Линклар

Шошилинч хабар
22 октябр 2018, Тошкент вақти: 06:24

Farg‘onada ota-onasi Turkiyada ishlayotgan 5 yashar qizcha o‘ldirib ketildi


Bolalarni bog‘chadan kattalar hamrohligisiz uyiga jo‘natgan bog‘cha xodimasining hosizda so‘roq qilingani aytilmoqda.

Fojia 5 fevral kuni Oltiqariq tumani Poloson qishlog‘ida ro‘y berdi. Guvohlarning Ozodlikka aytishicha, bolani bog‘chadan oladigan odam bo‘lmagach, bog‘cha opa uni boshqa bolalarga qo‘shib uyiga jo‘natgan; kechqurun bolaning chavaqlangan jasadi bog‘chadan bir kilometr narida topilgan. Qotillikda gumonlanib bir shaxs hibsga olingan.

Yaqinlarining Ozodlikka aytishicha¸ 5 fevral kuni o‘lik holda topilgan qiz Oltiariq tumanidagi 6-sonli bog‘cha tarbiyalanuvchisi 5 yashar Kibriyo G‘apporovadir.

Kibriyoning yorib tashlangan jasadi 5 fevral oqshomida u boradigan bog‘chadan bir kilometr naridagi temir yo‘l yoqasida topilgan.

Bu haqda qizning qarindoshlaridan biri Ozodlikka gapirib berdi:

- Bolani tanasining o‘ng tomoni qovurg‘asi yorilgan, ayrim qismlari majaqlangan. Bugun janazasi bo‘layapti, - dedi Kibriyoning qarindoshlaridan biri Ozodlikka 6 fevral kuni.

Oltiariq tumanidagi 6-sonli bog‘cha tarbiyachisining Ozodlikka aytishicha, Kibriyoning ota-onalari o‘tgan yil avgust oyida Turkiyaga ishlagani ketishgan, bola buvisi qaramog‘ida qolgan.

Bog‘cha xodimalaridan biri Ozodlik bilan suhbatda shu kuni Kibriyoni olgani hech kim kelmaganini aytdi:

- Uning amakivachchalarining bolalari ham bizni bog‘chada-da. Ular 6 yoshda. Bog‘cha hamshirasi Kibriyoni ularga qo‘shib, o‘zlarini uyiga jo‘natgan. Uylari bog‘chaga yaqin joyda-da. Lekin, bilsak bolalar uyiga etib bormagan. Qidirib-qidirib katta bolalarni topishdi, Kibriyoni topisha olishmadi. Ularning aytishicha, qandaydir velosipedli erkak bog‘chadan chiqishlari bilan qand olib beraman, deb qaergadir olib ketgan. Uzoqroq yurishgach, katta bolalarga sizlar turib-turinglar, biz Kibriyo bilan qand olib kelamiz, deb olib ketgan. Shu bilan qaytmagan. Kechqurun shunaqa bo‘lganini keyin biz eshitdik, - dedi 6-sonli bog‘cha xodimasi.

Ozodlik muxbiri Kibriyoning Turkiyadagi ota-onalariga bog‘landi. Ular Istanbuldagi tekstil fabrikalaridan birida ishlashi, yakkayu-yagona qizining o‘limini eshitib, O‘zbekistonga yo‘lga chiqishgani, hozirda gapira olmasliklarini aytishdi.

Oltiariq tumani prokuraturasi hozir mazkur holat bo‘yicha O‘zbekiston Jinoyat Kodeksining 98-moddasi - "Qasddan odam o‘ldirish" bandi bo‘yicha ish ochib, hodisani tergov qilmoqda.

Jarayon tafsilotlaridan xabardor mahalliy rasmiyning Ozodlikka aytishicha¸ bolalarni kattalar hamrohligisiz uylariga jo‘natib yuborgan bog‘cha hamshirasi ichki ishlar bo‘limida so‘roq qilinmoqda.

Farg‘ona huquq-tartibot idorasi mulozimining Ozodlikka aytishicha, bolalarga qand olib beraman, deb ularni olib ketgan velosipedli erkak ushlangan va u ham hozirda ko‘rsatma bermoqda.

Hozircha qotillik motivlariga oid aniq ma’lumot yo‘q. Huquq-tartibot idoralaridagi Ozodlik manbasiga ko‘ra, ekspertiza qizning zo‘rlanmagani, tana a’zolari ham olinmaganini ko‘rsatgan.

Tergovchilar qizni poezd bosib ketgan, degan farazlarni ham o‘rganmoqda.

Ozodlik voqea tafsilotlarini o‘rganishda davom etadi.

XS
SM
MD
LG