Арманистон пойтахти Ереванда бош вазир Никола Пашинян истеъфосини талаб қилаётган мухолифат тарафдорлари 9 март куни парламент биносига кириш йўлларининг барчасини тўсиб қўйишди. Парламент биносини ўраб олган намойишчилар билан полиция ўртасида вақти-вақти билан тўқнашув юзага келиб турган. У ерда бўлган мухолифатчи депутатлардан бир қанчаси шафқатсиз тўқнашувларнинг олдини олиш учун намойишчилар билан полиция ўртасига туриб олган. Махсус кийимлар кийиб олган полиция ходимлари оломонни тарқатишга уринмаган.
“Провокацияга берилманг”, дея намойишчиларга мурожаат қилган мухолифат фаоли Ишхан Сагателян ҳеч ким парламент биносига ёриб киришга уринмаётганини урғулаган.
“Бу бизнинг парламентга қарши фуқаровий бўйсунмаслик акциямиздир”, деган у.
Тоғли Қорабоғ атрофида Озарбайжон билан этник арман кучлари ўртасида 2020 йил кузида бўлиб ўтган олти ҳафталик тўқнашув ортидан мухолифат Пашиняннинг истеъфосини талаб қилиб чиққан ва норозилик чиқишлари орта бошлаган. Арманистонда шу кундаги инқироз марказида Никола Пашинян билан Озарбайжон президенти Илҳом Алиев ўртасида Россия воситачилигида ўт очишни тўхтатиш тўғрисида имзолаган битим турибди. Мазкур битим жанговар ҳаракатларни поёнига етказган, бироқ, битимга мувофиқ, арман кучлари айрим ҳудудларни қўлдан бой берган.
Битим шартларига кўра, Арманистон ўзини мустақил деб эълон қилиб олган Тоғли Қорабоғ ҳудудининг бир қисмидан Озарбайжон фойдасига воз кечган. Бу ҳудудлар Озарбайжоннинг Тоғли Қорабоғга ёндош етти тумани билан биргаликда ўтган асрнинг 90-йилларидан бери Арманистон томонидан назорат қилиб келинаётган эди.