Ўзбекистондаги Jurabek Laboratories қўшма корхонаси томонидан ишлаб чиқарилган ўзбек-хитой ZF-UZ-VAC2001 вакцинасининг 1 458 820 дозаси Санитария-эпидемиологик осойишталик ва жамоат саломатлиги хизматига 30 сентябрь куни тантанали равишда топширилди. Бу ҳақда Фармацевтика тармоғини ривожлантириш агентлиги ва Соғлиқни сақлаш вазирлиги хабар берди.
Ҳар икки манбанинг билдиришича, “ҳозирги кунда қўшма корхона томонидан жами 7 миллион доза вакцина ишлаб чиқарилган бўлиб, кейинги дозалари босқичма-босқич эмлаш пунктларига етказиб берилади”.
Фармацевтика тармоғини ривожлантириш агентлиги ва Соғлиқни сақлаш вазирлиги Jurabek Laboratories 7 миллион доза вакцина ишлаб чиқарган ҳолда, нега унинг фақат 1 458 820 дозасини Санитария-эпидемиологик осойишталик ва жамоат саломатлиги хизматига топширгани тўғрисида тушунтириш бермаган.
Расман билдирилишича, Jurabek Laboratories томонидан мазкур вакцинани ишлаб чиқарилиши Хитойнинг Anhui Zhifei Longcom Biopharmaceutical Co., Ltd. Компанияси билан имзоланган ҳамкорлик шартномаси доирасида амалга оширилмоқда.
Ўзбекистон ҳукумати коронавирусга қарши Хитой ва Россия вакциналарини мамлакатда ишлаб чиқаришга рухсат берувчи қарорни 2021 йил 20 августда қабул қилган эди.
Ҳукумат қарорида Хитойнинг ZF-UZ-VAC2001 ва Россиянинг Спутник V вакциналари Jurabek Laboratories корхонасида ишлаб чиқарилиши белгиланди.
Спутник V вакцинаси Ўзбекистонда жорий йилнинг февралида рўйхатга олинган эди. ZF-UZ-VAC2001 вакцинасининг клиник синовлари эса Ўзбекистонда ҳам ўтказилган.