Ереванда экс-президент Серж Саргсяннинг бош вазир лавозимига тайинланишига қаршиларнинг жума куни "Саргсянни рад эт!" шиори остида давом этган норозилик акцияларида қўлга олинганлар сони 65 нафарга етди. Бу ҳақда Азатутюн радиоси хабар қилди.
20 апрель куни норозилар яна пойтахт кўчаларини тўсиб, транспорт ҳаракатини тўхтатди.
Олдинроқ мухолифат дидери Никол Пашинян норозиларни намойишни давом эттиришга ва 20 апрель куни Ереван кўчаларини тўсиб қўйишга чақирган эди.
- Арман халқи коррупцияга, адолатсиз сиёсий тизимга қарши бахмал инқилобини эълон қилди. Жуда яхши биламизки, Серж Саргсян Арманистонда коррупция рамзидир, -деди Никол Пашинян.
Арманистоннинг собиқ президенти Серж Саргсян бош вазир лавозимини эгаллашига қарши норозилик намойишлари 7 кун аввал бошланган эди. Шунга қарамай Саргсян 17 апрелда парламент томонидан бош вазир лавозимига сайланган.
2008 йилда президентликка сайланиб, бундан икки ҳафта олдин бу лавозимни тарк этган Саргсян бош вазир сифатида ўз ҳокимиятини сақлаб қолишни режалаштирмоқда.
9 апрель куни Армен Саркисян 7 йиллик муддатга президентлик курсисига ўтирди.
