Тошкент метросининг “Ҳамид Олимжон” бекатида 24 май куни соат 8:52да 4-сонли йўналишдаги поезд тўхтаб қолди. Расман билдирилишича, поездни ҳайдовчи техник сабабларга кўра –носозлик аниқланиши муносабати билан тўхтатган.
“16-сонли йўналиш бўйича орқадан келаётган поезд йўловчиларни олиб, жадвалга мувофиқ ҳаракатланишни давом эттирди. Келтирилган ноқулайликлар учун узр сўраймиз”, — дейилади “Тошкент метрополитени” унитар корхонаси расмий билдирувида.
Бундан аввал ҳам Тошкент метрополитенида поездларнинг техник носозлик ортидан тўхташи ва йўловчиларнинг тушириб юборилиши кузатилган. Жумладан, 13 май куни “Амир Темур хиёбони” бекатида поезддан йўловчилар тушириб юборилган.
7 май куни эса соат 21:10 дан 22:00 гача Ҳалқа йўлининг 7-бекатида электр қуввати ўчиб қолган.
18 март куни соат 20:10 да Тошкент метрополитенида тўхтаб қолган поездга унинг ортидан келаётган поезд урилди. Бу ҳақда хабар қилган Фавқулодда вазиятлар вазирлигига кўра, ҳодисада жабрланган ва ҳалок бўлганлар йўқ. Вагонларга ҳам катта зарар етмаган.