Линклар

Шошилинч хабар
06 март 2021, Тошкент вақти: 04:48

Халқаро хабарлар

Бугун Мексиканинг Мерида шаҳрида 100 дан ортиқ мамлакат вакиллари коррупцияга қарши кураш тўғрисидаги халқаро ҳужжатни имзолашга йиғилади.

БМТ етакчилигида ишлаб чиқилган келишувнинг асосий мақсади - дунë жамоатчилигини коррупцияга қарши курашни уйғунлаштиришдан иборат.
Ҳужжат аксил коррупцияга кураш бўйича қонунчилик талабларини ўз ичига олган ва келишувни имзолайдиган ҳар бир мамлакат уни қабул қилишга мажбур.
30га яқин мамлакат келишувни маъқуллаши билан ҳужжат кучга киради.

Кун янгиликлари

Россия Қрим татарлари етакчиси Мустафо Жамилевга қўйилган тақиқни 2034 йилгача узайтирди

Қрим татарлари Жамилев Қрим Россия томонидан аннексия қилинишини тан олмагани учун таъқиб қилинмоқда, деб ҳисоблашади

Қрим татарлари етакчиси Мустафо Жамилевга Россия ҳудудига киришга қўйилган тақиқ муддати узайтирилди. Эндиликда 77 ёшли Жамилев ўз ватани бўлмиш Қримга 2034 йилгача киролмайди.

Тақиқ узайтирилганлиги аннексия қилинган Қримда Жамилевга қарши бўлиб ўтаётган суд жараёнида ошкор бўлди, деб хабар бермоқда Крым.Реалии нашри мухбири.

Тақиқ 2019 йилнинг 5 мартида 15 йилга қўйилган экан.

Армянскда 2019 йилда Жамилевга қарши қўзғатилган иш бўйича суд маҳкамаси бўлиб ўтмоқда. Жамилев Қримга ноқонуний киришга уринишда, ноқонуний қурол-аслаҳани харид қилиш ва сақлашда айбланмоқда.

Унинг ўзи бу айбловларни рад этиб, уларни сафсата деб атайди. Жамилев тарафдорларининг фикрича, Жамилев Қрим Россия томонидан аннексия қилинишини тан олмагани учун таъқиб қилинмоқда.

Душанбеда Озодлик мухбирлари ҳужумга учради

Иллюстратив сурат

Тожикистон пойтахти Душанбеда Озодликнинг тожик хизматида фаолият юритувчи икки журналист ёқилғи нархларининг ошишига оид сюжетни тасвирга олиш чоғида ҳужумга учради. Шаҳло Абдуллоева ва Муллоражаб Юсуфзодага 4 март куни автомобилларга ёқилғи қуйиш шохобчаларидан бирида ҳайдовчи билан суҳбатлашиб туришган пайтда ҳужум қилинган.

Ўз вазифасини бажариб юрган Тожикистондаги икки мухбиримизга қилинган ҳужум мутлақо қабул қилиб бўлмас ҳолатдир. Биз Тожикистон милицияси мазкур нохуш ҳодиса юзасидан тўлиқ текширув ўтказиб, журналистларнинг шу кунда ва келажакда воқеаларни очиқ ва тўсиқсиз ёритиш ҳуқуқини таъминлашини кутмоқдамиз”, дея баёнот берди Озод Европа / Озодлик радиоси президенти Жейми Флай.

Озодлик мухбирларига кўра, улар ҳайдовчилардан бири билан автомобиль ёқилғиси нархларининг ошиши ҳақида суҳбатлашиб туришган пайтда АЁҚШ ходимларидан бири журналистлардан тасвирга олишни бас қилишни талаб қилган. Кейин у Шаҳло Абдуллоевани қаттиқ туртиб юбориб, қўллари билан видеокамера объективини тўсиб олган. Ҳодисани мобиль телефони орқали тасвирга олаётган Юсуфзода ўртага тушган чоғда АЁҚШ ходими унга ҳужум қилган. Ходим ширкат раҳбариятининг ёзма розилигисиз журналистлар АЁҚШ ҳудудида видеотасвирга олишга ҳақли эмаслигини билдирган.

Юсуфзодага кўра, улар АЁҚШ биносини тасвирга олган эмаслар, улар шунчаки бензин нархи кескин ошиб кетганидан шикоят қилаётган ҳайдовчилар билан суҳбатлашаётган эдилар, холос. Юзига енгил жароҳат етган журналист ҳужум ҳодисаси ортидан шифокорга борган.

Озодлик мухбирлари Тожикистон Ички ишлар вазирлигига ариза билан мурожаат этишган. Сино туман ИИБ терговчилари оммавий ахборот воситалари вакилларига ҳужум ҳодисаси бўйича дастлабки суриштирувни бошлаганлар.

Қирғизистон президенти кейинги ҳафтада Тошкентга сафар қилади

Садир Жапаров

Қирғизистон президенти Садир Жапаров 11-12 март кунлари Ўзбекистонга сафар қилади. Бу ҳақда Қирғизистон ташқи ишлар вазири Руслан Қазақбаев 4 март куни Бишкекда ўтган матбуот анжуманида билдирган.

Қазақбаевга кўра, сўнгги кунларда президент Жапаров қатор мамлакатлар лидерларидан таклиф олган ҳамда у Ўзбекистондан кейин Тожикистон, Туркманистон ва Хитойга бормоқчи.

Садир Жапаровнинг Қирғизистон президенти вазифасига киришганидан кейин илк хорижий сафари февраль ойи охирида Россия Москвага бўлган. Март ойи бошида эса С. Жапаров Қозоғистонга сафар қилган.

Халқаро суд Фаластин ҳудудларида содир этилган жиноятларни тергов қилади

Фаластин- Исроил армияси Ғазо шаҳрига фосфорли бомба отмоқда. 2009 йил, 8 январь.

Халқаро жиноий суд (ХЖС) бош прокурори Фаластин ҳудудларида содир этилгани иддао қилинаётган жиноятлар юзасидан расмий тергов ўтказди.

Суднинг бу қарорини Исроил ва АҚШ танқид қилди. 3 март куни АҚШ давлат котиби Антони Блинкен Қўшма Штатлар суд қарорига «қатъий қарши ва ундан ҳафсаласи пир бўлганини» билдирди. Исроил ҳам суд қарорини қоралади.

Фаластин ва инсон ҳуқуқлари ташкилотлари эса бу хабарни олқишлади.

ХЖС бош прокурори Фату Бенсуданинг айтишича, суд беш йиллик дастлабки экспертиза ортидан 2014 йил июнидан бери Исроил томонидан босиб олинган Ғарбий Соҳил, шарқий Қуддус ва Ғазо секторида содир бўлган воқеаларни тергов қилишга қарор қилган.

Тергов давомида Хамас назоратидаги Ғазо секторидаги можаролар ҳамда Исроил босиб олган Ғарбий Соҳил ва Шарқий Қуддусдаги аҳоли пунктларидаги ҳодисаларга асосий эътибор қаратилиши кутилмоқда.

Торонтода 10 пиёдани машинаси билан босиб ўлдирган шахсга ҳукм чиқарилди

Канада байроғи.

3 март куни Канада суди 2018 йилнинг 23 апрелида пиёдалар устига автомобилини ҳайдаб юбориб, 10 одамни ўлдирган Алек Минасянни айбдор деб топди.

Минасяннинг адвокати мижози аутизмдан азият чекишини ва шу сабабдан нима қилаётганини билмаганини таъкидлади.

28 ёшли Минасяннинг ўзи фургони билан пиёдалар устига ҳайдаб юборганини тан олган. Шунингдек, у жинсий алоқадан кўнгли қолган эркакларнинг онлайн ҳамжамиятига аъзо эканини айтган.

Онлайн ҳамжамиятнинг айрим аъзолари жинсий алоқада бўлган одамларга ҳужум уюштиришни режалаштирган бўлган.

Минасян Торонтонинг гавжум маҳалласида пиёдалар устига автомобилини ҳайдаб юборганидан кейин, 22 дан 94 ёшгача бўлган саккизта аёл ва икки эркак нобуд бўлган эди.

Судья Минасян ҳужумни режалаштиргани ва қасддан қилганига шубҳа йўқлигини айтди.

Канадада қотилликда айбдор деб топилганлар умрбод қамоқ жазосига ҳукм қилинади.

Швеция жанубида пичоқ билан қуролланган ҳужумчи саккиз одамни яралади

Швед полицияси ҳодиса жойини текширмоқда.

Швеция полицияси мамлакат жанубида содир этилган пичоқбозлик замирида терроризм ётган бўлиши мумкинлигини маълум қилди. Ҳужумда саккиз киши жароҳат олган эди.

20 ёшлардаги ҳужумчи 3 март куни Ветланда шаҳрида пичоқ билан ўткинчиларга ҳужум қилган. Полиция уни яралаб, ҳибсга олган.

Маҳаллий касалхонадан олинган маълумотларга кўра, жароҳат олган уч кишининг аҳволи оғирдир.

Полиция ушбу жиноят қотилликка уриниш сифатида тергов қилинаётгани, шунингдек, терроризмга алоқаси текшираётганини билдирди.

Ички ишлар вазири Микаэль Дамберг Швеция радиосига берган интервьюсида хулоса чиқаришдан олдин тергов натижаларини кутиш кераклигини айтди:

«Мен полицияни тинглаганимда, улар иккаласи ҳам жиноятни қотилликка уриниш сифатида тергов қилмоқдалар, шунингдек, терроризмга алоқадор ҳар қандай алоқаларни кўриб чиқмоқдалар», - деди у.

Полиция ҳужумчи қандай қурол ишлатилгани ва у қайси давлат фуқароси эканини айтишдан бош тортди. Гумонланувчи айни дамда касалхонада даволанмоқда.

SpaceX ширкатининг навбатдаги прототип ракетаси қўнганидан кейин портлаб кетди

Starship SN10 ракетаси ширкатнинг Техас штатидаги космодромига қўнганидан кейин портлаган.

3 март куни АШҚдаги SpaceX фазо ширкатининг Starship ракетасининг яна бир прототипи синов парвозидан сўнг муваффақиятли равишда қўнди, аммо қўнганидан кейин бир неча дақиқа ўтиб, портлаб кетди.

Starship SN10 ракетаси ширкатнинг Техас штатидаги космодромига қўнганидан кейин портлаган.

Бундан аввал ширкатнинг икки прототип ракетаси қўна олмай портлаб кетган эди.

Бу сафарги портлаш сабаби нима экани ҳозирча номаълум
SpaceX қайта ишлатиш мумкин бўлган ракета ишлаб чиққан илк ширкатдир.

Ширкат асосчиси Илон Маск бундай ракеталар ёрдамида кенг оммани фазога учиришни йўлга қўйишга бел боғлаган.

АҚШ Афғонистон тинчлик музокараларини жадаллатиш учун БМТ анжуманини ўтказишни таклиф қилди

Афғонистон манзараси.

Америка Қўшма Штатлари Бирлашган Миллатлар Ташкилоти ҳомийлигида Афғонистон бўйича халқаро анжуман ўтказишни таклиф қилмоқда. Бу ҳақда АҚШ Давлат департаментининг юқори лавозимли расмийси маълум қилди.

АҚШ таклифини Вашингтоннинг Афғонистондаги махсус вакили Залмай Халилзод 4 март куни Қатарда Толибонга тақдим этиши кутилмоқда.

Халилзод 3 мартга қадар Кобулда Афғонистон тинчлик музокараларини жонлантириш ва мамлакатда авж олаётган зўравонликларни тўхтатиш мақсадида музокара ўтказди.

Хусусан, у президент Ашраф Ғани, Миллий ярашув олий кенгаши раиси Абдулла Абдулла ва бошқалар билан учрашиб, толиблар билан музокараларни тезлаштириш йўлларини муҳокама қилди.

Президент Жо Байден 2020 йилнинг февраль ойида АҚШ ва Толибон имзолаган шартномани қайта кўриб чиқмоқда.

Битимга мувофиқ 1 майга қадар АҚШ ва хорижий давлатлар қўшинлари Афғонистондан олиб чиқиб кетилиши керак.

Давлат департаментининг юқори лавозимли расмийсига кўра, БМТ анжуманига минтақадаги давлатлар, жумладан, қўшни Эрон ва Покистон вакиллари чақирилади.

Арманистонда минглаб одам бош вазир Пашинян истеъфосини талаб қилиб намойишга чиқди

Арманистонда Пашинянга қарши норозилик намойиши иштирокчилари.

Арманистон пойтахти Ереванда минглаб мухолифат тарафдори бош вазир Никол Пашинян истеъфосини талаб қилиб намойишга чиқди.

3 март куни 10 мингдан ортиқ намойишчи парламент биноси олдида тўпланди. Уларни кўп сонли хавфсизлик ходимлари кузатиб турди.

2 март куни Арманистон президенти армия бошлиғини лавозимидан бўшатиш тўғрисидаги буйруқни имзолашдан бош тортган, натижада мамлакатда юзага келган сиёсий инқироз янада мураккаблашган эди.

Ўтган ҳафтада Арманистон қуролли кучлари бош вазир Пашинян ва у бошқараётган ҳукумат истеъфосини талаб қилган эди. Пашинян бу талабни давлат тўнтариши уринишига тенглаштириб, Бош штаб бошлиғи Оник Гаспарянни ишдан олиш тўғрисида қарор чиқарди.

Аммо Арманистоннинг асосан рамзий ваколатларга эга президенти Армен Саркисян 2 март куни Гаспарянни ишдан бўшатиш тўғрисидаги буйруқни имзолашдан иккинчи марта бош тортди.

Ўтган йилнинг 27 сентябрида бошланиб, 9 ноябрда Озарбайжон ғалабаси билан якунланган Тоғли Қорабоғ уруши ортидан Арманистонда Пашинян истеъфоси талаб қилинган намойишлар тинчимаяпти. Бунга Пашинян Россия воситачилигида Озарбайжон билан сулҳ битимини имзолагани туртки бўлди.

Навальний ўзининг “Кольчугина” тергов ҳибсхонасида экани ҳақида хабар чиқарди

Мухолифатчи Алексей Навальний суд залида, Москва, 2021 йил 20 феврали

Мухолифатчи Алексей Навальний Москвадаги ҳибсхонадан этап қилинганидан кейин ўзининг қаерда эканига оид илк маълумотни чиқарди. 3 март куни сиёсатчининг Инстаграмида ёйинланган хабарга мувофиқ, у Владимир вилоятидаги “Кольчугина” тергов ҳибсхонасида тутиб турилибди.

Навальний штаби маълумотига кўра, мухолифатчи у ерда камида уруш фахрийси Игнат Артеменкога туҳмат иши бўйича апелляция аризаси кўрилгунича тутиб турилади. Мазкур иш бўйича Навальнийга 850 минг рубль жарима солинган.

Тергов ҳибсхонасидаги Навальний аҳволи яхши экани, бироқ ҳали ташқаридан хат-хабар ололмаётгани, шу важдан ташқи олам ҳақида Москвадаги “Матросская тишина” ҳибсхонасида ушлаб турилган пайтдан кўра камроқ маълумот билишини билдирган.

Аввалроқ Навальний Владимир вилояти Покров шаҳридаги 2-жазо колониясига етказилгани хабар қилинган, бироқ бу маълумот расман тасдиқланган эмасди.

Мухолифатчи Навальний заҳарлангани ортидан муолажа олган Германиядан шу йил 17 январида Москвага қайтиб келиши биланоқ қўлга олинганди. 2 февраль куни суд “Ив Роше” иши бўйича мухолифатчига нисбатан чиқарилган шартли жазони ҳақиқий қамоқ жазосига алмаштирган. Ўтган ҳафта у Москвадаги “Матросская тишина” тергов ҳибсхонасидан этап қилинган.

Мьянмада норозилик намойишини тарқатиш чоғида ёш болалар дохил 38 киши ўлдирилди

Мандалай шаҳридаги намойишдан лавҳа, 2021 йил 3 марти

Мьянмада ҳокимиятни эгаллаб олган ҳарбийларга қарши чоршанба куни ўтказилган норозилик акцияси иштирокчиларининг камида 38 нафари ўлдирилди. Бу ҳақда БМТ баёнотида айтилган.

Би-Би-Си хабарига кўра, шу тариқа 3 март Мьяанмада ҳарбий хунтага фуқаровий бўйсунмаслик ҳаракати бошланганидан буён энг қонли кунга айланган.

Ҳарбийларга тобеъ кучлар бир нечта шаҳарда, жумладан, Янгон, Мандалай ва Минжанда намойишчиларга қарата ўт очишган. Ўлдирилганларнинг камида икки нафари вояга етмаганлардир.

Мьянмада 1 февраль куни ҳарбий тўнтариш содир бўлганидан сўнг мамлакат бўйлаб оммавий норозилик акциялари бошланиб кетган, намойишчилар ҳибсга олинган ҳукумат вакилларини озод қилиш талаби билан кўчага чиққанлар. Ҳибсга олинганлар орасида ўтган йил ноябрь ойида бўлиб ўтган парламент сайловларида ғалаба қозонган “Демократия учун миллий лига” етакчиси Аун Сан Су Чжи ҳам бор. Ҳарбийлар унинг партиясини сайловларда кенг кўламли сохталаштиришларга йўл қўйганликда айблаб келади. Хунтачилар аввалги сайлов комиссиясини тарқатиб юборишган ва бир йилдан сўнг янги сайлов ўтказишга ваъда қилганлар.

БМТнинг Мьянма бўйича махсус элчиси Кристина Шранер-Бургенер маълумотларига кўра, ҳокимият тўнтаришидан сўнг бошланган норозилик акциялари чоғида 50 дан зиёд одам ўлдирилган. Бир кун аввал қўшни давлатлар Мьянма ҳарбийларини босиқликка чақиришганди.

Туркия пойтахтида Муҳаммад ал-Хоразмий бюсти очилди

Анқарада очилган Муҳаммад ал-Хоразмий бюсти (“Дунё” АА фотоси)

Ўзбекистоннинг Анқарадаги элчихонаси ташаббуси билан Туркий маданият халқаро ташкилоти – ТУРКСОЙ ҳамда Анқара шаҳар муниципалитети билан биргаликда Туркия пойтахти Анқара шаҳрида 3 март куни Муҳаммад ал-Хоразмий ёдгорлигининг очилиш маросими ўтказилган.

“Дунё” ахборот агентлиги хабарига кўра, ўзбек дипломатлари, ТУРКСОЙ вакиллари, туркиялик депутатлар ва маҳаллий мулозимлар иштирокидаги тадбир “Хива - туркий дунёнинг маданият пойтахти” халқаро дастури доирасида бўлиб ўтган.

Ёдгорлик Анқара шаҳрининг Кечиўрен туманидаги машҳур боғлардан бири – “Жўка водийси” (Ihlamur Vadisi) ҳудудида ўрнатилган.

Озодлик ўтган йил декабрида Испания пойтахти Мадридда ҳам Хоразмий ҳайкали ўрнатилгани ҳақида хабар қилганди.

VIII асрда Хивада дунёга келган жаҳонга машҳур олим Муҳаммад Хоразмийнинг “Ал-китоб ал-мухтасар фи ҳисоб ал-жабр вал-муқобала” асари номидан “алгебра” атамаси пайдо бўлган. Рисола XII асрдаёқ лотин тилига таржима қилиниб, “Algorithmi” рисоласи номи билан бутун Европага тарқалгани айтилади. Ҳозирда "алгоритм" калимаси IT соҳасида энг кўп қўлланиладиган сўзлардан бири бўлиб ҳисобланади.

Чегара билмас мухбирлар Саудия валиаҳд шаҳзодаси устидан Германия судига шикоят қилди

Журналист Жамол Хашогги 2018 йилда ўлдириб кетилган эди.

1 март куни Чегара билмас мухбирлар (RSF) ташкилоти Саудия Арабистони валиаҳд шаҳзодаси Муҳаммад бин Салмон ва Саудия Арабистонининг қатор юқори лавозимли мулозимларини 2018 йилда журналист Жамол Хашоггини ўлдиришда ва бу билан инсониятга қарши жиноятга қўл уришда айблаб, Германия судига шикоят йўллади.

Германия бош прокурорига юборилган 500 саҳифалик шикоят арзига Хашогги қотиллигидан ташқари 30 дан ортиқ журналист ўзбошимчалик билан ҳибсга олингани тўғрисидаги даъволар киритилган.

Германия прокуратураси шикоят келиб тушгани, айни дамда қонуний ва далиллар нуқтаи назаридан кўриб чиқилаётганини билдирди.

The Washington Post газетаси колумнисти Жамол Хашогги 2018 йил октябрида Саудия Арабистонининг Истанбулдаги консуллигида ўлдирилганди. Ҳодисадан сўнг Хашоггининг жасади бўлакларга бўлиниб, консуллик биносидан олиб чиқиб кетилган ва ҳалигача топилган эмас.

Хашогги Саудия Арабистони расмийлари, хусусан, шаҳзода Муҳаммад сиёсатини танқид қилиб келган. Жиноятда шаҳзода Муҳаммад қўли борлиги ҳақидаги гумонлар қотиллик ортидан дарҳол юзага келди. Шаҳзоданинг ўзи Хашогги ўлимига алоқадор эканини қатъиян рад этиб келади.

Германия қонунларига биноан мамлакат прокуратураси инсониятга қарши жиноятлар бўйича глобал миқёсда кучга эга ҳукм чиқаришга даъво қилиш имконини беради.

АҚШ махсус хизматлари Хашоггини ўлдиришни валиаҳд шаҳзода Муҳаммад буюртиргани эҳтимол эканини хулоса қилган.

Freedom House: Глобал миқёсда демократия янада тезроқ суръатда емирилмоқда

Freedom House халқаро ташкилоти логоси.

Инсон ҳуқуқларини ҳимоя қилувчи Freedom House ташкилоти 2020 йилда коронавирус пандемияси, иқтисодий ноаниқлик ва можаролар туфайли глобал миқёсда эркинлик кўрсаткичи пастлаганини маълум қилди.

Ташкилот 3 март куни эълон қилган йиллик ҳисоботда «эркин эмас» деб белгиланган мамлакатлар сони сўнгги 15 йил ичида қайд этилган энг юқори даражага кўтарилгани айтилади.

Ҳисоботда Қирғизистон ва Беларусь сиёсий ҳуқуқлар ва фуқаролик эркинликлари бўйича энг катта йўқотишлар кузатилган давлатлар қаторига киритилди. Айни пайтда Шимолий Македония энг катта ютуқларга эришган мамлакатлар сафидан ўрин олди.

Бу йилги ҳисоботда 73 мамлакат, шу жумладан, нафақат Хитой, Беларусь ва Венесуэла каби авторитар давлатлар, балки АҚШ ва Ҳиндистон сингари «нотинч демократик давлатларнинг» эркинлик кўрсаткичлари пасайтирилди.

2020 йилда «демократия ҳимоячилари авторитар рақибларига қарши курашда оғир йўқотишларга йўлиқдилар ва халқаро мувозанат зулм фойдасига ўзгарди», дейилади ҳисоботда.

ИШИД Афғонистонда уч нафар телевидение ходимини ўлдирганини иддао қилди

Афғонистон пойтахти Кобул манзараси.

ИШИД террор гуруҳи Афғонистон шарқидаги Жалолобод шаҳрида маҳаллий Enikass TV телеканалининг уч нафар аёл ходими ўлимига сабаб бўлган ҳужум учун жавобгарликни ўз зиммасига олди.

Enikass TV телеканали нобуд бўлган аёллар 18 ёшдан 20 ёшгача бўлган мактаб битирувчилари эканини маълум қилди.
Телеканал ходимлари ишдан уйга кетаётганда отиб ўлдирилган.

Декабрь ойида ИШИД гуруҳи Жалолободда айни телеканалда ишлаган аёл ва унинг ҳайдовчисига қилинган суиқасд учун жавобгарликни ўз бўйнига олган эди.

Сўнгги ойларда Қатарда Афғонистон ҳукумати ва Толибон вакиллари ўртасида тинчлик музокаралари олиб борилаётган бўлишига қарамасдан, Афғонистон бўйлаб журналистлар, фуқаролик жамияти фаоллари ва расмийларга ҳужумлар сони кўпайди.

Ҳуқуқни ҳимоя қилиш гуруҳларининг таъкидлашича, бу хуружлар Афғонистондаги мустақил фаоллар ва фуқаролик жамияти вакиллари овозини ўчириш ва уларни қўрқитиш мақсадида амалга оширилмоқда.

Арманистон президенти Қуролли кучлар бош штаби раҳбарини ишдан бўшатишга йўл очиб берди

Арманистон президенти Арман Саркисян.

2 март куни Арманистон президенти Қуролли кучлар бош штаби раҳбарини лавозимидан бўшатиш тўғрисидаги буйруқни имзолашдан бош тортди, натижада мамлакатда юзага келган сиёсий инқироз янада мураккаблашди.

Ўтган ҳафтада Арманистон қуролли кучлари Бош вазир Никол Пашинян ва у бошқараётган ҳукумат истеъфосини талаб қилган эди. Пашинян бу талабни давлат тўнтариши уринишига тенглаштириб, Бош штаб бошлиғи Оник Гаспарянни ишдан олиш тўғрисида қарор чиқарди.

Аммо Арманистоннинг асосан рамзий ваколатларга эга президенти Армен Саркисян 2 март куни Гаспарянни ишдан бўшатиш тўғрисидаги буйруқни имзолашдан иккинчи марта бош тортди.

Бунга қарамасдан, президент Конституциявий суддан Гаспарянни ишдан бўшатиш тўғрисидаги буйруқ конституцияга мос келиш-келмасиги тўғрисида қарор чиқаришни сўрамади. Мутахассисларнинг айтишича, агар 4 мартгача давлат раҳбари Олий судга мурожаат қилмаса, Гаспарянни ишдан бўшатиш қарори автоматик равишда кучга киради.

Ўтган йилнинг 27 сентябрида бошланиб, 9 ноябрда Озарбайжон ғалабаси билан якунланган Тоғли Қорабоғ уруши ортидан Арманистонда Пашинян истеъфоси талаб қилинган намойишлар тинчимаяпти. Бунга Пашинян Россия воситачилигида Озарбайжон билан сулҳ битимини имзолагани туркти бўлди.

Лукашенко Беларусда “ҳокимият трансфери” бўлмаслигини билдирди

Александр Лукашенко

Беларуснинг авторитар раҳбари Александр Лукашенко ўз мамлакатида “ҳокимият трансфери” бўлмаслигини билдирди. Бу баёнотни у 2 март куни Минскда Россия президенти Владимир Путин билан февраль ойида Сочида ўтказилган музокаралар ҳақида сўзлай туриб берди.

“Беларусда ҳеч қанақа трансфер бўлиши мумкин эмас… Ҳаммаси Конституция ва қонунга кўра бўлади”, деган А. Лукашенко.

Унинг айтишича, Беларусда янги Конституция кейинги йилнинг январь-февраль ойларида қабул қилинади.

“Ҳокимият трансфери деганлари бор-йўғи шу”, деган Лукашенко.

Беларусда ўтган йил 9 августида президент сайловидан кейин оммавий норозилик чиқишлари бошланган. МСК мазкур сайлов натижаларига кўра, Александр Лукашенкони ғолиб деб эълон қилган. Айни пайтда унинг асосий рақиби бўлган мухолифат вакиласи Светлана Тихановская президент сайловида ўзи ғалаба қозонганини билдирган.

Сайловдан кейинги намойишларда минглаб одам тутиб кетилган, аксилҳукумат акцияларида қўлга олинганлар ҳибсхоналарда қийноққа дучор қилингани ва калтакланганига оид кўплаб ҳужжатлар мавжуд.

Лукашенко ғалаба қозонгани айтилган сайлов натижаларини тан олмаган Европа Иттифоқи тинч намойишчилар, мухолифат ва оммавий ахборот воситалари вакилларига қарши қатағон уюштирган Минск расмийларига нисбатан босқичма-босқич санкциялар жорий этиб келмоқда.

Тихановская ЕИни Лукашенко режимига қарши кескинроқ позицияда туришга чақирган.

Россия ташқи ишлар вазири Ўзбекистонда “Спутник V” рўйхатга олинганини иддао қилди

Россия ташқи ишлар вазири С. Лавров (ў) ўзбекистонлик ҳамкасби А. Комилов билан, Москва, 2021 йил 2 марти

Россия ташқи ишлар вазири Сергей Лавров Ўзбекистонда “Спутник V” вакцинаси тезкорлик билан рўйхатга олинганини билдирди. Бу иддао Лавров тилидан 2 март куни ўзбекистонлик ҳамкасби Абдулазиз Комилов билан учрашувдан сўнг ўтказилган матбуот анжумани чоғида янграган.

Шу кунларда Ўзбекистонда аҳолини ёппасига эмлаш жараёни бошланади… Ўзбекистонда “Спутник V” вакцинасини ишлаб чиқариш масаласи кўриб чиқилмоқда, вакцина у ерда тезкорлик билан рўйхатга олинган. Биз бу йўналишдаги ҳамкорлигимизни жуда қадрлаймиз”, дея иқтибос келтирган Сергей Лавров сўзларидан РИА Новости.

Россия ташқи ишлар вазири ўз сўзида шу кунда Ўзбекистон Соғлиқни сақлаш вазирлиги делегацияси Москвада юрганини қўшимча қилган.

Ўзбекистонда Республика махсус комиссияси қарори билан Россиянинг “Спутник V” вакцинасини рўйхатга олиш ва ишлаб чиқаришни бошлашга рухсат берилгани 17 февраль куни очиқланган эди. Аммо Озодлик 2 март ҳолатига бу вакцина Ўзбекистонда рўйхатдан ўтгани ҳақида бирор расмий маълумот топа олмади.

Инновацион ривожланиш вазирлиги матбуот котиби Назокат Азим аввалроқ Озодлик билан суҳбатда Ўзбекистонда март ойининг ўрталаридан бошлаб аҳолининг биринчи навбатда эмланадиган қатламини Хитой вакцинаси билан оммавий эмлашни бошлаш кутилаётгани ҳақида маълум қилган эди.

ЕИ Навальний иши бўйича россиялик тўрт нафар мулозимни санкциялар рўйхатига киритди

Мухолифатчи Алексей Навальний суд залида, Москва, 2021 йил 20 феврали

Жорий йилнинг 2 март куни Европа Иттифоқи россиялик тўрт нафар мулозимга қарши санкция жорий қилди. Санкциялар мухолифатчи Алексей Навальнийнинг қамоққа йўлланиши ва унга қарши тазйиқлар уюштирилиши муносабати билан киритилган. Ўша куни АҚШ ҳам Навальнийнинг заҳарланиши билан боғлиқ равишда Россияга қарши санкция киритганлигини эълон қилди.

ЕИнинг янги санкциялари ҳақида маълумот иттифоқнинг расмий сайтида эълон қилинган. Bild ва Focus журналлари санкция рўйхатига киритилган Россия расмийлари Федерал жазони ижро этиш хизмати директори Александр Калашников, Россия Тергов қўмитаси раҳбари Александр Бастрикин, бош прокурор Игорь Краснов ва Миллий гвардия директори Виктор Золотов эканлиги ҳақида хабар берди.

Уларга ЕИ мамлакатларига кириш тақиқланади, ЕИ ҳудудидаги мол-мулки музлатилади.

Президент Жо Байден маъмурияти вакилларининг журналистларга маълум қилишларича, АҚШ санкциялари россиялик мулозимлар ва ширкатларга нисбатан жорий этилган. Америкалик мулозимлар мухолифатчининг заҳарланишига Россия ҳукуматининг алоқаси бор, деган фикрда. Брифингда қайд этилишича, Байден маъмурияти Россия билан алоқаларни яхшилашга ёки ёмонлаштиришга интилмайди. Шунчаки “Россия чегарадан чиққанида” АҚШ ва ҳамкорлари томонидан унга нисбатан жазо чоралари қўлланилади. Жумладан, маъмурият тез кунларда Россияга қарши янги санкциялар жорий этишни режалаштирмоқда, дея хабар қилди Bloomberg агентлиги.

Мухолифатчи Навальний заҳарлангани ортидан муолажа олган Германиядан шу йил 17 январида Москвага қайтиб келиши биланоқ қўлга олинганди. 2 февраль куни суд “Ив Роше” иши бўйича мухолифатчига нисбатан чиқарилган шартли жазони ҳақиқий қамоқ жазосига алмаштирган. Ўтган ҳафта у Москвадаги тергов ҳибсхонасидан колонияга этап қилинган.

СССРнинг биринчи ва охирги президенти Михаил Горбачёв 90 ёшга тўлди

Михаил Горбачёв СССРни 1985-1991 йилларда бошқарган.

1985 йилдан 1991 йилгача ҳозирда мавжуд бўлмаган давлат – СССРни бошқарган Михаил Горбачёв 2 март куни 90 ёшини нишонлади.

Михаил Горбачёв 1985 йилда Коммунистик партия бош котиби сифатида ҳокимият тепасига келди. У мамлакатни демократия йўлига олиб чиққан қайта қуриш ташаббускори бўлди. 1990 йилдан СССР тарқалиб кетгунича, яъни 1991 йилнинг якунигача СССРнинг биринчи ва охирги президенти лавозимини эгаллаган.

Михаил Горбачёв раҳбарлик қилган йилларда дунёда “совуқ уруш” якунланди. Совет қўшинлари Афғонистондан олиб чиқилди, биринчи марта эркин сайловлар ўтказилди, Коммунистик партиянинг “раҳбарлик ва йўлбошчилик қилиши” принципидан воз кечилди. Марказий ва Шарқий Европа социалистик системадан бош тортди. Иккига бўлиб юборилган Германия яна қайта бирлашди.

1990 йилда Горбачёв Нобель Тинчлик мукофотига сазовор бўлди.

Собиқ СССР ҳудудида Михаил Горбачёвни “улкан давлатни йўқ қилиш”да айбловчилар ҳам бор. Горбачёвнинг ўзи ҳам қатор хатоликларга йўл қўйганини тан олган.

Ғарбда Горбачёв олиб борган сиёсат қўллаб-қувватланади. Горбачёвни 90 йиллиги билан Германия президенти Франк-Вальтер Штайнмайер, АҚШ президенти Жо Байден, Британия Бош вазири Борис Жонсон ва бошқалар табриклади.

Россия президенти Владимир Путин Горбачёвга юборган табрикномасида уни “мамлакат ва дунё тарихини ўзгартирган буюк сиёсий арбоб” деб атади.

Тинчлик бўйча Нобель мукофотига 300 дан ошиқ номзод кўрсатилди

Нобель Тинчлик мукофотига Беларусь мухолифати лидери Светлана Тихановская ва Россия мухолифати лидери Алексей Навальний ҳам кўрсатилди.

Норвегия Нобель қўмитаси 2021 йилги Тинчлик бўйича Нобель мукофотига 329 номзод кўрсатилганини маълум қилди.

2016 йилда мукофотга рекорд 376 номзод кўрсатилган эди. Бу йилги номзодлар орасида 234 шахс ва 95 ташкилот бор.

«Бу Нобель тинчлик мукофотига халқаро миқёсда катта қизиқиш борлигини кўрсатади», - деди Норвегия Нобель қўмитаси котиби Олав Ньёльстад.

«Эҳтимол, бу дунёда ҳал қилинмаган қатор можаро, уруш ва инсон ҳуқуқлари билан боғлиқ муаммолар мавжудлигини акс эттиради», - дея қўшимча қилди котиб.

Қўмита номзодларни ошкор қилмайди. Аммо мукофотга номзод кўрсатганлар – давлат раҳбарлари ёки юқори лавозимли сиёсатчилар, университет профессорлари, ташқи сиёсат институтлари директорлари, ўтмишда Нобель мукофотига сазовор бўлганлар ва Норвегия Нобель қўмитаси аъзолари – кимни соврин учун номзод ўлароқ тақдим этганларини маълум қилишлари мумкин.

2021 йилги номзодлар орасида Россия мухолифати етакчиси Алексей Навальний, қувғиндаги Беларусь мухолифати раҳбари Светлана Тихановская, швед иқлим фаоли Грета Тунберг ва АҚШ ҳуқуқ ҳимоячиси Стейси Абрамслар бор.

Покистон суди куфрда айбланиб қамалган насронийни гаров эвазига озодликка чиқарди

Иллюстратив сурат. Қамоқхона тиканли симлари.

Покистон суди ўспиринлик чоғида куфрда айбланиб, қамалган насроний Набил Масиҳни гаров эвазига озодликка чиқарди.

1 март куни Масиҳни судда ҳимоя қилиб келаётган Британия–Покистон насронийлар уюшмаси Лоҳур суди 20 ёшга тўлган Масиҳ «жиноят содир этганини кўрсатувчи ҳеч қандай далил йўқлигини» айтиб, гаров эвазига озод қилишни буюрганини билдирди.

Тўрт йил қамоқда ўтирган Масиҳ уч кун ичида озодликка чиқарилиши кутилмоқда.

2016 йилда ўша пайтда 16 да бўлган Масиҳни оломон Facebookда Маккадаги Каъба расми билан таҳқирловчи пост ёзишда айблаган эди. Натижада 2018 йилда суд уни 10 йил қамоқ жазосига ҳукм қилди.

Британия–Покистон насронийлар уюшмаси Масиҳ тўлиқ оқланишига эришиш учун курашишда давом этишни режалаштирмоқда.

Арманистон Бош вазири муддатидан олдин сайлов ўтказишга тайёр эканини билдирди

Арманистон Бош вазири Никол Пашинян.

1 март кун Арманистон бош вазири Никол Пашинян мухолифат муайян шартларга рози бўлса, навбатдан ташқари парламент сайловларини ўтказишга тайёр эканини айтди.

Арманистонда сиёсий вазият кескин бўлиб қолмоқда. Пойтахт Ереванда Пашинян тарафдорлари ва мухолифат мунтазам равишда оммавий митингларни ўтказмоқда.

Ўтган ҳафтада Арманистон Қуролли кучлари Пашинян ва у бошқараётган ҳукумат истеъфосини талаб қилди. Бош вазирнинг ўзи эса бу талабни давлат тўнтариши уринишига тенглаштирди.

Ереванда ўз тарафдорлари олдида нутқ сўзлаган Пашинян:
«Агар парламентдаги мухолифат муддатидан олдин сайловларга рози бўлса, биз ҳам бунга рози бўламиз», - деди.

Бош вазир, шунингдек, келажакда сиёсий инқироз юзага келиши олдини олиш учун октябрь ойида президент ваколатларини кенгайтириш масаласида референдум ўтказишни таклиф қилди.

Ўтган йилнинг 27 сентябрида бошланиб, 9 ноябрда Озарбайжон ғалабаси билан якунланган Тоғли Қорабоғ уруши ортидан Арманистонда Пашинян истеъфоси талаб қилинган намойишлар тинчимаяпти. Бунга Пашинян Россия воситачилигида Озарбайжон билан сулҳ битимини имзолагани сабаб бўлган.

Коронавирусга қарши эмлаш жараёни узоқ давом этиши кутилмоқда

COVAX дастури асосида эмлаш Ганадан бошланди.

Гана президенти Жаҳон соғлиқни сақлаш ташкилоти (ЖССТ)нинг камбағал давлатларга коронавирусга қарши эмлашда ёрдам кўрсатиш - COVAX дастури доирасида эмланган илк шахс бўлди.

Хитой расмийси эса мамлакатдаги 1 миллиард 400 миллион аҳолининг 40 фоизи июнь ойигача эмланишини маълум қилди.

Бугунга қадар хитойликларнинг атиги 3,56 фоизи эмланган.
COVAX дастури доирасида жорий йил якунига қадар камида икки миллиард доза вакцина ҳозирлаш режалаштирилган.

Ўтган ҳафта COVAX вакциналари Гана ва Кот-д'Ивуарга етиб борди.

АҚШда эса 50 миллиондан ортиқ одам, ёки мамлакат аҳолисининг 15 фоизи камида бир доза COVID-19 вакцинасини олган.

Уларнинг деярли тенг ярми иккинчи дозани ҳам олган.
Коронавирус пандемиясига қарши курашдаги ижобий ўзгаришларга қарамай, ЖССТнинг фавқулодда вазиятлар бўйича директори Майкл Райан йил охиригача вирусдан бутунлай қутулиш эҳтимоли оз экани ҳақида огоҳлантирди.

БМТ экспертлари Навальнийнинг заҳарланиши юзасидан халқаро тергов ўтказишга чақирди

Навальний заҳарлангани ортидан муолажа олган Германиядан шу йил 17 январида Москвага қайтиб келиши биланоқ қўлга олинганди.

Бирлашган Миллатлар Ташкилотининг инсон ҳуқуқлари бўйича икки эксперти Кремль танқидчиси Алексей Навальнийнинг заҳарланиши бўйича халқаро тергов ўтказишга чақирди.

1 март куни БМТнинг судсиз ва ўзбошимчалик билан қатл этиш бўйича бош мутахассиси Агнес Калламар, фикр ва сўз эркинлиги бўйича эксперт Айрин Хан қўшма баёнот эълон қилиб, Россияни Навальнийни «зудлик билан озодликка чиқаришга» чорладилар.

«Маҳаллий ҳокимият идоралари етарлича чора кўрмагани, тақиқланган кимёвий қуроллардан фойдаланилгани ва қасддан ўлдириш уринишларини ҳисобга олган ҳолда, биз фактларни аниқлаш ва жаноб Навальнийнинг заҳарланишига ойдинлик киритиш мақсадида шошилинч равишда халқаро тергов ўтказиш керак, деб ҳисоблаймиз», - дейилади билдирувда.

Навальний заҳарлангани ортидан муолажа олган Германиядан шу йил 17 январида Москвага қайтиб келиши биланоқ қўлга олинганди. 2 февраль куни Россия суди мухолифатчига нисбатан аввалроқ чиқарилган шартли жазони ҳақиқий қамоқ жазосига алмаштирди ва уни 2,5 йил қамоқ жазосига ҳукм қилди.

Хабарларга кўра, 1 март куни Европа Иттифоқига аъзо давлатлар Навальний ҳибсга олинишида иштирок этган адлия ва ҳуқуқни муҳофаза қилиш идоралари амалдорларига қарши санкция жорий қилишга келишиб олган.

Дипломатик манбалар санкция йўлиққан Россия расмийлари Федерал жазони ижро этиш хизмати директори Александр Калашников, Россия Тергов қўмитаси раҳбари Александр Бастрикин, бош прокурор Игорь Краснов ва Миллий гвардия директори Виктор Золотов экани ҳақидаги аввалги хабарларни тасдиқлаган.

Давомини ўқинг

XS
SM
MD
LG