Линклар

Шошилинч хабар
08 декабр 2019, Тошкент вақти: 10:38

Ўзбекистон хабарлари

Расман: Самарқандда қизамиқ тарқалишига чет эл фуқаролари сабабчи бўлди

Иллюстратив сурат.

Самарқанд вилоятида қизамиқ касаллигининг тарқалишига қизамиққа қарши эмланмаган чет эл фуқаролари сабаб бўлди. Бу ҳақда Ўзбекистон Соғлиқни сақлаш вазирлиги 6 август куни расман маълум қилди.

Вазирликнинг билдиришича, жорий йил бошидан бери Самарқанд вилоятида 419 одам қизамиққа чалингани гумон қилинган, аммо улардан фақат 29 нафарида мазкур касаллик мавжудлиги тасдиқланган. Қизамиқнинг олдини олиш мақсадида Самарқандда қўшимча равишда 11 мингдан ортиқ одам эмланган. Қизамиқдан ўлим ҳолатлари қайд этилмаган.

“Жаҳон соғлиқни сақлаш ташкилоти мамлакатимизга қизамиқ вируси бошқа мамлакатлардан кириб келгани тўғрисида хулосага эга”, дейилади расмий баёнотда.

Соғлиқни сақлаш вазирлиги ушбу касаллик тарқалишининг олдини олиш ва ўчоқларини тўлиқ бартараф этиш мақсадида қўшимча равишда 100000 доза қизамиқ вакцинаси сотиб олиниб, эмлаш учун жойларга етказилганини ҳам маълум қилди.

“Шунингдек, қизамиқ касаллигини ўз вақтида аниқлаш, тарқалиб кетишининг олдини олиш ва даволаш ҳамда болаларни вакцина профилактикаси билан қамраб олиш мақсадида эпидемиологик назорат кучайтирилди”, дейилади хабарда.

5 август куни Ўзбек матбуотида Самарқандда қизамиқ эпидемияси кузатилаётгани ва 31 одам бу касалликка чалингани тўғрисида хабарлар пайдо бўлганди.

Кун янгиликлари

Президент Конституцияга бағишланган йиғилишда жамоатчилик назорати муҳимлигини айтди

“Ўзбекистон” халқаро анжуманлар саройида 7 декабрь куни Ўзбекистон Республикаси Конституцияси қабул қилинганининг 27 йиллигига бағишланган тантанали йиғилишда, давлат раҳбари расмий сайтининг хабар қилишича, "қонунийликни қарор топтириш, қонун бузилишига қарши курашиш борасида жамоатчилик ва оммавий ахборот воситалари “уйғонгани” қайд этилди".

Йиғилишда президент Мирзиёев Ўзбекистон халқини Конституция куни билан табриклади.

Расмий хабарга кўра, Президент ўз нутқида жамоатчилик назорати муҳимлигига алоҳида тўхталган.

"Масалан, Давлат бюджети муҳокамаси пайтида фуқаролар ва депутатлар фикри асосида мактаблар учун 50 миллиард сўм қўшимча маблағ ажратилгани ёки одамларнинг ҳақли эътирози туфайли дарахтларни сабабсиз кесишга қарши мораторий эълон қилингани ижобий баҳоланди. Булар аҳолининг ижтимоий жараёнларга нисбатан масъулият ва дахлдорлик ҳисси ошиб бораётганини кўрсатади" дейилади president.uz сайти хабарида.

Ўзбекистон президенти 92 фуқарони Конституция куни муносабати билан афв этди

Бу йил қанча пахта етиштирилгани маълум бўлди

Бўка туманилик теримчи аёллар.

Жорий йилда 7 миллион 130 минг тонна ғалла, 2 миллион 845 минг тонна пахта, 19 минг 600 тонна пилла, 21 миллион тонна мева-сабзавот, 400 минг тонна шоли, 2 миллион 600 минг тонна гўшт ва 11 миллион тонна сут маҳсулотлари, 8,1 миллиард дона тухум етиштирилди.

Бу маълумотлар президент Мирзиёевнинг Қишлоқ хўжалиги ходимлари куни муносабати билан Ўзбекистон қишлоқ хўжалиги ходимларига йўллаган табригида келтирилган.

Айтилишича, бу йил қишлоқ хўжалиги маҳсулотларидан жами 217 триллион 700 миллиард сўм ёки ўтган йилга нисбатан 12 фоиз кўп фойда олинган.

ДТМ: Абитуриентлардан йиғилган пулнинг 763 млн 374 минг 250 сўм сўми тушлик қилишга кетди

Абитуриент кириш имтиҳони топширмоқда

Давлат тест маркази 2019-2020-ўқув йилида абитуриентлардан йиғилган маблағларнинг сарфланиши бўйича ҳисобот эълон қилди.

ДТМ ўз ҳисоботида абитуриентлардан жами қанча маблағ йиғилгани тўғрисида маълумот бермаган, ҳужжатда берилган маълумотлар сарф-ҳаражатларга оид бўлиб, улар қуйидагилардир:

энг тезкор принтерлар хариди 840 млн 870 минг 316 сўм;

китоб тикадиган воситалар хариди - 199 млн 988 минг 154 сўм;

катта қувватли серверлар харид қилиш, уларни ўрнатиш ва ишга тушириш - 1 млрд 204 млн 206 минг 244 сўм;

бинолар ижараси учун - 1 млрд 942 млн 706 минг 950 сўм 18 тийин (Тошкент шаҳридаги бинолар бўйича);

гуруҳ назоратчилари иш ҳақи учун тўлов - 9 млрд 014 млн 745 минг 717 сўм 50 тийин;

гуруҳ назоратчилари учун тушлик сарфи - 763 млн 374 минг 250 сўм;

мобил алоқа воситалари тўлқинларини тўсувчи қурилмалар хариди - 688 млн 121 минг 120 сўм;

ичимлик суви хариди - 880 млн 494 минг 710 сўм;

шарикли ручкалар хариди - 336 млн 357 минг 552 сўм;

хизмат сафарлари учун тўловлар - 13 млн 262 минг 039 сўм 14 тийин;

Жами харажатлар: 15 млрд 884 млн 127 минг 052 сўм 82 тийин.

Билдирилишича, бунда бошқа биноларнинг коммунал ва ижара тўловлари, бир ой мобайнида шартнома асосида жалб этилган ёлланма ишчилар, техник воситаларнинг шу даврда мунтазам ишлаб туришини назорат қилиш бўйича мутахассислар иш ҳақи киритилмаган.

Булардан ташқари, маблағларнинг қолган қисмини қўшимча техника воситалари ва уларга захира қисмлар, тест синови жараёнлари ёзилган видео материалларни сақлаш учун катта хотирага эга қурилмалар, глушителлар хариди, хорижий экспертларни жалб этиш, хорижий мамлакатларда малака ошириш, кейинги ўқув йилида ўтказиладиган тест синовлари тайёргарлиги ва бошқалар учун йўналтириш режалаштирилган, дейилади ДТМ маълумотида.

Лондондан Тошкентга учган самолёт Навоийга қўнишга мажбур бўлди

Лондон-Тошкент HY-202 рейси туман сабабли Ислом Каримов номидаги халқаро аэропортга қўна олмади. Ҳаво кемаси командири Навоийдаги захира аэропортга мажбурий қўнишни амалга оширишга мажбур бўлди. Бу ҳақда Uzbekistan Airways авиакомпанияси матбуот хизмати хабар қилди

Туман, кўриш даражасининг ёмонлиги сабабли Uzbekistan Airways авиакомпаниясининг бир қанча рейслари бир оз ушланиб аэропортда қолиб кетаётганини қайд этди компания матбуот хизмати.

HY-423 Тошкент-Деҳли, HY-533 Тошкент-Бангкок рейслари об-ҳаво шароитлари яхшилангунига қадар кечиктирилди.

Президент 92 фуқарони Конституция куни муносабати билан афв этди

“Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Президент Фармони қабул қилинди.

Бу ҳақда хабар қилган Адлия вазирлигига кўра, фармонга мувофиқ, Ўзбекистон Республикаси Конституциянинг 93-моддаси 23-бандига асосан қилмишига чин кўнгилдан пушаймон бўлган ва тузалиш йўлига қатъий ўтган жазо муддатини ўтаётган 92 нафар фуқаро афв этилди.

Афв этилган шахсларнинг 20 нафари жазодан тўлиқ озод қилинади, 37 нафари жазони ўташдан муддатидан илгари шартли озод қилинади, 16 нафарига тайинланган жазо енгилроқ жазо билан алмаштирилади.

Шунингдек, 19 нафар шахсга тайинланган озодликдан маҳрум этиш жазосининг муддатлари қисқартирилади.

Афв этилганларнинг 3 нафарини 60 ёшдан ошган шахслар, 3 нафарини аёллар ҳамда 79 нафарини тақиқланган ташкилотлар фаолиятида қатнашган шахслар ташкил этади.

Ўтган йили президент Мирзиёев Ўзбекистон Конституцияси қабул қилинган куннинг 26 йиллиги муносабати билан 136 кишини афв қилган эди.

ТИВ ўринбосари: "Журналистлар билан мулоқот қилиш маданиятини кучайтириш зарур"

Ўзбекистон Республикаси ташқи ишлар вазирининг биринчи ўринбосари Илҳом Неъматов .

Дунёнинг кўплаб мамлакатларида журналистлар ҳақиқий тўртинчи ҳокимият даражасида. Либерал давлатларда журналистларнинг обрўси жуда баланд. Уларнинг фикри ҳам ички, ҳам ташқи сиёсатда муҳим таъсир кўрсатади.

Бу ҳақда Ўзбекистон Республикаси ташқи ишлар вазирининг биринчи ўринбосари Илҳом Неъматов Халқаро пресс-клубнинг навбатдаги тадбирида баёнот бергани тўғрисида маҳаллий нашр хабар қилди.

Фикрини давом этар экан, Илҳом Неъматов, шунингдек, бундай деган:

"Журналистларга бўлган муносабат негатив бўлса албатта, қоралайман. Ташқи ишлар вазирлиги ходимлари журналистлар билан мулоқотни этика, маданият ва ҳурмат томондан тўғрилашимиз керак, деб ҳисоблайди. Журналистлар билан уришиш яхшиликка олиб келмайди. Шуни билиш лозим. Европа давлатларида кимда-ким журналистлар билан алоқани бузса, охири унинг ўзи ишдан кетади ёки давлат обрўсига путур етади. Журналистларга бўлган ҳурматни оширишимиз керак. Улар билан мулоқот қилиш маданиятини кучайтириш зарур".

Шунингдек, Ташқи ишлар вазирлиги расмийси Ўзбекистон тўғрисида самимий мақолалар ёзаётган хориж ОАВ вакиллари, уларнинг позицияси ҳақида ҳам ўз муносабатини билдирди.

"Россияда элчи бўлиб ишлаганимда, деярли ҳар ҳафтада элчихонада турли тадбирлар ўтказардик. Улар шундай журналистки, агар бирор воқеа бўлмаса, уни ҳеч қачон бўлди, деб ёзмайди. Улар мутлақо муаллақ, мустақил журналист. Ҳеч кимга бўйсунмайди. Улар албатта, холисона баҳо беряпти, ўз фикрини айтяпти. Қандайдир тазйиқ орқали фикр бермаяпти, буюртма мақола эмас. Ўзбекистонда ҳақиқатан катта ўзгаришлар бўляпти", деган вазир ўринбосари Халқаро пресс-клубнинг навбатдаги тадбирида.

Фарғонадан Дўстликкача автобус қатнови очилди

Ўзбекистон-Қирғизистон давлат чегарасидаги Дўстлик назорат-ўтказиш пунктининг Қирғизистон томони.

6 декабрда “Uzautotrans service” корхонаси Фарғона шағридан Ўзбекистон-Қирғизистон давлат чегарасидаги Дўстлик назорат-ўтказиш пунктигача синов тариқасида автобус қатновини йўлга қўйди. Қирғизистоннинг Ўш шаҳри икки давлат ўртасидаги чегара чизиғидан 1 км наридан бошланади.

Ўзбекистон Республикаси Транспорт вазирлиги ахборот хизматига кўра, автобуслар “Фарғона шаҳар атрофи” автостанциясидан йўлга чиқиб, Андижон вилоятидаги “Дўстлик” чегара ўтказиш масканига қадар ҳаракатланмоқда.

Ушбу йўналиш масофаси 115 км.га тенг бўлиб, қатновлар Yutong автобусларида амалга ошириляпти. Йўлкира ҳаққи эса 15 000 сўм этиб белгиланган.

Хабарда айтилишича, дастлабки босқичда қатновлар икки томонлама йўналишда кунига жами 8 маротаба амалга оширилади.

ТИВ ўринбосари Ўзбекистоннинг Евроосиё иттифоқига кириш эҳтимоли тўғрисида фикр билдирди

Ўзбекистон Республикаси ташқи ишлар вазирининг биринчи ўринбосари Илҳом Неъматов .

Ўзбекистон Евроосиё иқтисодий иттифоқи масалаларида биринчи навбатда миллий манфаатларга таянади. Бу ҳақда Ўзбекистон Республикаси ташқи ишлар вазирининг биринчи ўринбосари Илҳом Неъматов Халқаро пресс-клубнинг навбатдаги тадбирида баёнот бергани тўғрисида маҳаллий нашр хабар қилди.

“Евроосиё иқтисодий иттифоқи масалаларида Ўзбекистон биринчи навбатда миллий манфаатларга таянади. Бу борада бизга ташқи босим йўқ”, - деган Ташқи ишлар вазирининг биринчи ўринбосари.

Мамлакатни 2030 йилгача комплекс ривожлантириш концепцияси лойиҳасига кўра, Ўзбекистон 2019-2021 йиллар оралиғида ЕОИИ аъзолари билан эркин савдо келишувини имзолаши, 2022-2025 йилларда эса ЕОИИга аъзо бўлиб кириш бўйича изчил тадқиқотлар ўтказиши кўзда тутилган.

Туризм қўмитаси Умра зиёратини уюштириш ҳуқуқини мустақил операторларга ҳам беришни таклиф қилди

"Умра" зиёратларини бозор муносабатлари ва фуқароларнинг эҳтиёжларидан келиб чиққан ҳолда ташкиллаштириш мақсадга мувофиқ ҳисобланади.

Бу ҳақда Ўзбекистон Республикаси Туризмни ривожлантириш қўмитаси баёнот берди.

"2018-2019 йилги мавсумда Ўзбекистон мусулмонлари идораси томонидан қанча фуқароларимиз “Умра” зиёратини амалга оширган бўлсалар, деярли шунча фуқароларимиз Қозоғистон, Қирғизистон, Туркия, БАА каби мамлакатлар орқали “Умра” сафарини амалга оширишган", дейилади баёнотда.

Туризм қўмитаси баёноти Ўзбекистон Миллий Ахборот агентлиги сайтида 3 декабрда эълон қилинган номли мақола ортидан пайдо бўлди.

Туризм қўмитаси фикрича, "Умра" зиёратларини уюштириш ҳуқуқини бошқа мустақил операторларга ҳам бериш мақсадга мувофиқ бўлади.

Қўмита маълумотларига кўра, "Туркия (156 та), Индонезия (101 та), Малайзия (71 та) ва қўшни Қозоғистон (30 тага яқин) мамлакатларида қонунчилик билан мустаҳкамланган аниқ тартиб-таомил асосида туризм фаолияти субъектлари томонидан “Умра” сафарлари юқори савияда ташкил этиб келинади. Бунинг натижасида эса, мазкур зиёратни амалга оширишга қодир бўлган кишиларнинг йиллаб навбат кутиши, сафар нархининг асоссиз кўтарилиши, фуқароларнинг айланма йўллар орқали зиёратни амалга ошириши ва тадбиркорлик субъектларининг яширин иқтисодиёт вакиллари сифатида сафарларни ташкил этиши каби нохуш ҳолатларга барҳам берилган".

“Умид”чилар Тошкент анжуманига йиғилади

Иллюстратив сурат.

“Умид” жамғармаси битирувчилари бир ойдан сўнг Тошкентда ўтказиладиган “Янгиланаётган Ўзбекистонга янги авлод кадрлари” халқаро анжуманига йиғилади. Анжуман 2020 йилнинг 3-4 январь кунлари ўтказилиши кутилмоқда. Бу ҳақда Ўзбекистон Вазирлар Маҳкамаси ҳузуридаги “Эл-юрт умиди” жамғармаси маълумот тарқатди.

Анжуман иштирокчилари “демократик янгиланиш ва мамлакат модернизацияси”, “таълим – ижтимоий тараққиётнинг асосий ҳаракатлантирувчи кучи”, “иқтисодий ислоҳотлар марказида инвестициявий иқлимни кучайтириш”, “мамлакатни инновацион ривожлантириш стратегияси ва устувор йўналишлари”, “қишлоқ хўжалигига илғор технологияларни жорий қилиш” каби секцияларда фаолият юритадилар.

Иштирокчиларга ўз тажрибаларидан келиб чиққан ҳолда тегишли секцияларда фаол иштирок этиб, бу соҳадаги ютуқ ва нуқсонларни кўрсатиш, мавжуд камчиликларни бартараф этиш бўйича таклифлар киритиш имкони берилади. Анжуман чоғида берилган таклиф ва танқидий мулоҳазалар кейинроқ тегишли соҳалардаги ҳокимият идораларига тақдим этилади.

Президент Мирзиёев ташаббуси билан 2018 йил сентябрида ташкил этилган “Эл-юрт умиди” жамғармаси Каримов даврида фаолият юритган “Умид” жамғармасининг маънавий вориси ўлароқ кўрилади.

Мазкур фонд ёрдами билан 1997 йилдан 2003 йилгача ўзбекистонлик 828 нафар ёш чет эллардаги нуфузли олий таълим даргоҳларида ўқиган. Бу кадрларнинг юртга қайтиб, Ўзбекистон тараққиёти учун хизмат қилиши кутилган. Бироқ хорижда ўқиб, чет эл ҳаёти билан танишган талабалардан бир гуруҳининг Ўзбекистонга қайтишдан бош тортиши "Умид"нинг миссиясини йўққа чиқарган.

Келаси ойдаги анжуманга хорижда яшаб, фаолият юритаётган “умид”чилардан қанчаси келиши ҳозирча маълум эмас.

Бухорода 58 ёшли кишини поезд уриб кетди

Иллюстратив сурат.

Шу йилнинг 5 декабрь куни Бухоро вилоятида темир йўлдан ўтаётган 58 ёшли Г. Х.ни юк электропоезди уриб юборган, натижада у воқеа жойида жон берган. Бу ҳақда Ўзбекистон Ички ишлар вазирлиги ҳузуридаги Тергов департаменти маълумот тарқатди.

Айтилишича, ҳодиса “Яккатут” ва “Мурғак” станциялари оралиғида - темир йўлнинг 4012- километрида содир бўлган.

Тергов департаменти воқеа жойида терговга қадар текширув ҳаракатлари олиб борилаётгани ва ҳодиса сабаблари ўрганилаётганини маълум қилган.

Бир неча кун аввал Озодлик Наманганда юк поезди 82 ёшли қарияни босиб кетгани ҳақида хабар қилганди.

Ўзбекистонда 2021 йилдан тотализаторларга рухсат берилади

Иллюстратив сурат.

Ўзбекистонда букмекерлик фаолиятини амалга оширишга рухсат берилади. Бу ҳақда президент Шавкат Мирзиёев томонидан 4 декабрь куни имзоланган “Ўзбекистонда футболни ривожлантиришни янги босқичга олиб чиқиш чора-тадбирлари тўғрисида”ги фармонда айтилади.

Фармондан келиб чиқилса, букмекерлик фаолиятига халқаро тажрибадан келиб чиқиб, спорт соҳасини, айниқса, футболни янада ривожлантириш, унинг инвестициявий жозибадорлигини ошириш, қўшимча маблағларни жалб қилиш мақсадида рухсат берилган.

2021 йил 1 январидан бошлаб шуғулланиш мумкин букмекерлик фаолиятини лицензиялаш Ўзбекистон Республикаси Капитал бозорини ривожлантириш агентлиги томонидан амалга оширилади.

Букмекерлик фаолияти билан шуғулланувчи тадбиркорлик субъектлари даромадларининг бир қисмини спорт турлари, шу жумладан, футболни ривожлантириш учун йўналтириш кўзда тутилмоқда.

Россиядаги “Сбербанк” банкоматлари мижозларга ўзбек тилида хизмат кўрсата бошлади

Иллюстратив сурат.

Россиядаги “Сбербанк” банкоматларининг 80 фоизидан кўпроғида мижозларга ўзбек ва тожик тилларида хизмат кўрсатиш бошланди, дея хабар қилади Ведомости нашри “Сбербанк” матбуот хизмати маълумотларига таянган ҳолда.

Қайд этилишича, эндиликда ўзбекистонлик мижозлар бу банкоматлар орқали ўз тилида нақд пул ечиб олиш, ҳисобдаги пулни текшириш ҳамда мобиль алоқа учун тўловларни амалга ошириш каби операцияларни бажара оладилар.

Айни пайтда Сбербанк офисларида чет элликлар орасида оммабоп бўлган маҳсулотлар бўйича инглиз, ўзбек ва тожик тилларида тақдимотлар ўтказилмоқда.

Сбербанк масъуллари бу ишлардан мақсад банк билан мижоз ўртасидаги мулоқотни осонлаштириш эканини урғулаганлар.

АҚШ санкция жорий қилган ҳакерлар орасида ўзбекистонлик ҳам бор

Иллюстратив сурат.

АҚШ дастур таъминоти билан боғлиқ фирибгарлик ва банклардан кўп миллионли маблағларни ўмариш билан шуғулланган Evil Corp (“Ёвузлик корпорацияси”) ҳакерлар гуруҳи билан алоқадорликда айбланмиш Россиянинг етти юридик шахси ва 17 нафар жисмоний шахсга қарши санкциялар жорий қилди. АҚШ Молия вазирлиги сайтида ёйинланмиш кибержиноятда айбланганлар рўйхати ичида ўзбекистонлик 29 ёшли Азамат Сафаров ҳам бор.

Илова этилган маълумотларга кўра, Азамат Сафаров 1990 йил 26 мартида Ўзбекистонда туғилган, шу мамлакат паспортига эга, аммо Москвада яшайди ва Evil Corp билан алоқага эга. Рўйхатга Испания, Греция, Исроил, Россия ва Украина ватандошлари ҳам киритилган.

АҚШ Молия вазири Стивен Мнучин Evil Corp гуруҳини “киберфазода дунёдаги энг фаол криминал ташкилот”лардан бири, деб атади. Вазирлик хабарномасида келтирилишича, бу гуруҳ ўз фаолияти билан миллионлаб долларлик зарар етказган, шу жумладан, 40 та мамлакатдаги 300 банк ва молиявий ташкилотлардан 100 миллион доллар ўғирлаган.

Dridex gang номи билан ҳам таниш бўлган Evil Corp компьютерларга вирус юқтириш ва молиявий ташкилотлардаги маълумотларни йиғиш учун Dridex вирусидан фойдаланган. Молия вазирлиги маълумотларига кўра, гуруҳ кўп йиллардан бери фаолият кўрсатиб келади. Гуруҳ лидери ФСБнинг (Россия Федерал хавфсизлик хизмати) собиқ ходими Максим Якубец бўлиб, у 2017 йилгача мазкур ташкилотда ишлаган.

АҚШ бу гуруҳ ҳакерларини Россия расмийлари билан ҳамкорлик қилганликда айблаган, лекин Россия томони бу айбловларни рад этган.

Президент қизи Ноширлик коллежи биносининг очилишида қатнашди

Президент тўнғич қизи алвон гилам устида қарши олинди.

5 декабрь куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги раҳбарлари – Комил Алламжонов ва унинг ўринбосари Саида Мирзиëева янги ремонт қилинган Ноширлик коллежи биносининг очилишида қатнашган.

Бу ҳақда агентлик директори Комил Алламжонов ўз Facebook саҳифасида хабар қилди.

Бугун Агентлигимиз тасарруфидаги Ноширлик коллежининг капитал таъмирдан чиқарилган биносини ўқувчилар учун фойдаланишга топширдик.

Коллеж келгусида етук матбаачилар ва ноширларни тайёрлайдиган муҳим масканга айланади, деб ишонаман. Бунинг учун барча шароит ва имконият етарли”¸ деб ëзди Алламжонов.

АОКА раҳбари бу хабарига очилиш маросимига оид суратларни ҳам илова қилган.

Бу расмлардан президент тўнғич қизининг алвон гилам устида қарши олингани¸ очилиш маросимида қизил лентани олтин дастали қайчи билан қирқаëтгани кўрилади.

Тилла суви югуртирилган қайчи.
Тилла суви югуртирилган қайчи.

29 ноябрь куни президент Шавкат Мирзиëевнинг Тошкентга келган Марказий Осиë раҳбарлари билан бирга қор босган боғдаги арчага тилла суви югуртирилган челакдан сув қуйгани суратлари эълон қилинган эди.

Алишер Усмонов $100 миллион ажратган Тошкентдаги Ислом цивилизация марказида ëнғин чиқди (ВИДЕО)

Ўтган йил июнь ойида Шавкат Мирзиëев марказ қурилишини бориб кўрган эди.

Тошкент шаҳар Ëнғин хавфсизлиги хизмати бошқармаси 5 декабрь куни тушдан кейин янги қурилаëтган Ислом цивилизация марказида ëнғин чиққанини тасдиқлади.

Бошқарма баëнотига кўра¸ “соат 16:38 да, Олмазор тумани, Зарқайнар 1-тор кўчасида жойлашган янги қурилаётган Ислом цивилизация маркази ҳудудида 150 кв.м. майдонида теплоизоляция (пенопласт) маҳсулотлари ёнган”.

Расмий баëнотдан тушунилишича¸ ëнғин оқибатида янги қурилаётган бинога зарар етмаган.

Ёнғин ўчириш жанговар бўлинмалари чақирилган манзилга соат 16:44да етиб борган ва кўрилган тезкор чора ва ҳаракатлар натижасида ёнғин соат 16:54да қуршаб олиниб, соат 17:06да ўчирилган”¸ дейилади бошқарма хабарида.

Тошкент ислом цивилизация маркази бош ҳомийси асли наманганлик миллиардер Алишер Усмоновдир.

Ўтган йил Forbes журнали мухбири билан суҳбатда Усмонов бу марказ қурилишига “аллақачон 100 миллион доллар ëтқизганини” айтган эди.

Турк ширкати билан пуллик йўл қуриш бўйича музокаралар натижасиз тугади

Ҳукумат иддаосича¸ Тошекнт-Самарқанд ўртасида қурилажак пулли магистраль йўл орадаги 300 кмлик масофани ҳозирги 4 соат ўрнига¸ 2 соатда босиб ўтиш имконини беради.

Ўзбекистон Бош вазирининг инвестиция ва ташқи иқтисодий алоқалар бўйича ўринбосари Элëр Ғаниев Туркиянинг Cengiz-Kolin-Kalyon консорциуми билан музокаралар самарасиз тугаганини билдирди.

2018 йил сентябрь ойида ҳукумат бу компания билан Тошкент ва Самарқанд ўртасида пулли магистраль қуриш бўйича келишувга эришилганини эълон қилган эди.

2018 йил июлида эса¸ бу лойиҳани Германиянинг GP Papenburg Baugesell schaft компанияси амалга ошириши эълон қилинган эди.

Бу режанинг амалга ошмагани ҳақида ҳукумат расмий изоҳ берган эмас.

Туркия консорциуми билан музокаралар¸ Элëр Ғаниевга кўра¸ нарх борасидаги келишмовчилик сабаб самарасиз тугаган.

Тошкент¸ Ғаниев иддаосича¸ турк ширкатининг Тошкент-Самарқанд йўлига ўрнатадиган қиммат нархига кўнишни истамаган.

Музокараларнинг айнан қайси сабабга кўра муваффақиятсиз тугагани ҳақида ҳозирча Озодлик мустақил маълумотга эга эмас.

Мирзиëев ҳокимиятга келгандан сўнг аксар йирик лойиҳаларнинг хориж инвесторларига берилгани эълон қилинди.

Аммо ўтказилган журналистик суриштирувлар натижасида «хориж ширкати» деб аталган аксар компанияларнинг ўзбекистонликлар номига чет элда расмийлаштирилган¸ асл эгаси бекитилган қобиқ ширкатлар экани аниқланди.

Масалан¸ Ўзбекистон тарихидаги энг қиммат лойиҳа – Tashkent Cityдаги тўртта лот қурилиши берилган “хориж инвесторлари”¸ британиялик тадқиқотчи ўтказган суриштирув натижасида¸ аслида Тошкент шаҳар ҳокими Жаҳонгир Ортиқхўжаевга тегишли ширкатлар бўлиб чиқди.

Келаси йилдан 10 та олий ўқув юрти ўз-ўзини молиялаштиришга ўтади

Вазирлар Маҳкамасининг 3 декабрь кунги қарори билан 2020 йил 1 январдан бошлаб, мамлакатдаги 10 та олий таълим муассасаси тажриба-синов тариқасида ўзини ўзи молиялаштириш тизимига ўтади.

Бу ҳақда Адлия вазирлигининг Ҳуқуқий ахборот Telegram канали 5 декабрь куни хабар тарқатди.

Бу рўйхатга Самарқанд давлат чет тиллари институти¸ Самарқанд иқтисодиёт ва сервис институти¸ Тошкент давлат юридик университети¸ Тошкент давлат иқтисодиёт университети¸ Тошкент молия институти¸ Тошкент давлат шарқшунослик институти¸ Тошкент фармацевтика инситути¸ Ўзбекистон давлат жаҳон тиллари университети¸ Урганч давлат университети ва Тошкент темир йўл муҳандислари институти киритилган.

Бу олийгоҳларнинг тажриба рўйхатига киритилишда¸ расмий хабарда ëзилишича¸ “уларнинг илмий педагогик салоҳияти юқорилиги, молиявий фаолиятининг барқарорлиги, моддий-техника базаси етарли даражадалиги, таълим хизматлари бозорида мазкур мутахассисликларга талаб юқорилиги инобатга олинган".

Мазкур рўйхатга киритилган ОТМлар Ўзбекистонда энг кўп абитуриент ҳужжат топширадиган¸ коррупция даражаси ҳам баланд экани айтиладиган олийгоҳлар саналади.

Ҳукумат қарорига кўра¸ мазкур 10 олийгоҳларда “тўлов-контракти асосида таълим олаётган талабаларнинг контракт тўлаш муддатлари томонлар келишувига кўра шартнома асосида белгиланади”.

Бу эса¸ келаси ўқув йилидан мазкур ОТМлардаги контракт нархининг ўзгаришини назарда тутади.

Президент Шавкат Мирзиëев жорий йил 11 июль куни 2020 йилдан бошлаб айрим ОТМлар босқичма-босқич ўзини ўзи молиялаштириш тизимига ўтишини кўзда тутувчи 5763-сонли қарорга қўл қўйган эди.

ЕТТБ бир йилда Ўзбекистонга рекорд даражадаги 400 миллион евро қарз берган

Озарбайжондаги Trend News агентлигининг хабар қилишича¸ Европа тикланиш ва тараққиëт банки 2018 йили Ўзбекистондаги 12 та лойиҳага 400 миллион евро маблағ ажратган.

Агентлик гаплашган ЕТТБ расмийси таъкидича¸ бу банк тарихида битта давлатга бир йил давомида қарз бериш бўйича мисли кўрилмаган рекорддир.

2017 йил охирида Ўзбекистондаги ўз фаолиятини қайта тиклаган ЕТТБ мулозими бу маблағнинг ҳам давлат¸ ҳам хусусий секторга ажратилганини таъкидлаган.

“2019 йил учун ҳозиргача эришилган келишувларимиз қиймати 475 миллион евро ва бу ўтган йилга нисбатан 20 фоизга кўпдир. Бу келишувлар ҳукумат бошлаган реформалар ва бизнинг Ўзбекистондаги ўтиш даврини қўллаб-қувватлаш ниятимиз маҳсулидир”¸ деган номи очиқланмаган ЕТТБ расмийси Trend News агентлиги билан суҳбатда.

ЕТТБ расмий сайтида келтирилган рақамларга кўра¸ ҳозирда банк Ўзбекистонда умумий қиймати 726 миллион евролик 23 та лойиҳада фаол иштирок этмоқда; бу маблағнинг 21 фоизи хусусий секторга¸ 79 фоизи эса давлат назоратидаги инфраструктура лойиҳаларига ажратилган.

Марказий банк баëнотига кўра¸ Ўзбекистон умумий қарзи 2019 йил июлига келиб¸ 20,7 миллиард долларга етган ва бу йил бошига нисбатан 3,4 миллиард долларга кўпдир.

Молия вазирлиги расмийси 18 ноябрь куни берган баëнотга кўра¸ 2019 йил кузига келиб давлат умумий қарзи мамлакат ялпи ички маҳсулотига (ЯИМ) нисбатан 33,6 фоизни ташкил этган.

Жаҳон банки ҳисоб-китобига кўра¸ Ўзбекистон ялпи ички маҳсулоти миқдори 2018 йили 50¸5 миллиард долларни ташкил этган.

Самарқандда Ҳолливуд типидаги кино шаҳарчаси қурилади

Самарқанд валояти Нуробод туманидаги Ҳазрати Довуд зиëратгоҳи (иллюстратив сурат).

Самарқандда АҚШ ҳамда дунё киносаноати марказларидан бири бўлган Ҳолливуд типидаги кино шаҳарчаси қурилади.

“Дарё” нашри хабарига кўра, Самарқанд вилояти Нуробод тумани Оқсой ҳудудида қурилиши режалаштирилган киношаҳарча лойиҳаси Vendo group компанияси томонидан амалга оширилади.

Лойиҳа муаллифи Ҳ.Мамасолиевга кўра, умумий ер майдони 160 гектар бўлган шаҳарча Cinema City Sollywood номини олади. Унда замонавий кўринишдаги 3-4 юлдузли меҳмонхоналар, ресторан ва кафелар, дам олиш ва истироҳат боғлари, аквапарк, кинотеатр, концертлар ва конференциялар ўтказиладиган заллар барпо этилади.

Шаҳарча АҚШнинг Daha USA Group ҳамда Хитойнинг Yiwu Compass Trading компаниялари билан ҳамкорликда қурилади. Биринчи босқичда лойиҳа учун 15 миллион АҚШ доллари миқдорида инвестиция маблағларини киритиш режалаштирилган.

Тошкент туманларидаги газ тақчиллигига метро қурилиши сабаб қилиб кўрсатилди

Иллюстратив сурат.

Тошкентнинг айрим туманларида газ тақчиллигига метро қурилиши важидан газ қувурларининг демонтаж қилиниши сабаб бўлган. Бу ҳақда “Ўзтрансгаз” ширкати матбуот хизмати маълумот тарқатди.

“Дарҳақиқат, Роҳат мавзеси томондан Қўйлиқ бозоригача бўлган Тошкент ҳалқа йўли бўйлаб ер усти метро қурилиши вақтида, зарурат туфайли, 1,5 км узунликдаги газ қувури демонтаж қилинди. Шу сабабли совуқ кунларда шаҳарнинг айрим ҳудудларида табиий газ тақчиллиги кузатилди”, дейилади хабарномада.

Ширкат шу кунда газ қувурини тиклаш бўйича қурилиш ишлари олиб борилаётгани, Қўйлиқ деҳқон бозори яқинидаги ҳалқа йўли ёқалаб 800 метр газ қувурлари ётқизилганини билдирган ҳамда вақтинча ноқулайликлар учун истеъмолчилардан узр сўраган.

Маълумотларга кўра, шу йил 22 ноябридан Тошкентнинг Миробод, Чилонзор, Сергели, Шайхонтоҳур, Яккасарой ва Учтепа туманларида газ босими пасайиб кетган.

Ўзбекларнинг “тилла бува”си оламдан ўтди

Миртоҳир Миралиев ("Тилла бува" фильмидан скриншот).

Ўзбекистон халқ артисти Миртоҳир (Тоҳир) Миралиев вафот этди. Бу ҳақда “Ўзбеккино” миллий агентлиги ўз Телеграм-канали орқали маълумот тарқатди.

Актёр "Тилла бува" (2011), "Учар отлар" (2011), "Қовун" (2012), "Жасур" (2011), "Аросат" (2009), "Чавандоз" (2007), "Армон" (1987) каби кўплаб фильмларда роль ижро этиб, халқ кўнглидан муносиб жой олган.

Миртоҳир Миралиев узоқ йиллар давомида ёш ҳамкасбларига актёрлик маҳоратидан сабоқ берган. Актёрни таниганлар уни ўз касбига содиқ профессионал қатори ёдга оладилар.

Озодлик радиоси жамоаси марҳумнинг яқинларига таъзия изҳор этади.

Фарғонада 3-синф ўқувчиси 11-синф ўқувчиси томонидан зўрланди

Иллюстратив сурат.

Фарғона вилоятидаги туманлардан бирида мактабнинг 3-синф ўқувчиси шу мактабнинг 11-синф ўқувчиси томонидан зўрланди. Бу ҳақда Газета.uz Ўзбекистон Бош прокуратураси матбуот хизмати маълумотига таянган ҳолда хабар тарқатди.

Ҳодиса сентябрь ойи бошида қурилиши битмаган ер участкасидаги вагонда содир бўлган. Жабрланувчига кўра, юқори синф ўқувчиси кимдир воқеадан хабардор бўлса, сўйиб ташлаш билан таҳдид қилган.

Ноябрь ойида ўтказилган экспертизалар тажовузкор ўқувчининг жиноятга алоқадорлигини тасдиқлаган. Ўсмир айбини бўйнига олган. Унга нисбатан 26 ноябрь куни судгача уй қамоғи шаклида эҳтиёт чораси қўлланилган.

Россияда ўтган ой ўзбекистонлик ва тожикистонликлар олиб борган ярим тонна мева ёқилди

Самара (Россия) аэропортида шу йил ноябрь ойида ўзбекистонлик ва тожикистонлик 147 нафар йўловчи томонидан олиб келинган ярим тонна хўл ва қуруқ мева карантин баҳонаси билан олиб қўйилган. Бу ҳақда sgpress.ru Россельхознадзорнинг Самара вилоят бошқармаси матбуот хизмати маълумотига таянган ҳолда хабар қилади.

Қайд этилишича, олиб қўйилган маҳсулотлар ичида мева-сабзавот, қуруқ мева, қуруқ чой ва гуруч бўлган. Фитосанитария талабларига жавоб бермаганлиги сабабли олиб қўйилган бу озиқ-овқатлар аэропорт печида ёқилган.

Самарқанд бош меъмори $735 000 ўмарганликда гумонланмоқда

Самарқанд (иллюстратив сурат).

Самарқанд вилоят бош архитектори Бобир Элмурадов давлат мулкини талон-торож қилишда гумонланиб қўлга олинган, дея хабар қилади Kun.uz нашри.

Нашр манбасига кўра, мулозим гаров эвазига озод қилинган ва ҳозирда 7 миллиард сўмлик (735 минг доллардан кўпроқ) бюджет маблағини ўзлаштирганликда айбланиб, суд қилинмоқда.

Элмурадов вилоят бош архитектори лавозимига шу йил мартида тайинланган. Унгача эса Самарқанд шаҳри ҳокими ўринбосари вазифасида ишлаган. У ўша вақтда шаҳарнинг “Саид” маҳалласидаги 26 нафар ватандошга уйлари “снос”га тушган деб давлат бюджетидан 7 миллиард сўм миқдоридаги пулни асоссиз равишда беришда айбланган.

Давомини ўқинг

XS
SM
MD
LG