Линклар

Шошилинч хабар
01 март 2021, Тошкент вақти: 15:26

Халқаро хабарлар

Эронда феврал ойида ўтадиган Парламент сайловларида қатнашишни истаган номзодлар бугун рўйҳатдан ўта бошладилар.

Мазкур сайловларда Парламентдаги кўпчилик ўринни консерваторларга бой бериши мумкин бўлган ислоҳотчилар ёш йигит-қизларни ўз номзодларини рўйҳатдан ўтказишга даъват этмоқдалар.
Эрон Президентининг укаси Муҳаммад Риза Ҳотамий етакчилигидаги асосий ислоҳотчи партия, агар номзодларга тўсқинлик қилинса, сайловларга бойкот эълон қилишини билдирди.

Кун янгиликлари

Петербургда ўзбекистонлик муҳожир ишга кириш учун борган жойида вафот этди

Россиянинг Санкт-Петербург шаҳридаги София кўчасида куни кеча 64 ёшли ўзбекистонлик муҳожир вафот этган. Бу ҳақда 78.ru нашри маҳаллий ҳуқуқ-тартибот идораларидаги манбасидан олинган маълумотга таянган ҳолда хабар қилди.

Нашрнинг ёзишича, муҳожир мазкур манзилга нонвой бўлиб ишга жойлашиш учун келган, бироқ кўп ўтмай у ўзини ёмон ҳис қила бошлаган ва “тез ёрдам” етиб келгунича жон таслим қилган.

Муҳожирнинг жасади ўлим сабабини аниқлаш учун моргга йўлланган. Ҳодиса юзасидан текширув ўтказилмоқда.

Алексей Навальний Борис Немцов фонди мукофотига лойиқ топилди

Борис Немцов ва Алексей Навальний, Москва, 2011 йилнинг 24 декабри

Ҳозирда қамоқда сақланаётган мухолифатчи Алексей Навальний Россияда демократик қадриятларни ҳимоя қилишда кўрсатган жасорати учун Борис Немцов мукофоти лауреатига айланди. Бу ҳақда Борис Немцов фонди маълумот тарқатди. Мукофот лауреатининг исми ҳар йили Немцов ўлдирилган сана – 27 февраль куни очиқланади.

Фонд хабарномасида Навальний “шахсий жасорат намунасини намойиш этибгина қолмай”, Россияда коррупцияни фош қилиш ҳамда мамлакатда сақланиб қолган процедураларда фуқаролар иштироки даражасини оширишга улкан ҳисса қўшгани айтилган.

“Ўз фаолияти мобайнида у Россиядаги энг нуфузли мухолифатчига ҳамда дунёдаги мустабидликка қарши кураш рамзига айланди”, дейилган хабарномада. Фонд Россия расмийларини Навальнийни зудлик билан озод қилишга чақирган.

Алексей Навальнийнинг номзоди мазкур мукофотга аввалги йилларда ҳам бир неча бор кўрсатилган, бироқ мухолифатчи лауреат бўлолмаганди. Ўтган йили Борис Немцов мукофоти ўша пайтда ҳибсда бўлган Константин Котовга топширилганди.

Мухолифатчи Навальний заҳарлангани ортидан муолажа олган Германиядан шу йил 17 январида Москвага қайтиб келиши биланоқ қўлга олинганди. 2 февраль куни суд “Ив Роше” иши бўйича мухолифатчига нисбатан чиқарилган шартли жазони ҳақиқий қамоқ жазосига алмаштирган. Ўтган ҳафта у Москвадаги тергов ҳибсхонасидан колонияга этап қилинган.

Шанба куни кўп агентликлар “Ярновости” нашрига таянган ҳолда Навальний Владимир вилоятидаги режимининг аёвсизлиги билан ном чиқарган 2-колонияга йўлланиши ҳақида хабар қилишганди. Бироқ бу маълумот расмийлар томонидан ҳам, мухолифатчининг адвокатлари томонидан ҳам тасдиқланган эмас.

Навальний ва Немцов 2011–2012 йиллардаги норозилик акциялари уюштирув қўмитасида, мухолифатнинг мувофиқлаштирувчи кенгашида бирга фаолияти юритишган, Немцов 2015 йили ўлдирилишидан аввалроқ эса улар биргаликда “Баҳор” норозилик юришига ҳозирлик кўраётган эдилар. Борис Немцов мазкур юришга 2 кун қолганида ўлдириб кетилганди.

Туркия Ойга парвоз қилиш учун ракета ишлаб чиқараётганини очиқлади

Туркия саноат ва технология вазири Мустафа Варанк

Туркия Ойга йўлланиши мўлжалланаётган гидрид моторли ракета ишлаб чиқармоқда. Бу ҳақда саноат ва технология вазири Мустафа Варанк Онадўли агентлигига билдирган.

Вазир Варанк Туркия ракетаси Delta V Space Technologies Inc ширкати ишланмаларини ўрганиш асосида қурилаётганини қайд этган, бироқ ракетанинг техник хусусиятларига тўхталган эмас.

Мулозимга кўра, Туркия ўзининг Ой дастурини икки босқичда (2023 ва 2028 йилларда) амалга оширишни режаламоқда. Илк босқичда Ой юзасига учувчисиз аппаратни қўндириш кўзда тутилган.

Варанк шу тариқа ўз мамлакати “космик соҳада олий лигага кириш”га ҳаракат қилаётганини урғулаган.

Туркия президенти Ражаб Тоййиб Эрдўғон 9 февраль куни миллий космик дастурни эълон қилганди. Дастур доирасида Туркия космодром қуриш, коинотга фазогир йўллаш ҳамда фуқаровий ва ҳарбий эҳтиёжларни қоплаш учун сунъий йўлдош аппаратларини учириш ниятида.

Мьянма полицияси намойишчиларни жанговар қуроллар билан ўққа тутди

Янгон шаҳрида ўтган норозилик намойишидан лавҳа, 2021 йил 22 феврали

Мьянмада шанба ва якшанба кунлари яна норозилик намойишлари бўлиб ўтган. Янгон, Тавой ва Мандалай шаҳарларида полиция билан тўқнашувлар чоғида камида 18 киши нобуд бўлган, 30 дан зиёд одам яраланган. Полициячилар жанговар ўқлар билан бир қаторда намойишчиларга қарши резина ўқлари ва кўздан ёш сиздирувчи газни ишга солганлар. Бу ҳақда Би-би-си БМТнинг Инсон ҳуқуқлари бўйича олий комиссари бошқармасидан олинган маълумотга таянган ҳолда хабар қилди.

Мамлакат мухолифати ҳарбийларни ҳокимиятдан четлатиш, сиёсатчи Аун Сан Су Чжи ва у етакчилик қилган партия раҳбариятини зудлик билан озод қилишга чақиряпти.

Ҳарбий ҳокимиятга бўйсунувчи полиция Мьянманинг феълан лидери бўлган Аун Сан Су Чжи ҳамда президент Вин Мьинни уй қамоғида сақламоқда. Мамлакатда бир йиллик фавқулодда ҳолат тартиби жорий қилинган. Йирик шаҳарларда оқшомги соат 8 дан тонгги соат 4 гача комендантлик соати ўрнатилган.

Ҳибсда тутилаётган Аун Сан Су Чжи рацияларни ноқонуний ташиганлик, сақлаганлик ва улардан фойдаланганлик, импорт тўғрисидаги қонун ва бошқа қонун ҳужжатларини бузганликда айбланмоқда.

Мьянма армияси янги парламент сайлови ўтказилишини ваъда қилаётган бўлса-да, сайлов санасини эълон қилмаяпти. Генераллар Аун Сан Су Чжи етакчилигидаги “Демократия учун миллий лига” партияси ғалаба қозонган аввалги сайловда натижалар сохталаштирилганини иддао қиляпти.

Шанба куни Мьянманинг ҳарбий ҳокимияти қарори билан мамлакатнинг БМТдаги элчиси Чжо Мо Тун вазифасидан озод этилган. Аввалроқ дипломат ўз юртдошларини ҳарбийлар ҳукмронлигини тўхтатиш учун “барча зарур воситаларидан фойдаланиш”га чақирган. Мьянма давлат телевидениеси Чжо Мо Тун “ўз юртини сотган”и ва “элчилик вазифасини суиистеъмол қилган”ини билдирган.

Мьянмани 1962 йилдан бери бошқариб келаётган ҳарбий режим раҳбарлари 2011 йили халқаро босимларга ён бериб, мамлакатни босқичма-босқич демократик бошқарув йўлига ўтишига розилик берганди. Бундай ўтишга ҳарбийлар парламентдаги ўринларнинг 25 фоизини эгаллаш ҳамда куч ишлатар тузилмалар устидан ўз назоратларини сақлаб қолиш шарти билан рози бўлганлар.

Жамиятнинг демократик қадриятларни дастаклаган қатлами лидери бўлган Аун Сан Су Чжи партияси 2011 йилдан кейинги барча сайловларда ғалаба қозонган.

Мазкур партия ўтган йилги сайловда ҳам катта фарқ ғалаба қозонган ҳамда ҳарбийлар иштирокисиз ҳукуматни мустақил равишда шакллантириш имкониятини қўлга киритганди.

АҚШда коронавирусга қарши яна бир вакцина қўллаш учун маъқулланди

АҚШнинг Озиқ-овқат маҳсулотлари ва дори-дармон сифати устидан санитар назорат бошқармаси (FDA) мамлакатда коронавирусга қарши Johnson & Johnson ширкати томонидан ишлаб чиқарилган вакцинани ошиғич қўллашни маъқуллади.

Оқ уй томонидан тарқатилган президент баёнотида бунинг “ҳар бир америкаликни тўлқинлантирувчи” ҳодиса бўлгани айтилган. Байденга кўра, қанча кўп одам эмланса, АҚШ шу қадар тез вирусни енгади.

АҚШ президенти COVID-19 устидан ғалаба қозонилишига ҳали узоқлигини айтиб, мамлакат аҳолисини муттасил қўл ювиш, ниқоб тақиб юриш ва ижтимоий масофани сақлашга чақирган.

“Мен вируснинг янги вариантлари тарқалиши қабатида вазият яна ёмонлашиши ва ҳозирги яхшиланиш ҳолати чаппасига кетиши мумкинлиги ҳақида аввал ҳам кўп бор айтганман”, деган Жо Байден.

Президентга кўра, унинг маъмурияти “мазкур хатарга енгилтаклик билан қарамайди”. Байден АҚШга яқин ойларда курашни давом эттиришга имкон берувчи ўз режаси лозимлигини билдирган.

Куни кеча АҚШ конгрессининг Намояндалар палатаси президент Жо Байденнинг коронавирус пандемияси шароитида мамлакат иқтисодиётини қутқариш ҳамда аҳолига ёрдам кўрсатиш режасини қабул қилиш учун овоз берган. Режада бу мақсадлар учун 1,9 триллион доллар маблағ ажратиш кўзда тутилган. Эндиликда мазкур “америкача қутқарув режаси” Сенат томонидан кўриб чиқилиши керак. Ҳужжат маъқулланган тақдирда, у федерал ҳукуматнинг инфекцияга қарши кураш бўйича олтинчи дастурига айланади.

Саудия Арабистони пойтахт Ар Риёдга қилинган ракета ҳужумининг олди олинганини билдирди

Ар Риёд манзараси.

Саудия Арабистони ҳукумати 27 февраль куни пойтахт Ар Риёдга отилган ракета уриб туширилганини билдирди.

Билдирилишича, ракета Ямандаги хусий шиа исёнчилари томонидан отилган.

Ямандаги шиа исёнчиларига қарши курашаётган араб давлатлари ҳарбийларидан иборат коалицияга раҳбарлик қилаётган Саудия ҳукумати баёнотида хусий исёнчилар Ар Риёд ва Жизан вилоятига ракета отгани айтилади.

Хусийлар бу баёнотга ҳозирча муносабат билдирмади. Ракета ҳужумидан жабрланганлар тўғрисида ҳам маълумот йўқ.

Саудия телеканаллари Ар Риёд осмонида портлаш юз бергани тўғрисидаги видеони эфирга узатди. Таҳлилчиларга кўра, ракеталар АҚШнинг Patriot ҳаводан мудофаа тизими ёрдамида уриб туширилган.

Саудиядаги АҚШ элчихонаси мамлакатдаги америкаликларни ҳужумлар давом этиши мумкинлигидан огоҳлантирди.

2014 йилда хусий шиа исёнчилари Яман пойтахти Сана шаҳрини ва мамлакат шимолидаги катта ҳудудни босиб олган эди. Бунинг ортидан президент Абд Раббу Мансур Ҳодий раҳбарлигидаги суннийлар ҳукумати Саудия Арабистонига қочишга мажбур бўлган.

Саудия 2015 йилда шиа исёнчиларига қарши коалиция тузган ва Абд Раббу Мансур Ҳодий ҳокимиятини тиклаш мақсадида хусийларга уруш очган. Эрон бу урушда хусий шиа исёнчиларни қўллаб келади.

Афғонистон ҳуқуқ ташкилоти Толибон қўмондони журналистнинг оиласини ўлдирганини маълум қилди

Толибон жангарилари.

Афғонистон Инсон ҳуқуқлари мустақил комиссияси -АИҲМК 28 февраль куни Гор вилоятида Толибон қўмондони аввал ўлдириб кетилган журналистнинг оила аъзоларидан уч нафарини ўлдиргани ҳақида маълум қилди.

Вилоятдаги мустақил радиолардан бирининг муҳаррири бўлган Бисмиллоҳ Одил Аймоқ 1 январь куни толиблар томонидан ўлдириб кетилганди.

25 февраль куни жангарилар Аймоқнинг отаси яшайдиган Фироз Коҳ шаҳри четидаги уйга ҳужум қилган. Ҳужум сабаблари ҳозирча маълум эмас.

АИҲМК оила аъзоларидан уч киши ўлдирилгани, тўрт киши яралангани ва оиланинг яна икки аъзосини ўғирлаб кетгани ҳақида билдирди.

Бироқ Толибон расмий вакили Забиҳуллоҳ Мужоҳид 26 февраль куни гуруҳ Аймоқ оиласига қилинган ҳужумга алоқадор эмаслиги ҳақида баёнот берди.

Афғонистонда сўнгги йилда журналистларга нисбатан ҳужумлар кўпайди. 2020 йилда Афғонистонда жангарилар 11 мухбирни ўлдирди.

Навальний жазони Москва яқинидаги колонияда ўтайди

Навальний суд залида.

Россия матбуотининг билдиришича, мухолифатчи Алексей Навальний ўз жазо муддатини Москва яқинидаги Владимир вилоятида ўтайди.

ТАССнинг 27 февралда хабар беришича, Навальнийни Владимир вилояти Покров шаҳридаги колонияга олиб келинади. Мазкур колония Москвадан юз километр узоқликда жойлашган.

ТАСС аноним манбага таянган ҳолда, Навальний колонияга 26 февралда олиб келинишини ва карантинга жойлаштирилишини айтган.

Манба Навальний колонияга олиб келингани ёки олиб келинмагани ҳақида хабар бермади.

Аввалроқ «Ярновости» сайти Навальний Владимир вилоятининг Кольчугино қишлоғидаги изоляторда сақланаётгани ва Покровдаги 2-сонли колонияга кўчирилишини маълум қилганди.

Жазони ўташ федерал хизмати 26 февраль куни Навальний Москвадаги тергов изоляторидан колонияга кўчирилганини маълум қилган. Лкуин хизмат Навальний айни қайси жойда жазони ўташини айтмаган.

Ғарб давлатлари Грузиядаги «беқарорлаштирувчи» ҳодисалардан хавотир изҳор қилди

АҚШ Сенатининг Халқаро алоқалар қўмитаси раиси, сенатор Боб Менендез .

АҚШ Сенатининг Халқаро алоқалар қўмитаси раиси, сенатор Боб Менендез Германия, Литва, Эстония, Латвия, Польша ва Чехия расмийлари билан бир қаторда Грузияда содир бўлаётган «беқарорлаштирувчи ва антидемократик ҳодисалар»дан хавотир билдирди.

Менендез ва юқорида тилга олинган мамлакатлар вакиллари имзолаган баёнотда «Грузиядаги энг йирик мухолифат партияси бўлмиш Бирлашган миллий ҳаракат раиси Ника Мелияни ҳибсга олиш учун партия офисига бостириб кирилгани Грузиядаги демократия ва эркинлик заифлигини фош қилди», дейилади.

23 февраль куни Грузия полицияси Бирлашган миллий ҳаракат офисига бостириб кириб, унинг етакчиси Мелияни қамоққа олган эди.

Натижада минглаб одам пойтахт Тбилисида норозилик намойишига чиқди. Грузия ва НАТО байроқларини кўтариб олган намойишчилар мамлакат парламенти биноси олдида тўпланиб, навбатдан ташқари парламент сайловларини ўтказилишини ва сиёсий маҳбуслар озод этилишини талаб қилдилар.

Мелия 2019 йилдаги аксилҳукумат намойишлар пайти оммавий зўравонликларни уюштиришда айбланмоқда. Унинг ўзи бу айблов ортида сиёсий сабаблар турганини айтиб келади.

Байден: АҚШ Сурияда берган зарбалар Эрон учун огоҳлантирувдир

АҚШ президенти Жой Байден

26 февраль куни АҚШ президенти Жо Байден Сурия шарқида Эрон дастаклаб келган қуролли кучларга берилган ҳаво зарбалари Теҳрон учун огоҳлантириш эканини айтди.

25 февраль куни АҚШ Мудофаа департаменти ой бошида Ироқда АҚШ ва коалиция қўшинлари жойлаштирилган базага қилинган ракета ҳужумларига жавобан жангариларга ҳаводан зарба берилганини маълум қилган эди.

Пентагоннинг маълум қилишича, икки F-14 ҳарбий учоғидан ракета ҳужумини амалга оширгани айтилаётган жангари гуруҳлар объектларига еттита бомба ташланган.

Зарбалар Сурия – Ироқ чегарасида Эрон дастаклаб келаётган қуролли кучлар, шу жумладан, «Каитиб Ҳизбуллоҳ» ва «Каитиб Саййид Ал-Шуҳада» гуруҳлари ишлатадиган «кўплаб объект»ни нишонга олган.

Қароргоҳи Британияда жойлашган Сурия инсон ҳуқуқлари обсерваториясига кўра, зарбалар натижасида Миллий мобилизация бўлимининг 17 аъзоси нобуд бўлган.

Россия мухолифати Борис Немцовни хотирлашга ҳозирланмоқда

Борис Немцов 2015 йил, 27 февраль тунда Кремль яқинида отиб ўлдирилган эди.

27 февраль куни Россия мухолифати фаоллари Москва марказида ўлдирилган мухолифатчи сиёсатчи Борис Немцовни хотирлашни режалаштирмоқда.

Немцов бунда роппа-роса олти йил олдин – 2015 йил 27 февраль тунда Кремль яқинида отиб ўлдирилган эди.

Немцовни хотирлаш маросими Россия мухолифати етакчиси Алексей Навальний қамоқда қолаётган ва унинг иттифоқчиларига қарши қатағон кучайган бир пайтга тўғри келди.

Навальний жамоаси унинг тарафдорларини бир дақиқа сукут сақлашга ва Немцов отиб ўлдирилган Большой Москворецкий кўпригида гул қўйишга чақирди.

Россия ҳукумати ўнлаб шаҳарда 10 мингдан зиёд одамни ҳибсга олиб, уларнинг кўпини маъмурий ва жиноий жавобгарликка тортгани учун Навальний иттифоқчилари норозилик намойишлари баҳорга қадар тўхтатиб турилишини эълон қилдилар.

Ўтган ҳафта Москва суди Навальнийни 2,5 йилга қамаш тўғрисидаги аввалги суд қарорини қонуний деб топди.

Мухолифат 27 февраль куни Немцов хотирасига митинг эмас, балки «хотирлаш тадбири» ўтказиш режалаштирилганини билдирди.

Москва шаҳри мэрияси коронавирус пандемияси туфайли мухолифат тарафдорларининг эсдалик маршини ўтказиш аризасини рад этди.

27 февраль куни Борис Немцов номидаги эркинлик жамғармаси Навальнийни «Жасорат учун Борис Немцов мукофоти» билан тақдирлади.

Жамғарма ушбу муносабат билан эълон қилган баёнотда «Навальний нафақат шахсий жасорат намойиш этди, балки коррупцияни фош этиш ва Россиянинг ҳанузгача мавжуд бўлган сиёсий жараёнларида фуқароларнинг фаоллигини оширишга катта ҳисса қўшди», дейилади.

Жамғарма директори Россия расмийларини Навальнийни «зудлик билан» озодликка чиқаришга чорлади.

Немцов тарафдорлари унинг ўлими ортидан Москворецкий кўпригида гуллар, фотосуратлар ва шамлардан иборат ёдгорликни яратган. Аммо полиция, шаҳар ишчилари ва бошқалар уни мунтазам равишда бузиб келади.

Немцов Борис Ельцин президентлиги йилларида бош вазир биринчи ўринбосари лавозимида ишлаган.

Владимир Путин ҳокимиятга келганидан кейин унинг ашаддий танқидчисига айланган эди.

Чеченистон президенти Рамзан Қодиров билан алоқаси бор беш чечен 2015 йил Немцов ўлимида айбланиб, жавобгарликка тортилди.

Қодиров бу ишда қўли борлигини рад этcа ҳам, айбланувчиларнинг бири Заур Дадаевни «чинакам ватанпарвар», деб таърифлаган.

Туркманистонда ит байрами таъсис этилди

Туркманистонда бундан буён алабай ити байрами нишонланади. Янги байрамни таъсис этиш тўғрисидаги фармонни мамлакат президенти Гурбангули Бердимуҳаммедов имзолагани ҳақида 25 февралда маҳаллий нашрлар хабар қилди.

Алабай ити байрами ҳар йили апрелнинг сўнгги якшанбасида, ахалтекин оти куни билан бирга нишонланади.

Ўтган йилнинг ноябрида Бердимуҳаммедов Ашхабодда алабайнинг олтин ёдгорлигини тантанали равишда очиб берганди. Олтин ёдгорлик пойдеворига Led-экран ўрнатилган. Ёдгорликнинг очилиш маросимида алабай итлари акс этган видеороликлар экранда намойиш этилган.

Туркманистон президенти Алабайга олтин ҳайкал ўрнатди
Илтимос кутинг

Айни дамда медиа-манба мавжуд эмас

0:00 0:03:17 0:00

АҚШ кучлари Суриядаги нишонларга ҳаводан зарба берди

АҚШнинг B-52 бомбардимончилари Яқин Шарқдаги ҳарбий машғулотлар чоғида - 27 январь, 2021

АҚШ кучлари пайшанба куни Эрон дастаклаётган ҳарбийлашган гуруҳларнинг Суриядаги объектларига ҳаводан зарба берди.

Пентагон матбуот котиби Жон Кирбининг билдиришича, ҳужум натижасида Суриянинг Ироқ билан чегарасида жойлашган бир неча бино йўқ қилинган. Пентагондаги аноним манбаларнинг хабар беришича, эронпараст гуруҳлар бу бинолардан контрабанда қуролларни сақлаш учун фойдаланган. CNN маълумотига кўра, бир неча жангари ўлдирилган.

Бу ҳужум Ироқнинг шимолидаги Ирбилдаги ракета зарбаларига жавобан амалга оширилди. Ирбилдаги ҳужумда бир неча АҚШ ҳарбийси яраланган, Пентагон учун ишлаётган бир нафар Филлипин фуқароси вафот этган эди. АҚШ Ирбилдаги ҳужум ортида Эрон турганини айтган.

Пентагон вакили ўз баёнотида таъкидлашича, Суриядаги объектларга зарба «аниқ мужда бермоқда: президент Байден АҚШ ҳарбийлари ҳамда халқаро коалиция аъзоларини ҳимоя қилади». АҚШ президенти Жо Байден иттифоқчилар билан маслаҳатлашувдан сўнг Суриядаги объектларга зарбани шахсан маъқуллаган.

Европа Иттифоқи беларуслик мулозимларга қарши санкция муддатини узайтирди

Европа Иттифоқининг санкциялар рўйхатида Александр Лукашенко ҳам бор

Европа Иттифоқи 1994 йилдан бери ҳокимият тепасида қолаётган авторитар раҳбар Александр Лукашенко дохил беларуслик ўнлаб мансабдорга қарши санкциялар муддатини бир йилга узайтирди.

Европа кенгаши сайти орқали 25 февраль куни ёйинланган хабарномада санкциялар “Беларусда тинч намойишчилар, мухолифатчилар ва журналистларга нисбатан зўравонлик қабатида уюштирилган қатағон учун масъул бўлган мансабдорлар ҳамда сайлов натижалари сохталаштирилгани учун масъул бўлган шахслар”га қарши қаратилгани айтилган.

Санкциялар 2020 йил августида ўтказилган президент сайлови натижаларига қарши бўлиб ўтган намойишлар расмий Минск томонидан шафқатсиз бостирилганидан сўнг жорий этилганди. Мухолифатчилар ва халқаро кузатувчилар мазкур сайлов натижалари сохталаштирилганини айтиб келишади. Лукашенко ғолиб деб эълон қилинган президент сайлови натижалари Европа Иттифоқи, АҚШ, Канада ва бошқа кўплаб мамлакат томонидан тан олинган эмас.

Ўтган йилнинг октябрь-декабрь ойларида кучга кирган санкциялар беларуслик 88 нафар жисмоний шахс ва еттита юридик шахсга қарши қаратилган. Тақиқ ЕИга сафар қилиш ва активларни музлатиш каби чораларни ўз ичига олади. ЕИ субъектларига санкция рўйхатига киритилган шахслар билан молиявий операциялар ўтказиш тақиқланган.

Санкциялар узайтирилгани беларуслик амалдорларга қарши чоралар йўқ деганда 2022 йил 28 февралигача амалда бўлишини англатади.

Истанбулда чавақланган ўзбекистонлик муҳожир касалхонада жон берди

Туркиянинг Истанбул шаҳрида шу йилнинг 23 февраль куни баданига ўткир тиғли жисм билан оғир тан жароҳати етказилган ўзбекистонлик О.Б. вафот этган. Бу ҳақда Ўзбекистоннинг Истанбулдаги бош консулхонаси маҳаллий прокуратура вакилларига сўзларига таянган ҳолда маълумот тарқатди.

Хабарномада ўзбекистон муҳожир олинган тан жароҳатлари туфайли Истанбулдаги Башакшеҳир давлат шифохонасида оламдан ўтгани айтилган.

Ўзбек дипломатлари мазкур ҳолат ўзлари томонидан қатъий назоратга олиниб, Туркиянинг ваколатли органлар томонидан бу борада терговга қадар текширув ҳаракатлари олиб борилаётганини билдирганлар.

Қайд этилишича, Бош консулхона марҳум муҳожир жасадини дафн қилиш учун Ўзбекистонга олиб кетишда лозим бўладиган барча зарур ҳужжатларни расмийлаштирган ва марҳумнинг оила аъзоларига керакли ҳуқуқий ёрдамни кўрсатган.

Озодлик аввалроқ Истанбулнинг Малтепе мавзеида 2020 йил 9 декабрида рўй берган можарода ўзбекистонлик 31 ёшли Бурҳонжон Олчинов маҳаллий тиланчи томонидан пичоқлаб ўлдирилгани, 12 декабрь куни эса шаҳарнинг Чаталжа мавзеида юз берган ўзаро жанжал оқибатида ўзбекистонлик 34 ёшли Х.Х. вафот этгани ҳақида хабар қилганди.

Россия коронавирусга қарши "Спутник V" вакцинасини нархини икки баробарга арзонлатди

Россиянинг "Спутник V" вакцинаси Қозоғистонда ҳам ишлаб чиқарилмоқда.

Россия Соғлиқни сақлаш вазирлиги "Спутник V" вакцинасининг нархини икки баробарга арзонлатди ва вакцинанинг икки компоненти баҳосини 866 рубль 81 копейка қилиб белгилади.

“Нарх пасайтирилиши вакцинани ишлаб чиқаришнинг технологияси оптимизациялаштирилгани, Россия аҳолисини оммавий равишда эмлаш мақсадида уни ишлаб чиқариш ҳажми кўпайгани ортидан юз берди”,-деб иқтиос келтирди Ишлаб чиқариш ва савдо вазири Денис Мантуров сўзларидан ҳукумат ахборот хизмати.

Аввал "Спутник V" вакцинасининг нархи 1942 рубль эди. Янги нарх - 866 рубль 81 копейка 5 мартдан бошлаб барча ишлаб чиқарувчилар учун мажбурий бўлади.

Россиянинг Гамалея илмий-тадқиқот маркази томонидан ишлаб чиқилган “Спутник V” вакцинасини Ўзбекистонда сертификатлаштирилган ҳолда оммавий қўллаш жараёнига Республика махсус комиссияси 17 февралда рухсат этган эди.

“Бугунги кунда ушбу вакцинадан 1 миллион доза харид қилиш юзасидан амалий чоралар кўрилмоқда”,-дейилади расмий билдирувда.

Арманистон Қуролли кучлари бош вазир Пашиняннинг истеъфо беришини талаб қилди

Арманистон бош вазири Пашинян ўз тарафдорлари билан бирга. Ереван, 25 февраль, 2021 йил.

Арманистон Қуролли кучлари бош вазир Никол Пашинян ва у бошқараётган ҳукумат истеъфосини талаб қилди.

Қуролли кучлар Бош штабининг 25 февралда тарқатган баёнотида айтилишича: “Арманистон Республикасининг бош вазири ва ҳукумати арман халқи учун оғир дамда адекват қарор қабул қила олмаган”.

Бундан ташқари Қуролли кучлар Бош штаб раҳбарининг биринчи ўринбсоари ишдан бўшатилганига норозилик билдирган. Бир кун аввал Пашинян генерал-лейтенант Тиран Хачатрянни лавозимидан озод қилганди.

Пашинян Бош Штаб баёнотини “ҳарбий давлат тўнтатириши” сифатида баҳолади.

“Мен Бош штаб баёнотини ҳарбий давлат тўнтариши сифатида баҳолайман. Ўз тарафдорларимни Республика майдонига йиғилишга чақираман”,-деб ёзди Пашинян Фейсбук саҳифасида.

Орадан кўп ўтмай, Пашинян Республика майдонига йиғила бошлаган ўз тарафдорлари сафига қўшилди.

Ўтган йилнинг 27 сентябрида бошланиб, 9 ноябрда Озарбайжон ғалабаси билан якунланган Тоғли Қорабоғ уруши ортидан Арманистонда Пашинян истеъфоси талаб қилинган намойишлар бўлиб ўтди. Бунга Пашинян Россия востачилигида Озарбайжон билан сулҳ битимини имзолагани сабаб бўлган.

Урушда Боку Тоғли Қорабоғнинг йирик ҳудудини ва унга туташ туманлар устидан назоратни тиклашга муваффақ бўлди.

Тоғли Қорабоғ халқаро миқёсда Озарбайжон ҳудуди ўлароқ тан олинган. Аммо минтақа 1990 йиллар бошидан 2020 йилнинг ноябрь ойигача этник арман қўшинлари бошқарувида эди.

Путин полицияга бўйсунмаганлик учун жарима миқдорини оширишга оид қонунни имзолади

Навальний ҳимояси учун акцияга чиққан намойишчи қиз полициячилар томонидан тутиб кетилмоқда, Москва, 2021 йил 31 январи

Россия президенти Владимир Путин оммавий тадбирлар уюштириш тартибини бузганлик, полиция ходимларига бўйсунмаганлик ҳамда хориж агенти ҳисобланмиш ноҳукумат ташкилотлари ва жисмоний шахслар ишига оид маълумотни ёйинлашда маркировка берилмагани учун жарима миқдорини ошириш тўғрисидаги қонунларни имзолади.

Митинглар ташкил этиш чоғидаги молиявий қонунбузарликлар учун эндиликда фуқаролар 10 минг рублдан 20 минг рублгача, мансабдор шахслар 20 минг рублдан 40 минг рублгача, юридик шахслар эса 70 минг рублдан 200 минг рублгача жаримага тортилиши мумкин (шу кундаги курс бўйича 1 АҚШ доллари 74 рублга тенг). Полиция ходимларига бўйсунмаганлар, янги қонунга мувофиқ, 4 минг рублгача жарима тўлашлари ёки 120 соатгача ҳибс этилишлари мумкин. Маъмурий ҳибснинг максимал муддати аввалгидек (15 сутка) қолган.

Хориж агенти ҳисобланмиш ноҳукумат ташкилотлари ва жисмоний шахслар ҳақидаги маълумотларни уларнинг мақомини зикр этмай ёйинлаган оммавий ахборот воситаларига 50 минг рублгача жарима солинади. Хорижий агент ҳисобланмиш ноҳукумат ташкилоти ўз мақомини қайд этмай материал ишлаб чиқарган тақдирда мансабдор шахслар 100 минг рублдан 300 минг рублгача, юридик шахслар эса 300 минг рублдан 500 минг рублгача жаримага тортилади.

Ўшдаги Қирғиз-Ўзбек университетига халқаро мақоми берилди

Ўшдаги Қирғиз-Ўзбек универистети биноси.

Ўшдаги Қирғиз-Ўзбек университети номи ўзгартирилди. 24 февралда расман билдирилишича, эндиликда университет Ботирали Сидиқов номидаги Қирғиз-Ўзбек халқаро университети деб аталади.

Таълим ва фан вазирлигининг билдирилишича, бу борадаги қарор 15 январда маҳаллий аҳолининг кўп сонли мурожаатлари ортидан қабул қилинган.

Давлат ва жамоат арбоби, фалсафа фанлари доктори Ботирали Сидиқов Қирғизистон мустақиликка эришганидан сўнг энг биринчи “афсонавий” парламент депутати бўлган. У Ўзбекистон Файласуфлар жамиятининг фахрий аъзоси, Қозоғистон Фанлар Академияси ва Қирғизистон Фанлар Академиясининг фахрий профессори бўлган.

Қирғизистон Инженерлик академияси ҳақиқий аъзоси Ботирали Сидиқов 3 монография ва 35та илмий тадқиқот муаллифи.

Университет 2010 йилдаги Ўш воқеаларига қадар Қирғиз-Ўзбек университети деб номланган. Ўш воқеаларидан сўнг унинг номи Давлат ижтимоий университети деб ўзгартирилган. Орадан бир неча йил ўтгач, таълим даргоҳи номи яна Қирғиз-Ўзбек университети деб ўзгартирилган эди.

Amnesty International Навальнийни “виждон тутқуни” деб аташдан бош тортди

Amnesty International халқаро инсон ҳуқуқлари ташкилоти ҳозирда қамоқда бўлган россиялик мухолифатчи Алексей Навальнийни “виждон тутқуни” деб топишга оид қарорини бекор қилди.

Alнинг Шарқий Европа ва Марказий Осиё бўйича менежери Александр Артемьевнинг “Медиазона” нашрига айтишича, мазкур қарор ташкилотнинг юридик ва сиёсий департаменти Навальнийнинг 2000-йиллар ўрталарида қилган чиқишлари ўрганиб чиқиб, уларда “нафрат риторикаси”ни топганидан кейин қабул қилинган. Бу ерда Навальнийнинг айнан қайси чиқишлари ҳақида гап бораётганига Артемьев аниқлик киритган эмас.

Айни пайтда у ҳуқуқ фаолларида Навальний айтган гаплар бўйича текшириш ўтказиш ҳақида ёппасига мулоҳазалар мухолифатчини хорижда обрўсизлантириш учун мувофиқлаштирилган ҳолда амалга оширилган кампания бўлиши мумкин, деган таассурот уйғотган. Артемьев бундай мулоҳазалар қаердан келиб тушаётганини айтмаган, бироқ “Навальнийни зудлик билан озод қилиш талаби ўз кучида қолиши”, чунки мухолифатчи мутлақо сиёсий мотивлар асосида таъқиб қилинаётганини урғулаган.

Amnesty International ташкилоти Алексей Навальний бир ой муқаддам Москва аэропортида қўлга олингани ортидан мухолифатчини “виждон тутқуни” деб топганди. Ўша пайтда Al “Навальнийнинг қўлга олиниши Россия расмийларининг мухолифатчи овозини ўчиришга галдаги уриниши” ўлароқ баҳолаганди.

Кейинроқ инсон ҳуқуқлари ташкилотига бу қарор юзасидан ёппасига шикоят хатлари кела бошлаган. Amnesty International’даги аноним манба “Медиазона” нашрига бу хатлар ортида Кремль томонидан молиялаштирилувчи Russia Today медиахолдинги турган бўлиши мумкин, деган тахминни айтган.

Microsoft раҳбари АҚШ тарихидаги энг хавфли киберҳужумда Россия разведкасини айблади

Microsoft корпорацияси раҳбари Брэд Смит SolarWinds ширкатига уюштирилган ҳакерлик ҳужумига Россиянинг алоқаси борлигига оид далиллар мавжудлигини билдирди. Мазкур ҳужум АҚШ тарихидаги энг хавфли киберҳужум экани айтилади.

АҚШ Сенатининг разведка бўйича қўмитасида чиқиш қилган Смитнинг қайд этишича, мутахассислар киберҳужумнинг Россия разведкаси томонидан амалга оширилганига оид асосли далиллар топган, ҳужум бошқалар томонидан амалга оширганига оид эса ҳеч қанақа далил тополмаган.

Смитга кўра, Техасда жойлашган SolarWinds ширкати тизимига киришга имкон берувчи код шу қадар мураккабки, унинг устида камида минг нафар юқори малакали дастурчи ишлаган.

“Бу кўлаб давлат тузилмалари иштирокига ишора қилмоқда”, деган Microsoft раҳбари.

Сенатдаги тингловда иштирок этган FireEye ширкати раҳбари Кевин Мандиа ҳужум чоғида ҳакерлар Россия томонидан қўлланиб келинган воситаларга ўхшаш воситалардан фойдаланганини маълум қилган. Мандиага кўра, улар Хитой, Шимолий Корея ёки Эрон томонидан қўлланиладиган воситаларга ўхшамайди.

Декабрь ойи ўрталарида АҚШдаги қатор давлат идоралари ва хусусий ширкатларга ҳакерлик ҳужуми уюштирилгани хабар қилинганди. Ҳужумга учраганлар орасида Microsoft ширкати ва унинг мижозлари ҳам бўлган. Ҳакерлар серверларга SolarWinds ширкати дастур таъминотига вирус юқтириш орқали ёриб киришга муваффақ бўлишган. Ўшанда Қўшма Штатларда Мудофаа, Савдо, Энергетика, Ички хавфсизлик ва Молия вазирлиги дохил камида тўққизта федерал агентлик ҳамда 100 дан зиёд хусусий ширкат ҳужум нишонига айланганди. Вирусли дастурдан истеъфода этган фойдаланувчиларнинг умумий сони 18 мингга етиши мумкин.

АҚШ нашрлари аввалроқ ҳужум Россия хавфсизлик хизматлари назорати остида бўлган ҳакерлар томонидан уюштирилганини иддао қилиб чиққан.

Бироқ ўша пайтда АҚШ президенти бўлган Дональд Трамп ҳужум учун Россияни айблашдан бош тортган, Оқ уй эса Москванинг айбдорлигига оид расмий баёнот ёйинлаш фикридан сўнгги дақиқада воз кечганди.

Куни кеча Оқ уйнинг миллий хавфсизлик бўйича маслаҳатчиси Жейк Салливан АҚШ яқин бир неча ичида SolarWinds ширкатига уюштирилган ҳакерлик ҳужумга жавоб беражагини билдирган. Салливанга кўра, жавоб “кўринадиган ва кўринмайдиган” бир неча воситани ўз ичига олади.

АҚШда коронавирусдан нобуд бўлганлар сони 500 мингдан ошди

АҚШ президенти Жо Байден

Душанба куни АҚШда COVID-19 инфекцияси туфайли нобуд бўлганлар сони ярим миллиондан ошди.

Мамлакат ҳудудида илк коронавирусга чалиниш ҳолати бундан бир йил олдин Калифорния штатида қайд этилган эди.

Президент Жо Байден жума куни қуёш ботгунига қадар жамоат бинолари ва майдонларда АҚШ байроғини марҳумлар хотирасига пастлатиб қўйишни буюрди.

«Ушбу қайғули дамда бизни тарк этганларни ва уларнинг яқинларини ёдга оламиз», дейилади Байден баёнотда.

«Биз миллат сифатида уларни ёдда тутишимиз керак, шунда ярамиз бита бошлаши, бирлашишимиз ва бир миллат ўлароқ ушбу пандемияни енгишимиз мумкин».

Вашингтондаги Миллий собор қўнғироқлари 500 минг ҳалок бўлган америкалик хотирасига 500 марта чалинди.

Қўнғироқ чалиб бўлинганидан кейин, Байден Оқ уй олдида нутқ сўзлаб,

«Америкадаги ушбу оммавий ўлим кўламини тан оламиз, ҳар бир инсонни ва унинг ҳаётини ёдимизда сақлаймиз», - деди.

«Ҳар куни кечқурун онасидан хабар олиш учун қўнғироқ қилган ўғилни. Отани, унинг дунёсини ёритган қизини. Доим ёнида бўлган энг яхши дўстини. … Беморларини яшашга ундаган ҳамширани».

Байден нутқ сўзлаб бўлганидан кейин, вице-президент Камала Харрис ва унинг турмуш ўроғи қора кийим ва қора ниқоб кийган ҳолда пайдо бўлдилар. Улар «Amazing Grace» (Ажойиб марҳамат) насроний мадҳияси янграр экан, сукут сақлаб турдилар.

Мамлакатда бугунга қадар 28 миллиондан ортиқ COVID-19 вирусига чалиниш ҳолати қайд этилди. Аммо касалхонага ётқизилиш ҳолатлари Рождество байрамидан бери энг паст даражага тушди.

Жаҳон бўйлаб коронавирус билан алоқадор кўрилаётган ўлимларнинг тахминан 19 фоизи АҚШда қайд этилди.

АҚШ аҳолиси глобал миқёсда вирусни юқтирганларнинг атиги 4 фоизини ташкил этиши ҳисобга олинса, вирус туфайли нобуд бўлган америкаликлар сони ўта юқоридир.

Канада парламенти Хитойни уйғурларни геноцид қилаётганликда айблади

Хитойдаги мусулмонлар сақланаётган "қайта тарбиялаш лагер"ларидан бири.

Канада парламентининг қуйи палатаси Хитой уйғурларга қарши геноцид содир этмоқда, деб топди.

22 февраль куни Хитойдаги уйғурлар «геноцидга дучор бўлгани ва дучор бўлаётгани» ҳақидаги резолюция бир овоздан қабул қилинди.

Канада парламенти, шунингдек, уйғурларга нисбатан шафқатсиз муносабат ўзгармаса, 2022 йилги қишки Олимпиада ўйинларини Пекиндан бошқа жойга кўчиришни талаб қилувчи резолюцияни ҳам қабул қилди.

Ўтган ҳафтада Канада бош вазири Жастин Трюдо Шинжонда содир этилаётган қонунбузарликлар ҳақида кўплаб хабар келаётганини айтган эди. Шинжонда Хитой ҳукумати камида 1 миллион уйғурни ва бошқа мусулмон халқларни қамоқ-лагерларда ушлаб тургани айтилади.

Январь ойида АҚШнинг собиқ президенти Дональд Трамп маъмурияти ҳам Хитой Шинжонда уйғурларга нисбатан «геноцид ва инсониятга қарши жиноятлар» содир этган, деб топган эди.

Янги президент Жо Байден маъмурияти бу баёнотни қўллаган ва Хитой уйғурларни геноцид қилаётганини тан олишини билдирган.

Хитой бу лагерлар диний экстремизмни йўқ қилиш ва одамларни ҳунарга ўргатиш мақсадида тузилганини иддао қилиб келади.

NASA марсюрарининг қизил сайёрага қўнаётгани акс этган видео эълон қилинди (ВИДЕО)

Марс сайёрасининг кўриниши.

АҚШ аэрокосмик агентлиги (NASA) Марсга ўзининг Perseverance ровери қўнаётгани акс этган тиниқ видеони эълон қилди.

Аппаратни Марсга қўндириш учун масъул бўлган гуруҳ раҳбари Ал Чен ровер томонидан юборилган тасвирларни «биз орзу қилган нарса» деб атади.

Perseverance ровери Марс сатҳига 18 февраль куни қўнган эди. Унга ўрнатилган 6 камера қўниш жараёнини бошдан оёқ ёзиб олган. Қўниш давомида камераларнинг биттаси ва микрофон ишламай қолган.

NASA эълон қилган видеода тўқ сариқ ва оқ рангли парашютнинг очилгани ва Марснинг юзаси тобора яқинлашиб бораётгани, сайёра сатҳига яқин қолганда ракета двигателлари ишга тушиши ортидан қизил чанг кўтарилганини кўриш мумкин.

Марсюрар сайёрада қадимда ҳаёт бўлганига оид аломатларни топишга уринади ҳамда тупроқ намуналарини йиғади. Тўпланган намуналар кейинчалик Ерга етказилади.

Қатарда Толибон билан Афғонистонда тинчлик ўрнатиш музокаралари давом этади

Афғонистон шаҳарларидан биридаги манзара.

Қатарда бир ойдан ошиқ чўзилган танаффус ортидан Толибон ва Афғонистон ҳукумати ўртасида тинчлик музокаралари қайта жонлантириладиган бўлди.

22 февраль куни кечқурун Толибон матбуот котиби Муҳаммад Наим Twitterда музокаралар давом этишини маълум қилди. Музокаралар ўтган ойда тўсатдан тўхтаб қолган эди.

Афғонистон ҳукумати, АҚШ ва НАТО учун Толибон билан тинчлик сулҳи имзоланишидан олдин мамлакатда зўравонлик камайишига эришиш устувор вазифадир. Толибон зўравонликни озайтириш мумкин эканини айтган, аммо экстремистик гуруҳ зудлик билан сулҳ имзолашга қаршилик кўрсатмоқда.

Бирлашган Миллатлар Ташкилотининг 23 февраль куни эълон қилинган ҳисоботида айтилишича, ўтган йили зўравонликлар туфайли ўлган ва яраланган афғонистонликлар сони 2019 йилга нисбатан 15 фоизга камайган, аммо 2020 йилнинг сўнгги ойларида зўравонлик яна кўпайган.

Давомини ўқинг

XS
SM
MD
LG