Линклар

Шошилинч хабар
16 октябр 2019, Тошкент вақти: 21:56

Ўзбекистон

Жасур Иброҳимовнинг ота-онаси ўғлининг ўлимида айблангандан суд орқали 651 732 760 сўм ундирмоқчи

Жасур Иброҳимов

25 сентябрь куни Фуқаролик ишлари бўйича Мирзо Улуғбек туманлараро судида марҳум Жасур Иброҳимовнинг яқин қариндошлари аризаси бўйича бошланган суд жараёнининг биринчи мажлиси бўлиб ўтди.

Kun.uzнинг хабар қилишича, даъвогарлар; марҳум Жасурбек Иброҳимовнинг отаси Муҳаммаджон Турсунов ва онаси Нилуфар Алиеванинг жавобгарлар Исломбек Тўлаганов ва унинг ота-онаси устидан ёзган ариза кўрилмоқда.

Даъвогарлар кўрган моддий ва маънавий зарарини жавобгарлардан ундириб беришни сўраган.

Даъвогар тараф жавобгарлардан етказилган моддий зарарни қоплаш учун 151 732 760 сўм ва фарзандининг ўлими туфайли кўрилган маънавий зарарни қоплаш учун 500 000 000 сўм талаб қилмоқда. Оила жавобгарлардан маънавий зарар учун ундириладиган маблағларни хайрия фондига ўтказишни режалаштирган.

Жавобгар тараф ариза билан танишиб чиққани, бу ўлим ҳолатида фарзанди айбсиз экани, Жасурбек Иброҳимов айрим шифокорлар ҳаракатсизлиги натижасида вафот этгани, ушбу воқеа юзасидан тегишли ташкилотларга ариза берганини айтиб, суддан уларни жавобгарлар сафидан чиқаришни ва мазкур талабни рад этишини сўрамоқда.

Суднинг навбатдаги мажлиси 14 октябрга белгиланди..

Тошкент тиббиёт коллежи талабаси Жасурбек Иброҳимовнинг ўлимида айбдор деб топилган Ислом Тўлаганов жазо муддатини ўташ вақтида колониядаги режимни бузмагани ва меҳнатга виждонан ёндашгани туфайли шу йилнинг апрелида озод этилган. Бу ҳақда Ички ишлар вазирлиги Жазони ўташ бош бошқармаси баёнот берган эди.

17 яшар Жасурбек Иброҳимов 2017 йилнинг 3 майида Ташкентдаги П.Ф. Боровский номидаги Тиббиёт коллежи ёнида калтакланган, шундан сўнг у 5 марта жарроҳлик амалиётдан ўтган, аммо 1 июнь куни вафот этган эди.

Кун янгиликлари

"Ўзбекконцерт" Жаҳонгир Отажоновнинг лицензиясини икки кунда қайтариб берди

Айрим сабабларга кўра «Ўзбекконцерт» томонидан лицензияси муддатидан олдин тўхтатилган санъаткорлар Жаҳонгир Отажонов, Абдулла Қурбонов, Шаҳло Аҳмедова ва Ҳалима Ибрагимовага ижодий фаолиятини давом эттириш учун рухсат берилди.

Бу ҳақда хабар қилган Kun.uzга кўра, лицензиялар қайтариб берилиши чоршанба куни «Ўзбекконцерт»да бўлиб ўтган навбатдан ташқари йиғилишда маълум қилинган.

Бироқ "Ўзбекконцерт"нинг расмий сайтида ҳозирча бу ҳақда хабар йўқ.

«Улар бундан буён ўз ижодларини ривожлантириш ва халқимизга астойдил хизмат қилишларини маълум қилганликлари сабаб уларнинг вақтинча олиб қўйилган ва тугатилган лицензияларини қайтарганлигимизни маълум қиламиз», – деган муассаса директори Одилжон Абдуқаҳҳоров.

"Ўзбекконцерт" Жаҳонгир Отажоновнинг лицензиясини бундан 2 кун муқаддам - 14 октябрда бекор қилган эди.

15 октябрда Ўзбекистон президенти администрацияси ҳузуридаги Ахборот ва оммавий коммуникациялар агентлиги бош директори Комил Алламжонов ўзининг фейсбукида "Жаҳонгир Отажоновнинг қўшиқларини оилам ва фарзандларим билан яхши кўриб тинглайверамиз! Бунинг учун шахсан бизга лицензия керак эмас!" деб ёзди.

Қўшиқчи Абдулла Қурбоновнинг лицензияси "Ўзбекконцерт" давлат муассасасининг 31 май кунги қарори асосида тугатилган эди.

МБ: Миллий валюта девальвацияси тезлашди, жамғармасини долларда сақловчилар 3 ойда қарийб 2 мартага кўпайди

2019 йилнинг июль-август ойларида ички ва ташқи омиллар таъсирида хорижий валютага бўлган талабнинг ўсиши кузатилди ва натижада миллий валюта девалвацияси тезлашди, деб хабар қилди Марказий банк.

Хусусан, 2019 йил январь-июль ойларида АҚШ долларининг алмашинув курси 4 фоизга (1 долларга 8 336 сўмдан 8 667 сўмгача) ошган ва ўртача ойлик ўсиш суръати 0,6 фоизни ташкил этган бўлса, август ойида валюта курсининг кескин ўсиши (8,2%) кузатилди. Бироқ, сентябрь ойига келиб, долларнинг алмашинув курси ўзининг аввалги тенденциясига қайтди ва ойлик ўсиш суръати 0,5 фоизгача пасайди.

Миллий валюта девалвацияси аҳолининг жамғариш кайфиятига ва фаоллигига ҳам таъсир кўрсатди. Хусусан, Марказий банк томонидан ўтказиладиган ойлик сўров натижалари шуни кўрсатадики, 2019 йилнинг июнь-сентябрь ойларида омонатларини хорижий валютада (шу жумладан, АҚШ долларида) сақлашни афзал кўрувчи сўров иштирокчилари улуши кўпайган.

Бунда, жамғармаларини нақд АҚШ долларида сақлашни афзал кўрувчи респондентлар улуши май ойидаги 19 фоиздан август ойида 33 фоизгача, хорижий валютадаги омонатларда сақлашни афзал кўрувчилар улуши эса май ойидаги 17 фоиздан сентябрда 24 фоизгача ошди. Шу билан бирга, сентябрь ойида валюта курси барқарорлашганидан сўнг, жамғармаларини нақд АҚШ долларида сақлашни афзал кўрувчи сўров иштирокчилари улуши 33 фоиздан 29 фоизгача пасайди.

Бош прокуратура: амалдорларнинг коррупцияга оид жиноятлари 30 фоизга камайди

Ўтган йилнинг шу даврига нисбатан коррупцияга оид мансабдор шахслар томонидан содир этилган жиноятлар сони 30 фоизга камайди. Бу ҳақда Бош прокуратуранинг Коррупцияга қарши кураш соҳасидаги чора-тадбирларни мувофиқлаштириш бошқармаси катта прокурори Каримжон Мусашайхов маҳаллий журналистларга баёнот берди.

16 октябрь куни Тошкент шаҳридаги «Radisson» меҳмонхонасида коррупцияга қарши кураш ва коррупцияга оид активларни қайтариш бўйича Истанбул ҳаракатлар режасининг натижалари бўйича учрашувда иштирок этган Бош прокуратура мулозими Каримжон Мусашайховнинг фикрича, коррупцияга оид жиноятлар 30 фоизга камайганини "амалга оширилган ислоҳотлар самараси деб айтиш мумкин"

  • Ўтган ойда Ўзбекистонга сафар қилган БМТнинг суд ва адвокатлар мустақиллиги бўйича махсус маърузачиси Диего Гарсия-Саян 25 сентябрда Тошкентда ўтган матбуот анжуманида Ўзбекистонда суд мустақиллиги юзасидан жиддий қийинчиликлар ва муаммолар бор эканини билдираркан, суд мустақиллигига энг биринчи жиддий тўсиқ коррупция бўлаётганини айтган эди.

Қозоғистон 6 ойга чорва экспортини тақиқлади

Қозоғистон Қишлоқ хўжалиги вазирлиги 10 октябрь куни олти ой муддатга йирик шохли тирик чорва молларини мамлакатдан олиб чиқишни тақиқлаш тўғрисидаги буйруқ қабул қилди, деб хабар қилди gazeta.uz расмий ҳужжатга таяниб.

Тақиқ бир ёшгача бўлган бузоқларга, бир ёшдан ошган ғунажинларга, сигирлар, қўйлар ва эчкиларга тааллуқлидир.

Қозоғистон Ўзбекистонга чорва молларини асосий етказиб берувчиси ҳисобланади. Буйруқ лойиҳасини ишлаб чиқиш ҳақида ёзда эълон қилинган эди. Ўзбекистонда фермерликни ривожлантириш дастури бунга сабаб қилиб кўрсатилди, унга кўра аҳолига бошқа мамлакатлардан чорва сотиб олиш учун имтиёзли кредитлар берилмоқда.

Ўтган йили Қозоғистондан Ўзбекистонга 50 минг бош қорамол, шу йилнинг олти ойи давомида эса 63,5 минг бош қорамол экспорт қилинди. Қозоғистон қишлоқ хўжалиги вазирлигидаги бу ҳолатни хавфли вазият деб атади.

Декабрдаги сайловлар учун бюджетдан 230,5 млрд сўм маблағ ажратилади

Иллюстратив сурат.

Жорий йилнинг 22 декабри куни бўлиб ўтадиган Олий Мажлис Қонунчилик палатаси, Қорақалпоғистон Республикаси Жўқорғи Кенгеси, Халқ депутатлари вилоят, туман ва шаҳар кенгашлари сайловларига тайёргарлик кўриш ва уларни ўтказиш билан боғлиқ харажатларни амалга ошириш учун Республика бюджети маблағлари ҳисобидан жами 230 миллиард 549 миллион сўм маблағ ажратилиши режалаштирилган. Бу ҳақда Ўзбекистон Марказий сайлов комиссияси сайти маълумот тарқатди.

Хабар қилинишича, Молия вазирлиги билан Марказий сайлов комиссияси Республика бюджетидан ажратилиши кўзда тутилган маблағларнинг қуйидаги мақсадлар учун сарфланиши ҳақида ўзаро келишиб олган:

- Олий Мажлис Қонунчилик палатаси сайловларига тайёргарлик кўриш ва уларни ўтказиш билан боғлиқ харажатлар учун ҳудудий округ ва участка сайлов комиссияларига – 96 миллиард 807 миллион сўм;

- Қорақалпоғистон Республикаси Жўқорғи Кенгеси, халқ депутатлари вилоят, туман ва шаҳар Кенгашлари сайловларига тайёргарлик кўриш ва уларни ўтказиш билан боғлиқ харажатлар учун ҳудудий округ ва участка сайлов комиссияларига - 45 миллиард 330 миллион сўм;

- Сайловларда иштирок этадиган сиёсий партияларининг умумпартиявий тадбирлари ва сиёсий партия томонидан кўрсатилган номзодларнинг сайловолди ташвиқот ва тарғибот ишларини амалга оширишга - 46 миллиард 674 миллион сўм;

- Марказий сайлов комиссияси томонидан сайловларга тайёргарлик кўриш ва уларни ўтказиш билан боғлиқ марказлашган тартибда харид қилинадиган зарур моддий-техника жиҳозлар, товар ва хизматлар билан таъминлаш учун – 41 миллиард 737 миллион сўм маблағ ажратилиши кўзда тутилган.

Фарғонадан Москвага парвоз қилаётган учоқ Самара аэропортига қўнишга мажбур бўлди

Иллюстратив сурат.

“Ўзбекистон ҳаво йўллари” авиаширкатининг Фарғонадан Москвага парвоз қилаётган учоғи йўловчилардан бирининг ўзини ёмон ҳис қилганлиги сабабли 15 октябрь оқшомида Россиянинг Самара шаҳрида фавқулодда қўнишни амалга оширган. Бу ҳақда авиаширкат матбуот хизмати ўз Telegram-канали орқали маълумот тарқатди.

Хабарномадан маълум бўлишича, парвоз чоғи 24 ёшли йўловчи ўзини ёмон ҳис қилган. Шу сабабли учоқ командири Самара аэропортига мажбурий қўнишга қарор қилган. Қўниш амалга ошиши билан хаста йўловчи шаҳар касалхонасига олиб кетилган, учоқ эса йўлида давом этиб, Тошкент вақти билан соат 22:25 да Москвадаги “Внуково” аэропортига етиб борган.

Мирзиёев ўқиган институт Шарқий Европа ва Марказий Осиёнинг кучли олийгоҳлари рейтингидан жой олди

Ўзбекистон президенти Ш.Мирзиёев Тошкент ирригация ва қишлоқ хўжалигини механизациялаш муҳандислари институти битирувчисидир.

Тошкент ирригация ва қишлоқ хўжалигини механизациялаш муҳандислари институти мустақил Ўзбекистон тарихида биринчи маротаба 2020 йил учун QSнинг Шарқий Европа ва Марказий Осиё давлатлари университетлари рейтингида қайд этилди. Бу ҳақда Ўзбекистон Олий ва ўрта махсус таълим вазир вазирлиги маълумот тарқатди.

Хабарномада Тошкент ирригация ва қишлоқ хўжалигини механизациялаштириш муҳандислари институти QS рейтингида академик сўровнома, иш берувчиларнинг баҳоси ва илмий салоҳияти каби мезонларда Шарқий Европа ва Марказий Осиё давлатлари университетлари ўртасида ижобий кўрсаткичларни қайд этиб, 301-350 ўринлар оралиғидаги университетлар қаторидан жой олгани қайд этилади.

Ушбу рейтингда 1-ўринни Ломоносов номидаги Москва давлат университети, 2-ўринни Санкт-Петербург давлат университетлари эгаллаган. Рейтингдан Россия, Чехия, Туркия, Венгрия, Польша, Руминия, Словения, Хорватия, Беларусь, Болгария каби давлатларнинг етакчи университетлари жой олган.

Ўзбекистоннинг амалдаги президенти Шавкат Мирзиёев Тошкент ирригация ва қишлоқ хўжалигини механизациялаш муҳандислари институтини 1981 йилда битириб, 1992 йилгача шу олийгоҳда кичик илмий ходим сифатида иш бошлаган ва биринчи проректор лавозимигача кўтарилганди.

Ҳукумат қарори ортидан Тошкентда буханка нон нархи 35 фоизгача ошди

Ўзбекистон пойтахтида 15 октябрдан буханка ноннинг нархи ошгани кузатилди.

Kun.uz хабарига кўра, сешанба куни Тошкентда бир буханка нон дўкон ва бозорларда 1350-1500 сўмдан сотила бошлаган. Бунгача мазкур нон 1100 сўмдан сотилаётган эди.

14 октябрь куни Вазирлар Маҳкамаси «Дон, ун ва нон етказиб бериш тизимига бозор механизмларини тўлиқ жорий этиш чора-тадбирлари тўғрисида» қарор қабул қилган, мазкур ҳужжат билан дон ва ун нархларини эркинлаштиришга қарор қилганди.

Охирги марта нон нархи 2018 йил сентябрида оширилган. Бунгача буханка нон узоқ йиллар 600-650 сўмдан сотилганди.

Мирзиёев Бокуда икки томонлама учрашувлар ўтказди

Туркий тилли давлатлар ҳамкорлик кенгаши саммити, Боку, 2019 йил 15 октябри.

Ўзбекистон президенти Шавкат Мирзиёев Боку шаҳрида Озарбайжон президенти Илҳом Алиев, Қозоғистоннинг тўнғич президенти Нурсултон Назарбоев, Туркия президенти Ражаб Тоййиб Эрдўғон, Венгрия бош вазири Виктор Орбан, Кавказ мусулмонлари идораси раиси шайхулислом Оллоҳшукур Пошшозода билан учрашувлар ўтказди.

Ўзбекистон президенти Мирзиёев Туркия президенти Эрдўғон билан, Боку, 2019 йил 15 октябри.
Ўзбекистон президенти Мирзиёев Туркия президенти Эрдўғон билан, Боку, 2019 йил 15 октябри.

Ш.Мирзиёев Озарбайжон пойтахтига Туркий тилли давлатлар ҳамкорлик кенгашининг навбатдаги саммитида иштирок этиш учун 14 октябрь куни борган.

15 октябрь куни бўлиб ўтган саммитда Ўзбекистон Республикасининг Туркий кенгашга тўла ҳуқуқли аъзо сифатида қўшилиши тўғрисида қўшма баёнот қабул қилинган.

Саммитда сўзлаган нутқида Мирзиёев Ўзбекистоннинг ташкилотга аъзо бўлиши табиий ва тарихий жараёнлар ифодаси эканини урғулаган.

Ўзбекистон президенти шу куни Тошкентга қайтиб келган.

Вашингтонда Ўзбекистон-АҚШ бизнес-форуми бўлиб ўтади

Жорий йилнинг 21-22 октябрь кунлари АҚШ пойтахти Вашингтонда Ўзбекистон-Америка бизнес-форуми ҳамда Савдо-сотиқ ва инвестициялар бўйича шартнома кенгашига аъзо мамлакатларнинг навбатдаги йиғилиши бўлиб ўтади. Бу ҳақда Ўзбекистон Ташқи ишлар вазирлиги матбуот хизмати маълумот тарқатди.

Ўзбекистоннинг АҚШдаги элчихонаси ҳамда АҚШ-Ўзбекистон савдо палатаси ҳамкорликда уюштираётган бизнес-форум ишида АҚШ савдо вазири Вилбур Росс, АҚШ ва Канаданинг 150 та йирик ширкати ҳамда халқаро ва молия институтлари вакиллари иштирок этиши кутилмоқда.

АОКА раҳбари: "Togri.uzнинг ёпилиши сиёсий сабабларга асло боғлиқ эмас" 

Комил Алламжонов

Togri.uz сайти фаолияти тўхтатилгани бу таъсисчиларнинг ички ва шахсий масаласи бўлиб, сиёсий сабабларга асло боғлиқ эмас.

Бу Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директори Комил Алламжоновнинг баёнотидир.

Ўзбекистон сиëсий, ижтимоий, иқтисодий ва маданий ҳаëти янгиликларини ëритиб келаëтган togri.uz сайти фаолияти 14 октябрда тўхтатилгани тўғрисида Озодлик 14 октябрда хабар қилган эди.

Комил Алламжонов ушбу сайт фаолияти тўхтагани юзасидан муносабат билдираркан, яна бундай деган:

"Агентлигимиз юртимиздаги оммавий ахборот воситаларининг сони янада кўпайиши, уларнинг цензурадан холи, эркин фаолият кўрсатиши тарафдори бўлиб, бунинг учун биз барча имкониятларни яратишга тайёр эканлигимизни таъкидламоқчиман.

Ахборот маконидаги рақобат ва хилма-хилликдан энг аввало, халқимиз ва давлатимиз манфаатдор бўлади. Холис, маълум бир шахслар мақсадлари учун эмас, балки эл-юрт фаровонлигига хизмат қиладиган ОАВлар ривожланаверсин ва кўпаяверсин!»

Сайтнинг етакчи журналистларидан бири Хуршид Йўлдошев ўзининг facebookдаги саҳифасида 2 октябрь куни Togri.uz саҳифасидан АОКА тарафидан битта мақола олиб ташлаттирилгани ҳақида ëзган эди.

Ўша мақола Россия Федерация Кенгаши раиси Валентина Матвиенко ташрифи ҳақида эди. Мақола олдириб ташлангани сабаблари ҳақида Togri.uz сайти муассислигига яқин ходим аниқ маълумот беришни истамади ва қисқа қилиб “сиëсий сабаб” деб қўя қолди.

Нашр журналистларидан бирининг Озодликка билдиришича, эътироз АОКА раҳбари Комил Алламжонов тарафидан билдирилган. Эътироз мақолага бириктирилган расмда президентнинг катта қизи Саида Мирзиëева қиëфасининг "гўзал" кўринмагани билан изоҳланган.

Togri.uz сайти ëпилишидан бир ой олдин - сентябрда Minbar.uz сайти ҳам молиявий сабаблар боис ëпилган эди.

Комил Алламжонов Жаҳонгир Отажоновни лицензиясиз ҳам тинглайверишини билдирди

Комил Алламжонов

Жаҳонгир Отажоновнинг қўшиқларини оилам ва фарзандларим билан яхши кўриб тинглайверамиз! Бунинг учун шахсан бизга лицензия керак эмас!

Бу фикрини Ўзбекистон президенти администрацияси ҳузуридаги Ахборот ва оммавий коммуникациялар агентлиги бош директори Комил Алламжонов ўзининг фейсбукида эълон қилди.

"Ўзбекконцерт" давлат муассасаси хонанда Жаҳонгир Отажонов номига концерт-томоша фаолиятини амалга ошириш ҳуқуқи учун берилган АА-серияли, 7422-сон лицензиянинг амал қилиши 2019 йил 14 октябрь кунидан тугатилганини хабар қилган эди.

Ўз қарорини изоҳлар экан, "Ўзбекконцерт" 14 октябрь кунги баёнотида буларни ёзган:

"Cўнгги вақтларда Жахонгир Атажанов масъулиятни бироз унутиб қўйди, десак хато бўлмайди. Жорий йилнинг май ойи яъни муборак Рамазон ойида ижтимоий тармоқларда хонанда Жахонгир Атажанов томонидан санъаткор одобига, миллий урф-одатларимиз ва одоб-ахлоқ қоидаларига тўғри келмайдиган номуносиб ҳаракатлар кузатилганди. Бу шунчаки ўзини кўз-кўз қилиш мақсадидами ёки бошқа мақсаддами, барибир ижтимоий тармоқлардаги бундай кўриниш ёшлар орасида, жамоатчилик ўртасида санъат аҳли тўғрисида салбий фикр уйғотмасдан қолмаган эди".

Ўзбекистонда бир давлат идораси раҳбарининг ўзи каби бошқа бир раҳбар қарори юзасидан фикр билдириши кузатилмас эди. Ўзбекистон президенти администрацияси ҳузуридаги Ахборот ва оммавий коммуникациялар агентлиги бош директори Комил Алламжоновнинг "Ўзбекконцерт" қарори юзасидан фикри очиқ танқид бўлмасада, ҳатто шу шаклда ҳам камдан-кам учрайдиган ҳодисадир.

Жазони ижро этиш бош бошқармаси Навоийдаги колонияда 5 маҳкум очлик эълон қилганини изоҳлади

Иллюстратив сурат. Қизилтепа шаҳридаги №64/4- жазо ўташ колониясига бу суратнинг алоқаси йўқ.

Ўзбекистон Ички ишлар вазирлиги Жазони ижро этиш бош бошқармаси Навоий вилоятидаги 5-сон манзил-колониясида маҳкумларнинг очлик эълон қилганига изоҳ бериб, уларга нисбатан қийноқлар қўлланилаётгани ҳақидаги хабарларни рад этди.

14 октябрда Озодлик Марказий Осиёда инсон ҳуқуқлари” ассоциацияси баёнотига таяниб, 10 октябрда №64/4- (64/(64/47) жазо ўташ колониясида сақланаётган маҳкумлардан 5 нафари ўзлари тушиб қолган вазиятга эътибор тортиш учун сиёсий очлик эълон қилгани тўғрисида хабар қилган эди.

ЖИЭББ маълумотларига кўра, 3 октябрь куни колонияда оғир ва ўта оғир жиноятлари учун жазони ўтаётган бир неча маҳкум ўрнатилган жазони ўташ тартибларини бузган ҳолда ишга чиқишдан бош тортади. «Натижада колония маъмурияти маҳкумларни колониянинг интизомий бўлинмага ҳайдаш кўринишидаги интизомий таъсир кўрсатиш бўйича қонуний чораларни кўрди», — дейилади хабарда.

Интизомий бўлинмада тушлик тарқатиш вақтида маҳкумлар таомни қабул қилишдан бош тортиб, буни уларга нисбатан интизомий чоралар кўрилганига норозилик сифатида намойиш этишади. «Тушунтириш ишлари ўтказилганидан сўнг маҳкумлар билан боғлиқ вазият ҳал этилди», — дея қайд этди ЖИЭББ.

«Мазкур ҳолатда колония маъмурият қонунчилик нормаларига қатъий риоя этган ҳолда ҳаракат қилди, маҳкумларга нисбатан жисмоний ёки руҳий босим қўлланилмади», — дея таъкидлади ЖИЭББ.

Мазкур колонияда жазони ўтаётган маҳкумлар томонидан ўз жонига қасд қилиш ҳолатлари аниқланмади, дея маълум қилди бошқарма.

ЎзАнинг 6 андижонлик қамалганига оид хабари эълон қилинганидан кўп ўтмай очилмай қолди

14 октябрда Озодлик Ўзбекистон Миллий ахборот агентлиги -ЎзА шу куни эълон қилган хабарга таяниб, Андижонда ёши 20 дан 23 гача бўлган 6 йигит диний экстремистликда айбланиб қамалгани тўғрисида хабар қилган эди.

14 октябрь, куннинг иккинчи ярмида ЎзАнинг хабари очилмади. Озодлик берган ишора босилганда хабар ўрнида "404 Топилмади" деган ёзув чиқмоқда. Андижонлик йигитларнинг қамалишига оид хабар 15 октябрь куни ҳам очилмади.

Бироқ google қидирув тизими 1 кун олдин ЎзА Неъматжон Ўрмонов, Нурулло Позилжонов, Дониёрбек ва Бобурбек Исаковлар, Изатулло Насриддинов ҳамда Аъзамжон Абдуллаевларга оид хабар эълон қилганини кўрсатмоқда.

Google 15 октябрда ЎзА бир кун олдин Андижондаги воқеа оид хабар берганини кўсатди.
Google 15 октябрда ЎзА бир кун олдин Андижондаги воқеа оид хабар берганини кўсатди.

8 октябрда Жиноят ишлари бўйича Андижон вилоят суди Ўрмонов Неъматжон Нўмонжон ўғлини 6 йилга, Позилжонов Нурулло Муҳаммадабдулло ўғли ва Исаков Дониёр Муҳаммаджон ўғлини 5 йил 6 ой муддатга, Исаков Бобурбек Муҳаммаджон ўғли, Насриддинов Иззатулло Абдурасул ўғли ва Абдуллаев Аъзамжон Авазбек ўғлини 3 йил муддатга озодликдан маҳрум этди.

Бу ҳақда хабар қилган ЎзА ахборот агентлиги ёши 20 дан 23 гача бўлган бу 6 фуқаро Жиноят кодексининг қайси моддалари бўйича айбдор топилганини ёзмаган.

Агентликка кўра, олтовлон "жиноий фаолият олиб бориш учун олдиндан бир гуруҳга бирлашиб ижтимоий тармоқларда тақиқланган сайтлардан материаллар олган.

Ўзбекистон Республикасининг амалдаги давлат тузумини Конституцияга хилоф тарзда ўзгартиришга, ҳокимиятни босиб олишга, қонуний равишда сайлаб қўйилган ёки тайинланган ҳокимият вакилларини ҳокимиятдан четлатишга очиқдан-очиқ равишда даъватлар қилишган.

Хориждаги диний экстремистик, сепаратистик ва фундаменталистик ташкилотлардан моддий ва молиявий ёрдамдан фойдаланган ҳолда Ўзбекистондаги барқарорликни бузиш ва фуқаролар тотувлигига рахна солиш каби уйдирмаларни тарқатиш билан шуғулланишган.

Шунингдек, улар ҳижрат ва жиҳод қилиш мақсадида уруш ўчоқлари бўлган Сурия ва Ироқ давлатларига кетиш режаларини ҳам тузишган. Ислом халифалик давлатини қуриш каби ғояларни қўллаб-қувватлашиб Афғонистон, Покистон ва Сурия давлатларидаги “Ўзбекистон Исломий Ҳаракати” ва “Исломий Жиҳод Иттиҳоди” халқаро террористик ташкилотларнинг жангарилар тайёрловчи лагерига бориб қўшилишга ҳаракат қилишган".

Ленинград вилоятида буқа Ўзбекистон фуқаросини ўлдирди

Иллюстратив сурат.

Ленинград вилоятининг Виборг туманида ғазабланган буқа Ўзбекистон фуқароси бўлган чўпонга ҳужум қилди. Чўпон олинган жароҳатлари ортидан воқеа жойида ҳалок бўлди.

Фергана агентлигининг хабар беришича, ҳодиса 13 октябрь куни Ганино қишлоғи яқинида юз берган. Воқеа жойидан мотоциклда ўтиб кетаётган тасодифий гувоҳ буқа чўпонни шохига илиб олиб, осмонга отаётганини кўрган.

Гувоҳ буқани мотоцикл сигнали, тош ва калтак билан қўрқитишга ҳаракат қилган. Бироқ буқа даладан сигирлар кетгачгина ювошланган. Гувоҳнинг айтишича, буқа шохлари билан чўпоннинг ёнбош қисмини ёриб ташлаган.

Хабарда айтилишича, ўзбекистонликнинг ёши 55да бўлган, у ўтган йилнинг декабрида Россияга келган ва май ойида 25 минг рубль эвазига чўпонликка ёлланган.

Фергана агентлиги расмий маълумотларга таянган ҳолда, ҳар йили Россияда 1200-1400 нафар ўзбекистонлик ҳалок бўлишини билдирди.

Бугун Ўзбекистон Туркий тилли давлатлар ҳамкорлик кенгашига қабул қилинади

Президент Шавкат Мирзиёев 14 октябрда Бокуда Озарбайжон президенти Илҳом Алиев билан учрашди.

Озарбайжон пойтахти Бокуда 15 октябрь куни бўлиб ўтадиган Туркий тилли давлатлар ҳамкорлик кенгаши саммитида Ўзбекистон ташкилотга аъзо давлат сифатида қабул қилинади.

Саммитда Озарбайжон, Қирғизистон, Туркия ва Ўзбекистон президентлари иштирок этмоқда. Қозоғистонни саммитда мамлакатнинг собиқ президенти Нурсултон Назарбоев, ташкилотда кузатувчи мақомига эга Венгрияни эса бош вазир Виктор Орбан тамсил этади.

Туркий тилли давлатлар ҳамкорлик кенгаши раиси Багдад Амреев Ўзбекистоннинг ташкилотга аъзо бўлиши ҳақидаги банд саммит декларациясига киритилганини ва уни барча аъзо давлатлар имзолашини айтди.

Озарбайжон Иқтисодиёт вазирлигининг билдиришича, Ўзбекистоннинг ташкилотга қўшилиши ортидан Туркий тилли давлатлар ҳамкорлик кенгашига аъзо давлатлар ўртасидаги савдо айланмаси йилига 12 миллиард долларга етади. Айни пайтда бу кўрсаткич 7 миллиард долларни ташкил қилмоқда.

2018 йилнинг 30 апрель куни Туркия президенти Ражаб Тоййиб Эрдўғон билан Тошкентда ўтган учрашувдан сўнг президент Шавкат Мирзиёев Ўзбекистон Туркий тилли давлатлар ҳамкорлиги кенгашига қўшилишини эълон қилган эди.

Ташкилотнинг 2018 йил, 3 сентябрда Қирғизистоннинг Чўлпонота шаҳрида бўлиб ўтган саммитида Ўзбекистон Республикаси Президенти Шавкат Мирзиёев фахрий меҳмон сифатида қатнашган.

"Тошкент-Ўш" йўлида юк машинаси ёниб кетди, Қорақалпоғистонда поезд ва “Nexia” тўқнашди (ВИДЕО)

«Тошкент-Ўш» автомобиль йўлида ёниб кетган юк машинаси.

«Тошкент-Ўш» автомобиль йўлининг Оҳангарон туманидан ўтган 158-километрида 14 октябрь куни соат тахминан 15:10 ларда юк машинаси ёниб кетди.

Тошкент вилояти Ички ишлар бош бошқармасининг билдиришича, Mercedes-Benz юк машинаси ҳайдовчиси ёмғир оқибатида рул бошқарувини эплай олмай қолган. Натижада юк машинаси йўлни ажратиб турувчи бетон тўсиққа бориб урилган. Зарб натижасида юк машинаси ёна бошлаган.

Расмий хабарда юк машинаси ҳайдовчиси - 1988 йилда туғилган К.Э соғ-саломат экани, ҳеч ким жароҳат олмагани таъкидланган.

Аввалроқ Қорақалпоғистон Ички ишлар вазирлиги 13 октябрь куни соат 16:35да Нукус-Тўрткўл темир йўлининг 693-километрида қўриқланмайдиган темир йўл кесишмасида поезд “Nexia” автомобили билан тўқнашгани ҳақида хабар берган эди.

Йўл-транспорт ҳодисаси оқибатида ҳеч ким жабрланмаган. Поезд соат 16:52да ҳаракатини давом эттирган.

“Росатом” раҳбари Ўзбекистонда АЭС қуриш бўйича музокаралар осон кечмаётганини айтди

Росатом” бош директори Алексей Лихачёв.

Ўзбекистондаги илк атом электр станциясини қуриш бўйича “Росатом” ва Ўзбекистон ўртасидаги музокаралар осон кечмаяпти. Бу ҳақда “Росатом” бош директори Алексей Лихачёвга таянган ҳолда Новости ва ТАСС агентликлари 14 октябрь куни хабар берди.

Алексей Лихачёвга кўра, нархни белгилаб олиш зарурати пайдо бўлгани ортидан музокаралар мураккаблашиб бормоқда.

“Аслини олганда, биз иккита номаълумдан иборат тенгламани ечмоқдамиз: лойиҳавий ишлар бўйича ҳам, бу лойиҳани амалга ошириш бўйича ҳам келишмоқдамиз", деб билдирган Лихачёв.

Жорий йилнинг 3 сентябрида Тошкентга келган Лихачёв атом электр станциясини қуриш ишлари 2020 йилнинг бошидан бошланиши ҳақида эълон қилган эди. Бироқ ТАСС хабарида қурилиш ишларини 2022 йилдан бошлаш режалаштирилаётгани маълум қилинди.

Айни пайтда Россиянинг «Атомстройэкспорт» ширкати Ўзбекистонда АЭС қурилиши бўйича муҳандислик-қидирув ишларининг иккинчи босқичини олиб бормоқда.

Иккинчи босқич 29 июнь куни атом электр станциясини қуриш учун мақбул майдонча сифатида танлаб олинган Тузкон кўли яқинидаги ҳудудда бошланган.

2018 йилнинг 19 октябрида президентлар Шавкат Мирзиёев ва Владимир Путин Жиззахда АЭС қурилишининг рамзий тугмасини босган эдилар.

Сурхондарёда Ўзбекистондаги энг биринчи "Вақф" меҳмонхонаси очилди

"Вақф" хайрия жамоат фондининг биринчи меҳмонхонаси. "Вақф" фонди фотоси.

Сурхондарё вилоятидаги Ҳаким Термизий зиёратгоҳи яқинида "Вақф" хайрия жамоат фондининг биринчи меҳмонхонаси иш бошлади.

"Вақф" жамғармасининг 14 октябрда билдиришича, меҳмонхонани муфтий Усмонхон Алимов тантанали равишда очиб берган.

Мазкур меҳмонхона 70 ўринга эга, унинг ҳудудида 1 та чойхона ва 1 та ресторан мавжуд.

“Меҳмонхонада мусулмон сайёҳларга қулайлик яратиш мақсадида ҳар бир хонага Қуръони карим, жойнамоз қўйилиши ва қибла кўрсаткичи ўрнатилиши режалаштирилган. Бундан ташқари, келажакда меҳмонхонани ҳалол стандартига мос ҳолатга келтириш кўзда тутилган”, дейилади расмий билдирувда.

Меҳмонхона фаолиятидан келиб тушган маблағлар вақф мулкларини тасарруф этиш ҳамда хайрия мақсадлари учун ишлатилиши айтилган.

Шунингдек, меҳмонхонанинг очилиш маросимида вилоятдаги 30 нафар жисмоний имконияти чекланган фуқароларга ногиронлик аравачалари топширилган.

Ҳукумат дон, ун ва нон савдосида бозор механизмларини тўлиқ жорий этишга қарор қилди

Иллюстратив сурат

14 октябрда Вазирлар Маҳкамаси дон, ун ва нон етказиб бериш тизимига бозор механизмларини тўлиқ жорий этиш чора-тадбирлари тўғрисида қарор қабул қилди.

Бу ҳақда хабар қилган Адлия вазирлигига кўра, қарорга мувофиқ, 2019 йил 15 октябрдан:

2019 йил ҳосилидан тайёрланган ва ун ишлаб чиқаришга мўлжалланмаган буғдой ғалла истеъмолчиларининг барча тоифаларига фақат биржа орқали сотилади;

давлат харидлари доирасида сотиб олинган буғдойни қайта ишлашдан олинган ун барча истеъмолчиларга 100 фоиз тўловни олдиндан амалга ошириш орқали очиқ биржа савдоларида сотилади;

2019 йил ҳосилидан тайёрланган буғдойнинг 1 тоннаси ун ишлаб чиқаришга 1300 минг сўмдан улгуржи нархда сотилади.

2019 йил 1 октябрдан бошлаб ун ва қолипли нон харид қилиш бўйича қўшимча харажатларни қоплаш учун аҳолининг ижтимоий ҳимояга муҳтож бўлган айрим тоифаларига бериладиган ҳар ойлик пул компенсацияси оширилиб, 50 000 сўм миқдорида белгиланди.

Шунингдек, 2019 йил 1 октябрдан бошлаб компенсация оладиган аҳоли тоифаларига қуйидагилар ҳам қўшилди:

14 ёшгача бўлган болалари учун нафақа олувчи оилалар;

белгиланган энг кам миқдорда ёшга доир пенсия олувчилар.

Ўзбекистон рус тилини ўрганишни такомиллаштиришда Россия билан ҳамкорлик қилмоқчи

Ўзбекистон Халқ таълими вазири Шерзод Шерматов.

Ўзбекистон Халқ таълими вазири Шерзод Шерматов ва Россиянинг Ўзбекистондаги элчиси Владимир Тюрденев рус тили фани бўйича ўқишни такомиллаштириш, шунингдек, барча мактабларга рус тили фан ўқитувчиларини тайёрлаш бўйича ҳамкорлик имкониятларини муҳокама қилди.

Бу ҳақда вазирлик Ахборот хизмати хабар қилди.

Халқ таълими вазирлигида бўлиб ўтган мазкур учрашувда таълим соҳасидаги ҳамкорликни кенгайтириш зарурлиги таъкидлаб ўтилгани, шунингдек, Ўзбекистондаги барча рус тили фани ўқитувчиларини қайта тайёрлаш учун Ўзбекистон россиялик мутахассисларни жалб қилишдан манфаатдор эканлиги алоҳида таъкидлангани хабар қилинди.

Россиялик ҳамкорларга ўзбекистонлик ўқитувчиларини рус тилида билимларни синаб кўриш ва натижаларга кўра уларни қайта тайёрлаш дастурини амалга ошириш таклифи берилди.

Шу билан бирга, томонлар Ўзбекистон ёшлари учун Россия университетларида педагогика йўналишида ўқишни ташкил қилиш масаласини кўриб чиқди.

Ўзбекистон томони россиялик мутахассисларни жалб қилган ҳолда ушбу соҳадаги таълим сифатини оширадиган ўқув дастурлари ва рус тилидаги дарсликларни қайта кўриб чиқишни таклиф қилди.

"Халқ таълими вазири ва Россия Федерацияси элчиси юртимиз мактабларига қўшимча бадиий адабиётлар тақдим этишда рус тилида таълим олиб борилмайдиган мактабларга ҳам алоҳида эътибор қаратиш бўйича фикр билдирди/ Учрашувда республикамиздаги барча мактаб битирувчилари камида учта тилни - давлат, рус ва инглиз тилларини билиши кераклиги таъкидланди" дейилган хабарда.

МОИҲ ассоциацияси: Навоийдаги колонияда 5 маҳкум қийноққа қарши сиёсий очлик эълон қилди

Иллюстратив сурат. Қизилтепа шаҳридаги №64/4- жазо ўташ колониясига бу суратнинг алоқаси йўқ.

"Навоий вилоят, Қизилтепа шаҳридаги №64/4- жазо ўташ колониясида маҳкумларга қийноқ қўллаш ва шафқатсиз муносабатда бўлиш амалиётига халқаро жамоатчилик зудлик билан аралашиши лозим".

Бу баёнотни қароргоҳи Францияда жойлашган “Марказий Осиёда инсон ҳуқуқлари” ассоциацияси ўз расмий сайтида эълон қилди.

Ўзига келиб тушган маълумотга таяниб ташкилотнинг хабар қилишича, 10 октябрда №64/4- (64/(64/47) жазо ўташ колониясида сақланаётган маҳкумлардан 5 нафари ўзлари тушиб қолган вазиятга эътибор тортиш учун сиёсий очлик эълон қилган.

Ташкилотнинг хабар қилишича, 29 сентябрдан буён №64/4- (64/(64/47) жазо ўташ колониясининг жазо изоляторида 10 маҳкум сақланмоқда. Айтилишича, улар ғишт заводида ишлайди ва иссиқ ғиштни юклаш учун янги қўлқоп ва пойафзал беришини сўраб колония маъмуриятига мурожаат қилган.

“Колониянинг режим бўйича бошлиғи В.Ю.Рустамов ва колония бошлиғи К.Ш.Каримовлар маҳкумларнинг мурожаатига ўта шафқатсиз муносабат билан жавоб қилган.Рустамов шахсан таёқ билан маҳкумларнинг товонига ва таналарининг бошқа қисмларига урган ва шундан сўнг уларни жазо изоляторига қамаб қўйган. 10 октябрь куни 10 маҳкумдан 5 нафари ўзлари тушиб қолган вазиятга эътибор тортиш учун сиёсий очлик эълон қилган”, - дейилади Марказий Осиёда инсон ҳуқуқлари” ассоциацияси хабарида.

Ташкилот маълумотига қараганда, №64/4- (64/(64/47) жазо ўташ колониясида сақланаётган маҳкумлар ғишт заводида кечаю кундуз – 3 сменада ишлайди. Заводнинг 3 та ғишт пишириш цехида бир суткада 400 мингта ғишт пиширилади. Пишириш цехларидан ҳар 10-15 дақиқада вагончаларда чиқадиган иссиқ ғиштни маҳкумлар юк машиналарига ортиши лозим.

"Бу ишга ўзлари устидан чиқарилган ҳукмга биноан жабрланган томонга кўрилган зарарни тўлаб беришга ҳукм қилинмаганлар ҳам мажбурланади. Маҳкумларнинг бу объектда ишлатилиши Ўзбекистон ўз зиммасига олган халқаро мажбуриятларига зид келувчи ва маҳкумларнинг Сталин Гулагидаги эксплуатациясига ўхшаш мажбурий меҳнат деб ҳисобланиши керак", - дейилган Марказий Осиёда инсон ҳуқуқлари” ассоциацияси баёнотида.

Президент Бокуга, Туркий тилли давлатлар ҳамкорлик кенгаши саммитига жўнаб кетди

Ҳайдар Алиев маданият маркази. Боку шаҳри.

Президент Шавкат Мирзиёев Туркий тилли давлатлар ҳамкорлик кенгашининг еттинчи саммити тадбирларида иштирок этиш учун 14 октябрь куни Озарбайжон пойтахти Боку шаҳрига жўнаб кетди.

Бу ҳақда давлат раҳбари расмий сайти хабар қилди.

Озарбайжон, Қозоғистон, Қирғизистон, Туркия, Ўзбекистон, кузатувчи мамлакат сифатида иштирок этаётган Венгрия ҳамда Туркманистон делегациялари раҳбарлари Туркий кенгаш доирасидаги кўп қиррали ҳамкорликни мустаҳкамлаш ва кенгайтиришга қаратилган масалаларни муҳокама қиладилар, дейилади матбуот хизмати билдирувида.

Саммитда Туркий кенгашга аъзо давлатлар раҳбарларининг Ўзбекистон Республикасининг тўла ҳуқуқли аъзо сифатида Ташкилотга қўшилиши тўғрисида Қўшма баёноти қабул қилиниши кутиляпти.

2018 йилнинг 30 апрель куни Туркия президенти Ражаб Тоййиб Эрдўғон билан Тошкентда ўтган учрашувдан сўнг президент Шавкат Мирзиёев Ўзбекистон Туркий тилли давлатлар ҳамкорлиги кенгашига қўшилишини эълон қилган эди.

Ташкилотнинг 2018 йил, 3 сентябрда Қирғизистоннинг Чўлпонота шаҳрида бўлиб ўтган саммитида Ўзбекистон Республикаси Президенти Шавкат Мирзиёев фахрий меҳмон сифатида қатнашган эди.

Дунёдаги туркий тилли 6 давлатдан бири бўлган Ўзбекистон раҳбарияти Туркий тилли давлатлар ҳамкорлиги кенгаши саммитларидан бирортасида иштирок этган эмас.

Афсонавий Оксана Чусовитина Гиннес китобига битилган ўз рекордини янгиламоқчи

Оксана Чусовитина Токио олимпиадасида 45 ёшида иштирок этади.

Еттита олимпиадада иштирок этгани ортидан Гиннес рекордлар китобига ёзилган ўзбекистонлик гимнастикачи Оксана Чусовитина 2020 йили Токиода бўлиб ўтадиган Олимпия ўйинларида ҳам иштирок этади. Бу ҳақда 44 ёшли спортчи ўзининг Instagram саҳифасида маълум қилди.

Оксана Чусовитина Токио олимпиадасида иштирок этиш ҳуқуқини спорт гимнастикаси бўйича жаҳон чемпионатида қўлга киритди.

Тelegraph нашрига берган интервьюсида Оксана Чусовитина Ўзбекистон учун Олимпиада медалини ютишни орзу қилишини айтган эди.

«Менинг орзуим — Ўзбекистон учун олимпия медалини ютиш. Рио-де-Жанейродаги Ўйиндан кейин карьерамни якунлаш-якунламасликни ўйладим, мен яна нималарнидир қила олишимни, менда ҳали куч-қувват етарли эканини ўйладим. Мен ўзимни яна бир марта синаб кўрмасам, у ҳолда умримнинг охирига қадар бундан афсусланаман, деб ўйладим», — деган эди спортчи.

Оксана Чусовитина 1992 йил Барселонадаги Олимпиадада олтин, Пекиндаги Олимпиадада эса кумуш медалларини қўлга киритган.

Шунингдек, жаҳон чемпионатларида 3 мартадан олтин ва кумуш медал, 4 марта бронза медални қўлга киритган Чусовитина Осиё ўйинларининг 2 маротаба чемпиони бўлган.

Оксана Чусовитина гимнастика тарихида еттита Ёзги Олимпиадада иштирок этган ягона спортчидир. Унинг номи Гиннес рекордлар китобига ёзилган. 2017 йилда унинг номи Гимнастика халқаро шуҳрат саройидан жой олган.

Оксана Чусовитина "Дўстлик", "Меҳнат шуҳрати" ва "Эл-юрт ҳурмати" орденлари билан тақдирланган.

Президент Мирзиёев Япония Бош вазирига таъзия билдирди

Япониянинг сув босган шаҳарларидан бири.

Президент Шавкат Мирзиёев «Хагибис» тўфони оқибатида кўплаб инсонлар қурбон бўлгани муносабати билан Япония Бош вазири Синдзо Абэга ҳамдардлик билдирди. Бу ҳақда 13 октябрь куни президент матбуот хизмати билдирди.

Сўнгги маълумотларга қараганда тўфонда 23 киши ҳалок бўлди, 166 киши жароҳатланди, 16 киши бедарак йўқолган ҳисобланмоқда.

Японияда 12 октябрь куни кучли ёмғирлар ва шамол билан бирга бошланган тўфон натижасида 14та дарё ўзанидан тошган. Табиий офат туфайли 200 мингдан ортиқ хонадон электр таъминотидан узилган.

Мутахассисларга кўра, бу Японияга 1958 йилда ёпирилган ва 1200 кишининг умрига зомин бўлган «Ида» тўфонидан кейинги энг йирик тўфон бўлмоқда.

Давомини ўқинг

Кўрмай қолган бўлсангиз

XS
SM
MD
LG