Линклар

Шошилинч хабар
13 июл 2020, Тошкент вақти: 19:23

Ўзбекистон хабарлари

Bloomberg: Ўзбекистонда жорий йилда ишсизлик даражаси 16 фоиздан ошади

Ўзбекистонга қайтиш учун Россия-Қозоғистон чегарасида тўпланиб турган мигрантлар.

Халқаро валюта фонди Ўзбекистонда жорий йилда ишсизлик даражаси 16,5 фоизга етиши мумкинлигини билдирди. Бу ҳақда Bloomberg хабар берди.

Хабарда айтилишича, аввалроқ Ўзбекистонда ишсизлик жорий йилда 8,9 фоизга етиши прогноз қилинган эди. Агентликнинг ёзишича, Ўзбекистон ҳукумати ишсизлик кўрсаткичини расман бундан озроқ қилиб кўрсатмоқда.

Тошкентдаги Ma’no тадқиқотлар ташаббуси маркази директори Бахтиер Эргашев: “Агар бу одамлар иш топа олмаса, мамлакатда ижтимоий таранглик кучаяди”, - деб ҳисоблайди.

Bloomberg агентлигининг ёзишича, ишсиз қолганларнинг асосий қисми Россиядан қайтган меҳнат муҳожирларидир.

“Чегаралар очилган тақдирда ҳам ишсизлар сўнгги ўн йилдан бери энг улкан инқирозни бошдан кечираётган ва иқтисодий жиҳатдан сустлашган Россиядан иш излайди”, - дейилади хабарда.

Агентликнинг ҳисоб-китобича, жорий йилда Россиядаги муҳожирлар Ўзбекистонга жўнатилаётган пул миқдори ҳам камида икки баробарга камаяди.

Кун янгиликлари

Миллий масс-медиа фондини бундан буён Колесниченко бошқаради

Миллий масс-медиани қўллаб-қувватлаш ва ривожлантириш жамоат фондининг янги директори Александра Колесниченко.

Миллий масс-медиани қўллаб-қувватлаш ва ривожлантириш жамоат фондига Александра Колесниченко директор этиб тайинланди. Бу ҳақда Фонд ўз Телеграм-канали орқали маълумот тарқатди.

Қайд этилишича, ушбу лавозимга тайинлангунга қадар А. Колесниченко Ахборот ва оммавий коммуникациялар агентлигининг Ахборот соҳасини ривожлантиришни мониторинг қилиш бўлими бошлиғи лавозимида ишлаган.

Фонднинг олдинги директори Хушнудбек Худойбердиев, аввал хабар берганимиздек, ҳукуматнинг жорий йил 1 июлидаги 415-сонли қарори билан Ўзбекистон Миллий ахборот агентлиги бош директорининг ўринбосари лавозимига тайинланган.

Миллий масс-медиани қўллаб-қувватлаш ва ривожлантириш жамоат фонди Ўзбекистонда журналист ва блогерларни қўллаш, сўз эркинлигини мустаҳкамлаш, Ўзбекистон имижини янада яхшилашни ўз олдига мақсад қилиб қўйган.

Cув хўжалигини ривожлантиришнинг 10 йиллик концепцияси тасдиқланди

Иллюстратив сурат.

Ўзбекистонда президент фармони билан республика сув хўжалигини ривожлантиришнинг 2020-2030 йилларга мўлжалланган концепцияси тасдиқланди.

Фармонга кўра, 2030 йилга қадар қуйидаги кўрсаткичларга эришиш назарда тутилган:

  • суғориш тизимларининг фойдали иш коэффициентини 0,63 дан 0,73 гача ошириш;
  • сув таъминоти паст даражада бўлган суғориладиган ер майдонларини 560 минг гектардан 190 минг гектаргача камайтириш;
  • шўрланган суғориладиган ер майдонларини 226 минг гектарга камайтириш;
  • Сув хўжалиги вазирлиги тизимидаги насос станцияларининг йиллик электр энергияси истеъмолини 25 фоизга камайтириш;
  • барча ирригация тизими объектларига “Smart Water” («Ақлли сув») сув ўлчаш ва назорат қилиш қурилмалари ўрнатилиб, сув ҳисобини юритишда рақамли технологияларни жорий этиш;
  • 100 та йирик сув хўжалиги объектларида сувни бошқариш жараёнларини автоматлаштириш;
  • қишлоқ хўжалиги экинларини суғоришда сувни тежайдиган технологиялар билан қамраб олинган ерларнинг умумий майдонини 2 миллион гектаргача, шу жумладан, томчилаб суғориш технологиясини 600 минг гектаргача етказиш;
  • сув хўжалигида давлат-хусусий шериклик тамойиллари асосида 50 та лойиҳани амалга ошириш.

“Ўзбекистон Республикаси сув хўжалигини ривожлантиришнинг 2020-2030 йилларга мўлжалланган концепциясини тасдиқлаш тўғрисида”ги мазкур фармон билан концепцияда белгиланган вазифаларни 2020-2022 йилларда амалга ошириш бўйича “Йўл харита”си ҳам тасдиқланган.

Унга мувофиқ, сув ресурсларини бошқариш, сувдан самарали фойдаланиш ва сувни истеъмол қилиш бўйича самарали механизмларни жорий этиш мақсадида Ўзбекистонда Сув кодекси ишлаб чиқилади.

Доллар ва евронинг расмий курси яна ошди

Ўзбекистон Марказий банки жорий йил 14 июлидан валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси ўтган ҳафтага нисбатан 10 сўм 23 тийинга қимматлаб, 10 минг 194 сўм 96 тийинни ташкил этади (ўтган ҳафта 11 сўм 35 тийинга қимматлаб, 10 минг 184 сўм 73 тийин бўлган эди).

Евронинг расмий курси эса олдинги курсга нисбатан 62 сўм 49 тийинга ошиб, 11 минг 518 сўм 27 тийинга тенг бўлади (ўтган ҳафта евро курси 44 сўм 30 тийинга кўтарилиб, 11 минг 455 сўм 78 бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Мирзиёев сенатор Робахон Маҳмудовани Олий суд раисининг ўринбосари лавозимига кўрсатди

Робахон Маҳмудова.

Ўзбекистон президенти Шавкат Мирзиёев сенатор Робахон Маҳмудова номзодини Олий суд раисининг биринчи ўринбосари – жиноят ишлари бўйича суд коллегияси раиси лавозимига кўрсатди. Унинг номзоди эндиликда Олий Мажлис Сенати томонидан кўриб чиқилади. Бу ҳақда Газета.uz нашри Сенатдаги ва Олий суддаги ўз манбаларидан олинган маълумотларга таянган ҳолда хабар қилди.

Робахон Маҳмудова 1968 йили Фарғона вилоятида туғилган. 2008 йилгача Олий суд судьяси лавозимида ишлаган. 2017−2020 йиллар мобайнида Ўзбекистон президентининг Фарғона вилояти бўйича халқ қабулхонасига раҳбарлик қилган. 2020 йил январида сенатор этиб сайланган ва шу кунда Олий Мажлис юқори палатасининг Фан, таълим ва соғлиқни сақлаш масалалари бўйича қўмитаси раиси бўлиб ҳисобланади.

Бундан ташқари, у Жиноят ишлари бўйича Фарғона вилоят судининг раиси бўлиб ҳам ишлаган.

Олий суд раисининг биринчи ўринбосари лавозими бу вазифада ишлаган Шоюнус Ғозиев 2014 йил августида Олий суд раиси лавозимига сайланиб кетганидан бери (яъни қарийб олти йилдан буён) бўш турганди. Ш.Ғозиев Олий суд раиси лавозимида 2017 йил майигача ишлаган.

Сурхондарёда туман ҳокими судьяларни обрўсизлантиришга уринди, судьялар ҳайдовчиси калтакланди

Иллюстратив сурат.

Сурхондарё вилоятининг Жарқўрғон тумани ҳокими Зиёдулла Давлатов туман суди хизмат автомашиналарини постдан ўтказмай, шу ерда навбат кутиб турган одамлар олдида судья ва суд ходимларини обрўсизлантиришга уринган. Бу ҳақда Ўзбекистон Миллий ахборот агентлиги Судьялар олий кенгаши судьялар дахлсизлигини таъминлаш бўйича суд инспекцияси маълумотларига таянган ҳолда хабар қилди.

Хабарда қайд этилишича, 10 июль куни содир бўлган ҳодиса чоғида судья ва суд ходимларига қўполлик қилинган, туман судининг ҳайдовчиси Р. Раҳимназаровни йўл патруль хизмати ходими Р. Раимов билагидан тортиб, ИИБ бошлиғи Б. Хидиров ва ўринбосари Ш. Азизбердиевлар автомашина калитини олиб қўйиб, уни автомашинада ўтирган жойидан куч ишлатиб тортиб, эгнидаги кўйлагини олд кўкрак қисмини йиртиб, суд ходимини туман ИИБ биносига олиб келиб, ИИБ бошлиғи ўринбосари Ш. Азизбердиев суд ходимини ҳақоратлаб, бўйнидан бўғиб, шахсий телефон аппаратини тортиб олиб, сўнгра вақтинча ушлаб туриш ҳибсхонасига қамаб қўйган.

“2020 йил 10 июлдаги 442-сонли суд-тиббий текшируви далолатномасига кўра, Р.Раҳимназаровнинг баданида қонталаш ва шилинма аниқланган. Р.Раҳимназаровнинг баданида кўкрак қафаси ўнг томони, бўйин орқа ўнг томони, ўнг кўкрак соҳасида қонталашлар ва ўнг қўл тирсак ташқи юзасида шилинмалар мавжудлиги, унинг кўкрак қафаси ўнг томони, бўйин орқа ўнг томони, ўнг кўкрак соҳасидаги қонталашлари ва ўнг қўл тирсак ташқи юзасидаги шилинмалари ўтмас қаттиқ жисмларнинг бир-неча мартабалик зарб ва ишқаланиш механизмлари таъсирида етказилганлиги, оғирлик даражасига кўра енгил тан жароҳатлари, деб баҳоланган”, дейилади хабарда.

Юқоридагиларни инобатга олиб, воқеа жойида бевосита ишчи гуруҳига раҳбарлик қилган Жарқўрғон тумани ҳокими З. Давлатов, туман ИИБ бошлиғи Б. Хидиров, ўринбосари Ш. Азизбердиев ва бошқа алоқадор ходимларга нисбатан суд ходимига қасддан енгил тан жароҳати етказиш, судья ва суд ходимларини обрўсизлантириш, судьянинг хизмат автомашинаси дахлсизлигини бузиш ва бошқа ҳолатларга қонуний баҳо бериш учун тўпланган ҳужжатлар Сурхондарё вилояти прокуратурасига юборилган.

Судьялар дахлсизлигини таъминлаш бўйича суд инспекцияси Республика махсус комиссиясининг 2020 йил 9 июлидаги қарори билан ҳаракатланиш учун махсус рухсатномалар талаб этилмайдиган хизмат автотранспорт воситалари рўйхатига суд тизими автомашиналари ҳам киритилганини таъкидлаб, жарқўрғонлик амалдорларни Республика махсус комиссияси қарори моҳиятини тушунмаганликда айблайди.

COVID-19 қурбонлари: Бир кеча-кундузда Тошкентда 3 аёл вафот этди

Ўзбекистонда жорий йил 12 июль куни коронавирус юқтириб олгани тасдиқланган беморлардан 3 нафари оламдан ўтди.

Соғлиқни сақлаш вазирлигининг жамоатчилик билан алоқалар бўлими маълумотига кўра, марҳумаларнинг уччаласи ҳам Тошкент шаҳридан бўлиб, 53 ёшли М.К. ва 65 ёшли М.Х. Олмазор туманида, 76 ёшли В.Т. эса Чилонзор туманида яшаб келган.

Вазирлик қайдича, уччала беморда ҳам ҳамроҳ касалликлар бўлган.

ССВ шифокорлар томонидан ўтказилган реанимацион муолажаларга қарамай, уч бемор ҳам ўткир нафас ва юрак қон-томир етишмовчилигидан вафот этганини билдирган.

Шу тариқа Ўзбекистонда COVID-19 инфекциясига чалингани ортидан ҳаётдан кўз юмганлар сони 60 нафарга етган.

Коронавирусга чалинганлар сони 13 минг нафарга етди

Ўзбекистонда коронавирус инфекцияси қайд этилганлар сони, 2020 йил 12 июль соат 23:30 ҳолатига кўра, 12997 нафарни ташкил этган. Бу ҳақда Соғлиқни сақлаш вазирлигининг жамоатчилик билан алоқалар бўлими маълумот тарқатди.

Бир кеча-кеча кундузда мамлакат бўйлаб 484 ҳолатда касаллик қайд этилган. Шундан 219 нафари карантин муассасаларида, 265 нафари аҳоли орасида аниқланган.

Айни пайтда якшанба куни Ўзбекистон бўйлаб 129 нафар бемор инфекциядан соғайган, эпидемия бошидан бери эса тузалиб кетган беморлар сони 7852 нафарга етган.

5085 нафар беморга нисбатан муолажалар давом этмоқда, улардан 43 нафари оғир, 7 нафари эса ўта оғир аҳволда.

Агентлик: хусусий клиникалардан коронавирусга тест олишни тўхтатиш сўралмаган

Соғлиқни сақлаш вазирлиги ҳузуридаги Санитария-эпидемиологик осойишталик агентлиги хусусий клиникаларга коронавирусга тест олишни тўхтатиш ҳақида кўрсатма берилмаганини билдирди.

Агентликка таяниб Daryo.uz нашрининг хабар қилишича, аксинча агентлик коронавирусга тест олиши учун хусусий клиникаларга имкон қадар шароит яратиб беришга уринмоқда.

"У ёки бу клиниканинг ҳозирги вақтда коронавирусга тест олишни вақтинча тўхтатиб қўйгани ушбу муассасаларнинг карантинга тушгани билан боғлиқ бўлиши мумкин, «мойка» жараёни якунига етгач, улар ўз фаолиятини яна аввалгидек давом эттираверади", дея иқтибос келтирди агентлик матбуот хизматидан Daryo.uz нашри.

9 июль куни Тошкентда коронавирусга тест ўтказаётган хусусий - Swiss Lab клиникаcи таҳлил ўтказишни номаълум муддатга тўхтатганини маълум қилган. Ходим бунинг сабабларини очиқламаган. Айтишича, бу клиникада COVID-19 учун 1 марта тест ўтказиш нархи 330 минг сўмдир.

10 июлдан бошлаб эса, ижтимоий тармоқларда пойтахтдаги бошқа қатор хусусий клиникалар ҳам тест ўтказишни тўхтатгани ҳақида хабарлар берилди:

Сўнгги кунларда Тошкентда коронавирус аломатлари билан оғрий бошлаган ва "Тез ёрдам" хизматини кунлаб кутаётганлардан Озодликка мурожаатлар келиши кўпайди.

Тармоқларда ҳам бу каби шикоятлар кўпайиши, шикоятчилар сафида давлат ташкилотлари вакилларининг ҳам кўриниши ортидан, 12 июль куни Санитария-эпидемиологик осойишталик агентлигининг пойтахтда коронавирус учун тест ўтказадиган лаборатория марказлари рақамлари эълон қилинди.

Озодлик мухбири 12 июль куннинг биринчи ярмида бу рақамлардан баъзиларига қўнғироқ қилиб, боғланишга уринди ва аммо, Озодликка келаётган шикоятларда қайд этилгани каби, рақамлар одатан банд бўлиб қолаётганига гувоҳ бўлди:

"Ғишткўприк" чегара пунктидан кираётганлар Ўртасарой карантин ҳудудига жойланмоқда (ВИДЕО)

Ўзбекистон билан Қозоғистон ўртасидаги чегара ўтказиш пункти, 2020

8 июлдан тўлиқ режимда ишлай бошлаган Ўзбекистон билан Қозоғистон ўртасидаги "Ғишткўприк" чегара ўтказиш пунктидан кунига 400 нафар атрофида ватандош киритилмоқда.

Бу ҳақда чегарадан репортаж ҳозирлаган Kun.uz нашри хабар қилди.

Хабарда айтилишича, чегарадан ўтказилаётганлар автобусларда Йўл-патрул хизмати ва Миллий Гвардия ходимлари назорати остида Зангиота туманидаги Ўртасарой карантин ҳудудига жойлаштирилмоқда.

Telegram тармоғида Соғлиқни сақлаш вазирлиги ва бошқа ташкилотлар ҳамкорлигида очилган Koronavirus Info канали 12 июль куни, "Ғишткўприк" чегара ўтказиш пункти шахсан президент топшириғи билан очилганини хабар қилди:

"Июль ойи бошида Қозоғистон билан чегарадаги "Ғишткўприк" пости қисман ёпилгани сабабли 4 мингдан ортиқ ватандош бир неча кун ҳеч қандай шароитсиз яшашга мажбур бўлди. Давлат раҳбари топшириғи билан 8 июлдан ўтказиш пункти очилди".

Ушбу хабарга, чегара пункти яқинида Ўзбекистонга киролмай қуруқ ерда, тиқилинч аҳволда навбат кутиб, тунаётганларнинг аянчли аҳволи акс этган видео илова қилинди:

Жорий йилнинг 8-9 июль кунлари қозоқ-ўзбек чегарасидаги “Жибек жўли” – “Ғишткўприк” назорат-ўтказиш пунктидан 3746 нафар ўзбекистонлик юртига ўтказилгани ҳақида Ўзбекистон Ташқи ишлар вазирлиги матбуот хизмати маълум қилган.

ТИВ Оператив штаби маълумотларига кўра, техник муаммолар туфайли қозоқ-ўзбек чегарасидан ўзбекистонликларни ўтказиш чекланган миқдорда амалга оширилган. Бу ҳолат чегарада 3000 га яқин ўзбекистонлик тўпланиб қолишига сабаб бўлган.

Ўтган ҳафта эса чегара маскани олдида Қозоғистонга пул топиш учун келган ўзбекистонлик ва тожикистонликлар йиғилиб қолгани, чегара ёпиқлиги туфайли улар уйларига қайта олмаётгани, бу вазиятга Тожикистон ва Қозоғистон ҳукумати вакиллари аралашгани кузатилган эди.

COVID-19 касаллиги симптомсиз кечаётганларни уйида даволаш тартиби тасдиқланди

Соғлиқни сақлаш вазири Алишер Шодмонов

"Коронавирус инфекцияси билан касалланган беморларни даволаш ва касаллик тарқалишини олдини олиш борасида ўтказилаётган эпидемияга қарши курашиш тадбирларини такомиллаштириш тўғрисида" Соғлиқни сақлаш вазирининг буйруғи қабул қилинди.

ССВ берган хабарга кўра, ушбу буйруқ билан:

- COVID-19 касаллигини ташқи белгиларсиз енгил кечираётганларни уйида даволаш ва эпидемиологик суриштирув ўтказиш тартиби;

- барча ҳудудларда бундай беморларга уйида тиббий хизмат қиладиган ходимлар рўйхати;

- Бундай беморларнинг 10 кунлик тиббий кузатувига оид ҳисобот шакли;

- Коронавирус аниқланган беморлар тўғрисидаги маълумот шакли тасдиқланди.

Беморнинг яшаш шароити санитария-эпидемиологик талабларга жавоб бермаган тақдирда ёки яккалаш имконияти бўлмаганида, улар шифохонада қолишлари мумкин.

Аммо, сўнгги бир ҳафта ичида республика бўйлаб коронавирус касаллиги аломатини ўзида сеза бошлаган, аммо тест топшириш учун қилган сўровлари жавобсиз қолаётганлардан шикоятлар кўпайиб кетди.

8 июль куни Коронавирусга қарши кураш республика штаби вакили Ҳабибулла Оқилов мамлакатдаги тиббиёт муассасалари тўлгани, агар қайд этилган беморларнинг кунлик сони 1000 нафарга етса, тизим ўлишини айтган эди.

Шу вақтгача Ўзбекистонда 7 ярим мингга яқин коронавирус бемори шифохоналардан соғайиб чиқди. Расмий рақамларга кўра, бу беморларнинг 70-80 фоизга яқини касалликни симптомларсиз кечирган.

Бундай беморларнинг ҳар бирига, ССВ берган расмий баёнотга кўра, 32 миллион сўмдан 64 миллион сўмгача маблағ сарфланган.

4 ойга чўзилган бу амалиётдан шу йилнинг 5 июлидан воз кечилди ва шу санадан бошлаб, коронавирус инфекциясига чалинганлар касалликни енгил кечираётган бўлса, уларга уйида даволанишига рухсат берилди.

11 июль кечга бориб вирус юқтирганлар яна 196тага кўпайди

Ўзбекистонда коронавирус юқтирганлар 11 июль Тошкент вақти билан соат 17га қадар 12402 кишига етди. Шу куни соат 10.00 даги маълумотга кўра 12206 нафар эди. Яна 196 нафар кишида коронавурус аниқланди.

Соғлиқни сақлаш вазирлигининг маълум қилишича, янги касалланиш ҳолатларининг 124 нафари Карантин марказидаги фуқаролар (барчаси хориждан келган) орасида, 37 нафари Самарқанд вилоятида коронавирусга чалинганлар билан мулоқотда бўлиб, карантинга олинган фуқаролар орасида, 20 нафари Тошкент шаҳрида (шундан 2 нафари коронавирусга чалинганлар билан мулоқотда бўлиб, карантинга олинган фуқаролар орасида, 18 нафари аҳоли орасида), 15 нафари эса Бухоро вилоятида аҳоли орасида аниқланган.

Ҳозиргача кун давомида мамлакатда 293 та янги COVID-19 ҳолати тасдиқланди.

Айни пайтда мамлакатда 7540 нафар коронавирус инфекциясига чалинган фуқаролар бутунлай соғайган.

COVID-19 га тест топширолмаган Адлия вазири маслаҳатчиси тиббиёт тизимини танқид қилди

Шаҳноза Соатованинг Фейсбукдаги саҳифасидан олинди.

Ўзбекистон Адлия вазирининг маслаҳатчиси ва блогер Шаҳноза Соатова ўз Телеграм саҳифасига қўйган мақолада, Covid-19 га тест топшириш ниҳоятда қийинлигини, вирусни аниқлаш ва касалликни даволашда аниқ бир тизим йўқлигини танқид қилди.

Блогернинг ёзишича, у ярим кун СЭС эшигида сарғайиб тест топширолмай уйига қайтган:

"Контакт бўлган, ҳароратим 4-кун 37 - 37,5 атрофида ушланиб турибди. Қизим, онам, укам, келиним - ҳаммамиз иситмаладик, онам таъм билмаяптилар, йўталяптилар. Келинимда қаттиқ қуруқ йўтал ва 39 даражагача иситма кузатилди, менда эса фақат тана қақшаб оғриши ва иситма. Тез ёрдам ва поликлиника менда ковид бўлиши мумкин деб фақат масофадан маслаҳат беряпти, лекин тест йўқлиги учун расман ковид деб тан ҳам олмаяпти. Хуллас, бетартиблик ва тизимсизлик. Ўзинг учун ўл етим".

Шаҳноза Соатова Соғлиқни сақлаш вазирига мурожаат қилиб шундай деб ёзади:

"Шунча пайт фалонча касал тузалди деб ҳисобот бериб, шундоқ ҳам тузалиб кетаётган одамлар билан статистикангизни бойитдингиз. Яна уларни тантана билан уйига кузатиб ажойиб шоулар қилдингиз. Ўша пайтда ресурсларингизни тўғри тақсимлаб, ҳозир ўзингиз қўллаётган усулни қилсангиз, яъни ёппасига эмас, фақат ўта зарур ҳолларда касалхонага ковид билан зарарланганларни ётқизсангиз бўлмасмиди? Врачларни зўриқтирмай, бошқа ресурсларни ҳам оқилона тақсимлаш бўлмасмиди шу. Кеча ҳаммага, бугун эса ҳеч кимга бўляпти энди".

Блогер вирус юқтирганлигини гумон қилган шахс сифатида ўз бошидан кечирганларини шундай деб ёзади:

"Масалан, уч кун аввал иситмам чиққанида поликлиникага телефон қилдим, у тезёрдамга қил деди. Колл-центр ҳам тезёрдамга йўналтирди, тезёрдам поликлиникага, поликлиника яна тезёрдамга... Охири телефоним овоз ёзяпти, шикоят қиламан деганимдан сўнг участка врачим телефонда дориларни айтиб турди. Мана аҳвол!"

Сўнгги кунларда Ўзбекистонда Covid-19ни юқтириш ҳолатлари яна кўпайгани қайд этиляпти. ССВ берган маълумотга кўра, 11 июль соат 10.00га қадар вирус юқтирганлар сони сони 12206 нафарни ташкил этди.

65 ёшдан ошган шахсларга "ўзини ўзи яккалаш" ҳаёт тарзига қатъий риоя этиш тавсия этилди

Ўзбекистонда коронавирус юқтираётганлар сони яна ошиши сабабли, Республика махсус комиссияси 13 июлдан 2020 йил 1 августга қадар республика миқёсида навбатдаги карантин чекловларини жорий этди.

Комиссия қарорида сартарошхона ва гўзаллик салонлари фаолияти, маҳаллий (ички) авиақатновлар ва темир йўл қатнови тўхтатилиши айтилган.

65 ёшдан ошган шахсларга "ўзини ўзи яккалаш" ҳаёт тарзига қатъий риоя этиш ҳамда сабабсиз уйдан ташқарига чиқмаслик тавсия этилади.

Шунингдек, жорий йил 18-19 июль ҳамда 25-26 июль (шанба ва якшанба) кунлари бутун сутка давомида республика миқёсида ҳаракатланиш, автотранспорт воситаларининг, шу жумладан, йўналишсиз таксиларнинг ҳаракати тўлиқ тўхтатилади.

Мазкур чеклов махсус рухсатнома (стикер)лар асосида ҳаракатланадиган автотранспорт воситаларига ҳамда Республика махсус комиссиясининг жорий йил 8 июлдаги қарори билан тасдиқланган Автотранспорт воситалари ҳаракатланишига махсус рухсатномалар талаб этилмайдиган ҳолатларга нисбатан татбиқ этилмайди.

54-қурбон: Тошкентда 50 яшар аёл вафот этди

Тошкент шаҳри Миробод туманида яшовчи 50 ёшли аёл Р.Ю. ўткир юрак қон-томир ва нафас етишмовчилигидан вафот этди.

Бу ҳақда Соғлиқни сақлаш вазирлиги жамоатчилик билан алоқалар бўлими маълум қилган.

Хабарда айтилишича, бу аёл 3 июлдан 9 июлгача уй шароитида даволаниб юрган. Нафас етишмовчилиги белгилари кучайгач, 1-сон шаҳар клиник шифохонасига ётқизилган.

Унга “COVID-19” инфекцияси оғир кечиши, икки томонлама пневмония ташхиси қўйилган. Касаллик ўткир нафас ва юрак қон-томир етишмовчилиги билан кечган. Шунингдек, юрак ишемик касаллиги, илк аниқланган қандли диабет ҳамроҳ касалликлари билан ҳам оғриган.

9 июль куни беморнинг аҳволи оғирлашиб, нафас етишмовчилиги белгилари кучайганлиги сабабли сунъий нафас олиш аппаратига уланган.

Бемор бир йилдан буён онкологик касаллик билан оғриб келган.Шифохонада беморнинг даволаниши давомида шифокорлар томонидан консультация ва консилиумлар қилинган, даволаш жараёни мутахассислар тавсияси асосида олиб борилган.

Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, вафот этган.

Коронавирусга чалинганлар 12 минг нафардан ошиб кетди

2020 йил 11 июль соат 10:00 ҳолатига кўра, Ўзбекистонда коронавирус инфекцияси қайд этилганлар сони 12206 нафарни ташкил этди.

Ўтган бир кун орасида вирус юқтирганлар 463 кишига кўпайди.

Бу ҳақда хабар берган Соғлиқни сақлаш вазирлигига кўра, янги касалланиш ҳолатларининг 126 нафари Карантин марказидаги (барчаси хориждан келган) фуқаролар орасида, 30 нафари Тошкент шаҳрида аҳоли орасида, 14 нафари Қорақалпоғистон Республикасида (шундан 1 нафари коронавирусга чалинганлар билан мулоқотда бўлиб, карантинга олинган фуқаролар орасида, 13 нафари аҳоли орасида), 9 нафар Навоий вилоятида коронавирусга чалинганлар билан мулоқотда бўлиб, карантинга олинган фуқаролар орасида аниқланган.

4621 нафар беморга белгиланган стандартлар бўйича даво чоралари кўрилмоқда. Улардан 43 нафари оғир, 10 нафари эса ўта оғир аҳволда.

Афғон аёллари қишлоқ хўжалиги соҳаси бўйича Ўзбекистонда таълим олади

Афғонистонлик толибалар (БМТТД фотоси).

Афғон аёллари Ўзбекистоннинг Термиз туманидаги афғонистонликларни ўқитиш марказида қишлоқ хўжалиги соҳасини ўзлаштирадилар. Бу ҳақда БМТ Тараққиёт Дастури матбуот маркази маълумот тарқатди.

Қайд этилишича, Ўзбекистонда таҳсил олган афғонистонлик аёлларга ўқишни тугатганларидан сўнг техник ва касбий таълим тўғрисидаги гувоҳномалар топширилади.

Лойиҳа Ўзбекистон Олий ва ўрта махсус таълим вазирлиги, Европа Иттифоқининг Ўзбекистондаги делегацияси ва БМТ Тараққиёт дастури қўшма лойиҳаси асосида амалга оширилмоқда.

Лойиҳанинг мақсади ўз юртларида таълим ва иш билан таъминлашда эркакларга қараганда номутаносиб тўсиқларга дуч келаётган афғон аёллари учун таълим олиш имкониятларини тақдим қилишдан иборат”, дейилади БМТТД хабарномасида.

Маълумотларга кўра, Афғонистондан келган 50 нафар аёл Қозоғистон ва Ўзбекистон университетларида таълим оладилар.

БМТ Тараққиёт дастури томонидан 2025 йилгача амалга оширилиши мўлжалланган мазкур ташаббус учун Европа Иттифоқи 2 миллион евро миқдорида грант ажратган.

Термиздаги марказда афғон аёллари Тошкент давлат аграр университети дастаги билан таълим олишлари айтилмоқда.

Афғонистонлик аёлларнинг илк гуруҳи 2019 йил октябрида статистика, қишлоқ хўжалиги ва тоғ-кон соҳаларида ўқиш учун Қозоғистонга боришган.

Лойиҳа ҳамкорлари бу йил яна 20 нафар талабага таълим гранти беришга қарор қилганлар. Улар Ўзбекистонда қишлоқ хўжалигини, Қозоғистонда эса кончиликни ўрганадилар. Ихтисослашган таълим олишдан олдин талабалар тил курсларини ўташлари керак бўлади.

53-қурбон: Сурхондарёда 67 ёшли эркак вафот этди

Сурхондарё вилоятининг Термиз шаҳрида яшаган ва коронавирусга чалингани тахмин қилинган 67 ёшли Р.А. оламдан ўтди. Бу ҳақда Соғлиқни сақлаш вазирлиги жамоатчилик билан алоқалар бўлими маълум қилган.

Қайд этилишича, у 3 июль куни ўзини ёмон ҳис қилган, нафас йўлларида яллиғланиш бўлган. 4 июль куни бемор COVID-19 инфекциясига намуна топширган ва шифохонага ётқизилган.

“Унга COVID-19 инфекциясига гумон, миокард инфаркти, ўткир юрак қон-томир ва нафас етишмовчилиги ташхиси қўйилган. Шунингдек, икки томонлама пневмония, ўткир юрак ишемик касаллиги, зўриқиш стенокардияси, сурункали юрак етишмовчилиги, қандли диабет каби ҳамроҳ касалликлар билан ҳам оғриган”, дейилади вазирлик хабарномасида.

Вазирлик, врачлар томонидан ўтказилган реанимацион муолажаларга қарамай, беморнинг аҳволи кескин оғирлашиб, миокард инфаркти, ўткир юрак қон-томир ва нафас етишмовчилигидан вафот этганини билдирган. Шу тариқа Ўзбекистонда COVID-19 билан боғлиқ ўлим ҳолатлари сони 53 тага етган.

Янги ташкил этилган Ёшлар ишлари агентлиги директори лавозимига Алишер Саъдуллаев тайинланди

Алишер Саъдуллаев.

Ўзбекистон президенти Шавкат Мирзиёев томонидан шу йил 10 июлида имзоланган қарор билан Саъдуллаев Алишер Зафар ўғли Ёшлар ишлари агентлиги директори лавозимига тайинланган. Бу ҳақда Адлия вазирлигига қарашли “Ҳуқуқий ахборот” Телеграм-канали маълумот тарқатди.

А. Саъдуллаев янги лавозимга тайинланиши муносабати билан президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчисининг биринчи ўринбосари лавозимидан озод этилган.

Ўтган ой охирида президент Ш.Мирзиёев фармони билан Ўзбекистонда Ёшлар ишлари агентлиги тузилганди.

Алишер Саъдуллаев Ўзбекистон тарихидаги энг ëш вазир ўринбосари сифатида тилга тушган. 2017 йили Шавкат Мирзиëев ўша пайтда 23 ёшда бўлган А. Саъдуллаевни Халқ таълими вазирига ўринбосар этиб тайинлаган эди.

Президентнинг 2018 йил 25 октябридаги қарори билан бу лавозимдан озод этилган Саъдуллаев кўп ўтмай Ёшлар иттифоқи раисининг 1-ўринбосари лавозимига тайинланганди.

Қашқадарёда синтетик ёнилғи заводи қурилишида ишлаётган 100 дан зиёд одам коронавирусга чалинди

Қашқадарё вилояти Ғузор туманида барпо этилаётган ва синтетик суюқ ёнилғи ишлаб чиқаришга ихтисослашган “Uzbekistan GTL” заводи қурилишида ишлаётган қурувчилардан 127 нафарининг COVID-19 инфекциясига чалинган. Бу ҳақда Қашқадарё вилояти соғлиқни сақлаш бошқармаси ахборот хизмати маълум қилган.

Аввалроқ уларнинг коронавирусга чалинганлар билан мулоқотда бўлганлиги сабабли карантинга олингани билдирилганди.

Бошқарма қайдича, айни пайтда завод қурилиши ҳудудида инфекция тарқалишининг олдини олиш бўйича барча зарурий чоралар кўрилмоқда.

Коронавирус пандемияси даврида Ўзбекистонда қатор завод ва йирик корхоналар фаолияти тўхтатилган эмас.

Бир ой муқаддам Ўзбекистондаги заводлардан бирида ишлаётган ходимлар Озодликка карантин чоғида уйга бормасдан, корхона омборхонасида ётиб ишлашга мажбур қилинаётганларини айтишганди.

Шанба ва якшанба кунларини ҳам қўшиб икки юз одам 15 кун подряд ишлаймиз. Эрталаб 8 дан кечки 8 гача ишлаймиз. Баъзида кунига 12 соатдан ҳам ошади. Меҳнат кодексига кўра, иш ҳафтаси 40 соатдан ошмаслиги керак. Ётиб қолишимиз смена деб қаралса¸ кейинги куни иш куни бошлангунга қадар 12 соат дам берилиши керак. Лекин, ундай бўлмаяпти”, деганди жумладан Андижондаги "UZ DONG YANG CO" корхонаси ишчиси.

Кейинги ҳафтадан маҳаллий йўналишлар бўйлаб поезд ва учоқ қатновлари тўхтайди

Жорий йилнинг 13 июлидан Ўзбекистонда маҳаллий йўналишлар бўйлаб поезд ва авиа қатновлар ҳам тўхтатилади. Бу ҳақда Транспорт вазирлиги ахборот хизмати раҳбари Наврўз Ашурматов 10 июль куни карантин чекловлари бўйича Республика махсус комиссияси қарори юзасидан АОКА ҳузуридаги штабда бўлиб ўтган брифингда билдирди.

Республика махсус комиссияси қарори билан 10 июлдан эътиборан республика миқёсида қатор чеклов чоралари ўрнатилганини қайд этган мулозимга кўра, кучайтирилган карантин тартиби шароитида фақатгина Республика махсус комиссияси томонидан тасдиқланган парвозлар жадвалига мувофиқ, хорижий давлатлардаги фуқароларимизни ватанга олиб келиш бўйича репатриацион рейслар бажарилади.

Н.Ашурматов 10 июль санасидан автобуслар ҳаракати вақтинча тўхтатилиши, чегара пунктларидан фуқароларни карантин ҳудудларига етказиш учун автобус ташувлари амалга оширилишини қўшимча қилган.

Брифингда билдирилишича, 10 июлдан 1 августга қадар "Ўзбекистон темир йўллари" томонидан 5900 та чипта сотилган бўлиб, бу чипта пуллари йўловчиларга қайтарилади.

Шунингдек, "Uzbekistan airways" АЖ томонидан 332 та авиачипта сотилган ("Тошкент-Нукус", "Тошкент-Урганч", "Тошкент-Термиз" йўналишларида). Сотиб олинган авиачипталарнинг амал қилиш муддати 1 йилгача ҳақиқий ҳисобланади. Авиақатновлар тикланганидан кейин йўловчилар аввал сотиб олган чипталари билан бемалол парвоз қилиши мумкинлигини қайд этилди.

Бундан ташқари, автобусда ҳаракатланиш мақсадида июль ойи учун сотиб олинган ойлик йўл чипталари 1 августдан 10 августгача қайтариб олинади ва фойдаланилмаган кунлар учун пул маблағлари қайтарилади.

ТИВ ўзбек-қозоқ чегарасида турган 3750 чоғли ўзбекистонлик юртига қайтарилганини билдирди

Қозоқ-ўзбек чегарасидаги автовокзал ҳудудида турган ўзбекистонлик ва тожикистонлик муҳожирлар, 2020 йил 3 июли.

Жорий йилнинг 8-9 июль кунлари қозоқ-ўзбек чегарасидаги “Жибек жўли” – “Ғишткўприк” назорат-ўтказиш пунктидан 3746 нафар ўзбекистонлик юртига ўтказилган. Бу ҳақда Ўзбекистон Ташқи ишлар вазирлиги матбуот хизмати маълум қилган.

ТИВ Оператив штаби маълумотларига кўра, 1 июлдан 7 июлгача мазкур НЎП орқали 2700 нафардан зиёд ватандош Ўзбекистонга қайтган. Бироқ юзага келган техник муаммолар туфайли қозоқ-ўзбек чегарасидан ўзбекистонликларни ўтказиш чекланган миқдорда амалга оширилган. Бу ҳолат чегарада 3000 га яқин ўзбекистонлик тўпланиб қолишига сабаб бўлган.

Республика махсус комиссияси, ДХХ Чегара қўшинлари ва Ўзбекистоннинг Қозоғистондаги дипломатик ваколатхоналарининг биргаликдаги саъй-ҳаракатлари натижасида 8 июль куни фуқароларимизнинг Қозоғистон-Ўзбекистон чегарасидан эркин ўтишига тўсқинлик қилувчи барча техник ва ташкилий масалалар тезкорлик билан ҳал қилинди”, дейилади вазирлик хабарномасида.

Ўзбек дипломатларига кўра, ҳозирги пайтда давлатлараро чегарани кесиб ўтишда муаммо йўқ, назорат-ўтказиш пунктлари одатдагидек ишламоқда, одамлар тўпланиб қолиши кузатилмаяпти.

Вазирлик хориждан қайтган ўзбекистонликлар 14 кунлик карантинга жойлаштирилишини эслатган.

Ўзбек-қозоқ чегарасидан 8 июль куни 2000 нафар ўзбекистонлик ўтказиб юборилгани ҳақида аввалроқ Озодлик хабар қилган. Сариоғоч тумани ҳокими Мухит Ўтаршиев 9 июль куни Озодликнинг қозоқ хизматига Ўзбекистоннинг Қозоғистондаги элчихонаси чегара яқинидаги автовокзалда турган ўзбекистонликларнинг барчасини кечгача ватанига қайтаришга ваъда берганини маълум қилган эди.

Ўқитувчиларни мажбурий меҳнатга жалб қилганликда айбланган ҳоким ўринбосари судда оқланди

Ўзбекистонда турли касб эгаларини тозалаш ишларига жалб қилиш анъанага айланган.

Тошкент вилояти Зангиота тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Бахтиёр Мамадалиев биринчи инстанция туман суди томонидан оқланди.

Суд у ўқитувчиларни мажбурий меҳнатга жалб қилмаган ва мажбурий обуна қилдирмаган, деган қарорни чиқарди.

ЎзАнинг 10 июлда хабар беришича, Зангиота тумани маъмурий суди Бахтиёр Мамадалиевни 15 миллион 610 минг сўм жарима солиш тўғрисидаги 03/52-сонли қарорини бекор қилиш ва унга нисбатан юритилган маъмурий ҳуқуқбузарлик тўғрисидаги ишни МЖтКнинг 271-моддаси 1-бандига асосан тугатишни лозим, деб топди.

Жорий йилнинг 5 июнь куни Халқ таълими вазирлигининг расмий сайтида Тошкент вилояти Зангиота тумани ҳокимининг ўринбосари Бахтиёр Мамадалиев ўқитувчиларни мажбурий обуна ва меҳнатга жалб қилгани учун 15 миллион 610 минг сўм жаримага тортилгани ҳақида хабар эълон қилинган эди.

Вазирлик ахборотида бу иш Халқ таълими вазири Назорат-ҳуқуқий хизмати ҳамда Тошкент вилояти Бандлик бош бошқармаси Давлат меҳнат инспекцияси ҳамкорлигида амалга оширилгани қайд этилган.

Мазкур хабарлар тарқалгач, ҳоким ўринбосари Б.Мамадалиев ўзига нисбатан чиқарилган қарордан норози бўлиб, судга мурожаат қилган.

Тошкент вилояти меҳнат инспекцияси Зангиота туман суди қарори устидан юқори инстанцияга шикоят киритишини билдирди.

Коронавирусдан даволанаётган 4 384 бемордан 52 нафарининг аҳволи оғир

Коронавирус юққан беморлардан 7 287 нафари соғайди, 52 бемор вафот этди.

Ўзбекистонда коронавирус инфекцияси қайд этилганлар сони, 10 июнь соат 10:00 ҳолатига кўра, 11 723 нафарни ташкил этмоқда. Сўнгги 12 соат ичида беморлар сони 159 нафарга кўпайди.

“Янги касалланиш ҳолатларининг 78 нафари Карантин марказидаги (барчаси хориждан келган) фуқаролар орасида, 29 нафари Тошкент шаҳрида, 10 нафари Сурхондарё вилоятида, 5 нафари Хоразм вилоятида ҳамда яна 5 нафари Жиззах вилоятида аҳоли орасида, 17 нафари Навоий вилоятида ва 15 нафари Самарқанд вилоятида коронавирусга чалинганлар билан мулоқотда бўлиб, карантинга олинган фуқаролар орасида аниқланган”, - дейилади хабарда.

Айни пайтда коронавирус юққан беморлардан 7 287 нафари соғайди, 52 бемор вафот этди.

Ҳозирда касалхоналарда 4 384 нафар бемор даволанмоқда. Улардан 42 нафари оғир, 10 нафари эса ўта оғир аҳволда.

52-ўлим. Зарафшонда 55 ёшли бемор вафот этди

9 июлда Ўзбекистонда коронавирусдан 6 киши вафот этгани хабар қилинган эди.

Навоий вилояти Зарафшон шаҳрида яшовчи 55 ёшли Ж.Ў., исмли эркак бемор коронавирусдан вафот этгани ҳақида Соғлиқни сақлаш вазирлиги 10 июлда хабар берди.

Унда 6 июль куни COVID-19 аниқланиб, шу куни Зарафшон шаҳридаги шифохонанинг реанимация бўлимига ётқизилган. Унга COVID-19 инфекциясининг оғир кечиши, икки томонлама пневмония, нафас етишмовчилигининг 3-даражаси ташхиси қўйилган.

У гипертония касаллиги, артериал гипертензия, юрак ишемик касаллиги, зўриқиш стенокардияси, семизлик каби ҳамроҳ касалликлар билан ҳам оғриган.

Касаллик ўткир нафас ва юрак қон-томир етишмовчилиги, ўпка артерияси тромбоэмболияси асорати билан кечган.

Ж.Ў., Ўзбекистонда коронавирусдан вафот этган 52-бемор бўлди. Аввалроқ 9 июлда Ўзбекистонда коронавирусдан 6 киши вафот этгани хабар қилинган эди.

Коронавирусдан вафот этганлар 51 нафарга етди. Бир кунда 6 бемор ўлди

Коронавирус вазияти мураккаблашгани ортидан Ўзбекистонда 10 июлдан карантин чоралари яна кучайтирилди.

Ўзбекистонда 9 июль давомида коронавирусга чалинган 6 киши вафот этди. Бу ҳақда Соғлиқни сақлаш вазирлиги хабар берди.

“Тошкент шаҳрида 2 нафар, Бухоро вилоятида 2 нафар, Жиззах ва Сурхондарё вилоятларида эса 1 нафардан, жами 6 нафар коронавирусга чалинган бемор вафот этди”, -дейилади хабарда.

Бухорода ўлганлардан бири Афғонистон фуқаросидир. Бундан ташқари Тошкентнинг Учтепа туманида яшовчи 83 ёшли Ш.Т.,исмли аёл, Тошкент шаҳри Шайхонтоҳур туманида яшовчи 51 ёшли Р.Н. исмли эркак, Жиззах шаҳрида яшовчи 28 ёшли М.О., исмли аёл, Бухоро вилоятининг Шофиркон туманида яшовчи 53 ёшли Н.С., исмли аёл, Сурхондарё вилояти Музработ туманида яшовчи 35 ёшли С.С., исмли эркак вафот этган.

Бу билан Ўзбекистонда коронавирусдан вафот этганлар сони 51 кишига етди.

Айни пайтда тиббиёт муассасаларида даволанаётган беморлардан 42 нафари оғир, 10 нафари эса ўта оғир аҳволда.

Давомини ўқинг

Кўрмай қолган бўлсангиз

XS
SM
MD
LG