Украина президенти Владимир Зеленский ўз телеграм-каналида Украина халқ депутати Виктор Медведчукнинг кишанбанд ҳолатдаги фотосуратини чоп қилди. Мухолифлари уни россияпараст сиёсатчи деб аташади. Уй қамоғида бўлган Медведчук Россия билан уруш бошланган куни ғойиб бўлган эди.
Зеленскийнинг ёзишича, Украина Хавфсизлик хизмати уни қўлга олиш учун махсус амалиёт ўтказган, амалиёт тафсилотлари тез орада очиқланиши айтилмоқда.
Фотосуратда Виктор Медведчук украин ҳарбийлари кийимида тушган. Сурат қачон ва қаерда олингани маълум эмас.
Қизини Путин чўқинтиргани сабабли оммавий ахборот воситаларида “Россия президентининг биродари” дея таърифланадиган Медведчук Украинада уй қамоғида сақланаётган эди. Россия мамлакатга бостириб кирган 24 февраль санасида у қочиб кетган.
Ўтган йилнинг октябрида Медведчук давлатга хиёнатда айбланган. Тергов фаразига кўра, сиёсатчи тан олинмаган “ДХР” ва “ЛХР”дан контрабанда йўли билан кўмир олиб сотиш схемаларига аралашган. Украина Бош прокуратураси эса Медведчукнинг Москва билан алоқалари 2014-2015 йилларда мамлакат иқтисодий хавфсизлигига путур етказганини таъкидламоқда. Собиқ президент Пётр Порошенкога ҳам айни айблов қўйилган.
Аввалроқ Медведчук “Мухолифат платформаси – Ҳаёт учун!” партиясининг Украина парламентидаги фракцияси раҳбари бўлган. Мухолифлари ушбу партияни Россия Қримни босиб олганидан сўнг россияпарастлик кайфиятини ёйишда ва Украина шарқидаги айирмачиларни дастаклашда айблашади.
20 март куни Украина Миллий хавфсизлик ва мудофаа кенгаши ҳарбий ҳолат даврида партия фаолиятини тўхтатиб туришга қарор қилган. Юқори мартабали украин мулозимлари партия фаолиятини суд орқали тақиқлаш режаланаётганини айтишган.