Линклар

Шошилинч хабар
28 январ 2020, Тошкент вақти: 06:03

Халқаро хабарлар

Россия Президенти Владимир Путин мамлакат Федерал Кенгашига йиллик мурожаати билан чиқиш қилди.

Яқин ўн йил ичидаги асосий умуммиллий вазифа сифатида у ялпи ички маҳсулот ҳажмини икки баробарга ошириш, камбағалликни камайтириш, аҳоли турмуш фаровонлигини ўстириш ва армияни модернизациялаштириш ишларини тилга олди.
Президент Путин мамлакатда дамократия тамойилларига риоя қилиниши борасида гапира туриб, Россияни онгли равишда ушбу тамойилларни четлаб ўтаётганликда ва давлатни авторитаризм шаклида мустаҳкамлашга уринишда айблашмоқда, деган фикрни билдирди.
Айни вақтда у инсон ҳуқуқлари ҳимоячиларини ҳам танқид остига олди. Бироқ, айнан қайси ташкилотлар ҳақида гап бораётганини билдиргани йўқ. Президент Путиннинг таькидлашича, Россиянинг демократик йўналиши аввалгидек қолади.

Кун янгиликлари

Чеченистон полицияси рейдларини тергов қилган Кремль расмийсини алдагани маълум бўлди

Татьяна Москалькова.

27 январь куни “Новая газета” Чеченистон полицияси Инсон ҳуқуқлари бўйича вакил Татьяна Москальковани алдаган бўлиши мумкинлигини хабар қилди. Хусусан, Чеченистон расмийларини рейдлар кўлами ҳақидаги хабарларни рад этиш мақсадида сохта гувоҳларни тақдим қилгани тахмин қилинмоқда.

Газета мақоласида ёзилишича, Москалькова Чеченистонда ўнлаб одам умрига зомин бўлган рейдлар бўйича тергов доирасида 2017 йилда республикада йиғин ўтказган.

Йиғинда рейдда ҳалок бўлгани айтилган икки шахс аслида тирик эканлигини айтиб, кўриниш берган. “Новая газета” хабарига кўра, йиғинда қатнашган шахслар аслида чиндан ҳалок бўлган шахсларнинг ака-укалари бўлган.

Мақола муаллифлари ижтимоий тармоқлардаги суратлар ҳамда ўша пайтдаги хабарлар асосида юқорида тилга олинган икки гувоҳ аслида бошқа шахслар бўлганини аниқлаган.

Москалькова Чеченистонда 2016 йилнинг декабрида ва 2017 йилнинг январида ўтказилган рейдларни тергов қилган эди. Рейдлар давомида 27 нафар одам ҳалок бўлгани хабар қилинган.

Москалькованинг офиси “Новая газета” хабари “жуда жиддий” эканлигини айтиб, у кўриб чиқилишини билдирди.

Покистонда пуштунлар ҳуқуқларини ҳимояловчи гуруҳ етакчиси қўлга олинди

“Пуштунларни ҳимоя қилиш ҳаракати” (Pashtun Protection Movement, PPM) етакчиси Манзур Паштин.

Покистонда мамлакат ҳарбийларининг амалиётларини танқид қилиб келган фуқаровий гуруҳ етакчиси қўлга олинди. “Пуштунларни ҳимоя қилиш ҳаракати” (Pashtun Protection Movement, PPM) етакчиси Манзур Паштин 27 январь куни Пешовар шаҳрида қўлга олинди.

Аввалроқ 12 январь куни Банну шаҳрида ўтказилган акция ортидан Паштинга қарши жиноят иш қўзғатилган эди.

Депутат ҳамда PPM аъзоси Муҳсин Давор Паштиннинг қўлга олинишини “ҳуқуқларимизни тинч ва демократик тарзда талаб қилгани учун унга берилган жазо”, дея таърифлади.

“Аммо Манзурнинг қўлга олингани бизнинг қатъиятимизни оширади, холос”, деб ёзди Давор.

PPM гуруҳи 2018 йилдан бери пуштунлар ҳуқуқлари ҳимояси учун курашиб келади. Гуруҳнинг минглаб аъзоси бўлиб, улар Покистон армиясининг зўравон амалиётларини кескин қоралаб келади.
Ҳарбийлари Паштинни армияни сохта айбловлар билан танқид қилишда ва хоинликда айбламоқда.

Тожикистонда 3,8 миллион SIM-карта қайта қайддан ўтмади

Тожикистонда 1996 йилги паспортлар асосида берилган тахминан 4 миллионга яқин SIM-карта аҳоли томонидан ҳамон фойдаланилмоқда.

Янги намунадаги паспорт асосида SIM-картларни қайта рўйхатдан ўтказиш тўғрисидаги ҳукумат қарори билан белгиланган муддат 15 февралда якунланади. Қайта регистрация қилинмаган фойдаланувчиларнинг телефон рақамлари ёпилади.

Тожикистон Алоқа хизмати раҳбарнинг ўринбосари Адолат Абдураҳмонзода Душанбеда бўлиб ўтган матбуот анжуманида журналистларга 3,8 миллион фойдаланувчи янги паспорт асосида ўзларининг мобил телефонлари рақамларини ўзгартирмаганликларини айтди

Экспертларнинг фикрича, янги ҳужжат асосида аҳоли салкам ярим ой давомида қайта рўйхатдан ўтишга улгура олмайди.

Ҳукумат қарори аҳоли ўртасида норозиликларга сабаб бўлди, кўпчилик ҳукумат шаънига танқидий фикрларни айтишди, улар ҳукумат аҳоли ҳисобидан бойишни мақсад қилганини айтишди. Танқидчиларнинг фикрича, биометрик паспортлар асосида қайтадан рўйхатдан ўтишнинг ҳожати йўқ. Жамоатчилик норозиликлари тўлқинида ҳукумат сим-карталарни қайтадан рўйхатдан ўтказиш муддатини 2020 йилнинг 15 февралига қадар узайтирди. Алоқа хизмати раҳбарияти 27 январь куни бўлиб ўтган матбуот анжуманида февралнинг иккинчи ярмидан кейин қайтадан рўйхатдан ўтмаганлар билан нима бўлади деган саволга жавоб қайтармади.

Аҳолининг норозиликларига янги намунадаги паспортнинг қиммат экани сабаб бўлди. Ҳукуматнинг қарорига танқидий ёндашган Тожикистон парламентининг айрим аъзолари аҳолининг янги паспортга тўла ўтиши учун камида 4 йил кераклигини айтишади.

Болтон китоб ёзиб, унда Трампни хизмат ваколатларини суиистеъмол қилишда айблади

АҚШ президентининг миллий хавфсизлик бўйича собиқ маслаҳатчиси Жон Болтон.

АҚШ президентининг миллий хавфсизлик бўйича собиқ маслаҳатчиси Жон Болтон ёзган китобида президент Дональд Трамп Украина унинг сиёсий рақибларини тергов қилмаса, мамлакатга ёрдам беришни музлатиб қўйишга ҳаракат қилгани ҳақида ҳикоя қилди. Бу ҳақда 26 ноябрь куни The New York Times​ нашри хабар қилди.

Болтон ҳали чоп этилмаган китобида ёзишича, Трамп унга Киев сиёсий рақиблари, жумладан, собиқ вице-президент Жо Байден ва унинг ўғлини тергов қилмаса, Украинага ваъда қилинган юзлаб миллион ҳарбий ёрдамни тўхтатиб қўйишни исташини айтган.

Трамп ҳуқуқшунослари президент Киевга босим ўтказмаганини таъкидлаб келади.

Болтоннинг китоби ҳақида хабар тарқалиши ортидан демократлар уни Трампга нисбатан импичмент тергови доирасида кўрсатма беришга чақирди.

Демократлар назоратидаги Намояндалар палатаси 2019 йил декабрида АҚШ тарихида учинчи марта президентга импичмент эълон қилиш бўйича овоз берган эди. Намояндалар палатасидаги Демократик партия аъзолари 18 январь куни Трампни президент ваколатларидан ўз шахсий сиëсий манфаати учун фойдаланганлик ва ўз кирдикорларини яшириш учун Конгресс терговига халақит берганликда айбловчи ҳужжатни расман Сенатга тақдим қилди.

27 январь куни Сенатда импичмент эшитувлари давом этади.

Афғонистонда 83 киши кетаётган самолёт ҳалокатга учради

Иллюстратив сурат

Афғонистоннинг Ғазни вилоятида учоқ ҳалокатга учрагани тўғрисида мамлакат расмийлари хабар қилди.

Ғазни вилоят ҳокими, дастлабки маълумотларга таяниб, самолёт бортида 83 киши бўлганини маълум қилди.

Вилоят ҳокимлиги матбуот котиби Ориф Нурийнинг Озодлик радиосига айтишича, учоқ 27 январь, маҳаллий вақт билан соат 13.10 да ҳалокатга учраган. Ҳалокат сабаби ҳозирча номаълум.

"Ходимларимиз воқеа содир бўлган жойга етиб боришга ҳаркат қилмоқда. Бироқ масофа катта бўлгани учун хавфсизлик кучларимиз ҳозирча етиб боролгани йўқ", - деди Нурий.

Вилоят ҳокимлиги матбуот котибига кўра, самолёт Деҳи Ғазни тумани марказидан жануби-шарқда, 20 километр узоқликда.

Хитойда янги коронавирусдан ўлганлар сони 80 кишига етди

Иллюстратив сурат.

Хитой расмийлари янги коронавирус тез тарқалаётгани, вирусни юқтириб олганлар сони ошиғич ошиб бораётгани ҳақида билдирмоқдалар. Сўнгги маълумотларга кўра, мамлакатда вирусга чалинганлар сони 2300 нафардан ошиб кетган, 80 киши эса нобуд бўлган.

Хитой соғлиқни сақлаш вазири Ма Сяовэй 26 январь куни мамлакат “критик босқич”га кираётгани, чунки “афтидан, янги вируснинг тарқалиш имконияти кучаяётгани” ҳақида баёнот берди. Сяовэйга кўра, ҳаракатланишга қўйилган чекловлар ва назоратнинг бошқа кескин чоралари “минимал харажат ва максимал тезликда” натижа бериши керак.

26 январь куни Жаҳон соғлиқни сақлаш ташкилоти (ЖССТ) бош директори коронавирус тарқалишига оид вазиятни хитойлик амалдорлар ва тиббиётчилар билан муҳокама қилиш учун Пекинга боришни режалаётганини маълум қилган.

Вирус юқтириб олиш билан боғлиқ ҳолатлар бошқа мамлакатларда ҳам кузатилмоқда. Сўнгги маълумотларга кўра, ўлим ҳолатлари фақат Хитойдагина қайд этилган. Бироқ Таиланд, Австралия, АҚШ, Канада ва Францияда вирусга чалинганлар сони ортиб бораяпти. АҚШ, Франция ва Япония ўз фуқароларини шаҳардан эвакуация қилишга тайёр эканларини билдирганлар.

Президент Си Цзинпин 25 январь куни Хитой “янги коронавируснинг тез тарқалиши билан боғлиқ жиддий вазият билан қарама-қарши қолгани”ни айтган. Аввалроқ мамлакатдаги бир неча шаҳар ёпиб қўйилгани, жамоат транспорти ва авиақатновлар тўхтатилгани ҳақида хабар қилинган.

Хитой Саёҳат хизматлари уюшмаси сайёҳлик агентликларига одамларнинг гуруҳ бўлиб саёҳат қилишини тўхтатиш зарурлигини билдирган.

Амалдорларга кўра, вирус туфайли ҳаётдан кўз юмганларнинг кўпчилиги 50 ёшдан ошган одамлардир. Айрим пайтларда хасталик асоратлари деярли кўзга ташланмаяпти, бошқа пайтларда эса шамоллашга ўхшаш белгилар (масалан, йўтал ва титроқ каби) намоён бўлмоқда. Оғир ҳолатларда эса нафас олишда қийналиш каби белгилар аниқланган.

Тожикистон: Исёнчи маҳкумлардан 70 нафарининг қамоқ муддати узайтирилди

Иллюстратив сурат.

Тожикистонда 70 нафар маҳкум жазони ижро этиш муассасасида оммавий тартибсизлик келтириб чиқаришга урингани боис янги қамоқ муддатларига ҳукм қилинди, яна 30 нафарига оид жиноят иши кўриб чиқилмоқда.

Бу ҳақда Тожикистон бош прокурори Юсуф Раҳмон ўтган ҳафта Тожикистон парламенти юқори палатасининг навбатдан ташқари сессиясида маълум қилди.

Бош прокурор қайси маҳкумларнинг қамоқ муддати узайтирилганига ойдинлик киритмади.

Ўтган бир ярим йил мобайнида Тожикистондаги колониялардан иккитасида - Хўжанд колониясида 2018 йил 7 ноябрь куни ва Ваҳдатдаги колонияда 2019 йил 19 май куни исён чиққан.

Расмий маълумотларга кўра, “Ислом давлати” террор ташкилотига алоқадор дея Вахдатда тутиб турилган 30 нафар маҳкум қочиш мақсадида пичоқ ва бошқа тиғли буюмлар билан қуролланган ҳолда муассаса ходимларини гаровга олган, сўнг улардан уч нафарини ўлдирган. Ҳодиса чоғида умумий ҳисобда 32 киши - 29 нафар маҳбус ва қамоқхонанинг 3 ходими ўлган.

Хўжанд колониясида рўй берган исён чоғида эса, расмий маълумотларга кўра, 21 нафар маҳбус ҳалок бўлган. Қамоқхонанинг икки нафар ходими ўлдирилган, беш нафар қўриқчи жароҳат олган.

Ўтган йил ёзида эса Душанбедаги қамоқхонанинг 20 га яқин маҳбуси жазони ижро этиш муассасасида оммавий тартибсизлик уюштиришга уринган. “Экстремистик ташкилотларга аъзолиги учун узоқ муддатларга ҳукм қилинган йигирма нафар маҳбус исёнга тайёргарлик кўришган – махфий жойдан арматура ва темир бўлаклари топилган”, дейди Озодлик тожик хизматининг ўз исмини ошкор қилишни истамаган манбаси.

Ўтган йил октябрида Тожикистон Олий суди Ваҳдатдаги колониянинг 26 нафар маҳкумига янги қамоқ муддатини қўшди. Улар Тожикистон Жиноят кодексининг 16 моддаси бўйича, жумладан террорчилик, экстремизм ва қотиллик бўйича айбдор, дея топилганлар. Янги ҳукмга мувофиқ, маҳкумлар колонияда 19 йилдан 29 йилгача ўтиришлари керак бўлади. Маҳкумларнинг ўзлари исёнда иштирок этганларини рад этиб, ҳукм адолатсиз бўлганини таъкидлашган.

Human Rights Watch халқаро инсон ҳуқуқлари ташкилоти томонидан яқинда эълон қилинган йиллик ҳисоботда Тожикистонда қамоқхона ва тергов ҳибсхоналарида қийноқ қўллаш муаммо бўлиб қолаётгани таъкидланади. Хўжанд ва Ваҳдатдаги колонияларда исён чиқишига ҳам айнан шу муаммо сабаб бўлгани айтилади.

АҚШнинг Бағдоддаги элчихонаси яна ракета зарбаларига нишон бўлди

Бағдоддаги АҚШ элчихонаси биноси.

Ироқ пойтахтидаги АҚШ ва бошқа мамлакатларнинг элчихоналари жойлашган “яшил ҳудуд” 26 январь куни ракета ҳужумига нишон бўлди. Қаттиқ қўриқланадиган мазкур ҳудудга ҳужум оқибатида уч киши жабрлангани айтилмоқда.

AFP ва Reuters ахборот агентликлари хабарига кўра, бир неча ракета АҚШ элчихонаси ҳудудига тушган, улардан бири ошхона биносига шикаст етказган.

Ироқ бош вазири Одил Абдул Маҳдий элчихонага ҳужумни қоралаб чиқди. Ўз баёнотида бош вазир Ироқ расмийлари мамлакатдаги “барча дипломатик миссиялар”ни ҳимоя қилиш қарорида қатъий эканини билдирди.

Бу жорий ойда АҚШнинг Бағдоддаги элчихонасига уюштирилган ҳужумларнинг учинчисидир. 21 январь куни элчихона яқинига учта ракета тушган. Ҳодиса чоғида ҳеч ким жабрланган эмас.

31 декабрь куни эронпараст намойишчилар АҚШ элчихонаси биносини штурм қилгандилар. Улар бу ҳужумни Эрон дастаклаётган қуролли гуруҳнинг камида 25 нафар аъзоси америкаликлар берган ҳаво зарбасидан ўлгани ортидан бошлагандилар. Ироқ хавфсизлик кучлари ўшанда намойишчиларни тарқатиш учун кўздан ёш сиздирувчи газ ва шовқинли гранаталарни ишга солгандилар.

Мазкур ҳужумдан кейин 3 январь куни Бағдод яқинида АҚШ ҳаво зарбаси билан эронлик генерал Қосим Сулаймоний ўлдирилган. Бунга жавобан Эрон Ироқда жойлашган АҚШ базаларига ракета отган.

Трампнинг ёзувдаги овози: “Россияга қарши уруш”да Украина қанча вақт туриб бериши мумкин?

АҚШ президенти Доналд Трамп 2018 йили донорлар, жумладан, Лев Парнас билан ўтган тушлик чоғида ёзиб олинган аудиоёзувда қайд этилишича, меҳмонлардан, Украина Россия тажовузига қанча вақтгача қаршилик кўрсата олиши мумкин, деб сўраган.

АҚШ оммавий ахборот воситалари, жумладан, “Associated Press” ва ABC News 24-25 январда қўлга киритган видеодан олинган аудиони эълон қилди.

Аудиода Трамп “Улар Россияга қарши урушда қанча вақт туриб бера олади?” деган саволни беради.

Ёзувда кимдир, “Бизсиз, узоқ вақт туриб бера олмайди”, дейди.

Трамп эса, “Бизсиз”, дея такрорлайди.

Президент яна, расмий Киев Россия билан можарода “ҳамма нарса яхши бўлади”, деб ўйлаганми, деб сўрайди. “Улар, агар сиз қўллаб-қувватласангиз, ҳамма нарса яхши бўлади, деб ўйлайди”, деб жавоб беради кимдир.

“Ҳаммани қўллаб-қувватлаган доим фақат бизмиз ўзи”, дейди Трамп ва Европа мамлакатларини харажатни қоплашда етарлича иш қилмаётганидан шикоят қилади.

Киев 2014 йилдан бери Украина шарқидаги Россияга суянган айирмачиларга қарши уришиб келмоқда, айни уруш чоғида 13 мингдан ошиқ киши ҳалок бўлди.

Россия Украинанинг Қрим ярим оролини босиб олди, аммо унинг бу қадамини халқаро ҳамжамият тан олгани йўқ.

Хитой президенти Си Цзинпин вазият оғир, аммо муаммони енгиш мумкин деб баёнот берди

Хитой президенти мамлакатидаги вазиятни “жуда оғир” деб атади, чунки тез тарқалаётган коронавирус – тожсимон вирус кўп одамларнинг умрига зомин бўлди, яна кўпчиликка юқди.

Айни чоқда дунёнинг бошқа мамлакатларида ҳам коронавирусни юқтирган кишилар борлиги аниқланмоқда.

Президент Си Цзинпин 25 январда Коммунистик партия раҳбарлари мажлисида мамлакат “янги вируснинг тарқалишини тезлаштираётган оғир вазиятга дуч келгани”, шу пайтгача бунинг оқибатида 56 киши нобуд бўлгани, вирус яна 1 минг 975 кишига юққанини айтди.

Бироқ Си, мамлакат “ушбу жангда ғолиб бўлиши”ни айтиб, ватандошларини тинчлантирмоқчи бўлди. Айни дамда тобора кўпроқ шаҳарларга транспорт воситаларининг кириши ва чиқиши тўсиб қўйилаётгани ҳақида хабарлар тарқалмоқда.

Бўҳрон Хитойдаги энг катта байрам – ой тақвими бўйича янги йил кенг миқёсда нишонланишига халақит берди.

Мамлакатнинг Саёҳат хизматлари уюшмаси сайёҳлик агентликларига одамларнинг гуруҳ бўлиб саёҳат қилишини тўхтатиш зарурлигини билдирган.

Афғонистондаги никоҳ тўйига ташланган граната оқибатида камида 20 киши яраланди

Афғонистон расмийларига кўра, мамлакат жанубидаги Хост вилоятида номаълум кишилар никоҳ тўйи бўлаётган жойга граната ташлаши оқибатида камида 20 киши ярадор бўлган.

Вилоят ҳукумати матбуот котиби Толиб Мангал 26 январда маълум қилишича, Алишир шаҳрида рўй берган фожиа юзасидан тергов олиб борилмоқда.

Қўшимча қилишича, ҳужумга нима сабаб бўлгани аниқ эмас. 25 январда рўй берган ҳужум учун ҳозирча ҳеч ким масъулиятни зиммасига олмади.

Афғонистон пойтахти Кобулда ҳам полиция автомобили қўлбола портловчи қурилмани босиб олиши оқибатида ўша жойда турган бир киши нобуд бўлди, яна тўрт киши яраланди, дейилади полиция тарқатган хабарда.

"25 январь кечқурунги портлаш оқибатида полиция машинаси парчаланиб кетди", деди мамлакат Ички ишлар вазирлиги матбуот котиби Нусрат Раҳимий.

Бу ҳужум учун ҳам ҳеч ким масъулиятни зиммасига олмади.

Бироқ “Толибон” ҳаракати тез-тез ҳукумат хавфсизлик кучларини нишонга олиб туриши кузатилади.​

Пентагон: Эрон ракета ҳужумлари оқибатида 34 нафар АҚШ аскари бош мия жароҳати олган

АҚШ Мудофаа вазирлиги Эроннинг Ироқдаги Америка базасига ракета ҳужумлари оқибатида 34 нафар ҳарбий ҳизматчиси бош мия жароҳати олганини маълум қилди.

Ҳарбий хизматчиларга мия чайқалиши ташхиси қўйилган.

Бу америкалик расмийлар аввал келтирган рақамлардан кўпдир.

АҚШ президенти Доналд Трамп ва Пентагон расмийлари Эроннинг ракета ҳужуми оқибатида америкалик аскарлар жабр кўрмаганини айтган.

Оқ уй раҳбари кўрилган талафот жуда кичик бўлганини айтганди.

7 январь оқшомида Эрон Ироқдаги икки ҳарбий базага ракета зарбаси берган эди.

Мазкур базаларда “Ислом давлати” экстремистик гуруҳига қарши амалиётлар олиб борган америкалик ҳарбийлар бўлган.

АҚШ Мудофаа вазирлиги баёнотига кўра, Ироқдаги ал-Асад ва Эрбил базаларига ўндан зиёд баллистик ракета отилган.

Хитойда  коронавирусдан ўлганлар сони 41 нафарга етди

Хитойда коронавирусдан ўлганлар сони 41 нафарга етди. Касалланганлар сони эса 1300 нафардан ошди.​ Бу ҳақда Reuters агетлиги Хитой соғлиқни сақлаш расмийларига таяниб хабар берди.

Хитой касаллик ўчоғи ҳисобланган Ухан ва яна 9 шаҳарни ёпиб қўйди. Хитойнинг ёпиб қўйилган Ухан шаҳрида 30 ўзбекистонлик талаба қамалиб қолгани ҳақда Озодлик хабар берган эди.

Хитойдан ташқари Таиланд, АҚШ, Тайван, Шимолий Корея, Япония, Вьетнам, Франция ва Сингапурда ҳам ушбу касалликка чалинган беморлар қайд қилинди.

Туркия шарқида зилзиладан 22 одам ҳалок бўлди

Туркия шарқида 6,8 магнитудали зилзила рўй берди.

"Анадўлу" ахборот агентлигига кўра, камида 22 одам ҳалок бўлган, саккиз юздан ортиқ одам жароҳат олган, 30 нафарга яқин одам ҳамон вайроналар остида қолмоқда.

Зилзила эпимаркази Туркия шарқидаги Элазиг ва Малатья вилоятларида содир бўлган.

Ерости силкинишлари қўшни Сурия ва Ироқ, шунингдек, Ливанда ҳам сезилган.

24 январь куни Тошкентда ҳам кучсиз ерости силкиниши кузатилди.

Шу куни Тожикистонда икки соат ичида 3 та зилзила рўй берди.

Лукашенко: Россияга қўшилишга рози бўлсам¸ халқ мени бир йил ичида еб қўйган бўларди!

Александр Лукашенко қоғоз заводи ишчилари билан гаплашмоқда.

Александр Лукашенко ўзининг мустақил Беларуснинг сўнгги президенти бўлишини истамаслигини билдирди.

Шклов шаҳридаги қоғоз фабрикаси ишчилари билан 24 январь кунги учрашувда Лукашенко¸ «агар Россияга қўшилиш таклифига рози бўлганимда¸ халқ мени бир йил ичида еб қўйган бўларди»¸ деди жумладан.

Асосан Россия билан муносабатлар мавзуида гапирган Лукашенко¸ Москвани Минскка мунтазам босим қилиб келаëтганликда айблади.

Хусусан Лукашенко¸ Россиянинг нефт секторидаги солиқлар бўйича қўллаган сўнгги маневрини беларусларнинг яшаш даражасини пасайтириш орқали Минск раҳбариятини Россияга қўшилишга мажбурлашнинг навбатдаги уриниши дея баҳолади.

- Буни махсус қилишди. Беларусга босимни кучайтириш учун. Нима мақсадда босим қилишаëтганини эса¸ ўзингиз тушуниб олаверинг¸ деди ишчилар билан учрашувда Беларус президенти.

Лукашенко таъкидича¸ Россия Беларусдан нефть учун жаҳон бозоридаги нархдан қимматроқ тўлашни талаб қилмоқда ва ҳозирча томонлар бу борада келишувга эришмаган.

Евросиë иқтисодий иттифоқида шерик бўлган Россиянинг бундай талаби ортидан¸ Лукашенкога кўра¸ Минск ҳукумати нефтни АҚШ ва Яқин Шарқ мамлакатларидан сотиб олиш бўйича музокара бошлаган.

Кейинги йилларда Россия ва Беларус ўртасида иттифоқчилик келишуви доирасида ўзаро интеграцияни янада кучайтиришга қаратилган сўзлашувлар бормоқда.

Кузатувчилар¸ бундай яқинлашув пировардида Россия Беларусни ўз суверенитетидан маҳрум қилишни режалаëтганини айтиб келмоқда.

Айни пайтда мустақил кузатувчилар¸ 2020 йилда Россия Ўзбекистонни Евроосиë иқтисодий иттифоқи ҳамда Коллектив хавфсизлик шартномаси ташкилотига қўшиш орқали¸ Каримов даврида Москвага ëн бермай келган Тошкентни ҳам ўзига қарам қилиш уринишини кучайтирганини таъкидламоқда.

Миллиардер Жорж Сорос эҳтимолий ва реал диктаторларга қарши кураш учун 1 миллиард доллар ажратди

89 яшар Жорж Сорос Давосда.

Либерал қадриятлар курашчиси сифатида танилган америкалик миллиардер Жорж Сорос дунë бўйлаб туғилиб келаëтган янги диктаторлар¸ айни пайтдаги реал мустабидларга қарши кураш учун 1 миллиард доллар маблағ ажратишини эълон қилди.

89 яшар Сорос бу баëнотни Давосда ўтаëтган Жаҳон иқтисодий форумидаги чиқишида қилди.

Бу қарорни “ўзининг энг муҳим ва энг узоқни кўзлайдиган лойиҳаси” сифатида тақдим этган Сорос¸ улкан маблағ фуқаролик жамиятига ëрдам берадиган кадрлар тайëрловчи таълим муассаларига сарфланишини таъкидлади.

Ҳозиргача ҳам Очиқ жамият институти тизими орқали демократия ва либерал қадриятларни қўллаб келаëтган Сорос¸ бугун инсониятнинг бурилиш нуқтасида экани ва келаси бир неча йил Дональд Трамп ва Си Цзиньпин каби президентлар тақдирини ҳал қилишини таъкидлади.

Бутун дунë айниқса¸ Европа радикал ўнгчилик ғоялари¸ хусусан¸ ирқчилик¸ миллатчилик ¸диний экстремизм ва антисемитимизм мафкураси кучайиб бораëтган бир пайтда Сорос инсониятни маърифат қутқаришини урғулади.

АҚШ элчиси қирғизистонликлар учун виза чеклови жорий этилганига оид маълумотни тасдиқламади

Қирғизистон ташқи ишлар вазири Чингиз Айдарбеков.

АҚШнинг Қирғизистондаги элчиси Дональд Лу Вашингтон қирғизистонликлар учун виза чекловлари жорий этишга қарор қилганига оид маълумотларни тасдиқламади. Бу ҳақда маҳаллий нашрлар ташқи ишлар вазири Чингиз Айдарбеков сўзларига таянган ҳолда хабар тарқатди.

Айдарбековга кўра, АҚШнинг Қирғизистондаги элчиси Дональд Лу 22 январь куни Қирғизистон ТИВга чақирилган ва у бу маълумотларни тасдиқламаган.

“Томонлар бу масала бўйича консультация олиб бормоқда. Маълумотларга кўра, бу таклиф АҚШ ҳуқуқ-тартибот идоралари томонидан илгари сурилмоқда. 2017 йили АҚШ президенти имзолаган қонунга кўра, 2020 йилда биометрик паспорт амал қилмайдиган мамлакатлар фуқароларининг мамлакатга кириши чекланиши қайд этилган. МДҲ мамлакатларидан фақат Қирғизистонда биометрик паспорт берилмайди”, деди ТИВ раҳбари.

Айдарбековнинг урғулашича, Қирғизистон виза чекловлари объектив вазият эътиборга олинган ҳолда ҳал этилишига умид қилади.

Аввалроқ АҚШ президенти Дональд Трамп маъмурияти Қўшма Штатларга фуқаролари кириши чекланган мамлакатлар рўйхатини кенгайтириб, унга яна еттита давлатни киритишни режалаётганига оид хабарлар тарқалганди. Айни дамда виза чекловлари жорий қилинган мамлакатлар рўйхатида Эрон, Ливия, Сомали, Сирия, Яман, Венесуэла ва Шимолий Корея бор. АҚШ бу мамлакатларга нисбатан санкция жорий қилган ёки бу мамлакатларда уруш кетмоқда. Янги рўйхатга Беларусь, Мьянма, Нигерия, Судан, Эритрея, Танзания ва Қирғизистон кириши мумкин.

Қиролича Елизавета Брекзит тўғрисидаги қонунни маъқуллади

Буюк Британия қироличаси Елизавета II.

Буюк Британия қироличаси Елизавета II парламент томонидан қабул қилинган мамлакатнинг Европа Иттифоқидан чиқиши тўғрисидаги қонунни маъқуллади. Ҳужжат қонуний кучга кирди. Унга кўра, Буюк Британия 31 январь куни Лондон вақти билан соат 23.00да Евроиттифоқни тарк қилади.

Қонун бундан аввал бош вазир Борис Жонсон ва ЕИ раҳбарлари ўртасида эришилган битимга асосланади. Мазкур битим эндиликда Европарламент томонидан маъқулланиши керак. Бу 29 январь куни бўлиб ўтиши кутилмоқда. ЕИнинг қатор мамлакатлари Брекзитдан мамнун эмасликларини айтаётган бўлишига қарамай, қаршилик кўрсатилмайди ва келишилган ҳужжат қабул қилинади.

Буюк Британия Брекзит тўғрисидаги референдумдан уч ярим йил ўтиб ЕИни тарк этмоқда.

Бердимуҳаммедов икки қудратли вазирига сўнгги огоҳлантириш берди

Бердимуҳаммедов Туркманистонни 2006 йилдан бери бошқариб келмоқда.

Туркманистон президенти Гурбангули Бердимуҳаммедов мамлакат Миллий хавфсизлик ва Мудофаа вазирига “ишда йўл қўйган камчиликлари учун “ жиддий танбеҳ берди.

Давлат матбуотининг ëзишича¸ Миллий хавфсизлик вазири Яйлим Бердиев ва Мудофаа вазири Бегенч Гундогдиев “хизмат ваколатларини рисоладагидай амалга оширмаганлик” ва “йўл қўйилган камчиликлар” учун сўнгги огоҳлантирув олган.

Матбуот хабарларида иккала вазирнинг айнан қайси камчиликлар учун огоҳлантирув олгани очиқланмаган.

22 январь кунги Давлат хавфсизлик кенгаши йиғинида Бердимуҳаммедов Хавфсизлик вазири Бердиев рутбасининг генерал-лейтенантликдан генерал-майор даражасига туширилгани ва унинг Хавфсизлик кенгаши котиби лавозимидан ҳам бўшатилганини эълон қилган.

Бердиев бундан олдин ўтган йил ноябрь ойида ҳам Бердимуҳаммедовдан танбеҳ олган эди. Ўшанда Хавфсизлик вазири ўзининг гейлигини тан олган туркман врачи ва унинг оиласи қийноққа солингани халқаро ҳамжамият томонидан кескин танқидга учрагани ортидан президентдан огоҳлантириш олган эди.

Бердимуҳаммедов дунëнинг табий газга бой давлатларидан бири саналган Туркманистонни 2006 йилдан бери бошқариб келмоқда.

Қуддусда Освенцим концлагери озод қилинганининг 75 йиллиги нишонланмоқда

Исроил Бош вазири Бенъямин Нетаняҳу Жаҳон ҳолокост форумида нутқ сўзламоқда.

Қуддусда нацистларнинг Освенцим концентрацион лагери озод этилганининг 75 йиллигига бағишланган тадбирлар ўтмоқда ва унда ўнлаб давлат ва ҳукумат раҳбарлари иштирок этмоқда.

Жаҳон ҳолокост форуми даб аталган маросимда хусусан¸ Россия ва Франция президентлари¸ АҚШ вице-президенти ва яна қирққа яқин давлат расмийлари қатнашмоқда.

Европа бўйлаб антисемитизм қайта бош кўтарган бир пайтда ўтаëтган тадбирда Освенцим лагери жойлашган Польша президенти қатнашишдан бош тортди. У Россия¸ Франция¸ Британия¸ АҚШ ва Германия раҳбарлари билан бир қаторда нутқ қилишига изн берилмагани учун Қуддусга бориш режасидан қайтди.

Тадбир ташкилотчилари¸ унда фақат нацистларга қарши коалицияга қўшилган тўрт давлат ва Германия расмийларига сўз берилганини билдирди.

Ҳолокост даврида қириб ташланган миллионга яқин яҳудийнинг бир миллиондан ошиғи Освенцим концлагерида ўлдирилган

Освенцим озод этилганининг 75 йиллигига бағишланган тадбир Исроил тарихидаги энг катта сиëсий маросимдир. Тадбир хавфсизлигини таъминлашга 10 мингдан ошиқ хавфсизлик кучлари жалб этилган.

Туркиянинг айрим ҳудудларида зилзила содир бўлди

Иллюстратив сурат.

Туркиянинг Маниса вилоятида 22 январь оқшомида 5,4 балли зилзила рўй берди. Ер силкиниши Манисага яқин бўлган Измир шаҳрида ҳам сезилган.

Маниса расмийларига кўра, зилзила чоғида ҳеч ким жабрланган эмас. Туркия Сейсмология институти маълумотига кўра, 23 январь тонгида Анқарада ҳам 4,5 балли зилзила қайд этилган. Пойтахт расмийлари ҳам ҳодиса чоғида ҳеч ким жабрланмаганини билдирганлар.

Туркияда кучли ер силкиниши сўнгги бор 2011 йил октябрида Ван вилоятида рўй берган. Ўшанда 7,2 балли зилзила 600 дан зиёд киши ҳаётига зомин бўлганди.

Лукашенко: Россия Қозоғистондан Беларусга нефть етказиб берилишига тўсқинлик қилмоқда

Беларусь президенти Александр Лукашенко Москва қозоқ нефтининг ўз мамлакатига етказиб берилишига тўсқинлик қилаётганини билдирди. Баёнот Россия билан нефть нархи борасида юзага келган баҳслар қабатида янгради.

Минскда нефть соҳаси экспертлари билан 21 январь куни бўлиб ўтган учрашувда Лукашенко иқтисодий шарт-шароит мураккаблашаётганини урғулади.

"Қизиқ, иттифоқчимиз бошқа бир иттифоқчимизнинг бизга нефть етказиб беришига розилик бермаяпти. Не тонгки, нефть етказиб бериш бўйича ҳозир вазият шунақа ва биз бу муаммони ҳал қилишимиз лозим", деди Лукашенко.

Қозоғистон, Беларусь ва Россия Евросиё Иқтисодий Иттифоқи аъзоси бўлиб ҳисобланади. Мазкур иттифоқдан Россия президенти Владимир Путин собиқ совет республикаларига Москва таъсирини ошириш ҳамда ЕИ ва НАТОга қарши туришда фойдаланишга уриниб келади.

“Россия Федерациясининг солиққа оид маневрлари туфайли республика бюджетига тушадиган даромад камаяди, нефтни қайта ишловчи заводларимизда иш самарадорлиги ёмонлашади. Ҳақиқатан, шу тобда Россия нефтига бошқа муқобил йўқ. Бироқ аввал келишганимиздек, диверсификация йўлидан боришимиз керак”, деган Лукашенко Беларусь нефть етказиб беришда Россия улушини 30-40 фоизга тушириш учун “ҳаракат қилиши лозим”лигини қўшимча қилди.

Беларусь сўнгги пайтларда нефть транзити нархи масаласида Россия билан баҳслашаяпти. Бу Москванинг интеграцияни чуқурлаштириш борасида Лукашенкога босими кучайиши қабатида юз бермоқда. Беларусь ёқилғи етказиб бериш ва молиялаштиришда Россияга қарам, айни пайтда у Россия нефтини Европага етказишда асосий транзит маршрут бўлиб ҳисобланади.

14 январь куни Беларусь бош вазири ўринбосари Дмитрий Крутой Минск Европа мамлакатларидан бир нечтаси, шунингдек Қозоғистон ва Озарбайжонга Россияни айланиб ўтган ҳолда Беларусга нефть сотиш таклифи билан мурожаат қилганини билдирганди. Аввалроқ Қозоғистон нефть етказиб бериш масаласини Беларусь билан 20 январгача муҳокама қилиши айтилган эди.

Ўтган йили Путин ва Лукашенко ўртасида бўлиб ўтган учрашув интеграцияни ривожлантириш нуқтаи назаридан муваффақиятли бўлгани йўқ. Лукашенко ўшанда “тенг” шарт-шароит тарафдори эканини билдирган.

Декабрь ойида Беларусда норозилик намойишлари бўлиб ўтган. Акция иштирокчилари интеграция бўйича музокаралар шаффоф эмаслигини урғулаб, Россия билан алоқаларнинг янада тиғизлашувига қарши чиққандилар.

Дунëнинг энг бадавлат одами Жефф Безос телефони Саудия шаҳзодаси билан ëзишмадан сўнг ҳак қилинган

Жефф Безос(чапдан иккинчи) Саудия валиаҳд шаҳзодаси(ўртада) билан WhatsApp орқали ëзишиб келган.

The Guardian газетасининг ëзишича¸ Amazon ширкати эгаси Жефф Безос телефони ҳакерлар ҳужумига учраган.

Бу ҳужум Безос Саудия Арабистони валиаҳд шаҳзодаси Муҳаммад бин Салмон телефонидан WhatsApp орқали юборилган видеофайлни олганидан кейин амалга оширилган.

The Wall Street Journal нашрига кўра¸ ҳужум 2018 йил баҳорида бўлган.

Бунгача Безос ва Саудия шаҳзодаси WhatsApp орқали ëзишиб келган.

Ҳакерлик ҳужуми пайтида Безос телефонидаги файллар кўчириб олинган¸ аммо ҳозирча айнан қандай маълумотлар ўғирлангани очиқланмади.

Риëд ҳукмдорлари ўзларининг ҳакерлик ҳужумига алоқаси йўқлигини иддао қилмоқда¸ Безос эса¸ матбуотдаги бу янги маълумотларга муносабат билдирмади.

Ўтгай йил март ойида киберхавфсизлик бўйича таниқли мутахассис Гэвин де Беккер дунëнинг энг бой одами телефонига қилинган ҳужумга Саудиянинг алоқадорлигини айтган эди.

АҚШ нашрлари The Washington Post газетаси ўз шарҳловчиси Жамол Хашоггининг Истанбулдаги Саудия консуллиги биносида ўлдирилишига оид тафсилотларни ëритишни бошлаганидан кейин Риëд Безосга қарши кампания бошлаганини ëзмоқда.

The Washington Post мулкдори Жефф Безосдир.

Швейцария газетаси: Давосда Россия разведкасининг махсус амалиëти олди олинди

Шу кунларда Швейцариянинг Жаҳон иқтисодий форуми ўтаëтган Давос шаҳрида ўтган йил август ойида Россия разведкасининг махсус операцияси олди олинди.

Швейцариядаги Tages-Anzeiger нашрининг 21 январь куни ëзишича¸ 8 август куни мамлакатга келган икки россиялик хавфсизлик хизматлари эътиборини ўзига тортган.

Давоснинг қимматбаҳо меҳмонхонасида тўхтаган икки россияликнинг ҳужжатлари текширилганда¸ улар ўзларининг сантехник эканини айтган¸ айни пайтда¸ дипломатик паспорт кўрсатган.

Швейцария хавфсизлик хизматлари бу икки шахснинг Давос форуми ўтадиган ва меҳмонлар турадиган биноларга махфий эшитиш ускуналари ўрнатиш¸ форум давомида киберҳужум уюштиришга қаратилган махсус амалиëтни йўлга қўйиш учун келганини тахмин қилмоқда.

Россия ТИВ ҳозирча сантехникларнинг қандай қилиб дипломатик паспорт билан Давосга саëҳат қилганига изоҳ бермади.

Жосуслиги тасдиқланмаган икки россиялик август ойидаëқ қўйиб юборилган.

Жаҳон иқтисодий форумининг бу йилги 50-сессиясида 50 дан ошиқ давлат ва ҳукумат раҳбари¸ 3000 дан ошиқ жамоатчилик ва йирик бизнес намояндалари қатнашмоқда.

Тожикистон ССВ мамлакатга хитойликлар келиши чекланишини таклиф қилди

Душанбе аэропорти (иллюстратив сурат).

Тожикистон Соғлиқни сақлаш ва аҳолини ижтимоий муҳофаза қилиш вазирлиги ТИВ ва Туризмни ривожлантириш давлат қўмитасига янги хавфли вирус тарқалиши муносабати билан мамлакатга Хитой фуқаролари келиши чекланишини сўраб, расмий мактуб юборди.

Куни кеча Хитой Соғлиқни сақлаш давлат қўмитаси янги 2019-nCoV вируси одамдан одамга юқишини тасдиқлади. Айтилишича, касалликни хасталанганлар билан мулоқотда юқтириб олиш мумкин. Беморларнинг кўпчилиги Хитойнинг Ухан шаҳрида қайд қилинган. Бу шаҳарда куни кеча 2019-nCoV коронавирусига чалинган тўртинчи киши вафот этган.

Шу билан бирга Шанхай, Пекин ва Гуаньдун вилоятида ҳам беморлар аниқланган - уларнинг ҳаммаси Уханга ташриф буюрган эди. Маълумотларга кўра, янги касаллик ХХРдан ташқарига чиқиб кетган: беморлар Таиланд, Жанубий Корея ва Японияда ҳам аниқланди.

Тожикистон соғлиқни сақлаш ва аҳолини ижтимоий муҳофаза қилиш вазирининг ўринбосари Мирхомуддин Камолзоданинг 21 январь куни Озодликнинг тожик хизматига маълум қилишича, янги вирус ҳақида хабар тарқалиши билан ХХРдан келганлар устидан аэропорт ва Хитой билан чегарадаги НЎПларда назорат кучайтирилган.

“Чегарадаги назорат-ўтиш пунктларида санитар-карантин постлари фаолият юритади. Қандайдир вирус пайдо бўлиши билан, қоидага кўра, назорат кучайтирилади ва постлар туну кун иш режимига ўтади. Ҳар бир аэропортда замонавий диагностика аппаратуралари ўрнатилган ва ХХРдан келган ҳар бир йўловчи шифокорлар кўригидан ўтишга мажбур. Агар вирус аломатлари қайд қилингудек бўлса, фуқаро махсус машинада юқумли касалликлар шифохонасига жўнатилади”, деди вазир ўринбосари.

Унинг қўшимча қилишича, Соғлиқни сақлаш вазирлиги Ташқи ишлар вазирлиги ва Туризмни ривожлантириш давлат қўмитасига расмий мактуб юбориб, янги хавфли вирус тарқалиши муносабати билан Тожикистонга Хитой фуқаролари, жумладан сайёҳлар келиши чекланишини сўраган.

“Биз Тожикистон аҳолисига хавфли вирус билан боғлиқ вазият барқарорлашгунга қадар Хитойга бормасликларини тавсия қиламиз”, дея қўшимча қилган М. Камолзода.

Хабарларга кўра, янги 2019-nCoV вируси ўлимга сабаб бўлиши мумкин. Инфекцион белгилари орасида иситма, йўтал, нафас қисиши мавжуд. Беморларнинг ҳаммасида рентгенограмма пневмонияни кўрсатган.

Жаҳон соғлиқни сақлаш ташкилоти 31 декабрь куни Хитой расмийлари эълон қилган янги касалликни муҳокама қилиш учун 22 январь куни фавқулодда қўмитанинг шошилинч йиғилишини чақирган. Ташкилот қаноатича, вирус манбаси сифатида ҳайвонлар кўрилмоқда. Хитой расмийлари касаллик Ухандаги денгиз маҳсулотлари бозорида пайдо бўлганини айтаяпти.

Давомини ўқинг

Кўрмай қолган бўлсангиз

XS
SM
MD
LG