Линклар

Шошилинч хабар
19 сентябр 2021, Тошкент вақти: 09:23

Ўзбекистон хабарлари

Президент видеоселекторда Экология қўмитаси раҳбарини ишдан олди

Ўзбекистондаги сув булғалган ҳудудлардан бири.

Президент Шавкат Мирзиёев 24 август куни ўтказилган видеоселектор йиғилишида экология ва атроф-муҳитни муҳофаза қилиш давлат қўмитаси раиси Алишер Мақсудовни ишдан олди.

Билдирилишича, Алишер Мақсудов соҳадаги тизимли муаммоларни ҳал эта олмаган ва қатор камчиликларга йўл қўйган.

Президентнинг айтишича, сўнгги 4 йилда саноат корхоналари 2 бараварга ортиб, шаҳарларда чанг-газ миқдори меъёрдан 4 баравар ошган. Айни пайтда яшил майдонлар 3-4 баробарга қисқариб кетган ва ўртача 8 фоиздан камайиб кетган.

2017 йилдан 2020 йилгача “Ўзпахтасаноат” АЖ раиси сифатида ишлаган Алишер Мақсудов 2020 йил декабрида Экология ва атроф-муҳитни муҳофаза қилиш давлат қўмитаси раҳбарлигига тайинланганди.

Кун янгиликлари

Мирзиёев Афғонистоннинг хориждаги музлатилган активларини қайтаришни таклиф қилди 

Толибон вакиллари Тошкентда, Ўзбекистон.

Ўзбекистон президенти Шавкат Мирзиёев Душанбе шаҳрида ўтаётган Шанхай Ҳамкорлик Ташкилоти саммитида Афғонистондаги гуманитар вазиятни ҳисобга олган ҳолда хориж банкларида музлатиб қўйилган афғон активларини қайтаришни таклиф қилди.

Гап август ўртасида "Толибон" қўлига тушмаслиги учун АҚШ томонидан музлатилган Афғонистон Марказий банкининг миллиардлаб долларлари ҳақида бормоқда.

Ўзбекистон раҳбарининг таъкидича, пулларнинг қайтарилиши Афғонистондаги гуманитар инқироз, қочқинлар оқимининг кўпайишига чек қўяди, шунингдек, мамлакатга ижтимоий муаммоларни ҳал қилишда ёрдам беради.

Қўшма Штатлар Афғонистон ҳукуматининг Америка банк ҳисобларида сақланаётган захираларни музлатгани, бундан ташқари маблағлар толиблар қўлига тушмаслиги учун Афғонистонга катта миыдорда доллар етказишни тақиқлаган.

23 август куни Жаҳон банки ҳам Афғонистондаги лойиҳаларини молиялаштиришни вақтинча тўхтатган эди.

Халқаро валюта жамғармаси маълумотига кўра, Афғонистон Марказий банки 9,4 миллиард долларлик захира активларига эга бўлган.

Толибон ишғоли ортидан чет элга қочган Афғонистоннинг Марказий банки бошқарувчиси Ажмал Аҳмадий "Твиттер"да банкининг деярли барча захиралари чет элда жойлашган ва улар 9 миллиард доллардан кўпроқни ташкил қилади деб ёзган эди.

Ўзбекистон президенти Шавкат Мирзиёев Афғонистон Толибон қўлига ўтишидан саноқли кунлар ўтиб, ўзбек халқининг тинчлиги учун, "ким бўлишидан қатъиназар, исталган томон билан гаплашиши"ни билдирганди.

Пиёда юрганларга Мирзиёев ваъда қилган пуллар тўхтади

Ўзбекистонда бир суткада камида ўн минг қадам юрганларга 3 минг сўмдан бериш 14 сентябр кунидан тўхтади. 

Ўзбекистонда бир суткада камида ўн минг қадам юрганларга 3 минг сўмдан бериш 14 сентябр кунидан тўхтади.

Ўзбекистон Туризм ва спорт вазирлиги аҳолини кунлик юриш ва югуришга тарғиб қилиш бўйича “Соғлом турмуш тарзи” платформаси 1hls.uz мобил илова бўйича фойдаланувчиларга тўловлар вақтинча тўхтатилганини айтмоқда.

Вазирлик буни ғазна ҳисобварағига тушадиган тегишли даромадлар манбаларининг бир меъёрда доимий тушиш имконияти чекланганлиги билан изоҳлаган.

Мазкур шахсий ғазна ҳисобварағида 500,0 млн сўмдан кам маблағ қолса, мобил илова бўйича фойдаланувчиларга тўловлар, ушбу шахсий ғазна ҳисобварағида 5,0 млрд сўмгача маблағ йиғилгунга қадар автоматик тарзда тўхтатилиши белгилаб қўйилган.

“Бунда, шахсий ғазна ҳисобварағидаги маблағлар 5,0 млрд. сўмга етгунга қадар мобил иловада ўн минг ва ундан ортиқ қадам юрган фуқароларга тўланадиган тўловлар тўланмаслиги кўрсатиб ўтилган”, дейилади вазирлик хабарида.

Тўловлар қачондан қайта тикланиши ҳақида вазирлик баёнотида ҳеч нарса айтилмаган.

Ўзбекистонда юриш ва югуришни рағбатлантирувчи 1hls.uz иловаси шу йилнинг 10 июнида ишга туширилган эди.

Мазкур платформани ишлаб чиқиш тўғрисида президент Шавкат Мирзиёев 2020 йилнинг ноябрида махсус фармонни имзолаганди.

Режага кўра, ҳар ойда ҳар бир туман (шаҳар) бўйича энг кўп юрган шахсга 300 минг сўм, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга 1 млн сўм қўшимча равишда платформадаги электрон ҳамёнига ўтказилиши кўзда тутилганди.

Ўзбекистон Туризм ва спорт вазирлигига кўра, ўшандан буён бир сутка давомида ўн минг ва ундан ортиқ қадам юрган 18 ёш ва ундан юқори ёшдаги Ўзбекистон фуқароларининг платформадаги электрон ҳамёнига жами 9,4 млрд сўм маблағлар тўлаб берилган.

Шунингдек, ҳар ойда ҳар бир туман (шаҳар) бўйича энг кўп юрган шахсга 300 минг сўмдан, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга қўшимча равишда 1 млн. сўм тўланиб, жорий йил июнь-август ойлари давомида жами 206,7 млн. сўм маблағ фойдаланувчилар электрон ҳисоб рақамига ўтказилган.

"Малика" бозорида яна рейдлар, Тошкент ИИББ бу соқолга қарши тадбир эмаслигини билдирди

Ижтимоий тармоқларда тарқалган видеода "Малика" савдо мажмуасида ниқобли махсус кучлар юргани кўринади.

Тошкент шаҳар Ички ишлар бош бошқармаси "Малика" савдо мажмуасида хавфсизлик хизматининг махсус ходимлари юргани акс этган видео юзасидан изоҳ берди.

Ижтимоий тармоқларда тарқалган видеода савдо мажмуасида ниқобли махсус кучлар юргани кўринади.

"Малика" савдо мажмуасидаги баъзи савдогарлар профилактик суҳбат чоғида хавфсизлик ходимлари соқолини олишга мажбурлаганини айтишган.

"Бизни ҳудди жиноятчидай Шайхонтоҳур РОВДсига олиб бориб соқолимизни олишди", - деган савдогарлардан бири Озодликка.

"Малика" бозорида рейдлар
Илтимос кутинг
Киритиш (Embed)

Айни дамда медиа-манба мавжуд эмас

0:00 0:00:11 0:00

Озодликка юборилган яна бир видеода кадр ортидан гапирган одам: "Маскалилар келди, соқоллиларни босишяпти, огоҳ бўлинглар!", дейди.

Тошкент шаҳар ИИББ матбуот хизмати пойтахтдаги "Малика" савдо мажмуасида профилактик тадбир ўтказилганини тасдиқлади.

"Шайхонтоҳур туманида Тошкент шаҳар ИИББ ходимлари томонидан "Хавфсиз шаҳар" концепцияси ижроси доирасида ҳамда жамоат тартибини таъминлаш, жиноятларнинг олдини олиш, гиёҳвандлик воситаларининг тарқалишига барҳам бериш мақсадида профилактик тадбирлар ўтказилмоқда", - дейилади Тошкент шаҳар ИИББ матбуот хизмати билдирувида.

Тошкент шаҳар ИИББнинг Озодлик суҳбатлашган мулозими рейдлар "соқол"га қарши ўтказилмаганини айтди.

Бу "Малика" бозоридаги биринчи профилактик тадбир эмас.

Икки йил аввал Тошкентда жума намозидан сўнг ички ишлар ходимлари “Малика” савдо мажмуасида ўнлаб соқолли эркакларни тутиб олиб кетиб, соқолини олишга мажбурлагани норозиликларга сабаб бўлган ва инсон ҳуқуқлари ташкилотлари томонидан танқид қилинган эди.

Шу йилнинг февраль ойида ҳам “Малика” мажмуасидаги савдогарлар соқоли мажбурлаб олингани ҳақда Озодликка айтишганди.

Ўшанда Тошкент шаҳар ИИББ матбуот котиби Ирини Сайфуддинова Озодлик билан суҳбатда бозорда савдогарлар соқоли мажбурлаб олинганини рад этаркан, "ҳеч ким соқолини олишга мажбурланмаслигини" таъкидлаган эди.

Сайфутдинова фуқароларга "ташқи кўринишларини биометрик паспортларидаги суратларга мувофиқлаштириш тавсия этилган бўлиши мумкин"лигини инкор қилмаган.

"Малика" бозорида "мажбурлаб соқол олиш тадбирлари" Ўзбекистонда Шавкат Мирзиёев президентлиги даврида халқаро ташкилотлар тарафидан нисбатан яхшилангани айтилаётган диний эркинлик вазиятига соя солди.

Ҳуқуқбонларга кўра, фуқароларнинг соқоли мажбуран олиниши инсон ҳуқуқлари поймол этилишини англатади.

Ўзбекистон расмийлари ва ҳуқуқ-тартибот идораларининг диний рамз деб кўриладиган соқол ва ҳижобга қарши кампаниялари халқаро жамоатчилик, жумладан, АҚШ Давлат департаменти томонидан ҳам танқид қилиб келинган.

Тошкентда 12 нафар шахс ҳизбчиликда гумонланиб ушланди

Тошкент шаҳрида 12 нафар шахс “Ҳизб ут-Таҳрир” диний-экстремистик ташкилотига аъзолигида гумонланиб қўлга олинган.

Бу ҳақда Тошкент шаҳар Ички ишлар бош бошқармаси маълум қилди.

17 сентябрь куни Тошкент шаҳрининг Олмазор, Учтепа, Яшнобод ва Юнусобод туманларида ўтказилган рейдларда ушланганлар ёнидан эктремистик мазмундаги материаллар топилгани айтилади.

"Таҳрирчилар”нинг барчаси 1980 й.т. Юнусобод туманида истиқомат қилувчи “Р.У.”нинг ғоявий таъсири остида экстремистик фаолият билан шуғулланиб келганлар.

“Р.У.” ва унинг жиноий алоқалари интернет ижтимоий тармоғи орқали Украина давлатида яшириниб келаётган 1980 йилда Қирғизистон Республикасида туғилган, “Махмуд Абдулмўмин” тахаллусли – Холдаров Махмуджон Абдумаликович билан алоқа ўрнатиб, унинг маърузалари ва “Ҳизб-ут Таҳрир” экстремистик ташкилоти материалларини аҳоли орасида тарқатиш ҳамда унинг кўрсатмалари асосида “таҳрирчилар” сафига янги аъзоларни ёллаш билан шуғулланиб келганлар", дейилади Тошкент ИИББ билдирувида.

Бу сўнгги бир ҳафтада Тошкентда "диний экстремистик ташкилоти аъзоларининг жиноий фаолиятига чек қўйишга қаратилган" иккинчи рейд.

Бундан олдин Тошкентда “Ҳизб-ут Таҳрир”нинг аёллар қаноти фош этили, 22 нафар шахс қўлга олингани хабар қилинган эди.

ДСҚ: Ўзбекистон йил бошидан импортга 15,7 млрд сарфлаган

Ўзбекистон Давлат статистика қўмитаси маълумотига кўра, шу йилнинг январь-август ойларида Ўзбекистоннинг ташқи савдо айланмаси 25 млрд АҚШ долларига тенг бўлган.

Шунинг 15,7 млрд доллари импортга сарфланган.

Экспорт 9,3 млрд долларни ташкил этиб, унинг таркибида маҳсулотлар 7,7 млрд долларни, хизматлар – 1,6 млрд долларни ташкил қилди.

Импорт ҳажми 15,7 млрд долларга тенг бўлиб, унинг таркибида маҳсулотларга 14,7 млрд доллар, хизматларга 1,0 млрд доллар сарфланган.

2021 йилнинг беш ойида Хитой Ўзбекистон экспорт ва импортида етакчилик қилмоқда. Хитойдан импорт экспортга нисбатан 2 баробарга кўп.

Ўзбекистон импортида юқори улушга эга бўлган бошқа давлатлар эса Россия, Қозоғистон, Жанубий Корея, Туркиядир.

Озодлик суриштируви ортидан каттақўрғонлик солиқчи ўлими бўйича иш қайта судга юборилди

40 ёшли Азиз Аҳмедов Каттақўрғон туман солиқ инспекцияси бошлиғи ўринбосари эди.

Шу йилнинг 14 сентябрь куни Самарқанд вилояти прокуратураси Каттақўрғон тумани ДСИ бошлиғи ўринбосари, 40 яшар Азиз Ахмедовнинг ўлими юзасидан қўзғатилган жиноят ишини мазмунан кўриш учун иккинчи марта жиноят ишлари бўйича Каттақўрғон тумани судига юборди.

Бу ҳақда Ўзбекистон Республикаси Бош прокуратурасининг матбуот хизмати маълум қилди.

Бош прокураура маълумотига кўра, Азиз Ахмедовнинг ўлими юзасидан қўзғатилган жиноят иши доирасида 4 нафар нафар ички ишлар органи ходимига нисбатан Ўзбекистон Республикаси ЖКнинг 102-моддаси (Эҳтиётсизлик орқасидан одам ўлдириш) ва 206-моддаси (Мансаб ваколатидан четга чиқиш) билан жиноят иши қўзғатилиб, тергов ҳаркатлари тугалланган. Икки нафар ходим қамоққа олинган.

Самарқанд вилояти прокуратурасига кўра, жиноят иши дастлаб шу йилнинг августида уч нафар ички ишлар ходимининг ҳаракатларида жиноят аломатлари йўқ, деган айблов хулосаси билан судга юборилган. Бироқ солиқчининг қариндошларининг муттасил норозилигидан сўнг шу йилнинг 6 сентябрь куни жиноят иши суддан чақириб олиниб, тергов органи қарори бекор қилинган ва ходимларга нисбатан қайта иш қўзғатилган ҳамда уларнинг бир нафари қамоққа олинган.

13 сентябрь куни Озодлик радиоси Каттақўрғон тумани ДСИ бошлиғи ўринбосари Азиз Аҳмедовга нисбатан ички ишлар органлари ходимлари куч ишлатгани акс этган видеони эълон қилган эди.

Ўзбекистон Ички ишлар вазирлиги ҳодиса борасида боди-камера тасвирларини сохталаштиргани ўртага чиққан.

ИИВ матбуот котиби Шохруҳ Ғиёсов Озодлик сўровига жавобан, "Ҳолатга тўлиқ ҳуқуқий баҳо берилганидан сўнг, расмий маълумот берилади. Қонунчиликка риоя этиш зарур", деди.

Шу йилнинг 26 июнида президент Шавкат Мирзиёев қийноқларни баратараф этиш ва қийноқ қурбонларига компенсация тўлаш тартибини жорий этиш бўйича қарор қабул қилганди. Қарор кучга киргандан сўнг мамлакатнинг Денов, Тахиатош ва Нишон туманларида оқибати ўлим билан тугаган қийноқ ҳодисалари фош бўлди.

Аксилкоррупция агентлиги Самарқандда коррупцион схемаларни фош қилганини айтмоқда

Коррупцияга қарши курашиш агентлиги директори Акмал Бурхонов

Ўзбекистон Республикаси Коррупцияга қарши курашиш агентлиги томонидан Самарқанд вилоятида давлат харидларига оид ўтказилган тафтишлар қарийб 50 миллиард сўмлик талон-тарожликларни юзага чиқарди.

Бу ҳақда агентликнинг матбуот хизмати хабар қилди.

Маълум бўлишича, бюджетдан молияланадиган буюртмачилар томонидан «dxarid.uz» ва «tender.mc.uz» махсус ахборот порталида жойлаштирилган эълонларнинг аксарияти сохта бўлиб, буюртмачилар томонидан давлат харидларини амалга оширишда 18 та ҳолатда қонунбузилишлар аниқланган.

Масъул идоралар томонидан Халқ таълими вазирлиги ва Солиқ қўмитасининг қуйи тизимларига қарашли объектларда қурилиш ишларини амалга ошириш бўйича тендерлар эълон қилинган. Аммо ҳали тендер натижалари эълон қилинмай туриб, буюртмаларни хуфиёна қўлга киритган ширкатлар қурилиш ишларини аллақачон бошлаб юборган.

Бундан аввал Бош прокуратура давлат идоралари ҳамда вазирликлар тизимида миллиардлаб сўм маблағлар ўзлаштирилгани, тендерлар сохталаштирилгани ҳақида ҳисоботлар берган. Корруцияга қарши курашиш агентлиги ўрта ва қуйи бўғиндаги амалдорлар орасида коррупция ҳолатларини фош этиш билан чекланиб қолаётгани, ҳокимиятнинг юқори эшелонларидаги коррупция ва манфаатлар тўқнашувига эътибор қаратмаётгани учун танқид қилинади.

Аввалроқ агентлик директори Акмал Бурхонов турли идора ва мансабдор шахслар томонидан агентлик фаолиятига босим ўтказилишини тан олган.

Адлия вазири Давлетов: Оммавий эмлаш жараёнининг сустлиги давлатга ишончнинг пастлигини кўрсатади

Ўзбекистон Республикаси Адлия вазири Русланбек Давлетовга кўра, мамлакатда коронавирусга қарши оммавий эмлаш ишларининг суст кечаётгани халқнинг давлатга ишончи пастлигини кўрсатади.

Бу ҳақда вазир 14 сентябрь куни олий таълим муассасаларининг профессор-ўқитувчилари билан Тошкент давлат юридик университетида ўтган мулоқотда гапирган.

“Халқнинг давлат органларига ишончи нақадар муҳимлигини вакцинация жараёнида кўрдик. Қаерда, қайси мамлакатда давлатга халқнинг ишончи юқори бўлса, вакцинация даражаси шунча юқори бўляпти – булар ўзаро тўғри пропорционал” дея вазирнинг сўзларидан иқтибос келтирмоқда Kun.uz нашри.

Вазирга кўра, фуқароларнинг уй-жойлари, объектларнинг ноқонуний бузиб ташланиши халқнинг давлат органларига бўлган ишончига қаттиқ зарба берган. “Одамлар бир-бирини ёқиш орқали муаммони ҳал қилиши – бу цивилизациянинг ортга кетиши эди. Буни нега ўрганмайсизлар?” дея хитоб қилади вазир.

Русланбек Давлетов шунингдек, дарсликлар, таълим соҳасидаги адолатсизлик, жазони ижро этиш муассасалари ва ижтимоий соҳадаги аҳволни танқид остига олган.

Президент Мирзиёев Покистон бош вазири билан Афғонистондаги вазиятни муҳокама қилди

Шавкат Мирзиёев ва Имрон Хон Душанбедаги Шанхай Ҳамкорлик Ташкилоти саммити доирасида ўтган учрашувда икки томонлама муносабатлар ва Афғонистонадаги вазият муҳокама қилишган.

Бу ҳақда 16 сентябрь куни Ўзбекистон президентининг матбуот хизмати хабар қилди.

“Тошкент мулоқотларидан сўнг ўзаро товар айрибошлаш ҳажми 2,5 бараварга ошган. Тошкент ва Лаҳор ўртасида авиапарвозлар тикланган. 30 дан ортиқ қўшма корхоналар бунёд қилинди. Савдо-иқтисодий соаҳаларда келишилган битимларга амал қилинмоқда” дейилади матибуот хизмати хабарида.

Кузатувчиларга кўра, Ўзбекистон ва Покистон ҳукуматларининг ўзаро мулоқотлари гарчанд савдо-иқтисодий, сиёсий алоқалар билан дастакланса-да, мазкур учрашувларнинг ажралмас мавзуи Афғонистон ва толиблар масаласи бўлиб қолаверади. Чунки Афғонистоннинг икки қўшни мамлакати муносабатлари, шубҳасиз, Афғоистодаги вазият билан чамбарчас боғлиқдир.

Ўтган ҳафтада Жанубий Осиё ва Марказий Осиё мамлакатлари махсус хизматлари раҳбарларининг Исломободдаги жамоатчилик учун ёпиқ мажлисларида Ўзбекистон расмийлари ҳам иштирок этганига доир маълумотлар чиққанди, аммо тафсилотлар очиқланмаган.

Олти йиллик танаффусдан сўнг Тошкент билан Киев ўртасида авиақатнов тикланмоқда

Шу йилнинг 26 сентябридан эътиборан Uzbekistan Airways авиаширкати Тошкент – Киев – Тошкент йўналиши бўйича авиақатновларни тиклайди.

Авиаширкат матбуот хизмати қайдича, мазкур йўналиш бўйлаб қатнов, режага мувофиқ, ҳафтада бир марта – якшанба кунлари амалга оширилади.

“Тошкент – Киев йўналишида авиачипта 2 234 655 сўмдан (багажсиз) ва 2 575 535 сўмдан (багажни ҳисобга олган ҳолда), Тошкент – Киев – Тошкент йўналишидаги авиачипталар эса 4 205 223 сўмдан (багажсиз) ва 4 836 482 сўмдан (багажни ҳисобга олган ҳолда) бошланади”, дейилган авиаширкат хабарномасида.

Ўзбекистон билан Украина пойтахтлари ўртасида мунтазам авиақатновлар 2015 йилдан бери иқтисодий ихтилофлар туфайли тўхтаб қолган, ўшандан бери бу йўналишни тиклаш учун бир неча бор уриниш бўлган, бироқ улар натижасиз якунланган эди.

Коронавирус юқтириб олганларнинг умумий сони 167 минг нафардан ошди

Ўзбекистонда коронавирус инфекцияси қайд этилганлар сони, 2021 йил 16 сентябрь ҳолатига кўра, 167 минг 268 нафарга етган.

Соғлиқни сақлаш вазирлиги қайдича, кеча мамлакат бўйлаб 624 киши коронавирусга чалинган.

Пайшанба куни Бухоро, Сирдарё ва Хоразм вилоятларидан ташқари ҳудудларда 977 киши тузалиб, соғайганларнинг умумий сони 160 минг 421 нафарга етган.

ССВ ўтган кеча-кундузда коронавирусга чалинган беморлардан яна 4 нафари вафот этиб, коронавирус қурбонлари сони 1 минг 179 нафарга етганини қўшимча қилган.

Вазирлик маълумотига кўра, 16 сентябрь куни 133 нафар кишида пневмония аниқланган, 5 июлдан бери эса 25 минг 956 киши пневмонияга чалинган. Булардан 21 минг 297 нафари соғайиб чиққан, 211 нафари эса вафот этган.

Қуйи Амударё биосфера резервати ЮНЕСКО бутунжаҳон тармоғига киритилди

Бухоро кийиклари

Ўзбекистондаги Қуйи Амударё биосфера резервати ЮНЕСКО бутунжаҳон биосфера қўриқхоналари тармоғига киритилди.

Ташкилот сайтида қайд этилишича, мазкур қарор ЮНЕСКО “Инсон ва биосфера” дастури Халқаро мувофиқлаштириш кенгашининг шу йил 13-17 сентябрь кунлари Нигерияда ўтказилаётган 33-сессияси чоғида маъқулланган.

Сессияда тармоққа Ўзбекистон резервати билан биргаликда 21 мамлакатдан 20 та янги объект киритилган.

Қуйи Амударё давлат биосфера резервати Амударё қуйи оқимининг шимолий қисмида жойлашган. Хабарномада унинг Марказий Осиёдаги энг йирик табиий тўқайлардан бири экани ва глобал нуқтаи назардан йўқ бўлиб кетиш хавфи остида турган ноёб экотизим экани қайд этилган.

Экологлар бу ҳудуднинг йўқолиб кетиш хавфи остида турган Бухоро кийиклари (Cervus hanglu bactrianus) қўриқланадиган табиий яшаш жойи эканини урғулаганлар.

Бу ЮНЕСКО бутунжаҳон биосфера қўриқхоналари тармоғига киритилган Ўзбекистондаги иккинчи резерват бўлиб ҳисобланади. Мазкур тармоққа 1978 йили Чотқол қўриқхонаси киритилган эди.

Душанбега сафари доирасида Мирзиёев Эрон президенти билан учрашди

Ўзбекистон президенти Ш. Мирзиёев Эрон президенти И. Раисий билан, Душанбе, 2021 йил 16 сентябри (president.uz фотоси)

Тожикистон пойтахтига ташрифи доирасида Ўзбекистон президенти Шавкат Мирзиёев Эрон президенти Иброҳим Раисий билан учрашув ўтказди.

Президент матбуот хизмати маълумотига кўра, учрашув чоғида Мирзиёв билан Раисий минтақа кун тартибидаги масалаларни, шу жумладан Афғонистонда вужудга келаётган вазиятдан келиб чиққан ҳолда кўриб чиққанлар.

Президентлар суҳбатида икки мамлакат ўртасидаги амалий ҳамкорликни кенгайтириш масалаларига алоҳида эътибор қаратилган, савдо-иқтисодий алоқалар суръатини давом эттириш ва янги “ўсиш нуқталари”ни аниқлаш мақсадида қўшма Ҳукуматлараро комиссия ишини фаоллаштиришга келишиб олинган.

Учрашув пайтида “йўл харита”си асосида саноат кооперациясини кучайтириш истиқболлари ҳамда икки мамлакат транзит салоҳиятини самарали ишга солиш имкониятлари ваколатли идоралар даражасида пухта ўрганилиши қайд этилган.

АҚШ ва Германия элчихоналари ўзбекистонликлардан виза учун аризалар қабул қила бошлади

АҚШнинг Ўзбекистондаги элчихонаси октябрь ойидан бошлаб виза бериш учун аризачиларни суҳбатга қабул қилишни бошлаши ҳақида эълон қилди.

Элчихона чекланган суҳбатга фақат Ўзбекистон фуқаролари ва резидентлари чақирилишини билдирган.

Қайд этилишича, консуллик бўлими дипломатик визалар билан бир қаторда фақат F, J, H, O, P, L, C1D, I, R виза мурожаатларини қабул қилади.

“Диққат, биз ҳозирда одатий B1B2 бизнес ва сайёҳлик визалари учун суҳбатга қабул қилмаймиз”, дея урғуланган АҚШ элчихонаси хабарномасида.

АҚШ Давлат департаменти ўтган йил мартидан эътиборан барча элчихона ва консулликларида виза беришни тўхтатиб қўйганди.

Бу орада Германиянинг Тошкентдаги элчихонаси ҳам ўзбекистонликларга Шенген визасини бериш бошланганини эълон қилган.

Элчихона маълумотига кўра, виза бўлими душанбадан пайшанбагача одатий иш соатларида: 8:00 дан 12:30 гача ва 13:00 дан 17:15 гача, жума: 8:00 дан 14:00 гача ишлайди.

Дипломатлар Шенген визасини олиш учун аризалар фақат COVID билан боғлиқ чекловлар истисно қилинган ҳолда қабул қилиниши мумкинлигини эслатишган.

Германия элчихонаси Афғонистондаги вазият туфайли шу йил 22 августидан виза беришни тўхтатиб қўйган эди.

Ички ишлар вазирлиги товламачилар УЗКАРДнинг сохта сайтини ишлаб чиққанини билдирди

Иллюстратив сурат.

Ички ишлар вазирлиги Киберхавфсизлик маркази интернет-фирибгарлар «Ягона Умумреспублика Процессинг Маркази» (УЗКАРД)нинг сохта веб-сайтини ишлаб чиққанларини аниқлади.

Билдирилишича, интернет-фирибгарлар https://uz-investt.space ҳаволали сохта сайт орқали фуқароларнинг пластик карталаридаги пулларни ўғирлашни режалаштирган.

Мазкур «фейк» веб-сайт орқали “UzCard Investment” лойиҳаси доирасида миллий банк хизматларининг фаол фойдаланувчиларига бир марталик 994 минг 558 сўм миқдорида компенсация тўланиши тўғрисида хабар юборилган. Фойдаланувчилардан бу пулни олиш учун шахсига ва банк пластик картасига оид маълумотлари, телефон рақамини ҳамда смс тариқасида келган тасдиқлаш кодини киритиш талаб қилинган.

Катта пулга эга бўлиш истагида бўлган фойдаланувчи тасдиқлаш кодини «фейк» ресурсга киритиши билан интернет-фирибгарлар унинг пластик картасини бошқариш ҳуқуқини қўлга киритади ва банк ҳисоб рақамидаги пулни ечиб олишга муваффақ бўлади.

“Шу сабабли, барча интернет фойдаланувчиларини, айниқса УЗКАРД тўлов тизими мижозларини мазкур «фейк» веб-сайтнинг ноқонуний фаолияти тўғрисида огоҳ бўлишларини, тўлов тизимларидан фойдаланаётганларида эса, уларнинг расмий веб-сайтларида тақдим этилган хизматларга мурожаат этишларини сўраб қоламиз”,-дейилади расмий билдирувда.

Ўзбекистон Қирғизистон ҳудудидаги ўз эксклавларида махсус солиқ режимини жорий қилди

Ўзбекистон ва Тожикистоннинг Қирғизистондаги эксклавлари харитаси.

Фарғона вилоятининг Сўх тумани, Риштон туманининг Чўнғара маҳалласи, Фарғона туманининг Шоҳимардон, Ёрдон маҳаллалари ва Ҳосилот маҳалласининг Тоштепа – 2 кўчасида солиқ солишнинг алоҳида тартибини назарда тутувчи солиқ режими жорий этилди. Бу борадаги “Ўзбекистон Республикасининг Солиқ кодексига ўзгартиш ва қўшимчалар киритиш тўғрисида”ги Қонун президент томонидан имзоланди.

Фарғона вилояти таркибига кирувчи Сўх тумани, Шоҳимардон, Ёрдон, Ҳосилот ва Чўнғара маҳалласи Ўзбекистоннинг Қирғизистон ҳудудидаги эксклавлари ҳисобланади. Ёрдон ва Ҳосилот маҳаллалари Шоҳимардон эксклави таркибига киради.

Янги тартибга асосан мазкур ҳудудларда солиқ ставкалари фойда ва даромад солиғи бўйича 1 фоиз, тадбиркорлар учун ҳар чоракда 25 минг сўм миқдорида белгиланади.

Ижтимоий солиқ юридик шахслар учун 1 фоиз, якка тартибдаги тадбиркорлар учун йилига БҲМнинг камида 1 баравари, айланмадан олинадиган солиқ бўйича 1 фоиз бўлади.

«Амирсой» курортида 700 туп қимматбаҳо дарахт кесиб ташлангани юзасидан жиноят иши қўзғатилди

Иллюстратив сурат.

Тошкент вилояти Бўстонлиқ туманидаги «Амирсой» курортида 700 тупга яқин ноёб дарахт кесиб ташлангани юзасидан жиноят иши қўзғатилгани тўғрисида Бош прокуратура 16 сентябрь куни маълум қилди.

Расман билдирилишича, дарахтлар кесилиши ортидан кўрилган зарар 1 миллиард 900 миллион сўмни ташкил қилган.

Иш Жиноят кодексининг 198-моддаси (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) асосида қўзғатилган.

24 август куни ўтган видеоселекторда президент Мирзиёев дарахтларни кесишга мораторий 2024 йилга қадар узайтирилгани ҳақида билдирган эди. Бундан ташқари президент октябрь-ноябрь ойларида 55 миллион, келгуси йил баҳор мавсумида 70 миллион дарахт экишга кўрсатма берган.

Президентнинг бундай кўрсатмаларига қарамай, «Амирсой»да 700 туп қимматбаҳо дарахт кесиб ташлангани тўғрисида Олий Мажлис депутати Расул Кушербаев жамоатчиликка маълум қилган эди.

Шавкат Мирзиёев ШҲТ саммитида иштирок этиш учун Душанбега жўнаб кетди

Шавкат Мирзиёев.

Ўзбекистон президенти Шавкат Мирзиёев Шанхай ҳамкорлик ташкилоти – ШҲТга аъзо давлатлар раҳбарлари кенгашининг мажлисида иштирок этиш учун 16 сентябрь куни Тожикистон пойтахти Душанбега жўнаб кетди.

Президент матбуот хизматининг билдиришича, саммитда ШҲТнинг ўтган 20 йилдаги фаолияти ҳамда Тожикистон раислигининг якунлари кўриб чиқилиб, кўп томонлама ҳамкорликнинг долзарб вазифалари муҳокама қилинади.

Глобал ва минтақавий аҳамиятга молик масалалар юзасидан фикр алмашилади.

“Саммит якунида Душанбе декларацияси қабул қилиниши ва бошқа ҳужжатлар имзоланиши кўзда тутилган. ШҲТга раислик Ўзбекистон Республикасига ўтиши саммитнинг муҳим воқеаси бўлади. Шунингдек, анжуман доирасида “ШҲТ - КХШТ” форматидаги учрашув ўтказилиши ҳам режалаштирилган”, -дейилади расмий хабарда.

Аввалроқ Россия президенти Владимир Путин ва Хитой раҳбари Си Цзиньпин мазкур Душанбега бормаслиги, саммитда онлайн иштирок этиши хабар қилинганди.

Солиқ кодексига киритилган ўзгартиш ортидан электромобиллар автотранспорт йиғимидан озод этилди

Жорий йилнинг январь-июли оралиғида мамлакатга 432 та электромобил олиб кирилган.

Президент Шавкат Мирзиёев 14 сентябрь куни имзолаган «Солиқ кодексига ўзгартиш ва қўшимчалар киритиш тўғрисидаги қонун»га асосан бундан буён Ўзбекистонга электромобилларни вақтинча олиб киришда ёки сотиб олишда автотранспорт йиғими бекор қилинди. Мазкур меъёр Солиқ кодексининг 459-моддаси 9-бандида белгилаб қўйилди.

Расман билдирилишича, сўнгги пайтларда Ўзбекистонга электромобилларни импорт қилиш кўпаймоқда. Жорий йилнинг январь-июли оралиғида мамлакатга 432 та электромобил олиб кирилган. Бу эса 2020 йилдаги кўрсаткичдан 2,3 баробарга кўпроқдир.

Ўзбекистонга электромобиллар асосан Хитойдан олиб келинмоқда.

Ўзбекистонда электромобилларни олиб кирганлик учун акциз солиғи бекор қилинган ва божхона божининг ноль ставкаси ҳам ўрнатилган.

Андижондаги икки мактабда корейс тилини ўрганишга ихтисослашган синфлар очилди

Андижон мактабларидан бирида дарс бераётган корейс тили ўқитувчиси (Андижон вилояти ХТБ фотоси)

Андижон шаҳридаги 24- ҳамда 13-умумтаълим мактабларида корейс тилини ўрганишга ихтисослашган синфлар ташкил этилди.

Мазкур синфларнинг очилиш маросими, вилоят халқ таълими бошқармаси матбуот хизмати маълумотига кўра, 13 сентябрь куни ўтказилган.

Маросимда иштирок этган Ўзбекистон-Корея халқаро университети ректори Пак Жун Хо вилоят халқ таълими бошқармаси билан ҳамкорликда ўтказилган фан олимпиадалари давомида андижонлик ёшларнинг билим салоҳияти юқорилиги аниқлангани сабабли ҳамкорлик алоқаларини давоми сифатида ушбу синфлар очилганлигини таъкидлаган.

Қайд этилишича, кореялик профессорлар вилоятдаги умумтаълим мактабларида Андижон вилояти халқ таълими бошқармаси ҳамда Ўзбекистон-Корея Университетлари ўртасида тузилган ҳамкорлик меморандумига асосан дарс беришмоқда.

Коронавирус қурбонлари сони 1175 нафарга, пневмониядан вафот этганлар сони 210 нафарга етди

Ўзбекистонда 15 сентябрь куни коронавирусга чалинган беморлардан 6 нафари вафот этган, шу тариқа пандемия қурбонлари сони 11 75 нафарга етган.

Соғлиқни сақлаш вазирлиги маълумотига кўра, кеча мамлакат бўйлаб 619 киши коронавирусга чалинган, вирус юқтириб олганларнинг умумий сони эса 166 минг 644 нафарни ташкил қилган.

Айни пайтда чоршанба куни Сирдарё ва Хоразм вилоятларидан ташқари барча ҳудудларда 1 минг 67 киши тузалиб, соғайганларнинг умумий сони 159 минг 444 нафарга етган.

ССВ қайдича, ўтган кеча-кундузда яна 142 нафар кишида пневмония аниқланган, 5 июлдан бери эса 25 минг 823 киши пневмонияга чалинган. Булардан 20 минг 772 нафари соғайиб чиққан, 210 нафари эса вафот этган.

Ўн минг нафар ўзбекистонликни Россиядаги қурилишларга йўллаш бўйича келишувга эришилди

Иллюстратив сурат

Қурилишда ишлаш учун ўзбекистонликларни жалб қилиш бўйича пилот лойиҳа доирасида 10 минг нафар меҳнат муҳожири яқин орада соддалаштирилган тартиб асосида Россияга ишга жалб қилинади. Бунга оид келишувга 10-11 сентябрь кунлари Ўзбекистонда бўлган Россия Федерацияси Меҳнат ва ижтимоий ҳимоя вазири ўринбосари Андрей Пудов бошчилигидаги делегация билан эришилган. Бу ҳақда Бандлик ва меҳнат муносабатлари вазирлиги ахборот хизмати раҳбари Мавжуда Мирзаева 15 сентябрь куни АОКАда ўтказилган брифингда маълум қилган.

Мулозиманинг айтишича, россиялик расмийлар билан келишувга мувофиқ, номзодларни ишга жалб қилиш билан боғлиқ, жумладан, тиббий кўрикдан ўтказиш, эмлаш, рус тили, Россия тарихи ва қонунчилиги бўйича имтиҳон топшириш, патент расмийлаштириш ва транспорт харажатлари иш берувчилар томонидан қопланиши кўзда тутилган.

Шунингдек, россияликлар билан Россия Федерацияси ҳудудида меҳнат фаолиятини амалга ошириш истагида бўлган фуқаролар учун патент олишда талаб этиладиган дактилоскопик рўйхатга олиш ва расмга олиш жараёнларини икки давлат Ички ишлар вазирликлари томонидан Россия томони ускуналари ёрдамида Ўзбекистонда амалга оширишга келишиб олинган.

Айни пайтда Россия Федерацияси ҳудудида меҳнат фаолиятини амалга ошириш истагида бўлган фуқароларни эмлаш ва коронавирусга қарши тест топшириш жараёнларини икки давлат мутахассислари томонидан Россия томони тиббий ускуналари ёрдамида биргаликда Ўзбекистонда амалга ошириш ҳамда уларнинг натижаси бўйича тиббий маълумотларни “COVID-19сиз саёҳат” иловаси тизимига интеграция қилиш белгиланган.

Шу ўринда сўнгги пайтларда Ташқи иш миграция агентлиги томонидан хорижга, хусусан, Россияга ишга йўлланаётган ўзбекистонликларнинг ҳақлари поймол этилаётгани ҳақида шикоятлар кўпайиб бораётганини ҳам қайд этиш жоиз. Шу каби шикоятлар асосига қурилган кўламли журналистик суриштирувлардан бири яқинда россиялик таниқли журналист Алексей Пивоваров бошлигидаги “Редакция” YouTube-канали журналистлари томонидан ёйинланган эди.

Қўқонлик блогер касалхонада вафот этди, яқинлари унинг заҳарланганини иддао қилишмоқда

Қўқонлик блогер Иқбол Комилжонов (ижтимоий тармоқлардан олинган сурат)

Қўқонда маҳаллий муаммоларни ёритиб борган блогер, Facebook тармоғидаги “Қўқонжоним” гуруҳи маъмурларидан бири Иқбол Комилжонов 15 сентябрь касалхонада жон берган. Бу ҳақда Фарғона вилоят Соғлиқни сақлаш бошқармаси бошлиғи Ҳусан Мамажонов маълум қилди.

И. Комилжонов 7 сентябрь куни оғир аҳволда шифохонага келиши билан жонлантириш бўлимига олинганини урғулаган мулозим беморга икки томонлама пневмония, қандли диабетнинг 2-тури, юрак ишемик касаллигининг иккинчи тури ҳамда нафас ва қон айланиш тизимининг бузилиши ташхиси қўйилганини билдирган.

Яқинларининг кўра, қорин оғриғидан шикоят қилган блогер аввалги сешанба куни касалхонага ўз оёғи билан юриб борган, кечаси эса аҳволи оғирлашиб қолгани учун уни реанимацияга олишган.

“Эртасига заҳарланишга ўхшаяпти, дейишди. Кейинги куни эса шифокор чиқиб, укам коронавирус бўлганини, сатурацияси 60 га тушиб кетганини айтди. Лекин ўша куни топширган таҳлилларида коронавирус аниқланмади. Шифохонага олиб келганимизда ҳам укамда на йўтал, на иситма, на оғриқ бор эди. COVID-19 ёки пневмониянинг бирорта белгиси йўқ эди”, дея иқтибос келтирган блогернинг опаси Шоира Комилжонова сўзларидан “Дарё” нашри.

Фарғона вилоят кўп тармоқли тиббиёт маркази бош шифокори Одил Умаров нашрга блогернинг саломатлиги билан боғлиқ ижтимоий тармоқларда тарқалаётган хабарлар мутлақо асоссизлиги, беморда заҳарланиш аломатлари бўлмаганини билдирган.

“Беморнинг яқинлари заҳарланмаганми, деган масалани қўйяпти. Экспертиза ўтказиб беринглар, дейишяпти. Беморда қандли диабет хасталиги бўлган. Қолаверса, у яқинда коронавирус бўлган экан. Инфекция ўпкага ўтиб, икки томонлама пневмония ривожланган. Танадаги барча хасталиклар бирлашиб, бош мияга ишемия берган. Бу бош мия қон айланишининг ўткир бузилишини келтириб чиқаради. Тананинг баъзи аъзоларида чириш бошланган. Ана шу чиришнинг орқасидан заҳар чиққан. Яъни касаллик организмни заҳарлаяпти. Бу ички заҳарланиш, у ташқаридан тушмаган”, деган тиббиёт маркази шифокори Элмурод Йўлчиев.

Аввалроқ Ахборот ва оммавий коммуникациялар агентлигининг Фарғона вилоят бошқармаси раҳбари Шоҳидбек Аслонов вилоят ҳокимининг ўринбосари Ф.Қосимов билан бирга Иқбол Комилжоновнинг ҳолидан хабар олиш учун касалхонага боргани, уларга блогернинг заҳарлангани ҳақида ижтимоий тармоқларда тарқалаётган маълумотлар мутлақо асоссизлиги билдирилганини маълум қилганди. Мулозимга кўра, блогернинг самарали меҳнатлари инобатга олиниб, у яқинда “Ўзбекистон Республикаси мустақиллигининг 30 йиллиги” эсдалик нишони билан тақдирланган. Ш. Аслонов И. Комилжоновнинг “Энг улуғ, энг азиз” танловининг вилоят босқичида “Энг фаол ижтимоий тармоқ гуруҳи администратори” деб топилганини ҳам қўшимча қилган.

Бу орада Ўзбекистон Бош прокурорининг матбуот котиби Ҳаёт Шамсуддинов блогер Иқболжон Комилжонов вафоти бўйича Фарғона шаҳар прокуратураси томонидан терговга қадар текширув олиб борилаётганини маълум қилган. БП расмийсига кўра, марҳумнинг ўлим сабабларини аниқлаш юзасидан суд-тиббий экспертизаси тайинланган.

ИИВ: Тошкентда “Ҳизбут-Таҳрир”га мансуб 10 киши қўлга олинди

Иллюстратив сурат

Тошкент шаҳрининг Олмазор туманида 15 сентябрь куни ҳуқуқ-тартибот идоралари томонидан “Ҳизбут-Таҳрир” диний экстремистик ташкилотига аъзо бўлган 10 кишининг жиноий фаолиятига чек қўйишга қаратилган тезкор тадбирлар” ўтказилган. Бу ҳақда Ички ишлар вазирлиги матбуот хизмати маълумот тарқатди.

Қўлга олинганларнинг барчаси муқаддам “Ҳизбут-Таҳрир” аъзоси ўлароқ жазо муддатини ўтаб чиққан шахслар экани қайд этилган.

“Улар Интернет тармоғи орқали хорижда яшириниб келаётган “Ҳизбут-Таҳрир” ДЭТ аъзолари билан алоқа қилиб, уларнинг кўрсатмалари асосида аҳоли орасида ташкилот ғояларини тарғиб қилиш ва тарафдорлари сафини кенгайтириш билан шуғулланиб келганлар”, дейилган ИИБ хабарномасида уларнинг уйларидан ва телефонларидан ташкилотга оид адабиёт ва материаллар чиққани ҳамда уларнинг процессуал тартибда расмийлаштирилиб, олиб қўйилгани иддао қилинган.

Ҳозирда бу кишиларнинг “ноқонуний хатти-ҳаракатларига ҳуқуқий баҳо бериш ва жавобгарликка тортиш мақсадида тергов-суриштирув тадбирлари давом эттирилаётгани”ни урғулаган вазирлик фуқароларга диний экстремистик ташкилоти сафида фаолият олиб бориш, ғояларини қўллаб-қувватлаш, материалларини тайёрлаш, сақлаш ҳамда тарқатиш жиноий жавобгарликка тортилишга сабаб бўлишини эслатган.

Озодлик ўтган ҳафта Тошкент шаҳри ва пойтахт вилоятида “Ҳизбут- Таҳрир”га аъзоликда гумонланган 29 нафар аёл қўлга олингани ҳақида хабар қилган эди.

Ўзбекистонда Жаҳон озиқ-овқат дастурининг Афғонистонга кўмак кўрсатиш маркази ташкил этилди

Жаҳон озиқ-овқат дастури вакиллари Афғонистоннинг Ҳирот вилоятида озиқ-овқат тарқатмоқда. 2021 йилнинг августи. БМТ расмий сайтидан олинган фотосурат.

Ўзбекистонда Бирлашган Миллатлар Ташкилотининг Жаҳон озиқ-овқат дастури Афғонистонга кўмак кўрсатиш бўйича асосий марказни ташкил этди. Бу ҳақда БМТ расмий сайтида хабар берилди.

Билдирилишича, БМТнинг Жаҳон озиқ-овқат дастури Афғонистонда эҳтиёжнинг кучайгани ортидан Покистон, Тожикистон ва Ўзбекистондаги омборларда биринчи галда зарур бўладиган маҳсулотлар захирасини тўплай бошлаган.

Ўзбекистоннинг Термиз шаҳрида эса бу йўналишдаги асосий логистика маркази ташкил этилди.

БМТ расмий вакилининг билдиришича, сўнгги кунларда БМТ Афғонистонга бир неча марта гуманитар ёрдамни етказиб беришга муваффақ бўлди.

14 сентябрь куни Ўзбекистон Афғонистонга 1300 тоннадан иборат гуманитар ёрдам кўрсатгани хабар қилинган эди.

Давомини ўқинг

XS
SM
MD
LG