Хитой Компартияси Марказий қўмитаси пленуми 11 ноябрь куни партиянинг 100 йиллиги ҳамда унинг “тарихи ва ютуқлари”га бағишланган резолюцияни қабул қилди. Унда илк бор очиқчасига амалдаги партия лидери ва ХХР раиси бўлган Си Цзинпиннинг роли ҳамда унинг “Хитой миллатининг буюк уйғониши”га қўшган “ҳал қилувчи ҳиссаси” тўғрисида айтилган.
Си Цзинпиннинг “Хитойга хос бўлган социализм”га оид мафкуравий асари ҳужжатда “Хитой маданиятининг квинтэссенцияси” деб аталган. Резолюцияда партия, армия ва халқ “ядроси ўртоқ Си Цзинпин бўлган” Хитой Компартияси (ХКП) Марказий қўмитаси атрофида жипслашишга чақирилган.
Ҳужжатдан иқтибос келтирган Ғарб агентликларига кўра, резолюция моҳиятан Хитой лидерининг жорий муддати тугаганидан кейин унинг ваколатларини узайтириш учун асос бўлиб хизмат қилади. Си Цзинпин феълан Мао Цзедун ва Дэн Сяопин каби хитойлик машҳур коммунист раҳбарлар меҳробига дохил этилмоқда. Партия тарихи ҳақида пайшанба куни қабул қилинганига ўхшаш резолюциялар аввалроқ бор-йўғи икки марта – 1945 йили Мао Цзедун даврида ҳамда 1981 йили Дэн Сяопин ҳокимият тепасида бўлган пайтда қабул қилинган.
Аввалроқ Хитой Компартияси Си Цзинпиннинг олий давлат ва партия мансабларини икки муддатгина эгаллаши мумкинлигига оид чекловни расман бекор қилган.
Резолюцияда партия Хитойнинг Тайван билан интеграцияси бўйича сиёсат олиб бориши хусусида ҳам айтилган. Бироқ бу ишни амалга оширишда ҳарбий кучдан фойдаланиш эҳтимолидан баҳс этилган эмас.
Пленум ёпиқ эшиклар ортида бўлиб ўтган ва унда резолюцияда акс этган масалалардан ташқари яна қандай мавзулар муҳокама қилингани очиқланаётгани йўқ.
ХКПнинг янги раҳбарияти сайланадиган ва Си Цзинпин ваколатлари узайтирилиши кутилаётган партия съезди 2022 йилда бўлиб ўтиши керак.