Линклар

Шошилинч хабар
24 июн 2021, Тошкент вақти: 08:38

Халқаро хабарлар

Озарбайжон Келбечердан арманларнинг чиқиб кетиш муддатини узайтиришга рози бўлди

Ахборот агентликларининг билдиришларича, арманлар уйларига ўт қўйиб кетмоқда.

Арманистон Келбечер туманидан ўз ҳарбийларини олиб чиқиб кетишга улгурмади. Озарбайжон Арманистонга ҳарбийларни олиб чиқиш муддатини узайтиришга рози бўлди.

“Озарбайжон Келбечер туманидан арман ҳарбийларини ва мазкур ҳудудга ноқонуний кўчиб келган арман аҳолисини олиб чиқиб кетиш муддатини 25 ноябргача узайтиришга рози бўлди”,-деб билдирди Озарбайжон президенти Илҳом Алиевнинг ёрдамчиси Ҳикмат Гажиев 15 ноябрда ўтган матбуот анжуманида.

Унга кўра, Алиев Россия президенти Владимир Путин воситачилигида ўтказилган музокаралардан сўнг бунга розилик берган.

Арманистон Келбечер туманидан 15 ноябрь куни чиқиб кетиши ва назоратни Озарбайжонга топшириши лозим эди.

Гажиевнинг айтишича, арман ҳарбийлари Агдам туманидан 20 ноябргача ва Лачин туманидан 1 декабргача олиб чиқиб кетилиши шарт.

Келбечер тумани 1990 йилларда этник арманлар томонидан босиб олинган эди. Бу ерга ноқонуний кўчиб келган арманлар Тоғли Қорабоғда урушни тўхтатиш тўғрисида 10 ноябрда имзоланган шартномага асосан ўз уйларини тарк этмоқда. Ахборот агентликларининг билдиришларича, арманлар уйларига ўт қўйиб кетмоқда.

Кун янгиликлари

Британия ҳарбий кемасига Россия томонидан ўқ отилгани инкор қилинди

Британиянинг Defender ҳарбий кемаси.

Британия Қора денгиздаги ўз ҳарбий кемасига Россия томонидан ўқ отилгани тўғрисидаги хабарларни инкор қилди.

23 июнь куни Россия Мудофаа вазирлиги Қрим яримороли яқинида “чегарани бузган Британия ҳарбий кемаси”га қарата огоҳлантирувчи ўқ отилгани, Су-24 ҳарбий учоғи эса Британия кемасини ортга қайтариш учун бир нечта огоҳлантирувчи бомба ташлаганини билдирган эди. Россия 2014 йилда босиб олган Қримни ўз ҳудуди ўлароқ тақдим этади.

Британия расмийлари Қора денгизнинг Украинага қарашли бўлган қисмида Defender ҳарбий кемаси тинчлик мақсадида сузиб ўтганини тасдиқлади. Айни пайтда Британия кема Россия чегарасини бузиб ўтгани ва унга қарши руслар томонидан ўқ отилгани тўғрисидаги хабарларни инкор қилди.

“Defender ҳарбий кемасига қарши ҳеч ким огоҳлантирувчи ўқ отган эмас. Британия ҳарбий денгиз кучлари халқаро ҳуқуқ меъёрларига амал қилган ҳолда Украина ҳудудий сувлари бўйлаб тинч мақсадлардаги сузиб ўтишни амалга оширди”,-дейилади Британия расмий хабарида.

28 июнь куни Қора денгизда НАТО ва унга иттифоқдош бўлган давлатларнинг ҳарбий денгиз машқлари бошланади.

Машқларда 40та кема ва 30 самолёт иштирок этади. Москва НАТО ва унинг иттифоқчиларини мазкур ҳарбий денгиз машқларидан воз кечишга чақирган.

Жаҳонда коронавирусга чалинганлар сони 180 миллионга яқинлашди

Дунё бўйича коронавирусга қарши 2 миллиард 687 миллиондан ортиқ доза вакцина қўлланилган.

Жаҳон соғлиқни сақлаш ташкилотининг билдиришича, сўнгги бир кун ичида дунёда камида 281 минг кишида коронавирус аниқланди. Коронавирус юққанлардан 6 349 нафари вафот этди.

Ташкилот ҳисоб-китобича, дунёда коронавирус инфекциясини юқтирганлар сони бу билан 178 миллион 503 мингдан ошган. Ўлганлар сони эса 3 миллион 872 минг кишига етган.

Жаҳондаги коронавирус бўйича статистикани олиб бораётган Жонс Хопкинс университети эса 23 июнь ҳолатига кўра, дунёда касаллик шу кунгача 179 миллион 164 минг кишига юққани ҳақида маълум қилди. Беморлардан 3 миллион 882 мингдан ортиғи вафот этган.

Жонс Хопкинс университетининг ҳозирги маълумотларига кўра, дунё бўйича коронавирусга қарши 2 миллиард 687 миллиондан ортиқ доза вакцина қўлланилган.

Ашхабод хорижликлар учун жаҳондаги энг қиммат, Тошкент ва Бишкек энг арзон шаҳар

Ашхабод манзараси.

Туркманистон пойтахти Ашхабод хорижликлар учун дунёдаги энг қиммат шаҳарлар рейтингида 1-ўринни эгаллади. Ашхабоддан кейинги бешликдан эса Ҳонконг, Байрут, Токио, Цюрих ва Шанхай ўрин олди.

Жаҳондаги энг қиммат ва арзон шаҳарлар рейтингидан 209 давлат жой олган. Мазкур давлатлар орасида Тошкент арзон шаҳарлар ўнлигидан жой олиб 203-ўринда қайд этилди. Бишкек эса дунёдаги энг арзон шаҳар сифатида тан олинди ва 209-ўринни эгаллади.

Жаҳондаги энг қиммат ва арзон шаҳарлар рейтинги 26 йилдан бери АҚШнинг Mercer ширкати томонидан тузилади.

Мазкур рейтинг ширкатлар ва ҳукуматларга хориждаги ўз ходимларига иш ҳақини белгилашда инобатга олинади.

Рейтингни шакллантиришда 209та шаҳардаги турар-жой ижараси, транспорт ва озиқ-овқат ҳаражатлари, 200 турдаги товар ва хизматларнинг нархи эътиборга олинади.

Одатда иқтисодиётнинг ўсиши ортидан шаҳарларда яшаш нархи ҳам ўзгариб боради. Аммо Ашхабодда нарх-наво иқтисодий ўсиш ортидан эмас, балки бир неча йилдан бери давом этаётган чуқур иқтисодий инқироз ортидан юқорилаб кетган.

Қирғизистоннинг айрим ҳудудларида қашшоқлик даражаси 40 фоизга етди

Жаҳон банки 2021 йилнинг март ойида Қирғизистонда қашшоқ аҳоли сони 35 фоизга етганини билдирган.

Қирғизистонда қашшоқлик даражаси 25 фоизга, айрим ҳудудларда эса 40 фоизга етди. Бу ҳақда 23 июнь куни Бишкекда тадбиркорлар билан учрашган мамлакат президенти Садир Жапаров маълум қилди.

Шу муносабат билан Садир Жапаров сўнгги кунларда кўплаб тадбиркорларни турли айбловлар билан қамоққа олаётган ва сўроқларга чақираётган ҳуқуқ-тартибот тузилмалари фаолиятини танқид қилди. Президент уларни тадбиркорлар фаолиятига ҳалақит бермасликка чақирди.

Садир Жапаров ўз сўзида Қирғизистон иқтисодиётининг 85 фоизи тадбиркорлар қўлида эканини урғулади.

Миллий статистика қўмитаси 2020 йилда Қирғизистонда аҳолининг 25,3 фоизи қашшоқлик даражасида яшаётганини маълум қилган. 2019 йилда бу кўрсаткич 20,1 фоиз даражасида эди.

Жаҳон банки 2021 йилнинг март ойида Қирғизистонда қашшоқ аҳоли сони 35 фоизга етганини билдирган.

АҚШда Эрон ҳукуматига мойил бўлган ўнлаб сайт блок қилинди

Блок қилинган 33 сайт Эрон Радио ва телевидение ислом иттифоқига қарашли.

Қўшма Штатларда Эрон ҳукуматига мойил ёки қарам бўлган ўттиздан ортиқ сайт блок қилинди. АҚШ ҳукумати блок қилинган сайтларни ёлғон маълумотларни тарқатишда айбламоқда.

Расман билдирилишича, блок қилинган 33 сайт Эрон Радио ва телевидение ислом иттифоқига, яна учта сайт Эрон томонидан қўллаб-қувватланаётган Катоиб Ҳизбалла жангари ҳаракатига тегишли.

Эрон расмийлари АҚШ ҳукуматининг бу қарорини танқид қилди ва “ноконструктив” деб баҳолади.

АҚШнинг Хорижий активларни назорат қилиш агентлиги ўтган йили Эрон Радио ва телевидение ислом иттифоқи Ислом инқилоби посбонлари корпуси томонидан назорат қилиниши тўғрисида баёнот тарқатган эди.

Ҳонконгдаги мустақил газета 26 июндан бошлаб ўз фаолиятини тўхтатишини эълон қилди

Аввалроқ Хитой ҳукумати Apple Daily бош муҳаррири ва газетанинг яна беш раҳбарини ҳибсга олган эди.

Ҳонконгдаги энг йирик мустақил демократик газета Apple Daily 26 июндан бошлаб ўз фаолиятини тўхтатишини эълон қилди. Таҳлилчилар фикрича, бу Ҳонконгдаги сўз ва матбуот эркинлигига берилган энг катта зарба бўлади.

Аввалроқ Хитой ҳукумати Apple Daily бош муҳаррири ва газетанинг яна беш раҳбарини шаҳар миллий хавфсизлигига оид қонунни бузганликда айблаб ҳибсга олган эди. Бундан ташқари ҳоким қарори билан газетанинг 2,3 миллион долларлик активлари музлатиб қўйилди.

Газета асосчиси бўлган миллиардер Жимми Лай 2019 йилда Ҳонконгда Хитой ҳукуматининг босимига қарши ўтказилган норозилик митингларида иштирок этгани учун қамоққа олинган.

Жимми Лай миллий хавфсизлик тўғрисидаги қонун талабларини бузганликда ва хориж давлати билан битим тузганликда ҳам айбланмоқда.

Ҳонконг миллий хавфсизлиги тўғрисидаги қонун ўтган йили қабул қилинган эди. Шаҳар аҳолиси бу қонунга қарши бир неча миллион киши иштирок этган намойишларни ўтказган. Халқаро ҳамжамият эса мазкур қонунни танқид қилган.

Ҳонконг мухториятни сақлаб қолиш шарти билан 1997 йили Хитойга ўтказиб берилгунига қадар Буюк Британия томонидан бошқариларди.

Москва суди Навальний ҳимоясига митингга чиққанлардан икки нафарини қамоқхонага йўллади

Москвада Навальний ҳимоясига ўтказилган норозилик акцияларининг биридан лавҳа

Москва суди шу йил 23 январида мухолифатчи Алексей Навальнийни дастаклаб митингга чиққан Ольга Бендас ва Александр Глушковни икки йиллик қамоқ жазосига ҳукм қилди. Москва судлари матбуот хизмати маълумотига кўра, бу одамлар норозилик намойиши чоғида полициячини калтаклаганликда айбланган.

“ОВД-Инфо” қайдича, Глушков айбини тан олган, Бендас эса тан олган эмас. У иш умумий тартибда кўриб чиқилишини рад этган.

Тергов талқинига кўра, Пушкин майдонидаги митинг чоғида Бендас полициячини бир неча бор урган ва ерда ётган резина тўқмоқни олган. Акциядан олинган видеода Бендас қўлида полициячи тўқмоғи билан қор уюмидан тураётгани, нима бўлганда ҳам бу ўлжани ёнида қолдиришини айтгани акс этган.

Москвага Мурманск вилоятидан келган Александр Глушков февраль ойида ҳибсга олинган. Тергов маълумотига кўра, акция чоғида у полициячининг бошига ва гавдасига урган. Муаллифи номаълум бўлган “Кремлевская прачка” телеграм-канали томонидан ёйинланган видеода у ОМОН ходимининг елкасига икки марта ургани акс этган.

Бендас ва Глушков қўлга олинганидан кейин Тергов қўмитаси уларнинг узр сўраган видеосини ёйинлаган. Бендас муштлашувда “ҳаммада кузатилган агрессив кайфият таъсирида” иштирок этганини айтган. Глушков “ҳамла чақириқлари” таъсири остида полициячини урганини айтган, бу орада Тергов қўмитаси видеосида, “Дождь” телеканали хабарига кўра, монтаж уламалари бор.

Мухолифатчи Алексей Навальнийнинг ҳибсга олиниши ва қамалишига қарши рухсат этилмаган норозилик акциялари 23 ва 31 январь ҳамда 2 февраль кунлари Россиянинг кўплаб шаҳарларида бўлиб ўтган. Митингларда рекорд даражада кўп одам тутиб кетилган. “ОВД-Инфо” лойиҳаси маълумотига кўра, акциялар чоғида умумий ҳисобда қарийб 11 минг одам полиция бўлимларига олиб кетилган. Норозилик чиқишларидан кейин юздан зиёд жиноят иши қўзғатилган. Акцияларнинг айрим иштирокчилари қамоқ жазосига ҳукм қилинган.

“Голос” ҳаракати: Россияда сайланиш ҳуқуқидан маҳрум камида 9 миллион фуқаро мавжуд

"Голос" жамоатчилик ҳаракати ҳамраиси Григорий Мельконьянц

Россияда бугунги кунда камида 9 миллион киши сайланиш ҳуқуқидан маҳрум қилинган. Бу сайланиш ёшидаги фуқаролар умумий сонининг 8 фоизини ташкил қилади, дейилган “Голос” сайловчилар ҳуқуқларини ҳимоя қилиш ҳаракатининг таҳлилий ҳисоботида.

Ҳисобот муаллифлари қайдича, сайланиш ҳуқуқидан маҳрум фуқароларнинг аниқ сонини ҳисоблашнинг иложи йўқ, келтирилган рақамлар эса фақат давлат идоралари маълумотларига асосланади.

Экспертларга кўра, экстремистик ташкилотлар фаолиятига алоқадор шахсларнинг сайловларда ўз номзодини қўйишини тақиқловчи янги қонун қабул қилинганидан ва Алексей Навальний тарафдорларига оид тузилмалар экстремистик ташкилотлар деб топилганидан сўнг пассив сайланиш ҳуқуқидан маҳрум этилиши мумкин бўлган фуқаролар бу ҳисобга кирмайди.

Пассив сайланиш ҳуқуқидан маҳрум бўлганларнинг аксари қисми — қўш фуқаролиги ёки чет давлатда яшашга рухсатномаси бор кишилардир. Уларнинг миқдори олти миллиондан ортиқ бўлиши мумкин, дея урғулаган “Голос”.

Бундан ташқари, кўплаб россияликларнинг сайланишига уларнинг судланганлиги халал беради — Жиноят кодексининг 417 та моддаси бўйича судланган кишиларга сайловларда иштирок этиш ман қилинган.

2020 йилда тахминан элликта янги жиноят таркиби жорий қилиндики, уларга кўра фуқаролар судланганлик олиб ташланганидан ёки тугатилганидан сўнг пассив сайланиш ҳуқуқидан вақтинча фойдалана олишмайди, дейилган ҳисоботда.

“Голос” маълумотига мувофиқ, “сиёсий” сабабларга кўра сайлана олмайдиганлар сони ҳозирча унчалик кўп эмас. Бироқ қонунчиликка “аксилэкстремизм” мазмунли тузатишлар киритилгач, бу рақам бир неча бараварга ўсиши мумкин, дея таъкидлашган экспертлар.

Рухсат этилмаган митинглардаги иштироки учун ҳибсга олинган шахслар ҳам сайланиш ҳуқуқидан маҳрум фуқаролар сафини тўлдириши мумкин. Шу билан бирга, митингларда қатнашиш қоидаларини бир неча марта бузиш “Дадин моддаси” бўйича жиноий жавобгарликка тортишга асос бўлиши мумкинки, бу ҳам пассив сайланиш ҳуқуқидан вақтинча маҳрум бўлишга олиб келади, дея қайд этишган ҳисобот муаллифлари.

Мазкур нормалар амалдаги сиёсатчиларнинг сайловлардаги иштирокини чеклашда аллақачон татбиқ қилинмоқда. Май ойи охирларидан буён олти киши: москвалик муниципал депутат Юлия Галямина, Навальнийнинг Архангельск вилоятидаги тарафдори Андрей Боровиков, вологдалик собиқ депутат Евгений Доможиров, “Янги социализм учун” ҳаракати етакчиси Николай Платошкин, коммунист Юрий Юхневич, ЛДПР аъзоси Антон Мирбалдаев сайланиш имкониятидан шу йўл билан маҳрум этилди.

“Голос” экспертлари фикрича, яна қарийб юз нафар сиёсатчининг пассив сайланиш ҳуқуқидан қилиниши хавфи жуда юқори. Улар орасида амалдаги ва собиқ депутатлар, жумладан Сергей Митрохин, Лев Шлосберг, Максим Резник, Дмитрий Гудков; Алексей Навальнийнинг сафдоши Любовь Соболь, ННТлар раҳбарлари ва бошқалар бор.

Сайловчилар ҳуқуқларини ҳимоя қилиш ҳаракати экспертлари Россиянинг амалдаги қонунчилиги пассив сайланиш ҳуқуқидан маҳрум қилиш учун зарур асослар ва ушбу чекловлар дахл қилган шахслар сони бўйича 1961 йилдан кейин қабул қилинган совет қонунларини ортда қолдиради, дея хулоса қилишган.

Беларусь авиаширкатларига қарши санкцияларга яна 7 мамлакат қўшилди

"Белавиа" ширкати учоғи

Европа Иттифоқига кирмайдиган етти Европа давлати Беларусь авиаширкатлари учоқларига ўз аэропортларидан фойдаланишни ҳамда ўзларига қарашли ҳаво ҳудудидан учиб ўтишни тақиқлади.

Албания, Черногория, Шимолий Македония ва Сербия, Исландия, Лихтенштейн ҳамда Норвегия бу қарорлари билан ЕИга аъзо 27 давлатнинг барчаси томонидан 4 июнь куни Лукашенко режимига қарши қабул қилинган санкцияларга қўшилишган.

Санкциялар Александр Лукашенконинг Ирландияга оид Rianair ширкати учоғини мажбурий қўндириш ва босиб олишга буйруқ берганига жавоб тариқасида жорий қилинган. Учоқ бортида 126 нафар йўловчи ва 6 кишилик экипаж бўлган. Учоқ қўндирилгач, Беларусь махсус хизматлари блогер Роман Протасевич ҳамда унинг қиз ўртоғи, Россия фуқароси София Сапегани ҳибсга олганлар.

ЕИнинг ташқи сиёсат бўйича вакили Жозеп Боррель мазкур етти мамлакат ЕИ Кенгаши қабул қилган санкцияларни давом эттиришини билдириб, мазкур қарорни олқишлади.

Бир неча кун олдин ЕИ Лукашенко режимига қарши янги санкцияларни жорий этган — улар мамлакатнинг энг йирик автомобилсозлик корхоналари бўлмиш МАЗ ва БелАЗга дахл қилади. Рўйхатдароссиялик тадбиркор Михаил Гуцериевга алоқадор “Новая нефтяная компания”, “Белаэронавигация” ва яна 4 корхона номлари ҳам тилга олинган.

24-25 июнь кунларига белгиланган ЕИга аъзо давлатлар раҳбарлари саммитида Беларусь экспорти “нишонга олинган” секторал санкциялар қабул қилиниши кутилмоқда.

Афғонистонлик юздан зиёд ҳарбий Тожикистонга қочиб ўтди

Тожикистонга қочиб ўтган афғонистонлик ҳарбийлар (Тожикистон МХДҚ Чегара қўшинлари фотоси)

Афғонистоннинг Қундуз вилоятида “Толибон” ҳаракати жангарилари билан тўқнашган ҳукумат кучларининг 100 дан зиёд ҳарбийси Тожикистон ҳудудига қочиб ўтган. Бу ҳақда 22 июнь куни Тожикистон Миллий хавфсизлик давлат қўмитаси билдирди, дея хабар қилди Озодликнинг тожик хизмати.

“22 июнь куни соат 09.00 гача давом этган қуролли тўқнашув натижасида Афғонистон ҳукумат кучларининг ҳужумга дош беролмаган 134 нафар ҳарбийси “Панж” чегара отрядининг 3 ва 4-заставаси орқали Тожикистон Республикаси ҳудудига чекинишга мажбур бўлишган”, дейилган МХДҚ Чегара қўшинлари матбуот маркази томонидан тарқатилган баёнотда.

Хабарномада тожикистонлик чегарачилар “инсонпарварлик ва яхши қўшничилик тамойилларидан келиб чиққан ҳолда давлат чегарасини кесиб ўтган афғонистонлик ҳарбийларнинг Тожикистон ҳудудига тўсиқсиз киришига рухсат берганлар”, дея қайд этилган.

Тожикистонлик чегарачилар икки мамлакат ўртасидаги чегарада вазиятни “таранг” дея баҳолаганлар ҳамда “Шерхон-Бандар” чегара маскани ҳудудида яраланган, ўлдирилган ва асир олинган афғонистонлик ҳарбийларнинг умумий сони юзга яқин эканини билдирган.

Хабарларга кўра, тожик-афғон чегарасидаги “Шерхон-Бандар” божхона ва савдо ўтиш жойи сешанба куни толиблар қўлига ўтган.

Москвада эмланмаган ёки ПЗР-тести бўлмаганларнинг ресторан ё кафега кириши тақиқланади

Москва мэри Сергей Собянин коронавирусга қарши эмланмаган, хасталикка чалиниш ортидан аксилтаначаларга эга бўлмаган ёки қўлида ПЗР-тести манфий натижа берганига оид ҳужжати бўлмаганларга шу йил 28 июнидан бошлаб шаҳардаги ресторан ва кафеларга киришни тақиқлаб қўйди. Бу ҳақда мулозим ўз блогида маълум қилган.

Кишининг тест топширгани ёки эмланганига оид сертификатлар давлат маълумотлар базасида қайдга олинган бўлиши шарт, ҳужжатлар QR-код орқали текширилади. Айни пайтда қоғоз шаклидаги маълумотномалар қабул қилинмаслиги айтилган.

Бу каби тартиб шу йилнинг 22 июнидан концертлар, спорт тадбирлари ва рақс майдонлари учун ҳам киритилганди. QR-код орқали текширув ўтказишни таъминлай олмаган муассасалар ёпилиши ваъда қилинган. Аммо 500 нафаргача киши иштирок этадиган оммавий тадбирлар учун истисно тариқасида рухсат берилган.

“Биз қабул қилаётган қарорлар мураккаб ва ҳаммага ҳам ёқавермайди, бироқ улар инсонлар ҳаётини сақлаб қолиш учун зарур”, дея билдирган Собянин. Аммо мэрия томонидан жорий қилинаётган бу каби чекловларнинг қонунларга нақадар мувофиқ ёки йўқлиги маълум эмас.

Июнь ойида Россияда коронавирусга чалиниш ҳолатлар кескин кўпайиб кетиши қабатида айрим минтақаларда қайтадан карантин чекловлари жорий этилган ҳамда хизмат кўрсатиш, савдо соҳаси ходимлари ва давлат амалдорларининг бир қисми мажбурий равишда эмловдан ўтказилиши эълон қилинган.

Россия қонунларига кўра ҳар қандай тиббий дахл (эмлов ҳам шунинг ичига киради) ихтиёрий бўлиб ҳисобланади. Ҳуқуқшунослар мажбурий эмловдан ўтиш талаби кўп ҳолларда ноқонуний эканини қайд этадилар. Аввалроқ Кремль мажбурий эмловга қарши эканини, бироқ эртами-кечми эмланмаганлар “дискриминацияга учраши муқаррар”лигини билдирган.

Осори атиқа ҳисобланмиш китоблар ва сопол буюмлар Россиядан Ўзбекистонга қайтарилди

Россия божхоначилари томонидан Ўзбекистонга топширилган китоб ва сопол буюмлар (ФБХ фотоси)

Россия Федерал божхона хизмати (ФБХ) XIII-XIX асрларга оид бўлган 29 та китоб ва 16 та сопол буюмни Ўзбекистонга қайтарди.

ФБХ матбуот хизмати маълумотига кўра, маданий бойликларни Ўзбекистон давлат божхона қўмитаси вакилларига топшириш маросими 21 июнь куни Москвада бўлиб ўтган.

Осори атиқалар ноқонуний олиб кирилган маданий бойликларни тутиб қолиш ва қайтариш бўйича икки мамлакат божхона хизматлари ўртасида тузилган ҳамкорлик шартномасига мувофиқ равишда топширилган.

Санъатшунослик экспертизаси хулосасига кўра, ўзбекистонлик божхоначиларга топширилган китоблар орасида XIX асрда кўчирилган арабий, форсий ва туркий тиллардаги диний асарлар, форсий ва туркий тиллардаги назмий тўпламлар бор. Кўза, коса, хум каби сопол буюмлар эса ўрта асрларда самарқандлик кулоллар томонидан ясалгани айтилмоқда.

Қайд этилишича, мазкур маданий бойликлар ноқонуний олиб киришга уриниш чоғида Қрим божхонаси ходимлари томонидан тўхтатиб қолинган. Китоб ва сопол ашёлар қримлик бир аёлнинг шахсий буюмлари орасидан чиққан.

Аёл Россия Федерацияси Жиноят кодексининг 226.1-моддаси 1-қисмида (контрабанда) кўзда тутилган жиноятни содир этганликда айбдор деб топилиб, шартли равишда икки йилга озодликдан маҳрум этилган.

Толибон жангарилари Тожикистон билан чегарадош ҳудудини эгаллади

Қундуз вилояти. 22 июнь, 2021 йил.

Толибон жангарилари сўнгги кунларда жанговар ҳаракатларни кучайтирди ва Афғонистон шимолида Тожикистон билан чегарадош ҳудудларни қўлга киритди.

БМТнинг Афғонистон бўйича вакили Дебора Лайнснинг 22 июнда маълум қилишича, Толибон мазкур ҳудуддаги 370 туманнинг 50дан ортиғида назоратни ўз қўлига олди. Дипломат бу билан қўшни давлатларга таҳдид пайдо бўлганини урғулади.

АФП агентлигининг билдиришича, жангарилар Қундуз вилоятидаги Ширхон Бандар шаҳарчасини ҳам босиб олган.

Мазкур шаҳарча вилоят марказидан 50 километр олисликда жойлашган. Қундуз вилояти Тожикистон билан чегарадош бўлган асосий ҳудуд ҳисобланади.

Тожикистон ҳукумати расмий вакилларидан бири 22 июнь куни Афғонистон билан чегарадош ҳудудда ўқ овозлари эшитилганини тасдиқлади ва қўшни давлат чегарачилари Тожикистон ҳудудига қочиб ўтишга мажбур бўлгани тўғрисидаги маълумотларни инкор қилди.

Қирғизистон парламенти қўмитаси Қирғизистон - Ўзбекистон тараққиёт фонди шартномасини маъқуллади

Қирғизистон парламентининг Халқаро муносабатлар, мудофаа ва хавфсизлик қўмитаси “Қирғизистон- Ўзбекистон тараққиёт фондини ташкил этиш шартномасини ратификациялаш тўғрисида”ги қонун лойиҳасини маъқуллади.

Қирғизистон - Ўзбекистон тараққиёт фондини ташкил этиш тўғрисидаги шартнома 2021 йилнинг 11 март куни Тошкентда икки давлат ҳукуматлари даражасида имзоланган эди.

Мазкур фонд Қирғизистон ҳудудида фаолият юритувчи тадбиркорларга молиявий кўмак кўрсатиш мақсадида ташкил этилади.

Фонднинг низом капитали дастлаб 50 миллион доллар миқдорида бўлади. Кейинроқ бу капитални 200 миллион долларга етказиш режалаштирилган. Фонд маблағи Ўзбекистон томонидан шакллантирилади.

Германия армиясида сўнгги юз йил ичида илк бор яҳудий руҳонийси лавозими жорий этилди

Немис армиясининг илк яҳудий раввини Жолт Балл.

Германия Қуролли Кучлари сафида 21 июнь куни яҳудий руҳонийси иш бошлади. Илк яҳудий раввин лавозимига келиб чиқиши венгриялик бўлган Жолт Балл тайинланди.

“Немис жамияти ва Германиядаги яҳудий жамоаси бу тарихий кунга етиб келиш учун жуда катта йўлни босиб ўтди”,-деди Балл Лейпциг синагогасида ўтган маросимда.

2019 йилда Германия ҳукмати немис армияси сафларида хизмат қилаётган 300 нафар яҳудийнинг диний ибодати учун раввин лавозимини таъсис этиш тўғрисида Яҳудийлар марказий кенгаши киритган таклифни тасдиқлаган эди.

Айни пайтда Германияда уч минг мусулмон аскар ибодатини таъминлаш мақсадида имом лавозимини жорий этиш юзасидан ишлар олиб борилмоқда.

Яҳудийлар Германия армиясида Биринчи жаҳон уриши даврида хизмат қилган. 1933 йилда Германия ҳукумати тепасига Адольф Ҳитлер раҳбарлигидаги фашистлар келганидан сўнг, яҳудийлар жамиятдан ажартиб қўйилди. Фашистлар Германияси томонидан миллионлаб яҳудий ўлдирилди.

Испаниядан мустақиллик эълон қилмоқчи бўлган Каталония миллатчилари қамоқдан озод этилади

Испания Бош вазири Педро Санчес.

Испания Бош вазири Педро Санчес 2017 йилда мустақиллик эълон қилмоқчи бўлгани учун узоқ муддатларга қамалган Каталония сепаратчилари гуруҳи ҳукумат томонидан авф этилиши ва озодликка чиқарилиши тўғрисида баёнот берди.

“Муросага келиш учун кимдир биринчи қадамни ташлаши лозим. Испания ҳукумати бу қадамни ташлади”,-деди Бош вазир Каталония маркази Барселонада 21 июнь куни қилган чиқишида.

Каталония мухтор вилояти ҳокимиятига келган миллатчилар 2017 йилда мухториятнинг Испаниядан мустақиллиги масаласида референдум ўтказган ва минтақани мустақил давлат сифатида эълон қилган эди.

Референдумни ўтказишга рухсат бермаган Испания ҳукумати миллатчиларни қамоққа олган ва мухториятда 7 ой бевосита Мадрид бошқаруви ўрнатилган эди.

2019 йилда Испания Олий суди Каталония ҳукуматининг 12 аъзоси ва миллатчи фаолларни айбдор деб топган ҳамда 9 йилдан 13 йилгача қамоққа ҳукм қилган.

Ижтимоий сўров натижаларига қараганда, Испания аҳолисининг 53 фоизи каталон миллатчиларининг қамоқдан озод этилишига қарши. Айни пайтда каталонияликларнинг 68 фоизи бу қарорни қўллаб-қувватламоқда.

Карл Нассиб АҚШ Миллий футбол лигаси тарихида гей эканини тан олган биринчи футболчи бўлди

АҚШ Миллий футбол лигаси ўйинчиси Карл Нассиб.

АҚШ Миллий футбол лигасининг "Лас-Вегас Райдерс" жамоаси ўйинчиси Карл Нассиб гей эканини тан олди.

“Бу ишни кўпдан бери амалга оширишни ўйлаб юрардим. Ниҳоят мен очилдим ва ўзимни жуда енгил ҳис қилдим”,-деб ёзди футболчи инстаграм саҳифасида.

28 ёшли Нассибнинг айтишича, тренерлар, командасидаги бошқа ўйинчилар, оиласи ва дўстлари уни қўллаб-қувватлашган.

Нассиб АҚШ Миллий футбол лигаси тарихида ўз сексуал ориентацияси ҳақида очиқ айтган биринчи ўйинчи бўлди. Кўпчилик спортчилар ўз ориентациялари ҳақида спортни тарк этганларидан сўнг очиқ гапирган, лекин уларнинг сони бармоқ билан санарли.

Россия Аргентинага “Спутник V”нинг иккинчи дозасини вақтида етказиб бера олмаяпти

Аргентина ҳукумати “Спутник V” вакцинасининг янги партияси етказиб берилишига эришиш мақсадида Россия билан қизғин музокаралар олиб бормоқда. Аммо вакцина қачон, қанча миқдорда етказиб берилиши номаълум, деб ёзди Аргентинанинг La Nacion газетаси.

Кўплаб аргентиналиклар “Спутник V”нинг биринчи компоненти билан жорий йилнинг март-апрель ойларидаёқ эмланган, бироқ улар ҳанузгача такрор эмланган эмас. Россия тўғридан-тўғри инвестициялар фонди бу масалада изоҳ беришдан бош тортган.

Июнь ойи ўрталарида мамлакатга вакцинанинг биринчи компонентидан қарийб 7,9 миллион доза, иккинчисидан эса 1,5 миллион дозадан ортиқ, яъни тахминан беш баравар кам келтирилган эди. Аргентина ҳукумати биринчи ва иккинчи компонентлар билан эмлаш оралиқ даврини 12 ҳафтагача узайтириб бўлди.

“Биз Россиядан иккинчи дозани юборишни илтимос қиламиз, чунки кўплаб фуқароларимизнинг биринчи дозани олганига 12 ҳафта бўлай деб қолди”, деган La Nacion нашрининг соғлиқни сақлаш тизимидаги манбаси.

Унинг қўшимча қилишича, ҳозирча хавотирланишга ҳеч бир сабаб йўқ, чунки “Спутник V” биринчи компонентидаёқ 78,6 фоиз самарадорлик қайд этиб, касалликнинг оғир кечиши ва ўлим ҳолатларининг олдини олишга ёрдам бермоқда.

Аргентина сотиб олаётган вакциналардан фақатгина “Спутник V” икки компонентли препарат саналади. Россия вакцинасининг илк партияси 2020 йил декабрида Аргентинага келтирилган.

La Nacion манбасига кўра, июнь ойи охирида 70 минг киши иккинчи дозани олиши керак. Аргентина президенти маъмурияти Россия вакцина ишлаб чиқаришни кўпайтиришда қийинчиликларга дуч келаётганини, шу боис ҳукумат “Спутник V”нинг янги партиялари кечикишидан ташвишда эканини айтган.

Аргентина, шунингдек, Мексика ҳукуматлари май ойида ҳам “Спутник V” вакцинасининг иккинчи дозаси етишмаётганини билдирган эди. Bloomberg агентлиги “Россия сайёрамиз аҳолисининг ўндан бир қисмига вакцина етказиб беришга ваъда берган бўлишига қарамай, ташқи бозорлар сурункали танқисликни бошидан кечирмоқда”, дея қайд этган.

Тожикистонда яна коронавирусга чалиниш ҳолатлари қайдга олинаётгани расман тасдиқланди

Душанбедаги тиббиёт марказларидан бири

Тожикистон расмийлари мамлакатда яна коронавирус инфекцияси тарқай бошлаганини тасдиқладилар, дея хабар қилди Озодликнинг тожик хизмати.

21 май куни COVID-19 тарқалишини олдини олиш бўйича эпидемиологик чораларни кучайтириш Республика штаби мамлакат касалхоналарида коронавирусга чалиниш бўйича янги ҳолатлар қайд этилганини маълум қилган.

Вирус яна тарқай бошлаганини Республика штаби хориждан қайтганлар томонидан карантин муддатига риоя қилинмагани ва ниқоблар тақилмай қўйгани билан боғлаган.

Тожикистон расмийлари йил бошидан бери мамлакатда COVID-19 га чалиниш ҳолатлари бўлмаётганини билдириб келганлар. Соғлиқни сақлаш вазирлиги маълумотига кўра, пандемия бошидан бери Тожикистонда 13 минг 308 нафар киши коронавирус юқтириб олган, хасталик важидан 90 нафар бемор қурбон бўлган. Бироқ мустақил манбалар хасталикка чалинган ва у туфайли қурбон бўлганлар сони расмий статистикада кўрсатилганидан анча юқори эканини иддао қилмоқдалар.

12 июнь куни Озодликнинг тожик хизмати маҳаллий врачлар, хусусий лабораториялар ходимлари ва беморларнинг яқинлари сўзларига таянган ҳолда мамлакатда яна коронавирусга чалиниш ҳолатлари кузатилаётгани ҳақида хабар қилган. Тожикистон Соғлиқни сақлаш вазирлиги бу маълумот асоссизлигини айтиб, мамлакатда хасталаниш билан боғлиқ янги ҳолатлар кузатилаётганини рад этганди.

Бишкек кўчалари бўйлаб Ўзбекистонда ишлаб чиқарилган автобуслар қатнай бошлади

Бишкекка етиб келган ISUZU автобуслари

Қирғизистон пойтахти Бишкек шаҳрида 22 июндан Ўзбекистонда ишлаб чиқарилган 50 та янги ISUZU автобуси йўловчиларга хизмат кўрсата бошлади. Яқин кунларда автобусларнинг янги партияси келиши кутилмоқда. Қирғизистонликлар тадбиркорлар Ўзбекистонга жами 350 дона автобус учун буюртма берилганини айтмоқдалар.

Мазкур автобусларнинг узунлиги 6,9 метр, ўриндиқлар сони 16 та бўлса-да, унда 38 нафар йўловчи ташиш мумкинлиги айтилмоқда. Дастлабки партия билан келган автобуслар шаҳардаги 5 та йўналиш бўйлаб хизмат кўрсатмоқда.

Автобуслар қирғизистонлик хусусий тадбиркорлар (“Эко Пассажирские перевозки” МЧЖ) томонидан сотиб олинмоқда – янги транспорт учун пойтахт бюджетидан пул ажратилган эмас. Бишкек мэрияси ходимлари Озодликнинг қирғиз хизматига автобуслар нархидан бехабар эканларини айтганлар, “Эко Пассажирские перевозки” ширкати вакиллари эса автобусни етказиб бераётган ширкат талабига кўра бу маълумотни тақдим этолмасликларини билдирганлар.

ISUZUнинг Ўзбекистондаги расмий дилери сайтида мазкур автобуслар нархи 358 миллион сўм (33 минг АҚШ долларидан кўпроқ) ўлароқ кўрсатилган.

“Грозний” телерадиоширкати раҳбари Рамзан Қодировни танқид қилувчиларга ўлим билан таҳдид қилди

"Грозний" Чеченистон давлат телерадиоширкати директори Чингиз Аҳмадов

Давлатга қарашли “Грозний” телерадиоширкати директори Чингиз Аҳмадов Чеченистон раҳбари Рамзан Қодировнинг танқидчилари ва душманларини ўлдиришга ваъда берди.

Аҳмадов “Инстаграм”да чечен тилидаги ёйинлаган мазкур видеобаёнотини Кавказ.Реалии нашри рус тилига ўгириб, эълон қилган.

“Грозний” ЧДТРШ директори фикрича, Қодировнинг ҳар қандай душмани чечен халқининг ва шахсан унинг душманидир. “Кимнидир ўлдириш керак бўлса, ўлимга муносиб одам бўлса, ўлдирамиз. Кимнидир уриш лозим бўлса, урамиз”, деган Аҳмадов ўз видеосида.

“Грозний” телерадиоширкати ўз эфири орқали Рамзан Қодировнинг танқидчилари камера қаршисида Чеченистон раҳбаридан кечирим сўрагани акс этган лавҳаларни мунтазам намойиш этиб келади.

Май ойи охирларида TikTok ижтимоий тармоғида Қодировни “шайтон” деб атаган тулалик “Андрей Бушмелёв” тахаллусли блогернинг узр сўраб чиққани ТВ орқали кўрсатилган. Блогер ўша видеосида барча ёшларни Чеченистон раҳбари шаънига ҳақоратли сўзларни айтишдан эҳтиёт бўлишга чақирган эди.

Бу воқеадан сал аввалроқ пермлик бир ўсмир ва Москва вилоятининг Чехов шаҳрида яшовчи асли доғистонлик 15 яшар йигитчанинг қариндошлари омма олдида Рамзан Қодировдан кечирим сўраган — улар иккиси ҳам ижтимоий тармоқларда Қодировни “шайтон” деб атаганди.

Кавказ.Реалии маълумотига кўра, Чеченистон раҳбарига қарши чиқувчи россияликларга чора кўриш вазифаси республикадан ташқарида яшовчи чечен диаспораси зиммасига юклатилган. Улар Рамзан Қодиров ва унинг оила аъзолари ҳақидаги оммавий фикр-муносабатларни мониторинг қилиб, уларнинг муаллифларини қидириб топиш билан ҳам шуғулланади. Чеченистоннинг ўзида эса бунақа ишлар “тизимли йўлга қўйилган”, деб ёзади нашр.

Қозоғистон Қирғизистондан келишилган сув ҳажмининг ярминигина олмоқда

Қирғизистондаги Тўқтўғул сув омбори

Қозоғистоннинг Жамбил вилояти Қирғизистондан келадиган сувга қарам бўлгани учун бу йил сув тақчиллигига рўбарў бўлган. Бу ҳақда вилоят раҳбари Бердибек Сапарбаев Озодликнинг қозоқ хизматига билдирган.

“Биз сувни Ўртатўқай ва Киров сув омборларидан оламиз. Бугунги кунда икки давлат ўртасидаги келишувда кўрсатилган ҳажмдан фақат 50 фоизинигина оляпмиз. Ҳозир бу борада Қирғизистон вакиллари билан ишлаяпмиз. Яқинда делегация келиб кетди. Шу кунда сувни бизга бироз кўпроқ бера бошладилар, бироқ, афсуски, бу сув биз учун ҳозирча етарли эмас”, деган Сапарбаев.

Мулозимга кўра, бу ҳолат Қирғизистоннинг ўзида ҳам сув танқислиги кузатилаётгани, ҳаво ҳароратининг тоғлардаги музликларни эритиш учун етарли даража исимаётгани билан боғлиқ бўлиши мумкин.

“Шунинг учун ҳам биз ўз сув захираларимиздан (ерости ва ерусти сувларидан) самарали фойдаланишимиз, қўшимча ҳавзалар барпо қилишимиз керак. Даставвал улардан учта қурамиз, кейин эса улар сонини оширамиз. Шунингдек, биз қудуқларимиздаги носозликларни бартараф қилишимиз, кузгача кўлларни тўлдириб, булоқ сувларидан истеъфода этишимиз лозим. Ҳозир биз Қирғизистон сувларига 80 фоизга қараммиз. Шу кунда Чу ва Талас дарёлари ҳисобидан сувга бўлган эҳтиёжимизнининг 50 фоизинигина қондиряпмиз, холос”, дея қўшимча қилган Бердибек Сапарбаев.

Унга кўра, Жамбил вилоятидаги суғориладиган ерлар (тақрибан 200 минг гектар) учун сув эҳтиёжи 1,1 миллиард куб метрни ташкил қилади. Қозоғистон жануби ва жанубий-ғарбида бу йил кузатилаётган қурғоқчиликни эътиборга олган ҳолда Жамбил вилоятида деҳқон хўжаликларига сув навбат билан берилмоқда. Бу ҳолат айниқса Қирғизистон сувларига қарам бўлган уч туманга кўпроқ дахлдор.

Қирғизистонда бу йил сув захиралари танқислиги юзага келган. Тўқтўғул сув омборидаги сув ҳажми 10,8 миллиард куб метргача пасайган. Бу эса ўтган йилдаги сув ҳажми билан солиштирганда икки-уч миллиард кубга камдир.

Қирғизистон Энергетика ва саноат вазирлиги маълумотига кўра, сўнгги бир неча йил ичида кузатилаётган сув тақчиллиги сув омборини тўлдиришда муаммоларни юзага келтирган, бунинг натижасида 2020/2021 йил қишидан резервуар минимал даражадаги (8,6 миллиард куб метр) сув ҳажми билан чиққан.

Путинни оламшумул шахс сифатида кўрувчи россияликлар сони озайди

Сталин, Путин ва Ленин суратлари туширилган сувенир кружкалар.

Сўнгги тўрт йилда Россия президенти Владимир Путинни оламшумул шахс сифатида кўрувчи россияликлар сони кескин озайди.

Ижтимоий фикрни ўрганувчи Москвадаги “Левада” марказининг сўнгги сўров натижаларига таянган ҳолда хабар беришича, респондентларнинг 15 фоизигина Путинни оламшумул шахс сифатида эътироф этган. Бундан тўрт йил аввал бу кўрсаткич 34 фоиз эди.

Айни пайтда россияликларнинг 39 фоизи репрессиялар ва қатлиомлар ташкилотчиси сифатида шуҳрат қозонган СССРнинг собиқ раҳбари Иосиф Сталинни тарихдаги энг буюк сиёсатчи сифатида тан олади.

Сталиндан кейинги иккинчи ўринни 1917 йилги давлат тўнтариши оқибатида ҳокимиятга келган коммунистлар доҳийси Владимир Ленин эгаллаган. Уни сўралганларнинг 32 фоизи буюк шахс сифатида билади.

Европа Иттифоқи Беларусга қарши янги санкцияларни қабул қилди

Испанияда Лукашенкога қарши ўтган норозилик акцияси. 2021 йил 29 май.

Европа Иттифоқи ташқи ишлар вазирлари Беларусь президенти Александр Лукашенко, унинг яқин одамлари ва юқори даражали мансабдорларига нисбатан санкцияларни жорий этди. Санкция жорий этилганлар рўйхатига киритилганлар орасида Лукашенконинг оила аъзолари ҳам бор.

Янги санкциялар рўйхатига Беларусь мансабдорларидан 78 киши ва саккизта давлат идораси киритилди. Бу рўйхат Европа Иттифоқи махсус журналида эълон қилинади. Рўйхат асосан қонун чиқарувчилар, прокурорлар, судлар ва бошқа давлат амалдорларидан иборат.

Санкиця рўйхатига киритлган шахсларнинг хориждаги банк ҳисоб рақамлари музлатилади ва уларга виза бериш тўхтатилади.

Германияда университет илмий ходими Россия фойдасига жосуслик қилганликда гумонланиб қўлга олинди

Германия Олий суди биноси.

Германия федерал прокуратураси 21 июнь куни мамлакатдаги университетларда ишловчи илмий ходимлардан бири Россия фойдасига жосуслик қилганликда гумонланиб қўлга олинганини маълум қилди.

Расман билдирилишича, Илнур Н., 2020 йилнинг октябридан бошлаб Москва махсус хизматларига муайян миқдордаги пул эвазига немис университетидаги махфий маълумотларни етказиб турган. Уни қўлга олиш амалиёти 18 июнь куни ўтказилган.

Қўлга олинган шахснинг тўлиқ исми ва у ишлаган университет номи ошкор этилмаяпти. Прокуратура баёнотида таъкидланишича, у илмий-техника сохасига алоқадор бўлган кафедрада илмий ходим бўлган.

Федерал суд жосусликда гумонланиб ушланган шахсга тергов тугагунига қадар қамоқ эҳтиёт чорасини белгилади.

Давомини ўқинг

XS
SM
MD
LG