ўз қутловини “бутун эл-юртнинг чексиз ҳурмат ва эҳтироми рамзи сифатида қабул этиш”ни сўраган.
“Ушбу қутлуғ айёмда сиз, заҳматкаш устозларга кўнглимизда, юрагимизда бўлган юксак ҳурмат-эҳтиром ва эзгу тилакларни сўз билан тўлиқ ифода этиш қийин, албатта. Чунки сизлар дунёдаги энг бебаҳо бойлик ва боқий меросни яратиш, уни халқимизга, униб-ўсиб келаётган ёш авлодимизга безавол етказиш йўлида чинакам фидойилик кўрсатиб меҳнат қилаётган улуғ инсонларсиз. Бу улкан бойлик – ақл-заковат ва илм, бу ўлмас мерос – яхши тарбиядир”, дейилган президент табрикномасида.
Мамлакатда сўнгги йилларда илм-фан ва таълим-тарбия соҳасини давлат сиёсатининг устувор йўналишига айлантиришга қаратилган, оилада фарзанд туғилганидан бошлаб, камолот ёшига етгунга қадар уни ҳар томонлама қўллаб-қувватлайдиган, ҳаётда муносиб ўрин топишига хизмат қиладиган яхлит ва узлуксиз тизим яратилаётганини урғулаган Ш. Мирзиёев мактабгача таълим, бошланғич ва ўрта таълим ҳамда олий таълимда эришилган ютуқлар ва ўтказилаётган ислоҳотлардан баҳс этган.
“Таълим соҳасининг яна бир муҳим вазифаси – фаол фуқаролик позициясига эга бўлган, Ватан ва халқ манфаатларини қатъий ҳимоя қила оладиган, замонавий, кенг фикрлайдиган ёшлар авлодини шакллантиришдан иборат. Шу сабабли “Узлуксиз таълим тизимида ижтимоий фанларни ўқитиш тартиби ва тамойиллари концепцияси”ни ишлаб чиқиш ва уни амалиётга жорий этиш объектив заруратга айланмоқда, деб ўйлайман”, деган президент ўз табригида.
Боғча тарбиячиси, мактаб муаллими, олийгоҳлар профессор-ўқитувчилари ҳамда илм ва ижод билан шуғулланаётган зиёлиларни бугун Ўзбекистон интилаётган “Учинчи Ренессанснинг тўрт таянч устуни” эканини таъкидлаган Ш. Мирзиёев “муаллим ва устозларнинг қадри, шаъни ва ғурурини тиклаш, машаққатли ва шарафли меҳнатини моддий ва маънавий рағбатлантириш бўйича бошланган ишларни янги поғонага кўтаришга ваъда берган.
Куни кеча Фарғона вилоятида сайловчилар билан учрашув чоғида ҳам амалдаги президент ва президентликка номзод Ш. Мирзиёев Ўзбекистонда “муаллимнинг маошини 1000 долларга етказмагунча тўхтамайман”, дея аввалги ваъдасини такрорлаган. Бундай ваъда илк бор президент тилидан ўтган йил август ойида мустақилликнинг 29 йиллигига бағишланиб Кўксаройда ўтказилган тантанали маросимда янграганди.