Линклар

Шошилинч хабар
15 ноябр 2018, Тошкент вақти: 12:14

Prokuror Mirziyoev jazolashni va’da qilgan Buxorodagi MXXchilarga uzoq muddatli qamoq jazolari so‘radi


Adolat tarozisi

20 iyun kuni O‘zbekiston Respublikasi Oliy harbiy sudida Buxoro viloyati sobiq MXX boshqarmasi va prokuraturasining bir guruh rahbarlari ustidan o‘tayotgan yopiq sud majlisida davlat qoralovchisi ayblanuvchilarga nisbatan 15,5 yildan 18,5 yilgacha qamoq jazosi so‘ragan. Bu Ozodlikka yuborilgan sud jarayoniga oid hujjatlar, qolaversa huquq faollari va Toshkent harbiy garnizonining nomi sir qolishini istagan mulozimi bilan suhbatlardan ma’lum bo‘ldi. Ozodlik bog‘langan O‘zbekiston Bosh prokuraturasi matbuot xizmati sudning yopiq o‘tkazilayotgani bois bu haqda ma’lumot berilmasligini bildirdi.

Ozodlik qo‘lga kiritgan ayrim tergov va sud hujjatlaridan ma’lum bo‘lishicha, 08/26616-18-sonli mazkur jinoyat ishi O‘zbekiston Respublikasi Bosh prokuraturasining tergov guruhi tomonidan shaxsan Prezident Shavkat Mirziyoevning ko‘rsatmasi asosida olib borilgan.

Ayblanuvchilar jami 11 nafar bo‘lib, ular ustidan O‘zbekiston Jinoyat Kodeksining 301-moddasi (Hokimiyatni suiiste’mol qilish, hokimiyat vakolatidan tashqariga chiqish yoki hokimiyat harakatsizligi) va 235-moddasi (Qiynoq) bilan tergov ishlari qo‘zg‘atilgan.

"Sudning qora kursisida Milliy xavfsizlik xizmati (hozirgi Davlat xavfsizlik xizmati) Buxoro viloyati boshqarmasi sobiq boshlig‘i, polkovnik Rustam Azimov, boshliqning ichki xavfsizlik bo‘yicha o‘rinbosari, polkovnik Azim Yunusov, tezkor vakillar In’om Ma’rupov hamda Bahodir Hoshimovlar o‘tiribdi," dedi Toshkent harbiy garnizoni mulozimi.

Shuningdek, guruh a’zolari sifatida ko‘rilayotganlar qatorida Respublika Bosh prokuraturasi qoshidagi soliq, valyutaga oid jinoyatlar va jinoiy daromadlarni legallashtirishga qarshi kurash Departamentining Buxoro viloyati bo‘limi boshlig‘i Ravshan Rajabov, Buxoro viloyati prokuraturasi tergovchisi Rasul Yuldashev, Buxoro viloyati IIB terrorizm va uyushgan jinoyatchilikka qarshi kurash bo‘limi boshlig‘i o‘rinbosari Umid Bobomurodov ham bor.

Jinoyat ishida Buxorodagi Qorovulbozor qamoqxonasi "loxmach"lari sifatida tasniflangan Rustam Jumaev, Umid Inog‘omov, Jamshid Safarov hamda Aleksandr Ivanovlar ham so‘roqqa tortilgan.

O‘zbekiston Bosh prokuraturasi matbuot xizmati MXX va prokuraturaning Buxorodagi sobiq xodimlari ustidan borayotgan mahkama yopiq bo‘lgani uchun ma’lumot berilmasligini bildirdi.

Sud jarayonidan voqif yana bir huquq faoli Ozodlik bilan suhbatda buxorolik aka-uka Ibodovlarning qiynoqqa tutilgani haqidagi da’volarning jinoiy ish markazida ekanini bildirdi.

Aka-uka Ibodovlar ishi

Buxoro shahridagi “Sitora” avtomobil bozorida tadbirkorlik bilan shug‘ullanib kelgan 44 yoshlik Ilhom Ibodov va uning akasi 48 yoshlik Rahim Ibodovlar 2015 yil 16 avgust kuni savdo qoidalarini buzganlik va noqonuniy valyuta oldi-sotdisini tashkil qilganlikda ayblanib, MXX xodimlari tomonidan hibsga olingan edi.

Bir oy o‘tib Buxoro Milliy xavfsizlik boshqarmasi tergov izolyatoridan Ilhom Ibodovning o‘ligi chiqdi.

Ilhom Ibodovning Ozodlikka yetib kelgan qamoqdan chiqqan jasadi suratlarida murdaning qorin va bel qismlarida ko‘kargan joylari va oyog‘ida jarohatlarini ko‘rish mumkin.

Marhum Ibodov badanida qiynoq izlarini ko‘rish mumkin
Marhum Ibodov badanida qiynoq izlarini ko‘rish mumkin

Buxoro viloyat sud-tibbiyot ekspertizasi Ilhom Ibodov o‘limi sabablarini o‘rganib, mahbus tergov izolyatorida yurak xurujidan vafot etgan, degan xulosani chiqardi.

Ilohom Ibodovning akasi Rahim sakkiz yilga qamaldi.

28 noyabr kuni Xyuman Rayts Uotch, Inson huquqlari uchun xalqaro sheriklik, Norvegiya Xelsinki qo‘mitasi va Markaziy Osiyoda inson huquqlari assotsiatsiyasi O‘zbekiston hukumatini aka-uka Ibodovlarning qamoqxonada qiynoqlarga solinishi holatini tergov qilishga chaqirdi.

2016 yil 1 dekabrda Ozodlik bilan suhbatlashgan aka-uka Ibodovlarning onasi Xursand Rajabova kichik o‘g‘lining qamoqxonadagi shubhali o‘limi yuzasidan batafsil, xolis va shaffof tekshiruv o‘tkazish hamda o‘zbek qamog‘ida qolayotgan yana bir o‘g‘lini ozod etishni so‘rab Shavkat Mirziyoevning virtual qabulxonasiga murojaat etganini bildirdi.

"Ularni ham shu ko‘yga soldiraman"

O‘zbekiston Prezidenti Shavkat Mirziyoev 2017 yil 16 fevral kuni Buxoro viloyatining Peshko‘ tumanida viloyat faollari bilan bo‘lgan uchrashuvda Milliy xavfsizlik xizmati (yangi nomi Davlat xavfsizlik xizmati) ni tanqid qildi.

MXXga berilgan cheksiz vakolatni tanqid qilgan prezident, tizim faoliyatini o‘tgan asrning 30-yillaridagi qatag‘onga solishtirgan edi.

Мирзиёев МХХ фаолиятини 37-йилдаги қатағонга қиёслади
Илтимос кутинг

Айни дамда медиа-манба мавжуд эмас

0:00 0:03:44 0:00

Prezident aka-uka Ibodovlarning qiynoqqa solinganini tilga olmagan esa-da, uning qo‘lida MXXning Buxorodagi jinoyatlari haqida yetarli dalillar borlini aytdi:

“Buxorodan menda juda ko‘p manba bor. Tadbirkorlarni aybsiz qamagani, qanday qiynagani, rasmlari ham bor menda. O‘sha ishni qilgan tergovchilarning hammasining familiyasi bor. Xudo xohlasa, sog‘-salomat yursak, vaqt keladi, televizorda ko‘rasizlar. Ularni ham xuddi shu kuyga soldiraman. Nima uchun, adolat bo‘lishi kerak. Yigirma yil bo‘lsa, yigirma yil qamaladi”, dedi prezident.

Buxorodagi MXX va prokuratura mulozimlari ustidan Oliy harbiy sudi hukmi yaqin kunlarda chiqishi kutilmoqda.

XS
SM
MD
LG