АҚШнинг Yahoo ширкати Хитой бозоридан чиқиб кетишини маълум қилди. Бунга “тадбиркорлик ва ҳуқуқий муҳитнинг оғирлашуви” сабаб қилиб кўрсатилмоқда, дея хабар қилди АР.
Хитойда ишловчи ширкатлар ҳукумат томонидан сиёсий таъсирчан ёки ножоиз деб ҳисобланган контентни цензура қилишга мажбур.
Yahoo вакиллари фойдаланувчилар ҳуқуқларини ҳурмат қилишлари ва эркин интернет тарафдори эканларини таъкидлашмоқда. 1 ноябрдан бошлаб ширкат сервислари Хитойнинг материк қисми учун ёпиб қўйилган.
Yahoo’нинг бозордан чиқиб кетиши шахсий маълумотларни ҳимоя қилиш тўғрисидаги қонун кучга кирган пайтга тўғри келди. Мазкур қонун ширкатлар тўплаши мумкин бўлган маълумотлар ҳажмини чеклайди ва уларни сақлаш қоидаларини белгилаб беради.
Хитой қонунлари мамлакатда ишловчи ширкатларга ҳуқуқ-тартибот идоралари сўровига кўра маълумотларни тақдим этиш мажбуриятини юклайди. Бу Ғарб фирмалари фаолиятини қийинлаштирмоқда. 2007 йилда АҚШ Конгресси Yahoo’ни Пекиндаги икки хитойлик диссидентга оид маълумотларни ҳукуматга бериб, уларнинг қамалишига сабаб бўлгани учун айблаган эди.
Yahoo Пекиндаги офисини 2015 йилдаёқ ёпган. Ширкатнинг ушбу кетиши рамзий тусга эга, чунки сервисларнинг бир қисми, жумладан асосий сайт аллақачон блокланган.
2021 йил октябрь ойида Хитойда Microsoft LinkedIn платформаси ўз фаолиятини тўхтатган.
2009 йилда Хитойда Twitter ва Facebook блокланган эди. 2010 йилда Google мамлакатдан чиқиб кетган. Хитой ҳудудида, шунингдек, Zoom ва TikTok ҳам ишламайди.