АҚШ Давлат департаменти Ўзбекистонда сўнгги ўн йилликда биринчи марта АҚШ нодавлат ташкилоти рўйхатдан ўтказилганини олқишлади.
Давлат департаменти матбуот котиби Хизер Науэр Халқаро таълим бўйича Америка кенгашларига Ўзбекистонда фаолият юритишга рухсат берилишини АҚШ стратегик ҳамкорликнинг ривожланаётгани сифатида баҳолаётганини билдирди:
-Бу сўнгги 15 йилда Ўзбекистонда биринчи марта рўйхатдан ўтказилган Америка нодавлат ташкилоти бўлди. Бу воқеа Қўшма Штатлар ва Ўзбекистон ўртасида стратегик ҳамкорликнинг ривожланаётгани, шунингдек, Ўзбекистон ҳукуматининг сезиларли ислоҳотлар ўтказишда собитлиги ва халқаро ҳамкорликка интилиши белгисидир, -деди Хизер Науэр.
29 август куни Адлия вазири ўринбосари А.Тошқулов АҚШнинг Ўзбекистондаги элчиси Памела Спартленга Халқаро таълим бўйича Америка кенгашлари (American Councils for International Education-ACIE)нинг Ўзбекистондаги ваколатхонаси давлат рўйхатидан ўтганлиги ҳақидаги гувоҳномани топширгани хабар қилинган эди.
Маркази Вашингтонда жойлашган Америка кенгаши дунë бўйлаб таълим дастурлари¸ асосан инглиз тилини ўқитиш ва талабалар алмашинуви билан шуғулланади.
Хизер Науэр ўз билдирувида Ўзбекистон бундан буён ҳам ислоҳотларни давом эттиришига, жумладан, диний эркинликни таъминлаш йўналишида самарали қадамлар ташланишига умид қилинаётганини таъкидлаб ўтди:
-Эсингизда бўлса, Давлат департаменти июль ойида бу давлатни диний эркинликларга бағишланган анжуманга таклиф қилган эди. Бу Ўзбекистон ҳукумати томонидан диний эркинликларни яхшилашга қаратилган сўнгги ҳаракатлар эътироф этилаётганини англатади. Биз Ўзбекистон ҳукумати президент томонидан эълон қилинган ислоҳотларни амалга оширишда сезиларли олға силжишларга эришаётганини олқишлаймиз,-деди Науэр.
Вашингтонда ўтказилган диний эркинликка бағишланган вазирлар анжуманида Ўзбекистон Ташқи ишлар вазири Абдулазиз Комилов етакчилигидаги делегация иштирок этган эди.
Жорий йилнинг май ойида АҚШ Давлат департаменти Ўзбекистонда диний эркинликлар вазиятини яхшилашга қаратилган қадамлар ташланаётганини олқишлаган ҳолда, бу жараён секинлик билан олиб борилаётганини эътироф этган эди.
Давлат департаментининг май ойида эълон қилинган ҳисоботида Ўзбекистон диний эркинлик ҳамон чекланган мамлакатлар рўйхатида қолдирилган эди.
Шавкат Мирзиëев ҳокимиятга келгандан кейин 2005 йилги Андижон воқеалари ортидан Ўзбекистондан ҳайдалган халқаро ташкилотлар Ўзбекистонга қайтиш ҳаракатини бошлади.
2017 йил сентябрида Ўзбекистонда фаолияти суд томонидан тақиқланган Human Rights Watch делегацияси 7 йиллик танаффусдан сўнг Тошкентга борди.
Жорий йил май ойида Amnesty International делегацияси ҳам кейинги 14 йил ичида биринчи бор Ўзбекистонга сафар қилди.
