Линклар

Шошилинч хабар
12 август 2020, Тошкент вақти: 02:09

Ўзбекистон хабарлари

Армияда хизмат қилганларнинг ўқишга кириши янада осонлашди

Gazeta.uz Интернет нашрининг таълим тизимидаги ўз манбасига таяниб хабар қилишича¸ 4 апрель куни президент Шавкат Мирзиëев имзолаган навбатдаги қарорга мувофиқ¸ 2017−2018 йилги ўқув йилидан бошлаб "Ўзбекистон Қуролли Кучларида муддатли ҳарбий хизматни ўтаган ҳамда ҳарбий қисмдан тавсиянома олган олий таълим муассасалари абитуриентлари кириш тестлари натижаси бўйича тўплаган балига 50 фоиз миқдорида устамага эга бўлади".

Ҳозиргача Ўзбекистон армиясида хизмат қилганларнинг кириш синовларида тўплаган натижаларига тўплаш мумкин бўлган энг юқори балнинг 27 фоизи миқдорида қўшиб берилар эди.

Кучайтирилган янги имтиëзнинг мамлакатдаги олий ўқув юртларининг барча йўналиш ва мутахассисликлар бўйича бакалавр босқичига тайёргарлик кўраётганларга тааллуқли экани айтилмоқда.

Армияда хизмат қилганларга бундай имтиëзнинг берилиши ортидан¸ танқидчилар фикрича¸ Ўзбекистон Қуролли кучларида муддатли ҳарбий хизматни ўташ жараëни коррупциялашиб кетган.

Кун янгиликлари

Коронавирусга қарши кураш учун россиялик врачлар гуруҳи келади

Россия соғлиқни сақлаш вазири Михаил Мурашко.

Коронавирусга қарши курашга кўмаклашиш учун Ўзбекистонга яқин кунларда россиялик врачлар жўнатилади. Бу ҳақда Россия соғлиқни сақлаш вазири Михаил Мурашко 10 август куни ўтган коронавирусга қарши кураш мувофиқлаштириш кенгаши президиумида маълум қилди.

“Известия” газетасининг хабар беришича, вазир Россия врачлари Қозоғистонда коронавирусга қарши курашда ўз миссиясини муваффақиятли бажарганларини ва эндиликда Ўзбекистонга боришга тайёргарлик кўраётганларини айтган.

Хабарда Россия врачлари Ўзбекистонга қачон келиши ва бу масалада Ўзбекистонда кимлар билан музокаралар олиб боргани айтилмаган.

Июль ойи охирида Мурашко Россияда коронавирусга қарши ишлаб чиқилган вакцинани Шанхай ҳамкорлик ташкилотига аъзо давлатларга, жумладан, Ўзбекистонга етказиб бериш масаласида музокаралар бошланганини билдирган эди.

Тошкентда коронавирусдан вафот этганлар сони 131 кишига етди

Коронавирусдан вафот этганлар сони Ўзбекистон бўйича 204 кишига етди.

Тошкентда коронавирусдан, 11 август соат 17:00 ҳолатига кўра, яна икки киши вафот этди.

Соғлиқни сақлаш вазирлигининг билдиришича, Мирзо Улугбек туманида яшаган 63 ёшли Ш.Й. (аёл) ҳамда Шайхонтоҳур туманида яшаган 57 ёшли Х.Қ. (эркак) вафот этди.

Соғлиқни сақлаш вазирлиги 10 август куни Тошкент шаҳрида 4 нафар, Тошкент вилоятида 2 нафар бемор вафот этганини билдирган эди.

Вазирликнинг 11 август куни эрталаб берган маълумотида Юнусобод туманида яшаган 60 ёшли А.А. (эркак) ҳамда Олмазор туманида яшаган 60 ёшли А.М. (эркак), жами 2 киши коронавирусдан ўлгани қайд этилган.

Бу билан Тошкент шаҳрида коронавирусдан вафот этганлар сони 131 кишига, Ўзбекистон бўйича 204 кишига етди.

Коронавирусдан карантинда бўлган яна бир шахс ўзини ўлдирди

Июнь ойида Ўртасаройдаги карантин марказида фуқаро контейнер ичида ўзини осиб қўйгани хабар берилган эди.

Тошкентдаги “Саёҳат” меҳмонхонасида карантинда бўлган сурхондарёлик 31 ёшли эркак 10 август куни тўртинчи қаватдан сакраб ўз жонига қасд қилди.

“Дарё” нашрининг хабар беришича, К.О. ўз жонига қасд қилгани ҳақидаги хабар Мирзо Улуғбек тумани Ички ишлар органлари фаолиятини мувофиқлаштириш бошқармаси навбатчилик қисмига 10 август, соат 10:33 да келиб тушган.

Бош прокуратуранинг нашрга маълум қилишича, К.О. 4 август куни чартер рейс орқали Россиянинг Қозон шаҳридан Тошкентга олиб келинган ва карантинга жойлаштирилган.

У 7 август куни COVID-19 вируси учун тест топширган ва 9 август куни чиққан тест таҳлиллари унда вирус йўқлигини кўрсатган.

К.О.нинг Сурхондарё вилояти Денов туманида яшовчи қариндошлари унинг руҳиятида салбий ўзгаришлар кузатилганини айтишган. Ани пайтда тергов ҳаракатлари олиб борилмоқда ва ўз жонига қасд қилган шахснинг руҳий саломатлиги юзасидан ҳам суриштирувлар олиб борилмоқда.

“Июнь ойида Ўртасаройдаги карантин марказида фуқаро контейнер ичида ўзини осиб қўйгани хабар берилган эди. Фуқаро нима сабабдан ўз жонига қасд қилгани номаълум”, -деб ёзди нашр.

Ростов-Дондан ҳам ўзбекистонликлар ватанига олиб келинмоқда

Самара ва Оренбург вилоятида минглаб ўзбекистонликлар чегарадан ўтолмай қолиб кетган эди.

Ростов-Дон шаҳридан 10 августда 918 нафар ўзбекистонлик поездда Ўзбекистонга қараб йўлга чиқди. Бу ҳақда Ўзбекистон Ташқи ишлар вазирлиги хабар берди.

Маълум қилинишича, Республика махсус комиссияси томонидан Россиянинг Шимолий Кавказ ва Жанубий федерал округидаги ўзбекистонликларни олиб келиш учун “Тошкент – Ростов-Дон – Тошкент” темир йўл рейси ташкиллаштирилган.

“Ҳозирда Республика махсус комиссияси томонидан Ўзбекистон фуқароларини ватанимизга тезроқ қайтариш учун Россиянинг турли ҳудудларидан рейсларни кўпайтириш, рейслар, жумладан, темир йўл рейсларининг йўналиши ва турларини кенгайтириш масаласи кўриб чиқилмоқда”, -дейилади расмий билдирувда.

Россиядан олиб келинган ўзбекистонликлар белгиланган тартибда карантин марказларига жойлаштирилади. 10 август куни “Самара—Бузулук—Тошкент—Поп” йўналиши бўйича Россиядан олиб келинган 918 нафар ўзбекистонлик 9 августда Поп темир йўл вокзалида кутиб олингани ва Попдаги карантин ҳудудига жойлаштирилгани хабар қилинганди.

7 августга ўтар кечаси Тошкен – Бузулук – Тошкент йўналишидаги поезд 918 нафар йўловчи билан Ўзбекистон томон йўлга чиққани хабар қилинган эди. 7 август куни Тошкент – Кинел – Тошкент йўналишидаги поезд ҳам 918 йўловчини Ўзбекистонга олиб келиниши билдирилган.

Поездлар Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинди.

Россия ва Марказий Осиё давлатлари коронавирус пандемияси туфайли киритган карантин чекловлари ва чегараларнинг ёпилиши ортидан май ойидан буëн Самара ва Оренбург вилоятида минглаб ўзбекистонликлар чегарадан ўтолмай қолиб кетган эди. Кейинроқ уларнинг бир қисми Қозоғистон билан келишилган ҳолда чегарадан ўтказилиб, Ўзбекистонга олиб келинганди.

Мирзиёев Лукашенко билан телефон орқали мулоқот қилди

Шавкат Мирзиёев Александр Лукашенкони “президент сайловидаги ишончли ғалабаси билан табриклади".

Ўзбекистон президенти Шавкат Мирзиёев 10 август куни Беларус президенти Александр Лукашенко билан телефон орқали мулоқот қилди.

Ўзбекистон президенти матбуот хизматининг билдиришича, суҳбат аввалида Шавкат Мирзиёев Александр Лукашенкони “президент сайловидаги ишончли ғалабаси билан табриклаб, унга Беларуснинг барқарор тараққиёти ва равнақини таъминлаш йўлида янги зафарлар тилади”.

"Икки томонлама муносабатлар кун тартибидаги ҳамда минтақавий ташкилотлар доирасидаги анъанавий яқин ҳамкорликка доир долзарб масалалар кўриб чиқилди”,- дейилади расмий хабарда.

10 август куни Мирзиёев Лукашенкога Хитой раҳбари Си Цзиньпин, Қозоғистон президенти Қасим-Жомарт Тоқаев, Россия президенти Владимир Путин билан бир қаторда табрик телеграммаси ҳам жўнатган эди.

Беларусда 9 август куни ўтган президент сайловида Александр Лукашенко 80 фоиз овоз олгани ҳақидаги хабарлардан сўнг мамлакатнинг бир қанча шаҳарида намойишлар бошланди.

Полиция намойишчиларни куч ишлатиш йўли билан тарқатди. Беларус президентлигига номзод Светлана Тихановская сайловнинг дастлабки натижаларини тан олмаслигини эълон қилди ва ўз тарафдорларини норозилик намойишларини давом эттиришга чақирди.

Беларус Ички ишлар вазирлиги 9 августдан 10 августга ўтар кечаси мамлакатнинг 33 шаҳрида норозилик намойишлари бўлиб ўтгани ва уч минг одам қўлга олинганини билдирди.

Коронавирусга чалинганлар сони 32 мингга яқинлашди

Ҳозирда 8 351 нафар беморга шифохоналарда қолмоқда.

Ўзбекистонда коронавирус инфекцияси қайд этилганлар сони, 11 август соат 10:00 ҳолатига кўра, 31 545 нафарни ташкил этмоқда. Бу 10 август соат 23:30даги кўрсаткичдан 241 кишига кўпдир.

“Янги касалланиш ҳолатларининг 193 нафари Тошкент шаҳрида, 21 нафари Самарқанд вилоятида, 12 нафари Сирдарё вилоятида, 8 нафари Навоий вилоятида ҳамда 7 нафари Тошкент вилоятида тана ҳарорати кўтарилганлиги сабабли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган”, - дейилади Соғлиқни сақлаш вазирлиги хабарида.

Айни пайтда коронавирус инфекциясига чалинган 22 992 бемор тузилиб, соғайиш даражаси 73 фоизни ташкил қилмоқда. Беморлардан 202 нафари вафот этган.

Ҳозирда 8 351 нафар беморга шифохоналарда қолмоқда. Улардан 1361 нафари оғир, 387 нафари эса ўта оғир аҳволда.

Коронавирусдан ўлганлар сони расман 200дан ошди

Ўлим ҳолатларининг асосий қисми Тошкент шаҳрига тўғри келмоқда.

Ўзбекистонда сўнгги бир кеча-кундузда 8 киши коронавирусдан вафот этди. Соғлиқни сақлаш вазирлигининг 10 август куни билдиришича, Тошкент шаҳрида 4 нафар, Тошкент вилоятида 2 нафар бемор вафот этган.

Вазирликнинг 11 август куни эрталаб берган маълумотида Юнусобод туманида яшаган 60 ёшли А.А. (эркак) ҳамда Олмазор туманида яшаган 60 ёшли А.М. (эркак), жами 2 киши коронавирусдан ўлгани қайд этилган.

Бу билан Ўзбекистонда коронавирусдан вафот этганлар сони 202 кишига етди.

Коронавирусдан ўлим ҳолатларининг 129таси Тошкент шаҳрига ва 22 таси Тошкент вилоятига тўғри келмоқда.

Қашқадарё вилоятида 8 нафар, Бухоро вилоятида 7 нафар, Жиззах ва Сурхондарё вилоятларида 6 нафардан, Қорақалпоғистон Республикаси, Навоий ва Наманган вилоятларида 5 нафардан, Самарқанд вилоятида 3 нафар, Андижон ва Сирдарё вилоятларида 2 нафардан, Хоразм ва Фарғона вилоятларида 1 нафардан бемор вафот этган.

Шавкат Мирзиёев Лукашенкони президентликка сайлангани билан тўртинчи бўлиб табриклади

Лукашенкони Хитой раҳбари Си Цзиньпин, кейин Қозоғистон президенти Қасим-Жомарт Тоқаев ва учинчи бўлиб Россия президенти Владимир Путин табриклади.

Ўзбекистон президенти Шавкат Мирзиёев Александр Лукашенкони Беларусь президенти сайловида эришган “ишончли ғалабаси билан қутлади”. Бу ҳақда Ўзбекистон президенти матбуот хизмати 10 августда хабар берди.

“Давлатимиз раҳбари ўз мактубида сайловчилар иштирокининг юқори даражаси ва овоз бериш натижалари Беларусь халқининг Александр Лукашенкога бўлган улкан ишончини ва бирдамлигини, аҳоли турмуш даражаси ва сифатини ошириш, мамлакатда барқарор иқтисодий ўсишни таъминлаш йўлида амалга оширилаётган самарали ислоҳотлар давом эттирилишини тўлиқ қўллаб-қувватлаётганини яна бир бор намоён этганини қайд этди”, -дейилади хабарда.

Беларус президентлигига 9 августда ўтган сайловда ғалаба қозонгани расман эълон қилинган Александр Лукашенкони 10 август куни биринчилардан бўлиб Хитой раҳбари Си Цзиньпин, кейин Қозоғистон президенти Қасим-Жомарт Тоқаев ва учинчи бўлиб Россия президенти Владимир Путин табриклади.

Шавкат Мирзиёев жаҳон давлатлари президентлари орасида Лукашенкони табриклаган тўртинчи, Марказий Осиё давлатлари орасида биринчи президент бўлди.

Беларусда 9 август куни ўтган президент сайловида Александр Лукашенко 80 фоиз овоз олгани ҳақидаги хабарлардан сўнг мамлакатнинг бир қанча шаҳарида намойишлар бошланди.

Полиция намойишчиларни куч ишлатиш йўли билан тарқатди. Беларус президентлигига номзод Светлана Тихановская сайловнинг дастлабки натижаларини тан олмаслигини эълон қилди ва ўз тарафдорларини норозилик намойишларини давом эттиришга чақирди.

Беларус Ички ишлар вазирлиги 9 августдан 10 августга ўтар кечаси мамлакатнинг 33 шаҳрида норозилик намойишлари бўлиб ўтгани ва уч минг одам қўлга олинганини билдирди.

ОАВ: Масжидлар 15 августдан бошлаб ишлай бошлаши мумкин

Йиғилишда айтилишича, масжидлар учун 150 миллиард сўм ажратилган.

“15 августдан бошлаб юртимизда масжидлар босқичма босқич яна фаолият кўрсата бошлайди”, -деб хабар берди 10 август куни “Azon.uz” ўз манбаларига таянган ҳолда.

Хабарда таъкидланишича, айни соатларда Ўзбекистон мусулмонлари идораси барча имом ва ноиблар билан Вазирлар Маҳкамаси ҳузуридаги Дин ишлари бўйича қўмита раиси Абдуғофир Аҳмедов иштирокида видео селектор шаклида йиғилиш ўтказмоқда.

“Йиғилишда пандемия вақтидаги имом хатиблар фаолиятини янада самарадорлик қилиш, давлатимиз томонидан имомларга эътибор қаратилиб, 150 миллиард сўм ажратилгани, ёшларимизнинг тарбиясида имомларнинг ўрни ва таъсири бўлиши зарурлиги каби мавзулар муҳокама қилиняпти”, - дейилади хабарда.

Ҳозирча Ўзбекистон ҳукумати ва коронавирусга қарши кураш бўйича Республика сайти бу хабар юзасидан муносабат билдирмади.

Расман: Фарғона пандемия иккинчи тўлқинига тайёрланмоқда

Вилоят ҳокими Шуҳрат Ғаниев Қўқонда кислород концентраторлари ишлаб чиқарилишини айтди.

Фарғона вилояти COVID-19 инфекциясининг навбатдаги эҳтимолий тўлқинига тайёргарлик ишларини бошлаб юборди ва 12 мингдан ортиқ захира ўринларини ҳозирлаб қўйди. Фарғона вилоят ҳокимлиги матбуот хизмати мана шундай хабар тарқатди.

Расмий хабарда айтилишича, COVID-19 инфекцияси билан касалланган беморларни даволашда қўлланиладиган 500 дона кислород концентратори ҳамда 5 мингта пульс оксиметрлари олиб келинди. Ҳозирга қадар 12 мингдан ортиқ захира ўринлари ҳозирлаб қўйилди.

“Тиббиёт масканларининг моддий-техник базаси мустаҳкамланяпти. Уч ойлик дори-дармон захираси учун 10 миллиард сўм маблағ ажратилди. Вилоят ҳокимлиги томонидан қарийб уч миллиард сўм маблағ эвазига Хитойдан кислород концентраторлари ва пульс оксиметрлари олиб келинганлиги ҳам ана шу ишларнинг узвий давомидир. Мазкур тиббий жиҳозлар захира жой учун тайёрлаб қўйилган масканларга топширилди”,- дейилади расмий маълумотда.

Аввалроқ Фарғона вилоят ҳокимлиги матбуот хизмати вилоят ҳокими Шуҳрат Ғаниев бу каби жиҳозларни ишлаб чиқарувчи корхона ишга туширилишини эълон қилгани ҳақидаги видеони ҳам тарқатган.

Видеода Шуҳрат Ғаниев Фарғона шаҳридаги “Само” спорт мажмуасидаги тақсимлаш марказида кислород концентраторларини ўрнатиш жараёнини билан танишгани акс этган.

-Вилоятимизда тайёрланган захира ўринларига бу кислород концентраторлари ва пульс оксиметрларининг биринчи қисми етказилмоқда. Шунингдек, бу каби зарур жиҳозлар билан барча тиббиёт масканларимизни таъминлаш тадбирларини кўрганмиз. Бундан ташқари, яқин кунларда “Қўқон” эркин иқтисодий зонасида худди шундай тиббий жиҳозларни ишлаб чиқарадиган йирик корхона ишга туширилади. Вилоятимиздаги барча шифокорлар ва тиббиёт ходимлари бепул пульс оксиметрлари ва бошқа керак тиббий жиҳозлар билан таъминланади, -деб айтган видеода вилоят ҳокими Шуҳрат Ғаниев.

Вилоят ҳокимлиги матбуот хизматининг маълум қилишича, бир дона кислород концентратор нархи барча ҳаражатлари билан 4 милион 200 сўм, бир дона пульс оксиметри эса 150 минг сўмга тушди.

ЎМИ муфтий алмашганига оид иддаолар ёлғон эканини билдирди

Диний идора маълумотига кўра, Усмонхон Алимов Ўзбекистон муфтийси лавозимида ўз фаолиятини давом эттирмоқда.

Ўзбекистон мусулмонлари идораси раиси, муфтий лавозимида Усмонхон Алимов фаолиятини давом эттирмоқда. Бу баёнотни диний идора матбуот хизмати ижтимоий тармоқларда Ўзбекистонда муфтий алмашгани ҳақида тарқалган маълумотларнинг асоссизлигини қайд этиш учун берган.

ЎМИ вакилларига кўра, “8 август куни ижтимоий тармоқларда тарқалган Ўзбекистон мусулмонлари идораси раиси, муфтий лавозимига гўёки номзодлар кўриб чиқилиб, Azon.uz сайти таъсисчиси Мубашшир Аҳмад маъқулланди, деган мазмундаги хабар сохта ва мутлақо ҳақиқатга тўғри келмайди”.

Қайд этилишича, мазкур асоссиз маълумот тарқалиши биланоқ Azon.uz таҳририяти ушбу хабар нотўғри экани, унга кўр-кўрона ишониб кетмасликка чақириб, раддия эълон қилган.

Доллар ва евронинг расмий курси яна кўтарилди

Ўзбекистон Марказий банки жорий йил 10 августидан валюталарнинг сўмга нисбатан нисбатан янги қийматини белгилади.

МБ маълумотига кўра, душанбадан АҚШ долларининг расмий курси ўтган ҳафтага нисбатан 21 сўм 85 тийинга қимматлаб, 10 минг 231 сўм 71 тийинни ташкил этади (ўтган ҳафта 2 сўм 17 тийинга қимматлаб, 10 минг 209 сўм 86 тийин бўлган эди).

Евронинг расмий курси эса олдинги курсга нисбатан 38 сўмга ошиб, 12 минг 59 сўм 9 тийинга тенг бўлади (ўтган ҳафта евро курси 125 сўм 5 тийинга кўтарилиб, 12 минг 21 сўм 9 тийин бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Коронавирусдан ўлганлар сони 196 кишига етди. 1764 беморнинг аҳволи оғир

Беморлардан 22 042 нафари соғайди, касалхоналарда 8 582 нафар бемор даволанмоқда.

Тошкентда сўнгги 12 соатда коронавирусга чалинган беморлардан яна икки нафари вафот этди. Бу билан коронавирусдан ўлганлар сони камида 196 нафарга етди.

Соғлиқни сақлаш вазирлигининг 10 августда билдиришича, Қибрай туманида яшаган 44 ёшли А.А. (эркак) ҳамда Шайхонтоҳур туманида яшаган 68 ёшли У.М. (аёл) вафот этган. 9 августда эса коронавирусга чалинган 6 киши вафот этгани хабар қилинганди.

Вазирлик Ўзбекистонда коронавирус инфекцияси қайд этилганлар сони, 10 август соат 10:00 ҳолатига кўра, 30 820 кишига етганини ҳам маълум қилди. Бу 9 август соат 23:30даги кўрсаткичдан 211 нафарга кўпдир.

“Янги касалланиш ҳолатларининг 176 нафари Тошкент шаҳрида (шундан 33 нафари тана ҳарорати кўтарилганлиги сабабли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида, 143 нафари эса Ўртасарой карантин марказидаги (барчаси хориждан келган) фуқаролар орасида), 24 нафари Тошкент вилоятида ҳамда 11 нафари Сирдарё вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган”, -дейилади расмий маълумотда.

Беморлардан 22 042 нафари соғайди, касалхоналарда 8 582 нафар бемор даволанмоқда. Улардан 1 378 нафари оғир, 386 нафари эса ўта оғир аҳволда.

Қирғизистон МХҚ: Бобомурод Абдуллаев Ўзбекистон сўрови билан қўлга олинди

Бобомурод Абдуллаев ўзининг Усмон Ҳақназаров тахаллуси остидаги мақолаларнинг аксарияти муаллифи эканини тан олган.

Қирғизистон Миллий хавфсизлик қўмитаси (МХҚ) 10 август куни ўзбекистонлик журналист Бобомурод Абдуллаевнинг Бишкекда қўлга олиниши юзасидан баёнот берди.

Баёнотда айтилишича, журналист 8 август куни Оилавий ва жиной ишлар бўйича ҳуқуқий ёрдам ва ҳуқуқий муносабатлар тўғрисидаги 1993 йилги Минск конвенциясига асосан Ўзбекистон сўрови билан қўлга олинган.

Бобомурод Абдуллаев қатор жиноятларни содир этганликда айбланиб Ўзбекистон томонидан қидирувга берилгани ҳам баёнотда таъкидланган. Лекин журналист қандай жиноятларда гумонланаётгани ёки айбланаётгани айтилмаган.

Айни пайтда Бобомурод Абдуллаев МХҚ ҳибсхонасида сақланмоқда. Бош прокуратура уни Ўзбекистонга топшириш масаласини кўриб чиқмоқда. 10 август куни Абдуллаевга эҳтиёт чорасини белгилаш масаласи Бишкек шаҳар Биринчи Май туман судида кўриб чиқилиши кутилмоқда.

Озодлик якшанба куни Бобомурод Абдуллаев 9 август оқшомида Қирғизистон пойтахти Бишкекдаги кафелардан бирида Миллий хавфсизлик давлат қўмитаси ходимлари томонидан қўлга олингани ҳақида хабар берганди.

Маълумотларга кўра, Бобомурод Абдуллаев Қирғизистонга шу йил февралида Марказий Осиёдаги Америка университети таклифи билан 4 ойлик ўқишга келган. Аммо коронавирус пандемияси туфайли чегаралар ёпилиб қолгани важидан у ўқишини давом эттириш учун Европага учиб кетолмай қолган.

Бобомурод Абдуллаев 2017 йилнинг 27 сентябрида МХХ томонидан ҳибсга олинган. Шундан сўнг у 2011 йилдан "Усмон Ҳақназаров" имзоси остида "амалдаги тузумни ўзгартиришга чақирувчи" мақолалар чоп этиш ва Ўзбекистонда "инқилоб қилиш"га уринишда гумон қилиниб, судланган.

Маҳкама давомида Бобомурод Абдуллаев ўзининг Усмон Ҳақназаров тахаллуси остидаги мақолаларнинг аксарияти муаллифи эканини тан олган, бироқ ўзи ёзган мақолаларда давлат тўнтаришига чақириқ бўлганини рад этган.

Шу билан бирга, судда журналистга нисбатан тергов давомида қийноқ қўлланилгани қайд этилган.

Прокурор Б.Абдуллаевга 5 йиллик қамоқ жазоси сўраган. Бироқ 2018 йил 7 май куни жиноят ишлари бўйича Тошкент шаҳар судида бўлиб ўтган маҳкамада журналист Ўзбекистон Жиноят кодексининг 159- моддаси, 1- қисми, “б” бандида назарда тутилган жиноятни содир этганликда айбдор топилиб, унга иш ҳақининг 20 фоизини давлатга ўтказиш ва 3 йилга ахлоқ тузатиш ишларига жалб этиш жазоси тайинланган ҳамда суд залидан озод қилинган.

Бобомурод Абдуллаевнинг суд залидан озод қилинишини қатор нуфузли халқаро ташкилотлар, жумладан, ЕХҲТнинг Матбуот эркинлиги бўйича вакили, Amnesty International , CPJ ва бошқа инсон ҳуқуқлари ташкилотлари томонидан олқишлаган.

Самара ва Оренбургдан олиб келинган ўзбекистонликлар карантин зонасига жойлаштирилди

Самара ва Оренбург вилоятида минглаб ўзбекистонликлар чегарадан ўтолмай қолиб кетган эди.

Россиядан қайтарилган 918 нафар ўзбекистонлик Попдаги карантин ҳудудига жойлаштирилди. Бу ҳақда Наманган вилоят ҳокимлиги хабар берди.

Ҳокимликнинг билдиришича, “Самара—Бузулук—Тошкент—Поп” йўналиши бўйича Россиядан олиб келинган 918 нафар ўзбекистонлик 9 августда Поп темир йўл вокзалида кутиб олинган.

Улар шу жойнинг ўзида Поп тумани Санитария-эпидемиологик осойишталик маркази ходимлари томонидан дезинфекциядан ўтказилди.

“Келтирилган фуқаролар республикамизнинг турли вилоятларидан бўлиб, улар Попдаги карантин ҳудудига жойлаштирилади ва 10 кун давомида кузатувда бўлади”, -дейилади расмий хабарда.

Аввалроқ Ўзбекистон Транспорт вазирлиги Россия-Қозоғистон чегарасидан ўтолмай Оренбург ва Самара вилоятларида тўпланиб қолган ўзбекистонликларни ватанига қайтариш жараёни бошлангани ҳақида билдирганди.

7 августга ўтар кечаси Тошкен – Бузулук – Тошкент йўналишидаги поезд 918 нафар йўловчи билан Ўзбекистон томон йўлга чиққани хабар қилинган эди. 7 август куни Тошкент – Кинел – Тошкент йўналишидаги поезд ҳам 918 йўловчини Ўзбекистонга олиб келиниши билдирилган.

Поездлар Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинди.

Россия ва Марказий Осиё давлатлари коронавирус пандемияси туфайли киритган карантин чекловлари ва чегараларнинг ёпилиши ортидан май ойидан буëн Самара ва Оренбург вилоятида минглаб ўзбекистонликлар чегарадан ўтолмай қолиб кетган эди. Кейинроқ уларнинг бир қисми Қозоғистон билан келишилган ҳолда чегарадан ўтказилиб, Ўзбекистонга олиб келинганди.

Таниқли адабиётшунос олим Санжар Содиқов вафот этди

Филология фанлари доктори, профессор Санжар Содиқов.

Адабиётшунос олим, филология фанлари доктори, профессор Санжар Содиқов 6 август куни 80 ёшида оламдан ўтди. Бу ҳақда маҳаллий нашрлар 9 август куни хабар берди.

1940 йил 21 июль куни Тошкент шаҳрида зиёлилар оиласида туғилган Санжар Содиқов кўзи ожиз болалар мактаб-интернатини тамомлаган. Сўнг Тошкент давлат университети (ҳозирги Ўзбекистон Миллий университети)нинг филология факультетида таҳсил олган.

1965 йилдан то умрининг сўнгига қадар Мирзо Улуғбек номидаги Ўзбекистон Миллий университети, Жаҳон тиллари университети ҳамда Алишер Навоий номидаги Тошкент давлат ўзбек тили ва адабиёти университетларида ёшларга таълим берган.

Санжар Содиқов адабиётшуносликка оид ўндан ортиқ асарларнинг муаллифидир. Унинг кўпчилик асарлари, жумладан, «Роман ва танқид» (2008), «Радиожурналистика асослари» (2010), «Мамлакатшунослик асослари» (2012), «Янгича талқин мевалари» (2013), «Жадид адабиётининг қалдирғочлари» (2013), «Янги ўзбек адабиёти тарихи» (2019) каби асарларидан олий ўқув юртларида дарслик сифатида фойдаланилади.

Ўзбекистонда хизмат кўрсатган ёшлар мураббийи Санжар Содиқов ёзувчи Борис Пастернакнинг «Доктор Живаго» (2018), Иван Буниннинг «Арсенев ҳаёти» (2020) номли романларини ўзбек тилига таржима қилган.

Хоразмда спорт мактаблари коронавирус марказларига айлантирилмоқда

Хоразм вилоятида шу кунгача 421 кишида коронавирус аниқланган.

Хоразм вилоятида спорт мактаблари коронавирусга чалинганларни даволаш учун махсус тиббиёт марказларига айлантирилмоқда. Бу ҳақда Жисмоний тарбия ва спорт вазирлиги 9 августда хабар берди.

Расмий хабарда айтилишича, шу кунга қадар Урганч ихтисослаштирилган олимпия захиралари мактаб-интернатининг 4 та спорт залида 718 ўринли, Хива шаҳридаги Олимпия ва миллий спорт турлари бўйича давлат ихтисослаштирилган мактаб-интернатининг кураш залида 132 ўринли марказ ташкил этилган.

Мазкур марказларда касалларга бирламчи тиббий ёрдам кўрсатиш ва даволаш мақсадида ташхислаш ва саралаш тақсимот ишлари олиб борилади.

Хоразм вилоятида шу кунгача 421 кишида коронавирус аниқланган. Улардан 367 нафари соғайган, 1 бемор вафот этган.

Тошкент шаҳар ҳокими пойтахтнинг тўртта туман ҳокимини жазолади, улар орасида шаҳарнинг собиқ ҳокими ҳам бор

Тошкент шаҳар ҳокими Жаҳонгир Ортиқхўжаев 8 август куни имзолаган қарорига кўра, шаҳарнинг Мирзо Улуғбек (Ш. Иргашев), Учтепа (Ф. Абдуллаев), Чилонзор (С. Маҳаметов), Яшнобод (Х. Тиллашайхов) туманлари ҳокимларига "ҳайфсан" интизомий жазосини берган.

Бу ҳақда хабар қилган Хабар.уз сайтига кўра, Ортиқхўжаев ҳокимларни пандемия даврида аҳоли томонидан кўплаб эътирозлар билдирилаётгани ҳамда белгиланган топшириқлар ижросини таъминлашда сусткашликка йўл қўйгани учун жазога тортган.

Интизомий жазога тортилганлар орасида пойтахтнинг собиқ ҳокими, ҳозирда Юнусобод тумани ҳокими бўлиб ишлаётган Р. Усмонов ҳам бор.

Ўзбекистонда коронавирусга чалинганлар сони 30197 кишига етди

Ўзбекистон Соғлиқни сақлаш вазирлиги хабарига кўра, 9 август соат 10:00 ҳолатига кўра коронавирус инфекциясини юқтириб олганлар сони расман 30 197 кишига етган. Сўнгги 11 соат ичида 279 та янги касалланиш ҳолати қайд этилган.

ССВга кўра, янги касалланиш ҳолатларининг 142 таси Тошкент шаҳрида, 133 таси Тошкент вилоятида ва 4 таси Қорақалпоғистонда қайд этилган.

"Шу билан бирга, Шайхонтоҳур туманида яшаган 84 ёшли Қ.Я. (эркак) ҳамда Зангиота туманида яшаган 62 ёшли С.Т. (эркак), жами 2 нафар коронавирусга чалинган бемор вафот этди", — дейилади ССВ ахборотида; шу тариқаси, ССВ ҳисоби бўйича Ўзбекистонда коронавирус инфекцияси асоратлари оқибатида вафот этганлар сони 190 нафарга етди.

9 август соат 10:00 ҳолатига кўра Ўзбекистонда коронавирусга чалинган 21 316 киши (жами касалланганларнинг 71 фоизи) соғайган. Айни вақтда 8 691 бемор даволанишни давом эттирмоқда — 1248 нафар беморнинг аҳволи оғир, шундан 274 нафарининг аҳволи эса ўта оғир деб баҳоланмоқда.

Сўх туманига авиақатнов йўлга қўйилади

Фарғона вилоятининг эксклав Сўх тумани

Ўзбекистонни Қирғизистон ҳудудидаги эксклави Фарғона вилоят, Сўх туманига авиақатновлар йўлга қўйилади.

Бу ҳақда хабар берган Кун.уз сайтига кўра, президент қарори билан бир ой муддатда Сўх туманида самолёт ва вертолётлар учун учиш-қўниш майдонини ташкил этиш вазифаси юклатилган.

Ўзбекистон президенти "2020-2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари" тўғрисидагиқарорида Транспорт вазирлигига Қирғизистон Республикаси ҳаво ҳудудидан фойдаланиш масаласи тўлиқ ҳал этилгандан кейин бир ҳафта муддатда Фарғона шаҳридан Сўх туманига кичик авиация транспорти орқали аҳолига мақбул нархларда қатновлар йўлга қўйилишини таъминлаши ҳақида ёзилган эди.

Молия вазирлиги Фарғона шаҳридан Сўх туманига кичик авиация транспорти қатнови бўйича кўрилган зарарларни қоплаш учун компенсация тўловларини жорий йилда Вазирлар Маҳкамасининг захира жамғармасидан қопланишини ва келгуси йилларда Давлат бюджети параметрларида назарда тутилишини таъминлайди.

Ўзбекистонга қарашли Сўх тумани Қирғизистон ҳудудидаги эксклав бўлиб ҳисобланади. 2013 йили қирғиз-ўзбек чегарасидаги можародан кейин Сўх-Риштон йўли ёпиб қўйилган. 2019 йилда бу йўл 2 кунга очилиб, кейин яна ёпилган.

Талабанинг контракт тўлови миқдори ўзгармайди

8 август куни АОКАда бўлиб ўтган йиғилишда Олий ва ўрта-махсус таълим вазири Иномжон Мажидов 2020-2021 ўқув йилида талабаларнинг контракт тўлови ўзгаришсиз қолишини билдирди:

“2020-2021-ўқув йилида контракт тўлови миқдори ўзгаришсиз қолади, оширилмайди, камайтирилмайди. Қўшимча қилиш керакки, пандемия шароитида иккинчи ва ундан юқори курслар сентябрдан бошлаб масофадан таҳсил олишни бошлайдилар. Кириш имтиҳонлари сентябрда бўлиб ўтишини ҳисобга олсак, биринчи курс талабалари учун ўқув машғулотлари октябрдан бошланади".

Бундан аввал юзлаб ўзбекистонлик талабалар Телеграм ижтимоий тармоғидаги "Талабалар ҳаракати" саҳифасида контракт тўловлари қимматлиги ва уни камайтиришни сўраб Олий таълим вазирлигига мурожаат қилган эди.

Вазирлик пандемия муддатлари узайтирилиб, ўқиш онлайн тарзда давом эттирилган ҳолатда ҳам, тўлов-шартнома асосида таҳсил оладиган талабалар ва уларнинг ота-оналари хавотирланишга ҳеч қандай асос йўқлиги ҳақида изоҳ берган.

Ўзбекистонликларни Россиядан олиб келиш учун махсус поезд йўлга чиқди

Россия-Қозоғистон чегарасида қулбола чодирлар тикиб, ва оғир шароитда кун кечираётган ўзбек мигарнтлари ҳаётлари Россия, Қозоғистондаги қатор етакчи интернет нашрлари томонидан ёритилганди.

"Ўзбекистон темир йўллари" ўзининг навбатдаги йўловчи поезди ўзбекистонликларни Россиянинг Ростов вилоятидан олиб келишга Тошкентдан жўнаб кетганини маълум қилди.

Россия-Қозоғистон чегарасида қўлбола чодирлар тикиб, ва оғир шароитда кун кечираётган ўзбек мигрантлари ҳаётлари Россия, Қозоғистондаги қатор етакчи интернет нашрлари томонидан ёритилганди.

"Ўзбекистон темир йўллари" маълумотига кўра, Гниловская – Тошкент йўналишидаги поезд 918 нафар йўловчи билан 10 август куни йўлга чиқади. Ушбу йўловчи поездида оғир касалланганлар ва уларга ҳамроҳлик қилувчилар учун махсус жойлар ажратилган.

Мазкур рейс чипталари фақат Ўзбекистон Республикаси фуқаролари учун сотилмоқда. Йўналишдаги чипта нархи 2.079.700 сўм (14.855 рубль)ни ташкил этади. Йўл давомида йўловчи поездлар фақат техник кўрик учун тўхтатилади, яъни станция-вокзалларда йўловчиларнинг платформага тушишига рухсат этилмайди.

Поездлар Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинади.

Қайд этилишича, ушбу рейсларда олиб келинган йўловчилар поездлардан тушиши биланоқ Наманган ва Тошкент вилоятларининг карантин зоналарига юборилади. Айнан шу жиҳатни инобатга олган ҳолда йўловчиларнинг қариндош ва яқинларидан уларни кутиб олиш мақсадида вокзалга ташриф буюрмасликлар сўралган.

Бош вазир моддий ёрдам пулларини тарқатишдаги камчиликлар учун маҳалла раисларини танқид қилди

Ўзбекистон бош вазири Абдулла Арипов моддий ёрдам ва кўмакка муҳтож оилаларга давлат бюджетидан ажратилган бир марталик моддий ёрдам пулларини тарқатишда "сусткашликка йўл қўйган" айрим маҳаллалар раисларини кескин танқид қилди.

8 август куни ўтказилган ҳукумат селектор мажлисида бош вазир "буни ҳеч қайси мезон билан оқлаб" бўлмайди деб айтган.

Ўзбекистонда 4 август куни ҳукумат мажлисида пандемия даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлаш, кўмакка муҳтож оилалар рўйхатларини тўғри ва ҳаққоний шакллантириш, ажратилган маблағларни адолатли тарқатилиши ҳақида айтилганди.

Ўз навбатида, Бош прокуратура ҳам рўйхат асосида эҳтиёжманд оилаларга бир марталик ёрдам пули тарқатилиши жараёнида қонунбузилиш ҳолатлари кузатилаётганига оид ижтимоий тармоқларда пайдо бўлган хабарларга муносабат билдирди.

Унда ёрдам пули ажратилишидаги қонунбузилишлар юзасидан прокуратурага мурожаат қилиш сўралди.

Шу ҳафта бошида Ўзбекистоннинг бир қанча туман ва маҳаллаларида ҳукумат ваъда қилган ёрдамлар берилмаётгани норозиликка сабаб бўлганди.

Фарғона вилоятида ўнлаб одам вилоят ҳокимлиги олдида тўплангани ҳақида Озодлик хабар берганди.

Ўзбекистонда инсон ҳуқуқ ҳимоячилари учун кўкрак нишони таъсис этилмоқда

“Инсон ҳуқуқлари ҳимояси учун” кўкрак нишони.

Ўзбекистон Вазирлар Маҳкамаси “Инсон ҳуқуқлари ҳимояси учун” кўкрак нишони тўғрисида”ги қарори лойиҳасини эълон қилди.

Қарор лойиҳасида айтилишича, кўкрак нишони билан чет эл фуқаролари ва фуқаролиги бўлмаган шахслар, шунингдек, инсон ҳуқуқларини ҳимоя қилиш соҳаси фаолият олиб бораётган ташкилотлар ҳам тақдирланиши мумкин.

Кўкрак нишони билан тақдирланган шахсларга базавий ҳисоблаш миқдорининг ўн баравари миқдорида бирйўла тўланадиган пул мукофоти берилиши қарор лойиҳасида кўзда тутилган.

Фуқаролик жамияти институтлари, давлат органлари ва ташкилотлар ҳамда фуқаролар ҳар йили 1 сентябрга қадар кўкрак нишони билан тақдирлаш юзасидан таклифларни Инсон ҳуқуқлари бўйича Ўзбекистон Республикаси Миллий марказига тақдим этади.

Номзод бўйича тақдим этилган таклифларга илова сифатида номзод ҳақида маълумотнома, сўнгги уч йил давомида у томонидан инсон ҳуқуқлари ва эркинликларини ҳимоя қилиш борасида амалга оширган ишлари тақдим этилади.

Қарор лойиҳасида тўлиқ тақдим қилинмаган ҳужжатлар кўриб чиқилмаслиги айтилган.

Кўкрак нишони билан тақдирлашга оид таклифларни кўриб чиқиш юзасидан Марказ директори томонидан комиссия ташкил этилади.

Комиссия таркибига инсон ҳуқуқлари соҳасидаги фуқаролик жамияти институтлари вакиллари, олимлар ва мутахассислар, шунингдек, халқаро ташкилотлар вакиллари киритилиши айтилган.

Комиссия йиғилишида номзодлар бўйича ҳужжатлар ўрганилиб, 10 ноябрга қадар энг муносиб номзодлар бўйича якуний қарор қабул қилинади.

Кўкрак нишони ва унинг гувоҳномаси ҳар йили 10 декабрь – Халқаро инсон ҳуқуқлари кунида Марказ директори (ёки унинг топшириғига мувофиқ бошқа масъул шахслар) томонидан тантанали вазиятда топширилиши қарор лойиҳасида тилга олинган.

Ўзбекистонда инсон ҳуқуқлари ҳимоячилари таъқиб этилиши, мустақил инсон ҳуқуқлари ташкилотлари рўйхатга олинмагани халқаро ташкилотлар тарафидан танқид қилиб келинади.

Ўзбекистонликларни олиб келадиган баъзи чартер рейсларнинг вақти ўзгарди

Ўзбекистон фуқароларини ватанига олиб келиш учун 2 августдан 16 август кунлари давомида амалга оширилиши белгиланган чартер рейсларининг парвоз йўналишига қисман ўзгартириш киритилди.

Ўзбекистон Транспорт вазирлиги ахборот хизматига кўра:

  • 7 август куни Тошкент – Ростов-Дон – Наманган;
  • 8 август Тошкент – Санкт-Петербург – Наманган;
  • 9 августга белгиланган Тошкент – Москва – Наманган авиақатновлари Тошкент шаҳрига амалга оширилади.

Шунингдек, Республика махсус комиссиясининг қарори билан Россия Федерациясининг Оренбург ва Самара вилоятларидаги Ўзбекистон фуқароларини Ватанга қайтариш учун 2 та поезд қатнови ташкил этилди.

Мазкур поездларнинг биринчиси 9 август куни Наманган шаҳрига, иккинчиси эса 9 август куни Самарқанд шаҳрига кириб боради. Поездларда олиб келинган барча фуқаролар ўрнатилган тартибда карантинга жойлаштирилади.

"Россия Федерациясининг Ростов-Дон вилоятидаги фуқароларни олиб келиш мақсадида учинчи поезд қатнови ҳам ташкил этилди. Ушбу поезд 13 август куни Тошкент шаҳрига кириб келади", дейилган Транспорт вазирлиги билдирувида.

Транспорт вазирлиги йўловчилардан борди-ю чипталарни ҳарид қилиш вақтида ноқонуний хатти-ҳаракатлар содир этилиши билан боғлиқ вазиятларга дуч келган тақдирда, вазирликнинг 1167 қисқа рақамли ишонч телефонига, шунингдек, "Ўзбекистон темир йўллари" АЖнинг (71) 299-94-50 ишонч телефонига мурожаат этишларини сўраб қолган.

Давомини ўқинг

Кўрмай қолган бўлсангиз

XS
SM
MD
LG