Линклар

Шошилинч хабар
10 декабр 2019, Тошкент вақти: 01:56

Ўзбекистон хабарлари

Жанубий Кореяда ўзбекистонлик талаба қурилаётган бинонинг юқори қаватидан қулади, оғир аҳволда

Сеул шаҳри.

29 май куни Жанубий Кореяда Ўзбекистон фуқароси Алишер Жовлиев қурилаётган бинонинг юқори қаватидан тушиб кетган ва оғир аҳволда “Кангвон” университети касалхонасига олиб борилган.

Бу ҳақда Ташқи ишлар вазирлиги матбуот хизмати хабар қилди.

Жабрланувчи Корея Республикасига 20 май куни Чунчон шаҳридаги “Кёнгин” университетининг тил ўрганиш курсида ўқиш учун келган ва пул ишлаш мақсадида жисмоний меҳнат билан шуғулланган.

"Дипломатик ваколатхона вазиятни назоратга олган, иш берувчи ва ватандошимиз даволанаётган касалхона раҳбарияти билан алоқа ўрнатган. Иш берувчи ташкилот ташкилий масалаларни ҳал қилиш ва даволаниш билан боғлиқ харажатларни қоплашга тайёрлигини билдирган", дейилади хабарда.

Айтилишича, Корея Республикасининг тегишли хизматлари томонидан текширув ишлари олиб борилмоқда.

Консуллик-ҳуқуқий департаменти Корея Республикаси ҳудудида бўлиб турган Ўзбекистон фуқароларига улар зарурат туғилган ҳолатларда Сеул шаҳридаги элчихона қуйидаги телефон рақамлари орқали мурожаат қилишлари мумкинлигини эслатиб ўтган: +82-02-574-65-54, +82-02-577-36-60.

Кун янгиликлари

ЙПХ инспектори маст ҳайдовчининг оёғидан отди

Иллюстратив сурат.

Тошкентда йўл-патруль хизмати инспектори ўзини агрессив тутган маст ҳайдовчи оёғига қарата ўқ узган. Бу ҳақда Тошкент шаҳар Ички ишлар бош бошқармаси маълумот тарқатди.

Ҳодиса 7 декабрдан 8 декабрга ўтар кечаси пойтахтнинг Чилонзор туманида содир бўлган. Қайд этилишича, “Лабо” русумли автомобилни бошқариб борган ҳайдовчи машинани бетон тўсиққа бориб урган, натижада “Лабо” ағдарилиб кетган.

Тахминларга кўра, ҳайдовчи психотроп воситалар ёки спиртли ичимликлар таъсири остида бўлган. Кутилмаганда у воқеа жойига етиб келган ЙПХ инспекторларига қаршилик кўрсата бошлаб,тинчланиш ва жамоат тартибини сақлаш ҳақидаги чақирувларга жавобан тажовузкорона ҳаракатлар қилган - ёнидаги пичоғини чиқариб, кимда ким яқинлашса, унга жароҳат етказиш билан таҳдид қилган.

“Ўтиб кетаётган ҳайдовчи ва пиёдалар тўхтаб томоша қила бошлаганлари сабабли ҳодиса атрофида одам кўпая бошлагач, фуқаролар ва ходимлар ҳаёти ва соғлиғи учун реал хавф юзага келди. Шунда ЙПХ инспектори кичик сержант Т.О. табель қуролини қўллашга қарор қилади. ЙПХ инспектори бир неча марта ҳайдовчини қурол қўллаши ҳақида огоҳлантиришига қарамасдан, ҳайдовчи ўзини агрессив тутишда давом этиб, ходимларга пичоқ санчмоқчи бўлган. Шундан сўнг ЙПХ инспектори йўриқномага мувофиқ ҳаракат қилиб, осмонга ўқ узди, бу ҳам қоидабузарга таъсир қилмаганидан сўнг, унинг оёғига қарата ўқ ўзди. Фақатгина шундан сўнг қоидабузар пичоғини ташлади. Унинг қўллари кишанланиб, тиббий ёрдам кўрсатиш учун шифохонага етказилди”, дейилади ИИББ хабарномасида.

Айтилишича, “Лабо” автомобили салонидан очиқ ҳолатдаги ароқ ва коньяк шишалари топилган.

Ҳайдовчининг шахсини аниқлаш бўйича олиб борилган ишлар натижасида унинг Шайхонтоҳур туманида яшовчи, муқаддам қасддан одам ўлдириш ва қасддан баданга енгил шикаст етказиш моддалари бўйича судланган 43 ёшли Нусрат И. экани маълум бўлган.

Маълумотларга кўра, ҳозирда Чилонзор туман прокуратураси ҳайдовчига нисбатан жинят иши қўзғатилиши масаласи билан шуғулланмоқда.

Чусовитина ХОҚ атлетлар комиссиясига номзод бўлди

Оксана Чусовитина.

Ўзбекистонлик гимнастикачи Оксана Чусовитина Халқаро Олимпия қўмитасининг (ХОҚ) атлетлар комиссияси таркибига номзодлик қилмоқда. Бу ҳақда Ўзбекистон Миллий олимпия қўмитаси маълумот тарқатди.

“Азизларим, Сизлар билан ажойиб янгиликни баҳам кўрмоқчиман. Бугун мен ХОҚдан ташкилотнинг атлетлар комиссияси аъзолигига номзодлардан бири эканим ҳақида мактуб олдим. Ўзбекистон Миллий олимпия қўмитаси ва ХОҚ номзодимни танлашгани учун уларга миннатдорчилик билдираман”, дея иқтибос келтирилади Чусовитина сўзларидан қўмита хабарномасида.

Қайд этилишича, ХОҚ президенти Томас Бах ушбу ўринга 30 нафар номзод кўриб чиқилаётгани ва Токио Олимпиадаси якунида уларнинг 4 нафари комиссиянинг тўлақонли аъзолигига қабул қилиниши ҳақида маълум қилган. Комиссия аъзолигига қачон қабул қилиниши тўғрисида маълумот берилмаган.

Аввалроқ Оксана Чусовитина 2020 йили Токиода бўлиб ўтадиган Олимпия ўйинларидан кейин катта спортдан кетиш ниятида эканини билдирган.

Оксана Чусовитина 1992 йил Барселонадаги Олимпиадада олтин, Пекиндаги Олимпиадада эса кумуш медалларини қўлга киритган.

Шунингдек, жаҳон чемпионатларида 3 мартадан олтин ва кумуш медал, 4 марта бронза медални қўлга киритган Чусовитина Осиё ўйинларининг 2 маротаба чемпиони бўлган.

Оксана Чусовитина гимнастика тарихида еттита Ёзги Олимпиадада иштирок этган ягона спортчидир. Унинг номи Гиннес рекордлар китобига киритилган. 2017 йилда унинг номи Гимнастика халқаро шуҳрат саройидан жой олган.

Оксана Чусовитина "Дўстлик", "Меҳнат шуҳрати" ва "Эл-юрт ҳурмати" орденлари билан тақдирланган.

Ўзбекистон билан Эрон ўртасида мунтазам парвозлар тикланди

Иллюстратив сурат.

Эроннинг Zagros Airlines авиаширкати 9 декабрдан Теҳрон-Тошкент-Теҳрон йўналиши бўйлаб мунтазам парвозларни амалга ошира бошлайди.

Бу ҳақда маълумот тарқатган Ўзбекистон Транспорт вазирлиги матбуот хизматига кўра, дастлабки босқичда авиаширкат мазкур йўналишда парвозларни ҳафтасига бир марта бажаради. Кейинчалик эса парвозлар ҳафтасига икки марта амалга оширилиши режаланган.

“Ўзбекистон ва Эрон ўртасида мунтазам парвозларнинг тикланиши икки мамлакат ўртасидаги савдо-иқтисодий, маданий-гуманитар ва сайёҳлик соҳаларидаги ҳамкорликни янада ривожлантиришга туртки беради”, дейилади вазирлик хабарномасида.

Шоир Абдували Қутбиддин оламдан ўтди

Абдували Қутбиддин (Kun.uz фотоси).

Ўзбекистонда хизмат кўрсатган журналист, истеъдодли шоир Абдували Қутбиддин (Қутбиддинов) 8 декабрь куни 59 ёшида Тошкентда вафот этди.

Кун.уз нашри маълумотларига кўра, шоир бетоблиги сабаб, икки ҳафтадан ортиқ вақт давомида шифохонада бўлган.

1960 йил 20 июнида Қаршида таваллуд топган Абдували Қутбиддин Тошкент Давлат университетининг журналистика факультетини (1983 й.) тамомлаган.

Ўз фаолиятини Самарқанд вилоятининг “Зарафшон” газетасида бошлаган шоир кейинчалик Тошкентдаги Ғафур Ғулом номидаги Адабиёт ва санъат нашриётида, “Ёзувчи” нашриётида, Ўзбекистон Миллий телерадиокомпаниясида ҳамда “Халқ сўзи” газетасида хизмат қилган.

Абдували Қутбиддиннинг “Найсон” (1988), “Ҳумо” (1989), “Бахтли йил” (1991), “Хаёл кечаси” (1994), “Сен ва сен учун” (1996), “Узоқдан олисга” (2007) каби китоблари нашр этилган.

Ўзбекистонда шахсни қўлга олишда видеотасвирга олиш мажбурий қилиб қўйилади

Иллюстратив сурат.

Шахсни ушлаб туриш, унга процессуал ҳуқуқларини тушунтириш каби жараёнларни, агар у ҳимоячидан воз кечса, бу ҳолатни ҳам мажбурий тарзда видеотасвирга тушириш тартибини ўрнатиш зарур. Бу ҳақда Ўзбекистон президенти Шавкат Мирзиёев мамлакат Конституцияси қабул қилинганининг 27 йиллиги муносабати билан сўзлаган нутқида билдирди.

Аввалроқ тинтув жараёнини, олинган кўрсатмаларни ҳодиса содир бўлган жойда текшириш, тергов эксперименти каби процессуал ҳаракатларни видеотасвир орқали қайд этиш шартлиги қонуний асосда белгиланган. Эндиликда бу ҳолат, президентга кўра, шахсни қўлга олиш жараёнига ҳам татбиқ этилиши лозим.

Ўз нутқида ҳуқуқни муҳофаза қилувчи органлар ходимлари томонидан ушланган шахс махсус бинога олиб келинганидан кейин бу ҳақда унинг оила аъзолари дарҳол хабардор қилиниши кераклигини ҳам урғулаган президент буни суриштирувчи, терговчи ва бошқа ваколатли шахснинг мажбурияти сифатида қонунда аниқ белгилаб қўйишни таклиф этди.

Президентнинг таъкидлашича, шахсни ушлаб туриш ва унинг ҳуқуқини чеклайдиган бошқа процессуал мажбурлов чораларини қўллаш ҳолатларини ҳисобга олишнинг электрон тизимига ўтиш зарур.

Давлат раҳбари бу борада ўтказилажак ислоҳотлар орасида 2020 йилдан прокурорлар қарори устидан судга шикоят қилиш тартиби ҳам жорий этилишига эътибор қаратди.

Президент Конституция куни муносабати билан 92 фуқарони афв этди

Президент Конституция куни муносабати билан афв этган 92 шахснинг 73 нафари жазони ижро этиш муассасаларидан озод қилинади.

19 нафарининг эса қамоқ муддати қисқартирилади.

ЎзА агентлигига кўра, президент Шавкат Мирзиёев «Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида"ги фармонни имзолаган.

Конституциянинг 93-моддаси 23-бандига асосан билиб-билмай жиноят содир этган, ҳозирги вақтда қилмишига чин кўнгилдан пушаймон бўлган ва тузалиш йўлига қатъий ўтган шахслар афв этилади.

Афв этилганларнинг 3 нафарини 60 ёшдан ошган шахслар, 3 нафарини аёллар ҳамда 79 нафарини тақиқланган ташкилотлар фаолиятида қатнашган шахслар ташкил этади.

Президент Шавкат Мирзиёев Конституция қабул қилинганининг 27 йиллигига бағишланган нутқида сўнгги йилларда жиноят содир этган шахсларни афв этиш бўйича 8 та фармон қабул қилингани, 4 мингдан зиёд шахс жазони ўташ жойларидан озод қилинганини айтди.

Тошкентда ИИВ йўлни нотўғри жойдан кесиб ўтган пиёдаларни тўхтатмоқда

Тошкент шаҳар ИИББ Йул ҳаракати хавфсизлиги бошқармаси ходимлари йўлни белгиланмаган жойдан кесиб ўтганларни тўхтатишни бошлади.

Тошкент шаҳар ИИББ берган хабарга кўра, 5 декабрь куни 2 минг 615 қоидабузарлик қайд этилган.

Бунинг 44 тасида йўлни белгиланмаган жойдан кесиб ўтмоқчи бўлган пиёдаларга нисбатан баённома расмийлаштирилган.

Аммо, баённомалар ортидан пиёдага қандай чора кўрилгани ҳақида маълумот берилмади.

ИИББ хабарида, шунингдек, 114 та ҳолатда пиёдалар йўлакчаси бўйлаб йўлни кесиб ўтмоқчи бўлган одамларни ўтказиб юбормаган ҳайдовчилар ҳам тўхтатилгани айтилган.

Президент Конституцияга бағишланган йиғилишда жамоатчилик назорати муҳимлигини айтди

“Ўзбекистон” халқаро анжуманлар саройида 7 декабрь куни Ўзбекистон Республикаси Конституцияси қабул қилинганининг 27 йиллигига бағишланган тантанали йиғилишда, давлат раҳбари расмий сайтининг хабар қилишича, "қонунийликни қарор топтириш, қонун бузилишига қарши курашиш борасида жамоатчилик ва оммавий ахборот воситалари “уйғонгани” қайд этилди".

Йиғилишда президент Мирзиёев Ўзбекистон халқини Конституция куни билан табриклади.

Расмий хабарга кўра, Президент ўз нутқида жамоатчилик назорати муҳимлигига алоҳида тўхталган.

"Масалан, Давлат бюджети муҳокамаси пайтида фуқаролар ва депутатлар фикри асосида мактаблар учун 50 миллиард сўм қўшимча маблағ ажратилгани ёки одамларнинг ҳақли эътирози туфайли дарахтларни сабабсиз кесишга қарши мораторий эълон қилингани ижобий баҳоланди. Булар аҳолининг ижтимоий жараёнларга нисбатан масъулият ва дахлдорлик ҳисси ошиб бораётганини кўрсатади" дейилади president.uz сайти хабарида.

Ўзбекистон президенти 92 фуқарони Конституция куни муносабати билан афв этди

Бу йил қанча пахта етиштирилгани маълум бўлди

Бўка туманилик теримчи аёллар.

Жорий йилда 7 миллион 130 минг тонна ғалла, 2 миллион 845 минг тонна пахта, 19 минг 600 тонна пилла, 21 миллион тонна мева-сабзавот, 400 минг тонна шоли, 2 миллион 600 минг тонна гўшт ва 11 миллион тонна сут маҳсулотлари, 8,1 миллиард дона тухум етиштирилди.

Бу маълумотлар президент Мирзиёевнинг Қишлоқ хўжалиги ходимлари куни муносабати билан Ўзбекистон қишлоқ хўжалиги ходимларига йўллаган табригида келтирилган.

Айтилишича, бу йил қишлоқ хўжалиги маҳсулотларидан жами 217 триллион 700 миллиард сўм ёки ўтган йилга нисбатан 12 фоиз кўп фойда олинган.

ДТМ: Абитуриентлардан йиғилган пулнинг 763 млн 374 минг 250 сўм сўми тушлик қилишга кетди

Абитуриент кириш имтиҳони топширмоқда

Давлат тест маркази 2019-2020-ўқув йилида абитуриентлардан йиғилган маблағларнинг сарфланиши бўйича ҳисобот эълон қилди.

ДТМ ўз ҳисоботида абитуриентлардан жами қанча маблағ йиғилгани тўғрисида маълумот бермаган, ҳужжатда берилган маълумотлар сарф-ҳаражатларга оид бўлиб, улар қуйидагилардир:

энг тезкор принтерлар хариди 840 млн 870 минг 316 сўм;

китоб тикадиган воситалар хариди - 199 млн 988 минг 154 сўм;

катта қувватли серверлар харид қилиш, уларни ўрнатиш ва ишга тушириш - 1 млрд 204 млн 206 минг 244 сўм;

бинолар ижараси учун - 1 млрд 942 млн 706 минг 950 сўм 18 тийин (Тошкент шаҳридаги бинолар бўйича);

гуруҳ назоратчилари иш ҳақи учун тўлов - 9 млрд 014 млн 745 минг 717 сўм 50 тийин;

гуруҳ назоратчилари учун тушлик сарфи - 763 млн 374 минг 250 сўм;

мобил алоқа воситалари тўлқинларини тўсувчи қурилмалар хариди - 688 млн 121 минг 120 сўм;

ичимлик суви хариди - 880 млн 494 минг 710 сўм;

шарикли ручкалар хариди - 336 млн 357 минг 552 сўм;

хизмат сафарлари учун тўловлар - 13 млн 262 минг 039 сўм 14 тийин;

Жами харажатлар: 15 млрд 884 млн 127 минг 052 сўм 82 тийин.

Билдирилишича, бунда бошқа биноларнинг коммунал ва ижара тўловлари, бир ой мобайнида шартнома асосида жалб этилган ёлланма ишчилар, техник воситаларнинг шу даврда мунтазам ишлаб туришини назорат қилиш бўйича мутахассислар иш ҳақи киритилмаган.

Булардан ташқари, маблағларнинг қолган қисмини қўшимча техника воситалари ва уларга захира қисмлар, тест синови жараёнлари ёзилган видео материалларни сақлаш учун катта хотирага эга қурилмалар, глушителлар хариди, хорижий экспертларни жалб этиш, хорижий мамлакатларда малака ошириш, кейинги ўқув йилида ўтказиладиган тест синовлари тайёргарлиги ва бошқалар учун йўналтириш режалаштирилган, дейилади ДТМ маълумотида.

Лондондан Тошкентга учган самолёт Навоийга қўнишга мажбур бўлди

Лондон-Тошкент HY-202 рейси туман сабабли Ислом Каримов номидаги халқаро аэропортга қўна олмади. Ҳаво кемаси командири Навоийдаги захира аэропортга мажбурий қўнишни амалга оширишга мажбур бўлди. Бу ҳақда Uzbekistan Airways авиакомпанияси матбуот хизмати хабар қилди

Туман, кўриш даражасининг ёмонлиги сабабли Uzbekistan Airways авиакомпаниясининг бир қанча рейслари бир оз ушланиб аэропортда қолиб кетаётганини қайд этди компания матбуот хизмати.

HY-423 Тошкент-Деҳли, HY-533 Тошкент-Бангкок рейслари об-ҳаво шароитлари яхшилангунига қадар кечиктирилди.

Президент 92 фуқарони Конституция куни муносабати билан афв этди

“Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Президент Фармони қабул қилинди.

Бу ҳақда хабар қилган Адлия вазирлигига кўра, фармонга мувофиқ, Ўзбекистон Республикаси Конституциянинг 93-моддаси 23-бандига асосан қилмишига чин кўнгилдан пушаймон бўлган ва тузалиш йўлига қатъий ўтган жазо муддатини ўтаётган 92 нафар фуқаро афв этилди.

Афв этилган шахсларнинг 20 нафари жазодан тўлиқ озод қилинади, 37 нафари жазони ўташдан муддатидан илгари шартли озод қилинади, 16 нафарига тайинланган жазо енгилроқ жазо билан алмаштирилади.

Шунингдек, 19 нафар шахсга тайинланган озодликдан маҳрум этиш жазосининг муддатлари қисқартирилади.

Афв этилганларнинг 3 нафарини 60 ёшдан ошган шахслар, 3 нафарини аёллар ҳамда 79 нафарини тақиқланган ташкилотлар фаолиятида қатнашган шахслар ташкил этади.

Ўтган йили президент Мирзиёев Ўзбекистон Конституцияси қабул қилинган куннинг 26 йиллиги муносабати билан 136 кишини афв қилган эди.

ТИВ ўринбосари: "Журналистлар билан мулоқот қилиш маданиятини кучайтириш зарур"

Ўзбекистон Республикаси ташқи ишлар вазирининг биринчи ўринбосари Илҳом Неъматов .

Дунёнинг кўплаб мамлакатларида журналистлар ҳақиқий тўртинчи ҳокимият даражасида. Либерал давлатларда журналистларнинг обрўси жуда баланд. Уларнинг фикри ҳам ички, ҳам ташқи сиёсатда муҳим таъсир кўрсатади.

Бу ҳақда Ўзбекистон Республикаси ташқи ишлар вазирининг биринчи ўринбосари Илҳом Неъматов Халқаро пресс-клубнинг навбатдаги тадбирида баёнот бергани тўғрисида маҳаллий нашр хабар қилди.

Фикрини давом этар экан, Илҳом Неъматов, шунингдек, бундай деган:

"Журналистларга бўлган муносабат негатив бўлса албатта, қоралайман. Ташқи ишлар вазирлиги ходимлари журналистлар билан мулоқотни этика, маданият ва ҳурмат томондан тўғрилашимиз керак, деб ҳисоблайди. Журналистлар билан уришиш яхшиликка олиб келмайди. Шуни билиш лозим. Европа давлатларида кимда-ким журналистлар билан алоқани бузса, охири унинг ўзи ишдан кетади ёки давлат обрўсига путур етади. Журналистларга бўлган ҳурматни оширишимиз керак. Улар билан мулоқот қилиш маданиятини кучайтириш зарур".

Шунингдек, Ташқи ишлар вазирлиги расмийси Ўзбекистон тўғрисида самимий мақолалар ёзаётган хориж ОАВ вакиллари, уларнинг позицияси ҳақида ҳам ўз муносабатини билдирди.

"Россияда элчи бўлиб ишлаганимда, деярли ҳар ҳафтада элчихонада турли тадбирлар ўтказардик. Улар шундай журналистки, агар бирор воқеа бўлмаса, уни ҳеч қачон бўлди, деб ёзмайди. Улар мутлақо муаллақ, мустақил журналист. Ҳеч кимга бўйсунмайди. Улар албатта, холисона баҳо беряпти, ўз фикрини айтяпти. Қандайдир тазйиқ орқали фикр бермаяпти, буюртма мақола эмас. Ўзбекистонда ҳақиқатан катта ўзгаришлар бўляпти", деган вазир ўринбосари Халқаро пресс-клубнинг навбатдаги тадбирида.

Фарғонадан Дўстликкача автобус қатнови очилди

Ўзбекистон-Қирғизистон давлат чегарасидаги Дўстлик назорат-ўтказиш пунктининг Қирғизистон томони.

6 декабрда “Uzautotrans service” корхонаси Фарғона шағридан Ўзбекистон-Қирғизистон давлат чегарасидаги Дўстлик назорат-ўтказиш пунктигача синов тариқасида автобус қатновини йўлга қўйди. Қирғизистоннинг Ўш шаҳри икки давлат ўртасидаги чегара чизиғидан 1 км наридан бошланади.

Ўзбекистон Республикаси Транспорт вазирлиги ахборот хизматига кўра, автобуслар “Фарғона шаҳар атрофи” автостанциясидан йўлга чиқиб, Андижон вилоятидаги “Дўстлик” чегара ўтказиш масканига қадар ҳаракатланмоқда.

Ушбу йўналиш масофаси 115 км.га тенг бўлиб, қатновлар Yutong автобусларида амалга ошириляпти. Йўлкира ҳаққи эса 15 000 сўм этиб белгиланган.

Хабарда айтилишича, дастлабки босқичда қатновлар икки томонлама йўналишда кунига жами 8 маротаба амалга оширилади.

ТИВ ўринбосари Ўзбекистоннинг Евроосиё иттифоқига кириш эҳтимоли тўғрисида фикр билдирди

Ўзбекистон Республикаси ташқи ишлар вазирининг биринчи ўринбосари Илҳом Неъматов .

Ўзбекистон Евроосиё иқтисодий иттифоқи масалаларида биринчи навбатда миллий манфаатларга таянади. Бу ҳақда Ўзбекистон Республикаси ташқи ишлар вазирининг биринчи ўринбосари Илҳом Неъматов Халқаро пресс-клубнинг навбатдаги тадбирида баёнот бергани тўғрисида маҳаллий нашр хабар қилди.

“Евроосиё иқтисодий иттифоқи масалаларида Ўзбекистон биринчи навбатда миллий манфаатларга таянади. Бу борада бизга ташқи босим йўқ”, - деган Ташқи ишлар вазирининг биринчи ўринбосари.

Мамлакатни 2030 йилгача комплекс ривожлантириш концепцияси лойиҳасига кўра, Ўзбекистон 2019-2021 йиллар оралиғида ЕОИИ аъзолари билан эркин савдо келишувини имзолаши, 2022-2025 йилларда эса ЕОИИга аъзо бўлиб кириш бўйича изчил тадқиқотлар ўтказиши кўзда тутилган.

Туризм қўмитаси Умра зиёратини уюштириш ҳуқуқини мустақил операторларга ҳам беришни таклиф қилди

"Умра" зиёратларини бозор муносабатлари ва фуқароларнинг эҳтиёжларидан келиб чиққан ҳолда ташкиллаштириш мақсадга мувофиқ ҳисобланади.

Бу ҳақда Ўзбекистон Республикаси Туризмни ривожлантириш қўмитаси баёнот берди.

"2018-2019 йилги мавсумда Ўзбекистон мусулмонлари идораси томонидан қанча фуқароларимиз “Умра” зиёратини амалга оширган бўлсалар, деярли шунча фуқароларимиз Қозоғистон, Қирғизистон, Туркия, БАА каби мамлакатлар орқали “Умра” сафарини амалга оширишган", дейилади баёнотда.

Туризм қўмитаси баёноти Ўзбекистон Миллий Ахборот агентлиги сайтида 3 декабрда эълон қилинган номли мақола ортидан пайдо бўлди.

Туризм қўмитаси фикрича, "Умра" зиёратларини уюштириш ҳуқуқини бошқа мустақил операторларга ҳам бериш мақсадга мувофиқ бўлади.

Қўмита маълумотларига кўра, "Туркия (156 та), Индонезия (101 та), Малайзия (71 та) ва қўшни Қозоғистон (30 тага яқин) мамлакатларида қонунчилик билан мустаҳкамланган аниқ тартиб-таомил асосида туризм фаолияти субъектлари томонидан “Умра” сафарлари юқори савияда ташкил этиб келинади. Бунинг натижасида эса, мазкур зиёратни амалга оширишга қодир бўлган кишиларнинг йиллаб навбат кутиши, сафар нархининг асоссиз кўтарилиши, фуқароларнинг айланма йўллар орқали зиёратни амалга ошириши ва тадбиркорлик субъектларининг яширин иқтисодиёт вакиллари сифатида сафарларни ташкил этиши каби нохуш ҳолатларга барҳам берилган".

“Умид”чилар Тошкент анжуманига йиғилади

Иллюстратив сурат.

“Умид” жамғармаси битирувчилари бир ойдан сўнг Тошкентда ўтказиладиган “Янгиланаётган Ўзбекистонга янги авлод кадрлари” халқаро анжуманига йиғилади. Анжуман 2020 йилнинг 3-4 январь кунлари ўтказилиши кутилмоқда. Бу ҳақда Ўзбекистон Вазирлар Маҳкамаси ҳузуридаги “Эл-юрт умиди” жамғармаси маълумот тарқатди.

Анжуман иштирокчилари “демократик янгиланиш ва мамлакат модернизацияси”, “таълим – ижтимоий тараққиётнинг асосий ҳаракатлантирувчи кучи”, “иқтисодий ислоҳотлар марказида инвестициявий иқлимни кучайтириш”, “мамлакатни инновацион ривожлантириш стратегияси ва устувор йўналишлари”, “қишлоқ хўжалигига илғор технологияларни жорий қилиш” каби секцияларда фаолият юритадилар.

Иштирокчиларга ўз тажрибаларидан келиб чиққан ҳолда тегишли секцияларда фаол иштирок этиб, бу соҳадаги ютуқ ва нуқсонларни кўрсатиш, мавжуд камчиликларни бартараф этиш бўйича таклифлар киритиш имкони берилади. Анжуман чоғида берилган таклиф ва танқидий мулоҳазалар кейинроқ тегишли соҳалардаги ҳокимият идораларига тақдим этилади.

Президент Мирзиёев ташаббуси билан 2018 йил сентябрида ташкил этилган “Эл-юрт умиди” жамғармаси Каримов даврида фаолият юритган “Умид” жамғармасининг маънавий вориси ўлароқ кўрилади.

Мазкур фонд ёрдами билан 1997 йилдан 2003 йилгача ўзбекистонлик 828 нафар ёш чет эллардаги нуфузли олий таълим даргоҳларида ўқиган. Бу кадрларнинг юртга қайтиб, Ўзбекистон тараққиёти учун хизмат қилиши кутилган. Бироқ хорижда ўқиб, чет эл ҳаёти билан танишган талабалардан бир гуруҳининг Ўзбекистонга қайтишдан бош тортиши "Умид"нинг миссиясини йўққа чиқарган.

Келаси ойдаги анжуманга хорижда яшаб, фаолият юритаётган “умид”чилардан қанчаси келиши ҳозирча маълум эмас.

Бухорода 58 ёшли кишини поезд уриб кетди

Иллюстратив сурат.

Шу йилнинг 5 декабрь куни Бухоро вилоятида темир йўлдан ўтаётган 58 ёшли Г. Х.ни юк электропоезди уриб юборган, натижада у воқеа жойида жон берган. Бу ҳақда Ўзбекистон Ички ишлар вазирлиги ҳузуридаги Тергов департаменти маълумот тарқатди.

Айтилишича, ҳодиса “Яккатут” ва “Мурғак” станциялари оралиғида - темир йўлнинг 4012- километрида содир бўлган.

Тергов департаменти воқеа жойида терговга қадар текширув ҳаракатлари олиб борилаётгани ва ҳодиса сабаблари ўрганилаётганини маълум қилган.

Бир неча кун аввал Озодлик Наманганда юк поезди 82 ёшли қарияни босиб кетгани ҳақида хабар қилганди.

Ўзбекистонда 2021 йилдан тотализаторларга рухсат берилади

Иллюстратив сурат.

Ўзбекистонда букмекерлик фаолиятини амалга оширишга рухсат берилади. Бу ҳақда президент Шавкат Мирзиёев томонидан 4 декабрь куни имзоланган “Ўзбекистонда футболни ривожлантиришни янги босқичга олиб чиқиш чора-тадбирлари тўғрисида”ги фармонда айтилади.

Фармондан келиб чиқилса, букмекерлик фаолиятига халқаро тажрибадан келиб чиқиб, спорт соҳасини, айниқса, футболни янада ривожлантириш, унинг инвестициявий жозибадорлигини ошириш, қўшимча маблағларни жалб қилиш мақсадида рухсат берилган.

2021 йил 1 январидан бошлаб шуғулланиш мумкин букмекерлик фаолиятини лицензиялаш Ўзбекистон Республикаси Капитал бозорини ривожлантириш агентлиги томонидан амалга оширилади.

Букмекерлик фаолияти билан шуғулланувчи тадбиркорлик субъектлари даромадларининг бир қисмини спорт турлари, шу жумладан, футболни ривожлантириш учун йўналтириш кўзда тутилмоқда.

Россиядаги “Сбербанк” банкоматлари мижозларга ўзбек тилида хизмат кўрсата бошлади

Иллюстратив сурат.

Россиядаги “Сбербанк” банкоматларининг 80 фоизидан кўпроғида мижозларга ўзбек ва тожик тилларида хизмат кўрсатиш бошланди, дея хабар қилади Ведомости нашри “Сбербанк” матбуот хизмати маълумотларига таянган ҳолда.

Қайд этилишича, эндиликда ўзбекистонлик мижозлар бу банкоматлар орқали ўз тилида нақд пул ечиб олиш, ҳисобдаги пулни текшириш ҳамда мобиль алоқа учун тўловларни амалга ошириш каби операцияларни бажара оладилар.

Айни пайтда Сбербанк офисларида чет элликлар орасида оммабоп бўлган маҳсулотлар бўйича инглиз, ўзбек ва тожик тилларида тақдимотлар ўтказилмоқда.

Сбербанк масъуллари бу ишлардан мақсад банк билан мижоз ўртасидаги мулоқотни осонлаштириш эканини урғулаганлар.

АҚШ санкция жорий қилган ҳакерлар орасида ўзбекистонлик ҳам бор

Иллюстратив сурат.

АҚШ дастур таъминоти билан боғлиқ фирибгарлик ва банклардан кўп миллионли маблағларни ўмариш билан шуғулланган Evil Corp (“Ёвузлик корпорацияси”) ҳакерлар гуруҳи билан алоқадорликда айбланмиш Россиянинг етти юридик шахси ва 17 нафар жисмоний шахсга қарши санкциялар жорий қилди. АҚШ Молия вазирлиги сайтида ёйинланмиш кибержиноятда айбланганлар рўйхати ичида ўзбекистонлик 29 ёшли Азамат Сафаров ҳам бор.

Илова этилган маълумотларга кўра, Азамат Сафаров 1990 йил 26 мартида Ўзбекистонда туғилган, шу мамлакат паспортига эга, аммо Москвада яшайди ва Evil Corp билан алоқага эга. Рўйхатга Испания, Греция, Исроил, Россия ва Украина ватандошлари ҳам киритилган.

АҚШ Молия вазири Стивен Мнучин Evil Corp гуруҳини “киберфазода дунёдаги энг фаол криминал ташкилот”лардан бири, деб атади. Вазирлик хабарномасида келтирилишича, бу гуруҳ ўз фаолияти билан миллионлаб долларлик зарар етказган, шу жумладан, 40 та мамлакатдаги 300 банк ва молиявий ташкилотлардан 100 миллион доллар ўғирлаган.

Dridex gang номи билан ҳам таниш бўлган Evil Corp компьютерларга вирус юқтириш ва молиявий ташкилотлардаги маълумотларни йиғиш учун Dridex вирусидан фойдаланган. Молия вазирлиги маълумотларига кўра, гуруҳ кўп йиллардан бери фаолият кўрсатиб келади. Гуруҳ лидери ФСБнинг (Россия Федерал хавфсизлик хизмати) собиқ ходими Максим Якубец бўлиб, у 2017 йилгача мазкур ташкилотда ишлаган.

АҚШ бу гуруҳ ҳакерларини Россия расмийлари билан ҳамкорлик қилганликда айблаган, лекин Россия томони бу айбловларни рад этган.

Президент қизи Ноширлик коллежи биносининг очилишида қатнашди

Президент тўнғич қизи алвон гилам устида қарши олинди.

5 декабрь куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги раҳбарлари – Комил Алламжонов ва унинг ўринбосари Саида Мирзиëева янги ремонт қилинган Ноширлик коллежи биносининг очилишида қатнашган.

Бу ҳақда агентлик директори Комил Алламжонов ўз Facebook саҳифасида хабар қилди.

Бугун Агентлигимиз тасарруфидаги Ноширлик коллежининг капитал таъмирдан чиқарилган биносини ўқувчилар учун фойдаланишга топширдик.

Коллеж келгусида етук матбаачилар ва ноширларни тайёрлайдиган муҳим масканга айланади, деб ишонаман. Бунинг учун барча шароит ва имконият етарли”¸ деб ëзди Алламжонов.

АОКА раҳбари бу хабарига очилиш маросимига оид суратларни ҳам илова қилган.

Бу расмлардан президент тўнғич қизининг алвон гилам устида қарши олингани¸ очилиш маросимида қизил лентани олтин дастали қайчи билан қирқаëтгани кўрилади.

Тилла суви югуртирилган қайчи.
Тилла суви югуртирилган қайчи.

29 ноябрь куни президент Шавкат Мирзиëевнинг Тошкентга келган Марказий Осиë раҳбарлари билан бирга қор босган боғдаги арчага тилла суви югуртирилган челакдан сув қуйгани суратлари эълон қилинган эди.

Алишер Усмонов $100 миллион ажратган Тошкентдаги Ислом цивилизация марказида ëнғин чиқди (ВИДЕО)

Ўтган йил июнь ойида Шавкат Мирзиëев марказ қурилишини бориб кўрган эди.

Тошкент шаҳар Ëнғин хавфсизлиги хизмати бошқармаси 5 декабрь куни тушдан кейин янги қурилаëтган Ислом цивилизация марказида ëнғин чиққанини тасдиқлади.

Бошқарма баëнотига кўра¸ “соат 16:38 да, Олмазор тумани, Зарқайнар 1-тор кўчасида жойлашган янги қурилаётган Ислом цивилизация маркази ҳудудида 150 кв.м. майдонида теплоизоляция (пенопласт) маҳсулотлари ёнган”.

Расмий баëнотдан тушунилишича¸ ëнғин оқибатида янги қурилаётган бинога зарар етмаган.

Ёнғин ўчириш жанговар бўлинмалари чақирилган манзилга соат 16:44да етиб борган ва кўрилган тезкор чора ва ҳаракатлар натижасида ёнғин соат 16:54да қуршаб олиниб, соат 17:06да ўчирилган”¸ дейилади бошқарма хабарида.

Тошкент ислом цивилизация маркази бош ҳомийси асли наманганлик миллиардер Алишер Усмоновдир.

Ўтган йил Forbes журнали мухбири билан суҳбатда Усмонов бу марказ қурилишига “аллақачон 100 миллион доллар ëтқизганини” айтган эди.

Турк ширкати билан пуллик йўл қуриш бўйича музокаралар натижасиз тугади

Ҳукумат иддаосича¸ Тошекнт-Самарқанд ўртасида қурилажак пулли магистраль йўл орадаги 300 кмлик масофани ҳозирги 4 соат ўрнига¸ 2 соатда босиб ўтиш имконини беради.

Ўзбекистон Бош вазирининг инвестиция ва ташқи иқтисодий алоқалар бўйича ўринбосари Элëр Ғаниев Туркиянинг Cengiz-Kolin-Kalyon консорциуми билан музокаралар самарасиз тугаганини билдирди.

2018 йил сентябрь ойида ҳукумат бу компания билан Тошкент ва Самарқанд ўртасида пулли магистраль қуриш бўйича келишувга эришилганини эълон қилган эди.

2018 йил июлида эса¸ бу лойиҳани Германиянинг GP Papenburg Baugesell schaft компанияси амалга ошириши эълон қилинган эди.

Бу режанинг амалга ошмагани ҳақида ҳукумат расмий изоҳ берган эмас.

Туркия консорциуми билан музокаралар¸ Элëр Ғаниевга кўра¸ нарх борасидаги келишмовчилик сабаб самарасиз тугаган.

Тошкент¸ Ғаниев иддаосича¸ турк ширкатининг Тошкент-Самарқанд йўлига ўрнатадиган қиммат нархига кўнишни истамаган.

Музокараларнинг айнан қайси сабабга кўра муваффақиятсиз тугагани ҳақида ҳозирча Озодлик мустақил маълумотга эга эмас.

Мирзиëев ҳокимиятга келгандан сўнг аксар йирик лойиҳаларнинг хориж инвесторларига берилгани эълон қилинди.

Аммо ўтказилган журналистик суриштирувлар натижасида «хориж ширкати» деб аталган аксар компанияларнинг ўзбекистонликлар номига чет элда расмийлаштирилган¸ асл эгаси бекитилган қобиқ ширкатлар экани аниқланди.

Масалан¸ Ўзбекистон тарихидаги энг қиммат лойиҳа – Tashkent Cityдаги тўртта лот қурилиши берилган “хориж инвесторлари”¸ британиялик тадқиқотчи ўтказган суриштирув натижасида¸ аслида Тошкент шаҳар ҳокими Жаҳонгир Ортиқхўжаевга тегишли ширкатлар бўлиб чиқди.

Келаси йилдан 10 та олий ўқув юрти ўз-ўзини молиялаштиришга ўтади

Вазирлар Маҳкамасининг 3 декабрь кунги қарори билан 2020 йил 1 январдан бошлаб, мамлакатдаги 10 та олий таълим муассасаси тажриба-синов тариқасида ўзини ўзи молиялаштириш тизимига ўтади.

Бу ҳақда Адлия вазирлигининг Ҳуқуқий ахборот Telegram канали 5 декабрь куни хабар тарқатди.

Бу рўйхатга Самарқанд давлат чет тиллари институти¸ Самарқанд иқтисодиёт ва сервис институти¸ Тошкент давлат юридик университети¸ Тошкент давлат иқтисодиёт университети¸ Тошкент молия институти¸ Тошкент давлат шарқшунослик институти¸ Тошкент фармацевтика инситути¸ Ўзбекистон давлат жаҳон тиллари университети¸ Урганч давлат университети ва Тошкент темир йўл муҳандислари институти киритилган.

Бу олийгоҳларнинг тажриба рўйхатига киритилишда¸ расмий хабарда ëзилишича¸ “уларнинг илмий педагогик салоҳияти юқорилиги, молиявий фаолиятининг барқарорлиги, моддий-техника базаси етарли даражадалиги, таълим хизматлари бозорида мазкур мутахассисликларга талаб юқорилиги инобатга олинган".

Мазкур рўйхатга киритилган ОТМлар Ўзбекистонда энг кўп абитуриент ҳужжат топширадиган¸ коррупция даражаси ҳам баланд экани айтиладиган олийгоҳлар саналади.

Ҳукумат қарорига кўра¸ мазкур 10 олийгоҳларда “тўлов-контракти асосида таълим олаётган талабаларнинг контракт тўлаш муддатлари томонлар келишувига кўра шартнома асосида белгиланади”.

Бу эса¸ келаси ўқув йилидан мазкур ОТМлардаги контракт нархининг ўзгаришини назарда тутади.

Президент Шавкат Мирзиëев жорий йил 11 июль куни 2020 йилдан бошлаб айрим ОТМлар босқичма-босқич ўзини ўзи молиялаштириш тизимига ўтишини кўзда тутувчи 5763-сонли қарорга қўл қўйган эди.

Давомини ўқинг

Кўрмай қолган бўлсангиз

XS
SM
MD
LG