Maxar Technologies ширкати 10 апрель куни Украинанинг Харьков вилояти бўйлаб ҳаракатланаётган Россия ҳарбий техникасининг 12 чақиримли карвони акс этган сунъий йўлдош тасвирларини эълон қилди.
Тасвирларда ҳарбий машиналар Харьковдан шарқ томонда жойлашган Большой Бурлук қишлоғи орқали жанубга йўналганини кўриш мумкин.
Ҳарбий техника катта эҳтимол билан Изюм шаҳрига йўл олган: Ғарб разведкасига кўра, Россия бу ерда Украина Қуролли кучларининг Донбасс гуруҳини қуршовга олиш мақсадида куч тўпламоқда. Яна бир ҳужум жануб томондан амалга оширилиши кутиляпти.
Харьков вилояти маъмурияти раҳбари Олег Синегубов 10 апрель оқшомида Россия карвони йўқ қилинганини маълум қилган, бироқ у Maxar тасвирларидаги карвонми ёки бошқами – аниқ эмас, қолаверса, ушбу маълумотнинг тўғрилиги бошқа манбалар орқали тасдиқланган эмас.
Россия ўз кучларини Изюм шаҳри атрофида жамлаётгани ҳақида россиялик ҳарбий мухбирлар ҳам очиқ-ойдин ёзишмоқда. Аввалроқ Россия мудофаа вазири Сергей Шойгу ҳарбий амалиёт маркази Донбассга кўчганини айтган эди. Мақсад – Москва “ДХР” ва “ЛХР”га қарашли деб ҳисоблаётган Украинанинг Донецк ва Луганск вилоятлари ҳудудини батамом ишғол этиш.
Украина расмийлари фикрича, Донбассдаги бўлғуси жанглар кўп жиҳатдан урушнинг якуний натижасини белгилайди. Айрим тахминларга кўра, муҳтамал жанг Европада Иккинчи жаҳон уруши давридан кейинги энг катта ерусти тўқнашуви бўлади – унда мингдан ортиқ ҳарбий техника ва 100 мингдан зиёд аскар иштирок этиши чамаланмоқда.