“Ўзбекнефтгаз”нинг хабар беришича, 1 июль куни соат 12:50 лар атрофида Шўртан нефть -газ конидаги ёнғин оқибатида бир ишчи ҳалок бўлди, икки киши жароҳатланди.
Расман билдирилишича, ёнғин газдан пропан-бутан аралашмаси ажратиб олиш 2-сонли қурилмасида содир бўлган.
Фавқулодда вазиятлар вазирлигининг билдиришича, ёнғинни бартараф қилишга 10 та ўт ўчириш экипажи жалб қилинди. Айни пайтда ёнғин тўлиқ бартараф этилган.
Воқеа жойида корхона ишчиларидан бири ҳалок бўлди ва икки нафари тан жароҳатлари олди. Жароҳатланган ишчилар касалхонага ётқизилган.