Линклар

Шошилинч хабар
14 июл 2024, Тошкент вақти: 23:01

Блогистон

якшанба 14 июл 2024

Календарь
июл 2024
дш сш чш пш ж ш якш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4
Мактабгача ва мактаб таълими вазири Ҳилола Умарова 10 июль куни Сурхондарё вилоятида ўтказилган тадбирда вилоят ҳокими Улуғбек Қосимовга “Таълим ҳомийси” кўкрак нишонини топширди.
Мактабгача ва мактаб таълими вазири Ҳилола Умарова 10 июль куни Сурхондарё вилоятида ўтказилган тадбирда вилоят ҳокими Улуғбек Қосимовга “Таълим ҳомийси” кўкрак нишонини топширди.

Мактабгача ва мактаб таълими вазири Ҳилола Умарова 10 июль куни Сурхондарё вилоятида ўтказилган тадбирда вилоят ҳокими Улуғбек Қосимовга “Таълим ҳомийси” кўкрак нишонини топширди. Бир йил аввал Сурхондарё вилоятидаги мактаб директори айнан ҳоким Қосимовнинг оғзаки буйруғи ортидан қамалган эди.

Ҳодисани ёдга олган жамоат фаоллари Таълим вазири “ўқитувчини қаматган ҳоким”га нишон топширганини “шармандалик” деб атади.

2023 йил июль ойида Сурхондарё вилоят ҳокими Улуғбек Қосимов ва Сариосиё туманидаги 28-мактаб директори Умида Турсунова ўртасидаги тортишув видеоси тарқалган эди. Умида Турсунова вилоят ҳокимига эътироз билдирар экан, унга нотўғри маълумот берилаётганини айтади.

OzodNazar: А. Мўминов иши: ҳукм ўқилди; Ҳоким қамаган аёлни вазир бўшатди
Илтимос кутинг

Айни дамда медиа-манба мавжуд эмас

0:00 0:53:47 0:00

Ҳоким билан даҳанаки тортишув ортидан мактаб директори 7 суткага қамалади, лавозимидан олинади ва кейинроқ калтаклаб кетилади. Фаоллар педагогнинг бошига келган бу мусибатларни унинг ҳоким билан тортишувига боғлаганди.

Суд ва терговсиз директорни қаматишга буйруқ берган ҳоким жавобгарликка тортилмагани, билъакс, “Таълим ҳомийси” кўкрак нишони билан тақдирлангани ижтимоий тармоқларда кескин эътироз уйғотди.

“Ўқитувчини қаматган ҳокимнинг Халқ таълими вазири томонидан тақдирланиши ва бўлиб ҳам нишон номи “Таълим ҳомийси” экани бу – катта шармандалик. Склероз, стратегиясизлик, ўқитувчиларга нисбатан ҳурматсизлик. Бу, шунингдек, жамиятга қарата эркин фикрли ўқитувчининг жойи қамоқ, қаматганники эса кўкрак нишон, дейиш ҳам. Албатта, ҳоким ўшанда ҳақ бўлганига ишонади-да, албатта, кейинги фаолиятига куч олади-да”, деб ёзди журналист Илёс Сафаров.
“Ўшанда Сурхондарё вилояти ҳокимига хўрланган ўқитувчи “милтиқ бўлса отиб ташланг”, деганди. Бундай адолатсизлик ва мантиқсизликни кўриб жонимиз азоб чекмасин, Ҳилола Умарова, милтиқ бўлса отиб ташланг... мени!”
дея вазирга хитоб қилди журналист Анора Содиқова.

Журналист ва инсон ҳуқуқлари ҳимоячиси Абдураҳмон Ташанов Сурхондарё ҳокими сийланганини узоқ йиллар таълим вазири лавозимида ишлаган ва кейинроқ порахўрлик сабаб қамалган Туроб Жўраев билан боғлиқ бошқа бир “шармандали кейс”га муқояса қилди.

“Бу одам вазирликнинг мажлисларидан бирида Бўка тумани ХТБ бошлиғининг (эркак киши) чотига чунонам тепгандики, у юзлаб ҳамкасблари кўз ўнгида йиқилган. Халқ таълими тарихига шармандалик билан кирган бу воқеа ягона бўлмаса керак. Вазир Ҳилола Умарованинг Сурхондарё вилояти ҳокими кўксига медаль таққани ҳам Туроб Жўраевнинг жасоратидан кам бўлмади. У ҳамкасбининг чотига тепмаса ҳам ўтган йили ўнга яқин маориф мудирларини 15 суткага қаматган одамни мукофотлаб, Жўраевнинг рекордини янгилади. Браво, вазир хоним!” деб ёзди Ташанов.

“Вилоят ҳокими билан жанжалдан бир неча кун ўтиб, калтакланиб, оғир аҳволда шифохонага ётқизилган аёл ҳақида ҳалигача ҳеч қандай маълумот мавжуд эмас. Куч адолатда эмас, адолат кучда бўлган мамлакатда одамлар эртанги кунга ишонармикан?” дея собиқ директорнинг тақдирига ойдинлик киритишга ундади “Файзбоғ” канали.

Собиқ депутат Қобил Дўсов эса ҳоким Қосимовнинг “Таълим ҳомийси” деб топилишини қўллаб-қувватлаб пост қолдирган.

“Сурхондарё вилояти ҳокимининг хатоси борлигини инкор қилмаган ҳолда, у кишини мактабларимизга 100 минг янги китоб совға қилиб, директорларнинг қариндош-уруғи тўлдирган мактабларимизда директорларни ротация қилгани учун ҳокимни мен бўлсам ҳам тақдирлаган бўлар эдим. Ўзбекистон тарихида ҳеч бир вилоят ҳокими мактабларга 100 мингта китоб совға қилмаган”, дея иддао қилди Дўсов.

Тошкент шаҳар ҳокими Шавкат Умурзоқов.
Тошкент шаҳар ҳокими Шавкат Умурзоқов.

Тошкент шаҳри ҳокими Шавкат Умурзоқовнинг Юнусобод туманидаги дўконда ўтказган “рейд”и ижтимоий тармоқларда қизғин муҳокама мавзусига айланди.

2023 йил март ойидан буён пойтахтни идора этиб келаётган Умурзоқов жамоатчиликка кам кўриниш берадиган, оммавий ахборот воситаларидан ўзини олиб қочадиган мулозим ўлароқ таърифланади.

Ҳокимлик матбуот хизмати хабарига кўра, Юнусобод тумани Собиробод маҳалласидаги муаммоларни ўрганган Шавкат Умурзоқов ҳудуддаги савдо объектлари санитария-эпидемиология ва ёнғин меъёрларига жавоб бермаслиги, дўконларда айниган сабзавот ва мевалар сотилаётганига эътибор қаратган.

“Мана, нима сотвотти аҳолига, мана, кўринг! Қани СЭС, қани солиқ?! Бяҳки, қаққа қаравоссилар?! Нима, эртага одамлар отравление бўлсинми?!” дея дўконда “моғорлаган ўрик” ва “суви чиқиб кетган олма” сотилаётганини “кўча услуби”да танқид қилади ҳоким тармоққа сиздирилган видеолавҳада.

Амалдорнинг қўл остидагиларга “феодалларча” муомала қилгани, мева солинган қутини отиб юбориши фаолларнинг кескин эътирозига сабаб бўлди.

“Ўзбекистон пойтахти бўлган Тошкент ҳокимининг муомаласини қаранг: “Бяҳки, нима бу? Қаққа қаравоссан?” Умуман ҳокимнинг МЧЖ эгасига ёки сотувчига шундай муомала қилишга, маҳсулотини олиб қўполлик билан улоқтиришга ҳақ-ҳуқуқи борми? Аслида, биз ҳокимга Тошкентга қараяпсанми ўзи, деб ўдағайлашга ҳақлимиз. У биз учун хизмат қилиши керак шунинг учун ҳам солиқлар тўлаяпмиз”, деб ёзди журналист Анора Содиқова.

Журналист Шарофиддин Тўлаганов фикрича, “шаҳар ёки туман хокимининг хусусий дўкон(лар)га кириб, у ердаги маҳсулотлар сифати ҳақида қизиқиши ва қўл остидаги амалдорларга топшириқ бериши ва уни ижтимоий тармоқларга жойлашиши ўта кулгили. Бу пиардан бошқа нарса эмас. Одамларнинг энсасини қотирадиган бу каби ҳодиса(лар) Шимолий Корея ва Туркманистондагина бўлиши мумкин”.

“Ҳокимнинг тўғридан-тўғри мажбуриятлари қолиб тадбиркорнинг ўригига ёпишиши умуман мантиққа тўғри келмайди. Ҳокимиятнинг Телеграм каналига бир кунда мингдан ошиқ муаммо билан мурожат қилишади. Ҳокимнинг тўғридан-тўғри вазифаси шу муаммоларни бартараф қилиш эмасми?” дейди Туробжон Салимов.

“Кун кўрмаган кун кўрса, кундуз куни чироқ ёқармиш, дегандек бўлибди”, дея тагмаъноли луқма ёзди тарихчи олим Шуҳрат Барлос.
“Ёмоннинг кучи япалоққа етибди”, дея халқ мақолини ёдга олди Матчон Султонов.

“Барибир прокурорлигига боради-да ҳоким бўлса ҳам”, деб ёзди журналист Миролим Исажонов пойтахт раҳбари муқаддам узоқ йил прокуратура тизимида ишлаганига шама қилиб.

Аксар фаоллар Тошкент ҳокимига сифатсиз мева олди-сотдиси билан эмас, балки нобоп йўллар, электр энергия ва газ узилишлари, чириган канализация қувурлари, ноқонуний қурилишлар, аёвсиз дарахткушлик каби долзарб муаммоларга эътибор қаратишни тавсия қилган.

“Юнусободда шу чириган ўрик ва олмадан ҳам бошқа каттароқ муаммолар бор эди лекин”, дейди журналист Муҳрим Аъзамхўжаев.

“Шаҳар ҳокимининг режаларида: асфальт қилинмаган йўллар ва бетон қилиниб дабдаласи чиққан тротуарлар, йўл ўтказгичларида ишламайдиган лифтлар, ўрнатилмаган чиқинди челаклар, ишламайдиган дренаж тизими ва яна +100500 та ўз зиммаларидаги муаммоларни текшириш бормикан?” дея савол қўйди блогер Умид Ғафуров.

“Юнусободни сув босиб, “Сквер”даги катта дарахтлар кесилиб кетсаям майли. Муҳими – чириган ўрик сотмаларинг!!!” дея кинояли пост қолдирди журналист Аброр Зоҳидов.

“Шунча йил яшаб, биронта одам айниган олма ёки айниган ўрик еб ўлганини эшитмадим. Лекин Ҳиндистоннинг сифатсиз дорилари сабаб ўнлаб болалар ўлганига шоҳидман”, дея мулозимни қамровни кенгроқ олишга ундади Аҳмад исмли фойдаланувчи.

“Шу “брат”нинг (пойтахт ҳокими назарда тутилмоқда – таҳр.) муборак пойи қадамлари фақат шу дўкон билан чекланмасдан бошқа антисанитар жойларга ҳам ташриф айлаб туришларини илтимос қилардим. Масалан, Тошкент бозорларида об-ҳавога қарайдиган ўзига хос монопол идоралари бор. Муниципиал активларни бошқариш ДУК деб аталади. Шу ДУК қилаётган ишларидан воқиф эмаслар десам, кунда-кунора Фарҳод бозоридан ўтадилар. Шундо “Мерс”дан сакраб икки қадам қўйсалар, ҳақиқий антисанитар ҳолатларни кўрардилар”, деб ёзди Телеграмдаги “Telegraf.uz” канали.

Аксар блогерлар пойтахт раҳбарини бозор иқтисодиёти қонуниятларини тушунмаслик ва шахсий мулк дахлсизлигини бузишда айблаган.

Бошқа бир гуруҳ фаоллар фикрича, муаммо Умурзоқовнинг шахсиятида эмас, балки тизимда.

“Агар ҳокимлар сайлов йўли билан раҳбарликка келса, уларнинг иш услуби ҳам, одамларга ва қўл остидагиларга муомаласи ҳам ўзгаради, шаҳар “катта холасининг уйи” эмаслигини тушуниб ётади”, деб ёзди Муродхўжа Азимхўжаев.

Давомини ўқинг

XS
SM
MD
LG