Туркманистон ўрта мактабларида ёзги таътил узайтирилиб, ўқув йилининг бошланиши ортга сурилди. Университетларда эса ўқиш қисман онлайн режимда олиб борилиши айтилмоқда. Бу ҳолат мамлакатда COVID-19нинг кучайгани билан боғлиқлиги ҳақида Озодлик радиоси туркман хизмати мухбирлари хабар берди.
Ашхабоддаги касалхоналардан бирининг шифокори радио мухбирига берган интервьюсида: “Ашхабодда вирус билан боғлиқ вазият ўта жиддий. Вирус юққан одамларни мунтазам касалхоналарга олиб келишмоқда. Ҳар икки кишидан бирига коронавирус юққан десак ҳам бўлаверади”,-деб айтган.
Мухбирларнинг билдиришича, 31 август куни биргина Мари вилоятида расман 60 киши коронавирусдан ўлган.
Озодлик радиоси туркман хизмати мухбирлари мамлакатдаги иқтисодий инқироз ортидан пулсизлик ва ишсизликдан қийналган аҳоли дори-дармон сотиб олиш имкониятига эга эмаслигини айтмоқда.
Туркманистон ҳукумати шу кунгача мамлакатда коронавирус мавжудлигини тан олмаган ва бу борадаги маълумотларни сир сақлаб келмоқда.