Хабаровск ўлка суди “Просто газета” нашри журналисти Татьяна Хлестуновани ҳибсга олиш ҳақидаги қарорни бекор қилди. Қарор журналист аёл ҳибсга олинганидан 10 кун ўтганидан кейингина қайта кўриб чиқилган. Бу ҳақда “ОВД-Инфо” мониторинг гуруҳи маълумот тарқатди.
Суд қароридан кейин Хлестунова озодликка чиққан. Материаллар қайта кўриб чиқиш учун биринчи инстанция судига йўлланган.
Журналист аёл 30 ноябрь куни тўрт суткага ҳибс этилганди. Бунга унинг Хабаровскда 28 ноябрь куни бўлиб ўтган норозилик акциясини ёритгани сабаб бўлган. Ҳибсхонадан чиқишда Хлестуновани яна қўлга олишиб, бу сафар 10 суткага ҳибсга олишган.
Иккала ҳолатда ҳам журналистга ўлканинг собиқ губернатори, ҳозир ҳибсда бўлган Сергей Фургални дастаклаш учун расмийлар рухсатисиз уюштирилган акцияда иштирок этганлик айби қўйилган.
Фургални қўллаш акциялари Хабаровскда собиқ губернатор қўлга олиниб, Москвага олиб кетилган июль ойидан бери давом этиб келмоқда.