Шинжон-Уйғур мухториятидаги қариндошларини сиёсий лагерлардан бўшатишни талаб қилиб Олмаотадаги Хитой консуллиги олдида 6 киши 200 кундан бери акция ўтказиб келмоқда.
25 август куни улар яқинлари қамоқдан озод этилиб, Қозоғистонга етиб келмагунича консуллик олдидан кетмасликларини билдирдилар.
"Бошқа иложимиз қолмади. Кеча акциянинг 199-куни бўлди. Ўшанда биз консулхона олдида тунашга келишиб олдик. Бизнинг Хитой халқига ҳеч қандай норозилигимиз йўқ. Биз бу сиёсатни олиб бораётган шахсга қаршимиз”,-деди акцияга чиққанлардан бири.
Хитой аввалроқ акцияга чиққанларнинг яқинлари “мамлакат қонунларини бузгани учун жазо муддатини ўтаётгани”ни билдирган.
Қозоқ полицияси ўз яқинлари ҳуқуқини ҳимоя қилиб акцияга чиққанларга жарима солган.
Халқаро ҳамжамият Хитойни 2017 йилдан бери миллиондан зиёд мусулмон уйғур ва бошқа миллат вакилларини қайта тарбиялаш лагерлари ва қамоқхоналарга йўллаганликда айблаб келмоқда.
У ерда маҳкумлар ўз динлари ва тилларидан бош тортишга мажбурланиб, мафкуравий ишловга дучор қилинади. Хитой расмийлари бу лагерларни террорчилик ва экстремизмга қарши курашиш учун зарур бўлган қайта ўқитиш ва тарбиялаш марказлари, деб атайди.