Халқаро хабарлар

Байден Си Цзиньпинни «диктатор» деб сифатлаганига Хитой муносабат билдирди

Байден Си билан сўнгги бир йилда илк маротаба 15 ноябрда Калифорнияда музокара ўтказган эди.

Хитой Ташқи ишлар вазирлиги АҚШ президенти Жо Байден Си Цзиньпинни диктатор деб атаганидан сўнг зудликда муносабат билдирди ва бу баёнотни “сиёсий манипуляция” қаторида қабул қилишини билдирди.

Жо Байден Хитой раҳбари Си Цзиньпин билан сўнгги бир йилда илк маротаба 15 ноябрда Калифорнияда музокара ўтказган эди.

Байден музокаралардан сўнг журналистларнинг саволларига жавоб берар экан, Хитой раҳбарини диктатор сифатида эътироф этишда давом этишини ва бу борадаги фикрини ўзгартирмаслигини маълум қилган.

Си Цзиньпин жорий йил март ойида учинчи муддатга Хитой раиси лавозимига сайланганидан сўнг Мао Цзэдундан кейин мамлакатни энг узоқ вақт бошқараётган раҳбарга айланди. 2018 йилда Хитой Конституциясига ўзгартишлар киритилган эди. Мазкур ўзгартишларга мувофиқ Цзиньпин умри охиригача Хитойни бошқариши мумкин. Бунан олдинги Конституцияда Хитой раиси лавозимига бир шахс фақат икки марта сайланиши мумкин эди.

15 ноябрда ўтган учрашув аввалида Байден: “Биз нотўғри тасаввурлар ва англашилмовчиликлар бўлмаслиги учун бир биримизни аниқ тушунишимиз ўта муҳимдир. Биз рақобат зиддиятга айланиб кетишининг олдини олишимиз лозим”, - деб айтди.

Бунга жавобан Си Цзиньпин: “Ер курраси иккита давлатнинг тараққиёти учун жуда катталик қилади. Мен кўп нарсаларни ваъда қилувчи истиқболли икки томонлама ҳамкорлигимизга қатъий ишонаман”, - деган.

Байден учрашувдан сўнг ўтган матбуот анжуманида “музокаралар нисбатан конструктив ва самарали” бўлганини маълум қилди. Унга кўра, томонлар Хитойда ишлаб чиқарилувчи ва АҚШга ноқонуний йўллар билан олиб келинувчи фентанил сунъий наркотигига қарши кураш чоралари ҳақида келишиб олган. Фентанил сўнгги йилларда минглаб америкаликларнинг ўлимига сабаб бўлди.

Байден Хитой ва АҚШ мудофаа вазирликлари ўртасидаги ҳамкорликни тиклашга ҳам келишилганини билдирди. Шунингдек, Байден музокара чоғида Россиянинг Украинага босқини, ҲАМАС-Исроил уруши ва Тайван атрофидаги вазият муҳокама қилинганини айтди.

Байден журналистларнинг саволларига жавоб берар экан, Хитой раҳбарини диктатор сифатида эътироф этишда давом этишини ва бу борадаги фикрини ўзгартирмаслигини маълум қилди.