Андижонда вилоят ҳокимлигининг икки мансабдори ва яна икки фуқаро фермерга 100 гектар ер ажратиб бериш эвазига 135 минг доллар пора талаб қилганликда айбланиб, узоқ муддатларга қамалди.
Олий суднинг билдиришича, 4 июнь куни Андижон вилоят суди ҳукми билан ҳокимлиги ҳузуридаги “Кичик саноат зоналарини бошқариш ягона дирекцияси” бош мутахассиси лавозимида ишлаган Ойбек Абдужалилов 10 йилу 6 ойга, вилоят ҳокимлиги Иқтисодий тараққиёти ва камбағалликни қисқартириш Бош бошқармаси ғазначиси лавозимида ишлаган Умиджон Солиев 10 йилу 2 ойга кесилди.
Уларга пора олди-бердисида воситачилик қилган “Универсал водий гипс” МЧЖ раҳбари Абдулҳамид Усвалиев ва фуқаро Абдураҳмон Усвалиевлар эса 10 йили 2 ойга озодликдан маҳрум қилинди.
Расман билдирилишича, судланганлар фермерлардан бирига Хўжаобод туманидан 100 гектар ер ажратиб бериш эвазига 135 минг доллар пора сўраган.
Фермер дастлаб 26 март куни бу пулнинг 7 минг долларини берган. 29 март куни қолган 128 минг долларни топширган. Судланганлар порани олаётган пайтда ДХХ ва Иқтисодий жиноятларга қарши кураш департаменти Андижон вилоят бошқармаси ходимлари томонидан ушланган.