Ўзбекистондаги йирик бозорлар, истироҳат боғлари ва хиёбонларда юз таниш тизимига эга камералар ўрнатилади. Бу ҳақда Миллий гвардия қўмондони Рустам Жўраев маълум қилди.

Мулозимга кўра, қўшимча видеокузатув камералари “жамоат тартибини сақлаш, ёнғин ва бошқа фавқулодда вазиятларнинг олдини олиш самарадорлигини ошириш мақсадида” ўрнатилиб, Ягона мониторинг марказига интеграция қилинади.

Миллий гвардия қўмондонининг билдиришича, жисмоний ва юридик шахслар томонидан бинолар ёки уларга кириш йўлакларига ўрнатилган видеокузатув мосламаларини ўзида бирлаштирадиган “Е-Hamkor” дастури ҳам татбиқ этилиб, мазкур дастур ички ишлар органларининг ҳудудий ситуацион марказларига интеграция қилинади. Жўраев маҳаллаларда ҳуқуқбузарликнинг олдини олиш бўйича янги тизим ва амалиёт жорий этилиб, мулкий ва жамоат тартибига қарши қаратилган жиноятлар содир этилиши эҳтимоли юқори бўлган объектларда доимий кузатув йўлга қўйилишини ҳам қўшимча қилган.

Аввалроқ Озодлик июнь ойи бошидан Қирғизистонда МДҲ мамлакатларида қидирувда бўлган шахслар юзини таниш тизими ишга туширилгани ҳақида хабар қилган эди. Қирғизистон ИИВ матбуот хизмати ўшанда камералар ишга туширилгани ортидан ўтган 10 кун мобайнида юз таниш функциясига эга бўлган кузатув камералари ёрдамида қидирувда бўлган 57 киши аниқланиб, милицияга олиб келинганини маълум қилган. Булардан орасида Россия ва Ўзбекистон фуқаролари бўлган тўрт киши қўлга олингани айтилган.

Инсон ҳуқуқлари ташкилотлари авторитар бошқарувли мамлакатларда бу каби юз таниш камераларининг ишга туширилиши фуқаролар ҳуқуқ ва эркинликларини сезиларли даражада чеклаб қўйиши мумкинлигидан ташвиш билдириб келишади. Айни пайтда юз таниш тизимини тўла тақиқлаш юзасидан ҳам хавотирлар йўқ эмас. Дейлик, мазкур тизим тўла тақиқланса, бу полициянинг бедарак йўқолган ёки жиноятда гумонланганларни қидириш ишини қийинлаштириши мумкин.

Ўзбекистон жорий йилнинг 1 октябридан Россия газини сотиб олишни бошлайди. Бу ҳақда ТАСС агентлиги Ўзбекистон Энергетика вазирлиги матбуот котиби Ҳасан Тошхўжаевдан олинган маълумотга таянган ҳолда хабар қилди.

“Режага мувофиқ, 1 октябрдан Ўзбекистонга Россия газини етказиб бериш бошланади, юқори босимли газ қабул қилиб олиш учун зарур бўлган барча инфратузилма ва газ қувурлари ҳозирлаб қўйилган”, дея иқтибос келтирган Тошхўжаев сўзларидан агентлик.

Аввалроқ расмий Тошкент “Газпром” билан июнь ойи ўртасида Ўзбекистонга табиий газ етказиб бериш бўйича икки йиллик шартнома имзолагани хабар қилинган эди. Шартномага кўра, Россиядан табиий газ Қозоғистон орқали “Ўрта Осиё – Марказ” қувури орқали узатилиши, етказиб берилажак газ ҳажми йилига тақрибан 2,8 миллиард куб метрни ташкил этиши айтилган.

Жанубий Кореянинг Эксимбанки Тошкентда “Миллий онкология марказини барпо этиш” лойиҳасини амалга ошириш учун Ўзбекистонга 10 йил имтиёзли давр билан 40 йил муддатга 0,1 фоиз устама билан 127,5 миллион доллар қарз беради. Президент Шавкат Мирзиёевнинг бу борадаги қарорида қайд этилишича, “Миллий онкология маркази”ни қуришга маблағ ажратиш масаласи Корея ҳукумати билан 2019 йилнинг 27 июнида келишилган эди.

“Корея Эксимбанкининг Иқтисодий ривожланиш ва ҳамкорлик жамғармаси билан молиявий ҳамкорликда “Миллий онкология марказини барпо этиш” лойиҳасини амалга ошириш чора-тадбирлари тўғрисида”ги қарор лойиҳасида қарз шартномаси 2021 йил 31 декабрда имзолангани таъкидланади.

Тошкентда Жанубий Корея билан ҳамкорликда юқори технологияга асосланган замонавий онкология тиббиёт маркази қурилиши ҳақида илк маротаба 2020 йилнинг 16 сентябрь куни расман билдирилган эди. Ўшанда соғлиқни сақлаш вазири Алишер Шодмонов ва Корея тиббиёт ассоциацияси илмий-текшириш қўмитаси раиси Цой Чже Ук бу масалада келишгани хабар қилинган.

Соғлиқни сақлаш вазирлиги 2020 йилдаги хабарида онкология тиббиёт маркази Тошкентда Жанубий Корея лойиҳаси асосида барпо этилган Болалар миллий тиббиёт маркази жойлашган ҳудудда қурилишини, бундан ташқари бу ерда тиббиёт олийгоҳи ҳам ташкил этилишини маълум қилганди.

Мазкур хабар 2020 йилнинг 3 сентябрида Тошкентдаги Республика ихтисослаштирилган Онкология ва радиология илмий-амалий тиббиёт марказида саратонга қарши ягона радиотерапия ускунаси ишдан чиққани тўғрисидаги маълумотлар фонида пайдо бўлган эди. Озодлик 2021 йилда ҳам 2 миллион долларга сотиб олинган ягона радиотерапия ускунаси ишдан чиққани, беморлар бир неча ҳафталаб муолажасиз қолгани ҳақида хабар берганди.

Ўзбекистон президенти Шавкат Мирзиёевнинг қизи ва ёрдамчиси Саида Мирзиёева Наманган вилоятида заҳарланган болалар ҳолидан хабар олгани тўғрисида телеграм каналида маълум қилди.

Президент топшириғига асосан Наманган вилоятига борганини ёзган Мирзиёева: “Вазиятни кўзимиз билан кўриш учун шифохонага бордик, болажонлар ҳолидан хабар олдик. Уларнинг кайфияти яхши, ҳаммалари аста-секин тузалишмоқда, кўпчилиги соғайгани учун уйига - оиласи бағрига қайтарилган”, деб ёзди.
⠀
Унга кўра, болаларнинг заҳарланиши юзасидан соғлиқни сақлаш, СЭС, таълим, прокуратура ва бошқа тегишли соҳа мутасаддилари билан йиғилиш ўтказилган. Мазкур ҳолат бўйича қўзғатилган жиноят иши Наманган вилоят прокуратурасидан Бош прокуратурага ўтказилган.

Мирзиёева ўз билдирувида Наманган вилоятида қанча бола заҳарлангани ва заҳарланиш сабаблари тўғрисида маълумот бермади.

Маҳаллий оммавий ахборот воситаларида камида 70 бола заҳарлангани тўғрисида хабарлар чиққан. Бироқ ижтимоий тармоқларда Чустдаги болалар боғчаларида заҳарланган болалар сони камида 450 нафар экани ва улар “Йод” ёки "Антиструмин"дан заҳарланган бўлишлари мумкинлиги тўғрисидаги тахминлардан иборат постлар пайдо бўлди.

22 сентябрь куни UzA | Tezkor xabarlar телеграм каналида мактаб ва боғчаларга тарқатилган йод препарати истеъмолини тўхтатиш тўғрисида Соғлиқни сақлаш вазирлиги кўрсатма бергани тўғрисида “Шошилинч хабар” эълон қилинди. Телеграм канал Ўзбекистон Соғлиқни сақлаш вазирлигининг "Кўрсатма хати" нусхасини эълон қилди.

Вазир ўринбосари Элмира Боситхонова имзолагани айтилаётган кўрсатмада, болаларнинг заҳарланишига сабаб бўлгани тахмин қилинаётган Antistrumin (Калий йоди) истеъмолини лаборатория хулосалари чиққунга қадар зудлик билан вақтинча тўхтатиб туриш ҳақида топшириқ берилгани англашилади.

“Газета. уз”нинг хабар беришича, бу ҳужжат Ўзбекистоннинг барча вилоятлари ва Тошкент шаҳри соғлиқни сақлаш бошқармаларига ҳамда дори-дармонларни сотиб олувчи «Ўзмедимпекс” ширкатига, дорини ишлаб чиққан Samo ширкатига жўнатилган.

Ўзбекистон расмийлари шу кунгача бу хабарларга муносабат билдирмади.

UzA | Tezkor xabarlar телеграм каналида мактаб ва боғчаларга тарқатилган йод препарати истеъмолини тўхтатиш тўғрисида Соғлиқни сақлаш вазирлиги кўрсатма бергани тўғрисида “Шошилинч хабар” эълон қилинди. Телеграм канал Ўзбекистон Соғлиқни сақлаш вазирлигининг "Кўрсатма хати" нусхасини эълон қилди.

Бироқ ЎзА сайти орқали кирилувчи UzA | Расмий канал телеграми саҳифасида ва агентликнинг расмий веб сайтида бу борада хабар йўқ.

Вазир ўринбосари Элмира Боситхонова имзолагани айтилаётган кўрсатмада, Чустда камида 70 боланинг заҳарланишига сабаб бўлгани тахмин қилинаётган Antistrumin (Калий йоди) истеъмолини лаборатория хулосалари чиққунга қадар зудлик билан вақтинча тўхтатиб туриш ҳақида топшириқ берилгани англашилади.

Соғлиқни сақлаш вазирлиги ижтимоий тармоқлар ва маҳаллий матбуотда тарқалган бу хабарга ҳозирча изоҳ бермади. Айни пайтда Элмира Боситхонова имзолагани айтилаётган ҳужжат нусхаси ижтимоий тармоқларда тарқалиб кетди.

“Газета. уз”нинг хабар беришича, бу ҳужжат Ўзбекистоннинг барча вилоятлари ва Тошкент шаҳри соғлиқни сақлаш бошқармаларига ҳамда дори-дармонларни сотиб олувчи «Ўзмедимпекс” ширкатига, дорини ишлаб чиққан Samo ширкатига жўнатилган.

“Кун. уз” эса бу маълумотни “20 сентябрдан Ўзбекистонда «Ёрқин миллат» дастури бўйича йод билан таъминлаш ишлари бошланганди. Йод препаратлари Соғлиқни сақлаш вазирлиги ва Мактабгача ва мактаб таълими вазирлиги орқали 3 ёшдан 15 ёшгача бўлган барча болалар учун бепул тақдим этилиши кўзда тутилганди”, деган маълумот билан тўлиқлади.

Наманган вилоятининг Чуст туманида камида 71 нафар бола заҳарланишда гумон қилиниб касалхонага ётқизилгани тўғрисида Озодлик 21 сентябрь куни хабар берганди. Бу маълумотни Озодликка соғлиқни сақлаш вазирлиги бошқарма бошлиғи Аброрбек Алижонов тасдиқлаган.

Бу болалар тумандаги 9 та боғча ва 2 та ўрта мактабнинг ўқувчиларидир.

Бош прокуратура Чуст туманида болалар заҳарланиши юзасидан терговга қадар текшириш ҳаракатлари олиб борилаётганини билдирган.

Соғлиқни сақлаш вазирлиги 22 сентябрь куни Чустда заҳарланиб, касалхонага ётқизилган болаларнинг аҳволи қониқарли экани тўғрисида расмий билдирув тарқатди. Унда айтилишича, болалардан 10 нафарининг аҳволи яхшилангани сабабли уйига рухсат берилди.

Билдирувда туманда содир бўлган мазкур ҳодиса шахсан Соғлиқни сақлаш вазири томонидан қатъий назоратга олингани таъкидланган.

“Туман тиббиёт бирлашмасига қабул қилинган болаларнинг барчасига белгиланган стандартлар бўйича даво муолажалари олиб борилмоқда. Уларга якуний ташхис қўйиш мақсадида белгиланган талаблар асосида намуналар олиниб, экспертизадан ўтказилмоқда”, дейилади билдирувда.

Вазирлик ҳозирча заҳарланиш сабаблари ва омиллари тўғрисида хабар бермади.

Ижтимоий тармоқларда Чустдаги болалар боғчаси тарбияланувчилари “Йод” ёки "Антиструмин"дан заҳарланган бўлишлари мумкинлиги тўғрисидаги тахминлардан иборат постлар кўпаймоқда. Шунингдек, айрим фойдаланувчилар Андижон ва Қўқонда ҳам бир неча бола заҳарланганини иддао қилмоқда. Бу хабарлар расман тасдиқланмаган. Соғлиқни сақлаш вазирлиги ҳам ўз баёнотида бу хабарлар юзасидан муносабат билдирмаган.

Соғлиқни сақлаш вазирлиги 22 сентябрь куни Чустда заҳарланиб, касалхонага ётқизилган болаларнинг аҳволи қониқарли экани тўғрисида расмий билдирув тарқатди. Унда айтилишича, болалардан 10 нафарининг аҳволи яхшилангани сабабли уйига рухсат берилди.

Билдирувда туманда содир бўлган мазкур ҳодиса шахсан Соғлиқни сақлаш вазири томонидан қатъий назоратга олингани таъкидланган.

“Туман тиббиёт бирлашмасига қабул қилинган болаларнинг барчасига белгиланган стандартлар бўйича даво муолажалари олиб борилмоқда. Уларга якуний ташхис қўйиш мақсадида белгиланган талаблар асосида намуналар олиниб, экспертизадан ўтказилмоқда”, дейилади билдирувда.

Вазирлик ҳозирча заҳарланиш сабаблари ва омиллари тўғрисида хабар бермади.

Ижтимоий тармоқларда Чустдаги болалар боғчаси тарбияланувчилари “Йод” ёки "Антиструмин"дан заҳарланган бўлишлари мумкинлиги тўғрисидаги тахминлардан иборат постлар кўпаймоқда. Шунингдек, айрим фойдаланувчилар Андижон ва Қўқонда ҳам бир неча бола заҳарланганини иддао қилмоқда. Бу хабарлар расман тасдиқланмаган. Соғлиқни сақлаш вазирлиги ҳам ўз баёнотида бу хабарлар юзасидан муносабат билдирмаган.

Наманган вилоятининг Чуст туманида камида 71 нафар бола заҳарланишда гумон қилиниб касалхонага ётқизилгани тўғрисида Озодлик 21 сентябрь куни хабар берганди. Бу маълумотни Озодликка соғлиқни сақлаш вазирлиги бошқарма бошлиғи Аброрбек Алижонов тасдиқлаган.

Бу болалар тумандаги 9 та боғча ва 2 та ўрта мактабнинг ўқувчиларидир.

Бош прокуратура Чуст туманида болалар заҳарланиши юзасидан терговга қадар текшириш ҳаракатлари олиб борилаётганини билдирган.

БМТнинг Лойиҳаларга хизмат кўрсатиш бошқармаси – UNOPS Тошкентда ўз ваколатхонасини очади. UNOPS матбуот хизматининг хабар беришича, бу борада Ўзбекистон ҳукумати билан 21 сентябрь куни шартнома имзоланган.

Нью-Йоркда ўтган маросимда шартномага Ўзбекистон ташқи ишлар вазири Бахтиёр Саидов ва БМТ бош котиби ўринбосари, UNOPS ижрочи директори Жорж Морейра да Силва қўл қўйган.

Хабарда айтилишича, бу ташкилотнинг Марказий Осиёдаги энг биринчи ваколатхонаси бўлади. UNOPS ўз ваколатхонасининг очилиши “Ўзбекистон — 2030” стратегияси ва Барқарор ривожланиш мақсадларини амалга ошириш борасидаги ҳамкорликни кенгайтиришига умид билдирган.

Имзоланган шартномага асосан UNOPS шифохоналар, мактаблар ва транспорт тизимларини қуриш ва реабилитация қилиш каби комплекс лойиҳаларни амалга оширишга эътибор қаратади.

Хабарда таъкидланишича, ҳозирда мазкур ташкилот Ўзбекистонда соғлиқни сақлаш ва эпидемияга тайёргарликни яхшилашга қаратилган бир қанча лойиҳаларда фаол иштирок этмоқда.

Хитойнинг “SINOMASH” холдинги “Кампиробод” сув омборидан Фарғона шаҳрига тоза ичимлик суви тортиш лойиҳасини амалга оширмоқчи. Бу ҳақда Фарғона вилоят ҳокимияти маълум қилди.

Хабарда айтилишича, “SINOMASH” билан бу борада дастлабки келишувларга эришилди. Бундан ташқари ширкат вилоятдаги ижтимоий муассасаларни қуриш ёки капитал реконструкция қилиш ишларини ҳам амалга оширади.

“Ушбу лойиҳаларга Хитой молия муассасалари томонидан камида 20 йил муддатга 300 миллион долларгача миқдорда ёки эквалентида долларда йиллик 3 фоизгача бўлган кредит ажратиш бўйича дастлабки келишувга эришилди”, дейилади хабарда.

2022 йилда Ўзбекистон ва Қирғизистон икки давлат чегарасидаги Кампиробод сув омборини ҳамкорликда бошқариш тўғрисидаги шартномани ратификация қилган эди.

Шартномага асосан Кампиробод сув омбори эгаллаган 4485 гектар ер Ўзбекистон ҳудуди сифатида тан олинган. Қирғизистон ҳукумати бунинг эвазига Ўзбекистондан 19 минг гектар ер олинганини билдирган.

Бироқ Қирғизистонда бу шартнома норозиликларга сабаб бўлган ва айрим сиёсатчилар томонидан “қирғиз ерларини Ўзбекистонга бериб юбориш” сифатида талқин қилинган. Шу фонда мамлакатда "Кампиробод иши" деб номланган жиноят иши очилиб, 30 га яқин сиёсатчи ва фаоллар ҳибсга олинган.

Фарғона вилоят ҳокимлиги хабарида таъкидланишича, вилоят ҳокими Хайрулло Бозоровнинг Хитойга амалий ташрифи доирасида умумий қиймати 1,37 миллиард доллар бўлган 29 та инвестициявий келишув ва савдо шартномалари имзоланган.

“Бухоро — Екатеринбург” йўналиши бўйича 21 сентябрь тонгида парвоз қилиши керак бўлган Red Wings авиаширкати учоғи Бухоро аэропортида 10 соатдан кўпроқ туриб қолган.

Uzbekistan Airports матбуот хизмати қайдича, бунга СУ-95 учоғида аниқланган техник носозлик сабаб бўлган.

Хабарномада учоқни созлаш ишлари чўзилиб кетгани сабабли 88 нафар йўловчининг ҳаммаси меҳмонхоналарга жойлаштирилиб, иссиқ овқати билан таъминлагани айтилган.

Техник носозлик бартараф қилингач, учоқ маҳаллий вақт билан соат 17:18 да Екатеринбургга учиб кетган.

Аввалроқ Россия нашрлари йил бошидан буён мамлакатда учоқ парвози билан боғлиқ 126 та нохуш ҳодиса кузатилгани ҳақида хабар қилишган.

Мутахассисларга кўра, авиаавариялар сони кўпайишига Россия қўшинлари Украинага бостириб кириши ортидан дунёдаги учоқ ишлаб чиқарувчи йирик корхоналар РФ авиаширкатларига хизмат кўрсатишдан бош тортгани ҳам сезиларли таъсир кўрсатяпти.

Эслатиб ўтамиз, АҚШнинг Boeing корпорацияси 2022 йилнинг март ойи бошидан Россиядаги учоқларга хизмат кўрсатишни тўхтатган. Кейинроқ бу каби қарор Европанинг Airbus ширкати томонидан ҳам олинган эди.

Тошкентдаги кўп қаватли уй подъездида 7 ёшли қизалоққа тегажоқлик қилган 55 ёшли эркак 18 йилга қамалди, деб хабар берди Nemolchi.Uz лойиҳаси 21 сентябрь куни.

Хабарда айтилишича, Жиноят ишлари бўйича Тошкент шаҳар Мирзо Улуғбек туман суди 1968 йилда туғилган А.Х.,ни Жиноят Кодексининг 119-модда 4-қисми (жинсий эҳтиёжни зўрлик ишлатиб ғайритабиий усулда қондириш)да назарда тутилган жиноятни содир этганликда айбдор деб топди.

А.Х., бундан аввал ҳам вояга етмаганларга нисбатан уятсиз хатти-ҳаракатлари учун жиноий жавобгарликка тортилгани аниқланган.

Июль ойида Мирзо Улуғбек туманидаги кўп қаватли уй подъездида номаълум шахс 7 ёшли қизни қўрқитиб, унга нисбатан жинсий тажовуз қилгани тўғрисида хабар берилган эди. Бу воқеа кўп қаватли уйга ўрнатилган видеокамералар томонидан қайд этилган ва ички ишлар ходимлари А.Х.,ни 24 соат ичида қўлга олган эди.

Nemolchi.uz лойиҳаси жорий йилда педофилия ҳолатлари бўйича ўнлаб ҳодисаларни жамоатчиликка ошкор қилди. NeMolchi.uz - 2017 йилда ташкил этилган мустақил ахборот лойиҳаси бўлиб, у аёлларга нисбатан зўравонликка жамоатчилик эътиборни жалб қилиш ва бу масалага жамиятнинг муносабатини ўзгартиришни мақсад қилганини билдириб келади.

Урганч шаҳридаги 1-оилавий меҳрибонлик уйига берилган - 15, 16, 17 ёшдаги етим қизларнинг 10 ой давомида Хоразм вилояти давлат амалдорлари билан жинсий алоқага мажбурлангани ҳақида биринчи бўлиб NeMolchi.uz хабар қилган эди.

Май ойининг бошларида лойиҳа асосчиси Ирина Матвиенко ўзига нисбатан ўлдириш таҳдиди бўлаётгани ортидан Ўзбекистонни тарк этишга мажбур бўлгани тўғрисида Озодликка маълум қилган. ИИВ 3 май куни Ирина Матвиенкого қилинган таҳдид ўрганилаётгани ҳақида баёнот берди. Аммо шу кунгача ИИВ текшируви натижалари тўғрисида маълумот берилмади.

Ўзбекистон Сенати раисининг биринчи ўринбосари Содиқ Сафоев Озарбайжоннинг Report ахборот агентлигига берган интервьюсида Озарбайжоннинг ҳудудий яхлитликни тиклашдаги ютуқларини олқишлади.

«Биз Озарбайжоннинг барча жабҳалардаги, айниқса, ҳудудий яхлитлик ва адолатни тиклаш йўналишидаги ютуқларидан мамнунмиз. Биз барча қийинчиликларга қарамай Озарбайжон ҳукумати ва халқининг ҳудудий яхлитлигини тиклаш ва ҳимоя қилиш йўлида олиб бораётган адолатли курашини қўллаб-қувватлаймиз ва қатъиятини олқишлаймиз”, - деган Сафоев.

Агентликнинг билдиришича, Сафоевдан интервью Нью-Йоркда олинган. У бу ерга Ўзбекистон делегацияси таркибида БМТ Бош Ассамблеясининг 78- сесиясида иштирок этиш учун келган.

Сафоев Ўзбекистон ва Озарбайжон ўртасидаги ҳамкорлик “мисли кўрилмаган даражага етганини”, ўтган йили президент Илҳом Алиев уч марта Тошкентга келганини таъкидлади. Расмий президент Шавкат Мирзиёевнинг Озарбайжонга август ойида қилган сафари доирасида Қорабоғдаги Фузулий шаҳрида Ўзбекистон томонидан қурилган мактаб ишга туширилганини ҳам эслатиб ўтди.

Бундан аввал Ўзбекистон Ташқи ишлар вазирлиги Тоғли Қорабоғда ўтказилган президент сайловларини тан олмаслигини билдирган эди.

"Ўзбекистон Республикаси дўст Озарбайжон Республикасининг суверенитети ва ҳудудий яхлитлигини қатъий қўллаб-қувватлайди, унинг ички ишларига ҳар қандай аралашувни қоралайди ва 2023 йил 9 сентябрь куни Қорабоғда ўтказилган қўштирноқ ичидаги президент сайловларини тан олмайди", дейилади вазирлик расмий сайтида эълон қилинган баёнотда.

Мазкур сайловни Европа Иттифоқи ҳам тан олмаган эди.

Тан олинмаган Тоғли Қорабоғ республикаси ҳукумати вакиллари 20 сентябрь соат 13:00 дан ўқ отишни тўхтатганини билдирди. Бу маълумотни Озарбайжон Мудофаа вазирлиги тасдиқлади.

19 сентябрда Озарбайжон армияси Тоғли Қорабоғда ҳарбий амалиёт ўтказилишини эълон қилганди. Амалиётдан мақсад “конституциявий тузумни тиклаш” экани айтилган.

20 сентябрда АҚШ Давлат котиби Энтони Блинкен Озарбайжон президенти Илҳом Алиев, кейин Арманистон бош вазири Никол Пашинян билан телефон орқали мулоқот қилгани билдирилди. Суҳбат чоғида Алиев Озарбайжон шартлари бажарилса, Қорабоғдаги “аксилтеррор амалиёт тўхтатилиши”ни айтган.

Тан олинмаган Тоғли Қорабоғ республикаси ҳукумати вакиллари 20 сентябрь соат 13:00 дан ўқ отишни тўхтатганини билдирди. Улар Озарбайжон томонининг барча талабларини бажаришга рози бўлди. Жумладан, қуролланган арман гуруҳлари тарқатиб юборилади. 21 сентябрдан эса Озарбайжоннинг Евлах шаҳрида Озарбайжон ҳукумати вакиллари билан Қорабоғнинг арман жамоасини интеграциялашуви юзасидан музокаралар бошланади. Бу эса келажакда Тоғли Қорабоғнинг барча ҳудуди Баку назоратига ўтишини англатиши мумкин.

Арманистон ва Озарбайжон Тоғли Қорабоғ масаласида ўзаро уруш ҳолатидадир. Халқаро ҳамжамият томонидан Тоғли Қорабоғ Озарбайжон ҳудуди сифатида тан олинади. Бу ҳудуд учун 1988-1994 йиллардаги урушда 30 минг киши ҳалок бўлган. Ўшанда минтақанинг асосий ҳудуди арманлар назорати остига ўтган ва юз минглаб озарбайжонлар ўз уйларини ташлаб чиқиб кетишга мажбур бўлганди.

2020 йилнинг кузида давом этган 40 кунлик уруш натижасида Озарбайжон Тоғли Қорабоғнинг катта қисмини ўзига қайтарди.

Ўзбекистон Энергетика вазирлиги йилига энергетика учун ажратилаётган субсидиялар миқдори 1 миллиард доллардан ошганини ва бу жараён давом этадиган бўлса энергетика соҳасини ривожлантириб бўлмаслигини маълум қилди.

Вазирликнинг расмий сайтида билдирилишича, истеъмолчига 1 киловатт-соат электр энергиясини етказиб бериш таннархи 970 сўмни, бир кубометр газнинг таннархи 1890 сўмни ташкил қилмоқда. Аҳоли эса электр энергиясининг 1 киловаттига 295 сўм, газ учун 380 сўм тўламоқда.

“Агар бир оила ойига ўртача 200 кВт/соат электр энергияси ишлатса, бу абонент учун тўланадиган субсидия ойига 135 минг сўмни, йилига 1,62 миллион сўмни ташкил қилади. Ўзбекистон электр тармоқлари 7,4 миллион абонентга эга”, дейилади расмий билдирувда.

Вазирликнинг таъкидлашича, иситиш мавсумида газнинг ўртача истеъмоли 750 куб метрни ташкил қилади. Бугунги тарифлардан келиб чиқиладиган бўлса мавжуд бўлган газлаштирилган 4,1 миллион хонадоннинг ҳар бирига ажратилаётган субсидия миқдори 1, 132 миллион сўм бўлмоқда.

“Энергетика соҳасига давлат бюджетидан ажратилаётган субсидияларнинг умумий миқдори йилига 14 триллион сўм ёки 1,15 миллиард доллар. Биргина электронергияси учун йилига 11,98 триллион сўм сарфланмоқда”, дейилади вазирлик билдирувида.

Энергетика вазирлигининг мазкур билдируви Ўзбекистон Вазирлар Маҳкамаси 1 октябрдан коммунал хизматлар нархини қайта кўриб чиқиш тўғрисидаги қарорни қабул қилгани ортидан эълон қилинди.

Мазкур қарорга асосан 1 октябрдан тадбиркорлик субъектлари учун электр ва газ нархи қимматлайди. Биринчи ва иккинчи гуруҳга киритилган юридик шахслар 1 киловатт электр учун ҳозирги 450 сўм ўрнига мос равишда 900 ва 1000 сўмдан, газнинг 1 куб метри учун ҳозирги 660 сўм ўрнига 1500 сўмдан 1800 сўмгача ҳақ тўлайди. Аҳоли учун тарифлар эса ҳозирча ўзгаришсиз қолмоқда.

11 сентябрда энергетика вазири Жўрабек Мирзамаҳмудов аҳоли учун 2024 йилдан бошлаб газ ва электр ҳақи ижтимоий нормалар асосида кўтарилиши режалаштирилаётганини билдирган эди.

Ўзбекистонда узоқ йиллардан бери куз ва қиш мавсумида энергетик инқироз кузатиб келинади. Озодлик радиоси электр ва газ таъминотидан норози аҳоли намойишларга чиққани ва йўлларни тўсиб қўйгани тўғрисида ўзининг Zimiston лойиҳасида маълумот бериб келган. Жорий йилда эса энергетик инқироз баҳор ва ёз мавсумларида ҳам юзага келди.

Ўзбекистондан Россия орқали Сурияга кетган ва жангарилар сафига қўшилган бир оиланинг олти аъзоси халқаро қидирувга берилди. Бу ҳақда Тошкент шаҳар Ички ишлар бош бошқармаси маълум қилди.

Хабарда айтилишича, 1969 йилда Тошкент вилоятининг Чиноз туманида туғилган Й.Т., 2014 йилда хотини, уч ўғли ва келини билан Россияга ишлаш учун кетади. Бу ерда у “ижтимоий тармоқларда диний-экстремистик ва террористик ташкилотларнинг ғояларини тарғиб қилувчи турли аудио-видеоматериаллар таъсирига тушиб қолган”.

Тошкент ИИББ маълумотида қайд этилишича, оила бошлиғи Й.Т., муқаддам Жиноят кодексининг 159-моддаси (Ўзбекистон Республикасининг конституциявий тузумига тажовуз қилиш) ва 244-1-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) асосида судланган.

Ички ишларнинг иддао қилишича, “Узейир тоға” лақаби билан танилган Й.Т., ижтимоий тармоқлар орқали ёшларни Сурияга боришга даъват қилган. Ўзи эса оиласи билан Сурияга қочиб ўтиб, у ерда “Тавҳид ва жиҳод” гуруҳида ошпазлик қилади. Унинг оила аъзолари эса террорчилар сафларида жанг қилади.

Сўнгги пайтларда Ўзбекистон ички ишлар органлари Сурияга кетиб жангарилар сафларига қўшилганлар тўғрисида кўплаб маълумотларни бермоқда. Жумладан, сентябрнинг бошларида Тошкент Ички ишлар бош бошқармаси Сурияда “Катибат ул имом ал-Бухорий” халқаро террорчилик ташкилоти асосчиси бўлган Улуғбек Бобомуродов жангларда ҳалок бўлгани ҳақида маълум қилди.

Аммо Озодликда мазкур гуруҳ ва унинг раҳбарлари тўғрисида Тошкент ИИББдан фарқли ўлароқ маълумотлар мавжуд ва улардаУлуғбек Бобомуродов номи қайд этилмайди.

Озодлик радиоси 2014 йилнинг ноябрида “Катибат ул имом ал-Бухорий” гуруҳи "Ислом давлат"и етакчиси Абу Бакр Бағдодийга қасамëд қилгани тўғрисидаги илк маълумотни ёйинлаган эди. Ўшанда гуруҳга Шайх Салоҳиддин тахаллусига эга асли наманганлик Акмал Жўрабоев исмли шахс амирлик қилаётгани айтилганди. 2017 йилнинг майида 47 ёшли Шайх Салоҳиддин Идлибда ўз сафдоши томонидан ўлдирилгани, унинг ўрнини тожикистонлик Абу Юсуф эгаллагани тўғрисида хабар қилинган.

Сурия ва Ироқдаги жангарилар сафларида камида уч минг ўзбекистонлик жанг қилаётгани айтилиб келинади.

Президент Шавкат Мирзиёев Нью-Йорк шаҳрига амалий ташрифи доирасида “Air Products” ширкати раҳбари Сейфи Гасеми билан учрашди. Президент матбуот хизматининг билдиришича, учрашувда АҚШ Давлат котибининг энергетика масалалари бўйича ўринбосари Жеффри Пайетт ҳам иштирок этди.

“Air Products” томонидан Ўзбекистонда “Uzbekistan GTL”да саноат газларини қайта ишлаш, “Навоийазот” негизида синтез-газ, кислород ва азот, суюлтирилган карбонат ангидрид ишлаб чиқариш лойиҳалари амалга оширилмоқда. Сўнгги икки йил давомида бу лойиҳаларга “Air Products” 1 миллиард доллардан зиёд тўғридан-тўғри сармоя киритган.

Учрашувда кўмирни газлаштириш, техник газлар, водород ва аммоний ишлаб чиқариш ҳамда аччиқ газларни утилизация қилиш бўйича истиқболли лойиҳалар кўриб чиқилди.

“Учрашув якунида “Air Products” компаниясининг Ўзбекистон учун қиймати 10 миллиард доллардан зиёд бўлган янги инвестиция дастурини амалга ошириш бўйича келишувлар алмашилди. Ўзбекистон-АҚШ кўп қиррали ҳамкорлигини кенгайтиришга қўшган ҳиссаси ва мамлакатимиздаги ортга қайтмас ислоҳотларни қўллаб-қувватлагани учун Ўзбекистон Республикаси Президенти Шавкат Мирзиёев “Air Products” бошқаруви раиси Сейфи Гасемига шахсан юксак давлат мукофоти – “Дўстлик” орденини топширди”, дейилади расмий хабарда.

БМТнинг Ўзбекистондаги ваколатхонаси Гулнора Каримовадан мусодара қилинган активларни бошқарувчи Uzbekistan Vision 2030 жамғармаси Ўзбекистонда оналар ва болалар ўлимини камайтиришга қаратилган БМТнинг янги лойиҳасини молиялаштириш учун 43,5 млн доллар ажратгани ҳақида билдирди.

Янги дастур UNICEF, UNFPA ва ЖССТ томонидан биргаликда амалга оширилади. Унинг асосий мақсадларидан бири кам вазнли чақалоқларнинг омон қолиш даражасини ҳозирги 75 фоиздан 90 фоизга оширишдир.

“Ишонч” деган ном билан ҳам танилган Uzbekistan Vision 2030 жамғармаси БМТнинг кўп томонлама ҳамкорликдаги траст фонди томонидан бошқарилади. У Гулнора Каримованинг Швейцариядаги жиноят иши жараёнида мусодара қилинган активларини Ўзбекистонга қайтариш учун ташкил этилган.

Ўтган йилнинг август ойида Ўзбекистон ва Швейцария жамғарма орқали 131 миллион долларни қайтариш бўйича келишув имзолаган. Бу маблағ Ўзбекистонда ислоҳотларни жадаллаштириш ва мамлакатдаги БМТ Барқарор ривожланиш дастурларини молиялаштиришга йўналтирилади.

Аввалги президент Ислом Каримовнинг тўнғич қизи Гулнора Каримовага қарши Ўзбекистонда 2013 йили талон-торож ва солиқ тўлашдан бўйин товлаганлик моддалари бўйича иккита жиноят иши очилган. 2015 йили биринчи иш бўйича унинг 5 йилга озодлиги чекланган, 2017 йилдаги иккинчи иш бўйича эса у 10 йилга қамалган. Кейинроқ бу жазо беш йиллик озодликни чеклаш билан алмаштирилган.

2020 йил мартида Тошкент шаҳар суди Каримовани жиноий тил бириктирганлик, товламачалик, ўзлаштириш, ўғрилик, пул ювганлик ва бошқа жиноятларда айбдор деб топиб, 13 йилу 4 ойга озодликдан маҳрум этган. У айни пайтда жазо муддатини Зангиотадаги аёллар қамоқхонасида жазо ўтаяпти.

Швейцария, Франция, АҚШ ва бошқа қатор мамлакатлардаги Гулнора Каримовага алоқадор бўлган мулкларнинг умумий қиймати қарийб 1,4 миллиард долларга баҳоланган. Ўзбекистон ҳукумати мазкур активларнинг бир қисмини қайтариб олишга уриниб келмоқда.

2020 ва 2021 йилларда Ўзбекистон Франциядан 20 миллион долларни қайтаришга муваффақ бўлган. Бу маблағ Париждаги кондоминиум ва 1815 йилда қурилган Château de Groussay қасрининг сотилишидан тушгани айтилган.