Линклар

Шошилинч хабар
29 июн 2022, Тошкент вақти: 20:48

Ўзбекистон хабарлари

"Яшил" ҳудудларда тўйларни фақат уйда ўтказиш мумкин

1 июндан бошлаб "яшил" ҳудудларда тўйларни ўтказишга рухсат берилди.

Оилавий тантана, тўй, маърака ва маросимларни фақатгина уйларда ўтказиш ҳамда меҳмонлар сони 30 кишидан кўп бўлмаслиги мажбурийдир. Бу ҳақда Маҳалла ва оилани қўллаб-қувватлаш вазирлиги матбуот котиби Саодат Боймирзаева 3 июнь куни АОКАда ўтказилган брифингда маълум қилди.

Унга кўра, 1 июндан бошлаб "яшил" ҳудудларда оилавий тантана, тўй, маърака ва маросимларни ўтказишга рухсат берилди.

“Белгиланган 30 кишилик таркибга биринчи навбатда, оилавий тантана ва тўй эгалари, маърака ва маросим ташкил этувчилар, уларнинг яқин қариндошлари, қўни-қўшниларнинг кам сонли вакиллари киритилади. Шунингдек, оилавий тантана ва тўй эгаларининг истакларига кўра, иштирокчилар сонидаги чеклов доирасида хонанда ва бошқа хизматларни бажарувчи ходим қатнашиши мумкин”,- деб айтган расмий.

Унга кўра, 30 кишидан кўп меҳмон чақирган шахслар ўрнатилган тартибда маъмурий жавобгарликка тортилади.

Оилавий тантана, тўй, маърака ва маросимларни ўтказишда санитария ва гигиена талабларига қатъий риоя этиш талаб этилади.

Кун янгиликлари

Тошкентда COVID-19 поликлиникалари фаолияти қайта тикланмоқда

Сўнги кунларда коронавирусга чалинганлар сони кўпая бошлагани муносабати билан Тошкент шаҳрининг 12 туманида COVID-19га ихтисослашган махсус поликлиникалар фаолияти қайта тикланди. Бу ҳақда Соғлиқни сақлаш вазирлиги 29 июнь куни маълум қилди.

“24 соат ишлайдиган ушбу муассасаларнинг асосий вазифаси хасталикни эрта босқичларда аниқлаш, беморларга ўз вақтида ташхис қўйиш ҳамда зарур даво муолажаларини олиб боришдан иборат”, дейилади билдирувда.

Вазирлик ушбу муассасаларда коронавирусни аниқлаш бўйича экспресс ва ПЗР тест олиш, биринчи ёрдам кўрсатиш, рентген текширувларини ўтказиш, касалликнинг оғир даражалари қайд этилган беморларни тез ёрдам машиналари орқали коронавирусга ихтисослашган шифохоналарга етказиш каби имкониятлар мавжудлигини таъкидлаган.

Сўнги ҳафтада Ўзбекистонда кунига юзга яқин киши коронавирусга чалинаётгани аниқланмоқда. Соғлиқни сақлаш вазирлигининг билдиришича, 28 июнь ҳолатига кўра, Ўзбекистонда коронавирус инфекцияси қайд этилганлар сони 240667 нафарни ташкил этмоқда. Соғайганлар жами 237995 нафарга етди ва соғайиш кўрсаткичи 99 фоизни ташкил этмоқда.

Ўзбекистонда 1 июлдан электр ва газ нархи қимматламайдиган бўлди

RUSSIA -- power energy line electricity

Ўзбекистонда аввал режалаштирилганидек 1 июлдан электр ва газ тарифларига ўзгартиришлар киритилмайди, деб билдирди Энергетика вазирлиги 29 июнь куни.

Расман билдирилишича, Вазирлар Маҳкамасининг “Ёқилғи-энергетика ресурслари нархларини ўзгартириш тўғрисида”ги қарори лойиҳаси юзасидан фуқаролардан мингдан ортиқ мурожаат келиб тушган. Бу мурожаатлар айни пайтда Энергетика вазирлиги, Молия вазирлиги, Иқтисодий тараққиёт ва камбағалликни қисқартириш вазирлиги мутахассислари томонидан ўрганилиб, таҳлил қилинмоқда.

“Қабул қилинган таклифлар бўйича барча хулосалар ва мутахассисларнинг хулосалари тақдим этилгандан сўнг, ушбу масала бўйича якуний ва тегишли қарор қабул қилинади”,-дейилади билдирувда.

“Ёқилғи-энергетика ресурсларининг нархларини ўзгартириш тўғрисида” ҳукумат қарори лойиҳаси 31 майда Норматив-ҳуқуқий ҳужжатлар лойиҳалари муҳокамаси порталида эълон қилинганди. Мазкур қарорда 2022 йилнинг 1 июлидан бошлаб электр қуввати ва табиий газ табақалаштирилган нарх асосида “ижтимоий истеъмол нормаси”га амал қилинган ҳолда берилиши таъкидланган.

Қарорда маълум қилинишича, 1 июлдан 1 киловатт-соат электрга овқат тайёрлаш учун марказлашган ҳолда электр плиталари билан жиҳозланган кўп квартирали уй-жойлар ва ётоқхоналарда яшайдиган маиший истеъмолчилар 165 сўмдан ҳақ тўлайди.

Қолган маиший истеъмолчилар ойига 250 кВт соатгача 325 сўм, ойига 250 кВт соатдан юқори ҳар 1 кВт соат учун 650 сўмдан тўлайди. Айни пайтда Ўзбекистонда 1 кВт соат электр қуввати нархи 295 сўмни ташкил этади.

Ҳукумат қарорида 250 кВт соатгача 325 сўм тўланадими ёки 250 кВт соатгача бўлган миқдорнинг ҳар бир киловаттига 325 сўмдан тўланадими, деган савол жавобсиз қолган.

Аммо расмий изоҳдан аниқланишича, ойига 250 кВт соатгача электр ишлатадиган хонадонлар тўлайдиган ҳақ миқдори ойига 7,5 минг сўмга ошади.

300 кВт соатгача ишлатадиганлар учун қўшимча харажат ойига 25 минг сўмга, 400 кВт соатгача электр ишлатадиганлар учун қўшимча харажат ойига 61 минг сўмга кўпаяди.

Шунингдек, газ нархи истиш мавсумида ҳисобга олиш ускуналари мавжуд бўлган аҳолига ойига 700 куб метргача бўлган меъёрнинг 1 куб метри учун 410 сўмдан, ойига 700 куб метрдан юқори ҳар 1 куб метр учун 1200 сўмдан белгиланди.

Иситиш мавсумидан ташқари пайтларда ойига 200 куб метргача бўлган меъёрнинг 1 куб метри учун 410 сўмдан, ойига 200 куб метрдан юқори ҳар 1 куб метр учун 1200 сўмдан тўланади.

АҚШ Россияга микрочип сотган Ўзбекистон ширкатига санкция жорий қилди

АҚШ Давлат департаменти биноси.

АҚШ Ўзбекистондаги Promcomplektlogistic ширкатини санкциялар жорий этилган корхоналар рўйхатига киритди. Бу ҳақда АҚШ давлат департаменти расмий сайтида 28 май куни маълум қилинди.

Давлат департаменти баёнотида қайд этилишича, 3 март куни АҚШ мудофаа саноатига маҳсулот етказиб бергани учун Россиянинг “Радиавтоматика” ширкатини санкциялар рўйхатига киритган эди. Бироқ шунга қарамай, Ўзбекистонаги Promcomplektlogistic компанияси “Радиавтоматика” ширкатига санкцияларни четлаб ўтишга кўмаклашган ва мазкур ширкатга микрочиплар етказиб берган.

АҚШ Давлат департаменти Promcomplektlogistic компаниясига санкция жорий этилиши бутун дунёдаги ширкатлар учун “огоҳлантириш” эканини таъкидлади. “Агар сиз санкция остидаги юридик ёки жисмоний шахс билан бизнес қилаётган бўлсангиз, билингки, ўзингиз ҳам санкциялар остида қолишингиз мумкин”, дейилади баёнотда.

Санкцияларга мувофиқ Promcomplektlogistic ширкатининг АҚШдаги барча активлари музлатилади ва АҚШ ширкатларига Promcomplektlogistic билан бизнес қилиш тақиқланади.

Очиқ маълумотларда қайд этилишича, Promcomplektlogistic ширкатига 2018 йилда асос солинган ва компания ер устида тарнспорт хизмати кўрсатиш билан шуғулланади.

Тошкентда рўйхатдан ўтказилган ширкатнинг ягона эгаси Олег Граблин экани, у Россияда ҳам бир неча ширкатга эга экани кўрсатилган.

Хива 2024 йилда Ислом дунёсининг туризм пойтахти айланади

Хива манзараси

Ислом ҳамкорлик ташкилотининг XI сессияси доирасида илк бор Ўзбекистон шаҳарларидан бири бўлмиш Хивани 2024 йилда “Ислом дунёсининг туризм пойтахти” дея эълон қилишга доир қарор қабул қилинган. Бу ҳақда Туризм ва маданий мерос вазирлиги матбуот хизмати маълум қилди.

Вазирлик қайдича, йиғилишда Хива шаҳрининг тарихий қиёфаси тикланиши, реставрация ва консервацияга оид амалга оширилган ишлар, қолаверса, электр устунларнинг демонтаж қилингани, сайёҳларнинг катта оқимини қабул қилиш учун яратилган шароитлар, инфратузилманинг яхшилангани, 5 юлдузли меҳмонхона қурилиши ҳамда бутик-отел ва ҳостеллар қурилиши фаол давом этаётгани алоҳида қайд этилган. Бундан ташқари, туризм ва унга ёндош соҳалар тадбиркорлари учун яратилган қулай шароитлар юқори баҳоланган.

Ислом дунёсининг туризм пойтахти номинациясига БАА, Туркия, Нигерия, Тожикистон ва Ўзбекистондан Абу-Даби, Шанлиурфа, Лагос, Душанбе ва Хива шаҳарлари номзоди қўйилган бўлиб, сўнгги йилда бу шаҳарлар орасида номинацияда ғолиблик учун шиддатли кураш кузатилган. Пировардида бу мақомга Хива шаҳри лойиқ топилган.

Россиянинг Совкомбанки санкциялар оқибатида Ўзагроэкспортбанкни сотиб олиш битимини бекор қилди

Совкомбанк Ўзбекистон Давлат мулкини бошқариш агентлигидан Ўзагроэкспортбанкнинг юз фоиз акцияларини сотиб олиш тўғрисидаги битимни бекор қилди. Бу ҳақда Совкомбанк бошқаруви раисининг биринчи ўринбосари Сергей Хотимскийга таянган ҳолда Интерфакс агентлиги маълум қилди.

“Афсуски, Россиядаги барча нуфузли банклар қаторида бизга ҳам санкциялар жорий этилгани оқибатида мазкур лойиҳани амалга ошириш имконияти мавжуд бўлмай қолди. Ҳозир томонларнинг ўзаро келишуви асосида битимни бекор қилиш жараёни олиб борилмоқда. Битим деярли бекор қилинди, десак ҳам бўлаверади”,-деди Сергей Хотимский.

АҚШ Совкомбанка нисбатан санкцияларни Россия Украинага бостириб кирганидан бир неча кун ўтиб жорий этган эди. Шундан сўнг бошқа қатор давлатлар ҳам мазкур банкни санкциялар рўйхатига киритган.

Совкомбанк Ўзагроэкспортбанкни 4 миллион долларга сотиб олиш ниятида экани 2021 йилнинг ноябрида хабар қилинган эди. Совкомбанк Ўзагроэкспортбанкни хусусийлаштириш юзасидан очиқ танловда ғолиб чиққани ва Ўзбекистон Давлат мулкини бошқариш агентлиги билан шартнома имзолагани айтилган.

2017 йилнинг ёзида ташкил қилинган Ўзагроэкспортбанк фаолияти асосан агросаноат соҳасидаги ишлаб чиқарувчилар ва экспортчиларни қўллаб-қувватлашга қаратилган эди.

“Ўзтрансгаз” раҳбари: Ўзбекистон икки йил ичида газ экспортидан бутунлай воз кечиши мумкин

Иллюстратив сурат

Ўзбекистон 2025−2026 йилларга бориб хорижга газ сотишнинг бутунлай тўхтатиши мумкин. Бу ҳақда журналистларга “Ўзтрансгаз” раҳбари Беҳзод Норматов маълум қилган.

“Ички истеъмол ошгани туфайли яқин келажакда Ўзбекистонда қазиб олинаётган газнинг ҳаммаси ЯИМнинг барқарор ўсишини таъмишлашга йўналтирилади. Ҳа, бизда экспорт бўлган, бироқ ҳали иқтисодиётимиз динамикаси унча юқори эмас. Биз иш ўринлари яратишимиз лозим, газни қайта ишлаш ва қўшилган қийматнинг қўшимча занжирини яратиш имконияти турганда газнинг ўзини экспорт қилишдан иқтисодиёт қанча фойда кўради?” дея иқтибос келтирган Беҳзод Норматов сўзларидан “Газета.уз” нашри.

Ҳозирги пайтда Ўзбекистонда қазиб олинаётган табиий газнинг тақрибан 10 фоизи Хитойга экспорт қилинмоқда. “Ўзтрансгаз” раҳбари бу фоиз Ўзбекистоннинг ички эҳтиёжларидан келиб чиққан ҳолда ойдан ой ўзгариб турганини айтган. Одатда, қишда экспорт қилинаётган газ ҳажми қисқартирилиб, ёз мавсумида оширилади.

Ўзбекистонда 2025 йилга бориб газ экспортини тўхтатиш режаси борлиги ҳақида бундан икки йил муқаддам бош вазир Абдулла Арипов ҳам айтган эди. Ўшанда у қазиб олинаётган газнинг ҳаммаси мамлакат ичида қайта ишланишини билдирган.

Ўзбекистон ОАВларининг фойда солиғи тенг ярмига қисқартирилди

Жорий йилнинг 1 июлидан 2025 йилнинг 1 июлигача Ўзбекистондаги оммавий ахборот воситаларидан олинадиган фойда солиғи 50 фоизга қисқартирилади. Бу ҳақда президенти Шавкат Мирзиёев 27 июнь куни имзолаган “Оммавий ахборот воситаларини қўллаб-қувватлаш ва журналистика соҳасини ривожлантириш чора-тадбирлари тўғрисида”ги қарорда қайд этилди.

Қарорда таъкидланишича, “2022 йил 1 июлдан бошлаб 2025 йил 1 июлга қадар оммавий ахборот воситалари фойда солиғини белгиланган солиқ ставкаларига нисбатан 50 фоиз камайтирилган солиқ ставкалари бўйича тўлайди, реклама хусусиятига эга бўлган оммавий ахборот воситалари бундан мустасно. Ўзбекистон Республикасида ишлаб чиқарилмайдиган, белгиланган тартибда шакллантириладиган рўйхат бўйича олиб кириладиган матбаа ускуналари, замонавий фото ва радиотелевизион ускуналар ҳамда қоғоз божхона божидан озод этилади”.

Бундан ташқари фаол журналистларни мунтазам рағбатлантириш ва улар ўртасида ижодий соғлом рақобат муҳитини ривожлантириш мақсадида ҳар чоракда оммавий ахборот воситаларида эълон қилинган 100 тагача энг яхши материал учун муаллифлар базавий ҳисоблаш миқдорининг 50 бараваригача миқдорда пул мукофоти билан тақдирланади.

2023 йилдан бошлаб журналистлар ўртасида ҳар йили анъанавий ўтказиб келинаётган “Олтин қалам” миллий мукофотининг бош совриндори автомобиль берилади. Биринчи ўрин учун базавий ҳисоблаш миқдорининг 200 баравари, иккинчи ўрин учун базавий ҳисоблаш миқдорининг 175 баравари, учинчи ўрин учун базавий ҳисоблаш миқдорининг 150 баравари миқдорида мукофот пули тўланади.

27 июнь — Ўзбекистонда Матбуот ва оммавий ахборот воситалари ходимлари куни сифатида нишонланади. Аввалроқ шу кун муносабати билан президент Шавкат Мирзиёев мамлакатдаги қатор журналистларни фахрий унвон, орден ва медаллар билан тақдирлагани хабар қилинган эди.

Халқаро ташкилотлар Ўзбекистонни матбуот эркин бўлмаган давлатлар қаторида баҳолайди. Жумладан, Париждаги “Чегара билмас мухбирлар” ташкилоти бу йилги матбуот эркинлиги индексида Ўзбекистонни 133-ўринга қўйди. Бу ўтган йилги кўрсаткичдан 24 поғона юқоридир.

“Чегара билмас мухбирлар” Ўзбекистонда блогерларга таҳдид қилиш ва уларни қамоққа ташлаш давом этаётганини таъкидлаган.

Ўзбекистонда хизмат кўрсатган журналист Фарҳод Маҳмудов 49 ёшида вафот этди

Фарҳод Маҳмудов. Фотосурат журналист Азиза Қурбонованинг телеграм каналидан олинди.

Ўзбекистон Миллий телерадиокомпанияси раиси биринчи ўринбосари Фарҳод Маҳмудов 27 июнда вафот этгани тўғрисида журналист Азиза Қурбонова маълум қилди.

Маҳаллий нашрларнинг ёзишича, аввалроқ Фарҳод Маҳмудов оғир касалликка чалинган эди. Унинг ўлимига мана шу касаллиги сабаб бўлган. Маҳаллий нашрлар “оғир касаллик”нинг номини айтмаган.

1973 йил Тошкент вилояти Чиноз туманида туғилган Фарҳод Маҳмудов 1996 йил Тошкент давлат университетининг журналистика факультетини тамомлаган.

У 1995 йилдан бери Миллий телерадиокомпанияда турли лавозимларда ишлаб келган. Жумладан, «Ўзбекистон 24» телеканалига раҳбарлик қилган.

2018 йилнинг сентябрида Фарҳод Маҳмудов ОАВ, маънавият ва маърифат, маданият, санъат ва ижодий ташкилотларни ривожлантириш масалалари бўйича президент маслаҳатчисига ўринбосар бўлган. 2019 йил сентябрида эса президент администрацияси раҳбарига ўринбосар этиб тайинланади.

2020 йил ёзидан Маҳмудов Миллий телерадиокомпанияси раисининг биринчи ўринбосари сифатида фаолият юритаётганди. У 2008 йилда «Меҳнат шуҳрати» ордени, 2018 йилда «Ўзбекистонда хизмат кўрсатган журналист» фахрий унвони билан тақдирланган.

Мирзиёев Матбуот куни муносабати билан қатор журналистларга унвон, орден ва медалларни улашди

Иллюстратив сурат

Ўзбекистон президенти Шавкат Мирзиёев 27 июнь — Матбуот ва оммавий ахборот воситалари ходимлари куни муносабати билан мамлакатдаги қатор журналистларни фахрий унвон, орден ва медаллар билан тақдирлади.

Президент сайтида эълон қилинган фармон матнига кўра, журналистлар мазкур мукофотларга Ўзбекистонда “сўз ва матбуот эркинлигини ривожлантириш, халқимизнинг ахборот соҳасидаги конституциявий ҳуқуқларини таъминлаш, давлат ва жамият бошқарувида очиқлик ва ошкоралик тамойилларини мустаҳкамлаш, жамоатчилик назоратини кучайтиришга қаратилган демократик ислоҳотларни амалга оширишда фаоллик кўрсатиб келаётгани, глобал ахборот майдонида миллий манфаатларимизни ҳимоя қилиш, юртимиздаги яратувчилик ва янгиланиш жараёнларида эришилаётган ютуқларни кенг тарғиб этишдаги катта хизматлари, шунингдек, ижтимоий ҳаётдаги фаол иштироки учун” лойиқ топилган.

Фармонга мувофиқ, уч кишига “Ўзбекистон Республикасида хизмат кўрсатган журналист”, икки кишига “Ўзбекистон Республикасида хизмат кўрсатган ёшлар мураббийси”, яна уч кишига “Ўзбекистон Республикасида хизмат кўрсатган маданият ходими” унвонлари берилган. Шунингдек, 6 киши “Меҳнат шуҳрати” ордени, 12 киши “Дўстлик” ордени, 2 киши II даражали “Соғлом авлод учун” ордени, бир киши “Соғлом турмуш” медали, 7 киши “Содиқ хизматлари учун” медали, 2 киши “Келажак бунёдкори” медали, 14 киши эса “Шуҳрат” медали билан тақдирланишган.

Тошкент ҳокимияти Қўйлиқ бозори бузилиши тўғрисидаги хабарларни рад этди

Тошкент шаҳар ҳокимияти матбуотда ва ижтимоий тармоқларда Қўйлиқ бозори бузилиши тўғрисида пайдо бўлган хабарларни рад этди.

“Қўйлиқ деҳкон бозорининг тўлиқ ҳудуди давлат ва жамият эҳтиёжлари учун олиб қўйилиши кўзда тутилмаган. Асосий кириш жойи олдидаги автотураргоҳ ҳудудининг бир қисми ва бир нечта вақтинча савдо қурилмаларининг ўрни қурилиш жараёнига жалб этилади. Бунда, асосий бино ва савдо расталарининг аксарияти ўз жойида қолади. Лойиҳага кўра, жалб этиладиган ҳудуднинг умумий майдони 10 минг кв.метр атрофида бўлади.

Қўйлиқ буюм бозори ҳам тўлиқ олиб қўйилмайди. Бу ерда ҳам автотураргоҳ ҳудуди ва бир нечта вақтинча қурилмаларнинг ўрни ишларга жалб этилиб, улар учун компенсация маблағлари тўлаб берилади. Буюм бозорининг ҳам асосий павильони ўз жойида қолади. Автотураргоҳ ҳудуди билан бирга ишларга жалб этиладиган умумий майдон 6,3 минг кв.метрни ташкил этади”, дейилади расмий билдирувда.

Аввалроқ Озодлик радиоси Тошкент шаҳар ҳокими Жаҳонгир Ортиқхўжаев 22 июнь куни “Ер участкасини давлат ва жамоат эҳтиёжлари учун олиб қўйилишига рухсат бериш тўғрисида”ги қарорни имзолагани тўғрисида хабар берган эди.

Мазкур қарорнинг иккинчи бандида “Тошкент шаҳар, Бектемир тумани, Тошкент автомобиль ҳалқа йўли бўйлаб жойлашган TRIUMVIRAT-QURILISH” МЧЖ ва “QO`YLIQ DEHQON BOZORI” ОАЖ кўчмас мулк объектларига ўрнатилган тартибда компенсация берилганидан сўнг, давлат ва жамоат эҳтиёжлари учун олиб қўйилишига рухсат берилсин”, дейилади.

Қарорда Қўйлиқ бозорининг 52 983 квадрат метр майдони компенсация бериладиган ҳудуд сифатида қайд этилган.

Аммо Тошкент ҳокимияти матбуот хизматининг билдиришича “ОАВда келтирилаётган жадвал фақатгина объектлар ҳақидаги умумий маълумотни акс эттирган бўлиб, улар бузилишидан далолат бермайди”.

Марказий банк: Ўзбекистон ташқи қарзи 2013 йилдан бери илк маротаба камайди

Марказий банк.

Марказий банк 2022 йилнинг 1 – чораги нисбатида эълон қилган навбатдаги ҳисоботида 2022 йил бошидан бери Ўзбекистоннинг ташқи қарзи 1,8 фоизга қисқарганини билдирди. Пул миқдорида бу кўрсаткич 721,5 миллион долларни ташкил қилади.

Ҳисоботда таъкидланишича, 2021 йилда Ўзбекистон умумий ташқи қарзи 39 миллиард 600 миллион доллар бўлган. Жорий йил 1 апрелида эса ташқи қарз 38 миллиард 845 миллионни ташкил қилди.

Умумий ташқи қарзнинг 23 миллиард 400 минг доллари давлат ҳиссасига, 15,5 миллиард долларга яқини эса хусусий сектор ҳиссасига тўғри келади.

Марказий банк Ўзбекистон ташқи қарзи 2013 йилдан бери илк маротаба камайганини қайд этар экан, буни қуйидагича изоҳлади: “Биринчи чоракда жаҳондаги нобарқарор геосиёсий вазият давлат ва хусусий секторнинг қарзларни жалб қилишини, шунингдек, асосий қарз бўйича тўловларни секинлаштирди ва бу ҳолат ташқи қарз қолдиқларида акс этди”.

Масалан, давлат биринчи чоракда 281 миллион доллар қарз олган, бу эса ўтган йилнинг шу давридаги кўрсаткичдан 68 миллион долларга оздир. Банкларнинг қарз олиши эса 2021 йилнинг 1 чорагига нисбатан 518 миллион долларга камайган.

Хусусий сектор 1,2 миллиард доллар қарз олган. Бу қарзнинг 389 миллиони банк, 217 миллиони тоғ-кон саноати, 171 миллион доллари нефтгаз ва энергетика саноати, 455 миллиони эса бошқа соҳалар ҳиссасига тўғри келган.

Жорий йилнинг уч ойи ичида давлат асосий қарзи бўйича 252 миллион доллар, фоизлар бўйича 127 миллион доллар тўлади.

Хусусий сектор эса асосий қарз бўйича кредиторларга 1 миллиард доллар, фоизлар бўйича 110 миллион доллар тўлаб берган.

Тошкент шаҳар ҳокими Қўйлиқ бозорини бузиш тўғрисидаги қарорни имзолади (ВИДЕО)

Тошкентдаги бозорлардан бири.

Тошкент шаҳар ҳокими Жаҳонгир Ортиқхўжаев 22 июнь куни “Ер участкасини давлат ва жамоат эҳтиёжлари учун олиб қўйилишига рухсат бериш тўғрисида”ги қарорни имзолади. Қарорга асосан Қўйлиқ бозори жойлашган ҳудуд “Тошкент ҳалқа автомобил йўлидан кириш ва чиқиш имконини берувчи қўшимча йўл ўтказгичлар қурилиши” учун олинади.

Мазкур ҳудуддаги “олиб қўйилиши режалаштирилган кўчмас мулк объектларига белгиланган тартибда товон пули берилади”.

Қарорда қўшимча йўл ўтказгичлар қурилиши таклифини ҳукуматга шаҳар ҳокимлиги ҳамда Транспорт ва Қурилиш вазирликлари киритгани, Вазирлар Маҳкамаси 2021 йил 12 июлдаги 387-м-сонли махсус фармойиши билан бу таклифни маъқуллагани таъкидланган.

Қарорда бузилиш ва қурилиш ишлари қачондан бошланиши, бу ишларни қайси ширкат олиб бориши тўғрисидаги маълумотлар қайд этилган эмас.

Озодлик радиоси Қўйлиқ бозори Ўртачирчиққа қўчирилиши режалаштирилаётгани, аммо бу иш қачон амалга оширилиши номаълум бўлиб қолаётгани тўғрисида 2018 йилнинг 27 апрелида хабар берган эди.

2021 йилнинг 9 декабрида эса Қўйлиқ бозорининг бошқа жойга кўчирилишидан норози бўлган юздан ортиқ одам автомобил йўлини тўсиб қўйганди. Ўшанда Қўйлиқ бозоридаги савдо фаолияти 2021 йилнинг 31 декабригача бутунлай тугатилиши, 1 январдан Food city савдо мажмуасига тўла кўчиш режалангани билдирилганди. Йўл тўсган савдогарлардан 5 нафари маъмурий қамоққа олинганди.

Жаҳонгир Ортиқхўжаев “Қўйлиқ” бозорини кўчирмоқда. Бозорчилар норози
Илтимос кутинг

Айни дамда медиа-манба мавжуд эмас

0:00 0:20:30 0:00

ССВ Қашқадарёда икки боланинг “номаълум” хасталикдан вафот этганига оид ҳолатни ўрганмоқда

Ижтимоий тармоқларнинг ўзбек сегмантида Қашқадарё вилоятининг Ғузор туманида икки бола “номаълум” хасталикдан вафот этгани тўғрисида хабарлар тарқалди.

Маълумотларга кўра, 20 июнь куни мазкур туманда 4 яшар бола жон берган, орадан уч кун ўтгач эса ўша оилага мансуб 6 ёшли қиз вафот этган. Хабарларда врачлар уларга ташхис қўёлмагани айтилган.

Бунга муносабат билдирган Соғлиқни сақлаш вазирлиги матбуот хизмати 23 июнь куни мазкур ҳолатни ўрганиш ва вазиятга аниқлик киритиш мақсадида вазирлик томонидан малакали профессор-шифокорлардан иборат маxсус тиббий бригада тузилиб, зудлик билан Ғузор туманига юборилгани ҳақида маълум қилди.

Ғузордаги ҳолат вазирлик назоратига олингани урғуланган хабарномада ССВ вакиллари “ўрганиш натижалари ҳақида батафсил маълумот бериш”ни ваъда қилишган.

Афғонистонга гуманитар ёрдам учун ташкил этилган Термиз логистика марказига халқаро хаб мақоми берилди

Афғонистонга Термиз орқали гуманитар ёрдам юк машиналарида етказилади. Бирлашган Миллатлар ташкилотининг Қочқинлар бўйича Олий комиссарлиги фотоси.

Президент Шавкат Мирзиёев Афғонистонга гуманитар ёрдам жўнатиш учун ташкил этилган Termez Cargo Center`га халқаро кўп функцияли транспорт-логистика хаби мақомини бериш тўғрисидаги қарорни имзолади.

21 июнь куни имзоланган ПҚ-288-сонли қарорга асосан Termez Cargo Center нафақат Афғонистонга, балки халқаро миқёсда гуманитар ёрдам кўрсатиш бўйича халқаро хабга айлантирилди.

Халқаро хабдан фойдаланувчи халқаро ташкилотлар ва хорижий давлатлар вакилларига инсонпарварлик ёрдамини кўрсатиш учун зарур шарт-шароитлар яратилади.

Халқаро хаб ҳудудида божхона, солиқ, фитосанитария, ветеринария, транспорт, банк хизматлари, сертификатлаштириш хизматлари, валюта айирбошлаш, мобил алоқа, тиббий ва меҳмонхона хизматлари, автотранспорт воситаларига техник хизмат кўрсатиш ва бошқа хизматларни “бир дарча” тамойили асосида, шунингдек, интерактив шаклда кўрсатиш жорий этилади.

Бирлашган Миллатлар Ташкилоти 2021 йилнинг октябрида Афғонистонга гуманитар ёрдамни Термиз орқали етказиб бериш қарорини қабул қилгани хабар қилинганди. Шундан сўнг октябрь ойининг охирларида Термизга БМТ учта самолётда инсонпарварлик ёрдамини етказган, аммо Толибон ҳукумати бу юкни Афғонистонга олиб ўтишга рухсат бермаган.

Фақат 2021 йилнинг 15 декабрь куни Толибон ҳукумати рухсати билан Термиз орқали иккита юк машинасида Афғонистоннинг Мозори Шариф шаҳрига илк гуманитар ёрдам жўнатилган.

Мазкур марказ орқали Афғонистонга яна гуманитар ёрдам жўнатилгани тўғрисида бошқа маълумотлар очиқ манбаларда мавжуд эмас.

22 июнь куни Ўзбекистон Ташқи ишлар вазирлиги Афғонистондаги зилзила оқибатларини бартараф этиш йўналишида Толибон ҳукуматига кўмак беришга тайёрлиги тўғрисида баёнот берди.

Афғонистон шарқидаги Пактика ва Хўст вилоятларида 22 июнга ўтар кечаси юз берган зилзилада, Толибон ҳукумати вакиллари маълумотига кўра, камида 920 киши нобуд бўлган, йўқ деганда 600 киши тан жароҳати олгани ҳақида Озодлик аввалроқ хабар қилган эди.

Сурхондарё вилоят ҳокимиятидаги йиғилишда коррупцияда гумонланган 8 киши қўлга олинди

Иллюстратив сурат.

Сурхондарё вилоят ҳокимиятида ўтказилган бюджет маблағларининг талон-торож қилиниши, суиистеъмолчилик ва коррупция ҳолатларига барҳам бериш ҳамда мансабдор шахсларнинг масъулиятини янада оширишга қаратилган йиғилиш пайтида 8 нафар давлат хизматчиси ДХХ томонидан қўлга олинди. Бу ҳада ЎзА хабар берди.

Расман билдирилишича, қўлга олинганлардан 1 нафари банк ходими, 7 нафари эса турли давлат ташкилотлари ходимларидир.

ЎзА қамоққа олинганлар тўғрисида қуйидагича маълумот берган:

“Жорий йил май ойида «Сурхондарёдонмаҳсулотлари» АЖга қарашли «Алпомиш» ун тегирмони собиқ раҳбари Д.А. ва омбор мудири Ф.А. қиймати 12 млрд. 87 млн. сўм бўлган 2 минг 884 тонна дон маҳсулотини талон-торож қилгани аниқланди.

Тергов ҳаракатлари давомида Д.А. ўзи томонидан талон-торож қилинган 616 тонна дон маҳсулоти учун етказилган зарарни, яъни 2 млрд. 607 млн. сўмни тўлиқ қоплагани учун унга нисбатан қўлланилган «қамоқ» эҳтиёт чораси «гаров»га ўзгартирилган.

Шунингдек, мазкур жиноят иши доирасида «Музработ дон қабул қилиш шохобчаси» собиқ мудири О.И. «Алпомиш» ун тегирмони собиқ раҳбари Ё.О.лар катта миқдордаги дон маҳсулотларини талон-торож қилгани аниқланган. Натижада уларга нисбатан ҳам «қамоқ» эҳтиёт чораси қўлланилган.

Бундан ташқари, ун тегирмони собиқ раҳбари (Ё.О)нинг қиймати 4 млрд. 886 млн. сўмлик 1 минг 166 тонна дон маҳсулотини талон-торож қилгани аниқланди. Тергов жараёнида собиқ раҳбарга тегишли бўлган қиймати 5 млрд. 400 млн. сўмлик кўчмас мулк объектлари хатловга олинган. Шу сабабли унга нисбатан қўлланилган «қамоқ» эҳтиёт чораси ҳам «гаров»га ўзгартирилди.

Шунингдек, омбор мудири Ф.А. ҳамда тегирмон катта таҳлилчиси Х.Ж.лар томонидан жиноий йўл билан топилган 2 та «Жентра» русумли енгил автомашина ҳам тегишли тартибда хатланди.

Яна бир ҳолат: 2021 йилда Шўрчи туманидаги “Shurchi Indenim Klaster” МЧЖ тасарруфидаги 1376 гектар пахта майдонига томчилатиб суғориш технологиясини жорий қилиш режалаштирилган. Амалда технология 142,7 гектар майдонда барпо этилиб, пудратчи “Agro new drip” МЧЖ томонидан ишлар тўлиқ якунига етказилмаган. Ҳисоботларда эса ишларнинг тўлиқ бажарилгани кўрсатилган. Бу эса катта миқдордаги субсидия маблағларининг ажратилишига сабаб бўлган.

Ўрганишлар давомида «Аму-Сурхон» ирригация тизимлари ҳавза бошқармаси бошлиғи Т.А. ва ушбу бошқармада фаолият юритиб келаётган айрим масъул шахслар давлат бюджетидан субсидия маблағлари ажратилиши ҳақидаги имкониятдан қасддан фойдаланиб, юқоридаги 142,7 гектар майдондан ташқари, қўшимча 993 гектарда томчилатиб суғориш технологияси жорий этилгани ҳақида сохта ҳужжатлар тузган”.

Оқибатда “Shurchi Indenim Klaster” МЧЖга 6 млрд. 747 млн. 640 минг сўм миқдоридаги субсидия маблағлари асоссиз ажратилган ва иқтисодиётга катта миқдорда зарар келтирилган. Мазкур ҳолат юзасидан Т.А.га гумонланувчи сифатида «қамоқ» эҳтиёт чораси қўлланилди.

Ҳозирда эса “Shurchi Indenim Klaster” МЧЖ масъул шахслари томонидан келтирилган 6 млрд. 747 млн. 640 минг сўмлик зарарнинг давлат фойдасига ундирилиши таъминланди. Шу муносабат билан унга нисбатан қўлланилган «қамоқ» эҳтиёт чораси «гаров»га ўзгартирилди".

Давомини ўқинг

XS
SM
MD
LG