Линклар

Шошилинч хабар
29 март 2024, Тошкент вақти: 16:39

Internetda uzilish kuzatildi


Xorijdagi Internet saytlariga kirmoqchi bo‘lganlar¸ msn.com saytiga o‘tkazib yuborilmoqda.
Xorijdagi Internet saytlariga kirmoqchi bo‘lganlar¸ msn.com saytiga o‘tkazib yuborilmoqda.

Ozodlik manbalarining O‘zbekiston ichkarisidan xorijdagi ijtimoiy tarmoqlarga kirib bo‘lmay qolgani haqidagi xabarini "O‘zbektelekom" mutaxassislari ham tasdiqladi. Hozircha bunday uzilish sababi sirligicha qolmoqda.

23 avgust kuni Toshkentda vaqt tushdan og‘ganda¸ o‘zbekistonlik Ozodlik mushtariylaridan¸ yoshlar orasida ommalashgan ko‘p saytlarga kirib bo‘lmay qolgani haqida xabar keldi.

"Odnoklassnikiga uydagi kompyuterimdan kirmoqchi bo‘layapman¸ ammo necha marta urinsam ham¸ "Oshibka" degan yozuv chiqib kelayapti"¸ dedi Ozodlik bilan bog‘langan toshkentlik talaba yigit.

Ozodlik muxbiri bu xabar tafsilotini o‘rganishni boshlashi bilan¸ O‘zbekiston ichkarisidagi yarim rasmiy axborot portalida ham ayni xabar paydo bo‘ldi.

"Bugun mahalliy vaqt bilan soat 14:00 atrofida O‘zbekistonda xalqaro Internet tarmog‘i ishida uzilishlar kuzatildi"¸ deb xabar berdi yarim rasmiy Olam.uz portali.

Bu manbaning yozishicha¸ xorijiy saytlarga kirishga urinilganda¸ brauzer avtomatik tarzda www.msn.com saytiga o‘tkazib yubormoqda.

“HTTP protokoli bo‘yicha ko‘plab xorijiy saytlarni ochib bo‘lmay qoldi. Ayni paytda¸ ICQ, Skype, Mail.ru Agent kabi HTTP aloqasini talab qilmaydigan messenjerlar faoliyatida uzilish kuzatilmadi”¸ deb yozdi O‘zbekiston ichkarisida ishlayotgan Olam.uz sayti.

Ozodlikka murojaat qilgan o‘zbekistonliklar yoshlarning kundalik saytiga aylangan ijtimoiy tarmoqlar¸ xususan¸ Odnoklassniki.ru¸ VKontakte.ru va Facebook kabi saytlarga kira olmayotganlaridan shikoyat qildilar.

“O‘zbektelekom” mutaxassislari¸ Olam.uzning yozishicha¸ bunday uzilish sabablarini aniqlab¸ uni bartaraf etish ustida ishlamoqda. Bu sabablarning mohiyatan texnik yoki siyosiy ekani haqida hozircha hech qanday ma‘lumot yo‘q.

O‘zbekistonda xorijda faoliyat yurg‘izayotgan mustaqil axborot agentliklari¸ shuningdek muxolifat saytlari yillardan beri muntazam to‘sib kelinadi.

Xususan¸ Ozodlik radiosining Internet sahifasiga O‘zbekiston ichkarisidan kirishga urinilganda¸ foydalanuvchi avtomatik tarzda msn.com saytiga o‘tkaziladi.

Ozodlikning O‘zbekistondagi manbalariga ko‘ra¸ proksi saytlar orqali kirish mumkin bo‘lmayotgan xalqaro saytlarga kirish mumkin va ular buning uchun Ozodlikning Psiphon3 texnologiyasidan foydalanmoqdalar.

Bugungi uzilish davomida xorijdagi saytlarni ochishga uringan Internet foydalanuvchilarining aynan msn.comga o‘tkazilishi¸ uzilishning maxsus o‘tkazilayotgan amaliyot natijasi bo‘lishi haqida taxminlar tug‘ilishiga asos bo‘lmoqda.

"Mustaqillik arafasida O‘zbekiston hukumati yoki Internetni filtr qiluvchi texnologiyasini yangilamoqda¸ yoki xalqaro Internetni to‘sgan holda¸ O‘zbekiston ichkarisidagi nazoratdagi Internet saytlarini ochiq qoldirishga hozirlik jarayonini sinovdan o‘tkazmoqda"¸ degan taxminni ilgari suradi Ozodlik bilan suhbatda axborot texnologiyalari bo‘yicha o‘zbekistonlik mutaxassis.

O‘zbekiston hukumati yillardan beri xalqaro maydonda Internet dushmanlari sifatida qayd etib kelinadi.
XS
SM
MD
LG