Линклар

Шошилинч хабар
04 март 2021, Тошкент вақти: 10:58

Ўзбекистон хабарлари

ЕХҲТ инсон ҳуқуқлари бюроси директори сайловларни кузатиш учун Тошкентга келди

Ингибьёрг Сольрун  Гисладоттир

Европада хавфсизлик ва ҳамкорлик ташкилоти ҳузуридаги Демократик институтлар ва инсон ҳуқуқлари бюроси (ДИИҲБ) директори Ингибьёрг Сольрун Гисладоттир 20 декабрь куни Тошкентга келди.

Бу ҳақда Ўзбекистон Марказий сайлов комиссияси хабар қилди.

Гисладоттир 22 декабрь кунги парламент ва маҳаллий кенгашларга сайловларни мониторинг қилувчи ЕХҲТ кузатувчилар гуруҳига раҳбарлик қилади.

МСК таъкидича¸ ЕХҲТ 1999 йилдан бери илк марта бу йилги сайловларни кузатиш учун тўлақонли миссия юборган.

Бу миссия таркибига Тошкентда жойлашган 11 нафар халқаро эксперт¸ 30 нафар узоқ муддатли ва 250 нафар қисқа муддатли кузатувчилар киритилган. Миссия ўз фаолиятини 25 ноябрдан бошлаган.

ЕХҲТнинг оралиқ ҳисоботида¸ қатор камчиликлар баробарида¸ Ўзбекистон сайлов қонунчилиги ва овоз бериш амалиëтида "сезиларли прогресс" кузатилгани айтилган.

ЕХҲТ миссияси сайловларга оид ўз якуний хулосасини 23 декабрь куни тақдим қилади.

Сайловларни МДҲ¸ ШҲТ каби бошқа қатор халқаро тизимлардан келган юзлаб экспертларнинг кузатиши айтилмоқда.

Мирзиëев президентликка келганидан бери биринчи марта ўтказилаëтган сайловларда Каримов даврида тузилган беш партия номзодларигина иштирок этмоқда.

Муҳожиратдаги мухолиф партия ва ҳаракатлар бу сайловларга қўйилмади¸ улар етакчиларининг Ўзбекистонга қайтишига ҳам изн берилмади.

Кун янгиликлари

Ўтган йили хориждан 1600 нафардан зиёд муҳожир жасади олиб келинган

Иллюстратив сурат

2020 йилда хорижий юртлардан меҳнат мухожирлигида юриб, вафот этган ўзбекистонликнинг 1629 та жасади олиб келинган. Бу ҳақда Республика патологик анатомия маркази директори Ражаббой Исроилов билдирган.

Қайд этилишича, бу кўрсаткич Ўзбекистоннинг 2020 йилдаги ўлимлар статистикасига кирган, лекин COVID-19 статистикасига кирмаган.

Соғлиқни сақлаш вазирлиги жамоатчилик билан алоқалар бўлими маълумотига кўра, шу кунда Ўзбекистонда коронавирус инфекцияси туфайли вафот этганлар сони 622 нафарни ташкил қилмоқда, мазкур ўлим ҳолатлари махсус лаборатория ҳамда патологоанатомик текширувида ҳам тасдиғини топгандан сўнг қайд этилган.

Вазирлик ўз хабарномасида коронавирусга чалинган беморлар сони ҳамда ушбу инфекциядан вафот этганлар кўрсаткичини яширишидан ҳеч қандай наф йўқлигини урғулаган.

Мирзиёев уй нархини бир квадрат метр учун 4 миллион сўмдан оширмасликни буюрди

Ўзбекистон президенти Шавкат Мирзиёев

Ўзбекистонда вилоят ва туман ҳокимлари бир квадрат метр уй нархини 4 миллион сўмдан оширмаслик учун барча зарур чораларни кўриши керак. Бу ҳақда президент Шавкат Мирзиёев уй-жой қурилиши ва ипотека бозорини ривожлантириш чора-тадбирлари бўйича 3 март куни ўтказилган видеоселектор йиғилишида билдирган.

Мирзиёев йиғилишда аҳоли кўчмас мулк нархидан рози эмаслигини қайд этган.

Энг катта масала – бу уй-жойларнинг нархини адолатли шакллантириш. Бугунги нарх-наводан одамларимиз рози эмас ва ҳокимлар бунинг ичига кирмагани ҳам рост.

Шунинг учун вилоят ва туман ҳокимлари бир квадрат метр уй нархини 4 миллион сўмдан оширмаслик учун барча зарур чораларни кўриши керак”, дея иқтибос келтиради президент сўзларидан Кун.уз нашри.

Йиғилишда Мирзиёев ҳокимлар зиммасига ўз ҳудудида қурилиш таннархи ичига кириб, қайси қурилиш материалларини арзонроқ ва яқинроқдан олиш мумкинлиги, цемент ва металл нархини қандай пасайтирса бўлишига оид саволларга жавоб топиш вазифасини юклаган.

Тошкент вилояти ҳокимининг уйи электрсиз қолди

Иллюстратив сурат

Тошкент вилояти ҳокими вазифасини бажарувчи Даврон Ҳидоятовнинг хизмат уйи у кўчиб кирганига бир ҳафта бўлмай электр таъминотидан узиб қўйилган.

Мулозимнинг айтишича, бунга ўзидан аввал бу уйда яшаганларнинг электр ҳақини тўламагани сабаб бўлган.

Амалдорга фармойиш билан ҳокимият ҳисобидан бу қарздорликни бартараф этиш мумкинлигини айтишган, бироқ у рози бўлмаган.

“Ҳокимият уй-жой билан таъминлаши мумкиндир, лекин коммунал хизматга тўловни у ҳоким бўладими, прокурор бўладими, шахсан ўзи амалга ошириши керак!” дея иқтибос келтирган Даврон Ҳидоятов сўзларидан вилоят ҳокимлиги матбуот хизмати.

Ҳоким фикрича, амалдор ишлатган электр бюджетдан, халқ пулидан қопланиши тўғри эмас.

Президент муҳтож оилаларга уй сотиб олиш учун давлат 10 фоиз субсидия беришини билдирди

Шавкат Мирзиёв бошпанасиз қолган 1 мингта оила, айниқса, аёлларни ижтимоий ижара асосида уй-жой билан таъминланашга ваъда берди.

Жорий йилда шаҳарларда ипотекага уй-жой сотиб олувчиларга белгиланган дастлабки бадал миқдори 20 фоиздан 15 фоизга туширилади. Бундан ташқари ипотека кредити бўйича 6 ойлик имтиёзли давр киритилади.

Маҳаллий матбуотнинг 3 мартда билдиришича, президент Шавкат Мирзиёев уй-жой қурилиши ва ипотека бозорини ривожлантириш масаласида ўтказган видеоселектор йиғилишида гапирган.

“Паст даромадли, уй-жой шароитини яхшилашга муҳтож оилаларга 15 фоизлик дастлабки бадалнинг 10 фоизи субсидия сифатида тўлаб берилади. Яъни, аҳоли уй олиш учун дастлабки бадалнинг 5 фоизини тўлайди, холос”,-деб айтган президент.

Бундан ташқари, кредит олган аҳоли учун фоиз тўловларининг Тошкент шаҳрида 12 фоизи, бошқа ҳудудларда 10 фоизидан юқори қисмига субсидия берилиши айтилди.

“Мисол учун, қишлоқларда 54 квадрат метрли квартира (ўртача 216 миллион сўм) олмоқчи бўлган оила 33 миллион сўмлик дастлабки бадалнинг фақат 11 миллион сўмини тўлайди, 22 миллион сўми бюджет маблағлари ҳисобидан қопланади. Бу оила имтиёзли даврда ойига 1 миллион 500 минг сўм кредит тўласа, қолган 1 миллион 100 минг сўмини ҳар ой давлат қоплаб беради”,-дейилади хабарда.

Шавкат Мирзиёв бошпанасиз қолган 1 мингта оила, айниқса, аёлларни ижтимоий ижара асосида уй-жой билан таъминланашга ваъда берди.

Ўзбекистон нодавлат ташкилотларига хориждан кўпроқ моддий кўмак олишга рухсат берди

Нодавлат нотижорат ташкилотлари 2020 йилнинг 1 мартидан бошлаб рўйхатдан ўтказувчи органни хабардор қилган ҳолда хорижий манбалардан бир календарь йилида жами БҲМнинг 100 бараваригача моддий кўмак олишларига рухсат берилди. Шу кунгача бу меъёр БҲМнинг 20 бараваридан ошмаслиги лозим эди.

Адлия вазирлигининг билдиришича, бу меъёр президент 3 март куни имзолаган“Нодавлат нотижорат ташкилотларини давлат томонидан қўллаб-қувватлаш, уларнинг фаолияти эркинлиги, ҳуқуқлари ва қонуний манфаатлари ҳимоя қилинишини таъминлашга оид қўшимча чора-тадбирлар тўғрисида”ги қарорда белгилаб қўйилди.

Қарорга асосан нодавлат нотижорат ташкилотини қайта рўйхатдан ҳамда унинг рамзини давлат рўйхатидан ўтказиш муддати 1 ойдан 15 кунгача қисқартирилади.
Ногиронлиги бўлган шахслар, фахрийлар, нуронийлар, хотин-қизлар, болалар жамоат бирлашмалари рамзларини давлат рўйхатидан (қайта рўйхатдан) ўтказиш учун давлат божи ундирилмайди.

Бундан ташқари, бундан буён нодавлат нотижорат ташкилотининг алоҳида бўлинмаси юридик шахс ҳисобланади, бунда алоҳида бўлинмаларни ҳисобга қўйиш тартиби бекор қилинади.

Шунингдек, маҳаллий ННТларни ривожлантиришга қаратилган дастур ва лойиҳаларни молиялаштириш учун Ўзбекистон нодавлат нотижорат ташкилотларини қўллаб-қувватлаш жамоат фондига давлат субсидияси ажратилади.

“Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондларини сақлаш харажатларига ҳамда уларнинг асосий фаолият йўналишларини амалга ошириши учун 1,1 миллиард сўмдан кам бўлмаган маблағлар йўналтирилади”,-дейилади қарорда.

Ўзбекистон Миллий телерадиокомпаниясининг 12 та канали Россияда намойиш этилади

Ўзбекистон Миллий телерадиокомпанияси биноси.

Россиянинг SPB TV ширкати Ўзбекистон Миллий телерадиокомпаниясининг 12 та канали кўрсатувларини Россияда намойиш этиш бўйича шартномани имзолади.
ТАССнинг 3 мартда хабар беришича, кўрсатувларни март ойидан OTT TVнинг турли платформалари орқали намойиш этиш режалаштирилган.

“Имзоланган шартномага асосан ўзбек тилидаги контент биринчи марта Россия ва МДҲ ТВ-платформаларига расмий равишда чиқарилади. Бу кўрсатувларнинг потенциал аудиторияси камида 2,5 миллион кишини ташкил қилади”,-дейилади хабарда.

Ўзбекистон Миллий телерадиокомпаниясининг 12 та каналини Россия да яшовчи ўзбек меҳнат муҳожирлари EPG, catch-up (видеоархив), timeshift (кейинроқ кўриш) форматина томоша қила оладилар. Телеканаллар нафақат телевизорлар орқали, балки мобил телефонлари, планшетлар, персонал компьютер ва SmartTV орқали намойиш этилади.

Пандемия ортидан 70 фоиз ўзбекистонликнинг даромади камайди

Сўралганларнинг 37,4 фоизи умуман жамғармаси йўқлигини айтган.

Ўзбекистон Марказий банки ўтказган сўровда қатнашганларнинг 70 фоизи 2020 йилда ўз даромадлари кескин камайганини маълум қилди. Сўровда жами 5717 киши қатнашган.

Марказий банкнинг “Аҳолининг истеъмол кайфияти шарҳи” деб номланган ҳисоботида қайд этилишича, сўралганларнинг фақат 15 фоизи даромадлари кўпайганини, 37 фоиз респондент жамғармаси йўқлигини, 23,6 фоизи эса жамғармалари ўртача бир ойга етишини билдирганлар.

Шунингдек, сўралганларнинг 65 фоизи кейинги 12 ой ичида даромадлари ошишига умид билдирган. 20 фоиз респондент эса даромадлари ўзгаришсиз қолиши ёки камайиши мумкинлигидан ҳавотир билдирган. Сўралганларнинг 37,4 фоизи умуман жамғармаси йўқлигини айтган.

Аёллар байрами арафасида суд қарори билан 14 нафар маҳкума қамоқдан озод этилди

Ўзбекистон Олий судида 8 март – Халқаро хотин-қизлар куни арафасида жазони ижро этиш муассасаларида оғир, ўта оғир жиноятларни содир этиб, турли муддатларга озодликдан маҳрум этилган 16 нафар маҳкума аёлнинг кассация тартибида берган шикоятлари кўриб чиқилган.

ЎзА хабарига кўра, суд ажрими билан содир этган жинояти учун тайинланган жазонинг асосий қисмини ўтагани, қилмишига иқрор ва пушаймон бўлгани, ёши ҳамда кафолат хатлари инобатга олиниб, 14 нафар аёлнинг тайинланган жазолари енгиллаштирилиб, жазодан озод қилинган. Улар оиласи бағрига қайтган.

Айни пайтда маҳкамада 2 нафар маҳкума аёлга тайинланган жазолар енгиллаштирилган.

Ўтган йили Ўзбекистон президенти Шавкат Мирзиёев Аёллар байрами арафасида қамоқларда жазо муддатини ўтаётган 83 нафар аёлни афв этиш тўғрисидаги фармонни имзолаганди.

Коронавирус юқтириб олганлар сони 80 минг нафардан ошди

Ўзбекистонда коронавирус инфекцияси қайд этилганлар сони, 2021 йил 2 март ҳолатига кўра, 80 минг 6 нафарни ташкил этган.

Соғлиқни сақлаш вазирлиги маълумотига кўра, ўтган кеча-кундузда Андижон, Сурхондарё, Хоразм, Тошкент вилоятлари ҳамда Тошкент шаҳрида жами 45 киши коронавирус юқтириб олган.

Сешанба куни Тошкент вилояти ва Тошкент шаҳрида 36 нафар бемор соғайиб, тузалганларнинг жами 78 минг 549 нафарга етган.

Касалхоналарда муолажаси давом этаётган беморлар сони эса 835 нафарни ташкил этиб, улардан 146 нафарининг аҳволи оғир, 27 нафарининг эса аҳволи ўта оғир экани айтилмоқда.

Бу орада, Worldometer сайти маълумотига мувофиқ, Ўзбекистонда коронавирус юқтириб олгани ортидан ҳаётдан кўз юмганлар сони 622 нафарга етган.

Раҳбарликка тайинланаётган мулозимларни ўзбек тили бўйича синовдан ўтказиш бошланади

Ўзбекистондаги давлат тилига бағишланган стендлардан бири

Раҳбарлик лавозимига кўтарилган ҳар бир киши давлат тилини билиши юзасидан тест топширади. Бу ҳақда, Repost нашрининг ёзишича, 2 март куни Тошкентда ўтказилган брифингда Вазирлар Маҳкамаси Давлат тилини ривожлантириш департаментининг мудири Абдуғаффор Қирғизбоев маълум қилган.

Мулозимга кўра, ўтган йили Ўзбекистонда давлат тили ривожи учун 17 та меъёрий-ҳуқуқий ҳужжат қабул қилинган бўлиб, улар орасида президентнинг икки фармони ва икки қарори, битта қонун ҳамда 12 та ҳукумат қарори бор.

Қирғизбоев айтган президент фармонларидан бири – “Мамлакатимизда ўзбек тилини янада ривожлантириш ва тил сиёсатини такомиллаштириш чора-тадбирлари тўғрисида”ги фармонда 2021 йил 1 апрелидан Ўзбекистонда давлат амалдорларининг ўзбек тилида расмий иш юритиш даражаси аниқланиши ҳамда масъул лавозимларга тайинланадиган шахслар учун давлат тилини билиш бўйича даража сертификатлари жорий этилиши белгилаб қўйилган.

Фармон билан 2020-2030 йилларда ўзбек тилини ривожлантириш ва тил сиёсатини такомиллаштириш концепцияси тасдиқланган.

Концепциянинг асосий йўналишларига асосан 2025 йилгача давлат мактабгача таълим тизимида ўзбек тилли гуруҳлар қамровини 72 фоизга, 2030 йилгача эса 80 фоизга етказиш, 2030 йилгача мактабларда ўқув йиллари учун таянч ўқув режаларида она тили фанини ўқитиш кўламини ҳафтада 84 соатдан 110 соатгача ошириш режалаштирилган.

Президент Шавкат Мирзиёев ўзбек тилига давлат тили мақоми берилган кун муносабати билан ўтган йили Ўзбекистон халқига йўллаган табригида “ҳозирги вақтда ер юзида ўзбек тилида сўзлашувчилар сони қарийб 50 миллион кишини ташкил этиши унинг дунёдаги йирик тиллардан бирига айланиб бораётганидан далолат беради”, деган эди.

Аввалроқ Озодлик ўзбек тилига эътибор рус тилида сўзлашувчи ўзбекистонликларнинг хавотирига сабаб бўлаётгани ҳақида мақола ёйинлаган, бу хусусда мулоҳаза билдирган ўзбек расмийлари бундай хавотирга асос йўқлигини билдирган эдилар. Хусусан, Ҳуқуқий сиёсат тадқиқот институти директори Аъзам Мадаминовнинг таъкидлашича, “Ўзбекистонда ҳеч бир миллат ëки элатнинг тили камситилмайди ва айни пайтда давлат тили ҳақидаги қонун талаблари пайсалга солинмай, амалга оширилаверади”.

ТММА: Ўтган икки ой ичида 4 минг чоғли ўзбекистонлик хорижга ишлаш учун юборилган

Россияга кетаётган ўзбекистонлик муҳожирларнинг катта қисми қурилишларда ишлаши айтилади

Жорий йилнинг январь-февраль ойларида 4 мингга яқин ўзбекистонлик муҳожир вақтинчалик меҳнат фаолиятини амалга ошириш учун ташкиллаштирилган ҳолда юборилган.

Ташқи меҳнат миграцияси агентлиги маълумотига кўра, уларнинг 3209 нафари Россия Федерациясига, 488 нафари Қозоғистонга, 3 нафари Бирлашган Араб Амирликларига йўлланган, шунингдек, меҳнат таътилини ўтказиш учун Ўзбекистонга келган меҳнат муҳожирларидан 101 нафари ишлаш учун Жанубий Кореяга қайтиб кетган.

Агентлик хорижга кетган ўзбекистонлик муҳожирлар белгиланган эпидемиологик талаблар ва карантин чекловларига риоя қилган ҳолда турли объектларда иш бошлашини билдирган.

Қурилиш вазири “Сардоба”ни тиклаш иши тендерда ютган ширкатга топширилишини билдирди

Ўтган йил баҳорида ўпирилган “Сардоба” сув омборини қайта қуриш иши тендерда ютган ширкатга топширилади. Бу ҳақда қурилиш вазири Ботир Зокиров 1 март куни Тошкентда ўтказилган матбуот анжуманида билдирган.

Сув омборини қайта қуришга оид лойиҳаларимиз халқаро экспертизадан ўтказилганидан сўнг тендерга қўйилади. Тендер шаффофлик асосида ўтказилади ва унда ким ютиб чиқишини вақт кўрсатади. Олдиндан бир нарса дея олмаймиз. Қайта қуриш жараёни қачон бошланиши ҳам аниқ эмас. Чунки дамбани қайта тиклаш анча вақт олади, буёғига шошилиб бўлмайди”, дея иқтибос келтирган вазир Зокиров сўзларидан Дарё.уз нашри.

Қурилиш вазири ҳукумат қарори билан дамба етказган зарарларни таъмирлаш ва қоплаш ишларини “ТўпалангсувГЭСқурилиш” МЧЖ ҳамда “Ўзбекистон темир йўллари” ўз ҳисобидан амалга ошириши, бунинг учун давлат бюджетидан бир сўм ҳам ишлатилмаётганини қўшимча қилган.

Матбуот анжуманида иштирок этган сув хўжалиги вазири Шавкат Ҳамраев ҳам “Сардоба” сув омборини қайта қуриш бўйича тендер шаффофлик асосида ўтказилишини таъкидлаган.

Унда “ТўпалангсувГЭСқурилиш” МЧЖ қатнашадими, йўқми – билмаймиз. Тендер жараёни якунида қайси ташкилот қуриши маълум бўлади”, деган вазир Ҳамраев.

Ўтган йилнинг 1 май куни Сирдарё вилоятидаги “Сардоба” сув омборида рўй берган техноген фалокат оқибатида Сардоба, Оқолтин, Мирзаобод туманларидаги минглаб аҳоли уйларини сув ювиб кетган, ҳодиса чоғида 6 киши ўлган, 1 киши бедарак йўқолган эди.​ Мазкур тошқин чоғида қўшни Қозоғистонда ҳам 276 квадрат километр майдонни сув босиб, Туркистон вилояти Пахтаорол туманидаги 14 та қишлоқдан жами 31 мингдан зиёд аҳоли эвакуация қилингани айтилган.

“Меҳр-4”: Афғонистондан 24 нафар ўзбекистонлик олиб чиқилди

2019 йилда Суриядан қайтарилган аёллар.

Сурхондарё вилоятини Афғонистон Ислом Республикаси билан боғлаб турувчи Ҳайратон кўпригида 2 март куни “Меҳр-4” операцияси амалга оширилди.

Kun.uz нашрининг билдиришича, операция натижасида Афғонистондан 24 нафар Ўзбекистон фуқароси олиб чиқилган. Улардан 19 нафари балоғатга етмаган бола, жумладан, 4 нафари етим.

Билдирилишича, 2017 йилдан 2020 йилгача Афғонистон махсус хизматлари билан ҳамкорликда 86 нафар фуқаро Ўзбекистонга қайтарилган. Уларнинг барчаси ноқонуний қуролли гуруҳлар сафларида бўлишган.

“Афғонистондан бугунгача олиб чиқилган фуқароларнинг 23 нафари эркак, 16 нафари аёл, яна 47 нафари болалар бўлган”,-дейилади хабарда.

2020 йилнинг 8 декабрида “Меҳр-3” операцияси доирасида Суриянинг жанговар ҳаракатлар кечаётган ҳудудларидан 98 нафар ўзбекистонлик, жумладан, 25 нафар аёл ва 73 нафар бола ватанга қайтарилганди.

2019 йилнинг октябрида “Меҳр-2” амалиёти доирасида ота-онасиз қолган 39 ўғил бола ва 25 қиз Суриядан қайтарилганди.

Ўзбекистонлик илк гуруҳ - 156 аёл ва бола "Меҳр" инсонпарварлик операцияси доирасида 2019 йилнинг 30 майида махсус авиарейс билан Тошкентга олиб келинган.

Талабалар ҳам қизил, сариқ, яшил рангларга ажратиладиган бўлди

Андижон вилоят университети.

Ижарада турувчи талабалар яшил, сариқ ва қизил рангларга ажратилади. Бунинг учун маҳаллаларда “талабабай юриш бошланди”. Бу ҳақда 2 март куни Олий Мажлис Қонунчилик палатасида Олий ва ўрта махсус таълим вазири Aбдуқодир Тошқулов маълум қилди.

Вазирга кўра, ижарада турган талабалар турмуш тарзини ва шароитларини текшириш учун махсус ишчи гуруҳи ташкил қилинган. Ишчи гуруҳ текширув натижаларидан келиб чиқиб, ижарада турувчи талабаларни яшил, сариқ ва қизил рангларга ажратади.

Озодлик радиоси 27 февраль куни соат 20:50 ларда Юнусобод тумани, Фирдавсий маҳалла фуқаролар йиғинига қарашли Инжобод кўчаси, 61-уйда Тошкент Ахборот технологиялари университети 2-босқич талабалари М.У., Р.С., Д.Ғ. ва Сингапур университети 2-босқич талабаси О.И. ҳамда “Инха” университети 1-босқич талабаси С.Х.,лар ўлик ҳолда топилгани ҳақида хабар берган эди.

Расман билдирилишича, талабалар номаълум моддадан заҳарланиб ўлишган. Ушбу ҳолат юзасидан шу куннинг ўзида Юнусобод туман прокуратураси томонидан Жиноят Кодексининг 259-моддаси 2-қисми “а” банди (Ёнғин хавфсизлиги қоидаларини бузиш) билан жиноят иши қўзғатилган.

Шундан сўнг Бош вазири ўринбосари Б. Мусаев 1 мартда шошилинч йиғилиш ўтказган ҳамда талабаларнинг яшаш шароитларини таҳлил қилиш тўғрисида топшириқ берган.

Spark, Nexia, Cobalt ва Lacetti 3 мартдан қайта сотила бошланади

UzAuto Motors биноси.

Spark, Nexia, Cobalt ва Lacetti автомобилларини сотиб олувчилар учун шартнома бериш жараёни 3 мартдан қайта йўлга қўйилади. UzAuto Motors бу ҳақда Асакадаги автомобил заводига 2 март куни уюштирилган пресс-турда маълум қилди.

Spark, Nexia, Cobalt ва Lacetti автомобилларини харид қилиш учун шартнома бериш UzAuto Motors дилерлари шартномалар ва автомобилларни етказиб бериш бўйича янги бошқарув тизимига ўтаётгани муносабати билан февраль ойи бошида вақтинча тўхтатилган эди.

Тошкентда талаба янги қурилаётган бинодан йиқилиб ҳалок бўлди

Тошкент юридик университети расмий Телеграм каналидан олинган сурат.

Тошкент давлат юридик университетининг талабаси Баҳодир Бозоров янги қурилаётган бинолардан бирининг лифт шахтасига йиқилиб тушиб ҳалок бўлди.

Тошкент давлат юридик университетининг расмий Telegram каналида 3-босқич талабаси бахтсиз тасодиф туфайли ўлгани билдирилган. Аммо бу “бахтсиз тасодиф” тафсилотлари айтилмаган.

Маҳаллий матбуотнинг ёзишича, Баҳодир Бозоров 27 февраль тунда ҳам ишлаб, ҳам яшаётган янги қурилаётган кўп қаватли уйлардан бирининг лифт учун бетондан тайёрланган шахтасига иккинчи қаватдан йиқилиб тушган.

Яқинлари “Тез ёрдам” чақирганига қарамай, шифокорлар келмаган. Шундан сўнг яқинлари кўчадан патрул машинасини тўхтатиб, ёрдам сўрашган. Тез ёрдам бўлимида Бозоровнинг вафот этгани аниқланган.

Тиббий экспертизанинг билдиришича, талабанинг олтинчи умуртқаси синган, орқа мияга қон қуйилган, шунингдек, жигари ёрилиб кетган.

Ўзбекистон майгача Россияга парвозларни қайта тикламоқчи

Uzbekistan Airways самолёти.

Ўзбекистон март-апрель ойлари оралиғида Россияга мунтазам авиапарвозларни қайта тиклашни режалаштирмоқда. Бу ҳақда Ўзбекистон транспорт вазири ўринбосари Жасурбек Чориев Тошкентда ўтган траснпорт дипломатиясига бағишланган йиғилишда маълум қилди.

«Ҳозир Россия томонининг жавобини кутмоқдамиз. Ўйлайманки, март-апрель ойларида ижобий натижа бўлади», - деб иқтибос келтиради вазир ўринбосари сўзларидан «Газета уз».

Жасурбек Чориев Ўзбекистон коронавирусга қарши кураш бўйича Россия махсус комиссиясига мамлакатда COVID-19 пандемияси билан боғлиқ вазият юзасидан барча керакли маълумотларни тақдим этган.

«Биз барча стандартлар бўйича Россия томонидан ўрнатилган талабларга жавоб берамиз»,-деди Чориев.

Ўзбекистон барча турдаги транспорт учун 2020 йилнинг 1 октябридан ўз чегараларини очган эди. Uzbekistan Airways эса ўтган йилнинг сентябрида Беларусь, Туркия, БАА, Қозоғистон ва Қирғизистонга, 20 январдан Тожикистонга, мартдан бошлаб Германия ва Ҳиндистонга авиапарвозларни тиклаган.

Вагончелленж: Наманган ҳокими ортидан Бухоро ҳокими ҳам эл дардини вагонда тинглашга чоғланди

Наманганда вилоят ҳокими учун барпо этилган контейнер-уй

Бухоро вилоятининг Олот туманида олиб борилаётган “ишлар билан яқиндан танишиш, мавжуд муаммоларни ўрганиш ва ҳал этиш мақсадида” 1 март куни туманга борган вилоят ҳокими Ботир Зарипов “Давлатбой” маҳалласидаги вагонга жойлашган. Бу ҳақда Бухоро вилояти ҳокимлиги матбуот хизмати маълумот тарқатди.

Қайд этилишича, ҳоким Зарипов Олотда вилоят ҳокими ўринбосарлари, МФЙ раислари, корхона ва ташкилотлар раҳбарларининг ҳисоботи эшитган, аҳоли вакиллари билан учрашган, мактабларни бориб кўрган.

Вилоят ҳокимлиги матбуот хизмати Ботир Зарипов “Давлатбой” маҳалласидаги 1 мартдан кўчма штабда ўз фаолиятини давом эттиришини билдирган.

Президент Ш. Мирзиёевнинг ўтган ой Наманган вилоятига қилган ташрифи чоғидаги танқиди ортидан вилоят ҳокими Шавкат Абдураззоқов “Бунёдкор” маҳалласи аҳолиси билан учрашиб, ўзига шу маҳаллада уй қурилиши, бу ердаги ҳолат ўнглангунига қадар шу ерда яшашини билдирганди.

Ҳозирда тайёр бўлган бу контейнер-уй Озодлик манбалари томонидан 7,5-8 минг долларга баҳоланган. Таҳририят суҳбатдошларига кўра, бу пулга қишлоқда ўртача уй қурса бўлади.

Eurocement “Оҳангаронцемент” акцияларини сотувга қўйди

Eurocement Holding AG “Тошкент” фонд биржасида Ўзбекистондаги ўз активи “Оҳангаронцемент” акцияларининг 84,19 фоизини сотувга қўйди.

Биржа маълумотига кўра, акциялар битта лот билан сотилади. Сотувга қўйилган 4 миллион 141 минг 108 дона акциянинг ҳар бири учун 103 минг 593 сўмдан нарх бичилган. Акциялар бу нархда сотилган тақдирда, байнинг умумий суммаси 420 миллиард сўмдан (қарийб 41 миллион доллар) ошиши мумкин.

Олтмиш йилдан бери фаолият кўрсатиб келаётган “Оҳангаронцемент” Ўзбекистонда катталиги жиҳатидан иккинчи цемент заводи бўлиб ҳисобланиб, бу ерда республикадаги цементнинг қарийб 20 фоизи ишлаб чиқарилган.

1994 йили “Оҳангаронцемент” хусусийлаштириб, акциядорлик жамиятига айлантирилган. Заводга анча йиллар Zeromax ширкати эгалик қилиб, 2006 йилда акцияларнинг 75,5 фоизини “Евроцемент”га сотган. Кейинчалик “Евроцемент” акциялари миқдорини 84, 19 фоизга етказган.

Айрим маълумотларга кўра, “Евроцемент груп” ўтган 14 йил ичида корхона ривожи учун 150 миллион доллар сарф қилган.

Россиялик бизнесменларга тегишли бўлган “Евроцемент” қарзларини тўлай олмай қолгани ортидан тўлалигича Россия ҳукуматига қарашли Сбербанк қўлига ўтгани ҳақида Озодлик аввалроқ хабар қилганди.

Ўзбекистоннинг икки шаҳри билан Истанбул ўртасида мунтазам авиақатнов йўлга қўйилади

Uzbekistan Airways авиаширкати шу йил 28 мартидан Урганч – Истанбул – Урганч йўналишида янги мунтазам қатновни йўлга қўяди. Шу йилнинг 3 апрелидан эса авиаширкат Фарғона – Истанбул – Фарғона йўналишида мунтазам авиақатновни бошламоқчи. Бу ҳақда Uzbekistan Airways матбуот хизмати маълумот тарқатди.

Қайд этилишича, Урганч билан Истанбул ўртасидаги қатнов ҳафтасига бир марта – якшанба кунлари, Фарғона билан Истанбул ўртасидаги қатнов эса ҳафтасига икки марта – чоршанба ва шанба кунлари амалга оширилади.

Авиаширкат ўз хабарномаларида мазкур парвозлар чоғидаги чекловлар ҳақида маълумот берган эмас.

Коронавирусга қарши илк вакцина рўйхатдан ўтказилди

Жорий йилнинг 1 март куни Ўзбекистонда COVID-19 га қарши илк вакцина рўйхатга олинган. Бу ҳақда ССВ қошидаги Фармацевтика тармоғини ривожлантириш агентлиги матбуот хизмати маълум қилди.

“Бугун ZF-UZ-VAC 2001 коронавируснинг янги типига қарши рекомбинант (CHO cell) вакцина тиббиёт амалиётида қўллаш учун тегишли тартибда давлат рўйхатидан ўтказилди. Рўйхат рақами - DV/X 08646/03/21”, дейилган агентлик хабарномасида.

Мазкур вакцина Хитойнинг Zhifei Longcom Biopharmaceutical Co. Ltd ширкати томонидан ишлаб чиқилган.

Қайд этилишича, Хитой томони коронавирусга қарши вакцинани яратишда Ўзбекистоннинг ҳиссаси ва cаъй-ҳаракатларини инобатга олиб, ZF 2001 вакцинани бирга яратган ҳаммуаллиф мамлакат сифатида белгилаган.

“Тадқиқот ишларида 6 ой иштирок этганимиз учун Хитой томони Ўзбекистонни “ҳаммуаллиф” деб тан олди. Айни кунларда бу вакцинани Ўзбекистонда ишлаб чиқариш бўйича музокаралар олиб бориляпти. Хитой томони талабларига жавоб берадиган лабораториялар, фармацевтика компаниялари бўлиши керак. Ҳали фалон жойда ишлаб чиқарилади, деган хулоса берилгани йўқ”, деганди ўтган ҳафта Озодликка Инновацион ривожланиш вазирлиги матбуот котиби Назокат Азим.

Мулозима вакцина нархи ҳақида ҳозирча маълумот берилмаслигини ҳам қўшимча қилган.

Қорақалпоғистоннинг Хўжайли туманида 3 киши девор босиб қолиши оқибатида ҳалок бўлди

Иллюстратив сурат.

Қорақалпоғистон Республикаси прокуратураси матбуот хизматининг 1 март куни билдиришича, эски уйини бузаётган уч киши девор босиб қолиши оқибатида ҳалок бўлди.

Расмий маълумотда айтилишича, 28 февраль куни соат 12:30 да Хўжайли туманидаги “Маданият” маҳалласида яшовчи А.А.,нинг эски уйини бузаётган Б.Қ., С.Л., ва Ж.Т., девор қулаб тушгани ортидан воқа жойида ҳалок бўлган.

Хўжайли туман Ички ишлар бошқармаси Тергов бўлими бу воқеа юзасидан Ўзбекистон Жиноят кодексининг 257-моддаси 2-қисми “а” банди (меҳнатни муҳофаза қилиш қоидаларини бузиш одам ўлишига сабаб бўлиши) асосида жиноят иши очган.

Тергов ишлари Қорақалпоғистон Республикаси прокуратураси томонидан назоратга олинган.

Тошкентда беш талаба ўлгани ортидан талабаларнинг яшаш шароити текшириладиган бўлди

Талабалар ўлгани ҳақида Бош прокуратура хабар берган.

Бош вазири ўринбосари Б. Мусаев Тошкент давлат иқтисодиёт университетида талабаларнинг яшаш шароити ва ҳаракатланиши мониторингини йўлга қўйиш ва бу борадаги ишларни такомиллаштириш масаласида видеоселектор йиғилиши ўтказди.

Олий ва ўрта махсус таълим вазирлигининг 1 мартда билдиришича, йиғилиш шошилинч тарзда ўтказилган.

Вазирлик билдирувида 27 февраль куни Юнусобод тумани, Фирдавсий маҳалла фуқаролар йиғинига қарашли Инжобод кўчаси, 61-уйда 5 нафар талабанинг номаълум моддадан заҳарланиб ўлгани тўғрисида маълумот берилмаган. Лекин расмий билдирувдан англашинадики, йиғилиш мазкур фавқулодда ходиса юз бергани ортидан ўтказилган.

“Муҳокама жараёнида олий таълим муассасалари ректорлари, проректорлари, декан, шунингдек, ёшлар бўйича етакчилари томонидан талабаларнинг яшаш шароитларини таҳлил қилиш ўз ҳолига ташлаб қўйилганлиги танқид қилинди”, -дейилади хабарда.

Турли вазирликлар ва идоралар вакиллари иштирок этган йиғилишда талабалар ижарада қаерда яшаётгани, яшаш шароити қандай экани, дарсдан кейин нима иш билан машғул бўлиши каби масалаларга эътибор қаратилмаётгани муҳокама қилинган.

“Талабалар томонидан ижарага олинаётган хонадонларнинг ёнғин ва бошқа техник хавфсизлик талабларига жавоб бермаслиги, талабаларда бирламчи ёнғин ва бошқа техник хавфсизлик бўйича билимларининг етарли эмаслиги натижасида турли нохуш ҳодисалар рўй бермоқда”,-дейилади хабарда.

Озодлик радиоси 27 февраль куни соат 20:50 ларда Юнусобод тумани, Фирдавсий маҳалла фуқаролар йиғинига қарашли Инжобод кўчаси, 61-уйда Тошкент Ахборот технологиялари университети 2-босқич талабалари М.У., Р.С., Д.Ғ. ва Сингапур университети 2-босқич талабаси О.И. ҳамда “Инха” университети 1-босқич талабаси С.Х.,лар ўлик ҳолда топилгани ҳақида хабар берган эди.

Расман билдирилишича, талабалар номаълум моддадан заҳарланиб ўлишган. Ушбу ҳолат юзасидан шу куннинг ўзида Юнусобод туман прокуратураси томонидан Жиноят Кодексининг 259-моддаси 2-қисми “а” банди (Ёнғин хавфсизлиги қоидаларини бузиш) билан жиноят иши қўзғатилган.

Товламачиликда айбланаётган блогер Отабек Сатторийга нисбатан тергов якунланди

Блогер Отабек Сатторий 30 январда қўлга олинганди.

Сурхондарёда блогер Отабек Сатторийга нисбатан қўзғатилган жиноят ишини тергов қилиш жараёни якунланди. Бу ҳақда ИИВ ҳузуридаги Тергов департаменти 1 март куни маълум қилди.

Расман билдирилишича, терговда Отабек Сатторий 2020 йилнинг июнь ойидан 2021 йилнинг январь ойига қадар бўлган вақт оралиғида “фуқароларнинг сир сақланиши лозим бўлган маълумотларини ошкор қилиш билан қўрқитиб ўзгадан мулкини, мулкий ҳуқуқини топширишини, мулкий манфаатлар беришини, мулкий йўсиндаги ҳаракатлар содир этишини талаб қилиб” келгани аниқланган.

Тергов департаменти баёнотида Отабек Сатторий Интернет тармоғи орқали Исроил Х., Мастона А., Насиба Н., Тўхтамиш К., Ўткир Т., Ашур Х., Зокиржон Х., Лочин Т.,ларга нисбатан “туҳмат қилиш, ҳақорат қилиш каби жиноятларни содир этган”.

“Олиб борилган тергов ҳаракатлари натижасига кўра, Сурхондарё вилояти ИИБ ҳузуридаги Тергов бошқармаси томонидан 2021 йилнинг 24 февраль куни Сатторий Отабек Абдуманонзодага Ўзбекистон Республикаси Жиноят кодексининг 165-моддаси 2-қисми “а”,“б” бандлари ва 3-қисми “а” банди (Товламачилик), 139-моддаси 3-қисми “а,г” бандлари (Туҳмат) ҳамда 140-моддаси 3-қисми “а” банди (Ҳақорат қилиш) билан аввалги айблов тўлдирилиб, шу куни дастлабки тергов тамомланган”,-дейилади билдирувда.

Айни пайтда блогер коррупцияга қарши курашгани ортидан сохталаштирилган жиноят иши доирасида қамоқда сақланмоқда деган фикр ҳам мавжуд.

Жумладан, бош қароргоҳи Нью-Йоркда жойлашган Журналистларни ҳимоя қилиш қўмитаси - CPJ Ўзбекистон ҳукуматини ҳибсга олинган блогер Отабек Сатторийни озод қилишга чақирди. Ташкилотнинг ишонишича, блогер коррупцияга қарши курашгани ортидан соҳталаштирилган жиноят иши асосида қамоққа олинган.

Отабек Сатторий Термиз шаҳрида 30 январь куни қўлга олинган эди. Суд уни айбдор деб топса, у 10 йилгача қамалиши мумкин.

Давстатқўм: Февраль ойида инфляция даражаси 0,6 фоизга тенг бўлди

Тошкент бозори

Жорий йилнинг феврал ойида истеъмол секторидаги товарлар ва хизматлар ўртача 0,6 фоизга қимматлаган.

Давлат статистика қўмитаси ҳисоботида айтилишича, 2021 йилнинг дастлабки икки ойи давомида нархларнинг ўсиши 1,7 фоизни, ўртача ойлик ўсиш суръати эса 0,8 фоизни ташкил этган. Йиллик нисбатда эса инфляциянинг ўсиш суръати 11,4 фоизга етган.

Ҳисоботда қайд этилишича, ўтган ой озиқ-овқат ва ноозиқ-овқат маҳсулотлари нархи 0,6 фоизга, хизматлар эса 0,8 фоизга ошган. Ўтган йилнинг бу даврида озиқ-овқат маҳсулотлари нархи 1,3 фоизга, ноозиқ-овқат маҳсулотлари нархи 0,6 фоизга, хизмат ҳақи эса 0,3 фоизга ошган эди.

Бундан озиқ-овқат маҳсулотлари нархида ўсиш ўтган йил билан солиштирганда камайгани, ноозиқ-овқат маҳсулотлари нархидаги ўсиш суръатида ўсиш бўлмагани, хизмат ҳақининг ўсиш суръати эса ортганини англаш мумкин.

Умуман олганда, ўтган бир йил ичида Ўзбекистонда озиқ-овқат маъсулотлар нархи 14,6 фоизга, ноозиқ-овқат маҳсулотлари нархи 9,1 фоизга, хизмат ҳақи эса 8,8 фоизга ошган.

Давомини ўқинг

XS
SM
MD
LG