Янги Зеландия бош вазири Жасинда Ардерн полиция кузатувида бўлган муҳожир 3 сентябрь куни Окленддаги супермаркетда уч кишини пичоқлаб ўлдиргани ортидан терроризмга қарши қонунчилик талабларини янада қатъийлаштиришга ваъда берди.
RNZ радиоси ҳужум қилувчининг исмини тилга олган – у 2011 йилда талаба визаси билан мамлакатга келган ва қочқин мақомини сўраган шри-ланкалик 32 ёшли Аҳмад Атилл Муҳаммад Самсудиндир.
Аҳмад Атилл 2017 йили муҳтамалан Сурияга кетаётган чоғида Окленд аэропортида қўлга олинган. Полиция Атиллнинг уйидан тақиқланган адабиётлар ва овчилар пичоғини топган, шунингдек унинг “Ислом давлати” экстремистик гуруҳи билан алоқаси борлигини аниқлаган эди. Ўшанда Атилл айбини тан олган ва гаров эвазига озод қилинган.
Бир йилдан сўнг уни яна қўлга олишиб, террористик ҳужумни режалашда айблаганлар. Бироқ суд амалдаги қонунчиликка кўра режа қилиш ўзича жиноят ҳисобланмайди, деб қарор чиқарган.
Уни 12 ойлик “махсус назорат”га ҳукм қилишган – шри-ланкаликни 30 нафаргача полициячи кузатиб юрган. Жасинда Ардернга кўра, хавфсизлик идоралари Атилл жамиятга таҳдид туғдиришини июль-август ойларида яна бир карра тасдиқлаганлар. Бироқ бу пайтда прокуратуранинг уни ҳибсда сақлаш учун қонуний асослари тугаган эди.
Чекловлар олиб ташланишидан икки ой ўтиб 3 сентябрь куни Аҳмад Атилл Окленд чеккасидаги дўконга кирган. У патруль ҳамроҳлигида келган, аммо полициячилар Атиллни харид қилмоқчи деб ўйлаб, ҳушёрликни бой берганлар. Атилл эса дўконга кириши билан етти кишига ҳужум қилишга улгурган, шундан сўнг полиция уни отиб ташлаган.
Янги Зеландия расмийлари юз берган воқеани “террористик хуруж” деб аташмоқда. Август ойида адлия вазири Крис Фаафои ҳужум қилишни режалашни жиноят ўлароқ малакалашни талаб қилиб, терроризмга қарши қонунга ўзгартириш киритилишига эришган.
“Парламент ишни янгидан бошлаши билан биз бу жараённи якунлаймиз”, деган бош вазир Жасин Ардерн.