Линклар

Шошилинч хабар
26 январ 2022, Тошкент вақти: 14:07

Халқаро хабарлар

Қирғизистонда яна бир собиқ Бош вазир ва собиқ президентнинг укаси МХҚда сўроқ қилинмоқда

Қирғизистоннинг собиқ Бош вазири Игорь Чудинов.

Қирғизистоннинг собиқ Бош вазири Игорь Чудинов айни пайтда Миллий хавфсизлик қўмитасида сўроқ қилинмоқда. Бу ҳақда Озодлик радиоси қирғиз хизмати ишончли манбаларга таянган ҳолда хабар берди.

Хабарда айтилишича, Игорь Чудинов “Қумтор” олтин кони билан боғлиқ коррупция иши доирасида сўроқ қилинмоқда.

Бундан бир неча соат аввал мазкур иш юзасидан собиқ президент Сўўрўнбай Жээнбековнинг укаси Асилбек Жээнбеков ва парламент депутати Тўрўбай Зулпукаров ҳам суроққа чақирилгани ҳақида Озодлик радиоси қирғиз хизмати ўз ишончли манбаларига таянган ҳолда хабар берган.

Собиқ президент Сўўрўнбай Жээнбековнинг укаси Асилбек Жээнбеков 2011-2016 йилларда Қирғизистон парламентининг раиси бўлган. Унинг акаси Сўўрўнбай Жээнбеков эса 2017 йилнинг 24 ноябридан 2020 йилнинг 15 октябригача Қирғизистон президенти лавозимида ишлаган.

Қирғизистон Миллий хавфсизлик қўмитаси ҳозирча бу хабарларни тасдиқламади ва айни пайтда инкор ҳам қилмади.

31 май куни Қирғизистон Миллий хавфсизлик қўмитаси собиқ Бош вазири Ўмурбек Бабанов Канада ширкати томонидан ишлатиладиган “Қумтор” олтин кони бўйича шартнома тузишда коррупцияга йўл қўйганликда айбланиб ҳибсга олинганини расман тасдиқлаган эди.

Қирғизистондаги энг йирик “Қумтор” олтин кони Канаданинг “Центерра Голд” ширкати томонидан ишлатилади.

Жорий йил февралида “Қумтор” олтин конини ишлатаётган Канада ва Қирғизистон ҳукумати ўртасида тузилган шартномани ўрганган давлат комиссияси раиси, депутат Акилбек Жапаров “Канада ширкати билан енг ичида келишиб, Қирғизистоннинг манфаатларига зид келувчи шартномани имзолашда иштирок этган ҳукумат амалдорларини жазолаш”ни талаб қилган эди.

Кун янгиликлари

СIT Россия Украина билан чегара ҳудудларига десантчиларни ташлаётганини қайд этди

Иллюстратив сурат

Conflict Intelligence Team (СIT) суриштирув гуруҳи Россия десантчилари Украина билан чегарага ташланаётганига оид далил-исботларга эга бўлди.

Гап “ТикТок”да ёйинланган темир йўл орқали ташилаётган ҳарбий техника видеоси ҳақида бормоқда. У Беларусь ва Украина билан чегарадош Брянск вилоятида суратга олингани айтилган.

Видеодаги зирҳли техникалар брезент билан ўралган, аммо тадқиқотчи Роберт Ли улар десантчи қўшинларга оид жанговар машиналар ва парашют орқали ташланадиган БТРлар эканлигини аниқлаганини урғуламоқда. Видеодан келиб чиқилса, ташилаётган ҳарбий техника сони тахминан 40 тани ташкил қилади, шунингдек поездда қарийб 250 аскар жойлашиши мумкин бўлган бешта йўловчи вагони ҳам бор. Роберт Ли шунга таяниб, чегарага десантчилар батальони кўчирилмоқда, дея хулоса ясаган.

“Россия темир йўллари”маълумотлар базасига кўра, вагонлар Иваново вилоятидан келмоқда – у ерда 98-ҳаво десанти дивизиясига қарашли 217-гвардия парашютчи десантчилар полки жойлашган. Мазкур полк яқинда КХШТ кучларини Қозоғистонга олиб киришда иштирок этган.

CIT таҳлилчилари фикрича, бу Украина билан чегара яқинига десантчилар йўлланаётганига оид биринчи тасдиқланган видеодир. Десантчи қўшинлар Россия армиясининг энг жанговар ва қудратли бўлинмалари сирасига киради.

Россия Мудофаа вазирлиги Беларусда ўтажак ҳарбий машқларга турли ҳарбий техникалар йўлланаётганини билдирган, бироқ машқларга десантчилар ҳам жалб этилиши ҳақида маълумот берган эмас.

CIT таҳлилчиларига кўра, Украинага қарши кенг кўламли ҳарбий ҳаракатлар бошланган тақдирда ҳужумлардан бири Брянск вилояти ҳудудидан амалга оширилиши мумкин – у ердан Киевгача масофа тахминан 200 чақиримни ташкил қилади.

Петербургда “диний экстремизм”да гумонланган туркманистонлик қўлга олинди

Туркманистонлик Аҳмет Жумадурдиев

Россиянинг Санкт-Петербург шаҳрида Туркманистон фуқароси Аҳмет Жумадурдиев қўлга олинди. У ўз ватанида “диний экстремизм”да айбланмоқда. Ўтган йил октябрида Инсон ҳуқуқлари бўйича Европа суди 39-қоидани қўллаган ҳолда, Россия расмийларига Жумадурдиевни Туркманистонга экстрадиция қилишни тақиқлаб қўйган эди.

Адвокат Ольга Цейтлиннинг “Свер.Реалии”га маълум қилишича, Жумадурдиевни ҳужжатларни текшириш учун ушлашган. Кейинроқ- сўроқ чоғида прокуратура ходими унга халқаро қидирувда бўлгани учун қўлга олинганини айтган.

Аҳмет Жумадурдиев илк бор 2017 йил декабрида Пулково аэропорти паспорт назоратида, Туркманистон уни “диний экстремизм”га доир иш бўйича халқаро қидирувга бергани муносабати билан қўлга олинган эди. Бир йилдан сўнг у прокуратура қарорига кўра ҳибсхонадан озод этилган. Туркманистонда яшайдиган акаси худди шу иш бўйича 25 йилга қамалган.

Россия Жумадурдиевга қочқин мақомини беришни рад этгач, у Эстониядан бошпана сўрашга қарор қилган ва чегарадаги дарёдан сузиб ўтганида эстон полицияси томонидан қўлга олиниб, Россияга қайтарилган.

Россия НТТлари Европа кенгашига мамлакатда йиғилишлар эркинлигига доир тавсиялар бажарилмаётганини билдирди

Россиядаги ўн битта нотижорат ташкилоти Европа кенгашига мамлакатдаги йиғилишлар эркинлиги билан боғлиқ вазиятга бағишланган ҳисобот тақдим этди. Ҳисоботда ўтган йили митингларга доир моддалар бўйича очилган маъмурий ишлар сони ортгани, йиғилишлар эркинлиги билан боғлиқ вазият ёмонлашгани қайд этилган, дея хабар қилди “Коммерсантъ” нашри. Аввалроқ Европа суди Россияга оммавий тадбирларга доир қонунчиликдаги камчиликларни бартараф этиш мажбуриятини юклаган эди.

Ҳисоботда митингларга доир моддалар бўйича қўзғатилган маъмурий ишлар сони бир йил ичида 13,7 мингтадан 16 мингтага кўпайгани таъкидланган. Бундан ташқари, мухолифатчи Алексей Навальний ҳимоясига ўтказилган митинглар иштирокчиларига нисбатан 170 та жиноят иши очилган.

Шунингдек, ҳуқуқбонлар норозилик акциялари иштирокчилари шафқатсиз усуллар билан, жумладан электрошокер қўллаган ҳолда ушланганини урғулаганлар. НТТлар вакиллари митинглар тугаганидан кейин акция иштирокчиларини қўлга олиш тенденцияга айланганидан хавотир билдиришган. Ҳисоботда қўлга олинган митингчилар ва уларни ҳимоя қилишнинг юридик воситалари ҳақида маълумот берувчи “ОВД-Инфо” лойиҳаси сайти блоклаб қўйилгани эслатилган.

“Коммерсантъ”га кўра, ҳисобот Европа кенгаши Вазирлар қўмитасининг март ойидаги йиғилишида кўриб чиқилади. Ўша тадбирда қўмита аъзолари Россиянинг Инсон ҳуқуқлари бўйича Европа судининг митингларга доир қонунчиликни ўзгартириш бўйича тавсияларига қанчалик амал қилаётганини тўртинчи марта баҳолайдилар.

Европа суди Россияга 2022 йил март ойигача йиғилишлар эркинлигига доир қонунчилик талабларини юмшатиш, жумладан, акциялар ўтказишга рухсат бериш тартиб-таомилларини соддалаштириш, митинглар ўтказиш учун белгиланган жойлар сонини кўпайтириш, митинг ўтказишга рухсат беришни рад этиш сабабларини аниқ кўрсатиш мажбуриятини юклаган.

Россия расмийлари вазият яхшиланаётгани ҳақида мунтазам равишда ҳисобот бериб келади. Бироқ ҳуқуқбонлик ташкилотлари бу иддаони рад этиб келишмоқда.

Байден Путин шахсига қарши санкция қўллаш масаласини кўриб чиқишга тайёр

АҚШ президенти Жо Байден

АҚШ президенти Жо Байден, Россия қўшинлари Украина ҳудудига бостириб кирган тақдирда, президент Владимир Путинга қарши якка тартибдаги санкциялар жорий этишга тайёрлигини айтди.

Байден, агар ҳужум амалга оширилгудек бўлса, у “улкан оқибатлар”ни келтириб чиқариши ва “дунёни ўзгартириши”ни қўшимча қилган.

Оқ уй раҳбари, шунингдек, АҚШнинг 8,5 минг аскари НАТОнинг Шарқий Европа мамлакатларига жўнашга шай турганини тасдиқлаган. Айни пайтда у АҚШ Украинага қўшин йўлламаслигини таъкидлаган.

АҚШ ва унинг НАТОдаги иттифоқчилари Европа шарқига қўшинлар жойлаштирилиши уларнинг Украина ҳудудида ҳарбий ҳаракатларда иштирок этишини назарда тутмаслигини бир неча бор айтган.

Вашингтон қайдича, НАТОнинг Украина билан чегарадош мамлакатларидаги қўшинлар иттифоқчиларнинг Россия агрессиясига қарши курашувчи Украина билан бирдамлигини намойиш этмоғи керак.

2021 йил мартида Conflict Intelligence Team (CIT) тадқиқотчилари Россия армияси артиллерия ва танкларни, мотоўқчи ва десантчи бўлинмаларни Украина билан чегара яқинига ташлаётгани ҳақида ёзишган эди. Украинага чегарадош Воронеж вилоятида ҳатто “Искандер” ракета мажмуалари мавжудлиги аниқланган. 2022 йил январида CIT Россия аскарлари ва ҳарбий техникаси Россиянинг ғарбий ҳудудларига кўчирилаётганига доир янги далилларни очиқлаган.

АҚШ ва Европа мамлакатлари, Россия қўшинлари чегарадан ўтса, кескин санкциялар қўллашга шайлигини билдиришган. Москва ҳарбий амалиёт бошлашга ҳозирланаётганини инкор этиб, қўшинлари ҳаракатини ҳарбий машқлар, дея изоҳлайди.

НАТОга аъзо мамлакатлар Украина билан боғлиқ вазият туфайли ўз кучларини жанговар шайлик ҳолатига келтириб, Шарқий Европага қўшимча куч – кема ва қирувчи учоқлар йўлламоқда. АҚШ мудофаа вазири Ллойд Остин 25 январь куни 8,5 минг аскар Шарқий Европага жўнаб кетиш учун юқори шайлик ҳолатига келтирилганини айтган.

Марказий Осиёда электр таъминоти узилгани ҳолатини ҳукуматлараро комиссия ўрганади

Марказий Осиё ягона электр тизимида 25 январь куни юз берган авария тизимга кирган давлатлар ҳукуматлари ташкил этган халқаро комиссия томонидан ўрганилади. Бу ҳақда Қирғизистон энергетика вазири Досқул Бекмурзаев маълум қилди.

Унга кўра, Ўзбекистон, Қирғизистон ва Қозоғистон ҳукуматлари бу борада маслаҳатлашган ва ишчи гуруҳ ташкил қилинган.

Марказий Осиё ягона электр тизимида Тошкент вақти билан соат 11 ларда узилиш юз бериб, Ўзбекистон, Қирғизистон ва Қозоғистонда электр энергияси бўҳрони юзага келган эди.

Орадан икки ярим соат ўтгач, Қирғизистон Марказий Осиё ягона электр тармоғидан чиқиб, ўз ҳудудига электр қуввати бера бошлади.

Ўзбекистон ҳукумати эса тармоқдаги узилиш туфайли мамлакатдаги ИЭслар ва ГЭСлар, газ ва нефть қазиб олиш ҳамда қайта ишлаш саноати, пойтахт Тошкентни электр, иссиқлик, сув ва транспорт билан таъминлаш тизими ишда чиққанини билдирган.

Қирғизистон Марказий Осиё ягона электр тармоғидан чиқиб, ўз ҳудудига электр қуввати бера бошлади

Қирғизистон Марказий Осиё ягона электр тармоғидан чиқиб, ўз ҳудудига электр қуввати бера бошлади. Энергетика вазирлиги матбуот котиби Жийде Зоотбекова Чуй ва Жалолобод вилоятларига электр берила бошланганини, пойтахт Бишкекнинг бир қисмида электр таъминоти қайта тикланганини билдирди.

Аввалроқ Вазирлар Маҳкамаси раиси ўринбосари Эдил Байсалов бир ярим соат ичида Бишкекда, кейин бошқа вилоятларда электр таъминоти тикланиши тўғрисида Твиттер саҳифасида ёзган эди.

Унга кўра, Марказий Осиё ягона электр тармоғидаги авария Қирғизистон ҳудудида содир бўлмаган.

Энергетика вазирлиги Қирғизистон ҳудудидаги иссиқлик ва гидроэлектр станцияларида авария бўлмаганини расман билдирди.

25 январь куни Бишкек вақти билан соат 12 ларда, Тошкент вақти билан соат 11 ларда Марказий Осиё ягона электр тармоғидаги носозлик оқибатида Ўзбекистон, Қирғизистон ва Қозоғистон электр энергияси таъминотидан узилиб қолди.

Германияда 120 нафардан зиёд католик руҳонийси ЛГБТга алоқадорлигини очиқлади

Германияда 120 нафардан зиёд руҳоний ва черков ходими ўзларининг ЛГБТга мансуб эканларини эълон қилишди. Уларга кўра, гап сексуаллик ёки гендер ҳақида кетганда черков таълимотининг эскирган қоидаларидан воз кечиш керак. Мазкур мурожаатнома OutInChurch ташаббуси доирасида ижтимоий тармоқлар орқали тарқатилган.

Мурожаатнома муаллифлари жинсий ориентация черковга хайрихоҳлик тамойилини бузишга тенглаштирилмаслиги ёки ишдан бўшатиш учун сабаб бўлмаслиги лозимлигини қайд этганлар.

Сўнгги бир неча йил ичида Германия ва АҚШдаги католик руҳонийлар бир жинсли жуфтликларни маъқуллаб, епископларни бундай никоҳлар учун рухсат беришга чақира бошлаганлар. Ватикан ўтган йили бу каби илтимосларнинг барчасини рад этган. Рим папаси Франциск ўшанда черков қарори дискриминация бўлиб ҳисобланмаслигини урғулаган. Аввалроқ у бир жинсли жуфтликлар учун фуқаро никоҳига оид қонун қабул қилишга чақирган эди.

НАТО Украина билан боғлиқ вазият туфайли Шарқий Европага кема ва қирувчи учоқлар йўлламоқда

Иллюстратив сурат

НАТОга аъзо мамлакатлар Украина билан боғлиқ вазият туфайли ўз кучларини шайлик ҳолатига келтирмоқда ва Шарқий Европага қўшимча куч – кемалар ва қирувчи учоқларни йўлламоқда. Бу ҳақда Шимолий Атлантика иттифоқининг расмий сайти маълумот тарқатди.

Дания Болтиқ денгизига фрегат жўнатган ва ҳаво ҳудудида навбатчилик қилиш миссиясини дастаклаш учун Литвага тўртта Ғ-16 қирувчи учоғини йўллашга ҳозирланмоқда.

Испания НАТО ҳарбий-денгиз кучларига қўшилиши учун ўз кемаларини юборган, шунингдек Болгарияга қирувчи учоқларни йўллаш имкониятини кўриб чиқмоқда.

Франция ўз аскарларини Руминияга ташлашга тайёрлигини билдирган. Ҳолландия Шарқий Европа ҳаво ҳудудини қўриқлаш учун иккита Ғ-35 қирувчи учоғи, битта кема ҳамда қуруқликда ҳарақат қилувчи бўлинмаларни Болгарияга юборади.

АҚШ эса Шарқий Европадаги кучларини ошириш имкониятини ўрганаётгани ҳақида баёнот берган.

“Бизга қўшимча кучлар тақдим этаётган иттифоқчиларимизни олқишлайман. НАТО ўз иттифоқчиларини ҳимоя қилиш учун барча зарур чораларни кўради. Биз хавфсизлик билан боғлиқ вазият ёмонлашувига ҳамиша ўз вақтида муносабат билдириб, жамоавий мудофаани мустаҳкамлаймиз”, деган НАТО бош котиби Йенс Столтенберг.

2021 йил март ойида Conflict Intelligence Team тадқиқотчилари Россия армияси артиллерия ва танкларни, мотоўқчи ва десантчи ҳарбий бўлинмаларни Украина билан чегара яқинига келтираётгани ҳақида ёзган. Украина билан чегарадош Воронеж вилоятида ҳатто “Искандер” ракета мажмуалари борлиги аниқланган. 2022 йил январида CIT Россия шахсий таркиб ва ҳарбий техникани ғарбий чегараларига ташлаётганига доир янги далилларни эълон қилган.

АҚШ ва Европа, Россия қўшинлари чегарадан ўтган тақдирда, кескин санкциялар жорий этишга тайёрлигини билдирган. Москва ҳарбий амалиётга ҳозирланаётганини рад этиб келяпти, қўшинлар ҳаракатини эса ҳарбий машқлар, деб изоҳламоқда.

Германия: Ҳейделберг университетидаги отишмада бир неча киши яраланди

Германиянинг нуфузли Ҳейделберг университетида бир неча киши ўқотар қуролдан яраланди. Ҳужум қилган одам ўлганлиги тахмин қилинмоқда. Бу ҳақда Манҳейм шаҳри полицияси “Твиттер”да маълум қилган.

Хабарномага кўра, полиция полиция Манҳеймга қўшни Ҳейделбергда кенг кўламли махсус амалиёт ўтказмоқда. Ўқ университетнинг маърузалар залида туриб, узун стволли қуролдан отилган. Бошқа тафсилотлар келтирилмаган.

Полициячилар фуқароларни тез тиббий ёрдам ва қутқарувчилар машиналари ҳаракатига халал бермаслик учун воқеа юз берган ҳудудни айланиб ўтишни илтимос қилмоқда.

Ҳейделберг университети Германиядаги энг эски университет саналади. У Times Higher Education талқини бўйича миллий ОТМлар рейтингида учинчи ва дунёда 42-ўринда.

Бишкек Хитой – Қирғизистон – Ўзбекистон темир йўли лойиҳасини Пекинга тақдим қилди

Иллюстратив сурат.

Қирғизистон Хитой ҳукуматига Хитой – Қирғизистон – Ўзбекистон темир йўли лойиҳасини амалга ошириш юзасидан барча ҳужжатларни тақдим қилди. Бу ҳақда Бишкекдаги “Биринчи радио”га интервью берган “Қирғиз темир йўллари” ширкати бош директори ўринбосари Дастан Усубакунов билдирди.

“Биз ўз томонимиздан Хитой – Қирғизистон – Ўзбекистон темир йўли лойиҳаси бўйича барча ҳужжатларни Пекинга тақдим қилдик. Февралда, Худо хоҳласа, раҳбарларимиз Хитойга боради ва у ерда уч давлат вакиллари бир битимга келади. Шундан сўнг жамоатчиликка барча тафсилотларни очиқлаймиз”, - деб айтган Дастан Усубакунов.

Хитой-Қирғизистон-Ўзбекистон темир йўлини қуриш ташаббуси 2000-йиллар бошларида эълон қилинган, аммо ўшандан бери амалга ошмай қолмоқда.

2017 йилда Хитой-Қирғизистон-Ўзбекистон темир йўлини қуриш бўйича уч томонлама ишчи гуруҳ тузилган, шунингдек лойиҳани амалга оширишнинг уч хил варианти кўриб чиқилаётгани ҳақида маълум қилинган.

АҚШ Давлат департаменти Киевдаги дипломатлари оилаларини эвакуация қила бошлади

АҚШнинг Киевдаги элчихонаси

АҚШ Давлат департаменти Россия Украинага ҳужум қилиши эҳтимоли туфайли Қўшма Штатларнинг Киевдаги элчихонасида ишловчи ходимлар оилаларига мамлакатни тарк этиш ҳақида кўрсатма берди. Бу ҳақда Reuters агентлиги Давлат департаменти баёнотига таянган ҳолда хабар қилди. Ёлланма ходимларнинг бир қисмига мамлакатдан ихтиёрий равишда чиқиб кетишга рухсат этилган.

Шунингдек, Давлат департаменти Украина ҳудудида бўлиб турган америкаликларга тижорат рейслари билан мамлакатдан чиқиб кетиш ҳақида ўйлаб кўришни ва Россияга бормасликни тавсия қилган.

“Россия Украинага қарши кенг кўламли ҳарбий ҳаракатлар бошлашни режалаётгани тўғрисида хабарлар бор. Хусусан, Украина чегараларида, Россия босиб олган Қримда ва Украинанинг Россия назоратидаги шарқий ҳудудларида хавфсизлик шароитини олдиндан тахминлаб бўлмайди ва аҳвол кутилмаганда ёмонлашиши мумкин”, дея АҚШ Давлат департаменти баёнотидан иқтибос келтирган Bloomberg.

Давлат департаменти вакили Россия Украина ҳудудига “исталган лаҳзада” бостириб кириши мумкинлиги ва у ҳолда Вашингтон ўз фуқароларини эвакуация қила олмаслигини айтган.

Аввалроқ Германиянинг Bild нашри расмий Берлин ҳам Украинадаги дипломатларини кўчириб кетишни режалаётганини маълум қилган эди, бироқ расмийлар бу маълумотни инкор этишмоқда.

Ўтган ҳафтада The New York Times газетаси Украина Хавфсизлик хизматининг юқори мартабали ходими сўзларига таянган ҳолда, Россиянинг икки консуллиги дипломатларига Украина ҳудудидан чиқиб кетишга ҳозирлик кўриш буюрилгани ҳақида хабар қилган. Россия ТИВ Киевдаги элчихонаси одатдаги тартибда ишлаётганини билдирган.

Россия ўтган йилнинг кузидан бери Украина билан чегараси яқинида катта ҳарбий куч тўплаётгани айтиляпти. Сўнгги ҳафталарда Ғарб мамлакатлари Россиянинг ушбу мамлакатга бостириб кириши реал хавфга айлангани ҳақида очиқ-ойдин гапиришмоқда.

Москва ҳужум режалаётганини инкор этиб келади. Ғарб мамлакатлари, Украинага бостириб кирган тақдирда, Россияга нисбатан “мисли кўрилмаган” санкциялар жорий этмоқчи.

Қирғизистон: "Наркотикка оид иш" юзасидан ушланган журналист тилхат асосида қўйиб юборилди

Қирғизистонлик журналист Болот Темиров

Наркотик моддалар истеъмол қилишга ундашда гумонланиб 22 январь оқшомида қўлга олинган қирғизистонлик журналист, “Temirov Live” канали муаллифи Болот Темиров бир сутка ўтар-ўтмас Бишкекни тарк этмаслик тўғрисида тилхат олиниб, озод этилди. Бу ҳақда Озодликнинг қирғиз хизмати хабар қилди.

Қўлга олинишидан икки кун олдин у “Қирғизнефтгаз” давлат ширкати ишлаб чиқарган мазут экспортидаги шубҳали схемалар ва уларга Миллий хавфсизлик давлат хизмати раиси қариндошларининг алоқаси бўлиши мумкинлигига оид суриштирувини эълон қилган эди.

Журналистни ҳамкасблари ва ҳатто айрим депутатлар ҳимоя қилиб чиққан, Бишкек ва Ўш шаҳарларида уни озод этиш талаби билан норозилик акциялари ўтказилган.

Депутат Дастан Бекешев журналистнинг ҳибсга олинишини унинг сўнгги суриштируви билан боғлаган. “Мазкур суриштирув айрим шахсларни қаттиқ ғазаблантирди ва улар ҳаялламай жавоб қайтаришди”, деб ёзган у “Фейсбук”даги саҳифасида. Депутат Бош прокуратура Болот Темиров суриштирувига зудлик билан муносабат билдириши ва журналистлар ҳуқуқларини ҳимоя қилиши лозимлигини қўшимча қилган.

“Политклиника” нашри муҳаррири Дилбар Алимова ҳам касбдошининг қўлга олиниши унинг касбий фаолияти билан боғлиқ эканини айтган. “Болотни яхши танийман. У мамлакатдаги энг кучли журналистлардан бири. Унинг қонунни бузганига сира ишонмайман”, деган Алимова.

22 январь куни “Temirov Live” канали офисига милиционерлар ва ниқобли одамлар келиб, тинтув ўтказишган ва муайян ҳужжатларни имзолашни талаб қилишган. Дастлабки маълумотларга кўра, тинтув Айпери Адилбек қизи деган фуқаронинг даъво аризаси бўйича ўтказилган. Канал аъзоларидан бири Ақтилек Капаровга кўра, ҳуқуқ-тартибот ходимлари уларга Темиров гўё “бир қизни” гиёҳванд моддалар истеъмол қилишга мажбурлаганини айтишган.

Болот Темиров офисдан чиқиш чоғида “подстава” қилингани ва “ёнига наркотик модда ташлаб қўйишган”ини таъкидлаган.

22 январь кечаси Темиров текшириш учун наркодиспансерга олиб борилган. У ердан “спецназ” жангчилари ҳамроҳлигида чиққан Темиров Озодлик мухбирига марихуана, героин ва сунъий наркотик истеъмол қилганини аниқлаш учун ўтказилган учала тест ҳам манфий натижа берганини айтган.

41 ёшли Болот Темиров Қирғизистонда ва хорижда таниқли журналист саналади. Сўнгги бир неча йил ичида у қатор шов-шувли суриштирувлар эълон қилган. Журналист асосан коррупция билан боғлиқ мавзуларни ўрганади. 2020 йил 9 январида у номаълум кимсалар томонидан калтаклаб кетилган эди.

2021 йилда Болот Темиров АҚШ Давлат департаментининг “Коррупцияга қарши курашчи” мукофотига сазовор бўлган.

Блинкен Россияга қарши янги санкцияларни зудлик билан жорий этиш ғоясини дастакламади

АҚШ давлат котиби Энтони Блинкен

Россияга қарши янги санкцияларни зудлик билан жорий этилиши Ғарбнинг Россия армияси Украина ҳудудига кенг кўламда бостириб киришининг олдини олиш имкониятига путур етказади. Бу мулоҳазани АҚШ давлат котиби Энтони Блинкен 23 январь куни CNN телеканалига берган интервьюсида билдирган.

“Санкциялардан мақсад – Россияни тажовуздан тийиб туриш. Агар улар ҳозир амалга киритилса, тийиб туриш эффектини йўқотасиз”, деган давлат котиби Украина президенти Зеленскийнинг бостириб киришини кутмасдан Россияга қарши янги чекловлар жорий этиш ташаббуси юзасидан изоҳ бераркан.

АҚШ президенти Жо Байден ва давлат котиби Энтони Блинкен кенг миқёсда ҳужум бошлаган тақдирда Россия мисли кўрилмаган санкцияларга дуч келиши ҳақида аввал бир неча бор баёнот беришган. Мухолифатдаги республикачилар партияси янги санкцияларни пайсалга солаётгани учун Байден маъмуриятини танқид қилиб келади.

Хусусан, сенатор Жони Эрнстга кўра, “санкцияларни ҳозироқ жорий этиш керак. Президент Путин фақат куч ва қудратни билади. Америка собит қатъиятини кўрсатиб қўйиши лозим”.

Декабрь ойида CNN манбалари Москвага қарши ҳозирланган янги санкциялар Эрон ва Шимолий Кореяга қарши жорий этилган чекловлардан сўнг “тарихдаги энг кескин санкциялар” бўлишини айтганлар. Бироқ республикачилар қистовига қарамай, санкциялар рўйхати эълон қилинмаяпти.

CNNга берган интервьюсида Блинкен Россия қуролли кучларининг “ақалли битта” янги бирлиги Украина ҳудудида пайдо бўлса, АҚШ ва Европа тарафидан “тезкор, беаёв ва умумий зарба” берилишини айтган.

Арманистон президенти “ваколати етарли эмас”лиги важидан истеъфога кетди

Армен Саркисян

Арманистон президенти Армен Саркисян етарлича ваколатга эга эмаслиги, мамлакат сиёсатига ҳамда уруш ва тинчлик масалаларига таъсир эта олмаётганини важ қилиб, истеъфо берди. Бу ҳақда сиёсатчининг расмий сайти маълумот тарқатди.

68 ёшли А. Саркисян 2018 йилдан бери президент лавозимида фаолият юритаётган эди. 1996-1997 йилларда у тўрт ой муддатга бош вазир бўлган. Арманистон – парламент республикаси бўлиб, президентлик асосан расмиятчилик тусидаги лавозим саналади. Бу лавозимга фақат бир марта, етти йил муддатга сайланиш мумкин.

Саркисяннинг аризасига кўра, Арманистондаги воқеликда президент тизимли вазифаларни бажариш учун “ўз салоҳиятининг катта қисмидан фойдалана олмайди”, “мазкур вазиятда ўз мамлакатига ёрдам бериши учун президентда зарур воситалар йўқ”.

Аризада Саркисян даврида Конституцияга ўзгаришлар киритиш бўйича комиссия тузилгани эслатилган. У мазкур ўзгаришлар қабул қилинганидан сўнг навбатдаги президент “нисбатан уйғун муҳитда” ишлашига ва мамлакатда “тийиб туриш ва мувозанатда тутиш тизими яратилишига” умид билдирган.

Мамлакат қонунчилигига биноан, президент истеъфо аризасини парламентга тақдим этади. Истеъфо бу ҳақда эълон қилинган вақтдан эътиборан қабул қилинган ҳисобланади. Янги давлат раҳбари лавозимга киришгунига қадар президент ваколатларини парламент раиси бажариб туради. Президент депутатлар томонидан сайланади.

Армен Саркисян қарийб тўрт йил муқаддам президентликка сайланганидан кўп ўтмай оммавий норозилик манзарасида амалдаги бош вазир Никол Пашинян иқтидорга келган эди.

ЕИ Москвани чечен расмийлари томонидан ўғирланган судьянинг рафиқасини озод қилишга чақирди

Зарема Мусаева

Европа Иттифоқи Россия расмийларини Чеченистон Олий суди собиқ судьяси Сайди Янгулбаевнинг хотини Зарема Мусаевани озод қилишга чақирди. З. Мусаева Чеченистонга маҳаллий полициячилар томонидан куч ишлатган ҳолда олиб кетилгани айтилмоқда.

ЕИ дипломатик хизмати сайтида ёйинланган баёнотда Кавказ минтақасида инсон ҳуқуқлари бетўхтов бузилаётгани юзасидан хавотир изҳор қилинган.

“Европа Иттифоқи Россия расмийларини Мусаевани озод қилишга, содир бўлган ҳолат юзасидан текширув ўтказиб, инсон ҳуқуқлари ҳимоячилари ва оила аъзоларининг таъқиб қилинишини тўхтатишга ҳамда уйдирилган айбловлар билан қўлга олинганларни зудлик билан озод қилишга чақиради”, дейилган баёнотда. ЕИ Москва расмийларини Чеченистонда судсиз қатл қилишлар, қийноқлар ва инсон ҳуқуқларининг қўпол равишда бузилиши билан боғлиқ бошқа барча ҳолатлар бўйича самарали ва тезкор тергов ўтказишга чақирган.

Россия расмийлари мазкур баёнот юзасидан ҳали изоҳ берганларича йўқ.

Сайди Янгулбаев Россия президентининг 2012 йил августидаги фармони билан Чеченистон Олий суди судьяси этиб тайинланган. 2015 йил ноябрида судьяларнинг квалификацион коллегияси уни судьялик ваколатларидан маҳрум қилган. Аввалроқ С. Янгулбаевнинг ўғли Ибрагим “Дождь” телеканали ёйинида отаси ва ўзини Рамзан Қодировнинг атрофидаги кишилар ўғирлаб кетгани ҳақида гапириб берган эди. Унинг иддаосича, ота-болани Қодировнинг шахсан ўзи қийноққа солган.

Зарема Мусаева шу йилнинг 20 январь куни Россиянинг Нижний Новгород шаҳрида чеченистонлик полициячилар томонидан қўлга олиниб, Чеченистонга олиб чиқиб кетилган. Грозний расмийлари судья ва унинг оиласини экстремистик дея талқин этилаётган мухолифатдаги Телеграм-канал фаолиятига алоқадорликда айблашяпти. С. Янгулбаев ва яқинлари бу айбловни рад этишмоқда.

Давомини ўқинг

XS
SM
MD
LG