Линклар

Шошилинч хабар
22 январ 2022, Тошкент вақти: 07:54

Ўзбекистон хабарлари

Тошкентда Akfa хусусий университети очилади

Akfa Medline биноси.

Ўзбекистонда 2019/2020 ўқув йилида ишга тушадиган Akfa халқаро университети хусусий мулк асосида очилиши кутилаётган илк университетлардан бири бўлади. Президент маслаҳатчиси Абдужаббор Абдувоҳитов кўра, бу каби олийгоҳларни ташкил этиш орқали мамлакатда таълим соҳасида очилмаган, янги истиқболларга эришиш мумкин.

А.Абдувоҳитов бу фикрни 17 октябрь куни Тошкент давлат иқтисодиёт университети биносида ташкил этилган матбуот анжуманида билдирди. Ўзбекистон президентининг “Тошкент шаҳрида Акфа халқаро университетини ташкил этиш тўғрисида"ги қарори ўтган ҳафта Норматив ҳуқуқий ҳужжатлар лойиҳалари муҳокамаси порталида эълон қилинган.

Қарорда олийгоҳни ташкил этиш ташаббуси Соғлиқни сақлаш вазирлиги, Олий ва ўрта махсус таълим вазирлиги ҳамда “Akfa Medline” МЧЖга оидлиги қайд этилган.

“Akfa Medline” МЧЖ AKFA ширкатлар гуруҳи томонидан ташкил этилган хусусий кўп профилли тиббий марказдир. AKFA ширкатлар гуруҳининг эгаси Тошкент шаҳар ҳокими Жаҳонгир Ортиқхўжаев бўлиб ҳисобланади.

Таълим инглиз тилида амалга ошириладиган Akfa университети, президент қарорида айтилишича, иқтисодиётнинг реал сектори тармоқларининг аниқ эҳтиёжларини ҳисобга олган ҳолда фундаментал, аниқ, тиббиёт ва гуманитар фанлар бўйича юқори малакали мутахассисларни тайёрлаш билан шуғулланади.

Университетда таълим кундузги таълим шаклида тўлов-контракт асосида амалга оширилади.

Университет фаолияти таъсисчилар ҳамда тўлов-контракт асосида ўқишга кирувчи талабалар маблағлари ҳисобига молиялаштирилади.

Университет 2022 йил 1 январгача барча турдаги солиқлар ва давлат мақсадли жамғармаларига мажбурий тўловларни тўлашдан озод этилади.

Кун янгиликлари

ИИББ Тошкентда ўқ узилгани билан боғлиқ ҳодисага изоҳ берди

Иллюстратив сурат

Тошкент шаҳар ИИББ таниқли блоггер Никита Макаренконинг ижтимоий тармоқдаги саҳифасида эълон қилинган пойтахтнинг Мирзо Улуғбек туманида ўқ отилганига доир видео лавҳаси юзасидан изоҳ берди.

Маълум бўлишича, 20 январь куни пойтахтнинг Феруза массивида 32 яшар З.С. аввал ҳаракатланаётган ВАЗ-2199 автомобили ғилдиракларини тепган, сўнг унга пневмотик қуролдан ўқ узган.

Дастлабки суриштирувларга кўра, мазкур ҳолат 37 яшар Г.А. га нисбатан рашк оқибатида содир этилган.

Ижтимоий тармоқ фойдаланувчилари ўртасида шов-шув бўлган видео лавҳада кўк костюмдаги шахснинг ғазабнок ҳолатда автомобилни тепгани ва сўнг унга ўқ узгани кўринади.

“Ҳодиса оқибатида ҳеч ким жабрланмаган, ҳолат юзасидан Мирзо Улуғбек тумани прокуратураси томонидан терговга қадар суриштирув ишлари олиб борилмоқда” дейилади Тошкент шаҳар ИИББ хабарномасида.

Соғлиқни сақлаш вазири ўринбосарларидан бири ишдан олинди

Маҳаллий оммавий ахборот воситаларининг ёзишича, Ўзбекистон Республикаси Соғлиқни сақлаш вазири ўринбосари Абдулла Азизов лавозимидан четлатилди. Унинг истеъфоси билан боғлиқ тафсилотлар очиқланмаган.

Соғлиқни сақлаш вазирлигининг матбуот хизмати Озодликнинг бу борадаги саволини изоҳсиз қолдирди.

Япониянинг Нагоя университети битирувчиси бўлган 41 яшар Абдулла Азизов Даниядаги Орхус университетида магистирлик даражасини олган. Сўнг Европадаги "Маэрск А/С", "ДОНГ Energy А/С", "Carлсберг А/С", "Имплемент консалтинг group", "Vestaс А/С" ҳамда "Данфосс"си сингари ширкатларда фаолият олиб борган.

2019 йилда Давлат солиқ қўмитаси раиси ўринбосари лавозимига тайинланган Азизов бир йиллик солиқчилик амалиётидан сўнг Соғлиқни сақлаш вазири ўринбосари этиб тайинланганди. Эндиликда унинг қандай лавозимни эгаллашига оид маълумотлар йўқ.

“O`zbekiston 24” телеканали хабарига кўра, шу кунларда Соғлиқни сақлаш вазирлигининг Беҳзод Мусаев бошчилигидаги янги раҳбарияти мамлакат бўйлаб тиббий муассасалар ҳолатини кўздан кечириш, аҳоли репродуктив саломатлиги билан боғлиқ вазиятни ўрганиш мақсадида вилоятларга сафар қилган.

Мирзиёев давлатга қарашли 23 та корхона акцияларини сотиш ҳақида топшириқ берди

Шавкат Мирзиёев

Ўзбекистон президенти Шавкат Мирзиёев масъулларга мамлакатдаги 23 та акциядорлик жамияти акцияларини бирламчи сотиш орқали фонд бозорига чиқариш ҳақида кўрсатма берди. Мазкур топшириқ, президент матбуот хизмати маълумотига кўра, 20 январь куни Ш. Мирзиёев раислигида давлат мулкини хусусийлаштириш бўйича жорий йилда амалга ошириладиган ишлар юзасидан ўтказилган видеоселектор йиғилиши чоғида берилган.

Хабарномада президент айнан қайси корхоналарни назарда тутганига аниқлик киритилган эмас. Бироқ видеоселекторда “Фарғонаазот”, “Бектемир спирт заводи”, “Қўқон биокимё”, “Деҳқонобод калий заводи”, “Кварц”, Hyatt сингари йирик мажмуаларга салоҳиятли инвесторларни жалб қилиш муҳимлиги урғуланган.

Шунингдек, йиғилиш чоғида, президент топшириғи билан ўтказилган хатлов натижаларига кўра, тармоқ ва ҳудудларда самарасиз ишлатилаётган 2 мингта объект борлиги аниқлангани, нефть-газ тармоғида 210 та, алоқа соҳаси корхоналарида 152 та, давлат тижорат банкларида 114 та, кимё тармоғида 44 та, энергетикада 28 та сотиладиган бино борлиги, вилоят ҳокимликлари балансида ҳам 170 га яқин бўш объект йиллар давомида сотилмай тургани айтилган.

Ш. Мирзиёев ҳудудий объектлар ва ноқишлоқ ерларни хусусийлаштириш орқали йил якунигача жами 8 триллион сўмдан зиёд тушумни таъминлаш мумкинлигини таъкидлаган. Шунингдек, у масъуллар олдига бугунгача савдога қўйилган 33 мингта ер участкасини мулк ҳуқуқи асосида сотиш, шунингдек, 1 июлга қадар яна 25 мингта майдонни аукционга чиқариш вазифасини қўйган.

Президент йўл, транспорт, нефт-газ, энергетика, автомобилсозлик тармоқларига қарашли 266 та корхонани алоҳида ёндашув асосида савдога чиқариш кераклиги айтган.

“Ҳали кўплаб тармоқ раҳбарлари тизимидаги носоҳавий корхоналарни самарасиз ишлатмоқда. Йирик тармоқларда 480 та корхонадаги давлат улушини тўлиқ хусусий секторга бериш мумкин”, деган Ш. Мирзиёев бош вазир А. Ариповга “Ўзавтосаноат”, “Ўзбекистон темир йўллари”, “Ўзбекнефтегаз”, “Ҳудудий электр тармоқлари” каби тармоқлардаги тегишли объектларни тўлиқ хатловдан ўтказиб, уларни хусусийлаштириш бўйича таклиф киритиш вазифасини топширган.

Президент Ш. Мирзиёев ўтган йил баҳорида “Капитал бозорини янада ривожлантириш чора-тадбирлари тўғрисида”ги фармонни имзолаган, мазкур ҳужжатга илова ўлароқ 2021—2023 йиллар мобайнида акциялари биржага чиқарилажак 15 та йирик ширкат рўйхати тасдиқланган эди.

ССВ: Коронавирусга чалинганлар сони 210 минг нафардан, қурбонлар сони 1530 нафардан ошди

Ўзбекистонда коронавирус инфекцияси қайд этилганлар сони, 2022 йил 20 январь ҳолатига кўра, 210 минг 899 нафарга етган.

Соғлиқни сақлаш вазирлиги маълумотига кўра, пайшанба куни мамлакатнинг барча ҳудудларида жами 1321 кишининг коронавирус юқтириб олгани аниқланган. Бу эса пандемия бошидан бери мамлакатда коронавирусга чалиниш бўйича янги аксилрекорд қайд этилганини англатади.

Вирус юқтириб олиш бўйича кундалик кўрсаткичнинг шиддат билан ошиб бораётгани Ўзбекистонга Omicron штаммининг кириб келиши билан боғланмоқда.

Кеча мамлакат бўйлаб 466 нафар бемор тузалиб, соғайганларнинг умумий сони 201 минг 712 нафарга етган.

ССВ ўтган кеча-кундузда коронавирусга чалинган беморлардан яна 3 нафари вафот этиб, коронавирус қурбонлари сони 1 минг 532 нафарга етганини қўшимча қилган.

Икки йилдан сўнг Ўзбекистонда 200 минг сўмлик купюра муомалага чиқарилади

Марказий банк раиси Мамаризо Нурмуродов

Ўзбекистон Марказий банки 2024 йилдан эътиборан 200 минг сўмлик купюра чиқаришни режалаяпти. Бу ҳақда, маҳаллий нашрлар хабарларига кўра, МБ раиси Мамаризо Нурмуродов 20 январь куни Тошкентда ўтган матбуот анжуманида билдирган.

“Биз 2024 йилда 200 минг сўмлик чиқаришни режалаштирганмиз. Шу билан бирга, муомаладаги нақд пулни оптималлаштириш жараёнини ҳам амалга оширяпмиз”, дея иқтибос келтирган М. Нурмуродов сўзларидан “Дарё” нашри.

Мулозим келажакда 1000 сўмлик банкнотлардан воз кечилиб, унинг ўрнига шу қийматдаги танга чиқарилишини ҳам қўшимча қилган.

МБ қайдича, Ўзбекистонда ўтган йилларда муомаладаги нақд пуллар таркибида асосан йирик номиналдаги банкнотлар салмоғининг ошиши ҳисобига банкнотлар умумий сони сезиларли даражада камайган.

“2021 йил давомида муомалага чиқарилган нақд пуллар таркибида уларнинг сўмдаги миқдори бўйича 100 000 сўмлик банкнотлар улуши – 27,3 фоиздан 34,8 фоизга етган бўлса, 50 000 сўмликнинг улуши – 38,8 фоиздан 34,2 фоизга, 10 000 сўмликнинг улуши – 15,7 фоиздан 14,5 фоизга, 5 000 сўмлик – 16,1 фоиздан 12,7 фоизга, 1 000 сўмгача – 2,1 фоиздан 1,4 фоизга тушди. Шунингдек, 2 000 сўмлик (0,3 фоиз) ва 20 000 сўмлик (2,1 фоиз) намунадаги банкнотлар муомалага киритилди”, дейилган Марказий банк ҳисоботида.

Қишки таътилдан сўнг ўқувчилар ва талабалар бир ой давомида онлайн таълим олади

Иллюстратив сурат

Ўзбекистонда қишки таътил кунлари тугайдиган 24 январдан бошлаб барча мактаблар (шу жумладан президент мактаблари), лицейлар, олий ва профессионал таълим муассасаларида таълим жараёни бир ой давомида “онлайн” шаклда олиб борилади. Бу ҳақда Халқ таълими вазирлиги, Президент таълим муассасалари агентлиги ҳамда Олий ва ўрта махсус таълим вазирлиги ахборот хизматлари маълумот тарқатишди.

Мазкур қарор коронавирус янги штаммининг болалар ва ёшлар ўртасида тарқалиши хавфини олдини олиш ҳамда Соғлиқни сақлаш вазирлиги ва Санитария-эпидемиологик осойишталик ва жамоат саломатлиги хизматининг таклифларидан келиб чиққан ҳолда қабул қилингани айтилмоқда.

ХТВ қайдича, масофавий шаклда ўқувчиларнинг сифатли таълим олиши учун дарслар МТРК телеканаллари ҳамда “Онлайн мактаб” телеграм канали орқали бериб борилади, дарслар жадвали эса кунлик равишда “Онлайн мактаб” телеграм канали орқали эълон қилиб борилади.

Олий ва ўрта махсус таълим вазирлиги эса талабалар учун темирйўл чипталари тариф қисмидан 50 фоиз миқдорида чегирмаларини сақлаб қолиш ҳамда 2022 йил 24 февралига қадар авиа ва темирйўл чипталарини бепул тарзда бошқа муддатга алмаштириб берилишини билдирган.

Аввалроқ ҳар икки вазирлик Ўзбекистондаги мактаблар ва ОТМларда қишки таътил 24 январгача давом этиши ҳақида эълон қилган эдилар.

Президент Сирдарё ва Хоразм вилоятлари ҳокимларига ҳайфсан берди

Президент Шавкат Мирзиёев 20 январда ўтган видеоселекторда Сирдарё вилояти ҳокими Ғофур Мирзаев ва Хоразм вилояти ҳокими Фарҳод Эрмановга давлат активларини хусусийлаштиришни суст даражада олиб бораётгани учун ҳайфсан берди. Бу ҳақда президент матбуот колтиби Шерзод Асадов хабар қилди.

Президентнинг айтишича, мазкур вилоятларда давлат активларини хусусийлаштириш бўйича амалга оширилаётган ишлар суръати қониқарсиздир. Вилоят ҳокимликлари балансида йиллар давомида 170 га яқин бўш объектлар сотилмасдан турибди.

Видеоселектор давомида хусусийлаштиришни ўз ҳолига ташлаб қўйгани учун Давлат активлари агентлигининг Сирдарё, Хоразм ва Бухоро вилоятлари бошқарма бошлиқлари ҳамда “Ўзагросервис” жамияти раиси Р. Хайитов эгаллаб турган лавозимидан озод қилинди.

Шавкат Мирзиёев Қозоғистон президентини қўллаб-қувватлашини билдирди

Ўзбекистон президенти Шавкат Мирзиёев 20 январда қозоғистонлик ҳамкасби Қасим-Жомарт Тоқаев билан телефон орқали мулоқот қилди, деб хабар берди Мирзиёевнинг матбуот хизмати.

Мулоқотда “Ўзбекистон ва Қозоғистон ўртасидаги сиёсий муносабатлар жадал ривожланиб бораётгани, товар айирбошлаш ортаётгани ва кооперация алоқалари кучайиб бораётгани, ҳудудлараро ва маданий-гуманитар алмашинувлар фаоллашгани мамнуният билан қайд этилди”.

Президент Мирзиёев Қозоғистон Президенти томонидан мамлакатдаги вазиятни барқарорлаштириш борасида кўрилаётган чора-тадбирларни қўллаб-қувватлашини билдирди.

Шунингдек, минтақавий хавфсизликни таъминлаш масалалари юзасидан ҳам фикр алмашилди. Бўлажак олий даражадаги учрашувлар режаси кўриб чиқилди.

Ўзбекистонда 5 ёшдан 11 ёшгача бўлган болаларни коронавирусга қарши эмлашга рухсат берилди

АҚШ хасталикларни назорат қилиш ва олдини олиш маркази 5 ёшдан 11 ёшгача бўлган болалар учун Pfizer/BioNTech вакцинасидан фойдаланишни расман маъқуллаган.

Ўзбекистонда коронавируснинг “омикрон” штамми кенг тарқалишининг олдини олиш мақсадида COVID-19га қарши 5 ёшдан 11 ёшгача бўлган болаларни ота-оналар ёки васийларнинг розилиги асосида "Pfizer" вакцинаси билан ихтиёрийлик асосида эмлашга рухсат берилди.

Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабековнинг 20 январда маълум қилишича, 5 ёшдан 11 ёшгача бўлган болаларни эмлашга “халқаро ва республика даражасидаги экспертлар тавсиялари ҳамда аҳоли мурожаатларини инобатга оли6” рухсат берилган.

"Pfizer" вакцинаси билан 12 ёш ва ундан катта бўлган аҳолига 0,3 мл эмлаш дозалари ишлатилган бўлса, 5 - 11 ёшдаги болаларни эмлаш учун 0,1 мл доза қўлланилади.

2021 йилнинг 28 сентябрида Ўзбекистон Бош давлат санитария врачи ва миллий техник иммунологик эксперт комиссиясининг қарорига асосан, Ўзбекистонда ота-оналар ва васийларининг розилиги асосида 12 ёшдан катта болаларни Pfizer вакцинаси билан эмлаш бошланган эди.

2021 йил ноябрида АҚШнинг хасталикларни назорат қилиш ва олдини олиш маркази 5 ёшдан 11 ёшгача бўлган болалар учун коронавирусга қарши Pfizer/BioNTech вакцинасидан фойдаланишни расман маъқуллаган.

Самарқанд шаҳри таркибида туманлар ташкил этилиши тўғрисидаги қарор муҳокамага қўйилди

Самарқанд манзараси.

Самарқанд шаҳри таркибида Қорасув, Суғдиёна, Сиёб, Боғишамол ва Мароқанд туманлари ташкил этилади. Бу борадаги Сенат қарори 9 январь куни умумхалқ муҳокамасига қўйилди.

Қарор лойиҳасида таъкидланишича, Оқдарё, Пастдарғом, Самарқанд, Тойлоқ туманлари маъмурий-ҳудудий чегаралари ҳам ўзгартирилади. Бундан ташқари Самарқанд тумани тугатилади.

Ҳужжатга мувофиқ, Оқдарё туманидан 1 654 гектар, Самарқанд туманидан 12 975 гектар, Пастдарғом туманидан 1 245 гектар, Тойлоқ туманидан 1 269 гектар ер Самарқанд шаҳри таркибига қўшилади.

Самарқанд шаҳридан 528 гектар, Самарқанд туманидан 1370 гектар ер Пастдарғом тумани таркибига киритилади. Тойлоқ туманига Самарқанд тумани ҳудудидан 29 283 гектар ер ўтказилади.

Мирзиёевнинг қизи танқид қилган сериални кўрсатган “Севимли” телеканали раҳбарлари ишдан олинди

Президент Шавкат Мирзиёевнинг қизи Саида Мирзиёева.

“Севимли” телеканали таъсисчиларининг 20 январда ўтган йиғилишида “Севимли” телеканали директори А. Хўжаев ва бош муҳаррир Қ. Сайдалиев ишдан бўшатилди.

“Darakchi.uz”нинг хабар беришича, таъсисчилар йиғилишга Кинематография агентлиги бош директори Фирдавс Абдухолиқов ҳам таклиф қилинган. Йиғилишда Фирдавс Абдухолиқов “жамоатчилик фикрини инобатга олган ҳолда” “Севимли” телеканали Кузатув кенгаши раиси вазифасини бажарувчи сифатида сайланган.

Шу кунгача Электрон оммавий ахборот воситалари миллий ассоциацияси бош директори лавозимида ишлаб келаётган Жалолиддин Сафоев канал бош директори вазифасига тайинланди.

“Севимли” телеканали “Сабрия” сериалини эфирга узатгани ортидан ижтимоий тармоқларда кескин танқидларга учраган эди. Жумладан, президент Шавкат Мирзиёевнинг қизи Саида Мирзиёева мазкур сериални “аёлларга нисбатан мислсиз нафрат рамзи” ўлароқ сифатлаб, танқид қилган.

Агентлик: Ўтган йил давомида хориждан Ўзбекистонга 500 дан зиёд муҳожирнинг жасади олиб келинди

Иллюстратив сурат

Ўтган 2021 йил давомида Ўзбекистонга хорижда вафот этган 518 нафар фуқаронинг жасади олиб келинган. Бу ҳақда маълум қилган Ташқи меҳнат миграцияси агентлиги матбуот хизмати муҳожирларнинг жасадлари қайси мамлакатлардан келтирилганига аниқлик киритган эмас.

Агентлик қайдича, ўтган 12 ой давомида хорижда қийин аҳволда қолган 321 нафар ўзбекистонлик фуқаро ватанига қайтарилган ҳамда оғир тан жароҳати олган 17 нафар меҳнат мигрантининг тиббий хизмат харажатлари қоплаб берилган.

Бундан ташқари, Ташқи меҳнат миграцияси агентлиги чет ўлкаларда ишлаётган ўзбекистонлик 8 минг 811 нафар мигрантга ҳуқуқий ёрдам, 295 минг 102 нафарига маслаҳат хизматлари, 6 минг 283 нафарига ижтимоий ёрдам, 13 минг 424 нафарига моддий ёрдам кўрсатилганини билдирган. Шунингдек, 7 минг 534 нафар меҳнат мигрантига бир марталик моддий ёрдам ажратилиб, 358 нафар меҳнат мигранти вақтинча хостелга жойлаштирилгани қўшимча қилинган.

Агентлик ўтган йил мобайнида меҳнат мигрантларининг иш берувчилар томонидан тўланмай турган қарийб 984,1 минг АҚШ доллари миқдоридаги иш ҳақи ва пуллик компенсациялари ундириб берилганини ҳам иддао қилган.

Янги аксилрекорд: ССВ ўтган суткада 1300 дан зиёд киши коронавирусга чалинганини очиқлади

Ўзбекистон жорий йилнинг 18 январь куни коронавирус инфекциясини юқиши билан боғлиқ 1 минг 307 та ҳолат қайд этилган, шу тариқа мамлакатда COVID-19 га чалинганларнинг умумий сони 209 минг 578 нафарга етган. Бу ҳақда Соғлиқни сақлаш вазирлиги маълумот тарқатди.

Бу коронавирус пандемияси бошидан бери кундалик касалланиш кўрсаткичи бўйича янги аксилрекорд бўлиб ҳисобланади, аввалгиси бундан бир кун аввал кузатилган (1214 та ҳолат) эди.

Вирус юқтириб олиш бўйича кундалик кўрсаткичнинг шиддат билан ошиб бораётгани Ўзбекистонга Omicron штаммининг кириб келиши билан боғланмоқда.

ССВ қайдича, чоршанба куни барча ҳудудларда 734 киши тузалиб, соғайганларнинг умумий сони 201 минг 246 нафарга етган.

Вазирлик ўтган кеча-кундузда коронавирусга чалинган беморлардан яна 4 нафари вафот этиб, коронавирус қурбонлари сони 1 минг 529 нафарга етганини қўшимча қилган.

Ўзбекистонда ҳар бир маҳалла ёшларига етакчи тайинланади

Иллюстратив сурат

Ўзбекистондаги ҳар бир шаҳарча, қишлоқ, овулда, шунингдек, шаҳарлар, шаҳарчалар, қишлоқлар ҳамда овуллардаги ҳар бир маҳаллада ёшлар етакчиси лавозими жорий этилади. Бу ҳақда президент Ш. Мирзиёев томонидан 19 январь куни имзоланган “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарорда айтилган.

Ҳужжатга мувофиқ, “Ёшлар баланси”ни шакллантириш, ёшлар тўғрисидаги зарур маълумотларни “Ёшлар дафтари” ва “Ёшлар портали” электрон платформаларига киритиб бориш, улар билан самарали иш ташкил қилиш, маҳаллаларда ёшларнинг бўш вақтини мазмунли ташкил этиш, миллий халқ ўйинлари ва спорт турларини ёшлар орасида оммалаштириш, ёшлар фестиваллари ва бошқа маданий-маърифий тадбирларни амалга ошириш, ёшларнинг ижтимоий фаоллигини ошириш, иқтидори, истеъдоди ва ташаббусларини рағбатлантириш ҳамда ҳаётда ўз ўрнини топишларига кўмаклашиш, ёшларни ватанпарварлик руҳида тарбиялаш ҳамда уларнинг интеллектуал жиҳатдан камол топишини ва маънавий ривожланишини таъминлаш, ҳуқуқбузарлик содир этишга мойиллиги бўлган ёшлар билан тизимли ишлаш, жазони ижро этиш муассасаларидан озод қилинган, ихтисослаштирилган ўқув-тарбия муассасаларидан қайтиб келган ёшларнинг ижтимоий-педагогик реабилитация қилиниши ва мослашувига кўмаклашиш кабилар ёшлар етакчисининг асосий вазифалари этиб белгиланган.

Етакчилар зиммасига ўзига бириктирилган маҳаллаларда маданият ва санъатни тарғиб қилиш, соғлом турмуш тарзи ва спортни оммалаштириш, ахборот технологияларидан самарали фойдаланишни ташкил қилиш, маънавият ва китобхонликни тарғиб қилиш, ватанпарварлик руҳида тарбиялаш ва ҳуқуқий саводхонликни ошириш, тадбиркорлик ғояларини қўллаб-қувватлаш йўналишлари бўйича фаолият юритиш вазифаси юкланган.

Қарорда қайд этилишича, ҳар чоракда маҳаллада ёшлар сиёсатини самарали амалга оширишда юқори натижадорликка эришаётган мамлакат бўйича энг илғор 100 нафар ёшлар етакчиси бир ойлик иш ҳақига тенг миқдорда бир марталик пул мукофоти билан тақдирланади ҳамда фаолиятини самарали ташкил этаётган, ўзининг шахсий фазилатлари билан ёшларга намуна бўлаётган ва уларга раҳбарлик қилаётган етакчилар “Янги Ўзбекистон ислоҳотчиси” кўкрак нишони билан тақдирланади.

Ёшлар етакчисининг ойлик маошига келинса, ҳужжатга кўра, бу миқдор етакчи бириктирилган маҳалладаги хонадонлар сонига мутаносиб равишда белгиланади ва хонадонлар сони 500 тагача бўлган маҳаллада меҳнатга ҳақ тўлашнинг энг кам миқдорининг 5 баравари (ёки 4 миллион 110 минг сўм), хонадонлар сони 501 тадан 1 000 тагача бўлган маҳаллада меҳнатга ҳақ тўлашнинг энг кам миқдорининг 5,5 баравари (ёки 4 миллион 521 минг сўм), хонадонлар сони 1 000 тадан ортиқ бўлган маҳаллада эса меҳнатга ҳақ тўлашнинг энг кам миқдорининг 6 баравари (ёки 4 миллион 932 минг сўм) миқдорида бўлади.

Ўзбекистонда меҳнатга ҳақ тўлашнинг энг кам миқдори 2021 йилнинг 1 сентябридан эътибор ойига 822 000 сўм қилиб белгиланган.

Аввалроқ Ўзбекистонда президент Ш. Мирзиёев кўрсатмаси билан ҳоким ёрдамчиси лавозими таъсис этилган. Маълумотларга кўра, янги йилдан жойларда 9 минг 309 нафар ҳоким ёрдамчиси иш бошлаган ва уларга кўмак бериш учун вазирликлардан 300 нафар раҳбар-ходимлар хизмат сафарига юборилган.

Айни пайтда мамлакатда бюджет тақчиллиги ва пандемия шароитида солиқ тўловчилар ҳисобидан миллионлаб сўм ойлик тўланадиган янги лавозимларнинг таъсис этилиши танқидларга сабаб бўлган.

Тошкентда туман суди блогер Миразиз Бозоров ишини кўришни бошлайди

Ўзбекистонлик блогер Миразиз Бозоров

Жиноят ишлари бўйича Миробод туман суди блогер Миразиз Бозоровнинг ишини кўриб чиқа бошлайди. Суднинг илк мажлиси, Олий суд интерактив хизматлар порталида жойлаштирилган жадвалга мувофиқ, 20 январь куни соат 11.00 га белгиланган.

Мазкур очиқ суд мажлисига туман суди судьяси Сардорбек Содиқов раис этиб тайинланган.

Ўзбекистон Жиноят кодексининг 139-моддаси 3-қисми г-банди (Туҳмат) бўйича айбланаётган Миразиз Бозоров иши бўйича тўрт киши, жумладан Аброр Мухтор Алий тахаллуси остида фаолият юритадиган блогер ва Ислом цивилизацияси маркази ходими Аброр Абдуазимов ҳамда яна бир таниқли блогер Шуҳрат Мусаев жабрланувчи ўлароқ кўрсатилган. Судда М. Бозоровнинг айбдорлиги исботланган тақдирда, унга нисбатан БҲМнинг 300 бараваридан 500 бараваригача жарима ёки 360 соатдан 400 соатгача мажбурий жамоат ишларига жалб этиш ёхуд бир йилдан уч йилгача озодликни чеклаш жазоси тайинланиши мумкин.

Блогер Миразиз Бозоров тармоқларда Ўзбекистон ҳукуматига қаратилган танқидлари ва ЛГБТ ҳуқуқларини ҳимоя қилувчи чиқишлари билан танилган.

Бозоров ўтган йилнинг 28 мартида Тошкентдаги уйи олдида қора ниқобли одамлар томонидан дўппослаб кетилгани ортидан бир ой касалхонада даволаниб чиққан. Блогерга ҳужумни инсон ҳуқуқларини ҳимоя қилувчи қатор халқаро ташкилотлар, шунингдек АҚШ ҳамда Британиянинг Ўзбекистондаги элчилари қоралаб чиққанлар ва ўзбек расмийларини ҳодиса юзасидан текширув ўтказишга чақирганлар.

М. Бозоров соғайиб чиқиши билан уй ҳибсига олинган. Унинг адвокати Сергей Майоров аввалроқ Озодликка айбловга блогернинг ижтимоий тармоқлардаги чиқишлари асос қилиб олинганини айтган.

Блогер Бозоров тақдирига халқаро диний эркинлик бўйича АҚШ комиссияси томонидан ўтган йил октябрида ёйинланган ҳисоботда ҳам эътибор қаратилган эди.

Давомини ўқинг

XS
SM
MD
LG