Президент Шавкат Мирзиёев Ўзбекистонда от етиштириш ва от спорти бўйича қарор имзолади. Қарорга мувофиқ Қашқадарёда "Ўзбекнефтегаз" ширкати оталиғида Қорабайир отлари, Тошкентда эса вилоят ҳокимлиги оталиғида Ахалтека отлари етиштирилади. Шу билан бирга отбоқар, чавандоз ва от спорти тренерларини тайёрлайдиган даргоҳлар ҳам очилади.
Ўзбекистон президенти расмий сайтида чоп этилган "Ўзбекистон Республикасида от етиштириш ва от спортини ривожлантиришга оид қўшимча чора-тадбирлар тўғрисида"ги 3057-қарор 15 июнда имзоланган.
Қарорда мамлакатда мавжуд От спорти федерацияси номини "От етиштириш ва от спорти федерацияси" қилиб ўзгартириш кўзда тутилган.
Ҳужжатда Қорабайир ва Ахалтека зотларидан спортчи отларни етиштириш, бунда хориж тажрибасини ўзлаштириш, от спорти ва от етиштириш учун зарур давлат режасини ишлаб чиқиш, бу спорт турини ёшлар орасида кенг тарғиб қилиш, бу мақсада болалар от спорти мактаблари, секциялари, клубларини очиш белгиланган.
Бу мақсад учун маблағни Федерация қошида очиладиган жамғармадан олиш, жамғарманинг эса бу маблағни федерация аъзолари ва ҳомийлардан йиғиши режаланмоқда.
Бундан ташқари, федерация раҳбариятига спорт учун етиштирган отларини валюта мажбуриятларисиз экспорт қилиш имкони ҳам берилган.
Шунингдек, федерация 2021 йилнинг 1 январига қадар солиқ ва бож тўловларидан озод қилинди.
Қарорда тегишли ташкилотларга икки ойлик муддат ичида кўзланган мақсадни амалга оширишга қаратилган 2021 йилгача давлат дастурини ишлаб чиқиш вазифаси топиширилди.
2018 йилнинг 1 январигача "Ўзбекнефтегаз" ширкати Қашқадарёда Қорабайир етиштирувчи комплексни қуриб битириши, Тошкент вилоят ҳокимлиги эса "Марказий ипподром" комплексини таъмирлаб, Ахалтека отларини етиштиришга ҳозирлаши керак.
Шу йилнинг март ойида Ўзбекистон президенти Туркманистонга илк расмий ташриф билан борган ва ўшанда Туркманистон президенти Қурбонқули Бердимуҳамедов унга зотдор Ахалтека отини совға қилган эди.
Ўшандаёқ президент Мирзиёев Ўзбекистонда зотдор отларни етиштириш ғояси туғилгани ва, шу йил апрел ойида Қашқадарёга қилган сафари пайтида эса, тез орада республикада зотдор отларни етиштириш бошланиши ҳақида гапирган эди.
Ўзбекистондаги расмий манбалар Қорабайир зотдор отларга "ватани Ўзбекистонда бўлган ва зоти жаҳон от селекциясининг олтин фондига киритилган", деб таъриф беради.
