Линклар

Шошилинч хабар
08 май 2021, Тошкент вақти: 02:13

Ўзбекистон хабарлари

Жиззах шаҳрида карантин талаблари кучайтирилди

Жиззахда карантин чораларини кучайтириш 4 июлдан бошланди.

Жиззах вилоят ҳокими Э. Солиевнинг Жиззах шаҳрида карантин талабларини кучайтириш тўғрисидаги қарори матни 7 июль куни ҳокимлик расмий сайтида эълон қилинди.

Хабарда айтилишича, вилоят ҳудудида сўнгги кунларда коронавирусга чалинган беморлар сони ортиб бораётгани, вилоятнинг айрим туманлари “қизил” тоифага киритилгани муносабати билан Жиззах шаҳрида 4 июль соат 00:01дан бошлаб карантин чоралари кучайтирилган.

Қарорга асосан Жиззах шаҳрига кириш ва чиқишда қўшимча йўл патруль хизмати стационар постлари ва блок постлари ташкил этилади. Шаҳарга кираётган ва чиқаётган шахсларда коронавирус инфекцияси аломатларини аниқлаш бўйича мажбурий тиббий назорат ўрнатилади.

Жиззах шаҳридаги “Ёшлар шаҳарчаси”, “Истиқлол” ва “Ўрда” экологик истироҳат боғлари фаолияти тўхтатилади ва фуқароларнинг боғ ҳудудига кириши тақиқланади.

Жиззах шаҳрида автотранспорт воситаларининг махсус рухсатномасиз фақат куннинг муайян вақтида соат 07:00дан – 10:00гача ва 17:00дан – 20:00гача ҳаракатланишига рухсат этилади.

Шаҳарда жамоат жойларида соат 07:00дан 23:00га қадар уч кишидан ортиқ тўпланиш ҳамда 23:00дан 07:00га қадар кўчаларда, кўп қаватли уйлар ва ҳовлилар олдида бўлиш тақиқланади.

Бундан ташқари вилоят марказида барча савдо шохобчалари, чойхона, ресторан, кафе ва бошқа умумий овқатланиш жойлари, сартарошхона ва гўзаллик салонлари ҳамда ўқув курслари фаолияти тўхтатилади.

Кун янгиликлари

ССВ: COVID-19 дан бир кунда уч киши вафот этди, қурбонлар сони 660 нафарга етди

Ўзбекистонда ўтган кеча-кундузда коронавирусга чалинган беморлардан уч нафари вафот этган, шу тариқа COVID-19 қурбонларининг умумий сони 660 нафарга етган. Бу ҳақда Соғлиқни сақлаш вазирлиги матбуот хизмати маълумот тарқатди.

Вазирлик қайдича, 2021 йил 6 май ҳолатига кўра, мамлакатда коронавирус инфекцияси қайд этилганлар сони 93 минг 597 нафарни ташкил этган.

ССВ кеча Ўзбекистоннинг истисносиз барча ҳудудларида 421 киши коронавирус юқтириб олганини билдирган.

Айни пайтда пайшанба куни Қорақалпоғистон Республикаси, Андижон, Жиззах, Қашқадарё, Навоий, Наманган, Самарқанд, Сирдарё, Фарғона, Хоразм, Тошкент вилоятлари ва Тошкент шаҳрида 363 нафар бемор тузалиб, соғайганларнинг умумий сони 89 минг 338 нафарни ташкил этган.

Вазирлик тиббиёт муассасаларида ҳозирда муолажа олаётган беморлар сони 3599 нафарга етганини қўшимча қилган.

Мирзиёев келгусида ҳокимлардан ҳам чет тилини билиш талаб қилинишини билдирди

Ўзбекистон президенти Шавкат Мирзиёев

Ўзбекистонда келгуси йилдан бошлаб давлат идораларига ишга қабул қилиш ва янги лавозимга тайинлашда хорижий тилни билиш мажбурий бўлади. Бу ҳақда, Газета.uz хабарига кўра, президент Шавкат Мирзиёев 6 май куни чет тилларини ўқитиш тизимини такомиллаштириш чора-тадбирлари юзасидан ўтказилган видеоселектор йиғилишида билдирган.

Йиғилишда президент хорижий тилларни ўрганиш бўйича қишлоқ хўжалиги каби кластер тизимини жорий қилиш зарурлигини таъкидлаган.

“Ишга қабул қилишда чет тилини билиш мажбурий бўлади. Ҳокимлар ҳам энди чет тилини билиши керак”, деган Ш. Мирзиёев.

Унга кўра, чет тилини чуқур эгаллаган ходимларнинг иш ҳақига 20 фоизгача қўшимча устама белгилаш тартиби жорий этилади.

Аввалроқ Озодлик президент Мирзиёев 6 май кунги видеоселекторда Вазирлар Маҳкамаси ҳузурида Хорижий тилларни ўрганишни оммалаштириш агентлиги ташкил этилишини очиқлагани ҳақида хабар қилган эди.

Пойтахт ҳокимлиги: “Ўлмас полк” акциясига ҳеч бир мутасадди ташкилот рухсат бермаган

Тошкентда 2016 йили рухсатсиз ўтказилган "Ўлмас полк" акцияси иштирокчилари

“Ўлмас полк” акцияси ташкилотчилари мурожаат қилган ҳеч бир мутасадди ташкилот мазкур оммавий тадбирни ўтказишга рухсат берган эмас. Бу ҳақда Тошкент шаҳар ҳокимлиги матбуот хизмати маълум қилди.

Аввалроқ Ўзбекистонда фаолият юритувчи русийзабон сайтларда, хусусан, Podrobno.uz нашрида ҳокимлик мазкур акцияни ўтказиш бўйича Тошкент шаҳар Ички ишлар бош бошқармасига буйруқ бергани иддао этилмиш хабарлар ёйинланганди.

Тошкент шаҳар ҳокимлиги вакилларига кўра, аслида Тошкент шаҳар ҳокимининг ўринбосари М. Муҳитдинов пойтахтда “Ўлмас полк” (хабарномада “Бессмертный полк” деб ёзилган – таҳр.) акциясини ўтказиш бўйича қилинган мурожаатни ўрнатилган тартибда Тошкент шаҳар ИИББ ва ЙҲХБга йўналтирган.

Бироқ Интернетдаги хабарда ёзилганидек, мазкур мурожаатга “Принять к исполнению в установленном порядке” тарзида эмас, балки “Ўрнатилган тартибда кўриб чиқилсин”, яъни “Рассмотреть в установленном порядке” дея имзо чекилган”, дейилган ҳокимлик хабарномасида.

Ҳокимлик матбуот хизмати бу ўринда мутасадди раҳбарнинг топшириғини нотўғри таржима қилиш оқибатида англашилмовчилик юзага келгани, натижада кенг жамоатчиликка “мутасаддилар мазкур акцияни ўтказиш учун рухсат беришган бўлса-да, ҳуқуқ-тартибот идоралари бунга қарши чиқмоқда” деган мазмунда асоссиз хабар тарқатилганига эътибор қаратган.

Пойтахт ҳокимлиги қайдича, “Ўлмас полк” акцияси ташкилотчилари мурожаат қилган ҳеч бир мутасадди ташкилот томонидан бугунги пандемия шароитида мазкур оммавий тадбирни ўтказишга рухсат берилмаган.

Республика махсус комиссияси қарорига асосан жорий йил 1 майидан бошлаб Ўзбекистонда турли оммавий тадбирлар, хусусан, концерт дастурлари, байрам томошалари ва оммавий юришларни ўтказиш вақтинчалик тўхтатилганини урғулаган ҳокимлик “бундай чекловлар юзлаб одамлар иштирок этиши кўзда тутилган “Ўлмас полк” оммавий тадбирига ҳам дахлдор эканини унутмаслик лозим”лигини қўшимча қилган.

“Ўлмас полк” тадбири Ўзбекистон президентининг шу йил 20 апрелидаги қарорига илова қилинмиш “9 май — Хотира ва қадрлаш куни, умумхалқ байрамига бағишланган тадбирларга тайёргарлик кўриш ва уларни ўтказиш дастури”дан ҳам ўрин олган эмас. Республика махсус комиссияси қарорига мувофиқ эса Хотира ва қадрлаш кунии билан боғлиқ оммавий тадбирларни карантин талабларига қатъий риоя этган ҳолда амалга ошириш зарур ва бунда байрам дастурида назарда тутилмаган бошқа ҳар қандай оммавий тадбирни ўтказиш тақиқланади.

Аввалроқ Озодлик Россияда бу йил ҳам ўтган йили бўлганидек 9 май - Ғалаба куни “Ўлмас полк” маршисиз нишонланиши, ташкилотчилар буни коронавирус тарқалишининг олдини олиш чора-тадбирлари билан изоҳлашгани ҳақида хабар қилган.

Хусусий секторга ҳайдовчилик гувоҳномалари учун имтиҳон ўтказиш ҳуқуқи берилди

Иллюстратив сурат

Ўзбекистонда жорий йил 1 июнидан автомототранспорт воситалари ва шаҳар электр транспорти воситалари ҳайдовчиларини тайёрлаш, қайта тайёрлаш ва уларнинг малакасини ошириш бўйича нодавлат таълим хизматлари кўрсатиш фаолияти учун лицензияга эга тадбиркорларга барча тоифадаги автомототранспорт воситаларини бошқариш ҳуқуқини берувчи ҳайдовчилик гувоҳномасини олиш учун назарий ва амалий имтиҳонларни ўтказиш ҳуқуқи берилди.

Бу ҳақда ҳукуматнинг 4 майда қабул қилинган “Автомототранспорт воситаларини бошқариш ҳуқуқини берувчи ҳайдовчилик гувоҳномаларини олиш учун имтиҳонларни ўтказиш соҳасига хусусий секторни жалб этишга доир қўшимча чора-тадбирлар тўғрисида”ги қарорида айтилган.

Адлия вазирлигига қарашли “Ҳуқуқий ахборот” Телеграм-канали ҳайдовчилик гувоҳномасини олиш учун имтиҳонлар авваллари Ички ишлар вазирлиги Давлат йўл ҳаракати хавфсизлиги хизмати ва унинг ҳудудий бўлинмалари томонидан амалга оширилиб келинганига эътибор қаратган.

Қайд этилишича, мазкур тартиб троллейбус ва трамвай транспорт воситаларини бошқариш ҳуқуқини берувчи ҳайдовчилик гувоҳномасини олиш учун татбиқ этилмайди.

Наманганда сел туфайли темир йўл изи кўмилиб қолди, Тошкент-Андижон рейси бир кунга бекор қилинди

Намангандаги сел шикаст етказган йўллардан бири (ИИВ ЙҲХББ фотоси)

Наманган вилоятидаги “Поп – Қўшминор 2” темир йўл бекатлари оралиғининг 106 километрида темир йўл изини лой аралашмаси кўмиб ташлагани туфайли темир йўлда поездлар ҳаракати чекланган. Бу ҳақда маълумот тарқатган Ички ишлар вазирлиги Йўл ҳаракати хавфсизлиги Бош бошқармаси бунга 6 май куни ҳудудда кузатилган сув тошқинини сабаб ўлароқ келтирган.

ЙҲХББ кечаги сел важидан вилоятнинг айрим жойларидаги автомобиль йўлларида ҳам чеклов жорий этилганини билдирган.

Айни пайтда “Ўзтемирйўлйўловчи” акциядорлик жамияти Фарғона водийсида кузатилаётган ноқулай об-ҳаво шароити ҳамда сел туфайли 7 май куни 60-сонли Тошкент – Андижон йўловчи поездининг ҳаракатланиши 1 рейсга бекор қилиниши ҳақида маълум қилган ҳамда йўловчиларга сотиб олинган чипталар пулини тўлиқ қийматда вокзаллар чиптахоналаридан қайтариб олишлари ёки бошқа санага алмаштиришлари мумкинлиги эслатган.

Темирйўлчилар қайдича, мазкур вазият Фарғона водийсига ва у ердан бошқа вилоятларга ҳаракатланаётган барча йўловчи поездларнинг ҳаракат жадвалига ҳам таъсир кўрсатиши мумкин.

Президент чет тилларни ўрганиш агентлиги ташкил этиш тўғрисида кўрсатма берди

Маҳаллий матбуотнинг хабар беришича, 6 май куни президент ўтказган видеселектор йиғилишида Вазирлар Маҳкамаси ҳузурида Хорижий тилларни ўрганишни оммалаштириш агентлиги ташкил этилиши ҳақида маълум қилинди.

Шавкат Мирзиёев йиғилишда янги ташкил этиладиган агентлик боғча, мактаб, лицей, олийгоҳ ва ўқув марказларида камида 10 та чет тилини, жумладан, инглиз, рус, немис, француз, хитой, корейс, япон, турк, араб, форс тилларини ўргатишни ташкиллаштириши зарур эканини таъкидлади.

Бундан ташқари агентлик болаликдан хорижий тилларни пухта ўрганиш кўникмаларини шакллантирадиган анимацияларни, видеороликларни, мобиль ўйинларни ва кўнгилочар кўрсатувларни ишлаб чиқариши шарт бўлади.

Президент Шавкат Мирзиёев коллеж ва олийгоҳлар битирувчилари камида 2 та чет тилини мукаммал билиши шартлиги тўғрисидаги талабни ҳам кун тартибига қўйди.

“Биз рақобатдош давлат қуришни ўз олдимизга мақсад қилиб қўйган эканмиз, бундан буён мактаб, лицей, коллеж ва олийгоҳ битирувчилари камида 2 та чет тилини мукаммал билишлари шарт. Бу қатъий талаб ҳар бир таълим муассасаси раҳбари фаолиятининг асосий мезонига айланиши лозим”, — деб иқтибос келтирди Шавкат Мирзиёев сўзларидан “Газета уз”.

Навоийда автоавария оқибатида уч киши ҳалок бўлди

2021 йилнинг дастлабки икки ойида аварияларда 265 киши ўлган.ИИВ ЙҲХББ ахборот хизмати инфографикаси.

Навоий вилоятида автоҳалокат оқибатида уч киши вафот этгани тўғрисида Zamon uz 6 май куни хабар берди.

Билдирилишича, 3 май куни соат 21:00 ларда Қизилтепа тумани ҳудудидан ўтган Когон-Қизилтепа-Тошробод-Янгиқурғон автомобиль йўлида Tracker-2 русумли автомашина ҳайдовчиси бошқарувни йўқотган. Оқибатда автомашина йўл четига ағдарилган.

Авария оқибатида воқеа жойида 2 киши ҳалок бўлди, яна бир киши касалхонада кўз юмди.

Ўзбекистон автоавариялар натижасида ўлим ҳолатлари кўп юз берадиган давлатлар қаторига киради.

Масалан, ИИВ ЙҲХББ ахборот хизмати март ойида 2021 йилнинг январь—февралида содир этилган йўл-транспорт ҳодисаларида 265 киши ҳалок бўлгани ва 724 киши тан жароҳатлари олганини билдирган.

Ўзбекистонда 2020 йилда авариялар оқибатида жами 1962 киши ҳалок бўлган.

1 майдан “боғча пули” 15 фоизга оширилганининг сабаби маълум қилинди

Озиқ-овқат маҳсулотлари нархининг ошгани муносабати билан болалар боғчаларига ота-оналар тўлайдиган ҳақ миқдори ҳам 15 фоизга кўпайтирилди. Бу ҳақда Мактабгача таълим вазирлиги расмийлари АОКАда ўтган брифингда маълум қилди.

Аввалроқ 1 майдан бошлаб давлатга қарашли болалар боғчаларида “боғча пули ўртача 15 фоизга оширилгани” хабар қилинган эди.

Билдирилишича, айни пайтда пойтахт Тошкента “боғча пули” ойига ўртача 246 минг сўмни, вилоятларда эса ўртача 167 минг сўмни ташкил этмоқда.

Давлат статистика қўмитаси 2020 йилда озиқ-овқат маҳсулотларининг нархи ўртача 15,3 фоизга ошганинини билдирган эди.

Аввалроқ Озодлик радиоси Молия вазирлигининг UzASBO тизимида рўй берган техник узилиш сабаб мамлакатдаги айрим болалар боғчаларида озиқ-овқат муаммоси юзага келгани ҳақида мақола эълон қилган.

Ички ишлар ходими кийимида рақс тушган йигит қамалди

2 май куни ижтимоий тармоқда тарқатилган видеодан скриншот.

Тошкент вилоятида ички ишлар ходими кийимида рақсга тушган 21 ёшли йигит 7 суткага қамалди. Бу ҳақда Ички ишлар вазирлиги матбуот хизмати 5 май куни маълум қилди.

Расман билдирилишича, йигит сартарош бўлиб ишлаган. У 2 май куни “Янгиобод” бозорида ички ишлар ходими формаси сотилаётганини кўрган ва уни харид қилган. Шундан сўнг у формани кийиб, ўзи ишлайдиган сартарошхонада рақсга тушиб видеога олган ҳамда мазкур видеони танишларига жўнатган.

“Ҳолат бўйича ўтказилган суриштирув давомида ИИО ходими йигитдан вазиятга ойдинлик киритишни сўраганида, у ходимга қаршилик кўрсатган”,-дейилади хабарда.

Хабарда таъкидланишича, жиноят ишлари бўйича Тошкент вилояти Юқори Чирчиқ туман суди йигитга 7 сутка маъмурий қамоқ жазоси тайинлади.

Коронавирусга чалинганлар сони 93 мингдан ошди, эмланганлар сони 1 миллионга яқинлашди

Ўзбекистонда шу кунгача коронавирус инфекциясига қарши эмлаш жараёнида 1 миллион 9 минг 510 доза вакцинадан фойдаланилган.

Соғлиқни сақлаш вазирлиги маълумотига кўра, 5 май куни мамлакат бўйлаб жами 45 минг 616 доза вакцина қўлланилган, улардан биринчи босқич эмланганлар 34 минг 89 нафарни, иккинчи босқичда эмланганлар эса 11 минг 527 нафарни ташкил қилган.

Айни пайтгача фойдаланилган 1 миллион 9 минг 510 доза вакцинадан 32 минг 533 дозаси иккинчи босқичда қўлланилгани эътиборга олинса, биринчи босқичда эмланган сони 976 минг 977 нафар экани маълум бўлади.

Бу орада Ўзбекистонда коронавирус инфекцияси қайд этилганлар сони, 2021 йил 5 май ҳолатига кўра, 93 минг 176 нафарга етган.

ССВ қайдича, ўтган кеча-кундузда мамлакатнинг истисносиз барча ҳудудларида 452 киши коронавирус юқтириб олган, бу рақам эса жорий йил ҳисобидан янги аксилрекорд бўлиб ҳисобланади.

Айни пайтда чоршанба куни Қорақалпоғистон Республикаси, Бухоро, Жиззах, Қашқадарё, Навоий, Наманган, Самарқанд, Сурхондарё, Фарғона, Хоразм, Тошкент вилоятлари ва Тошкент шаҳрида 440 нафар бемор тузалиб, соғайганларнинг умумий сони 88 минг 975 нафарни ташкил этган.

Вазирлик тиббиёт муассасаларида ҳозирда 3544 нафар бемор муолажа олаётганини билдирган, қурбонларнинг умумий сони эса, сўнгги расмий маълумотларга кўра, 657 нафарга етган.

МБ Ўзбекистонда ипотека кредитлари ҳажми кескин ошишига сабаб бўлган омилларни санади

Андижонда сўнгги йилларда қурилган кўп қаватли уйлар

Ўзбекистонда кейинги йилларда ипотека кредитлари ҳажмининг кескин ошишига уй-жойга бўлган талабнинг ошиб бориши ҳамда аҳолини уй-жой билан таъминлашга қаратилган чора-тадбирларнинг амалга оширилиши сабаб бўлган. Бу ҳақда Марказий банк томонидан 5 май куни тақдим этилмиш 2020 йил ва 2021 йилнинг I чораги учун “Ипотека кредитлари таҳлили”да айтилган.

Ҳисоботда қайд этилишича, ипотека кредитлари қолдиғи 2018 йил 1 январь ҳолатига 9,7 триллион сўмни ташкил этган бўлса, 2021 йил 1 январь ҳолатига 3 баробарга кўпайиб, 28,3 триллион сўмга етган. Ипотека шартномалари сони эса 121,7 минг донадан 238,4 минг донага етиб, қарийб 2 баробарга ошган.

МБ ипотека кредитлари ҳажми ва унга бўлган талабнинг ошишига қуйидаги омилларни сабаб ўлароқ келтирган:

  • мамлакатда аҳоли сонининг ўсиб бориши;
  • республикада инвестицион фаоллик ва уй-жой қурилиши суръатларининг ошгани;
  • аҳоли реал даромадларининг (сўнгги 4 йилдаги ўртача йиллик ўсиш 6,9 фоизга тенг) ошиб бораётгани;
  • амалга оширилаётган ислоҳотлар натижасида ҳудудларда урбанизация даражасининг ортиб бориши ва уй-жой қурилиши учун зарур инфратузилмаларнинг кенгайиши;
  • бозор тамойилларига асосланган ипотека кредитлари орқали аҳолини уй-жой билан таъминлаш тизимининг жорий этилиши натижасида тижорат банклари ипотека кредитлари ажратиш учун барқарор ресурс манбаи билан таъминланаётгани;
  • якка тартибдаги уй-жой қурилиши учун ва улушдор жисмоний шахсларга ажратиладиган ипотека кредитларининг соддалаштирилгани.

Марказий банк 2017-2020 йиллар мобайнида жами 220,2 минг нафар фуқарога умумий қиймати 25,8 триллион сўм миқдорида ипотека кредитлари ажратилганига эътибор қаратган.

“Виждон эркинлиги ва диний ташкилотлар тўғрисида”ги янги қонун қуйи палатада қабул қилинди

Ўзбекистонда бундан буён диний ташкилотларни рўйхатдан ўтказиш электрон тизим орқали амалга оширилиши кутилмоқда. Мазкур тартиб Қонунчилик палатаси томонидан сўнгги кунлар ичида кўриб чиқилиб, учинчи ўқишда қабул қилинган “Виждон эркинлиги ва диний ташкилотлар тўғрисида”ги қонун лойиҳасида акс этган.

Палата матбуот хизмати қайдича, янги қонунда виждон эркинлиги ва диний ташкилотлар тўғрисидаги қонун ҳужжатларини қўллашда мавҳум бўлган айрим диний атамаларга ойдинлик киритиш, диний ташкилотларнинг ҳуқуқ ва мажбуриятларини аниқ белгилаш орқали уларнинг эркин фаолиятини янада кафолатлаш, диний ташкилотни тузиш ва давлат рўйхатидан ўтказиш тартибини соддалаштириш, уни давлат рўйхатидан ўтказишда рад этиш асосларини аниқ кўрсатиш, бу соҳада тегишли давлат органларининг ваколатларини белгилаш, диний ташкилотни тугатиш, диний ташкилотларнинг ўтказилиши режалаштирилган тадбирлари ҳақида хабардор қилиш, диний мазмундаги материалларни тайёрлаш, олиб кириш, тарқатиш ва уларни давлат диншунослик экспертизасидан ўтказиш тартиблари каби нормалар ўз аксини топган.

Маҳаллий нашрларга кўра, янги қонун лойиҳасида фуқароларнинг жамоат жойларида ибодат либосларида юришларига йўл қўйилмаслигига оид чеклов ҳам олиб ташланган.

Айни пайтда, kun.uz нашрининг ёзишича, айрим депутатлар ушбу қонунга узвий боғлиқ бўлган Маъмурий жавобгарлик тўғрисидаги кодекснинг 184-1-моддаси ўз кучида қолаётганига эътибор қаратганлар. Агар жамоат жойларида ибодат либосида юришга доир чекловлар олиб ташланса, бу модда янги қонунга тескари кучда бўлиб қолади. Шу сабабли депутатлар Дин ишлари бўйича қўмитага МЖтКдаги мазкур моддани бекор қилиш бўйича таклиф ишлаб чиқиш ва бу борадаги ишларда ташаббускор бўлишлари кераклигини қайд этганлар.

Ҳужжат билан диний ташкилотни рўйхатдан ўтказиш бўйича берилган аризани кўриб чиқиш муддати уч баравар қисқартирилиб, уч ойдан бир ойга туширилган. Бу ва бошқа кўплаб ўзгартишларни ўз ичига олган янги қонун кучга кириши учун эндиликда Сенат томонидан маъқулланиб, президент томонидан имзоланиши лозим. Бу ишлар амалга ошган тақдирда, шу кунда амалда бўлган “Виждон эркинлиги ва диний ташкилотлар тўғрисида”ги қонун ўз кучини йўқотади.

Эслатиб ўтамиз, АҚШ Давлат департаменти ўтган йил декабрида Ўзбекистонни диний эркинлик бўйича махсус кузатувдаги давлатлар рўйхатидан чиқарган. Бироқ АҚШнинг Халқаро диний эркинликлар бўйича комиссияси (USCIRF) жорий йил апрель ойида Ўзбекистонни махсус кузатувдаги давлатлар рўйхатига қайтаришни тавсия қилганди. Комиссиянинг бундай хулосага келишига асосан қонунчиликдаги муаммолар, хусусан “Виждон эркинлиги ва диний ташкилотлар тўғрисида”ги қонуннинг янги таҳрирдаги лойиҳаси халқаро стандартларга мос келмаслиги сабаб бўлгани билдирилганди.

ДСҚ ўз ходимларининг даромад ва активларини мажбурий декларациялашни таклиф этди

Давлат солиқ қўмитаси биноси

Давлат солиқ қўмитаси солиқ хизмати ходимлари томонидан ҳар йили даромадлари ва эгалигида бўлган активлар тўғрисида декларация тақдим этиш бўйича мажбурий талабни белгилашни назарда тутувчи норматив-ҳуқуқий ҳужжат лойиҳасини ишлаб чиққан. Бу ҳақда ДСҚ матбуот хизмати маълумот тарқатди.

Қайд этилишича, лойиҳада давлат солиқ хизмати органларининг барча ходимлари 2020 йилда олган даромадлари ва эгалигида бўлган активлари тўғрисида 2021 йилнинг 1 сентябрига қадар ҳамда келгуси йилдан бошлаб ҳар йили 1 апрелга қадар декларация тақдим этиши назарда тутиляпти.

Бундан ташқари, “Давлат солиқ хизмати тўғрисида”ги Қонунига давлат солиқ хизмати органларининг барча ходимлари зиммасига декларация топшириш талабини юклаш ва ушбу талабга риоя қилмаганлик учун жавобгарлик белгилашни назарда тутувчи ўзгартириш киритилади.

“Эндиликда давлат солиқ хизмати органининг ҳар бир ходими кўчар ва кўчмас мулклари, бошқа активлари, шунингдек ҳисобот йилида олган даромадлари тўғрисидаги маълумотларни кўрсатган ҳолда декларация тақдим этиши шарт бўлади”, дейилган хабарномада.

Декларацияларни қайта ишлаш натижасида олинган ахборотлар шахсга доир маълумотлар тўғрисидаги қонунчилик талабларидан келиб чиқиб, жамоатчилик учун очиқ ҳолда махсус ochiq.soliq.uz веб-сайтига жойлаштириш таклиф этилган.

Аввалроқ Озодлик бош вазир ўринбосари – инвестициялар ва ташқи савдо вазири Сардор Умурзоқов амалдорларнинг харажатлари, уйи, машинаси, кийим-кечагу соатигача назорат қилиниши лозимлиги ҳақида гапиргани, ундан кейин адлия вазири Русланбек Давлетов Ўзбекистонда бюджет пуллари сарфланиши шаффофлиги таъминланиши, шу билан бирга, амалдорларнинг кўчмас мулк ва машиналари тўғрисидаги маълумотлар очиқланиши кераклигидан баҳс этгани хусусида хабар қилганди.

Куздан бошлаб ҳайдовчилардан қоғоз шаклидаги ишончнома талаб қилинмайди

Ўзбекистонда автомототранспортни бошқариш учун ишончнома (нотариал тартибда тасдиқланган), техник кўрикдан ўтказилганлиги тўғрисидаги маълумот, автотранспорт воситалари ойналарининг тусини ўзгартиришга (қорайтиришга) рухсатнома электрон шаклга ўтказиш орқали жорий йил 1 сентябридан мазкур ҳужжатларни ҳайдовчидан талаб этиш тартиби бекор қилинади. Янги тартиб ҳукуматнинг шу йил 4 майида қабул қилинган “Йўл ҳаракати хавфсизлиги соҳасида давлат хизматлари кўрсатиш тартиб-таомилларини соддалаштириш чора-тадбирлари тўғрисида”ги қарорида акс этган.

Қарорга мувофиқ, 2021 йил 1 августидан қуйидаги давлат хизматлари Ягона интерактив давлат хизматлари портали (ЯИДХП) орқали кўрсатилади:

автомототранспортлар ва шаҳар электр транспортлари ҳайдовчиларини тайёрлаш, қайта тайёрлаш ва уларнинг малакасини ошириш бўйича нодавлат таълим хизматлари кўрсатувчи юридик шахсларнинг ўқув гуруҳларини рўйхатга олиш;

автомототранспортлар ва шаҳар электр транспортлар ҳайдовчилигига номзодлардан имтиҳонларни қабул қилиш учун ҳужжатларни ва миллий ҳайдовчилик гувоҳномасини расмийлаштириш.

Айни пайтда 2022 йил 1 августидан ўқув гуруҳларини рўйхатга олиш, шунингдек, ҳайдовчиликка номзодлардан имтиҳонларни қабул қилиш учун ҳужжатларни ва миллий ҳайдовчилик гувоҳномасини расмийлаштириш учун барча тегишли ҳужжатлар фақат ЯИДХП орқали тақдим этилиши белгиланган.

АҚШ Оролбўйига 3 миллион долларлик инсонпарварлик ёрдами жўнатди

Орол денгизи ҳудуди.

АҚШнинг Project C.U.R.E ширкати ташаббуси билан Сиэтл шаҳридан Қорақалпоғистон аҳолиси учун хайрия лойиҳаси доирасида биринчи гуманитар ёрдам жўнатилди.

Ўзбекистон Ташқи ишлар вазирлигига қарашли “Дунё” ахборот агентилигининг 4 майда билдиришича, мазкур лойиҳа Boeing ширкати билан ҳамкорликжда амалга оширилмоқда.

Гуманитар ёрдамнинг биринчи партияси 3 миллион долларлик тиббиёт буюмлари ва жиҳозлари, сунъий шамоллатиш мосламаларини ўз ичига олган 40 футлик ўнта контейнер ташкил қилди

“Ушбу юкни Канзас-ситидан Сиэтлга (3 минг километр) Пенсильвания штатидаги ўзбеклар диаспораси фаолларидан бири, логистика компанияси асосчиси Аҳмаджон Одилов беғараз амалга оширди. Бундан ташқари, АҚШдаги ватандошлар томонидан асос солинган «Give to Get International» хайрия ташкилоти кўмагида мустақил экспертларнинг Қорақалпоғистондаги тиббиёт муассасаларининг эҳтиёжларини баҳолаш бўйича харажатлари тўланди”, - дейилади хабарда.

Аввалроқ мазкур юк Ўзбекистон учун Boeing ишлаб чиқарган Dreamliner учоғи орқали Тошкентга етказиб берилиши маълум қилинган эди.

Ис газидан заҳарланиб ўлганлар ҳақида давлат қўмитаси президентга қарши маълумот берди

Саноат хавфсизлиги давлат қўмитаси маълумотида ис газидан ўлганлар сони президент айтганидан анча кам.

Ўзбекистонда 2020 йилда ис газидан заҳарланиш бўйича 70 та ҳолат қайд этилди. Заҳарланиш оқибатида 66 кишининг соғлиғига зарар етди, 91 киши вафот этди.

Саноат хавфсизлиги давлат қўмитасининг билдиришича, 2020 йилда ис газидан ўлганлар сони 2019 йилга нисбатан 41 кишига кўп бўлган. 2019 йилда ис газидан заҳарланиш бўйича 31 та ҳолат рўйхатга олинган, 21 киши жароҳат олган, 50 киши ўлган эди.

Мазкур муаммо 2020 йил 16 декабрида президент Шавкат Мирзиёев раислигида ўтган видеоселектор йиғилишида ҳам қайд этилган эди.

Йиғилишда президент 2020 йилда рўй берган 56 та ис газидан заҳарланиш ва 106 та чақнаш ҳолати оқибатида 106 нафар фуқаро вафот этгани, 190 нафари заҳарлангани ва куйиш тан жароҳатини олганини таъкидлаган.

Uzbekistan Airways АҚШдан яна бир Dreamliner учоғини қабул қилиб олишга ҳозирланмоқда

Uzbekistan Airways тасарруфидаги Boeing 787-8 Dreamliner учоқларидан бири

Uzbekistan Airways авиаширкати 5 май куни еттинчи Dreamliner учоғини қабул қилиб олади. Бу ҳақда Ўзбекистоннинг АҚШ ва Канададаги элчиси Жавлон Ваҳобов Фейсбукдаги ўз саҳифаси орқали маълум қилган.

Маълумотларга кўра, Сиэтлдан Тошкентга чоршанба куни етиб келадиган учоқ Ўзбекистон авиаширкати учун Boeing заводида тайёрланган Dreamliner’ларнинг еттинчисидир.

Янги учоқ бортида Project C.U.R.E. хайрия ташкилоти номидан Оролбўйи аҳолисига инсонпарварлик ёрдами ўлароқ йўлланган юкни ҳам олиб келиши айтилмоқда. Юк умумий қиймати 3 миллион долларга тенг бўлган сунъий нафас олдириш аппаратлари, амбулатория жиҳозлари ва бошқаларни ўз ичига олган.

Бу орада ЎзА агентлиги галдаги Dreamliner Тошкент аэропортига етиб келгани, ҳисоб бўйича бу олтинчи Boeing 787-8 учоғи экани ҳақида хабар қилган.

Аввалроқ фуқаро авиацияси соҳасидаги янгиликлардан хабардор бўлган мулозимлар Озодлика қарзга ботган Uzbekistan Airways авиаширкати ўз ихтиёридаги 8 та учоқни сотмоқчи бўлгани, улардан иккитаси Dreamliner учоғи экани ҳақида билдиргандилар. Бироқ, сўнгги расмий маълумотларга кўра, авиаширкат 17 та учоғини сотувга қўйган, бундан 5 таси Boeing (757 ва 767), 12 таси Ил 76 ҳамда Ил-114 бўлиб, улар орасида Dreamliner йўқ.

Шароити танқид қилинган Китобдаги меҳрибонлик уйи тарбияланувчилари Қамашига кўчирилди

Китобдаги меҳрибонлик уйи биноси

Қашқадарё вилоятининг Китоб туманида жойлашган 5-меҳрибонлик уйи тарбияланувчилари Қамаши туманида жойлашган 4-меҳрибонлик уйига кўчирилган. Бу ҳақда Олий Мажлис Сенатининг Фан, таълим ва соғлиқни сақлаш масалалари қўмитаси раиси Одилжон Иминов маълум қилди.

Шароити ёмонлиги важидан Китобдаги меҳрибонлик уйи тугатилиши лозимлиги хусусида аввалроқ болалар омбудсмани Алия Юнусова билдирганди. Мулозима танқиди ортидан ўз вазифасига совуққонлик билан қараган 5-меҳрибонлик уйи директори ва омбор мудири ўз лавозимларидан озод қилингандилар.

Сенатор О. Иминовга кўра, юқори палата ишчи гуруҳи Китобдаги меҳрибонлик уйи бинолари таъмирталаб ҳолатда экани, тарбияланувчиларга берилаётган озиқ-овқат маҳсулотларининг сифати амалдаги санитария қоидалари ва меъёрлари талаблари асосида эмаслиги, тарбияланувчиларнинг бўш вақтларини мазмунли ўтказиш учун шароит етарли эмаслиги сабабли у ерда тарбияланаётган 65 нафар тарбияланувчини Қамаши туманидаги меҳрибонлик уйига ўтказиш мақсадга мувофиқлиги ҳақида вилоят ҳокимлиги мутасаддиларига тавсиялар берган.

Ишчи гуруҳи тавсиясига асосан, жорий йил 2 май куни Китоб туманидаги 5-сонли Меҳрибонлик уйи 65 нафар тарбияланувчиларининг 10 нафари яқин қариндошлари оиласига, 55 нафари Қамаши туманидаги 4-сонли Меҳрибонлик уйига кўчирилди”, дея маълум қилган сенатор Одилжон Иминов.

Суд ДСҚнинг депутат Р. Кушербаевга қарши даъво аризасини 12 майдан кўра бошлайди

Қонунчилик палатаси депутати Расул Кушербаев

Давлат солиқ қўмитасининг Олий Мажлис Қонунчилик палатаси депутати Расул Кушербаевга қарши даъво аризаси кўриб чиқиш иши шу йил 12 май куни соат 11:30 да Шайхонтоҳур туманлараро судида бошланади. Бу маълумот депутатга суд томонидан йўлланган чақирув қоғозида акс этган. Чақирув қоғози нусхаси журналист Хуршид Далиевнинг Телеграм-каналида эълон қилинган.

ДСҚ мулоҳазасича, депутат Р. Кушербаев “HUMAN.UZ” ахборот порталидаги “Сўз блогерларга” кўрсатувининг жорий йил 23 февралидаги сонида солиқ органлари ходимларини асоссиз айблаган ва уларнинг ишчанлик обрўсига путур етказган.

Қўмита депутатдан асоссиз иддаолари учун кечирим сўрашни ҳамда ўзига етказилган 4,6 миллиард сўмлик маънавий зарарни тўлаб беришни талаб қилмоқда.

Прокурор блогер Отабек Сатторийга 11 йиллик қамоқ жазоси сўради

Сурхондарёлик блогер Отабек Сатторий

Жиноят ишлари бўйича Музработ туман судида блогер Отабек Сатторий иши бўйича 4 май куни бўлиб ўтган маҳкамада сўз олган прокурор судланувчига 11 йиллик қамоқ жазоси берилишини сўради.

Танқидий чиқишлари билан танилган сурхондарёлик блогер Отабек Сатторийга Ўзбекистон Жиноят кодексининг 3 та моддаси билан жами 8 та айблов эълон қилинган.

Маҳаллий нашрлар хабарларига кўра, кечаги судда прокурор блогерга қўйилган айбловлардан учтасини рад этиб, бештаси бўйича айбдор деб топишни сўраган.

Судланувчи ўзига қўйилаётган айбловларни тан олмагани ва жабрланувчиларга етказилган зарарни қоплаб бермаганини урғулаган прокурор Отабек Сатторий ишида енгиллаштирувчи ҳолатлар йўқ деб ҳисобланиши лозимлигини билдирган.

Мазкур иш бўйича галдаги маҳкама шу йил 10 майига белгиланган.

Telegram ва YouTube порталидаги “Халқ фикри” видеоблогидаги танқидий чиқишлари билан танилган Отабек Сатторий шу йилнинг 30 январида Термиздаги уйидан фуқаро кийимидаги ходимлар томонидан олиб кетилганди.

Блогер устидан маҳкама жараёни 11 март куни Музработ туман судида бошланган.

Қатор халқаро ташкилотлар Ўзбекистон ҳукуматини ҳибсга олинган блогер Отабек Сатторийни озод қилишга чақирди. Ташкилотларнинг ишонишича, блогер коррупцияга қарши курашгани ортидан сохталаштирилган жиноят иши асосида қамоққа олинган.

Машҳур ўзбек боксчиси Мелиқўзиев 4 йилга дисквалификация қилинди

Бектемир Мелиқўзиев 2016 йилда Бразилияда ўтган Олимпиадада кумуш медаль соҳиби бўлган эди.

Ўзбекистонлик боксчи Бектемир Мелиқўзиев допинг истеъмол қилгани аниқлангани ортидан тўрт йил муддатга дисквалификация қилинди. Бу ҳақда Ўзбекистон Миллий антидопинг агентлигига Халқаро бокс федерацияси (AIBA) маълум қилди.

Маълум қилинишича, спортчи 2020 йил 16 февралдан бошлаб 2024 йил 15 февралга қадар барча спорт мусобақаларида иштирок этиш ҳуқуқидан маҳрум этилди.

Унинг 2020 йил 16 февралдан бошлаб мусобақаларда олган барча медаллари ва рейтинг очколари бекор қилинди. Шу билан бирга, Бутунжаҳон антидопинг кодексига кўра, Б. Мелиқўзиевнинг профессионал боксда чиқишларини давом этиши ёки этмаслиги тегишли Халқаро профессионал бокс ташкилотининг қарорига боғлиқ бўлади.

Бектемир Мелиқўзиевда дастлабки допинг - “фуросемид” тақиқланган моддаси аниқланганидан сўнг, у 2018 йил 28 февралдан 2020 йил 27 февралгача боксдан четлатилган эди. Аммо шунга қарамай унда 2019 йилнинг 21 октябри ва 2020 йил 16 февралидаги текширувларда яна допинг аниқланган.

Бектемир Мелиқўзиев 2016 йилда Бразилияда ўтган Олимпиадада кумуш медаль соҳиби бўлган эди. Мазкур Олимпиадада Ўзбекистон терма жамоаси сазовор бўлган 13 медалдан 4таси олтин, 2 таси кумуш ва 7таси бронзадир.

Ўшанда Ўзбекистон терма жамоаси Бразилия Олимпиадасида жами 13та медални қўлга киритиб, умумжамоа ҳисобида Олимпиадада медалларга сазовор бўлган 87 давлат орасида 21-ўринни эгаллаган эди.

Россия Миграция хизмати ходими ўзбекистонлик муҳожирни калтаклади

Иллюстратив сурат.

Россия Тергов қўмитасининг Томск вилоят бошқармаси 3 май куни Миграция хизмати ходими Ўзбекистон фуқаросини калтаклагани юзасидан текширув ўтказилаётганини маълум қилди.

Ташқи Меҳнат миграцияси агентлиги ҳам мазкур воқеага муносабат билдириб, “ҳар томонлама ва объектив текширув ўтказиш юзасидан Ўзбекистоннинг Россия Федерациясидаги Элчихонаси ҳамда Агентликнинг Россия Федерациясидаги ваколатхонаси томонидан Россиянинг ваколатли идораларига тегишли сўровномалар юборилгани” тўғрисида хабар берди.

“Мавжуд маълумотларга кўра, Россиянинг Тергов қўмитаси ва Ички ишлар вазирлиги ушбу воқеа бўйича текширув ишларини бошлаган. Амалга оширилган ишлар натижаси юзасидан қўшимча маълумот берилади”, - дейилади расмий хабарда.

2 май куни ижтимоий тармоқларда Россия Миграция хизмати ходими ўз ташкилоти биносида ўзбекистонлик эркакдан ҳайдовчилик гувоҳномасини кўрсатишни талаб қилгани, Ўзбекистон фуқароси эса унга паспортини кўрсатганини айтиб, ҳайдовчилик гувоҳномасини кўрсатишдан бош тортаётгани акс этган.

Шундан сўнг видео давомида ходим муҳожирни хоналардан бирига олиб киради ва хонада мавжуд бўлган бошқа одамлар кўз ўнгида ўзбекистонликни калтаклайди.

Мазкур воқеадан сўнг калтакланган Ўзбекистон фуқароси полицияга мурожаат қилган.

Ўзбекистонда коронавирусдан ўлганлар сони 655 кишига етди

Сўнгги бир сутка давомида 314 кишида коронавирус аниқланди.

Ўзбекистонда 3 май куни коронавирусдан яна икки киши вафот этди. Соғлиқни сақлаш вазирлигининг 4 май куни билдиришича, бу билан Ўзбекистонда коронавирусдан ўлганлар сони 655 кишига етди.

Сўнгги бир сутка давомида 314 кишида коронавирус аниқланди. Янги касалланганларнинг 188 нафари Тошкент шаҳрида, 39 нафари Самарванд вилоятида ва 32 нафари Тошкент вилоятида яшайди. Шу кунгача Ўзбекистонда коронавирусга чалинганлар сони 92 320 кишини ташкил қилмоқда.

Касалликдан соғайганлар жами 88258 нафарга етди ва соғайиш кўрсаткичи 96 фоизни ташкил қилмоқда. Айни пайтда тиббиёт муассасаларида 3407 нафар бемор даволанмоқда.

Электроникада янги йўналишга асос солган ўзбек академиги вафот этди

Ўткир Расулев 1939 йил 11 июлда Тошкент шаҳрида хизматчи оиласида туғилган.

Ўзбекистон Фанлар академияси академиги Ўткир Расулев 4 май куни 82 ёшида вафот этди. Академиянинг билдиришича, Ўткир Расулев Ўзбекистон Фанлар Академияси Президиуми аъзоси, Давлат мукофотлари совриндори бўлган.

1939 йил 11 июлда Тошкент шаҳрида хизматчи оиласида туғилган Ўткир Расулев 1956 йил Тошкентдаги 135-ўрта мактабни олтин медал билан тугатиб, Ўрта Осиё Давлат университетига ўқишга кирган.

Ўткир Расулев эмиссион электрониканинг мураккаб таркибли молекулаларнинг қаттиқ жисм сиртида ионлашиш каби янги йўналиши асосчиларидан бири бўлган.

1985—2007 йилларда Фанлар Академиясининг Электроника институти директори бўлган Ўткир Расулев раҳбарлигида сиртий ионлашув усуллари ва асбоблари кашф этилган. Бу кашфиёт Россия, Германия, АҚШ, Швейцария, Италия ва Ўзбекистонда патентлаштирилган.

Коронавирусга қарши эмланганлар сони 900 мингга етди, эмловнинг иккинчи босқичи бошланди

Ўзбекистон жорий йил 3 майигача коронавирус инфекциясига қарши эмланганлар сони 911 минг 811 нафарга етган, уларнинг 14 минг 285 нафари иккинчи босқичда эмланганлардир.

Соғлиқни сақлаш вазирлиги қайдича, душанба куни мамлакат бўйлаб жами 55 минг 795 нафар киши COVID-19 га қарши эмланган.

“Маълумки, вирусга қарши тўлиқ эмланиш учун инсон, вакцина турига қараб, икки ёки уч босқичда эмланиши керак. Шу йилнинг 1 майидан бошлаб вакцинанинг биринчи босқичини олган фуқароларни унинг иккинчи дозаси билан ҳам эмлаш бошланди”, дейилган ССВ хабарномасида.

Шу тариқа 3 май куни биринчи босқичда эмланганлар сони 47 минг 816 нафарни, иккинчи босқичда эмланганлар сони эса 7 минг 979 нафарни ташкил этган.

Ўзбекистонда коронавирусга қарши эмлаш кўрсаткичлари бўйича ҳамон Фарғона водийсида жойлашган вилоятлар олдинда кетяпти (Фарғона вилояти - 126 минг 27 нафар, Андижон вилояти 99 минг 797 нафар, Наманган вилояти - 98 минг 310 нафар), улардан кейинги ўринда эса Самарқанд вилояти (91 минг 887 нафар) бормоқда.

Давомини ўқинг

XS
SM
MD
LG