Линклар

Шошилинч хабар
21 январ 2020, Тошкент вақти: 01:54

Ўзбекистон хабарлари

Бош вазир Абдулла Арипов Абдулла Қодирий ҳовлисида боғ музей қуришни ваъда қилди

Ëзувчи Абдулла Қодирий.

20 февраль куни ўзбек романчилигининг асосчиси Абдулла Қодирий авлодлари яшаб келаëтган ҳовлига борган Бош вазир Абдулла Арипов¸ бу ерда ëзувчи хотирасига бағишланган боғ-музей ташкил этишни ваъда қилган.

Бу ҳақда BBC ўзбек хизматига ëзувчининг набираси Хондамир Қодирий маълум қилди.

Айтилишича¸ Абдулла Қодирийнинг машҳур айвонли уйи қурилган ҳудуднинг умум майдони бир гектарга яқин ва бу ерда ëзувчининг авлодилари бўлган 10 дан ошиқ оила яшайди.

Бош вазир бу оилаларга бошқа уй-жой ажратиб¸ Қодирий ҳовлисида боғ-музей ташкил этиш ғоясини қўллашини билдирган.

19 феврал куни ЎзА агентлиги Маданият вазирлиги “катта маблағ” талаб этилиши важи билан ўзбек адабиётининг буюк вакили Абдулла Қодирий уй - музейини ташкил этишдан воз кечиб келаëтганини хабар қилган эди.

Агентликнинг ёзишича, Маданият вазирлиги Абдулла Қодирий уй музейини ташкил этиш илтимоси билан Қодирийлар авлодидан 25 нафар киши имзо чеккан мактубга: “Уй-музейи ташкил қилиш учун уй ҳудудини асл ҳолатига келтириш керак, бу эса, ўз навбатида, катта маблағни талаб этади... Шунингдек, уй-музейи ташкил этиш учун А.Қодирийнинг оила аъзоларини бошқа уй-жой билан таъминлаш масаласи Маданият вазирлигининг ваколат доирасига кирмаслигини ва бу масала Тошкент шаҳар ҳокимлиги томонидан ҳал этилиши мумкинлигини маълум қиламиз”, деб жавоб берган.

Адибнинг невараси Хондамир Қодирийнинг маълумот беришича, Адабиёт музейида Қодирийга тегишли экспонатлар мавжуд бўлиб, Қодирий уй-музейи ташкил этилса бу ёдгорликлар адиб ҳовлисига қайтарилади. Уйда ҳозирда авлодлар томонидан адибга тегишли бўлган бир-қанча буюмлар сақланмоқда.

Кун янгиликлари

Арипов ўз ҳукумати истеъфосини эълон қилди. Ариповнинг қайта Бош вазир этиб сайланиши кутилмоқда

Техник истеъфосини эълон қилган Бош вазир Абдулла Ариповнинг яна Бош вазирликка сайланиши кутилмоқда.

Янги сайланган Ўзбекистон Олий мажлиси Қонунчилик палатаси ва Сенатининг 20 январь кунги илк қўшма мажлисида Абдулла Арипов ўз ҳукумати истеъфосини тақдим этди.

Сенат расмий сайтида берилган тонгги хабарда ялпи мажлис кун тартибига Ўзбекистон Республикаси Вазирлар Маҳкамасининг ўз ваколатларини зиммасидан соқит қилиши тўғрисидаги масала ҳам киритилгани айтилган эди.

Қонунчиликка кўра¸ янги сайланган парламентда кўпчилик ўринни эгаллаган партия Бош вазирликка ўз номзодини қўяди. Янги парламент тасдиғидан ўтган Бош вазир шундан сўнг янги ҳукумат тузишни бошлайди.

2016 йилдан бери Шавкат Мирзиëев ҳукуматини бошқариб келган Абдулла Арипов 22 декабрь кунги сайловларда кўпчилик овоз қозонган ЎзЛиДеп вакили ва унинг яна қайта Бош вазирликка тасдиқланиши кутилмоқда.

Айни пайтда¸ янги ҳукумат таркибида айрим жузъий ўзгаришлар бўлиши тахмин қилинмоқда.

Мирзиëев Ўзбекистоннинг ЕОИИга ҳозирча кузатувчи мақомида киришини билдирди

Мирзиëев ҳокимиятга келганидан кейин Ўзбекистонда Россиянинг йирик лойиҳаларини амалга ошириш жараëни бошланди. Хусусан¸ Ўзбекистонга келган Путин Мирзиëев билан Навоийда АЭС қурилиши лойиҳасини мажозий тугмани босиш орқали бошлаб берди.

Янги сайланган Олий Мажлис Сенатининг биринчи мажлисида сўзга чиққан Шавкат Мирзиëев Евроосиё иқтисодий иттифоқига Ўзбекистоннинг жорий йил аъзо бўлиши ҳақидаги муҳокамаларга муносабат билдирди.

Мирзиëев ўз чиқишида ЕОИИ га қўшилиш эҳтиëжини Қозоғистон ва Россияда ишлаëтган миллионлаб меҳнат муҳожири манфаатини ҳимоялаш ва Ўзбекистон иқтисодини риивожлантириш учун зарур миллиардлаб доллар билан изоҳлаган.

Айни пайтда Мирзиëев 20 январь кунги чиқишида мустақил кузатувчиларнинг Россия етовидаги бу сиëсий гуруҳга қўшилиш Ўзбекистон мустақиллигини бой беришга олиб келиши ҳақидаги хавотирларини рад қилишга уринган.

“Мустақилликни бировга бериб қўяди, деган хомхаёл гаплар ҳою-ҳавас гаплар. Ким бериб қўяди мустақилликни?”¸ деб иқтибос келтирди Мирзиëевдан маҳаллий нашрлар.

Президентга кўра¸ Ўзбекистон ЕОИИга аввалига кузатувчи мақомида қўшилиб¸ “нима яхши, нима ёмонлигини кузат”гандан кейин аъзолик борасида қарор беради.

«Бир нарсага амин бўлинглар, ҳамма қилган ҳаракатларимиз миллатимиз манфаати, иқтисодиётимизнинг эртанги куни учун. Иқтисодиётимизни барқарор қилиш учун ҳам бизга ҳозир 50 миллиард доллар керак. Бугун оғир, таҳликали замонда яшаяпмиз. Тўғри йўлни топиш узоқ, лекин шунга интилиш керак»¸ деган Сенатдаги чиқишида Шавкат Мирзиëев.

Тошкент прокуратураси дизайнер Григоряннинг рашк эмас¸ босқинчилик қурбони бўлганини билдирди

Нариман Григорян — таниқли ўзбек дизайнери, хореографи, «Тодес» гуруҳи биринчи таркибининг собиқ аъзоси, халқаро кўргазмалар, танловлар ва фестиваллар иштирокчиси бўлган.

Тошкент шаҳар прокуратурасининг ўта оғир жиноятларни тергов қилиш бўлими бошлиғи Анвар Ўрмонов ва бу ишга алоқадор терговчилар таниқли модельер ва дизайнер Нариман Григорян ўлимига оид айрим янги тафсилотларни очиқлади.

Кун.уз нашри 20 январь куни иқтибос келтирган прокуратура ходимлари Григоряннинг рашк эмас¸ балки оддий ўғрилик қурбони бўлганини айтган.

«Сўроқ пайтида гумонланувчи Нариман Григорян деб танилган Наримон Алимжоновни унинг пули ва баъзи моддий бойликларига эга бўлиш мақсадида ўлдирганини айтди. Қотил 625 АҚШ доллари, Iphone телефони ва қулоқчинлари, электрон сигарет ва Каптива автомобили калитини олиб кетган», - деган жумладан маҳаллий нашрга Тошкент шаҳар прокуратурасининг ўта оғир жиноятларни тергов қилиш бўлими бошлиғи ўринбосари.

Терговчилар таъкидича¸ жиноят изларини яшириш мақсадида айбланувчи Григорян хонадонига ўт қўйган.

Тошкент шаҳар прокуратураси 14 январь куниëқ қотилликда гумонланаëтган шахснинг қўлга олингани ва унга нисбатан Жиноят Кодексининг 97-моддаси 1-қисми (қасддан одам ўлдириш) билан жиноят иши қўзғатилганини билдирган эди.

Янги парламент депутатлари Мирзиëевни мукофотлаш таклифини қарсаклар билан қарши олди

Шавкат Мирзиëев 22 декабрь кунги парламент сайловларида овоз бермоқда.

20 январь куни Ўзбекистон Олий мажлиси Қонунчилик палатасининг янги сайланган депутатлари ўз илк мажлисини бошлади.

Мажлисда бевосита қатнашган маҳаллий мухбирларнинг билдиришича¸ 84-Тўйтепа сайлов округидан сайланган депутат Виктор Пак “мамлакатда улкан ўзгаришлар амалга оширилгани, энг узоқ қишлоқларгача янги ҳаёт кириб бораётгани”ни таъкидлаб¸ бу ўзгаришлар учун президент Шавкат Мирзиëевни тақдирлаш таклифини ўртага қўйган.

Бу таклифини “140 мингдан зиёд сайловчиси хоҳиш-иродаси ифода”си сифатида тақдим этган депутат Мирзиëевга давлат мукофоти беришни сўраган ва бу таклиф депутатларнинг гулдурос қарсаклари билан қарши олинган.

Овозга қўйилса¸ якдиллик билан қабул қилиниши кутилган бу таклифни Шавкат Мирзиëев “камтарлик билан рад этган”.

Халқимиз менга энг катта унвон бериб бўлган. Бундан юксак унвон бўлмаса керак. Бу – халқ ишончи!”¸ деб иқтибос келтирди Мирзиëевдан маҳаллий нашрлар.

Марказий Осиëнинг авторитар раҳбарлари ижроия ҳокимияти назоратида бўлган парламент ва турли кенгашлар воситасида ўзларига давлатнинг энг олий мукофотлари ва турли мақомлар беришни урф қилган.

Хусусан¸ Туркманистон ва Тожикистон президентларига миллий парламентлар ташаббуси билан "аркадаг" ва "миллат пешвоси" деган махсус мақом берилган бўлса¸ Қозоғистоннинг биринчи президенти Нурсултон Назарбоевга "элбоши" титули берилган.

Олий Мажлис Қонунчилик палатасида спикер ва ўринбосарлари сайланди

Иллюстратив сурат.

Душанба, 20 январь куни Тошкентда Олий Мажлис Қонунчилик палатасининг илк мажлиси очилди. Унда депутатлар палата спикери, унинг биринчи ўринбосари ва ўринбосарларини сайладилар.

Маҳаллий нашрлар хабарига кўра, Олий Мажлис Қонунчилик палатаси спикерлигига бир овоздан Нурдинжон Исмоилов сайланган. Палатада янги таъсис этилган спикернинг биринчи ўринбосари лавозимига эса ҳуқуқшунос Акмал Саидов сайланган.

Шунингдек, мажлисда Актам Хаитов, Алишер Қодиров, Наримон Умаров, Борий Алихонов ҳамда Улуғбек Иноятов спикернинг ўринбосарлари этиб сайланганлар.

Қонунчилик палатасининг илк мажлисида Ўзбекистон президенти Шавкат Мирзиёев ҳам иштирок этмоқда.

Фармацевтика институти ректори оламдан ўтди

Сурат pharmi.uz сайтидан олинган.

Тошкент фармацевтика институти ректори, тиббиёт фанлари доктори, профессор Иброҳим Алимджанов 61 ёшида вафот этди.

Бу ҳақда Соғлиқни сақлаш вазирлиги матбуот хизмати маълум қилади.

Хабарларга кўра, фармацевтика институти ректори 19 январга ўтар кечаси вафот этган.

И.Алимджанов 1959 йилда Андижон шаҳрида туғилган.1982 йилда Ўрта Осиё педиатрия тиббиёт (ҳозирги Тошкент педиатрия тиббиёт) институтини тамомлаб, Андижон шаҳар 2- болалар шифохонаси врач интерни, ординатори, даволаш ишлари бўйича бош врач ўринбосари, кейинчалик Андижон давлат тиббиёт институти кафедра ассистенти, доценти ва кафедра мудири лавозимларида фаолият кўрсатган.У 2012-2018 йилларда мазкур институт ўқув ишлари бўйича проректори ва ректори вазифасида ҳам ишлаган.

И.Алимджанов 2018 йилдан Тошкент фармацевтика институти ректори сифатида фаолият кўрсатиб келаётган эди.

Навоий вилоятида БАА ширкати шамол электр станцияси қуради

Иллюстратив сурат.

Ўзбекистоннинг Навоий вилоятида 400 МВт қувватга эга шамол электр станциясини қурилади. Бунга оид келишув 18 январь куни Инвестиция ва ташқи савдо вазирлигида дунёдаги энг йирик Mubadala инвестиция холдингининг (БАА) Masdar ширкати билан имзоланган.

Вазирлик хабарномасида қайд этилишича, мазкур келишувга мувофиқ, Masdar компанияси шамол электр станциясини лойиҳалаштириш, молиялаштириш, қуриш ва эксплуатация қилишни амалга оширади.

Қурилиш учун инвестициялар ҳажми 600 млн доллар миқдорида баҳоланмоқда. Қурилиш ишлари 2020 йилнинг учинчи чорагида бошланади. Объектни эса 2022 йилда фойдаланишга топшириш режалаштирилган.

U-23: Ўзбек футболчилари ярим финалга чиқди

Иллюстратив сурат.

Ўзбекистон олимпия терма жамоаси U-23 Осиё чемпионати чорак финалида Бирлашган Араб Амирликлари терма жамоасига қарши майдонга тушиб, 5:1 ҳисобида ғалабага эришди.

Бу ғалаба Ўзбекистон жамоаси учун ярим финалга йўл очди. Эндиликда ўзбек футболчилари Саудия Арабистони ўйинчиларига қарши майдонга тушишлари керак.

Осиё чемпионатида финалга чиққан икки жамоа ва учинчи ўрин эгаси Токиода бўлиб ўтадиган Олимпиадада иштирок этиш имкониятини қўлга киритади.

ИИВ вазири АҚШ элчиси билан ўзаро ҳамкорлик масалаларини муҳокама қилди

АҚШнинг Ўзбекистондаги элчиси Даниэл Розенблюм.

Ўзбекистонлик экспертлар АҚШга танишув ташрифи билан боришлари мумкин. Бу масала 17 январь куни Тошкентда ички ишлар вазири Пўлат Бобожонов ҳамда АҚШнинг Ўзбекистондаги элчиси Даниэл Розенблюм ўртасида бўлиб ўтган учрашув чоғида муҳокама қилинган.

Ички ишлар вазири Пўлат Бобожонов.
Ички ишлар вазири Пўлат Бобожонов.


“Бу каби ташрифлардан кўзланган мақсад АҚШнинг ҳуқуқ-тартиботни сақлаш, уюшган жиноятчиликка қарши кураш, одам савдоси билан боғлиқ жиноятларни очиш борасидаги иш услубини ўрганишдан иборат бўлиб, эксперт-криминалистик бўлинмалари учун кадрларни тайёрлаш, соҳани замонавий жиҳозлар билан таъминлашга кўмаклашиш каби масалаларни ҳал этишдир”, дейилади вазирлик хабарномасида.

Қайд этилишича, учрашувда америкалик дипломат элчихона номидан Ўзбекистон Республикаси Ички ишлар вазирлиги билан ҳамкорликни ривожлантиришга ўз ҳиссасини қўшишини урғулаган.

МБ мулозими олтин алмашув курси барқарорлигини таъминлаш учун сотилганига оид иддаоларни рад қилди

Иллюстратив сурат.

Ўзбекистон Марказий банкининг биринчи ўринбосари Илҳом Норқулов нима учун МБ 2019 йили 4 миллиард долларлик олтин сотганига изоҳ берди. Мулозимнинг изоҳига ўтган йили Марказий банк олтинни экспорт қилиш орқали алмашув курси барқарорлигини таъминлагани ҳақидаги хабар ижтимоий тармоқлар фойдаланувчилари томонидан кенг муҳокама қилингани сабаб бўлган.

И. Норқуловга кўра, Марказий банк алмашув курси барқарорлигини таъминлаш учун олтин сотмайди.

“Нега кўпроқ олтин сотдик? Негаки, биз ташқи бозордаги ҳолатдан ҳам келиб чиқамиз. Яъни нарх қулайроқ шаклланаётган бўлса, маълум маънода олтинни кўпроқ сотишимиз мумкин. Нарх ноқулай шаклланаётган бўлса кутиб турамиз. Бунда Марказий банк таҳлилчиларининг прогнозлари бизга қўл келади. Олтинни сотишдан келиб тушган пул валюта бозорида сотилишини англатмайди. Яъни бизнинг олтин сотиш операцияларимиз олтин-валюта захираларини самарали бошқариш вазифаларидан келиб чиқиб амалга оширилади”, деган МБ биринчи ўринбосари Илҳом Норқулов ЎзАга.

Мулозимга кўра, 2019 йили Ўзбекистонда олтин-валюта захиралари 28,6 миллиард долларни ташкил этган. И.Норқулов иддаосича, ўтган йили олтин-валюта захиралари 2 миллиард доллардан зиёдроққа ошган, МБ эса йил давомида алмашув курсини қўллаб-қувватлаш учун мавжуд захираларни ишлатмаган.

Маълумотларга кўра, Ўзбекистон 2018 йили 70 тонна, 2019 йилда 110 тонна олтин экспорт қилган.

Ядро хавфсизлиги конвенциясига қўшилиш тўғрисидаги лойиҳа муҳокамага қўйилди

Иллюстратив сурат

Ўзбекистон президентининг "Халқаро шартномага қўшилиш тўғрисида"ги қарори лойиҳаси муҳокамага қўйилди.

Regulation.gov.uz сайтига 17 январь куни қўйилган ҳужжатда Ўзбекистоннинг Ядро хавфсизлиги тўғрисида 1994 йили имзоланган Вена Конвенциясига қўшилиши кўзда тутилган.

Лойиҳани Саноат хавфсизлиги давлат қўмитаси ишлаб чиққан ва айни қўмита халқаро шартномани амалга оширишда ваколатли орган этиб белгиланган.

Қарор лойиҳасида Вазирлар Маҳкамаси ҳамда тегишли вазирлик ва идораларнинг раҳбарлари халқаро шартнома кучга киргандан кейин унинг қоидалари бажарилиши устидан белгиланган тартибда назоратни таъминлаши қайд этилган.

Қарор муҳокамаси 1 февраль куни якунига етади.

2018 йилнинг 8 сентябрида Россия ҳукуматининг ўша кездаги раиси Дмитрий Медведев ва Ўзбекистон бош вазири Абдулла Арипов атом электр станциясини қуриш тўғрисида келишув имзолаган.

"Келишув лойиҳаси Ўзбекистон ҳудудида атом электр станциясини лойиҳалаштириш ва қуриш, шунингдек, ишга тушириш ва фойдаланишда ҳамкорликни кўзда тутади. Россия лойиҳаси бўйича барпо этиладиган атом электр станцияси сув-сувли энергетик реактор асосидаги ҳар бирининг қуввати 1,2 ГВт бўлган икки энергоблокдан иборат бўлади”, дейилганди бу келишув ҳақидаги расмий хабарда.

2018 йилнинг 19 октябрида Ўзбекистонга келган Россия президенти Владимир Путин ва Шавкат Мирзиёев Жиззахда АЭС қурилишининг рамзий тугмасини босиб, бу қурилишга старт берган.

“Росатом” бош директори Алексей Лихачев "Россия 1" телеканалига берган интервьюсида Ўзбекистонда АЭС пойдеворини қуриш ишлари 2020-2021 йилларда бошланиши режалаштирилганини билдирган.

Ўзбекистон Энергетика вазири Алишер Султоновга кўра, АЭС ҳар бири 1 200 МВт қувватга эга «3+» авлодидаги 1200-сув энергетик реакторли энергоблокдан иборат бўлади. Биринчи энергоблок 2028 йилгача, иккинчиси 2030 йилгача ишга туширилиши айтилган.

Ҳануз жамоатчиликка бу лойиҳанинг якуний нархи қанча бўлиши, бу маблағнинг қаердан олиниши, Россия билан АЭС қуриш келишувининг иқтисодий ва хавфсизлик шартлари қандай экани ҳақида тўлиқ маълумот берилмади.

Мажбурий ижро бюроси қоидабузар ҳайдовчилардан 41 млрд. пул ундирди

Мажбурий ижро бюроси (МИБ) Тошкент шаҳрида 8 минг 553 та машинани жарима майдончасига жойлаб, уларнинг ҳайдовчиларидан 41 миллиард 142 миллион сўм жарима ундирди.

Daryo.uz нашрининг, МИБ матбуот хизматига таяниб хабар қилишича, бюро Тошкент шаҳар ИИББ Йўл ҳаракати хавфсизлиги бошқармаси билан ҳамкорликда пойтахтда рейд ўтказиб келмоқда.

Маълум қилинишича, 2019 йилнинг 11 июнидан 31 декабрига қадар жами 136 минг 627 қоидабузар ҳайдовчи аниқланган.

"Ҳайдовчилар ихтиёрий – 60 кун муддатда жарималарни тўламагани оқибатида, МИБ 48 071 та қоидабузарлардан 15 миллиард 979 миллион сўм ундирган", деб хабар қилади агентлик.

МИБ Ўзбекистон Бош прокуратураси қошида тузилган бошқармадир.

Бу бошқарма мамлакат бўйлаб жаримага тортилган ёки мажбурий тўловларини тўламаётган аҳолидан тўловларни мажбуран ундиришга масъул қилинган.

Тўловларни мажбуран ундириш жараёнида ташкилот ходимларининг аҳоли билан зиддиятга кираётгани, айрим ҳолларда, иш тортишув ва муштлашувга айланиб кетаётгани ҳақида Озодликка кўплаб шикоятлар келган.

Ижтимоий тармоқларда кузатилишича, эндиликда МИБ ходимларининг ҳайдовчилардан жарималарни ундириш жараёнига қўшилгани ортидан, жарима майдончалари ёхуд кўчаларда ҳайдовчилар билан тортишувлар келиб чиқмоқда.

Т. Норбоева "Йил одами", АОКА ва Мусулмонлар идораси "намунали ташкилот" деб топилди

ЎзА миллий ахборот агентлиги 2019 йилдаги энг фаол давлат арбоблари ва ташкилотлари танлови натижаларини эълон қилди.

Агентлик ижтимоий тармоқлар ва ўз веб-ресурслари ёрдамида ўтказган танлов натижасида аниқланган ғолиблар Тошкентдаги Зарафшон концерт залида тақдирланди.

Жума кунги тадбирдан Gazeta.uz нашри мухбирининг хабар қилишича, Олий Мажлис Сенати раиси Танзила Норбоева "Ўзбекистондаги энг фаол давлат арбоби - Йилнинг энг яхши одами" номинациясида ғолиб чиққан.

Очиқлиги ва принципиал позицияси учун депутат Расул Кушербаев "Халқ дардини кун тартибига қўя олган депутат", деб топилган.

- "Энг намунали вазирлик" Адлия вазирлиги,

- "2019 йилнинг энг намунали ҳудуди" Самарқанд вилояти,

- "Энг намунали давлат ва жамоат ташкилоти" Давлат хизматлари агентлиги, ундан кейин Ахборот ва оммавий коммуникациялар агентлиги ҳамда Ўзбекистон мусулмонлари идораси,

- "2019 йилда энг кўп ўзгариш қилган вазирлик" Олий ва ўрта махсус таълим вазирлиги,

- "2019 йилда халқ ишончини қозонган банк тизими" "Агробанк" акциядорлик тижорат банки,

- "Журналистлар билан энг яхши муносабат ўрнатган матбуот хизмати" Инновацион ривожланиш вазирлиги, деб эътироф этилган.

Танлов ғолибларини аниқлашда ЎзА овоз бериш учун ижтимоий тармоқлардан фойдаланган, овоз бериш натижасида сараланган номзодлар эса журналистлар ва блоггерлар томонидан баҳоланиши натижасида ғолиб, деб эълон қилинган.

А.Арипов: Ўзбекистон газ экспортини 2025 йилга бориб тўхтатмоқчи

Бош вазир Абдулла Арипов Ўзбекистон 2025 йилга бориб, газ экспортини тўхтатмоқчи эканлиги ҳақида гапирди.

Ўзбекистон Либерал-демократик партияси Сиёсий Кенгашининг 18 январь куни бўлиб ўтган Тошкентдаги мажлисида бу ҳақда гапирган Абдулла Арипов, газни қайта ишлаш ва газни қўшимча қийматда қайта ишлаб чиқаришни кўпайтиришни режалаштираётганини айтди.

"2025 йилга бориб табиий газ экспортини тўхтатиш ва мамлакат ичкарисида уни тўла қайта ишлаш, шунингдек қўшимча қийматдаги газ маҳсулотларини ишлаб чиқаришни кенгайтириш чоралари кўрилади", деди Бош вазир.

Абдулла Арипов электр энергияси ишлаб чиқаришда муқобил энергия турларидан фойдаланишга алоҳида эътибор берилишини, 2020 йил охиригача барча истеъмолчиларга газ ва электр ҳисоблагичлар қўйилиши тугатилишини айтди.

Газета.уз хабарига кўра Ўзбекистон 2018 йилда 13 миллард куб метр газ экспорт қилган, 2019 йилда эса 15 миллард куб метрга шартнома имзолаган.

Ўзбекистонликлар табиий газга бой мамлакатда аҳолига газ берилмаётганидан шикоят қилиб келади.

Ўзбекистонда янги авиакомпания ташкил этилади

Ўзбекистон Бош вазири Абдулла Арипов 2020 йилда давлатга қарашли Humo Air авиакомпанияси ташкил этилишини эълон қилди, унинг тарифлари амалдагидан анча арзон бўлади.

Бу ҳақда хабар берган "Газета.уз" сайтига кўра, Абдулла Арипов авиация саноатида рақобат муҳитини яратиш учун янги давлат авиакомпанияси ишга туширилишини айтган.

"Мазкур авиакомпания томонидан дастлаб республикамиз ичида, яна қайтариб ўтаман - ичида амалдагидан анча арзон нархларда мунтазам авиарейслар қатновини амалга ошириш масаласини муҳтарам президентимиз ҳукуматимиз олдига кескин қўйди ва буни мен ўйлайманки, 2020 йилда биз уни, албатта, ташкиллаштириб, бажарамиз", деган Абдулла Арипов.

Ўзбекистонликлар мамлакатда "Ўзбекистон ҳаво йўллари" компаниясининг рақобатчиси йўқлиги сабаб, ички ва ташқи йўналишларда авиачипталарнинг қўшни давлатларга қараганда анча қиммат эканлигидан шикоят қилиб келадилар.

O‘zLiDeP Абдулла Арипов номзодини Бош вазирликка кўрсатди

Ўзбекистон Либерал-демократик партияси Сиёсий Кенгашининг 18 январь куни бўлиб ўтган Тошкентдаги мажлисида Бош вазир лавозимига Абдулла Арипов номзоди кўрсатилди.

Бу ҳақда O‘zLiDePнинг расмий сайтида хабар берилган.

Ўзбекистон Либерал-демократик партияси Олий Мажлис Қонунчилик палатасига сайловларда 150 ўриндан 53тасини қўлга киритган.

Қонунчиликка кўра, Абдулла Арипов номзодини президент кўриб чиқиши ва сўнгра Олий Мажлиснинг парламенти ва Сенати тасдиқлаши керак.

59 яшар Абдулла Арипов 2016 йилдан буён Ўзбекистон Бош вазири лавозимини эгаллаб келади.2002 йилдан 2012 йилгача Бош вазир ўринбосари ва 2005-2009 йилларда параллел равишда Алоқа ва ахборотлаштириш агентлиги раҳбари бўлиб ишлаган.

Абдулла Арипов 2012 йили айнан шу лавозимдан, телекоммуникация соҳасидаги коррупция жанжали ортидан, ишдан олинган эди.

Мирзиёев иқтидорга келганидан сўнг, 2016 йилнинг 13 сентябрида Арипов Абдулла Ниғматович Ўзбекистон Республикаси Бош вазирининг ўринбосари этиб, кейин эса Бош вазир этиб тайинланган эди.

Ўзбекистон Жаҳон банки билан янги узоқ муддатли стратегияни ишлаб чиқмоқчи

Жаҳон банки вице-президенти Сирил Мюллер.

Президент Мирзиёев 17 январь куни Жаҳон банки вице-президенти Сирил Мюллер бошчилигидаги делегацияни қабул қилди.

Давлат раҳбари матбуот хизматининг хабар қилишича, учрашувда икки томонлама ҳамкорликнинг долзарб масалалари ва устувор йўналишлари муҳокама қилинган.

"Муҳим тармоқларда, жумладан, қишлоқ хўжалиги, энергетика, нефть-газ тармоғи, транспорт ва бошқа соҳаларда ислоҳотларни давом эттиришга кўмакни кенгайтириш ҳамда қашшоқликка қарши курашиш борасида қўшма лойиҳаларни амалга ошириш масалаларига алоҳида эътибор қаратилди. Ўзбекистон ва Жаҳон банки ўртасидаги шериклик бўйича янги узоқ муддатли стратегияни ишлаб чиқишга келишиб олинди" дейилган расмий хабарда.

Президент матбуот хизматига кўра, Жаҳон банки гуруҳи Ўзбекистонда ижтимоий-иқтисодий ислоҳотларнинг янги дастурини амалга оширишда стратегик шерикдир.

"Банк экспертлари Ўзбекистонда қишлоқ ва сув хўжалиги, геология, банк-молия ва солиқ, таълим соҳаларида модернизация ишларини самарали амалга оширишга доир таклифларни ишлаб чиқишда, инвестиция ва ишбилармонлик муҳитини такомиллаштириш ҳамда бошқа устувор йўналишларда фаол иштирок этмоқда. Бугунги кунда Жаҳон банки томонидан Ўзбекистонда амалга оширилган ва давом эттирилаётган лойиҳаларнинг қиймати 5,5 миллиард долларни ташкил этади" дейилган расмий хабарда.

Ўзбекистон ва Жаҳон банки ўртасидаги шериклик бўйича янги узоқ муддатли стратегияни ишлаб чиқишга келишиб олингани хабар қилинди.

Саратовдаги автоҳалокатда нобуд бўлган ва жабрланганлар шахси маълум қилинди

Иллюстратив сурат.

Ўзбекистон Республикаси Фавқулодда вазиятлар вазирлиги 16 январда Россиянинг Саратов области ҳудудида содир бўлган автоҳалокатда нобуд бўлганлар ва жароҳат олганлар рўйхатини эълон қилди.

Вафот этган Ўзбекистон Республикаси фуқаролари:

Болтабаев Нодир, 1979 й.т. (Фарғона вилояти Қувасой шаҳрида истиқомат қилган).
Собиров Сардорбек, 1997 й.т. (Фарғона вилояти Боғдод туманида истиқомат қилган).

Тан жароҳати олган Ўзбекистон Республикаси фуқаролари:

Мухамедова Гулором, 1968 й.т. (Самарқанд вилояти Самарқанд шаҳрида истиқомат қилади).
Ибатов Суннат, 1989 й.т. (Қашқадарё вилояти, Қарши шаҳрида истиқомат қилади).
Баллиев Иса, 1998 й.т. (Қорақалпоғистон Республикаси Хўжайли туманида истиқомат қилади).

"Ўзбекистон Республикаси ва Россия Федерацияси Фавқулодда вазиятлар вазирликлари ҳамда Ташқи ишлар вазирлиги, унинг ҳудудий консуллик хизмати ходимлари томонидан воқеага аниқлик киритиш мақсадида, ўзаро маълумотлар алмашинуви олиб борилди" дейилган расмий хабарда.

16 январь куни маҳаллий вақти билан соат 08:20да «Нижний Новгород-Арзамас-Саранск-Исса-Пенза-Саратов» автомобиль йўлининг 580 килметрида «Волга-ГАЗ-3110» автомобили ҳамда HYUNDAI минивен автомобили иштирокида йўл-транспорт ҳодисаси содир бўлган.

Оқибатда, жами 9 киши тан жароҳати олган. Шулардан 4 нафари воқеа жойида вафот этган. Уларнинг икки нафари Ўзбекистон фуқароси бўлган. Шунингдек, 5 киши турли даражадаги тан жароҳатлари билан Саратов шаҳар вилоят клиник касалхонасига ётқизилган. Уларнинг 3 нафари ўзбекистонлик.

Мазкур ҳолат юзасидан ҳуқуқни муҳофаза қилувчи органлари томонидан терговолди суриштирув ишлари олиб борилмоқда. Шунингдек, вафот этган фуқароларнинг қариндошларига хабар бериш ва жасадларини «Ўзбекистон ҳаво йўллари» МАК авиатранспорти орқали Ўзбекистонга олиб келиш ҳамда тан жароҳати олган фуқароларга тегишли тиббий ёрдам кўрсатиш бўйича ҳамкорликда ишлар олиб борилмоқда, дейилади ФВВ маълумотида.

ЖБ Ўзбекистондаги аэропортларнинг модернизация қилинишига кўмаклашади

Жаҳон банкининг Европа ва Марказий Осиё давлатлари бўйича вице-президенти Сирил Мюллер.

Жаҳон банки Ўзбекистонда аэропортлар инфратузилмасини модернизациялаш бўйича лойиҳаларни амалга оширишда иштирок этишга тайёр. Бу ҳақда Жаҳон банкининг Европа ва Марказий Осиё давлатлари бўйича вице-президенти Сирил Мюллер 16 январь куни Тошкентда Ўзбекистон Республикаси Бош вазирининг биринчи ўринбосари — транспорт вазири Очилбой Раматов билан учрашув чоғида билдирган.

Транспорт вазирлиги ахборот хизматининг маълум қилишича, учрашувда Ўзбекистон билан Жаҳон банки ўртасидаги узоқ муддатли ва ўзаро манфаатли ҳамкорликни янада мустаҳкамлаш, мамлакатда ушбу банк билан ҳамкорликда устувор тармоқларда амалга оширилиши режалаштирилган лойиҳалар муҳокама қилинган.

Жаноб Мюллер Жаҳон банки шу вақтга қадар Ўзбекистонда асосан автомобиль йўллари қурилиши соҳасидаги лойиҳаларни амалга оширишга молиявий кўмак кўрсатиб келганини таъкидлаб ўтган ҳамда эндиликда ЖБ бу мамлакатда аэропортлар инфратузилмасини модернизациялаш бўйича лойиҳаларни амалга оширишда иштирок этишга тайёрлигини маълум қилган.

Энергетика вазирлиги электр таъминотидаги узилишларни ИЭСдаги носозлик билан боғлади

Талимаржон иссиқлик электр станцияси.

Ўзбекистон Энергетика вазирлиги республиканинг айрим ҳудудларида кузатилаётган электр энергиясидаги узилишларни “Талимаржон иссиқлик электр станцияси”нинг электр энергияси ишлаб чиқаришга мўлжалланган қурилмасида юзага келган носозлик билан боғлади.

Вазирлик матбуот хизматига кўра, носозлик бартараф этилгач, электр таъминоти яхшиланади.

Энергетика вазирлиги вакилларининг “Газета.uz”га маълум қилишича, электр таъминотидаги узилишлар барча вилоятларда кузатилаяпти. Вилоятларнинг ҳаммаси ягона тармоққа улангани учун тармоқдаги зўриқиш туфайли юзага келган узилишлар барчага баробар таъсир кўрсатмоқда.

Саратовдаги автоҳалокатда икки ўзбекистонлик ҳаётдан кўз юмди

Иллюстратив сурат.

Россиянинг Саратов шаҳри яқинида содир бўлган автоҳалокатда икки ўзбекистонлик нобуд бўлди, яна беш киши турли даражада тан жароҳати олди. Бу ҳақда “Московский комсомолец” нашри минтақадаги тезкор хизматлар ходимларидан олинган маълумотга таянган ҳолда хабар тарқатди.

Йўл-транспорт ҳодисаси 16 январь куни эрталабки соат 7:20 ларда содир бўлган. Нижний Новгород- Саратов йўлида “Волга” автомобили билан Hyundai минивэни тўқнашиб кетган. Авария чоғида минивэндаги икки ўзбекистонликдан ташқари “Волга”нинг россиялик ҳайдовчиси ҳам ўлган.

Ҳодиса чоғида жароҳатланган 5 нафар ўзбекистонлик касалхонага етказилган. Улардан уч нафарининг аҳволи оғирлиги, икки нафарининг аҳволи эса ўртачалиги айтилмоқда.

Дастлабки маълумотларга кўра, автоҳалокатга қарши йўлга чиқиб кетган Hyundai ҳайдовчиси сабаб бўлган.

Навоийдаги ёнғинда 20 та дўкон куйиб кетди

Иллюстратив сурат.

Навоий шаҳридаги 4 қаватли савдо мажмуасининг 4-қаватида 16 январь куни кечқурун ёнғин содир бўлди.

Ўзбекистон Ички ишлар вазирлиги ҳузуридаги Тергов департаментининг маълум қилишича, ёнғин маҳаллий вақт билан тахминан 21:15 ларда чиққан.

Табиий офат чоғида 6 та кийим-кечак дўкони тўла ёниб кетган, 14 та дўкон эса яроқсиз ҳолга келган.

Қурбонлар ва тан жароҳати олганлар йўқ. ИИВ ҳодиса жойида тергов-тезкор гуруҳи фаолият олиб бориб, ёнғиннинг келиб чиқиш сабабларини ўрганаётганини маълум қилган.

Ижтимоий тармоқларда кеча Навоийдаги ёнғин акс этган видео тарқалди:

Жиззахдаги газ қуйиш шоҳобчасида портлашда ишчи ҳалок бўлди

16 январь, тахминан соат 11:30 да Жиззах вилоят, Зарбдор туман, Янгиҳаёт маҳалласида жойлашган автомобилларга суюлтирилган газ (пропан) қуйиш шоҳобчасида юз берган портлашдан 40 ёшли фуқаро ҳалок бўлди, 44 ёшли бошқа бир фуқаро тан жароҳатлари билан шифохонага ётқизилди.

Бу ҳақда хабар қилган ИИВ ҳузуридаги Тергов департаментига кўра, газ портлаган шоҳобча “Gaz manbai” МЧЖга қарашли бўлиб, ҳалок бўлган ва жароҳатланган ишчилар шу корхона ишчиларидир.

Айтилишича, автомобилларга суюлтирилган газ қуйиш шоҳобчасида портлаш таъмирлаш-пайвандлаш ишлари олиб борилаётганида келиб чиққан чақнаш оқибатида содир бўлган.

Ҳозирда ҳодиса жойида тергов-тезкор гуруҳи ишлаётгани, портлашнинг келиб чиқиш сабаблари ўрганилаётгани хабар қилинди.

Лавров билан учрашувда Россия билан ўзаро алмашинувлар мисли кўрилмаган даражада фаоллашгани қайд этилди

Ўзбекистон президенти Шавкат Мирзиёев Россия Федерацияси ташқи ишлар вазири вазифасини бажарувчи Сергей Лавров билан.

16 январда президент Шавкат Мирзиёев Ўзбекистонда расмий ташриф билан бўлиб турган Россия Федерацияси ташқи ишлар вазири вазифасини бажарувчи Сергей Лавровни қабул қилди.

Бу ҳақда хабар қилган давлат раҳбари матбуот хизматига кўра, учрашув аввалида Ўзбекистон президенти стратегик шериклик ва иттифоқчиликка асосланган икки томонлама муносабатларнинг ривожланиш суръати тобора ортиб бораётганини катта мамнуният билан қайд этган.

"Олий даражадаги мулоқот мунтазамлик касб этгани, ўзаро алмашинувлар мисли кўрилмаган даражада фаоллашгани, кўп қиррали ҳамкорлик, аввало, савдо-иқтисодий, инвестиция, энергетика, транспорт-коммуникация, маданий-гуманитар соҳалар, таълим ва бошқа устувор йўналишларда кенгайиб бораётгани бундан далолат беради", дейилган расмий хабарда.

Айтилишича, Сергей Лавров самимий қабул учун Ўзбекистон раҳбарига миннатдорлик билдирган ҳамда Россия Федерацияси Президенти Владимир Путиннинг дилдан саломларини етказган.

"Учрашувда Ўзбекистон-Россия муносабатларининг долзарб масалалари кўриб чиқилди, халқаро ва минтақавий аҳамиятга молик мавзулар юзасидан фикр алмашилди. Жорий йилда ўтказилиши режалаштирилган олий даражадаги учрашувларга тайёргарлик масалаларига алоҳида эътибор қаратилди" дейилган расмий хабарда.

16 январь куни Сергей Лавров Ўзбекистон Республикаси ташқи ишлар вазири Абдулазиз Комилов билан ҳам учрашди.

1 сўмга сотилмаган "Чорсу" яна 1 сўмга сотувга қўйилди

Тошкентдаги "Чорсу" меҳмонхонаси.

Тошкентдаги"Чорсу" меҳмонхонаси 1 сўм бошланғич нархда ким ошди савдосига қўйилди. Бу ҳақда Давлат активларини бошқариш агентлиги 16 январда эълон қилди.

“Чорсу” меҳмонхона мажмуаси давлат активларини сотишда инсон омилини камайтириш, жараёнларнинг шаффофлигини таъминлаш мақсадида электрон онлайн савдоларга чиқарилмоқда. (Лот рақами ва батафсил шартлари қисқа фурсатларда эълон қилинади)

Бошланғич нархи 1 сўм. Аукционнинг ҳар бир босқичи 100 млн. сўм.

Сармоядор 2 йил мобайнида ҳукумат кафолатларисиз камида 25,0 млн АҚШ долларга тенг эквивалентда инвестициялар киритиши, уч юлдузли меҳмонхона хизматини ташкил этиши ҳамда 150 та янги иш ўрни яратиши лозим" дейилган агентлик хабарида.

2017 йилнинг сентябрида “Чорсу”ни туркиялик ишбилармон Аҳмад Демир сотиб олгани ва у меҳмонхона базасида “Эски шаҳар” савдо-сайëҳлик мажмуаси қуришга киришгани хабар қилинган эди.

Бироқ 2 июль куни иқтисодий масалалар бўйича Тошкент туманлараро суди Аҳмад Демир ўз мажбуриятларини бажармаган, деган қарорга келиб, у билан имзоланган шартномани бекор қилган эди.

Аҳмад Демир меҳмонхонани ноль қийматида сотиб олган эди. Шартнома бўйича у 33 миллион доллар инвестиция киритиши лозим бўлган.

"Чорсу" меҳмонхонаси 2019 нинг сентябрида ҳам 1 сўмга сотувга қўйилган эди.

Давомини ўқинг

Кўрмай қолган бўлсангиз

XS
SM
MD
LG