Линклар

Шошилинч хабар
27 сентябр 2020, Тошкент вақти: 06:30

“1000 ta jo‘ja spektakli”Rossiyada muhojirlikda yurgan mardikorning o‘g‘li ekani aytilgan "kambag‘al" mahalla raisining o‘g‘li bo‘lib chiqdi


Samarqand viloyati Pastdarg‘om tumani Qo‘qoni mahallasi raisi va tumani prokurori “1000 ta jo‘ja spektakli”ni namoyish etishdi, deb xabar beradi Kun.uz.

Davlat amaldorining sovg‘a olishi ham korrupsiya. Mahalla raisi Rossiyada ishlayotgan muhojirni ro‘yxatga tirkab, “kambag‘al” o‘g‘liga jo‘ja berdi. Joriy hafta matbuot shu kabi voqealar haqida xabar berdi.

Davlat amaldorlarining sovg‘a olishi korrupsiya alomati ekani eslatildi

Korrupsiyaga qarshi kurashish agentligi direktori Akmal Burhonov tanish-bilishchilik va manfaatlar to‘qnashuvi haqida gapirdi (www.xabar.uz, 5 sentabr).

“Rivojlangan mamlakatlarda har bir davlat idorasi va xususiy tashkilotda manfaatlar to‘qnashuvining aniq tushunchasi mavjud. Bizda hamma narsa aralashib ketgan – tanish-bilish ham, manfaatlar to‘qnashuvi ham, biz o‘zimiz hali oxirigacha chegara qayerda o‘tganligini to‘liq anglab yetmaganmiz. Afsuski, barchamiz “tanish-bilish” bu mentalitet deymiz. Ammo madaniyatimiz va urf-odatlarimizni davlat xizmati bilan adashtirmasligimiz kerak”, - degan u.

Qayd etilishicha, hatto yangi tashkil etilgan agentlikka ishga qabul qilish borasida ham yuqori amaldorlardan “falonchini ishga oling” degan mazmunda ko‘plab qo‘ng‘iroqlar bo‘ldi. Agentlik rahbari hukumat amaldorlariga sovg‘a berish holatini ham izohlagan.

“Bizda turli sabablar bilan sovg‘alar berish holati ko‘pincha hukumat amaldorini o‘z tomoniga og‘dirish yoki pora sifatida qabul qilinmaydi. Chet mamlakatlarda esa, agar davlat xizmatchisi kimdirdan sovg‘a oladigan bo‘lsa, bu holda sovg‘a beruvchi unga bo‘ysunuvchi yoki undan bog‘liq bo‘lishi shart emas, bu holat lavozim suiiste’moli sifatida korrupsiya holatiga tekshirish uchun sabab hisoblanadi”, - degan A.Burhonov.

Agentlik rahbariga ko‘ra, yetarli bo‘lmagan ochiqlik va ma’lumotning yo‘qligi, fuqarolik jamiyati ishtirokining yetishmasligi hamda jazosiz qolish hissi korrupsiyaga yo‘l ochuvchi omillar bo‘lib qolmoqda.

“1000 ta jo‘ja spektakli”: rais ishdan olindi, prokuror harakatiga baho berilganicha yo‘q

Samarqand viloyati Pastdarg‘om tumani Qo‘qoni mahallasi raisi va tumani prokurori “1000 ta jo‘ja spektakli”ni namoyish etishdi, deb xabar beradi Kun.uz.

Mazkur nashrda kambag‘al oila farzandi bo‘lgan Doston Tirkashev ismli yigitcha tadbirkorlikni boshlashi uchun mahalla raisi Husniddin Tursunov hamda tuman prokurori tomonidan ko‘mak berilgani haqida maqola e’lon qilingan. Yigitning otasi Rossiyada mehnat muhojirotida ekani aytilgan.

Ammo ko‘p o‘tmay mas’ullar yolg‘on ma’lumot bergani, kambag‘al oila vakili deya ko‘rsatilgan D.Tirkashev aslida mahalla raisi H.Tursunovning farzandi ekani ma’lum bo‘lgan.

“Sektor rahbari bo‘lmish prokurorlarning ko‘z oldida qo‘yilayotgan bunaqa spektakllar odamlarning ishonchi yo‘qolishiga, davlat tomonidan olib borilayotgan islohotlarning shubha ostida qolishigagina xizmat qiladi, xolos” , - deb izohlagan Kun.uz nashri ushbu holatni.

Ushbu maqola chop etilishi ortidan mahalla va oilani qo‘llab-quvvatlash vaziri Rahmat Mamatov Qo‘qoni mahallasiga borib yig‘ilish o‘tkazgan.

Pirovardida mahalla raisi H.Tursunov o‘z arizasiga ko‘ra lavozimidan ozod etilgan. Tuman mahalla va oilani qo‘llab-quvvatlash bo‘limi boshlig‘i M. Sanaqulovaga hayfsan berilgan.

“Spektakl”dagi bosh rol ijrolaridan biri tuman prokurori xatti-harakatiga hali baho berilganicha yo‘q. Xabarlarga ko‘ra, bosh prokuratura holatni o‘rganmoqda.

Avariyada nobud bo‘lgan bolaning otasi YTH yuz bergan joyga yo‘l belgisi o‘rnatdi

Avariya oqibatida nobud bo‘lgan ikki yoshli bolaning otasi Yevgeniy Chexovskiy yo‘l-transport hodisasi yuz bergan joyga yo‘l belgisi o‘rnatdi (www.gazeta.uz, 9 sentabr).

24 avgust kuni taxminan soat 01:10 da Yunusobod tumani Yunusota ko‘chasida Cobalt avtomobili haydovchisi, 31 yoshli Tohirxo‘ja A. piyodalarning tartibga solinmagan o‘tish joyidan onasi bilan o‘tayotgan yosh bolani urib yuborgan.

Bolakay 24 avgust kechasi jarohatlar oqibatida kasalxonada vafot etgan. Bolaning onasi avtomobil zarbasidan keyin jiddiy jarohatlangan.

Rasmiy xabarga ko‘ra, YTHni sodir etgan haydovchi Toshkent shahar IIBB sobiq xodimi bo‘lib, u avariyadan to‘rt kun avval – 20 avgust kuni tizimdan bo‘shatilgan edi.

YTHdan ikki hafta o‘tgach, vafot etgan bolaning otasi Yevgeniy Chexovskiy hodisa sodir bo‘lgan joyga piyodalar o‘tish joyini ko‘rsatuvchi yangi belgi o‘rnatishga qaror qildi. Shuningdek, u “O‘zavtoyo‘lbelgi” korxonasi vakillarining yordami bilan deyarli o‘chib ketgan piyodalar o‘tish chizig‘ini yangiladi.

“Agar biz o‘zimiz kirishmaganimizda, buni hech kim qilmagan bo‘lar edi. Na mahalla, na tuman IIB xodimlari va na shahar yo‘l harakati xavfsizligi boshqarmasi... Hech kim kelib, belgini yangilashni xohlamadi” , - degan Yevgeniy Chexovskiy.

Uning fikricha, tartibga solinmagan o‘tish joyida svetofor bo‘lganda edi, YTHning oldini olishi mumkin edi. Endi u kelajakda yuz berishi mumkin bo‘lgan o‘limlarning oldini olish maqsadida mazkur joyga svetofor o‘rnatish uchun fuqarolarning imzosini yig‘moqda.

Алоқадор

XS
SM
MD
LG