Линклар

Шошилинч хабар
06 октябр 2022, Тошкент вақти: 21:36

Ўзбекистон хабарлари

Мирзиёев табиий офат ортидан Бухорога йўл олди

Ўзбекистон президенти Шавкат Мирзиёев.

Ўзбекистон президенти Шавкат Мирзиёев 27 апрель куни содир бўлган табиий офат оқибатларини кўздан кечириш, зарур чора-тадбирларни белгилаш ҳамда аҳоли билан тўғридан-тўғри мулоқот қилиш мақсадида сешанба куни Бухоро вилоятига жўнаб кетди. Бу ҳақда президент матбуот хизмати маълум қилади.

Маълумотларга кўра, кеча Ўзбекистон ҳудудида юз берган кучли шамол Бухоро, Навоий, Самарқанд ва Қашқадарё вилоятларида аҳоли ҳаёти, инфратузилма тармоқлари ва қишлоқ хўжалиги экинларига катта зарар етказган.

Табиий офат оқибатида 1 киши ҳаётдан кўз юмган, камида 30 киши тан жароҳати олган.

Расмийларга кўра, кучли шамол Ўзбекистонга Туркманистон ҳудудидан кириб келган. Шу важдан ҳам бу мамлакатга қўшни бўлган Бухоро вилояти энг кўп зарар кўргани айтилмоқда.

Кун янгиликлари

Мирзиёев Путинни олдинроқ Хитой раҳбарига берилган орден билан тақдирлади

Украина ва Ғарб нашрлари Путин Самарқанддаги ШҲТ саммитида яккаланиб қолгани ҳақида ёзган.

Ўзбекистон президенти Шавкат Мирзиёев 70 ёшини қаршилаётган Россия президенти Владимир Путинни “Олий Даражали Дўстлик” ордени билан мукофотлаш тўғрисидаги фармонни имзолади.

Ўзбекистон Президенти матбуот хизматига кўра, Путинга мазкур орден Ўзбекистон билан Россия “халқлари ўртасидаги анъанавий дўстлик ва ҳамкорлик ришталарини ривожлантиришга қўшган улкан шахсий ҳиссаси" муносабати билан ҳам берилган.

7 октябрь куни 70 ёшга тўладиган Путин Россияни 22 йилдан буён бошқариб келади. Ўтган йили Россия конституциясига киритилган ўзгартишларга мувофиқ у 2026 йилдан кейин ҳам 14 йил ҳокимиятда қолиши мумкин. Аммо таҳлилчиларга кўра, ҳозирда Путиннинг ҳокимиятдаги умри Украинадаги урушга боғлиқ бўлиб қолмоқда.

Путин Ўзбекистон президенти томонидан юксак мукофотга лойиқ кўрилган биринчи давлат раҳбари эмас. Икки йил муқаддам таъсис этилган “Олий Даражали Дўстлик” орденини Мирзиёев биринчи бўлиб шу йил сентябрида Самарқандда Хитой раҳбари Си Цзиньпинга топширганди.

Маҳаллий ва хорижий матбуот, жумладан, Украина оммавий ахборот воситалари Ўзбекистон президенти Самарқандда Хитой раҳбарига юксак эҳтиром кўрсатгани ва Россия раҳбари Путин яккаланиб қолгани ҳақида ёзган.

Самарқандга ташриф чоғида Путин Ўзбекистон раҳбарига “Александр Невский” орденини топширганди.

Ўзбекистонлик таниқли блогер Никита Макаренконинг ёзишича, Путинга берилган орден шунчаки, "дипломатик лутф" холос.

"Бу эътибор ва таҳлилни талаб қиладиган жиддий нарса деб ўйламайман.

Тўғрироғи, уч миллион меҳнат муҳожирларимиз тиқилиб қолган мамлакатга илтифот кўриниши.

Улар уйда бўлганларида яхшироқ эди", деб ёзди Макаренко.

Ўзбекистон Россиянинг Украинага уруши юзасидан нейтрал позицияни эгаллаган. Шу йил 26 февралида Ўзбекистон президентининг матбуот котиби Шерзод Асадов Кремлнинг "Тошкент Россиянинг Украинадаги ҳарбий амалиётига тушуниш билан ёндашгани" ҳақида берган баёнотини рад этган эди.

Алламжонов АҚШ Давлат департаменти вакиласи билан масс-медиа соҳасини ривожлантириш масаласини муҳокама қилди

Ўзбекистон президенти администрацияси раҳбарининг ўринбосари Комил Алламжонов АҚШ давлат котибининг жамоатчилик билан алоқалар бўйича ёрдамчиси вазифасини бажарувчи Элизабет Кеннеди Трюдо билан, Тошкент, 2022 йил 6 октябри

Ўзбекистонда меҳмон бўлиб турган АҚШ давлат котибининг жамоатчилик билан алоқалар бўйича ёрдамчиси вазифасини бажарувчи Элизабет Кеннеди Трюдо 6 октябрь куни президент администрацияси раҳбарининг ўринбосари Комил Алламжонов билан учрашди.

“Учрашувда давлат органлари очиқлигини таъминлаш, жамоатчилик билан мулоқот, фейк ва ёлғон ахборотларга қарши курашиш, масс-медиа соҳасини ривожлантириш, аҳолининг медиасаводхонлигини ошириш каби кенг кўламли масалаларни муҳокама қилдик ва ўзаро фикр алмашдик”, дея маълум қилди Алламжонов Телеграмдаги ўз саҳифаси орқали.

Президент администрацияси раҳбарининг муовини АҚШ Давлат департаменти вакиласи билан учрашуви “ҳар икки томон учун самарали” ўтганини урғулаган.

Келинини бошини олганликда гумонланган қайнота ушланди

Фарғона вилоятининг Қўштепа тумани Хумдон маҳалласида 64 ёшли қайнота кечки овқатни тайёрлаш пайтида келиб чиққан жанжал ортидан келинини сўйиб ташлаган. Бу ҳақда “Газета уз” Бош прокуратурага таянган ҳолда хабар берди.

1 октябрь куни қайнота И. Р., келини К. Г.,дан кечки овқатни мазалироқ тайёрлашни илтимос қилади. Келин бундан жаҳли чиқиб, эшикни қарсиллатиб ёпади ва бунинг оқибатида ойналар синиб кетади.

Тергов маълумотларида қайд этилишича, қайнота ғазаби қўзиб келинининг бўйнига қўли билан уради. Шундан сўнг у хушсиз ётган келинни Оқбилол қишлоғи тепалигига олиб боради.

“ У ерда хўжалик пичоғи билан ҳушсиз ётган К. Г. нинг бўйнидан кесиб, бошини танасидан ажратади ва шу орқали қасддан қотиллик содир этади. У кесилган бошни полиэтилен пакетга солади, жасадни чиқиндихонага ташлайди, бошни эса Олтиариқ тумани Файзобод қишлоғидаги „Тожиали обод“ фермер хўжалиги ҳудудидаги арчалар орасига яшириб қўяди”, — дейилади Бош прокуратура хабарида.

Мазкур ҳолат юзасидан 3 октябрь куни Фарғона вилояти прокуратураси томонидан И. Р.га нисбатан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган. Гумонланувчи процессуал тартибда ушланган.

Владимир Норов Толибон ҳукумати қарорини олқишлади

Ўзбекистон ташқи ишлар вазири Владимир Норов.

Ўзбекистон ташқи ишлар вазири Владимир Норов Толибон ҳукуматининг мамлакат олийгоҳларига қабул квотасини оширганини олқишлади.

“Афғонистон муваққат ҳукуматининг афғон университетларидаги студентлар квотасини деярли 70 фоизга, 2021 йилдаги 68000 дан 2022 йилда 115000 га ошириш қарорини олқишлайман. Умид қиламанки, қизларга ҳам олийгоҳларда ўқиш учун тенг ўрин берилади”, деб ёзди Норов.


TKG нашрининг ёзишича, Афғонистонда 6 октябрда олийгоҳларга кириш имтихонлари бўлиб ўтади. Унда 12-синфни тамомлаган 160 минг мактаб битирувчиси қатнашади. Улардан юз минг нафари олийгоҳларга қабул қилинади

Афғонистонда Толибон ҳокимиятни босиб олган 2021 йилнинг 15 августидан сўнг қизларнинг таълим олишига турли чекловлар қўйила бошланди. Халқаро ҳамжамият Толибонни қизлар ҳуқуқларини таъминлаш ва кафолатлашга чақирди.

Толибон ҳукумати жорий йилда гўёки қизларнинг олийгоҳларга киришига қўйилган чекловлар олиб ташланганини иддао қилмоқда.

30 сентябрь куни Кобулнинг асосан шиа хазоралар яшайдиган мавзесида худкуш ўқув марказида ўзини портлатгани оқибатида 53 киши хҳалок бўлганди, улардан 46 нафари олийгоҳга синов имтихонидан ўтган қизлардир.

Ўзбекистон президенти Тожикистон раҳбарини туғилган куни билан табриклади

Тожикистон президенти Имомали Раҳмон ўтган йилнинг 10 июнида Душанбега борган Ўзбекистон президенти Шавкат Мирзиёевни I даражали “Зарринтож” ордени билан тақдирлаган эди.

Ўзбекистон президенти Шавкат Мирзиёев 5 октябрь куни телефон орқали Тожикистон президенти Имомали Раҳмонни 70 ёшга тўлгани муносабати билан қутлади.

Мирзиёевнинг матбуот хизмати «Давлатимиз раҳбари Тожикистон етакчисини 70 йиллик юбилейи билан чин дилдан табриклаб, унга мустаҳкам соғлик, бахт-саодат ва катта муваффақиятлар, биродар Тожикистон халқига эса тинчлик-осойишталик ва равнақ тилади», деб ёзди.

Суҳбат чоғида илгари эришилган келишувлар ва қабул қилинган битимларни амалга ошириш масалалари кўриб чиқилди. Саноат, қишлоқ хўжалиги, энергетика, транспорт ва бошқа муҳим йўналишлардаги устувор кооперация лойиҳаларини илгари суришга хизмат қиладиган Қўшма инвестиция фонди ўз фаолиятини бошлагани мамнуният билан қайд этилди.

Имомали Раҳмон 2020 йилнинг октябрида бешинчи бор президентликка сайланган эди. У Тожикистонни 28 йилдан бери бошқармоқда.

4 октябрь куни Россия президенти Владимир Путин тожикистонлик ҳамкасби Имомали Раҳмонни III -даражадаги “Ватан олдидаги хизматлари учун” ордени билан мукофотлаганди.

ОТБ Ўзбекистонга ярим миллиард доллар миқдорида қарз бермоқчи

Осиё тараққиёт банки (ОТБ) Россия қўшинларининг Украинага бостириб кириши ортидан юзага келган иқтисодий муаммолар туфайли озиқ-овқат хавфсизлигини таъминлаш, аҳолининг заиф қатламларини ижтимоий жиҳатдан ҳимоялаш ва бандликни дастаклаш учун Ўзбекистонга 500 миллион АҚШ доллари миқдорида қарз беришга қарор қилди. Бу ҳақда ОТБ матбуот хизмати маълумот тарқатди.

Хабарномада ОТБ Ўзбекистон ҳукуматига унинг 1,2 миллиард долларлик “Тараққиёт учун контрциклик харажатлар дастури”ни амалга оширишда молиявий ёрдам кўрсатиши айтилган.

“Ҳукумат дастури озиқ-овқат хавфсизлиги ва нарх-наво барқарорлиги мустаҳкамлаш, кам таъминланган оилалар, қариялар ва бошқа муҳтож гуруҳларга тўғридан-тўғри ижтимоий ёрдам кўрсатиш, шунингдек, ишсизлар ва ватанга қайтаётган меҳнат муҳожирларини дастаклашга қаратилган”, дейилган банк хабарномасида.

Олмаотада қорақалпоғистонлик яна бир фаол қўлга олинди

Иллюстратив сурат

Қозоғистоннинг Олмаота шаҳрида қорақалпоғистонлик фаол Зиуар Мирманбетова қўлга олинган. Бу ҳақда Озодликнинг қозоқ хизмати қорақалпоқ диаспораси вакили Ақилбек Муратбай маълумотига таянган ҳолда хабар қилди.

Муратбайга кўра, Мирманбетова уйидан тутиб кетилиб, Олмаота полиция департаментига олиб борилган. Фаол бу Қозоғистонда қорақалпоғистонликлар ушлаб кетилиши бўйича тўртинчи ҳодиса эканига эътибор қаратган.

Сентябрь ойи ўрталарида Олмаотада июль ойида Нукусда рўй берган оммавий норозилик чиқишларига алоқадорликда гумонланган қорақалпоғистонлик уч нафар фаол қўлга олинган эди. Раиса Худайбергенова, Жангелди Жақсимбетов ва Қошқарбай Торемуратов «Ўзбекистондаги конституциявий тузумга тажовуз қилганлик» гумони билан ҳибсга олинган.

Июль ойининг бошида Ўзбекистоннинг янги таҳрирдаги конституциясида Қорақалпоғистон мақомининг ўзгартирилишига қарши оммавий норозилик чиқишлари хавфсизлик кучлари томонидан бостирилганди.

Ўзбекистон расмийлари берган маълумотларга кўра, 1-2 июль кунлари Нукусда тартибсизликларга айланиб кетган норозилик намойишлари чоғида 21 киши ҳалок бўлган, ҳуқуқ-тартибот идоралари ходимлари дохил 243 киши яраланган. Бунинг ортидан 500 киши қўлга олинган.

Фаоллар норозилик чиқишлари чоғида қўлга олинганлар қийноққа солинаётганини иддао қилишмоқда.

Тошкентга «Уюшган халқаро молия маркази» мақоми берилгани айтилмоқда

Тунги Тошкент.

Стратегик ислоҳотлар агентлиги GFCI Халқаро молия марказлари глобал индекси Тошкентга «Уюшган халқаро молия маркази» мақомини берганини билдирди.

Агентликнинг билдиришича, GFCI халқаро молия марказлари рақобатбардошлигини молия бозори, бизнес муҳит, инсон капитали, инфратузилма, мамлакат обрўси йўналишлари бўйича баҳолайди.

GFCIнинг рейтинг тузувчи молиявий-инвестициявий ҳамжамияти 30 минг молиячи ва дунёнинг 138 та мамлакатидаги 5 мингта халқаро корпорацияларни ўз ичига олади.

“Республика пойтахтининг индексга киритилиши халқаро инвесторлар ва бизнес вакиллари томонидан инвестицион қарорларни қабул қилишда Ўзбекистонни капитал киритиш учун юрисдикция сифатида танлашга рағбатлантиради”, дейилади расмий билдирувда.

Ўзбекистон ва Венгрия 16 шартномани имзолади. Ядровий соҳада ҳамкорлик қилинади

Шавкат Мирзиёев ва Виктор Орбан қўшма баёнот қабул қилди.

Ўзбекистон президентининг Венгрияга 3-4 октябрдаги ташрифи доирасида томонлар ўртасида 16 та шартнома имзолангани тўғрисида Мирзиёевнинг матбуот хизмати хабар берди.

Президент Шавкат Мирзиёев ва бош вазир Виктор Орбан имзолаган Ўзбекистон ва Венгрия ўртасидаги стратегик шерикликни ривожлантириш тўғрисида қўшма баёнотда музокаралар дўстона, очиқ ва конструктив руҳда ўтгани қайд этилган.

Имзоланган шартномалар орасида 2023-2024 йилларда саноат кооперациясини ривожлантириш бўйича қўшма дастур, фан ва технологиялар соҳасидаги ҳамкорликни ривожлантириш бўйича ҳаракатлар режаси, қишлоқ хўжалиги соҳасидаги ҳамкорликни кенгайтириш бўйича ҳаракатлар режаси каби ҳужжатлар бор.

Шунингдек, Ўзбекистон-Венгрия бизнес форумида умумий қиймати 1 миллиард доллардан кўпроқ бўлган шартномалар имзоланган.

Бундан ташқари Венгрия ташқи ишлар вазири Петер Сийярто ўзбекистонлик ҳамкасби Владимир Норов билан ўтказган музокаралар доирасида Ўзбекистон ва Венгрия ядровий энергетика соҳасида комплекс ҳамкорлик дастурини йўлга қўйишга келишиб олгани билдирилди.

Петер Сийяртога кўра, ядровий энергетика соҳасида комплекс ҳамкорлик дастури учта қисмдан иборат бўлади:

1. Ўзбекистонда қурилаётган АЭСда Венгрия совутиш тизимларидан фойдаланилади.

2. АЭС комплекс ҳамкорлик учун таълим асоси бўлади. Венгрия ҳар йили ўзбекистонлик олий ўқув юртлари талабаларига 170 та стипендия ажратади. Уларнинг бир қисми, ядровий энергетика соҳасидаги бўлажак инженер ва экспертлар Венгрияда тайёрланади.

3. Қиздирувчи унсурлар билан боғлиқ тадқиқот ва ишланмалар дастури йўлга қўйилади.

4 октябрь куни Будапешт шаҳридаги Шандор саройида Шавкат Мирзиёев венгриялик ҳамкасби Каталин Новак билан учрашди. Президентлар Ўзбекистон ва Венгрия ўртасидаги кўп қиррали стратегик шериклик муносабатларини янада кенгайтириш масалалари юзасидан фикр алмашдилар.

Чирчиқдаги кимё заводида чиққан ёнғин ўчирилиди. Икки киши жароҳат олди

Тошкент вилоятининг Чирчиқ шаҳридаги Maxam Chirchiq заводининг аммиак-1 ишлаб чиқарувчи синтез цехида 4 октябрь куни соат 8:30 да бошланган ёнғин тўлиқ ўчирилгани тўғрисида вилоят ҳокимлиги матбуот хизмати хабар берди.

ФВВнинг билдиришича, ёнғин ва шундан сўнг юз берган портлаш оқибатида заводнинг икки ходими енгил жароҳатланган. Уларга Чирчиқ шаҳар касалхонасида тиббий ёрдам кўрсатилмоқда.

Воқеа жойига шаҳар ҳокими Даврон Хидоятов, Ўзбекистон Фавқулодда вазиятлар вазири Абдулла Қўлдошев, бош вазир ўринбосари, энергетика вазири Жўрабек Мирзамаҳмудовлар етиб келиб, ёнғин ва портлаш сабабларини ўрганмоқда.

«Максам Чирчиқ» ширкати Ўзбекистонда минерал ўғитлар ва бошқа кимё маҳсулотларини йирик ишлаб чиқарувчиси ҳисобланади.

Чирчиқдаги йирик кимё заводида портлаш бўлди

Чирчиқдаги завод. Тошкент вилоят ҳокимияти матбуот хизмати фотоси.

Тошкент вилоятининг Чирчиқ шаҳрида 4 октябрь куни эрталаб «Максам Чирчиқ» ширкатига қарашли 5-заводда ёнғин чиқди. Ёнғин оқибатида заводда портлаш юз берганини Тошкент вилояти ҳокимлиги тасдиқлади.

Ҳозирги пайтда соат 08:40 ларда бошланган ёнғинни қуршаб олиш ва ўчириш чораси кўрилмоқда. “Ўзкимёсаноат” ширкати ёнғин ва портлаш оқибатида ҳеч ким жабрланмаганини расман билдирди. Ширкатнинг маълум қилишича, портлаш оқибатида атмосферага заҳарли газларнинг кўтарилишининг ҳам олди олинган.


Мазкур вазиятни келтириб чиқарган сабаблар ва оқибатлари юзасидан қўшимча ахборот берилиши маълум қилинди.

«Максам Чирчиқ» ширкати Ўзбекистонда минерал ўғитлар ва бошқа кимё маҳсулотларини йирик ишлаб чиқарувчиси ҳисобланади.

Ўзбекистонда 9 ойда нархлар 12,2 фоизга қимматлади

Нархлар ўсишида етакчи ўринларни озиқ-овқат маҳсулотлари эгаллаган.

Ўзбекистонда сентябрь ойига келиб, истеъмол нархлари индексининг ўсиш даражаси 12,2 фоизга етди. Бу ҳақда Давлат статистика қўмитаси маълум қилди.

Расман билдирилишича, сентябрь ойида истеъмол секторидаги товарлар ва хизматлар ўртача 1 фоизга ошган. Нархлар ўсишида етакчи ўринларни озиқ-овқат маҳсулотлари эгаллаб, ой давомида уларнинг нархлари ўртача 1,4 фоизга ошди.

Шу даврда ноозиқ-овқат товарлари нархлари 0,7 фоизга ва аҳолига пуллик хизматлар кўрсатиш 0,8 фоизга қимматлади.

Март ойида Ўзбекистонда инфляция даражаси Марказий банк кутилмаларидан кўпроқни, ўн ярим фоизни ташкил этгани билдирилган эди. Марказий банкка кўра, бунга озиқ-овқат нархларининг 2,5 фоизга, ноозиқ-овқат товарларининг эса 1,1 фоизга ошгани сабаб бўлган.

Жаҳон банки 10 апрель куни эълон қилган ҳисоботида Ўзбекистонда 2022 йилда иқтисодий ўсиш 3,6 фоизгача секинлашишини башорат қилди. Банк иқтисодий ўсишнинг секинлашишига пул ўтказмалари ҳажмининг қисқариши, озиқ-овқат ва нефть нархларининг ошиши каби омиллар сабаб бўлишини айтган.

Ўзбекистонликларни онасидан сўккан собиқ ИИБ ходими қамоққа олинди (ВИДЕО)

Ўзбекистон халқини онасидан сўккан Оққўрғон тумани ИИБ собиқ ходими Аббос Сулаймонов 2 октябрь куни Жиноят кодексининг 277-моддаси (Безорилик) 3-қисми «г» банди билан айбланиб, қамоққа олинди. Бу ҳақда Тошкент вилояти Ички ишлар бош бошқармаси матбуот хизмати маълум қилди.

Аввалроқ ижтимоий тармоқларда Сулаймоновнинг бир аёл билан телефон орқали қилган мулоқоти аудиоси пайдо бўлган эди. Унда Сулаймонов “бутун ўзбекистонликларнинг, жумладан, оққўрғонликларнинг оналари” билан “жинсий алоқада” бўлганини қўпол сўзлар билан бир неча марта айтган ва аёлга “ўзи билан ҳазиллашмасликни ва тинчиб ўтириш”ни тавсия қилган.

Бу ёзув интернетда тарқалгани ортидан эллик нафарга яқин оққўрғонлик туман ички ишлар бўлимига келиб, онани ҳақорат қилган фуқарога қаттиқ жазо беришни сўраган.

Тошкент вилояти Ички ишлар бош бошқармасининг билдиришича, 1992 йилда туғилган Аббос Сулаймонов “2022 йилда туман ИИБ профилактика инспектори лавозимига қабул қилинган. Ёш ходим кўп ўтмай хизмат фаолияти давомида ўзини салбий томондан кўрсатганлиги ва ноўрин хатти-ҳаракатлари сабабли ички ишлар органларидан бўшатилган”.

Сулаймонов қўлга олинганидан сўнг ижтимоий тармоқларда унинг Ўзбекистон халқидан кечирим сўраган видеоси эълон қилинди. Шунингдек, ижтимоий тармоқларда унинг онаси ҳам кечирим сўраган видео тарқатилди.

Шавкат Мирзиёев 3-4 октябрда Венгрияга сафар қилади

Президент Шавкат Мирзиёев 3−4 октябрь кунлари Венгрия томонининг таклифига биноан расмий ташриф билан Будапештга боради. Мирзиёев у ерда Венгрия президенти Каталина Новак ва бош вазири Виктор Орбан билан музокаралар ўтказади.

Ўтган йилнинг март ойида бош вазир Виктор Орбан Тошкентда бўлган эди. Президент матбуот хизматининг билдиришича, “бўлажак саммит давлат раҳбарининг жавоб ташрифи” ҳисобланади.

Президент матбуот хизматининг билдиришича, Ўзбекистон-Венгрия саммитининг кун тартибидан стратегик шериклик муносабатларини янада ривожлантириш, энг аввало, савдо-иқтисодий, инвестициявий, қишлоқ хўжалиги, молиявий ва маданий-гуманитар соҳаларда кўп қиррали ҳамкорликни кенгайтиришнинг долзарб масалалари ўрин олган.

Бундан ташқари ўзаро савдони кўпайтириш, фармацевтика, агросаноат мажмуи, машинасозлик, сувни тежаш ва бошқа йўналишларда саноат кооперациясини чуқурлаштиришга қаратилган қўшма лойиҳа ва дастурларни амалга оширишга алоҳида эътибор қаратилади.

Халқаро ва минтақавий сиёсат масалалари, шу жумладан Туркий давлатлар ташкилоти доирасидаги ҳамкорлик юзасидан ҳам фикр алмашилади.

Музокаралар якунида қўшма баёнот ва икки томонлама ҳужжатларнинг салмоқли тўпламини имзолаш режалаштирилган.

Бундан ташқари, Мирзиёевнинг Венгрия етакчи компания ва банклари раҳбарлари билан учрашув ўтказиши кўзда тутилган.

Ўзбекистон ТИВ мобилизациядан қочиб келаётган россияликлар масаласида муносабат билдирди

Ўзбекистон Ташқи ишлар вазирлиги 30 сентябрда мобилизациядан қочиб келаётган россияликлар масаласида муносабат билдирди.

“Уларнинг мамлакатимизда бўлиши масаласи, шунингдек, эҳтимолий экстрадиция қилиниши Ўзбекистон қонунчилиги, икки томонлама ва кўп томонлама ҳуқуқий ҳужжатлар асосида тартибга солинишини қайд этамиз. Шу билан биргаликда ҳуқуқбузарликлар содир қилмаган хорижий давлат фуқаролари мажбурий депортация қилиб юборилмайди” дейилади вазирлик баёнотида.

ТИВ баёнотида Украинанинг бўлгинчи ҳудудларидаги “референдум”лар бўйича муносабат билдирилмаган. Бироқ Ўзбекистон томони мавжуд вазиятни халқаро ҳуқуқ нормаларидан келиб чиқиб сиёсий-дипломатик йўл билан ҳал этиш учун шартларни имкон қадар тезроқ ишлаб чиқиш тарафдори экани қайд этилган.

Президент Путин 21 сентябрь куни Россияда қисман сафарбарлик эълон қилгани ортидан минглаб россияликлар урушга боришдан қочиб бошқа давлатларга, жумладан, Ўзбекистонга бошпана излаб келди.

Украина уруши ортидан Ўзбекистонга россияликларнинг биринчи оқими шу йил мартига тўғри келган эди. Камида 2 минг россиялик, асосан IT-мутахассислар Тошкентда иш ва бошпана қидириши турар-жой ижара нархларига сезиларли таъсир кўрсатгани айтилган.

Ўзбекистон ҳукумати Украинадаги уруш борасида нейтрал позицияда эканини таъкидлаб келади.

Давомини ўқинг

XS
SM
MD
LG