Испания суди Каталония мухториятининг ҳокимиятдан четлатилган президенти Карлес Пучдемонни қўлга олишга ордер берди. Бу ҳақда сиёсатчининг ҳуқуқшуноси билдирди.
Аввалроқ Испания прокуратураси Пучдемон ва парламентнинг 4 собиқ депутатини қамоққа олиш учун ордер берилишини сўраган эди.
Мазкур 5 сиёсатчи 2 ноябрь куни судда сўроқ қилиниш учун чақирилган эди. Лекин улар суд чақирувини эътиборсиз қолдирган.
Пучдемон ва унинг сафдошлари Каталония мухториятида 1 октябрда ўтган мустақиллик референдуми ортидан исён кўтарганликда айбланмоқда. Бу иш юзасидан судга жами Каталония ҳукуматининг 14 аъзоси чақирилган эди. Уларнинг 9 нафари 2 ноябрда судга келган.
Судга келган Каталония собиқ расмийларидан 8 нафари ҳибсга олинди. Бир нафар шахс 50 минг евро гаров пули тўлаш эвазига очиқда қолдирилди.
Испания ҳукумати референдумни ноқонуний деб эълон қилган ва Каталонияни ўз бошқаруви остига олган.