Тошкент халқаро аэропортига 13 сентябрь куни тушдан кейин 1 200 000 дозадан ортиқ Pfizer/BioNTech вакцинаси юкланган самолёт келиб қўнди, деб хабар берди Соғлиқни сақлаш вазирлиги.
Pfizer/BioNTech вакцинаси мамлакатга биринчи марта олиб келинди. АҚШнинг Pfizer ва Германиянинг BioNTech ширкатлари ҳамкорликда ишлаб чиқарган Pfizer/BioNTech препарати ўзбекистонликларни эмлашда қўлланиладиган бешинчи вакцина бўлади.
Бундан аввал Ўзбекистонга 1 342 480 доза AstraZeneca, 18 миллион доза ZF-UZ-VAC2001, 460 000 доза "Sputnik V" ва 3 миллион дозадан кўпроқ Moderna вакциналари олиб келинган эди.
«Шундай қилиб, юртимизга келтирилган жами вакцина 24 002 540 дозани ташкил қилмоқда. Айни кунгача мамлакатимизда жами 16 861 167 доза вакцинадан фойдаланилиб, тўлиқ эмланган фуқаролар 3 121 019 нафарни ташкил қилмоқда»,-дейилади расмий хабарда.