Электрон хизматлар кўрсатувчи хорижий компаниялар жорий йилнинг январь-апрель ойларида Ўзбекистон хазинасига 32,4 миллиард сўм (тақрибан 2 миллион 833 минг доллар) солиқ тўлаган. Бу ҳақда Ўзбекистон Республикаси Иқтисодиёт ва молия вазирлиги ҳузуридаги Солиқ қўмитаси маълумот тарқатди.
Қайд этилишича, ўтган тўрт ой ичида IT-компаниялари томонидан тўланган солиқ миқдори ўтган йилнинг шу даврига нисбатан 1,6 баробар кўп.
Энг кўп солиқ тўлаган ширкатлар орасида Meta (12,1 миллиард сўм), Google (9,3 миллиард сўм), Apple (6 миллиард сўм) ва бошқалар саналган.
Солиқ қўмитаси ўтган йил декабрида 2022 йилнинг 11 ойи давомида Ўзбекистонда электрон хизматлар кўрсатувчи хорижий компаниялар 44 миллиард 800 миллион сўм (4 миллион АҚШ долларидан кўпроқ) солиқ тўлагани ҳақида маълум қилган эди.